اؤن‌ سؤز

ايچيندەکيلر

 

 

اؤن‌ سؤز. 3

سازلى - سؤزلو عاشيق‌ ياراديجيليغيميز. 64

آتالار سؤزو و مثللر. 94

دئييملر. 132

تاپماجالار ( بيلمۂجۂلر) 177

ماللانصرالدين لطيفه لرى.. 191

آذربايجان ائل ماهنيلارى.. 220

آپاردى سئللر سارانى. 224

گئديرم گولوستانا 226

آى قيز٬ جئيرانين اوللام 227

آى قيز سنه ماييلم 227

آى لاچين. 228

رسمرسوم 267

نورزو: نوروز بايرامى٬ ائل بايرامى٬ ايل بايرامى٬ باهار بايرامى٬ يئنى ايلين باشلانديغى گون 273

ياراديليش.. 288

انسانين دونيايا گلمۂسى و حياتى بارە ده 291

دوغوم 295

اوشاق دۆشورمک ( سالماق) 296

بويلو آروادلارين قورونماسى. 297

يئريکلمه. 297

اوغلان يوخسا قيز؟. 298

اوشاق گرکليکلرى (سيسمونى) هديه. 299

اوشاق سالما 300

دوغوم 301

زاهىنين آلتيسى. 302

تايا (دايه) 304

قولاق دلدى.. 305

کسديرمه (ختنه) 305

قوربانليق. 306

آد قويما 307

زاهى حامامى. 308

اؤلوم 308

ناغيللار. 313

درباره قصه ها و افسانه هاى آذربايجان. 315

کئچينين ناغيلى. 320

اووچو پيريم و ايلانلار پادشاهى. 323

باجىقارداش و ديو. 326

مليک جميلين حکايه سى. 329

دونيا گؤزلى. 333

لوغمان حکيم 338

قارا چوخا 342

هر نه تؤکسن آشينا٬ اودا چيخار قاشيغينا 344

پادشاهلا اوغلو. 350

سئحرکار پادشاه و سئحرکار وزير. 353

صمد بهرنگى و بهروز دهقانى نين آنا ديلينده توپلاديقلاری آذربايجان ناغيللاری اوزۂرينده چاليشمالاری 356

.

حلالزاده قردش ايله حرامزاده قردش.. 359

حاجی صياد قيزی.. 362

يئددی قيز دده سی٬ يئدی اوغلان دده سی. 367

اينام و اينانيشلار. 372

آندلار. 372

اينانيشلار. 376

دعالار. 385

قارقيشلار. 393

 

 

 

 

 

 

اؤن‌ سؤز

 

پهلوي‌ رژيمي‌ حاكيميتي‌ ايللرينده‌ گونئي‌ آذربايجان‌ فولكلورونو توپلاما،آراشديرما و نشري‌ مسأله‌لرى

هر خلقين‌ فولكلورو٬ او خلقين‌ ميللى - تاريخي‌ وارليغيني‌ اؤزونده‌ گؤسترن‌ ان ‌صاف‌ گوزگوسو ساييلان‌ و اونون‌ معنوي‌ - مدني‌ دونياسيني‌ نوماييش‌ ائتديرن ‌توكنمز ائل‌ خزينه‌سيدير. بيز بو صاف‌ گوزگو و بو توكنمز خزينه‌ده‌ خلقين‌ تاريخي ‌اينكيشافيني‌، ميللى - پسيكولوژيك‌ وارليغيني‌، دوغما ديليني‌، عادت‌ وعنعنه‌لريني‌ ان‌ قديم‌ عصرلردن‌ باش‌ آليب‌ گلن‌ اينانجيلاريني‌ و بير سؤزله‌ اونون‌ مادى‌-معنوى‌ اينكيشاف‌ ايزلرينى‌ گؤروروك‌.

بونا گؤره‌ ده‌، بير خلقي‌ دريندن‌ تانيماق‌ و اونون‌ مادي‌ - معنوي‌ وارليغيني ‌دريندن‌ اؤيرنمك‌ اوچون‌، او خلقين‌ فولكلورونو و خلق‌ ياراديجيليغيني ‌منيمسه‌مك‌ و اؤيرنمك‌ لازيمدير. بير خلقين‌ فولكلورو و خوصوصيله‌ اونون‌هاميدان‌ گئنيش‌ و رنگارنگ‌ ساحه‌سى اولان‌ شيفاهي‌ خلق‌ ادبياتينا يول‌ تاپماقلا او خلقين‌ بوتون‌ اتنيك‌ علامتلرينه‌، ميللى و پسيكولوژيك‌ خوصوصيتلرينه‌،تاريخي‌ قهرمانليقلارينا، دويغو و دوشونجه‌ اينجه‌ليكلرينه‌، بديعي‌ - فلسفي ‌دونيا باخيشلارينا، ياراتديقلاري‌ و ياشاتديقلاري‌ ديريليك‌ قايدا - قانونلارينا،ايستكلرينه‌، آرزولارينا و كدرلرينه‌ يول‌ آچير و بئله‌ليكله‌ ده‌ او خلقي‌ داها دريندن‌ تانيماق‌ ايمكانلاريني‌ ال اؤنونده قويور.

آذربايجان‌ خلقي‌ چوخ‌ قديم‌ تاريخا‌ ماليك‌ اولدوغو كيمي‌، اولدوقجا زنگين‌ وچوخ‌ ساحه‌لي‌ خلق‌ ياراديجيليغي‌ و ائل‌ ادبياتينا آرخالانير. بو خلقين‌ تاريخين‌درينليكلريندن‌ باش‌ آليب‌ گلن‌ ميللى - مدني‌ وارليغي‌ هر شئيدن‌ اول‌ اونون ‌فولكلورو و خلق‌ ياراديجيليغي‌ ايله‌ سسلنميشدير. تاريخ‌ بويونجا خلقين ‌ايگيدليك‌ و اينسان‌ سئورليك‌ روحونو اؤزونده‌ عكس‌ ائتديرن‌ بؤيوك ‌داستانلاردان‌ توتموش‌، تا خلقين‌ دويغو و دوشونجه‌ اينجه‌ليكلريني‌ گؤسترن ‌ييغجام‌ و عين‌حالدا دولغون‌ ائل‌ سؤزلرينه‌ قدر، ائلين‌ دوغما سيماسيني‌ ومعنوي‌ ثروتيني‌ اؤزونده‌ ياشاتميشدير.

بيزده‌، بير چوخ‌ خلقلرده‌ اولدوغو كيمي‌، يازيلي‌ ادبيات‌ گاهدان‌ اؤزونو باشقا ديلده‌ و يا باشقا اوسلوبدا گؤسترسه‌ ده‌، خلق‌ ياراديجيليغي‌ اؤزونو تكجه‌ دوغما ديلده‌، دوغما روحدا٬ دوغما اوسلوبدا و دوغما اؤلچولرده‌ گؤسترميشدير. بونا گؤره‌ ده‌ آذربايجان‌ فولكلورو و شيفاهي‌ خلق‌ ادبياتي‌ تاريخ‌ بويو ميللى وارليغين‌ وميللى روحون‌ ان‌ قودرتلي‌ تمثيلچيسي‌ و آذري‌ سويداشلاري‌نين‌ توپلوم‌ يا داغينيق‌ حالدا، جنوبدا، شيمالدا يا هر يئرده‌ ياشاديقلارينا باخماياراق‌، معنوي ‌وارليغيني‌ ترنوم‌ ائدن‌ ان‌ گوجلو واسيطه‌سي‌ اولموشدور.

۱۹-جو عصرين‌ بيرينجي‌ ياريسيندا تاريخين‌ اوغورسوز حاديثه‌لري‌ نتيجه‌سينده‌ واحيد آذربايجان‌ اؤلكه‌سي‌نين‌ ايكي‌ يئره‌ پارچالانماسي‌ و ديلي‌،ديني‌، تاريخي‌، مدنيتي‌ و فولكلورو عئيني‌ اولان‌ بير خلقين‌ ايكي‌ پارچايا بؤلونمه‌سي‌ و ايكي‌ آيري‌-آيري‌ سياسي‌ ايجتيماعي‌ رژيمده‌ ياشاماق‌ مجبوريتينده‌ قالماسي‌ و اؤلكه‌نين‌ قان‌ دامارلاريندان‌ بيري‌ ساييلان‌ آراز چايي‌نين‌ حؤكومت‌ سرحدي‌ كسيلمه‌سي‌ و بئله‌ليكله‌ ده‌ اؤلكه‌نين‌ شيمالي‌ آذربايجان‌ وجنوبي‌ آذربايجان‌ آدي‌ ايله‌ بير-بيريندن‌ فرقله‌نن‌ طالعلره‌ اوغراماسي‌ باش‌وئرميشدير. بو سارسيديجي‌ و اوزون‌ ايللرده‌ بو آيري‌-آيري‌ طالعلره‌ اوغرايان‌ايكي‌ قارداش‌ اؤلكه‌ اولدوقجا موركب‌ سياسي‌-مدني‌ حيات‌ كئچيرديكلري ‌حالدا، شيمالي‌ آذربايجاندا ديل‌ و ميللى-بديعي‌ ادبياتلا باغلي‌ بوتون‌ ساحه‌لرده ‌تاريخي‌-علمي‌ اهميته‌ لاييق‌ بير چوخ‌ ايشلر گؤرولدوگو كيمي‌، آذربايجان ‌فولكلورو و خوصوصيله‌ اونون‌ ان‌ سانباللي‌ و زنگين‌ حيصه‌سي‌ ساييلان ‌آذربايجان‌ شيفاهي‌ خلق‌ ادبياتي‌نين‌ توپلانماسي‌، آراشديريلماسي‌ و نشري‌باره‌ده‌ اولدوقجا گئنيش‌ و هرطرفلي‌ ايشلر گؤرولموشدور. بو خوصوصدا گؤرولن ‌ايشلر سيراسيندا آذربايجان‌ علملر آكادميياسيندا فولكلور شؤعبه‌سي‌نين ‌يارانماسي‌، علمي‌-تدقيقي‌ فولكلورچولوقدان‌ اونيورسيته‌لرده‌ درس‌كئچيريلمه‌سي‌ و يوزلرله‌ فولكلور مجموعه‌لري‌ و يا فولكلور آراشديرمالاري ‌باره‌ده‌ چيخان‌ كيتابلار، ريساله‌لر و مقاله‌لردن‌ اساس‌ نومونه‌لر كيمي‌، آد چكمك‌اولار.

شيمالي‌ آذربايجاندا آپاريلان‌ بو تدقيقي‌ ايشلرين‌ عكسينه‌ اولاراق‌، جنوبي ‌آذربايجاندا بو ساحه‌ده‌ گؤرولن‌ ايشلر بير سيرا دورغونلوقلاردان‌ و داريسقالليقلاردان‌ آسيلي‌ اولاراق‌، اولدوقجا سئيرك‌، آرابير، گليشي‌ گؤزل‌ ودئمك‌ اولار كي‌، شيمالي‌ آذربايجاندا گؤرولموش‌ ايشلرله‌ موقاييسه ‌ائديله ‌بيلميه‌جك‌ درجه‌ده‌ آز و اؤنمسيز اولموشدور.

هئچ‌ شوبهه‌ يوخ‌ كي‌، جنوبي‌ آذربايجانين‌ بو كيمي‌ ساحه‌لرده‌ دالا قالماسي‌نين ‌سببي‌ پهلوي‌ رژيمي‌نين‌ يوروتدوگو آشيري‌ ناسيوناليزم‌ و آسيميلاسيا سياستي ‌اولموشدور. اؤلكه‌ني‌ ايراندا ياشايان‌ خلقلرين‌ زيندانينا چئويرن‌ و امپرياليستلرين ‌ال‌ اؤرگنجه‌يي‌ اولان‌ پهلوي‌ حاكيميتي‌ بير گون‌ واحيد و موتمركيز حؤكومت‌ وبير گون‌ آغ‌ اينقيلاب‌ عونواني‌ آلتيندا ياراتديقلاري‌ دؤزولمز ديسپوتيزم ‌شرايطينده‌ خلقلري‌ اؤز دوغما ديللريندن‌، اتنيك‌ -پسيكولوژيك ‌وارليقلاريندان‌، آداب‌، عنعنه‌ و اينانجيلاريندان‌ اوزاقلاشاراق‌ ضيد خلقي ‌شووينيزم‌ ايديالارينا بولاشيب‌ قالماق‌ كيمي‌ سوغاتلار گتيريرديلر.

بئله‌ليكله‌ ده‌ بوتون‌ بو ايللرده‌ آذربايجان‌ ديلي‌نين‌، ادبياتي‌نين‌، مطنوعاتي‌نين‌ وبير سؤزله‌ آذربايجان‌ ميللى‌-مدني‌ وارليغي‌نين‌ ياساق‌ اولدوغو شرايطده‌ بوميللى وارليغين‌ ان‌ گئنيش‌ و كوتلوي‌ ساحه‌سي‌ ساييلان‌ خلق‌ ياراديجيليغي‌ محصوللاريني‌ توپلاماق‌، آراشديرماق‌ و نشر ائتمك‌ مسأله‌سي‌ اؤز يئرينده ‌قالسين‌، حتي‌ آناديلي‌، خلق‌ وارليغي‌، خلق‌ ادبياتي‌ و خلق‌ اينانجيلارى كيمي ‌سؤزلرى آغيزا آليب‌ دانيشماق‌ بئله‌، باغيشلانماز گوناه‌ ساييليردي‌.

