یاشیل حرکاتی ایله باغلی گونئی آذربایجان میللی اویانیش حرکاتی (گاموح) نین بیلدیریشی

ایران آدلانان اؤلکه چئشیتلی میللتلردن اولوشور. بوگرچکه رغمن بو مملکته  حاکیم اولان  دؤولت  بو میللتلرین  یوخ، یالنیز فارس میللتین تمثیلچیسی دیر. بو حاکمیت ده تورک، تورکمن، بلوچ، کورد، عرب و باشقا میللتلرین پایی یوخدور. ایران اسلام جمهوریتی و کئچمیش ده پهلوی رئژیمی فارس میللتی نین توتالیتر رژُیمی اولموش، ایران آدلانان اؤلکه ده یاشایان بوتون میللتلره  استبداد و زوراکیلیقلا حکومت ائده رک، فارس اولمایان میللتلره ایسه استعمار و استثمار سیاستینی اویقولامیشلار. باشقا سؤزله، فارس اولمایان میللتلر یالنیز سیویل حاقلار دئییل،  استعمارین یاپدیغی آغیر ظولوملره معروض قالاراق، ان ایلکین و انسانی حاقلاریندان دا محروم قالماقدادیرلار. بو آرادا آذربایجان تورک میللتی و ایراندا یاشایان باشقا تورکلر (قاشقای، افشار، بیچاقلو و تورکمنلر) چوخونلوق اولدوقلاریندان و موباریزه لرینین گئنیش اولدوغوندان  دولایی آغیر ضربه لر گؤرموشدورلر.

هر زامان استبداد و استعمارا قارشی موباریزه لرده، اؤنجول اولوب، اؤنده گئدن آذربایجان قهرمان میللتینین پایی آنجاق وئردیی مینلر شهید، مینلر دوستاقلی و یارالارینین درینلشمه سی اولسادا، بو گون  او موباریزه لردن چوخ دیرلی تجروبه لر قازاناراق، گونئی آذربایجان میللی حرکتی آدلی بؤیوک و مقدس موباریزه نی  باشلامیشدیر. آذربایجان میللی حرکتی، آذربایجان میللتینین دانیلماز ائلچی سی اولاراق، مشروطه انقلابی، شیخ محمد خیابانی حرکاتی، آذربایجان میللی حکومتی، بهمن انقلابی  و جمهوری اسلامی دئورینین تجروبه لرینه دایاناراق، گونون اولایلارینا، اؤزللیکله یاشیل حرکاتینا تکجه آذربایجانین میللی منافعی یعنی میللی قورتولوش و موقددراتینی اؤزو بلیرلمک حاققینی الده ائتمه یی تمل سیاست و استراتژی کیمی توتماقدادیر. کئچن 9 آی دا، یاشیل حرکات آغیر هزینه لر وئرمه سی، چوخلو اینسانلارین توتوقلانماسی، ایشکنجه و اؤلدورولمه سینه رغمن، بو گونه کیمی فارس اولمایان میللتلر آراسیندا اؤزونه یئر آچابیلمه ییب، اوغور سوز اولدوغو گؤرونور. دئمک بو حرکات یالنیز تهران و بیر نئچه فارس شهر ده باش وئرمکده دیر.  

باشقا سؤزله قئیری فارس میللتلر، او جومله دن آذربایجان تورک میللتی، یاشیل حرکاتی نین ایچریده و دیشاریدا اولان رهبرلرینین وئردیی شوعارلار، یازیلار، بیاناتلار و چالیشمارلارینا (سئچکیلردن اؤنجه و سونرا، رسمی یا غیر رسمی شکیلده)  دیققت گؤستررک،، بو حرکاتی  حاکیم فارس دؤولتینین، فارسلارین میللی منافعی اوغروندا اولان (باشقا میللتلرین منفعتلرینی نظرده آلمایان)، رفورمچو حرکات کیمی دیرلندیریرلر کی بو گونه کیمی ده، ایران دا یاشایان میللتلرین پوزولموش حاقلارینینی گورمزدن گلمیشدیر.  بونا گؤره دیر کی یاشیل حرکاتینین قارشیسیندا سوسقونلوق استراتژیسینی سئچه رک،  اونلارلا ایش بیرلیک ائتمه میش و بو ایسه یاشیل حرکاتی نین بو گونه کیمی اوغور قازانا بیلمه دیینین ان اؤنملی ندنی اولموشدور.

ایران آدلانان اولکهده یاشایان میللتلر! موباریز و آزادلیق سئور انسانلار! یاشیل حرکاتی نین چالیشقانلاری و دستکچیلری!

