آذربايجان فدرال دموکرات حرکاتى‌نين

فدرال ايرانين ميلّيتلرى کونگره‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌سيندن

آيريلماسى حقينده بيلديريش

 

١- آذربايجان فدرال دموکرات حرکاتى ايراندا ياشايان خالقلارين آرخاداشليغينا و البيرليگينه، آزادليق و دموکراسى‌يه چاتماغين آيريلماز ترکيب حيصه‌سى و شرطى کيمى، دريندن اينانديغينا گؤره خالقلارين دموکراتيک ايستکلرينى هرزامان مودافيعه ائديب و اوغروندا موباريزه ائتميشدير.

۲ - فدرال ايرانين ميلّيتلرى کونگره‌سينده، [ کنگره ملیت های ایران فدرال] قورولدوغو اون ايلدن يوخارى مدتده، تشکيل ائدن اعضاسى‌نين چئشيتلى ترکيبينه گؤره و کنگره‌نين تصويب ائتديگى اوصول ايله موغايير اولماماق شرطى ايله، مستقل سياست گؤتورمه‌لرينده فردى استقلال‌لا صاحيب اولمالارى اوزوندن، عملده بير بيرينه اويمايان سياستلر کنگره‌ده حاکيم اولموش ايدى. اوسياستلردن بير پاراسى ايله آياقلاشماميز و اعضادان بيرپاراسى‌نين سياسى کاراکتر داشييان تماسلارا گيرمه‌سى و آپارديقلارى بيرپارا سياستلر ايله آياقلاشماماميز آيديندير.

۳ - ايندى کنگرهنين آپارديغى سياستلرده بير بؤيوک دؤنوش گؤزؤموزون قاباغيندادير. بيزجه بو سياسى دؤنوش ايرانين آزادليق و دموکراسى‌يه سارى حرکتى آماجى‌نين و خالقلارين منافعى‌نين ترسينه گئدير، بيز اونو اؤز پلاتفورم و اوصولوموزا موغايير بيليريک.

۴ - دموکراتيک ايران اوغروندا آدلى سونکو بيلديريشيميزده اعلان ائتديگيميز کيمى سعودى عربيستانى، ياريم عصردن يوخارى، بؤلگه‌نين ايرتيجاعچى سياستلرى‌نين و بير سيرا عرب اؤلکه‌لرى‌نين داغيديلماسى‌نين اساس مرکزى‌ اولموشدور

۵- تاسوفله ايران کوردوستانى دموکرات پارتياسى‌‌نين سون واختلاردا سعودى عربيستانا ياخينلاشماغا گؤره ائتديگى حرکتلر، و اونون آرديجا ايگيرمى ايلدن سونرا ايراندا کوردلرين يئرلشديگى بؤلگه‌لرده سيلاحلى دؤگوشون يئنى دؤورونه باشلاماق، کورد خالقى‌نا هئچ نه قازانديرماياجاقدير و ايران خالقلارى‌نين دموکراتيک قايغولارينى اوياتماق ايله نتيجه‌لنمه‌يه‌جکدير. ترسينه اولاراق بو کوردلرين يئرلشديکلرى بؤلگه‌لرده خالق آراسيندا پانيک تؤره‌تمکله کوردوستاندا مدنى جمعيتين گليشمه‌سى‌نين و بوى آتماسى‌نين قاباغينى کسه بيلر.

۶ بيزجه اينديکى دورومدا، ايران کوردوستانى دموکرات پارتياسى‌نين ايران ايچينده سيلاحلى عمليات آپارماسى، آرتشين و پاسدارلارين اينقيلابدان سونراکى دؤورده ايرتجاعى يوروشو قارشيسيندا سيلاحلى ديرنيش و لگال ساييلان اؤزونو مودافيعه‌دن ماهيتجه‌سينه فرقلنير. بو دؤگوش، قورتولوش ساواشى، يا دموکراسى اوغروندا ووروشماق ساييلماز. يالنيز، بؤلگه‌ده آپاريلان وکالتى ساواشلارى‌نين بير تيکه‌سينده ايشتيراک ائتمکدير. بو ساواشلارين، ائولرى و تيکينتى‌لرى خرابه‌ليگه چئويرمه‌سى‌نين باشليجا مالى‌لشديرنى و اساس تمللريندن بيرى‌ سعودى عربيستانى‌دير. نتيجه‌‌سى ده يوزمينلر گوناهسيزاينسانين اؤلدورولمه‌سى و اوستونه گل ميليونلارجا عاييله‌سى داغيلميش ديدرگين دوشموشلردير. دوشمنيمين دوشمنى ضرورت اولاراق هر شرايطده و هريئرده منيم دوستوم دئگيلدير. ساييق اولمالى، چونکو تهلوکه ده ائله بورادا دالدالانيبدير.

۷ - خالقلارين آرخاداشليق و البيرليک ائتمه‌لرى اوزرينده دايانماقلا بيرليکده، کورد و آذربايجان خالقلارى‌نين اورتاق موباريزه‌لرى گله‌نکلرينى و تاريخينى اونوتمادان (گؤزدن قاچيرمادان)، فدرال ايرانين ميلّيتلرى کونگره‌سينده قالماغيميزا دوام ائتمگى سياسى پرنسيپلريميزين ترسينه بيليب و بونونلا دا رسمى اولاراق اورادان ديشارى چيخماميزى بيلديريک.

آذربایجان فدرال دموکرات حرکاتى

١٠ مهر ١٣٩٥ ١ اوکتيابر ٢٠١٦