آذربايجان‌ ديلينده‌ هئچ‌ جور كيتاب‌ و مطبوعاتين‌ نشرينه‌ ايمكان‌ وئرمه‌مك‌ ويئري‌ گلينجه‌ ده‌ بو ديلده‌ چيخان‌ كيتابلاري‌ آرادان‌ قالديرماغا و يا ييغيشديريب ‌يانديرماغا ال‌ آتماق‌، بوتون‌ تبليغاتي‌ شيوه‌لردن‌ فايدالاناراق‌ شوونيزم ‌اويدورمالارينا قاپيلماقلا آذربايجان‌ ديليني‌ تحقير ائتمك‌ و اونو بو اؤلكه‌ ده ‌نسيلدن‌ نسيله‌ ياشايان‌ خلقين‌ دوغما و اتنيك‌ ديلي‌ كيمي‌ يوخ‌، بلكه‌ بيرتحميلي‌ و سونرادان‌ گلمه‌ كؤچريلرين‌ و چوبانلارين‌ ديلي‌ قلمه‌ وئرمك‌، بيرپارا عاليم‌ و تدقيقاتچي‌ آدي‌ داشييان‌ كيمسه‌لرين‌ قلمي‌ ايله‌ يازيلان‌ وانجمن‌ آثار ملي‌ و موقوفات‌ رضا افشار كيمي‌ يارديمچي‌ اورقانلارين ‌يارديمي‌ و موباشيرتي‌ ايله‌ بوراخيلان‌ كيتابلاردا آذربايجانا قوندارما تاريخي ‌هؤويّت‌ يونتالاماق‌ و آذربايجان‌ ديليني‌ ضابيطه‌سيز - قايداسيز بير لهجه‌آدلانديرماق‌ و چكينمه‌دن‌ بو ايشه‌ تام‌ ياريم‌ عصير (پهلوي‌ رژيمي‌نين‌قورولوشوندان‌ باشلاميش‌ ۱۳۵۷نجى ايل حرکاتىنين غلبه‌ چالديغي‌ گونه‌ قدر)دوام‌ ائتديرمك‌، آذربايجان‌ خلقي‌ علئيهينه‌ آپاريلان‌ آچيق‌ آسيميلاسياچيليقدان ‌باشقا نه‌ آد وئرمك‌ اولار؟

پهلوي‌ حاكيميتي‌ ايللرينده‌ بو آچيق‌ آسيميلاسياچيليق‌ سياستيني‌ يورودن‌ عاميللرين‌ تشبوثلريندن‌ سايسيز - حسابسيز فاكتلار گتيرمك‌ اولار. بورادا فورصتين‌ آز اولدوغوندان‌ بيز يوخاريدا آديني‌ چكديگيميز موقوفات‌ دكترمحمود افشارين‌ قوروجوسو تانينان‌ همين‌ دوكتور جنابلاري‌نين‌ زبان‌ ديرين ‌آذربايجان‌ - آذربايجانين‌ قديم‌ ديلي‌ - عونوانلي‌ كيتابا يازديغي‌ باشليقدان‌آشاغيداكي‌ سؤزلري‌ نقل‌ ائديريك‌: بوگون‌ آذربايجاندا و زنجاندا دانيشيلان‌ توركو يابانجي‌ اولوب‌، ايستيلاچي‌ سلجوق‌ توركلري‌، مونغوللار، تاتارلار،آق‌قويونلولار و قره‌قويونلولار واسيطه‌سيله‌ بو اؤلكه‌لره‌ تحميل‌ ائديلميشدير.ايرانين‌ ايستيقلال‌ و ميللى بيرليگيني‌ قوروماق‌ و ميلتين‌ اساسلاريني‌ بركيتمك ‌اوچون‌، واحيد عومومو - ميللى بير ديلين‌ ضرورو اولدوغو خاطيره‌ بو آراييشدا هرنه‌ اليميزه‌ چاتسا و ايجازه‌لي‌ اولساق‌ اونون‌ چاپ‌ و نشرينه‌ ايقدام ‌ائده‌جه‌ييك‌ (زبان‌ ديرين‌ آذربايجان‌ - پژوهش‌ و نگارش‌ دكتر منوچهرمرتضوى‌ موقوفات‌ دكتر محمود افشار يزدي‌، شماره‌ ۱۲، تهران‌ ۱۳۶۰)ش‌

منيم‌ آنادان‌ اولدوغوم‌، مكتبه‌ گئتديگيم‌، بويا - باشا چاتديغيم‌ و بير سؤزله ‌عؤمرومون‌ ان‌ آزي‌ اللي‌ ايلي‌ بو آسيميلاسياچيليق‌ و زوراكيليق‌ ايللرينده‌ باشا چاتميشدير. من‌ ده‌ مينلر و ميليونلار آذربايجانلي‌ وطنداش‌ كيمي‌ اؤز آنا ديليمده ‌درس‌ آليب‌ بو ديلين‌ دوغماليغيني‌، اينجه‌ليكلريني‌ و آل- الوانليقلاريني ‌اؤيرنيب‌ منيمسه‌مك‌ عوضينه‌ اونون‌ تحقير ائديلمه‌سي‌نين‌ و آرادان ‌قالديريلماسي‌نين‌ شاهيدي‌ اولموشدوم‌. بو سارسيديجي‌ چكيشمه‌لرده ‌ياديرقايانلار و سارسيلانلار اولدوغو كيمي‌ آياق‌ ديره‌ينلر و سارسيلمايانلاردا اولموشدور. من‌ ده‌ باشدان‌ كئچيرديگيم‌ ايجتيماعي‌ - سياسي‌ شراييط‌ نه‌ قدرآغير و دؤزولمز اولورسا دا بو ايكينجي‌ جرگه‌ده‌ اولانلاردان‌ بيري‌ كيمي‌ آناديليمه‌ گووننلردن‌، اونو اؤيرنمگه‌ جان‌ آتانلاردان‌، اونو مودافيعه‌ ائديب‌ قورويانلاردان‌ بيري‌ اولموشام‌.

 

ايلكين‌ تانيشليقلار: آنا قوجاغى‌، عاييله‌ اوجاغى

هاچان‌ آذربايجان‌ شيفاهي‌ خلق‌ ادبياتيندان‌ و منيم‌ بو ادبياتين‌ توكنمزخزينه‌سيله‌ نئجه‌ تانيش‌ اولوب‌ آشناليق‌ قاتديغيمدان‌ سؤز دوشنده‌، هر شئيدن ‌اول‌، ايستر - ايستمز، ايختياري‌ اولمادان‌، يئتميش‌ ايلين‌ آرديندان‌، كئچميشين ‌دومانلي‌-چيسكينلي‌ يوللارينا بويلانيرام‌. عؤمرون‌ درينليكلرينه‌ جومورام‌ وقولاق‌ آسيرام‌. آنامين‌ حزين‌ و نيسكيللي‌ سسله‌ كؤرپه‌لرينه‌ اوخودوغو لايلالاري ‌و نازلامالاري‌، گئجه‌لر بيزلري‌ قانادلارينا آليب‌ پريلر دونياسينا آپاران‌ ناغيللاري‌،ايش‌ گؤره‌ - گؤره‌ زمزمه‌ ائتديگي‌ باياتيلاري‌، خلق‌ ماهنيلاري‌ و عاشيق ‌قوشمالاري‌ و اونون‌ آردينجا آتامين‌ تمكينلي‌ سسله‌ آرا بير سؤيله‌ديگي‌ ائل‌ سؤزلري‌ و گونده‌ليك‌ حياتدا باش‌ وئرن‌ هر بير حاديثه‌يه‌ ياراشديرديغي‌ بير لطيفه ‌قولاقلاريمدا سسله‌نير و جانيما ياييلير.

منه‌ ائله‌ گلير كي‌، بو ايلكين‌ و دوغما تانيشليغي‌ داها دا جانلي‌ صورتده‌ گؤسترمك ‌ اوچون‌، ايللر اول‌ وارليق‌ مجله‌سينده‌ آپارديغيم‌ آنا ديليميز و ميللىوارليغيميز اوغروندا خاطيره‌لر دفتريندن‌ موصاحيبه‌دن‌ بو اوزاق‌، لاكين‌ ياددان‌ چيخماز اولفت‌ ايله‌ ايلگيلي‌ سؤزلري‌ دينله‌مك‌ داها دا يئرلي‌ اولاجاق‌.

آنامدان‌ خاطيره‌لر:

منيم‌ آنا ديليميز و ميللى وارليغيميزين‌ هاميدان‌ پارلاق‌ وصاف‌ آيناسي‌ اولان‌ خلق‌ ادبياتيميزين‌ گئنيش‌ و رنگارنگ‌ دونياسيلا ايلك ‌تانيشليغيم‌ آناملا اولموشدور. آنام‌، منه‌ تكجه‌ دوغما ديليميزي‌ اؤيرتمكده‌ يوخ‌،بلكه‌ بير آز بويا-باشا چاتينجا و ايستيني‌ - سويوغو قانينجا ديليميزين‌ سؤزخزينه‌سينه‌ يول‌ تاپماقدا ايلك‌ موعليميم‌ اولموشدور. آنامين‌ بيري‌بيري‌نين‌ آردينجا دونيايا گؤز آچان‌ كؤرپه‌ قارداشلاريما سؤيله‌ديگي‌ شيرين‌ لايلالاري‌ واوخشامالاري‌، يوخسوللوغون‌ دؤزولمزليگي‌ و ياشاييشين‌ چتينليكلري‌ ايله ‌سس‌-سسه‌ وئرن‌ نيسكيللي‌ باياتيلاري‌ و گؤز ياشاريديجي‌ آغيلاري‌، بير چوخ ‌حاللاردا ايش‌ باشيندا، فرش‌ توخوياندا يا ايپ‌ اييرنده‌ حزين‌ - حزين‌ زمزمه‌ ائتديگي‌ ماهنيلاري‌، هر سؤز باشي‌ سؤيله‌ديگي‌ معنالي‌ مثللري‌ و بونلارين ‌هاميسيندان‌ چوخ‌ اوزون‌ قيش‌ گئجه‌لرينده‌، كورسو باشيندا جوراب‌ توخويا -توخويا و يا ناخيش‌ تيكه‌تيكه‌ سؤيله‌ديگي‌ فوسونكار ناغيللاري‌ و افسانه‌لري‌ بوتانيشليق‌ و اولفتين‌ باشلانيشي‌ اولموشدور. (وارليق‌ مجله‌سي‌، بئشينجي‌ ايل‌،سايي‌ ۱۲)

آنام‌، عؤمؤر بويو درس‌ و كيتابدان‌ محروم‌ و يوخسوللوق‌ ايچينده‌ بؤيوموش‌ بيراوبالي‌ قيزي‌ ايدي‌. او حياتين‌ ايلك‌ چاغلاريني‌ قاراداغين‌ اوزاق‌ كندلرين‌بيرينده‌، چوبانلاردا ياشاميش‌ و جوان‌ ياشلاريندا باهاليق‌ تهلوكه‌سيندن‌ و اربابين ‌ظولموندن‌ جان‌ قورتارماق‌ اوچون‌، عاييله‌سيله‌ بيرليكده‌ تبريزه‌ كؤچموشدو.اونون‌ عاييله‌سي‌، يعني‌ آناسي‌، قارداشلاري‌ و باجيلاري‌ شهرده‌ ياشايا بيلمه‌ديكلري‌ اوچون‌ تازادان‌ كنده‌ قاييتميش‌، لاكين‌ آنام‌ ائولنديگينه‌ گؤره ‌تبريزده‌ قالمالي‌ اولموشدور. اونون‌ ياشاييشي‌ شهرده‌ بير درجه‌ ياخشيلاشسادا وكيشي‌سيندن‌ راضي‌ اولسادا، بو ديدرگينليك‌ اونون‌ اورگينده‌ ايزلر بوراخميش‌ واونو غوربت‌ يامان‌ شئيدير، آللاه‌ هئچ‌ كسه‌ گؤرستمه‌سين‌ دئيه‌ عؤمور بويو اينلتميشدي‌.

آنام‌ كيتابدان‌ - دفتردن‌ باش‌ آچماديغي‌ حالدا، سينه‌سي‌ توكنمز سؤز خزينه‌سي‌ايدي‌. او، عغله‌ سيغماز قدر ناغيل‌، دستان‌، متل‌، باياتي‌، تاپماجا، قوشماجا.گرايلي‌، آتالار سؤزو و داها نه‌بيليم‌ نه‌لر بيلردي‌. اونون‌ بو قدر كيتابلارا و دفترلره ‌سيغمايان‌ سؤزو كيمدن‌ و هاچان‌ اؤيرنيب‌ و نئجه‌ ياددا ساخلاديغي‌ هميشه‌ وهله‌ ايندي‌ ده‌ مني‌ دوشوندورون‌ بير مسأله‌ اولموشدور. اوللر فيكيرلشرديم‌ كي‌،شايد او. بونلاري‌ عاييله‌سيله‌ بيرليكده‌ كندده‌ ياشاديغي‌ ايللرده‌، آناسيندان ‌اؤيرنميشدي‌. آما وقت‌ ائله‌ گتيردي‌ كي‌، اونون‌ آناسيني‌، يعني‌ بؤيوك‌ ننه‌مي ‌بوباره‌ده‌ سيناديم‌. او بير چوخ‌ شئيلر بيلسه‌ ده‌، هئچ‌ قيزي‌نين‌ توپوغونا دا چاتمازدي‌. آنامين‌ اؤزوندن‌ سوروشاندا معنالي‌ - معنالي‌ گولومسه‌ييب‌ بوباياتيني‌ اوخوياردي‌:

 

آچديم‌، آچديم‌ گول‌ اولدوم‌،

بوي‌ آتديم‌ سونبول‌ اولدوم‌،

بير ديل‌ بيلمز قوشودوم‌،

اوخودوم‌ بولبول‌ اولدوم‌

او، دوغروداندا، عؤمورومده‌ تانيديغيم‌ خلق‌ شعريميزين‌ سينه ‌دفتر بولبوللريندن‌بيري‌ ايدي‌.

آنام‌، قانع‌ و دؤزوملو آدام‌ اولدوغو و ياشاييشين‌ هر جور چاتيشمازليق‌ وچتينليگينه‌ قاتلاشديغي‌ حالدا، غمين‌ - كدرين‌ چوخلوغوندان‌ بئزيكديگي‌ساعاتلاري‌ دا چوخ‌ اولاردي‌. كنده‌كي‌ ائليندن‌ - اوباسيندان‌ گؤزله‌نيلمز بير خبرآلماسي‌، اكينين‌ ياخشي‌ گلمه‌مه‌سي‌. قارداشي‌نين‌ مازندرانا فهله‌ليگه ‌گئتمه‌سي‌...تانيديغي‌، حتي‌ تانيماديغي‌ بير يازيغين‌ حقي‌نين‌ تالانماسي‌ يا آياغينا تيكان‌ باتماسي‌ و اونلارجا بو كيمي‌ حاديثه‌لر آنامي‌ كدرلنديرر و اوخودوغو باياتيلارا و آغيلارا غم‌ جالاردي‌. بئلنچي‌ وقتلر اونون‌ اورگينه‌ دومان‌ كؤچر واورك‌ يانيقلي‌ - يانيقلي‌ سيزيلداماغا باشلاردي‌.

آنامين‌ بو غملي‌ - كدرلي‌ ساعاتلاردا اوخودوغو باياتيلار و آغيلاردان‌ منده ‌سيلينمز تأثير بوراخيب‌، هله‌ ده‌ ياديمدا قالانلاردان‌ نئچه‌سيني‌ سيزين‌ اوچون‌اوخويورام‌:

 

باغا گيرديم‌ باغبانسيز٬

دوه‌ گؤردوم‌ سروانسيز

هامي‌يا درمان‌ اولدوم‌٬

اؤزوم‌ قالديم‌ درمانسيز

 

گل‌ گئدك‌ باش‌ بولاغا ٬

سويو سرخوش‌ بولاغا،

بيرين‌ سن‌ ده‌، بيرين‌ من٬

‌توكك‌ قان‌ ياش‌ بولاغا

 

چؤللرده‌ بوستان‌ اولدوم٬

‌ ديللرده‌ دستان‌ اولدوم‌

طالعيم‌ بد گتيردي٬

‌آشنادان‌، دوستدان‌ اولدوم‌

آنامين‌ يانيقلي‌ سسي‌ اوجالار- اوجالماز، ائوده‌ اولسئيديم‌، دينمز سؤيله‌مز بيربوجاغا سيخيليب‌ باشدان‌ آياغا قولاق‌ اولارديم‌. بيلمزديم‌ نه‌دن‌ سؤزلر جانيما ياتار، قلبيم‌ كؤورَلر و گؤزلريم‌ ياشالاردي‌...