 

اؤتن آیلاردا یاشیل حرکات لیدرلری و چالیشقانلارینین وئردیی بیر چوخ بیلدیری لره شاهید اولدوق، بو  بیلدیریلرده اورتاق اولاراق دئموکراسی، اینسان حاقلاری، سؤز و اینانج آزادلیغی و.... دن سؤز گئدیر. بو سؤزجوکلر بشریتین تاریخ بویونجا سوسیال یاشاییشدان الده ائتدیی ده یرلی قاوراملار اولدوقلاری حالدا، همان قدرده استعمارچیلار و دئسپوتلار وریندن سوء استفاده ائدیلمیشدیر. کئچن 100 ایلده بو سوء استفاده لری گؤرمک، باشقا طرفدن آذربایجان میللتینده میللی بیلینجین (شعورون) گلیشمه سی، سبب اولموشدور کی  یاشیل حرکت باشچیلارینین، هئچ بیر عملی فاکت اولمادان بو تور شوعارلاری، آذربایجان میللتی طرفیندن اولوملو قارشیلانمایاراق، همهشه کی تبلیغاتی، آلدادیجی و عوامچی شوعارلارین داوامیندا حئساب ائدیلسین. بو گونه کیمی یاشیل حرکتین باشچیلاری و مودافیعه چیلری آذربایجان میللی حاقلاری و باشقا فارس اولمایان میللتلرین حاقلارینا گؤره، تپکی گؤسترمه مکلری،  حتی بیر سیرا بو حرکته منسوب اولان شخص و قوروملارین شوونیستی شوعارلاری و آذربایجان خبرلری و تاریخینین ایلگیلی  رسانه لرده بایکوت اولوب، تحریف اولماسی، آذربایجان میللی حرکتینده، یاشیل حرکته قارشی اعتمادسیزلییین آرتماسینا ندن اولوب.

بونو بیلمه لی ییک کی، ایران اؤلکه سینده یاشایان چئشیتلی میللتلری نظرده آلمادان، اؤلکه- ایچی بین الملل ایلیشگیلرینده بو میللتلرین میللی حاقلارینی اؤزونده عکس ائتدیرن (میللی حاقلارینین تأمیناتچیسی اولان) بیر حقوق رژیمی اولمادان، آزادلیق و دئموکراسی دن دانیشماق، آذربایجان میللتینه گئدن استعماری استبدادی ظولملرین قالدیریلماسینا چؤزوم یولو اولابیلمز. عئینی حالدا یاشیل حرکات لیدرلری و دستکچیلری نین  بو حاقدا سوسماقلاری، اونلارین یئترینجه دئموکراتلاشمادقلارینی گؤستریر. اونلار ایران دا یاشایان مظلوم میللتلرین میللی حاقلارینی رسمیته تانیماقدا، فاشیست ارتجاع  ایله بیر سنگرده دورورلار.  

اینانیریق کی یاشیل حرکات لیدرلری و حیمایتچیلرینین آذربایجان میللتینین میللی حاقلارینا و دفعه لرجه چئشیتلی تریبونلار و کمپئینلر طریقی ایله ایسته نیلن ایستکلری قارشیسیندا اولوملو موضع لری بو موباریز میللتین الدن گئتمیش گوونجینی یئنی دن قازانماقدا بیر باشلانقیج اولابیلر.

قهرمان آذربایجان تورک میللتی

یاشیل حرکاتین اوغورسوزلوغونودا ائتکیلی اولان سیرالادیغیمیز چاتیشمازلیقلار و بوشلوقلارا رغمن، بو حرکت ایران ایسلام جمهوریتینی دئموکراتیزه ائتمک استقامتینده چابا گؤسترن حرکت دیر. بو حرکاتین ماهییتجه میللی حرکت دن فرقلی اولسادا، ایران حاکمیتینین دئموکراتیزه اولماسی، آذربایجان میللتینین میللی  حاقلارینا چاتماقدا هزینه لرینین آزالماسینا سبب اولابیلر، اینانجینداییق. آذربایجان میللتی غورورلو تاریخینده گؤستردییی کیمی، میللی موباریزهسینده گونو-گوندن ایرهلیلهیرک، بو موجادیلهده یارانان فورصتلردن باشاردیقجا قوللاناجاقدیر.

بوتون بونلارلا یاناشی، آذربایجان میللی اویانیش حرکاتی (گاموح) اولاراق، ایران اسلام جمهوریتی رژیمینین،  آزادلیق و دئموکراتیا اوغروندا تهران و بیر پارا شهرلرده اعتراض حرکتلرینی جلادجاسینا باسدیرماغینی، بو رژیمین چئشیتلی آراجلارلا میللتین دویغولاری و اینانجلاریندان کؤتو قوللانیملارینی، دین و مذهبی اویونجاق ائدیب، مظلوم میللتلرین ثروتلرینی سوموروب، بیر نئچه گون آرتیق  حکومت ائتمک اوچون هر ایشه ال آتماغینی قیناییب، کسینلیکله محکوم ائدیریک.

 

آذربایجان میللی اویانیش حرکاتی (گاموح) بؤلگه و ایران آدلانان اؤلکهده سیاسی دورومو، اؤزللیکله یاشیل حرکات اولایلارینی دیققتله آراشدیرماقدادیر و دورومون هانسیسا دییشیکلییی قارشیسیندا، آذربایجان تورک میللتینین میللی شعورونا دایاناراق، گرکن ایشلری یاپاجاقدیر.

یاشاسین ایراندا یاشایان مظلوم میللتلر

یاشاسین آذربايجان

 

آذربایجان میللی اویانیش حرکاتی (گاموح)- مرکزی کومیته

تبریز-  مارت 2010