بيز تبريزده‌ چاي‌ قيراغي‌ آدلانان‌ كاسيب‌ اوتوراغي‌ اولان‌ محله‌لردن‌ بيرينده‌ ياشارديق‌. بورادا ياشايان‌ آداملارين‌ چوخو ساواددان‌ - درسدن‌ محروم‌ ايش‌ وزحمت‌ آداملاري‌ ايديلر. محله‌ده‌ تك‌بير خيرداپاي‌ تاجيرلر و باغ‌ - باغات‌ صاحيبلري‌ ده‌ وارايدي‌. آنجاق‌ بونلارين‌ يوخسول‌ عاييله‌لر ايله‌ چوخ‌ گل‌ -گئتلري‌ اولمازدي‌. بورادا ياشايان‌ عاييله‌لرين‌ بير چوخلاري‌ كندده‌ ياشاييشين‌آغير اولدوغوندان‌ كؤچوب‌ شهره‌ گلميشديلر. بوناگؤره‌ ده‌ بورادا بير كنديستان‌ حال‌ -هاواسي‌ وار ايدي‌. بوردا آيدان‌ - ايلدن‌ بير توي‌ - دوگون‌ اولاندا٬ بعضاً كند عادتي‌ اوزره‌٬ عاشيق‌ چاغيرارديلار. ياخشي‌ ياديمدادير بو تويلارين‌ بيرينده‌ آنام ‌مني‌ ده‌ اؤزويله‌ آپارميشدي‌. آرا چوخ‌ قيشقيريق‌ ايدي‌. آما عاشيق‌ مجليسه‌ گيرجك‌ آرا سايخاشدى‌، سس‌ - كوي‌ كسيلدي‌. عاشيق‌ اول‌ حقدن‌ موراد ديله‌دي‌، اؤز اوستادي‌ عاشيق‌ ميزه‌يه‌ و بوتون‌ مجليسده‌كيلره‌ جان‌ ساغليغي‌ آرزولادي‌. بگه‌ (كوره‌كنه‌) و گلينه‌ تويوز موبارك‌، گونلريز بيري‌ - بيريندن خوش‌، اوجاغيز اوغوللو - قيزلي‌ اولسون‌، دئدي‌. سونرا سازي‌ سينه‌سينه‌ باسيب‌ اويناق ‌بير هاوا ايله‌ سؤزه‌ باشلادي‌.

 

دلي‌ كؤنول‌، نه‌ گزيرسن‌ ديوانا٬

بيوفا ديلبردن‌ سنه‌ يار اولماز.

دوز چيخماز ايلقاري‌، عهدي‌ پئيماني٬

‌هرجايى دا ناموس‌، غئيرت‌، عار اولماز٠٠٠.

ائله‌ بو سؤزلر قورتارار - قورتارماز من‌ اوجادان‌ آناما قيشقيرديم‌: آبا (آناما ائوده ‌آبا دئيه‌رديك‌) عاشيق‌ سنين‌ سؤزلريوي‌ اوخويور. آنام‌ و آناما ياخين‌ اوتورانلار بو سؤزي‌ ائشيدنده‌ هاميسي‌ گولوشدولر. ال‌ - آياغيمي‌ ايتيريب‌. برك‌ اوتانديم‌.اورادا دورماييب‌ تو دابانا قاچديم‌. آما قاچديغيمدان‌ پئشمان‌. آنام‌ داليمجا اوشاق‌ گؤندردي‌، لاكين‌ اوتانجيمدان‌ گئده‌ بيلمه‌ديم‌. آنام‌ ائوه‌ قاييداندان‌ سونرا دئدي‌: حئييف‌ اولدو قويوب‌ قاچدين‌. عاشيغين‌ سؤزو ده ‌گؤزل‌ ايدي‌، سازي‌ دا، عاشيق‌ نفسيني‌ حقدن‌ آلير، او بيزدن‌ اؤيرنمير، بيز اوندان ‌اؤيرنيريك‌.

آنام‌، ناغيلي‌ اولدوقجا ياراشيقلي‌ و يئرلي‌ - ياتاقلي‌ دئيه‌ردي‌. او بير چوخ‌ وقت ‌ناغيلا بو سؤزلر ايله‌ باشلاردي‌: بيري‌ وار ايدي‌، بيري‌ يوخ‌ ايدي‌، اينسانلارين ‌درد-غمي‌ چوخ‌ ايدي‌، اونلارين‌ بير دادينا چاتام‌ يوخ‌ ايدي‌...ناغيل‌ باشلار -باشلاماز من‌ گؤزلريمي‌ يومار، رؤيالارا قاپيليب‌، پريلرين‌ قانادلارينا ساريليب‌،سولئيمانين‌ خالچاسينا مينرديم‌...آنامين‌ دئديكلري‌ ياغ‌ اولوب‌ ويجودوما ياييلارو سيرقا اولوب‌ يادداشتيمدان‌ آسلاناردي‌...

آنام‌ خلق‌ داستانلاريندان‌ اصلي‌ كرمي‌، عاشيق‌ غريبي‌، امراهي‌، توفارقانلي‌عابباسي‌، كوراوغلونو، قاچاق‌ نبي‌ني‌ بوتون‌ آيرينتيلاري‌ ايله‌ سؤيلردي‌.

ايللر گئچدي‌، من‌ ياشا دولدوم‌، زمانلا دده‌ قورقود داستانلاري‌ ايله‌ تانيش‌اولدوم‌. گئجه‌لرين‌ بيرينده‌ داستانلاريندان‌ ديرسه‌ خان‌ اوغلو بوغاج‌ي‌ آناما اوخودوم‌ و دئديم‌:

- آنا، ياخشي‌ ديقت‌ يئتير، گؤر بوردا سنين‌ اوچون‌ آنلاشيلماز سؤز، صؤحبت‌ وارسا، منه‌ سؤيله‌. او درين‌ ديقتله‌ قولاق‌ آسدي‌ و داستان‌ قورتاراندان‌ سونراسؤيله‌دي‌:

-اوغول‌، بورادا هانسي‌ آنلاشيلمازليق‌ اولا بيلر؟ اورداكي‌ بوي‌ دا بيزيمدي‌،سوي‌ دا بيزيمدي‌، سؤز ده‌ بيزيمدي‌، آند - ايلقار دا بيزيمدي‌...

آنامدان‌ علاوه‌، منيم‌ ديليميزين‌ فولكلور و ادب‌ ساحه‌لري‌ ايله‌ تانيشليغيمدا آتامين‌ دا اؤنملي‌ تأثيري‌ اولموشدو. هر بير سؤزونو بير ائل‌ مثلي‌ يا تمثيلي‌ ايله آنلادان‌ كيشي‌، گاهدان‌ دا ياديمدا قالان‌ بو كيمي‌ تك‌ بئيتلره‌ ال‌ آتاردي‌:

 

گئچمه‌ نامرد كؤرپوسوندن‌، قوي‌ آپارسين‌ سئل‌ سني‌

ياتما تولكو دالداسيندا، قوي‌ يئسين‌ اسلان‌ سني‌!

زبسكه‌ آتش‌ آهيم‌ يانوب‌ شراره‌لنوب‌

يئتوبدي‌ چرخه‌، اودور، چرخ‌ اوزي‌ سيتاره‌لنوب‌!

سانما ازديكجه‌ فلك‌ بيزلري‌ ويرانليق‌ اولور،

اون‌ تمناسي‌ ايله‌ بوغدا دگيرمانليق‌ اولور...

اونون‌ ساوادي‌ آز اولسا دا، آذري‌ شاعيرلريندن‌ ياشيل‌ قابيقلي‌ دفتره‌ كؤچوردوگو شعرلر هله‌ ايندي‌ ده‌ گؤزومون‌ آلا تورانيندا جانلانير...

بئله‌ليكله‌ آنامين‌ و آتامين‌ بيرليكده‌ ائوده‌ - ائشيكده‌، گونده‌ليك‌ دانيشيقلاردا،شوخلوقلاردا، آتماجالاردا، فرش‌ كارخانالاريندا اوخونان‌ ترانه‌لر و گاهدان‌قرامافوندان‌ دينله‌ديگيم‌ ائل‌ ماهنيلاري‌، مكتبده‌ آنا ديليمده‌ درس‌ اوخومايابيلمه‌سم‌ ده‌، مني‌ بو ديلين‌ شيرينليگي‌ و اينجه‌ليگي‌ ايله‌ تانيش‌ ائدير و سونراكي‌قايغيلاريما و چاليشمالاريما بير تمل‌ داشي‌ اولور.

بو حقيقت‌، او آغير ايللرده‌، يازيب‌ ياراتماق‌ آرزوسيلا يانيب‌ ياخيلان‌ سؤزاوستادلاري‌نين‌ آيري‌ - آيري‌ اثرلرينده‌ ده‌ اؤزونو آچيق‌-آيدين‌ گؤسترميشدير،بونا چوخلو نومونه‌لر گتيرمك‌ اولار. بورادا نومونه‌ اولاراق‌ ب‌.ق‌.سهندين‌شعرلريندن‌ و باشقا يازيچي‌ و شاعيرلرين‌ اثرلريندن‌ فاكتلار نقل‌ ائتمك‌ يئرلي‌دوشر.

عاشيق‌ حوسئن‌ هرواخ‌. هاچان‌،

سازين‌ چاليب‌، اوخودوقجان‌:

بالا نرگيز، بالا نرگيز،

قول‌ بوينوما دولا نرگيز

دوداقلارين‌ خام‌ شكردير،

ديلين‌ باتيب‌ بالا نرگيز

شاختا، بوران‌، آجليق‌، حيرمان‌

سولدوردوغو نرگيزلرين‌

پيتالاري‌ قونچه‌لنر، اورگينه‌ اوميد دولار،

گونش‌ پارلار. نور النر

اوشاق‌ ايكن‌، كؤرپه‌ ايكن‌،

من‌ بو يورغون‌، ساري‌، سولغون‌

نرگيزلرين‌ بيريسي‌نين‌

قوجاغيندا بوي‌ آتميشام‌.

بو نغمه‌لر، زمزمه‌لر،

احساسيمين‌ تاياسيدير،

شعريمين‌ ده‌ ماياسيدير

اورگيمين‌ تئللريني‌

ازل‌ باشدان‌ سيزيلدادان‌

ايلهام‌ وئرن‌، بئشيك‌ اولان‌

قوپاريدير، آناسيدير.

 

خاطيريمه‌ گلر - گلمز

ايلهاميمي‌ بيلر - بيلمز،

ائللريمين‌ ياراتديغي‌

ياراداني‌ ياد وئريلمز،

هئچ‌ بير شاعير، هئچ‌ صنعتكار

نظيره‌سين‌ يازا بيلمز

قوشمالاردان‌ آلميشام‌ من‌.

كؤنول‌ سازين‌ - زورنالارين‌،

دؤهوللرين‌ گور سسيندن‌،

عاشيقلارين‌، اوزانلارين‌

كؤنول‌ آچان‌ نغمه‌سيندن‌

اؤيرَنيبن‌ چالميشام‌ من‌...

(ب‌.ق‌.سهند: قارداش‌ آندي‌)

 

جنوبي‌ آذربايجانين‌ فولكلور و خلق‌ ادبياتيندان‌ صؤحبت‌ گئدنده‌ بير اساس ‌مسأله‌ هئچ‌ زامان‌ اونودولماماليدير. بو اساس‌ مسأله‌ ده‌ وقتيله‌ آذربايجاندان ‌كؤچموش‌ و قرنلر بو اؤلكه‌نين‌ جوغرافي‌ سرحدلريندن‌ ديشاريدا ياشايان‌ آذري ‌سويلو كوتله‌لرين‌ فولكلورو و شيفاهي‌ خلق‌ ادبياتيدير. ايرانين‌ گئنيش ‌اراضي‌سيندا شرقدن‌ غربه‌ و شيمالدان‌ جنوبا يا داغينيق‌ حالدا، حتي‌ كؤچري‌قورولوشلار شكيلينده‌ يئرلشميش‌ بو تۆرک سويلو توپلوملار ساي‌ جهتدن ‌جنوبي‌ آذربايجانين‌ داخيلينده‌ يئرلشن‌ جمعيتدن‌ ايكي‌ قات‌ چوخ‌ اولماقدادير.بئله‌ كي‌، بو گون‌ تكجه‌ تهران‌ بؤلگه‌سينده‌ ياشايان‌ چوخ‌ ميليونلوق‌ سكنه‌نين ‌شوبهه‌سيز ياريسيني‌ آذربايجانليلار تشكيل‌ ائدير.

بو باخيمدان‌ چوخ‌ آيديندير كي‌، ايراندا توپلوم‌ يا داغينيق‌ حالدا ياشايان ‌آذربايجان‌ خلقي‌نين‌ ديلي‌، فولكلورو و ائل‌ ادبياتي‌ اولدوقجا وسعتلي‌ بيرخزينه‌ و رنگارنگ‌ بير لابراتوريادير. سيز آذربايجاني‌ تبريز، قاراداغ‌، اردبيل‌،خالخال‌، ميانا. اوروميه‌، مراغا، خوي‌، سولدوز بؤلگه‌لريندن‌ توتموش‌ تا زنجانا،همدانا، ساوه‌يه‌ و اورادان‌ كؤچري‌ حيات‌ سورن‌ قاشقاييلارا و او بيري‌ طرفدن‌ تا خوراسانين‌ داغ‌ باسارلارينا قدر و اورادان‌ تهران‌ دئييبن‌ ياييلميش‌ آذري‌ فولكلورو و خلق‌ ادبياتي‌ بوگونه‌ قدر ال‌ دگمه‌ميش‌ و هله‌ هئچ‌ زامان‌ يازي‌يا آلينماميش سايسيز-حسابسيز ترمينلر، مثللر، آتالار سؤزو، باياتيلار، بيلمه‌جه‌لر،قوشماجالار٬‌ لطيفه‌لر، ناغيللار، داستانلار و اونلارين‌ جوربه‌جور واريانتلاري‌ ايله ‌زنگيندير. سؤز يوخ‌ كي‌، بئله‌ بير گئنيش‌ ساحه‌ده‌ ياشايان‌ آذري‌ سويلو خلقلرين دوغما آداب‌ عنعنه‌لريندن‌، روسوم‌ مراسيملريندن‌، اعتيقاد و اينانجلاريندان ‌سؤز آچماق‌ اؤزو بير آيري‌ موباحيثه‌ اولا بيلر.

بورادا نومونه‌ اوچون‌ آذربايجاندان‌ چوخ‌ اوزاق‌ ايكي‌ بؤلگه‌دن‌: بيري‌ فارس ‌ايالتينده‌ فسا ماحالي‌نين‌ اميرحاجيلو، ديندارلو، آغ‌ جغالو، بيگ‌ اينانلو وساييره‌ كندلرينده‌ ياشايان‌ آذري‌ سويلو توركلرين‌ دؤردلوكلريندن‌ و ايكينجيسي ‌خوراسان‌ ايالتينده‌ دره‌ گز ماحاليندا يئرلشميش‌ آذري‌لرين‌ ائل‌ ترانه‌لريندن ‌بيريني‌ نقل‌ ائديريك‌:

فارس‌ فسا آذريلرى‌نين‌ دؤردلوكلريندن‌

 

۱- اوبه‌ميز كؤشدى‌ بوگون‌،

كؤرپودن‌ گئشدي‌ بوگون‌،

آغزي‌ سلاملي‌ ياريم‌،

سلامسيز گئشدى‌ بوگون‌.

 

۲ - آغاج‌ آتديم‌ نار گلدي‌،

كؤينك‌ بيچديم‌ دار گلدي‌،

كؤلگه‌ دوشدي‌ قاپي‌يا،

ديديم‌ بلكه‌ يار گلدى‌.

 

۳ - قارا داغدا قار اولماز،

كؤهنه‌ باغدا نار اولماز.

قيزي‌ خانا وئرمه‌يين‌،

خان‌ آداما يار اولماز.

۴ - آيي‌ گؤر نئجه‌ گئدر،

اؤرگنيب‌ گئجه‌ گئدر.

بير اليم‌ يار قوينوندا.

بير اليم‌ حاجا گئدر.

 

۵ - اكين‌ اكيلن‌ يئرلر،

كردي‌ چكيلن‌ يئرلر،

اگلن‌ اوزوندن‌ اؤپوم‌،

چتري‌ تؤكولن‌ يئرلر.

 

۶ - او تايدا يار اوبه‌سي‌،

دوگولر ناقاراسي‌

دسمال‌ گتير، گول‌ آپار.

خلوتدي‌ باغ‌ آراسي‌.

(صادق‌ همايوني‌، يكهزاروچهارصد ترانه‌ محلي‌، كانون‌ تربيت‌ شيراز - ۱۳۴۶. ص ۲۵۰ - ۲۴۶)

 

خوراسان‌ - درگز آذريلري‌نين‌ ترانه‌لريندن‌:

 

۱- اوزوكيمدير فيروزه‌،

گئدون‌ دييون‌ خوروزه‌

بو گئجه‌ بانلاماسون‌،

ياريم‌ گله‌جاق‌ بيزه‌.

 

۲ - دام‌ داما‌دور داميميز

قوشادور ائيوانيميز.

سن‌ اوردان‌ باخ‌، من‌ بوردان‌.

كور اولسون‌ دوشمانيميز.

 

۳ - پنجره‌دن‌ داش‌ گلير.

خومار گؤزدن‌ ياش‌ گلير.

سني‌ منه‌ وئرسه‌لر.

آللاها‌ دا‌ خوش‌ گلير.

 

۴ - گؤيده‌ اولدوز آلتميشدي‌،

آلتميشي‌ ده‌ باتميشدي‌.

گيتديم‌ اوزوك‌ چكديرم‌،

زرگر اوغلان‌ ياتميشدي‌.

 

۵ - ياريم‌ اوخشار جئيرانه‌.

زولفين‌ دارار‌ بير يانه‌.

اوخي‌ بولبولوم‌ اوخي‌.

بلكه‌ ياريم‌ اويانه‌.

 

۶ - باغدا چيخان‌ نعنايم‌،

گول‌ اوسته‌ پروانه‌يم‌.

اوچ‌ گوندي‌ گؤرمه‌ميشم‌.

دلي‌يم‌، ديوانه‌يم‌.

 

۷ - قيزيل‌ اوزوك‌ لاخلادي‌،

وئرديم‌ آنام‌ ساخلادي‌.

آناما‌ قوربان‌ اولوم‌،

ياري‌ قوناق‌ ساخلادي‌.

 

۸ - ياريم‌ گيدوب‌ اويونا‌،

قيزيل‌ ساليب‌ بوينوننا‌.

اوينار گوزل‌ نار اوينار،

قوربان‌ اولوم‌ بويونا.

(سيد علي‌ ميرنيا، ايلات‌ و طوايف‌ درگز - جلد دوم‌ - مشهد 1363، ص‌ 174)

فوللكلور آرشيويميزدن‌

و ايندي‌ قوجامان‌ موعليم‌ و يورولماز آراشديريجي‌ اوستاد يوسف‌ قهرمانپورون ‌سولدوز (قره‌ پاپاق‌ - بورچالي‌) خلق‌ ادبياتينا عاييد بؤيوك‌ اثريندن‌ درلمۂرى دينله‌ييريك‌:

هله‌ بوگونه‌ قدر ايشيق‌ اوزو گؤرمه‌ميش‌ فولكلور و خلق‌ ادبياتيميزا عاييد مجموعه‌لر آراسيندا قوجامان‌ موعليم‌ و يورولماز آراشديريجي‌، اوستاد يوسف ‌قهرمانپورون‌ ايللر بويو اوستونده‌ ايشله‌ديگي‌ و سايسيز - حسابسيز سولدوز (قره‌پاپاق‌ - بورچالي‌) فولكلور و خلق‌ ادبياتي‌ ايله‌ زنگين‌لشديريلميش‌ اثري‌، ان ‌دولغون‌ و ميثيلسيز مجموعه‌لردن‌ بيري‌ ساييلماليدير.

يوسف‌ قهرمانپورون‌ توكنمز امك‌ صرف‌ ائتديگي‌ بو زنگين‌ و چوخ‌ ساحه‌لي‌اثرينه‌ بير اؤتري‌ باخيش‌ بئله‌، مولّيفي‌ فولكلور و خلق‌ ادبياتي‌ توپلاييجي‌سي‌ وآراشديريجي‌سيندان‌ علاوه‌، بير ميللى - مدني‌ تدقيقاتچي‌، باجاريقلي‌ اديب‌ وشاعير و هاميدان‌ چوخ‌ اؤز يوردونون‌ و خلقي‌نين‌ اودونا آليشيب‌ يانان‌ قودرتلي ‌بير مونوقرافچي‌ سيماسيندا گؤسترمكده‌دير. بو اثر، هر شئيدن‌ اول‌، سولدوز بؤلگه‌سي‌ و اوردا قرنلر بويو ياشايان‌ خلقين‌ وارليق‌ و مدنيت‌ قباله‌سيدير.

مجموعه‌ پهلوي‌ رژيمي‌ ايللرينده‌ يازيليب‌ حاضيرلانديغي‌ اوچون‌، اونون‌ آچيقلاما و آيدينلاشديرما قيسمتلرى فارسجا، لاكين‌ بوتون‌ فولكلور و خلق‌ادبياتي‌ نومونه‌لري‌ قره‌پاپاق‌ - تركمه‌ توركجه‌سيله‌ وئريلميشدير.

مولّيف‌ مجموعه‌يه‌ يازديغي‌ ييغجام‌ باشلانيشدا اثرين‌ ياراتماسينا بسله‌ديگي ‌مقصدي‌ آشاغيدا كي‌ ياراشيقلي‌ سؤزلر ايله‌ آيدينلاشديرير:

ايتيب‌ - باتماقدا اولانلارين‌ ايكينجي‌ دفعه‌ ده‌ اولسا، رؤيادا ياراديلماسي‌ بئله‌،اينساندا اونلارين‌ يئني‌دن‌ ياراديلماسينا درين‌ ماراقدير.

نئچه‌ ايل‌ بوندان‌ اول‌، بير چين‌ يازيچيسي‌ يازديغي‌ اثرين‌ چاتيشمازليقلارينا بويون‌ قوياراق‌ يازدي‌: اؤز ايشيمين‌ چاتيشمازليقلارينا ايليشيب‌ قالسايديم‌. بوكيتاب‌ هئچ‌ زامان‌ سونا چاتمازدي‌.

من‌ ده‌ بوتون‌ اكسيكليكلري‌ و چاتيشمازليقلاري‌ گؤز اؤنونه‌ آلاراق‌ بو مجموعه‌ني ‌توپلاماغا باشلاديم‌... توپلاما ايشي‌نين‌ چوخ‌ حيصه‌سي‌ بوش‌ ساعاتلاريمدا اولسا دا، اوتوز ايلدن‌ بري‌ بير گونوم‌ ده‌ اونسوز كئچمه‌دي‌. سيز بونو اؤزونه ‌گوونمگه‌ يوزمايين‌. ايسترديم‌ اورك‌ ايستگي‌مين‌ امرينه‌ باش‌ يئنديرميش‌ و آناديليمين‌ اينجيلريني‌ ايپه‌ - ساپا دوزوم‌. اونلارين‌ ايتيب‌ - باتماسي‌نين‌ اؤنونو آليم ‌و اينانجيمين‌ بوينوما قويدوغو وظيفه‌ني‌ يئرينه‌ يئتيريم‌.

من‌، بو ايشده‌ يارديم‌ گؤردوگوم‌ يوزلرله‌ اينسانا بورجلويام‌. من‌ بو يادداشتلاري‌اونلارين‌ منه‌ تاپيشيرديقلاري‌ يازيلارين‌ ايچيندن‌ سئچميشم‌. بو توپلامادا، منيم ‌ايشيم‌ اولسا، مطلبلري‌ و رسم‌ - روسوملاري‌ بيرلشديرمه‌، اوزلشديرمه‌ واوسلوبلاشديرماقدان‌ باشقا اولماميشدير. لايلالارا، باياتيلارا، آتالار سؤزو ومثللره‌. اوشاق‌ ناغيللاري‌ و خوصوصيله‌ متللره‌ گلينجه‌. آنام‌ منيم‌ ان‌ بؤيوك ‌يارديمچيم‌ اولموشدور. بونا گؤره‌ ده‌ بو مجموعه‌ني‌ اونون‌ بؤيوك‌ روحونا هديه ‌ائتمه‌گي‌ يئرلي‌ سانيرام‌

اثرين‌ ييغجام‌ باشلانيشيندان‌ آنلاشيلير كي‌، او ۱۳۵۶ - جي‌ ايلده‌ توپلانيب ‌حاضيرلانميش‌، آنجاق‌ بو سيرادا حسنلو تپه‌سي‌ قازينتيلاري‌ باره‌ده‌ بير پارا آچيقلامالار آرتيرماق‌ قصديله‌ او گون‌ موزه‌ ايران‌ باستان‌ رئيسي‌ آقاي‌ سيدغلامرضا معصومي‌يه‌ امانت‌ وئريلير. لاكين‌ آچيقلاما يازماق‌ باشينا دگسين‌. اثرين ‌اصلي‌ ده‌ دفعه‌لرله‌ ايسته‌نيلديگينه‌ باخماياراق‌ گئري‌ قايتاريلمير.

اونون‌ آردينجا دا اثرين‌ نوسخه‌سي‌ چاپ‌ اولوب‌ ياييلماق‌ قصديله‌ مرحوم‌ بولود قارا چورلويا وئريلير. بو نوسخه‌ ده‌ گؤزله‌نيلمز حاديثه‌لر نتيجه‌سينده‌ ايتير باتير ومولّيف‌ چاره‌سيز اثري‌ ايكينجي‌ دفعه‌ يازمالي‌ اولور و يئني‌دن‌ توپلانان‌ مجموعه ۱۳۶۸ ده‌ حاضيرلانير. مولّيف‌ آجي‌ گولوشله‌ اثري‌نين‌ طالعيني‌ باشي‌ بلالارچكميش‌ و اورك‌ چيرپينتي‌لاريني‌ آغيلارا و باياتيلارا جالاميش‌ خلقي‌نين ‌طالعينه‌ اوخشادير...

اثرين‌ ايچينده‌ يئرلشميش‌ بؤلوملر ايكي‌ اساس‌ حيصه‌يه‌ آيريلير. بيرينجي ‌حيصه‌ده‌ مولّيف‌ قره‌ پاپاق‌ ائلي‌نين‌ اتنيك‌ منشأيي‌ و تاريخ‌ بويونجا بؤلمه‌لري‌ ويورددان‌ يوردا كؤچمه‌لري‌ و ديدرگينليك‌لري‌ باره‌ده‌ گئنيش‌ بيليك‌ وئرديكدن ‌سونرا بوگونكو سولدوز - نقده‌ اؤلكه‌سي‌نين‌ جوغرافي‌ دوروموندان‌، اورانين ‌اكينچيليك‌ و حشمدارليق‌ اوچون‌ اولدوقجا موناسيب‌ و ال‌ وئريشلي‌ يورد اولدوغوندان‌، بؤلگه‌نين‌ باشدان‌ آشيرديغي‌ تاريخي‌ حاديثه‌لر و اورادا ايللر بويو يارانان‌ ايجتيماعي‌، سياسي‌ و ايداري‌ قورولوشدان‌ دانيشير. اثرين‌ ايكينجي ‌حيصه‌سينده‌ اساس‌ يئر فولكلور و خلق‌ ادبياتي‌ مسأله‌لرينه‌ وئريلير. بوراد ائل ‌آراسيندا اولان‌ رسم‌روسوملاردان‌، بايراملاردان‌. ضرب‌المثلردن‌،تاپماجالاردان‌، تيرينگه‌لردن‌، آغيلاردان‌، باياتيلاردان‌، ناغيللاردان‌، متللردن‌،عاشيقلاردان‌ و ساييره‌دن‌ نومونه‌لر گتيرير.

بير سيرا تاريخي‌ و آنسيكلوپديك‌ منبعلرده‌ قارا پاپاقلارين‌ زنگين‌ خلق‌ ادبياتي ‌اولدوغو قئيد ائديلير. آشاغيدا مجموعه‌نين‌ آيري‌ - آيري‌ يئرلريندن‌ گتيريلن ‌نومونه‌لر بو فولكلورون‌ دوغرودان‌ - دوغرويا زنگينليگيني‌ گؤسترمكده‌دير.

 

 

ياللي‌ و اونونلا ايجرا ائديلن‌ ماهنيلار:

 

آذربايجان‌ ائللري‌ آراسيندا كوتله‌وي‌ رقص‌ و بو رقص‌ ايله‌ بيرليكده‌ اوخونان ‌ماهنيلارين‌ آدلارى‌ اولموشدور. بو رقص‌، كوردلر، گورجولر و ائرمنيلر آراسيندادا گئنيش‌ ياييلميشدير. تويلاردا و شنليكلرده‌ ايكي‌ چالغي‌ آلتي‌، بيري‌ زورنا و اوبيري‌ ناغارا و اويغون‌ ماهني‌نين‌ موشاييعتيله‌ اوينانيليب‌، رقصده‌ ايشتيراك ‌ائدنلرين‌ سايي‌ بليرسيز اولور: ۱۰-۱۵ نفردن‌٬ ۸۰ - ۱۰۰ قدر اولا بيلر. ياللي‌نين‌ايجراسيندا ال‌ - اله‌ وئرميش‌ كيشي‌ يا قادينلار (بعضاً ده‌ قاريشيق‌) حلقه ‌وورورلار. ياللي‌نين‌ باشيندا دوران‌ رقاص‌ (ياللي‌ باشي‌) الينده‌ يايليق‌ فيرلادير.ياللي‌ اولده‌ آغير آهنگله‌ باشلار، سونرا گئت‌ - گئتده‌ چاپيقلاشير. اوينايانلار ريتميك‌ حركتلرله‌ انداملاريني‌ قاباغا يؤنلديب‌ قالخيرلار. ياللي‌نين‌ منشأيي ‌هله‌ليك‌ آيدينلاشماديغي‌ حالدا، بو رقص‌ حقينده‌ ايلك‌ دفعه‌ قوبوستان‌ داش تصويرلرينده‌ و سونرادا نظامي‌نين‌ خسرو و شيرين‌ينده‌ تيمثال‌ وئريلميشدير.بو يالليلار و اونلارلا ايفا ائديلن‌ ماهنيلارين‌ آدلاري‌ اولموشدور. بونلارين ‌معروفلاريندان‌: اوچ‌ آدديم‌، دؤنه‌ ياللي‌، قازقازي‌، كؤچري‌، قالادان‌ قالايا، توولاما، شئيخاني‌ و... اولموشدور.

اوستاد قهرمانپور اؤز آچيقلامالاريندا تأسوفله‌ قئيد ائدير كيى بسته‌كارليقدان‌ باش‌آچماديغي‌ اوچون‌ بو اينجه‌ ماهنيلارين‌ اوزرينه‌ آهنگ‌ قويماق‌ ايقتيداريندا دگيل‌و آرزو ائدير كي‌، صلاحيتلي‌ بسته‌كارلار بلكه‌ بو ايشي‌ گؤره‌ بيلسه‌لر. اوستادي‌سئويديرمك‌ اولار كي‌، آذربايجان‌ جومهوريسينده‌ بؤيوك‌ بسته‌كارلاردان‌نئچه‌سي‌ بو ماهنيلاردان‌ بير پاراسيني‌ بسته‌له‌ميشلر. بيز آشاغيدا مجموعه‌ده‌يئرلشن‌ ياللي‌ ماهنيلاريندان‌ ايكي‌ نومونه‌ و هر نومونه‌دن‌ نئچه‌ سطير گتيريريك‌:


 


ياللي‌ ماهنيلاري‌

 

توولاما

 

بير خالين‌ ياخشيدير، بير خالي‌ يامان‌

توولاما، توولاما، توولاما گلين‌.

بير خالين‌ ساليبدي‌ گؤيلومه‌ گومان‌

الينده‌ شاماما قوخلاما گلين‌.

بير خالين‌ ياقوتدو، بير خالين‌ يمن‌

توولاما، توولاما، توولاما گلين‌.

عيشوه‌ني‌، غمزه‌ني‌ آز ائيله‌ گلين‌

الينده‌ شاماما قوخلاما گلين‌.

يولويون‌ ساليبسان‌ چئشمه‌ باشيندان‌

توولاما، توولاما، توولاما گلين‌.

قورخورام‌ گله‌سن‌ نظره‌ گلين‌

الينده‌ شاماما قوخلاما گلين‌.

اگر قبول‌ ائتسن‌ بو شيرين‌ جاني‌

توولاما، توولاما، توولاما گلين‌.

وئررم‌ قوربان‌ سن‌ تك‌ گؤزله‌ گلين‌

الينده‌ شاماما قوخلاما گلين‌.

قيزيل‌ گولو دسته‌ توتوب‌ در گيلن‌

توولاما، توولاما، توولاما گلين‌.

دريب‌، دريب‌ گيزلين‌ يئرده‌ سر گيلن‌

الينده‌ شاماما قوخلاما گلين‌...

اوچ‌ آياق‌

 

 

يار سينه‌مي‌، آچ‌ قلبيمي‌گؤر اورادا جوشان‌ نه‌دير؟

طبيبيم‌ اول‌، آچيق‌ سؤيله‌،وورغون‌ قلبه‌ درمان‌ نه‌دير؟

قوي‌ اوزويون‌ بير اوزومه‌تيك‌ گؤزويون‌ بير گؤزومه‌

نولار باخسان‌ بير سؤزومه‌؟ بيرجه‌ بيليم‌ وفان‌ نه‌دير؟

ياننام‌، يانانيم‌ هئچ‌ اولماز درد- حاليمي‌ بيرجه‌ سورماز

هئچ‌ جللاد دا بئله‌ اولماز،چارام‌ نه‌دير، درمان‌ نه‌دير؟

افسونلاييب‌ سن‌ توولادين‌ خومار گؤزلرله‌ اوولادين‌

اورگيم‌ باشين‌ داغلادين ‌داد چكرم‌، آمان‌ نه‌دير؟

دالان

 

ايشيق‌ سَپر، گول‌ جمالين‌ اؤلكه‌مه‌

كيمسه‌ اولماز ميثال‌ سنه‌، تاي‌ سنه‌.

آغ‌ سينه‌ده‌ بيتيب‌ بئهيشت‌ آلماسي‌

نولار وئرسن‌ اوندان‌ بيرين‌ پاي‌ منه‌؟

بوگون‌ پارلاق‌ گونش‌ اولدون‌ سن‌ بيزه‌

ائوده‌ اوتورماق‌ هئچ‌ ياراشماز سنه‌

بارماق‌ ايله‌ بير - بيره‌ خلق‌ گؤرسه‌دير

حسرت‌ چكر گونش‌ سنه‌، آي‌ سنه‌

گئتمه‌ باهاريمي‌ خزان‌ ائيله‌مه‌

سوچوم‌ نه ‌دير، سؤيله‌ منه‌، ساي‌ منه‌.

غم‌ بولودو آلدي‌ مني‌ آرايا

هوجوم‌ ائدر ناله‌ منه‌. واي‌ منه‌.

من آللهدان‌ بهيشت‌ - حوري‌ ايسته‌مم‌

سن‌ حوريسان‌، بهيشت‌ منه‌، پاي‌ منه‌.

 

اوچ‌ تپيك‌

 

سحر-سحر دان‌ يئلي‌ تك ‌اسمه‌ قاداسين‌ آلديغيم‌.

منيم‌ صبري‌ قراريمي ‌كسمه‌، قاداسين‌ آلديغيم‌

آغلار آغلار من‌ قالميشام‌ هئيوا كيمي‌ سارالميشام‌،

جان‌ قويموشام‌، عشق‌ آلميشام ‌گئتمه‌، قاداسين‌ آلديغيم‌.

دويماق‌ اولماز قلم‌ قاشدان‌،مارال‌ تكي‌ يان‌ باخيشدان‌،

نه‌ دئديم‌، اينجيدين‌ دوستدان‌؟كوسمه‌، قاداسين‌ آلديغيم‌.

بياض‌ گردن‌، بولور سينه‌،آل‌ مني‌ قوينون‌ ايچينه‌،

مني‌ قويوب‌، اؤزگه‌سينه ‌گئتمه‌، قاداسين‌ آلديغيم‌.


سئويشمه‌

 

من‌ سوناني‌ ايسته‌رم‌،

گئجه‌ - گوندوز عشقيني‌

اورگيمده‌ بسله‌رم‌.

سونا قونشوموز قيزي‌،

اوجا گؤيلر ايلديزي‌،

سولدوزون‌ بالي‌، دوزو.

آلما بنيز، قارا گؤز.

 

 

 

 

 

سونام‌، گؤلده‌ اوز ها اوز.

سونا دا مني‌ ايستر،

او منه‌ قاش‌ - گؤز ائيلر.

 

بير گون‌ دئديم‌: آي‌ سونا1

آز قالير باغريم‌ يانا،

گؤزوين‌ قوربان‌ كسيم‌،

قوي‌ باغريما بير باسيم‌،

اينصافدي‌ باغريم‌ يانا،

اولام‌ دلي‌ - ديوانا؟!

سونا دئدي‌: آي‌ اوغلان‌،

شيرين‌ ديلي‌ين‌ قوربان‌،

مني‌ سن‌ چوخ‌ قيناما!

قونشو گؤرر، ياد گؤرر،

گئدر دئيَر آناما.

 

 

گون‌ گئچدي‌، آيلار اؤتدو

گؤزلريم‌ قان‌ ياش‌ تؤكدو

اودا يانديم‌، دايانديم‌،

درد وغمه‌ بويانديم‌.

بير گون‌ چؤلده‌ گؤروشدوك‌،

جان‌ - جان‌ دئييب‌ سئويشديك‌

بونو يولداشي‌ گؤردو،

بالا قارداشي‌ گؤردو.

***

آناسي‌ خبر تاپدي‌،

تومانين‌ باشا آتدي‌،

گئديب‌ خانا سؤيله‌دي‌،

خان‌ دا مني‌ چاغريتدي‌

دئدي‌: آي‌ قاشي‌ قره‌،

نه‌ دوشموسن‌ بو چؤللره‌؟!

سؤز آتيرسان‌ اؤتنه‌،

ساتاشيرسان‌ گئچنه‌

سونا گؤلده‌ اوزمه‌سين‌،

كهليك‌ چؤلده‌ سوزمه‌سين‌،

بؤركويون‌ يان‌ قويموسان‌،

كندده‌ لوتي‌ اولموسان‌،

توفاغيزي‌ چؤللۂرم،

دام‌ - داشيزي‌ بئلله‌رم‌

سامانليغا سالارام‌،

اوستوزه‌ اود قالارام‌.

 

قورخودان‌ دؤنوب‌ قالديم‌،

اؤز ايشيمدن‌ اوتانديم‌،

ايشدن‌ اتيم‌ چورودو،

بونجا نوطقوم‌ قورودو.

خان ‌هاي‌ باسدي‌ ايتلره‌،

آلا باش‌ كؤپكلره‌،

اوز قويدوم‌ من‌ قاشماغا،

ديك‌ - چوخوردان‌ آشماغا،

جان‌ دئديگين‌ شيريندي‌،

بوغوشماقليق‌ چتيندي‌.

باج‌ وئرمه‌ديم‌ ايتلره‌،

ديرماشديم‌ سؤيوتلره‌،

باغريم‌ باشي‌ قيريلدي‌،

تومانجيغيم‌ جيريلدي‌.

شلمه‌م‌ دوشدو باشيمدان‌،

تري‌ سيلديم‌ قاشيمدان‌.

 

خبر چاتدي‌ آناما،

اوز قويوب‌، گئتدي‌ خانا،

گؤز ياشيني‌ اله‌دي‌،

سورا بئله‌ سؤيله‌دي‌:

قوربانين‌ اولوم‌ آي‌ خان‌،

باشييان‌ دؤنوم‌ آي‌ خان‌!

ايللر بويو آغاسيز،

هوندور داغسيز، قاياسيز،

اؤلكه‌ سيزه‌ بئل‌ باغلار،

ائللر سيزله‌ چال‌ - چاپار،

منيم‌ بالام‌ اوفاقدي‌،

بالاجا بير اوشاقدي‌.

ايتلره‌ بوغدورما، سن‌،

گولومو سولدورما، سن‌،

آغ‌ ساچيما باغيشلا،

خان‌، هاشيما باغيشالا.

طوبا خانيمين‌ جاني‌.

اولوم‌ گؤزون‌ قورباني‌،

ايتلري‌يين‌ گؤتور گئت‌،

اوغلانجيغي‌ آزاد ائت‌!

***

خان‌ باشلادي‌ گئتمه‌يه‌،

سرايينا اؤتمه‌يه‌،

ايتلر مني‌ بوشلادي‌،

خان‌ چئوره‌سين‌ خوشلادي‌،

شاد - خورامان‌ گئتديلر،

بونجا گؤزدن‌ ايتديلر،

آنام‌ مني‌ گؤتوردو،

ائويميزه‌ يئتيردي‌.

دئدي‌: اوغلوم‌ بير ده‌ سن‌،

آت‌ - قاتيري‌ هوركوتمييه‌سن‌!

متل‌

 

ايشله‌رم‌، ايشله‌مه‌رم‌، گونوم‌ بودو

يئديگيم‌ يارما آشي‌، ياريسي‌ سودو.

يايدا من‌ خانلارا بوستان‌ اكرم‌

قيشدا من‌ كل‌ - جاميشا باش‌ چكرم‌.

قولو گر اولمويا، بوستان‌ كيم‌ اكر

قولونو جان‌ ائوينه‌ كيمدي‌ چكر؟

خان‌ منيم‌ خاطيريمي‌ چوخلو سئور

بيزلري‌ آتا - بابا نؤكر بيلر.

اؤلكه‌ده‌ تانير مني‌ بؤيوك‌، اوشاق‌

هلله‌نيب‌ چؤلمه‌گيني‌ تاپيب‌ قاپاق‌.

وايدا، تويدا چاغيراللا: قولو گل‌!

باش‌ يئتير اوجاقلارا، ايشلره‌ ال‌.

اؤزويون‌ دورما گيلن‌ چايا يئتير

دولچاني‌ سو ايله‌ تئز دولو گتير.

توي‌ چالينديقجا اسر سوموكلريم‌

چالخانار، سن‌ دئيه‌سن‌ ايليكلريم‌.

يورويوب‌ هايدي‌، تويا من‌ گيررم‌،

ياپيشيب‌ دوزودن‌، ياللي‌ گئدرم‌.

اورگيم‌ چال‌ - چاغيري‌ چوخلو سئور

لوت‌ اگر اويناماسا، غم‌ اؤلدورر.

چولومنان‌ هوركور منيم‌ جين‌- شياطين‌

موفته‌دي‌ چال‌ - اويناماق‌، دگيل‌ ساتين‌.

گيرنده‌ ياللي‌يا من‌ هامي‌ گولر

منه‌ باخيب‌ هاميليقجا سئوينر.

گول‌ گؤزوم‌، قارا گونو اونوت‌ گيلن‌

گله‌جك‌ نه‌ اولدوغون‌ كيمدي‌ بيلن‌؟

گون‌، گون‌ اوسته‌، بئله‌جه‌ عؤمور گئچير

تا عؤمور باشا چاتيب‌، وقت‌ يئتيشير.

بونلارا قارشى دوروب‌، واردي‌ سؤزوم‌

گول‌ گيلن‌ كوتله‌لرين‌ سن‌ حالينا

توف‌ ائله‌ سارساقلارين‌ ساققالينا!

 

ايشله‌رم‌، ايشله‌مه‌رم‌، گونوم‌ بودو

يئديگيم‌ يارما آشي‌، ياريسي‌ سودو

بيلمرم‌، باش‌ گؤتوروب‌ هارا گئديم‌

گئتمه‌ييم‌، بو حال‌ ايله‌ من‌ نه‌ ائديم‌؟

بير مثل‌ وار ائل‌ ايچينده‌ دئييلر،

گؤيه‌ هاردان‌ باخاسان‌ گؤي‌ گؤرونر-

هر سحر قوش‌ يووادان‌ اوچوب‌ گئدر

آخشام‌ اوستو يووايا توخ‌ قاييدار.

ايشلر اللر نه‌ اوچون‌ آج‌ قالالار

قونچه‌لر آچيلماميشدان‌ سولالار؟..

بئله‌ قورغو قورولوب‌ بو دونيادا

بيريسي‌ خان‌ - بيگ‌ اولا. بيري‌ گدا.

باشي‌يين‌ سال‌ آشاغا، يوگور ايشه‌

چوخ‌ قاليبدي‌ هله‌، آخير گؤروشه‌.

هامي‌ يوللار چاتاجاق‌ بيرجه‌ يئره‌،

بو گئدنلر يئته‌جك‌ قيل‌ كؤرپويه‌.

يوكلري‌ آغير اولانلار زويه‌جك‌

سؤنمز بير اود ايچينه‌ تؤكوله‌جك‌.

نه‌قدر چيرك‌ - كثافت‌ واردي‌ يانار

اينسان‌ اوغلو يئني‌دن‌ حق‌ دوغولار.

چونكي‌ اولدو او بئله‌ آري‌ - تميز

نيتي‌ دوزگون‌ اولار، اؤزو عزيز.

هامي‌ اوزلر، بئله‌ كي‌، گون‌ سئوينر

باشي‌ اوسته‌ تاريني‌ آچيق‌ گؤرر.

 

 

هاوالان ‌ها، هاوالان‌

 

هاوالان ‌ها، هاوالان‌

هاوالانديق‌ اوچماغا،

حق‌ قاپيسين‌ آچماغا،

قاناديميز اوزولدو،

ائل‌ يايلاغا دوزولدو،

ائل‌ يايلاقدان‌ گلينجه‌،

بوغدالاري‌ درينجه‌

قوجا باشي‌ كسديلر،

قينديرقادان‌ آسديلار،

قينديرقا قيلينج‌ باغي‌

ايچينده‌ قورد - قوش‌ ياغي‌،

قورد - قوش‌ ياغي‌ درماندي‌،

جانيم‌ سنه‌ قورباندي‌،

يولداشلار هامي‌ گئتدي‌،

اويونلار بوردا بيتدي‌.

 

 

 

آرواد ايله‌ كيشي‌نين‌ چاققيشماسي‌

 

آرواد:

يئميشم‌ تورش‌ آلچاني‌.

قارنيم‌ چالار كمانچاني‌،

نئيله‌رم‌ قازانچاني‌، تييانچاني‌.

سات‌، منه‌ قند - چاي‌ آل‌، گتير

گون‌ اورتايا تويوق‌ اتي‌،

آخشاميما بال‌ آل‌ گتير.

بير دونوم‌ وار، جيريم‌ - جيريم‌،

سالخيلاري‌ شيريم‌ - شيريم‌،

قار - كولكده‌ نئجه‌ دوروم‌؟

مخمردن‌ بير دون‌ آل‌ منه‌

گؤر نه‌ ده‌ ياراشيقلي‌يم‌،

نور جاهانام‌، باخ‌ گؤر گئنه‌!

 

كيشي‌:

 

ايشلريميز اولدو اوزان‌،

باشيميزا گئچدي‌ قازان‌،

بو حال‌ ايلن‌ چؤرك‌ قازان‌!

گتير وئر نور جاهان‌ يئسين‌،

قاش‌ آتيبان‌، گؤز اويناديب‌،

دينديرنده‌ يامان‌ دئسين‌.

فيكري‌ - هوشو يئمكده‌دي‌،

قيزيللانيب‌ گئيمكده‌دي‌،

گؤزو چايدان‌ - چؤلمكده‌دي‌،

گل‌ گيلن‌ قان‌ توپورمه‌ سن‌،

يوخدور بير حاليني‌ بيلن‌،

سني‌ بو دردلر اؤلدورر.

 

آرواد:

كولونگون‌ دگيبدي‌ داشا،

ال‌ آتديغين‌ گئدر بوشا،

بگنميرسن‌ گئداخ‌ بوشا،

قادام‌ او پيس‌ اندامييان‌،

ديشي‌ سئيرك‌، گؤزو دومبا،

ساققاللي‌ هيس‌ اندامييان‌،

يئمك‌ گتير بير توخ‌ يئييم‌،

گئيمك‌ گتير، ياخشي‌ گئييم‌،

گؤز - قاشيمي‌ بير بزه‌ييم‌،

گؤرن‌ باخسين‌ دؤنه‌ - دؤنه‌،

دئسين‌ قادان‌ خانيم‌ منه‌،

نور جاهانام‌ باخ‌ گؤر گئنه‌.

 

كيشي‌:

تر شاماما تولوق‌ اولدو،

شوخ‌ قامتين‌ بوروق‌ اولدو.

قيريشيب‌ گول‌ بنيزين‌ سولدو،

سؤزون‌ گلير سؤيوش‌ منه‌،

قاش‌ - قاباقدان‌ ساواش‌ ياغير،

قييا باخماق‌ دؤيوش‌ منه‌،

دوشونورسن‌ اوزون‌ گولدو،

ساچلارين‌ ساري‌ سونبولدو،

يئريشين‌ ميثلي‌ دولدولدو،

يوخوسونا كيمين‌ گلسن‌،

ائله‌ بيلر خورتدان‌ گلير،

باغري‌ چاتلار سني‌ گؤرن‌.

 

آرواد:

ياغ‌ تاپماديم‌ ياوان‌ يئديم‌،

شال‌ تاپماديم‌، خامي‌ گئيديم‌،

گاه‌ يئري‌، گاه‌ گؤيو سؤيدوم‌،

نينه‌ اوخشار، دام‌ - توفاغين‌،

بير حصير، بير ممد نصير،

دليك‌ - دولوك‌ تخت‌ - تاباغين‌،

داغين‌ يوخدو، لالان‌ اولا،

گؤلون‌ يوخدو، سونان‌ اولا،

چتين‌ سنله‌ قالان‌ اولا،

كول‌ باشييان‌، آهئيوره‌

آدام‌ قيسمت‌ اولا گورا،

نه‌ كي‌ سنين‌ كيمي‌ اره‌!

 

كيشي‌:

 

بيز آلميشيق‌ آروادي‌ ايش‌ گؤرمگه‌،

آلماميشيق‌ گونده‌ ساچين‌ هؤرمگه‌،

بيز آلميشيق‌ قاين‌آناسين‌ ساخلاسين‌،

آلماميشيق‌ گئجه‌ - گوندوز يوخلاسين‌،

بيز آلميشيق‌ ياپپا ياپا، زيل‌ چكه‌،

آلماميشيق‌ بايقوش‌ كيمي‌ هئي‌ اؤته‌!


لاكين‌، مسأله‌ يالنيز ديلي‌ ياساقلاما و دگيشديرمكله‌ توكنميردي‌. بيردن‌ بيره‌وحدت‌ ملي‌ كابوسونا اويان‌ آسيميلاچيلار خلقين‌ حيات‌ طرزيني ‌دييشديرمگه‌ ده‌ ال‌ آتير و بو يولدا هئچ‌ بير خوشونتدن‌ چكينميرلر. حؤكومت‌ بوتون‌ تورك‌ سويلو ائللري‌، ايرانين‌ بوتون‌ بؤلگه‌لرينده‌ و نومونه‌ اولاراق‌ فارس‌بؤلگه‌سينده‌ ياشايان‌ قاشقايلاري‌ تخته‌ قاپو ائتمگه‌ اليندن‌ گلني‌ اسيرگه‌ميردي‌...محمد بهمن‌ بيگي‌ بو فاجيعه‌ني‌ ايل‌ من‌، بخاراي‌ من‌ - ائليم‌، بوخارام‌ منيم‌اثرينده‌ بئله‌ قلمه‌ آلير:

شهر آدي‌ ائشيدنده‌ اورگيم‌ سئوينجدن‌ چاغلاردي‌. آتامي‌ و اونون‌ آردينجا دا آنامي‌ تهرانا سورگون‌ ائتديلر. سونراسي‌ عاييله‌نين‌ شن‌ - شادمان‌ آدامي‌ بيرباشامن‌ ايديم‌. نه‌ بيلئيديم‌ آتيمي‌ و ايه‌ريمي‌ آلاجاقلار و مكتب‌ نيمكتي‌ آرديندا اوتورداجاقلار؟! نه‌ بيلئيديم‌ كي‌، بزكلي‌ مشق‌ توفنگيمي‌ آلاجاقلار و اليمه‌ قلم ‌وئرجكلر؟!

آتام‌ ائله‌ ساييلي‌ كيشي‌ دگيلدي‌. سهواً سورگون‌ اولموشدو. آنام‌ دا ساييلي‌ قادين ‌دگيلدي‌. او دا سهواً دؤولتي‌ و ميللتي‌ آغالارين‌ الي‌ ايله‌ غارت‌ ائديلميشدي‌.

سورگون‌ ايللري‌ اولدوقجا آغير كئچدي‌ و اون‌ ايلدن‌ چوخ‌ داوام‌ ائتدي‌. آزقالميشدي‌ كي‌، كوچه‌لره‌ دوشوب‌ ديله‌نك‌. نظميه‌ مأمورلاري‌ بيزي‌ديلنچيليكدن‌ بئله‌ قورويوردولار. وار - يوخوموزدان‌ خبرسيزايديك‌. خرج ‌خيرتده‌گيميزه‌ قالخميشدي‌. اوللر آداملاريميز وار ايدي‌. لاكين‌ اونلار دا وضعي ‌خراب‌ گؤرونجه‌ قاچديلار و بيزي‌ آللاه‌ اومودونا بوراخديلار.

ايچمه‌لي‌ كهريزلرين‌ كناريندا يورد سالان‌ آداملارا تهرانين‌ او گونكو سو آنبارلاري ‌موصيبت‌ ايدي‌.

آغاج‌ و پاليدين‌ قيرميزي‌ آلووونا آليشان‌ آداملارا كؤمور منقلي‌ و نفت‌ چيراغي‌ بلا ايدي‌. گؤزل‌ و گئنيش‌ فارس‌ اؤلكه‌سيندن‌ آت‌ چاپما مئيداني‌ كيمي‌ فايدالانان ‌كيمسه‌لره‌ بير داريسقال‌ و توزاناقلي‌ كوچه‌ده‌ ياشاماق‌ اؤلوم‌ و يوخلوق‌ ايدي‌.

بوتون‌ عؤمرونو آچيق‌ و كؤچريليك‌ هاواسي‌ ايله‌ دولو چاديردا باشا آپاران‌ آناما دؤرد ديوار آراسيندا چئوريلي‌ اوتاقدا نفس‌ آلماق‌ چتين‌ و جان‌ سيخيجي‌ ايدي‌.اونون‌ اوچون‌ حَيتده‌ چادير قوردوق‌، يالنيز قيشين‌ قاسيرغالي‌ قاري‌ و سويوغو اونو اوتاغين‌ دؤرد ديواري‌ آراسينا قايتارا بيلدي‌.

من‌ آنامين‌ چاديريندا ياتيرديم‌. بير گئجه‌ اوغرو پالتارلاريمي‌ آپاردي‌. پالتارسيز قاليب‌ آغلاديم‌. سورگونلردن‌ بير خيرداجا آدام‌ پالتاريني‌ منه‌ باغيشلادي‌. يئنه ‌اوزون‌ و گئن‌ اولدو. آما هر نه‌ ايسه‌ چيلپاقليقدان‌ ياخشي‌ ايدي‌. گئيديم‌ ويوللانديم‌. كوچه‌ و مكتب‌ اوشاقلاري‌ گولوشدولر.

بيزيم‌ قاپيدان‌ چيخما حَيت‌ توتماغا ايمكانيميز يوخ‌ ايدي‌. ايشيميز او طنطنه‌لي‌و كلانترليك‌ و كدخوداليق‌ ياشاييشيندان‌ بير تك‌ كيرايه‌ اوتاغا گليب‌ چاتميشدي‌.حيتده‌ هرجور قونشوموز وار ايدي‌: سوت‌ ساتان‌، بلديه‌ سوپورگه‌چيسي‌، بانك ‌قوللوقچوسو و بير ارسيز قادين‌. اونون‌ آدي‌ همدم‌ ايدي‌. او هاميدان‌ مهريبان ‌ايدي‌. آتام‌ نظميه‌ گؤزآلتيسي‌ ايدي‌. گؤزجوسو وار ايدي‌. بير قووون‌ آلماغا گئتمك‌ ايسته‌سه‌ايدي‌، حؤكومت‌ مأمورو اونونلا بيرگه‌ گئديردي‌. ايگيرمي‌ دن ‌چوخ‌ قاشقايلي‌ سورگونو تهراندا وار ايدي‌. هر سورگونون‌ بير گؤزتچيسي‌ وارايدي‌. بير بيزيم‌ گؤزتچي‌ هاميدان‌ يازيق‌ ايدي‌. چونكو اونون‌ اوتوروب‌ راحاتلانماسي‌ اوچون‌ يئريميز يوخ‌ ايدي‌. اونو آغيرلاماق‌ اوچون‌ سوفره‌ميز ده ‌يوخ ايدي‌. بونا گؤره‌ ده‌ او چاره‌سيزليكدن‌ كوچه‌ده‌ بوش‌ نفت‌ حلبي‌سي‌ اوستونه ‌روزنامه‌ ساليب‌ اونون‌ اوستونده‌ اوتوراردي‌ و بيزي‌ گؤز آلتى‌ قوروياردي‌. او ايشيندن‌ و بيز يوخسوللوغوموزدان‌ اوتانيرديق‌.

بير گون‌ آتامي‌ نظميه‌يه‌ ايسته‌ديلر. گون‌ اورتا اولدو گلمه‌دي‌، مأمور بيزي‌اينانديردي‌ كي‌، گئجه‌ گلير. گئجه‌ ده‌ گلمه‌دي‌، آردي‌ گئجه‌لر ده‌ گلمه‌دي‌. آنامين ‌كدري‌ و بيز اوشاقلارين‌ باشسيزليغي‌ قورتاراسي‌ دگيلدي‌. آيلاردان‌ سونرا بير گون ‌تاپيليب‌ گلدي‌. تانيماق‌ اولموردو. ايشكنجه‌ اولموشدو. يالنيز سسيندن‌ آتام ‌اولدوغونو بيلديك‌...(محمد بهمن‌ بيگي‌، بخاراي‌ من‌، انتشارات‌ آگاه‌، تهران‌،۱۳۶۸)

بئله‌ليكله‌ ايراندا ياشايان‌ آذري‌ سويلو توركلرين‌ ياخين‌ يا اوزاق‌ بؤلگه‌لرده‌فولكلور و شيفاهي‌ خلق‌ ادبياتي‌نين‌ اؤلچويه‌ سيغماز قدر گئنيش‌ ياييلديغينا باخماياراق‌، يوخاريدا آد آپارديغيميز او آجي‌ و اوغورسوز ايللرده‌ حاكيمييتين ‌آمانسيز ضيداينساني‌ و ضيدميللى سياستيندن‌ اؤزونو قورويا - قورويا و بوتون‌چتينليكلره‌ قاتلاشا - قاتلاشا بير نئچه‌ كيشي‌نين‌ بئش‌ - آلتي‌ فولكلور مجموعه‌سي‌ توپلاييب‌، يا ايكي‌ اوچ‌ فولكلور آراشديرماسي‌ يازيب‌، حؤكومتين ‌تهلوكه‌سيندن‌ چكينه‌ - چكينه‌، اونلاري‌ اؤز گونده‌ليك‌ ماعاش‌ يوللاري‌ ايله‌ نشرائدن‌ اورتايا چيخاتمالاريني‌ جاندان‌ مايا قويماقدان‌ باشقا نه‌ كيمي‌ يورماق ‌اولار؟

هاميدان‌ ماراقلي‌ يئر بوراسيدير كي‌، ۱۹۷۱ - جي‌ ايل‌ ايراندا بوراخيلان‌ ايران ‌فولكلورچولوغو مونوقرافياچيليغينا عاييد كتاب‌شناسي‌ فرهنگ‌ عامه‌ ومردم‌ شناسي‌ ايران‌، بخش‌ اول‌: فهرست‌ كتابها، گرد آورنده‌ محمود زماني‌. بخش‌دوم‌: فهرست‌ مقاله‌ها، گرد آورنده‌ علي‌ بلوكباشي‌، نشريه‌ شماره‌ ۳۳ مؤسسه‌فرهنگي‌ منطقه‌اي‌، تهران‌ - اسفند ۱۳۵۰ بوراخيلان‌ توپلوم‌ فهرستينده‌، ۲۱۶ كيتابدان‌ و ۱۶۰۰ مقاله‌دن‌ آد آپاريلديغي‌ حالدا، همين‌ آذري‌ فولكلور و خلق‌ادبياتينا عاييد كيتاب‌ و مقاله‌لردن‌ اصلاً آد آپاريلماميشدير. البته‌ بونا باخماياراق ‌همين‌ فهرستده‌ آذربايجان‌ ديلي‌ و ميللى وارليغي‌ علئيهينه‌ يازيلان ‌مونوقرافيالاردان‌ يئرلي‌ - يئرينده‌ آد آپاريلميش‌ و تانيتديريلميشدير.

يوخاريدا قئيده‌ آلينديغي‌ كيمي‌ فولكلور و شيفاهي‌ خلق‌ ادبياتي‌نين‌ شيمالي ‌آذربايجاندا٬ جنوبى آذربايجانا نيسبت‌ ايرليلمه‌سي‌ و بو باره‌ده‌ چوخلو فولكلورمجموعه‌لري‌ و فولكلور آراشديرما اثرلري‌نين‌ اورتايا چيخماسي‌ و اونلارين ‌موختليف‌ فورصتلرده‌ جنوبي‌ آذربايجانا گليب‌ چاتماسي‌، بورادا فولكلور توپلاما و آراشديرما ايشلرينده‌ بو مجموعه‌لري‌ كيريل‌ اليفباسيندان‌ كؤچورولمه‌ ايشينه ‌يول‌ آچميشدير. بو كؤچورمه‌ ايشي‌نين‌ جنوبي‌ آذربايجاندا ايستر - ايسته‌مز فولكلورچولوق‌ ايشينه‌ هم‌ خئيري‌، هم‌ده‌ ضررري‌ اولموشدور. ايشين‌ خئيري ‌اوراسيندادير كي‌، بو كؤچورمه‌ ايشي‌ عومومو حالدا جنوبدا فولكلورلا ماراقلانانلارا و اونون‌ آيري‌ - آيري‌ ساحه‌لريني‌ منيمسه‌مك‌ ايسته‌ينلره‌ اولگو واؤرنك‌ اولموشدور. آما ايشين‌ ضرري‌ اوراسيندادير كي‌، بو كؤچورمه‌ ايشي‌ ايله ‌مشغول‌ اولانلار بير چوخ‌ حاللاردا مسأله‌ني‌ بونونلا قورتارميش‌ سانيب‌ و اؤز يئرلي‌ فولكلورلاريني‌ توپلاماغا و آراشديرماغا لازيمي‌ رغبت‌ گؤسترميرلر. بئله‌ليكله‌ ده‌ جنوبي‌ آذربايجاندا و ايرانين‌ جنوبي‌ آذربايجاندان‌ قيراق‌ باشقا بؤلگه‌لرده‌ ياشايان‌ آذريلرين‌ فولكلور ماترياللاري‌نين‌ توپلانما و آراشديرما ايشيني‌ لنگيديرلر. بو دوغرودور كي‌، اوتايلي‌ و بوتايلي‌ ايكي‌ قارداش‌ خلقين ‌فولكلور ملزمه‌لري‌ اساس‌ صورتده‌ سؤز قورولوشو و مضمون‌ اعتيباريله‌ درين ‌اتنيك‌ ياخينليغا و حتي‌ عئيني‌ليگه‌ ماليك‌ اولدوقلاري‌ حالدا، هر بؤلگه‌نين ‌فولكلورو اؤز ديالكت‌ ويئرلي‌ واريانت‌ خوصوصيتلريني‌ تام‌ ساخلاماليدير.اساساً فولكلورون‌ علمي‌ - تدقيقي‌ توپلانيب‌ آراشديريلماسي‌، بو خوصوصيتلره‌ اساس‌ يئر وئرمكله‌ مومكون‌ اولا بيلر. بوندان‌ علاوه‌، همين‌ اللي‌ ايلده‌ شيمالي ‌آذربايجاندا حاكيم‌ كسيلميش‌ ايدئولوژيدن‌ دولايي‌ فولكلورون‌ بير سيرا ساحه‌سي‌، او جومله‌دن‌ اينانيش‌ و اعتيقادلارا عاييد قيسمي‌ بو سون‌ زامانلاراقدر ايشله‌نيلمه‌ميش‌ قالميشدير.

جنوبي‌ آذربايجاندا شيفاهي‌ خلق‌ ادبياتي‌نين‌ نيسبي‌ حالدا آزاد و ثمره‌لي ‌توپلانيب‌ دؤوري‌ مطبوعاتدا چاپ‌ ائديلمه‌سي‌ ۱۹۴۵- ۱۹۴۶-جي‌ ايللرده ‌اولموشدور. بو ايللر عرفه‌سينده‌ ايكينجي‌ دونيا موحاريبه‌سي‌نين‌ ايدامه‌سينده‌ وايرانين‌ موعين‌ ايستراتژيك‌ سببلره‌ گؤره‌ جنوبدا اينگيليس‌ و آمريكا اوردولاري‌ وشيمالدا قيزيل‌ اوردو طرفيندن‌ ايشغال‌ ائديلمه‌سي‌ نتيجه‌سينده‌، رضاخانين ‌حؤكومت‌ باشيندان‌ گؤتورولمه‌سي‌ ايله‌ موقتي‌ ده‌ اولسا ايران‌ خلقلرينه‌ آزاد نفس ‌چكمك‌ ايمكاني‌ يارانير. بو شراييطين‌ اورتايا چيخماسي‌ ايله‌ ايراندا سورعتله ‌قلم‌ و عقيده‌ آزادليغي‌ برپا ائديلير، سياسي‌ محبوسلار بوراخيلير و جور به ‌جور سياسي‌ فيرقه ‌لر باش‌ قالديرماغا باشلايير. بو ايللرده‌ شيمالي‌ آذربايجاندان‌ اوركستر و تئاتر قروپلاري‌ جنوبا گلير و موختليف‌ شهرلرده‌ نوماييشلر و كونسرتلر وئريرلر. شيمالدان‌ عرب‌ اليفباسيله‌ چيخان‌ بيرسيرا شعر مجموعه‌لري‌ و ادبي ‌اثرلر گئنيش‌ صورتده‌ جنوبدا ياييلير.

بونلارين‌ ايچينده‌ همت‌ عليزاده‌نين‌ كوراوغلو داستانيندان‌ توپلاديغي‌ فولكلور اثري‌ ده‌ اولور. بونلاردان‌ علاوه‌، همان‌ ايللرده‌ تبريزده‌ وطن‌ يولوندا آديله‌ عرب‌ اليفباسيندا بوراخيلان‌ سياسي‌ - ادبي‌ روزنامه‌نين‌ خوصوصاً ادبيات‌ صحيفه‌سي ‌خلقه‌ ياديرغاميش‌ آنا ديللري‌ ايله‌ اولفت‌ ياراتماقدا يارديم‌ ائدير.

او ايللرده‌ ايراندا سياسي‌ فيرقه‌لرين‌ يارانماسي‌ ايله‌ ياناشيى٬ آذربايجاندا دموكرات ‌فيرقه‌سي‌ يارانير. بو فيرقه‌نين‌ يارانماسي‌ او گونكو سياسي‌ شراييطده‌ چوخ‌ موباحيثه‌لر يارادير. همين‌ فيرقه‌ اؤز ميللى مدني‌ موراجيعتنامه‌سينده‌ آذربايجاندا ديل‌ آزادليغي‌ و مكتبلرده‌ آنا ديلينده‌ درس‌ وئرمك‌ و ميللى مطبوعاتين‌ يارانماسيناشراييط‌ يارادير. تبريزده‌ و باشقا شهرلرده‌ روزنامه‌لر و نشريه‌لر چيخماغا باشلايير.ايبتيدائي‌ مكتبلر اوچون‌ آذربايجان‌ ديلينده‌ درس‌ كيتابلاري‌ حاضيرلانير، تبريزده ‌اونيورسيته‌نين‌ آچيليشي‌ و ميللى تئاتر ايله‌ ميللى اوركسترين‌ برپا ائديلمه‌سي ‌خلقه‌ حيات‌ سيرداشي‌ اولان‌ ائل‌ نغمه‌لرينه‌ يئني‌ قول-قاناد وئرير. اونيورسيته‌ده‌ فولكلور درسلرينه‌ پروقرامدا يئر وئريلير. دؤوري‌ مطبوعاتدا وهاميدان‌ چوخ‌ آذربايجان‌ روزنامه‌سينده‌ فولكلور و خلق‌ ادبياتي‌ نومونه‌لري ‌اوچون‌ آچيلميش‌ سوتوندا بؤيوك‌ ميقداردا باياتيلار، آتالار سؤزو، مثللر و ميللى داستانلاردان‌ پارچالار و بير سيرا فولكلور آراشديرمالاري‌ وئريلير. بونلاردان ‌بعضيلري‌ خوصوصيله‌ آتالار سؤزو و مثللر درسليكلره‌ سالينير.

بيز بورادا آذربايجان‌ روزنامه‌سينده‌ آرديجيل‌ حالدا ايكي‌ آيري‌-آيري‌ باشليق‌آلتيندا بيري‌: آذربايجانين‌ ميللى داستانلاري‌ عونواني‌ ايله‌ روزنامه‌نين ۱۵۰-جي‌ نؤمره‌سيندن‌ (۲۴ ايسفند ۱۳۲۴ دن‌...) باشلاياراق‌ آرديجيل‌صورتده‌ چاپ‌ ائديلن‌ نومونه‌ و آراشديرمالاردان‌، ايكينجيسي‌ آذربايجان‌ خلق ‌ادبياتي‌ عونواني‌ ايله‌ روزنامه‌نين‌ ۲۹۴-جو نؤمره‌سيندن‌ (۱۹ شهريور ۱۳۲۵دن‌...)يئنه‌ آرديجيل‌ صورتده‌ وئريلن‌ خلق‌ ادبياتي‌ نومونه‌لري‌ اولموشدور.

آذربايجان‌ ميللى داستانلاري‌ عونواني‌ ايله‌ وئريلن‌ يازيلار م‌.ع‌.قوسي‌ (فرزانه‌)طرفيندن‌ حاضيرلانميشدير. بورادا داستانلارين‌ يارانماسي‌ باره‌ده‌ بيرباشلانيشدان‌ سونرا او گونه‌ قدر جنوبي‌ آذربايجاندا اساسا تانينماميش‌ و ايلك‌ دفعه‌ اولاراق‌ چوخ‌ گئنيش‌ اؤلچوده‌، خوصوصيله‌ دده‌ قورقود داستانلاريندان ‌چوخلو نومونه‌لر وئريلميشدير. بو نومونه‌لري‌ وئرمكده‌ توركيه‌ عاليمي‌ موعليم ‌رفعتين‌ ۱۹۱۶-جي‌ ايلده‌ عرب‌ اليفباسيله‌ چاپ‌ ائتديرديگي‌ نوسخه‌ و بير ده‌آذربايجان‌ عاليمي‌ حميد آراسلي‌نين‌ ۱۹۳۹-جو ايلده‌ اوگونكو لاتين‌ اليفباسيله ‌چاپ‌ ائتديرديگي‌ نوسخه‌ اساس‌ گؤتورولموشدور. داستانلارين‌ ديل‌ وخوصوصيتلري‌ ساخلانيلديغي‌ حالدا اوخوجولار آراسيندا گئنيش‌ يئر آچميش ‌و چوخلو ماراق‌ ياراتميشدير. دده‌ قورقود داستانلاريندان‌ سونرا همين‌ سوتوندا قهرمانليق‌ داستانلاريندان‌ نومونه‌لر گتيريلميشدير.

بو يازيلاردا آرا-سيرا وئريلن‌ آراشديرمالاردان‌ بير نومونه‌ كيمي‌ باشلانيشدان ‌نئچه‌ سطير گتيريريك‌:

ميللى داستانلار، ميلتلرين‌ كئچيرديكلري‌ ايفتيخار و عظمت‌ و يا سوقوط‌و اسارت‌ دؤورلرينده‌ اوز وئرن‌ حاديثه‌ و اولايلاردان‌ روحلاناراق‌ ووجوده‌ گلميشلر.

هر ميلتين‌ كئچميشي‌ شانلي‌ و موقدس‌ خاطيره‌لري‌، مليت‌ روحونو تحريك‌ ائتمك‌، بيرلشديرمك‌ و اوميدلنديرمكده‌ بؤيوك‌ قوّته‌ ماليكدير.

دده قورقود حكايه‌لري‌، اصلي‌ كرم‌، عاشيق‌ غريب‌، عاشيق‌ عباس‌،كوراوغلو وساير داستانلار آذربايجانين‌ شرفلي‌ كئچميشيني‌ ميللى عظمتيني‌ وحياتيني‌ موحافيظه‌ ائتديكلري‌ اوچون‌ قيمتلنديريلير...(آذربايجان‌ روزنامه‌سي‌،۲۴ ايسفند ۱۳۲۴)

آذربايجان‌ ميللى داستانلاري‌ عونوانيله‌ گئدن‌ يازيلارين‌ جماعتده‌ علاقه ‌ياراتديغينا گؤره‌، روزنامه‌نين‌ يازيچيلار هيأتي‌ طرفيندن‌ خلق‌ ادبياتينا داها اوستون‌ يئر وئرمك‌ اوچون‌، يوخاريدا آد آپاريلان‌ ۲۹۴-جو نؤمره‌ده‌ بئله‌ بيربيلديريش‌ وئريلير:

آذربايجان‌ خلق‌ ادبياتي‌ - آذربايجان‌ فولكلورونون‌ ان‌ گئنيش‌ و زنگين ‌قيسمتي‌ اولان‌ خلق‌ ادبياتي‌ حيصه‌سيني‌ توپلاييب‌ نشر ائتمك‌ آرزوسيله‌ بوگوندن‌ باشلاياراق‌ آذربايجان‌ روزنامه‌سينده‌ بير سوتون‌ آچيلير.

آذربايجانين‌ موختليف‌ نوقطه‌لريندن‌ اولان‌ ماراقلي‌ و هوسكارلاردان‌ تمنا ائديلير آذربايجان‌ فولكلورونون‌ بو حيصه‌سي‌نين‌ تکميلى صورتده‌ توپلانماسي ‌اوچون‌ يوخاريداكي‌ مؤوضوعلارا عاييد معلوماتلاريني‌ دقتله‌ توپلاييب ‌آذربايجان‌ روزنامه‌سي‌ ايداره‌سينه‌ گؤندرسينلر. آذربايجان‌ روزنامه‌سي‌.

بو بيلديريشدن‌ سونرا روزنامه‌نين‌ همين‌ نؤمره‌سيندن‌ باشلاياراق‌ بير پارا آراشديرمالارلا برابر خلق‌ ادبياتي‌نين‌ آيري-آيري‌ نؤوعلريندن‌ و هاميدان‌ چوخ‌ باياتيلاردان‌ و آتالار سؤزلريندن‌ نومونه‌لر وئريلميشدير.

 

م‌.ع‌.قوسي‌(فرزانه‌)نين‌ همين‌ نؤمره‌ده‌ يازديغي‌ آراشديرمادا دئييلير:

آذربايجان‌ شيفاهي‌ خلق‌ ادبياتي‌ اؤز گئنيشليگي‌، بديعي‌ گؤزلليگي‌ ودولغون‌ معناسي‌ ايله‌ آذربايجان‌ فولكلورو ايچريسينده‌ ان‌ گؤركملي‌ يئرتوتموشدور.اؤلكه‌نين‌ جوغرافيا دورومو، اونون‌ اوجا داغلاري‌، آخار چايلاري‌،اينسانلارين‌ ياشاييشي‌ اوچون‌ اويغون‌ آب‌هواسي‌، طبيعي‌ اوتلاقلاري‌، ان ‌قديم‌ عصيرلردن‌ چوخلو مدني‌ ملتلر ايله‌ قونشو اولوب‌، بؤيوك‌ تاريخي حاديثه‌لره‌ شاهيد اولماسي‌، بوردا ياشايان‌ ايستعدادلي‌، قهرمان‌ و احساسلي ‌خلقلره‌ ايمكان‌ وئرميشدير كي‌، ياشاديقلاري‌ موحيطدن‌، فردي‌ و ايجتيماعي ‌حياتدان‌. افسانه‌وي‌ وحقيقي‌ حاديثه‌لردن‌ سوژه‌ آلماقلا آذربايجان‌ خلق ‌ادبياتيني‌ ياراديب‌ تكميللشديرسينلر.

آذربايجان‌ خلق‌ ادبياتي‌، چوخ‌ قديم‌ دؤورلردن‌ آذربايجاندا ياشايان‌ خلق ‌كوتله‌لري‌نين‌ حياتلاريني‌، اورك‌ آرزولاريني‌، اونلارين‌ قهرمانليق‌ وديلاورليكلريني‌ تصوير ائتمكده‌ چوخ‌ بؤيوك‌ رول‌ اويناميشدير. او، بوتون ‌اويدورمالاردان‌ (ساختاكارليقلاردان‌) ايراق‌ و دايماً حياتيني‌ ساده‌ و پاك‌ حالدا باشا آپاران‌ اينسانلارين‌ روحوندان‌ جوشدوغو اوچون‌ ديقتي‌ چكن‌ اهميته ‌ماليكدير...

آذربايجانين‌ خلق‌ ادبياتي‌نين‌ تاريخي‌ اؤلكه‌نين‌ مدنيتي‌ و ادبيات‌ تاريخي قدر چوخ‌ قديمدير. بئله‌ كي‌، بيز هله‌ اونون‌ بعضي‌ فانتاستيك‌ و افسانه‌وي ‌نومونه‌لرينه‌ ميلاددان‌ نئچه‌ قرن‌ اول‌ يازيلميش‌ اوستادا و هابئله‌ يونان ‌تاريخچيسي‌ هرودوتون‌ اثرلرينده‌ تصادوف‌ ائديريك‌...

بو عومومي‌ آراشديرمادان‌ سونرا باياتيلارين‌ بديعي‌ خوصوصيتلري‌ باره‌ده ‌ايضاحات‌ وئريلير و اونون‌ آردينجا باياتيلاردان‌ چوخلو نومونه‌لر گتيريلير. بونومونه‌لرين‌ ايچريسينده‌ م‌.ع‌.قوسي‌ (فرزانه‌)نين‌ توپلاديغي‌ باياتيلاردان علاوە‌، رسول ‌سرحددارين‌، حسين‌ صابر زامانين‌، فاطمه ‌خانيم‌ ميرزائي‌نين‌ و ابوالفضل ‌حسيني‌نين‌ و هابئله‌ آيريلاري‌نين‌ گؤندرديكلري‌ باياتيلار درج‌ ائديلميشدير.

 

باياتيلاردان‌ علاوه‌، حسين‌ صابرزامانين‌ و خانيم‌ دانشين‌ گؤندرديكلريندن‌ بيرچوخ‌ آتالار سؤزو، مثللر و تك‌ بير مزه‌لي‌ حكايه‌لرده‌ چاپ‌ ائديلميشدير.

همين‌ سيرادا او گونلرده‌ مطبوعاتدا فعال‌ ايشتيراك‌ ائتميش‌ گونئي‌ آذربايجانين ‌معروف‌ شاعيري‌ حبيب‌ ساهير، روزنامه‌نين‌ بير نئچه‌ نؤمره‌سينده‌ خلق‌نغمه‌لري‌ عونواني‌ آلتيندا آشاغيداكي‌ دؤردلوكلره‌:

 

آخوند مني‌ اوخوتدو

قارا ساچيمي‌ توخوتدو

قارا ساچيمين‌ شيوه‌سي

‌قيزيلداندي‌ دوگمه‌سي‌.

گلين‌، گلين‌ قيز گلين

‌اينجيلري‌ دوز گلين‌

يئددي‌ اوغلان‌ ايسته‌رم‌

سون‌ بئشيگين‌ قيز گلين‌

 

هوپ-هوپون‌ اولسون‌ دايي

‌گول‌ توپون‌ اولسون‌ دايي‌

آغ‌ اوتاغين‌ ايچينده‌

نيشانلون‌ اولسون‌ دايي‌

بديعي‌ ايضاحلار و اويوشدورمالار يازميشدير.

يئنه‌ نومونه‌ اولاراق‌ همين‌ ايللرده‌ هلال‌ ناصري‌ طرفيندن‌ كؤشكي‌ بالابان‌اويونو و بو اويون‌ ايله‌ بيرليكده‌ اوخونان‌ معروف‌ ائل‌ نغمه‌سي‌ ايلك‌ دفعه ‌مطبوعاتا يول‌ تاپميشدير:

بو اويون‌ آخشام‌ وقتي‌ گون‌ باتان‌ زامان‌ باشلاناردي‌. اوينايانلارين‌ دا سايي‌ هر نه‌ قدر اولسايدي‌ عئيبي‌ يوخ‌ ايدي‌. اول‌ اوينايانلار حلقه‌ كيمي‌ دوزولوب‌ قوللاريني‌ بير - بيرينه‌ كئچيريرديلر و هركس‌ ده‌ گرك‌ قولونو او بيري‌نين‌ قولونا كئچيرندن‌ سونرا اللريني‌ دال‌ طرفده‌ مؤحكم‌ بير-بيرينه‌ كئچيره ‌ايدي‌. ائله‌ كي‌ اولينجي‌ حلقه‌ دوزلدي‌، ايكينجي‌ حلقه‌ اونلارين‌ چيگنينه‌ چيخاردي‌ و يئنه‌ حلقه‌ وورارديلار. اوچونجو سيرا داايكينجي‌نين‌ چيگنينه‌ چيخاردي‌. ائله‌ كي‌، بو اوچ‌ صف‌ دوزه‌لردي‌، بو سؤزلري ‌اوخويوب‌ و فيرلانارديلار تا گون‌ باتاردي‌ و اويون‌ داغيلاردي‌. هلال‌ ناصري‌.

 

كؤشكي‌ بالابان‌ آرازاباخار

آرازين‌ سويي‌ گؤزلردن‌ آخار

آي‌ آراز قوري‌، آخما بير زمان‌،

ائي‌ بيزي‌ اودا يانديريب‌ ياخان‌

سنله‌ آيريلدي‌ آنا بالادان٬

‌كؤشكي‌ بالابان‌ آرازا...

 

آنا چيغيريرواي‌، بالام‌ هاني‌

بالا چيغيرير واي‌ آنام‌ هاني‌

مَلر قويدون‌ سن‌ هر ايكي‌ جاني

‌كؤشكي‌ بالابان‌ آرازا...

 

داغلاريندا وار قانيمين‌ ايزي

‌ايندي‌ ده‌ باخير آنامين‌ گؤزو

اوجا داغلاردان‌ آختارير بيزي

‌كؤشكي‌ بالابان‌ آرازا...

 

گون‌ باتان‌ زمان‌ قلبيم‌ دارالير

باغريم‌ اولور قان‌ رنگيم‌ سارالير

باخارام‌ سنه‌ هاوا قارالير

كؤشكي‌ بالابان‌ آرازا...

 

ياردان‌ آيريلدي‌ آداخلي‌ قيزلار

ديزي‌ قوجاقلي‌، اوركدن‌ سيزلار

دؤوره‌مه‌ گلين‌ آي‌ آداخسيزلار

كؤشكي‌ بالابان‌ آرازا...

 

ايللر دولاندي‌، آغلاركن‌ ياتديق‌

طالع‌ اوياندي‌ بير - بيرين‌ تاپديق‌

بير اورك‌ - بير قان‌ بير يئره‌ چاتديق

‌محبت‌ گؤزو بير يئره‌ باخار

آرازين‌ سويو گؤزلردن‌ آخار

 

چاتدي‌ بير - بيره‌ اوغول‌ آنالار

اوزاقدان‌ گؤروب‌ قوللارين‌ آچار

آنان‌ گل‌ دئييب‌، باغرينا باسار

محبت‌ گؤزو بير يئره‌ باخار،

آرازين‌ سويو گؤزلردن‌ آخار

بونلاردان‌ علاوه‌، فريدون‌ بازرگان‌، رضا آذري‌، احمد - احمد (احمد موسوي‌)طرفيندن‌ هم‌ آذربايجان‌ و هم‌ يئني‌ شرق‌ روزنامه‌لرينده‌ فولكلورون‌ ماهيتي‌،اونون‌ تاريخي‌ و كوتله‌وي‌ اهميتي‌ و توپلانيب‌ آراشديريلماسي‌ باره‌ده‌ بير سيرا نظري‌ مولاحيظه‌لر يازيلميشدير.

بئله‌ليكله‌ ده‌ او بير ايلده‌ آذربايجان‌ فولكلورو و خلق‌ ادبياتي‌نين‌ توپلانماسي‌،آراشديريلماسي‌ و نشري‌ اوغروندا ايلك‌ آدديملار آتيلميشدي‌...

لاكين‌، بوتون‌ باشقا ميللى - مدني‌ ساحه‌لرده‌ اولدوغو كيمي‌، خلق‌ ادبياتي‌نين ‌توپلانماسي‌، آراشديريلماسي‌ و نشري‌ ايشي‌ ده‌ تكجه‌ بير ايل‌ دوام‌ ائده‌بيلدي‌.آذربايجان‌ خلقي‌نين‌ ميللى - مدني‌ وارليغيندان‌ مودافيعه‌ ائدن‌ بو حركات‌، دونيا سياستيني‌ فيرلادان‌ سياستچيلرين‌ ايستراتژيك‌ ايستكلري‌ و بيرينجي‌ نؤوبه‌ده ‌نفت‌ ياريشلاري‌ قارشيسيندا قوربان‌ كسيلدي‌. آذربايجان‌ بير داها زيندانلار، دار آغاجلاري‌ و سورگونلر ديارينا چئوريلدي‌. قلملر سينديريلدى٬‌ كيتابلاريانديريلدي‌، ميللى تئاتر قاپاندي‌، نغمه‌لر قانا بوياندي‌ و ايرانين‌ ساتقين‌ حؤكومتي ‌يئردن‌- گؤيدن‌ بو حركاتين‌ علئيهينه‌ تؤهمتلر ياغديرماغا باشلادي‌. محكمه‌لر برپا ائديلدي‌ و بو محكمه‌لرده‌ حتي‌ اؤز آن‌ ديلينده‌ شعر يازانلار و فولكلور آراشديرانلار دا سوآل‌ - سورغويا چكيلديلر.

رضاخان‌ ايستيبدادي‌نين‌ داها دا قانلي‌ و قورخونج‌ شكيلده‌ يئني‌دن‌ برپا ائديلمه‌سينه‌ باخماياراق‌ بو بير ايلين‌ عرضينده‌ ديله‌، ادبياتا و ائله‌جه‌ ده‌ خلق ‌ادبياتينا يارانان‌ ايستك‌ هم‌ حسرت‌ دولو سينه‌لرده‌، هم‌ ده‌ يئره‌ قويلانميش ‌صحيفه‌لرده‌ ساخلانيلير. دده‌قورقودون‌ مشعلي‌ كؤورك‌ اوركلره‌ ايشيق‌ ساچير...

آذربايجاندا آچيق‌ آسيميلاسيا سياستي‌ يورودن‌ حاكيميت‌ بوتون‌ فاشيستي ‌شيوه‌لره‌ ال‌ آتديغي‌ حالدا، دماغوژي‌ تشبوثلردن‌ ده‌ چكينمه‌ميشدي‌.۲۷-۱۳۲۶ جى ايللرده‌ تبريز دانيشگاهي‌نين‌ يئني‌دن‌ برپا ائديلمه‌سي‌ عرفه‌سينده ‌تهراندا بو ايشين‌ سرانجامي‌ اوچون‌ گتيريلن‌ اوستادلاردان‌ بديع‌الزمان‌ فروزانفر چيخيشيندا آذربايجان‌ فولكلورونون‌ توپلانيلماسيني‌ دانيشگاهين‌ و بيرينجي ‌نؤوبه‌ده‌ ادبيات‌ دانيشكده‌سي‌نين‌ اساس‌ وظيفه‌لريندن‌ بيري‌ آدلانديرديغينا باخماياراق‌، اوتوز ايله‌ ياخين‌ مودتده‌ نشر ائديلن‌ تبريز ادبيات‌ دانيشكده‌سي ‌نشريه‌سينده‌ حتي‌ بير صحيفه‌ليك‌ قدر ده‌ اولسون‌ آذربايجان‌ فولكلورونا عاييد مطلب‌ يازيلماميشدير.

۳۲-۱۳۳۰جى ايللرينده‌ ايراندا ضيد ايمپرياليست‌ حركاتي‌ يئني‌دن‌ جانلانير. ايران‌ خلقلري‌ اينگيليس‌ ايمپرياليستلريني‌ ايراندان‌ چيخارماق‌ و نفت‌ صنايعيني ‌ميللىلشديرمك‌ اوچون‌ مئيدانا چيخيرلار. آما بو حركاتين‌ گئديشينده‌ ايران موطلقييتى آذربايجاني‌ هر يئردن‌ چوخ‌ قورويور. تهراندا قورولان‌ ميللى دموكراتيك‌ جمعيتلرين‌ فعاليتي‌ اوچون‌ بورادا ايمكان‌ وئريلمير. بو جمعيتلري ‌تبريزده‌ و باشقا آذربايجان‌ شهرلرينده‌ قوروماغا چاليشانلار دسته‌ - دسته‌ حبسه ‌آلينيرلار و يا سورگون‌ ائديليرلر. بونونلا بئله‌ آذربايجان‌ ديلينده‌ روزنامه‌ چيخير وتهراندا برپا ائديلميش‌ آذربايجان‌ جمعيتي‌ ميللى اورکستر يارادير و بير سيرا ادبي ‌درنكلر يارادير و بروشورلار چاپ‌ ائدير.

اينگيليس‌ - آمريكا ايمپرياليستلري‌نين‌ دربار و شاهين‌ ال‌ بيرليگي‌ ايله ‌ياراتديقلاري‌ ۲۸ مورداد كودتاسي‌، خلقلرين‌ نئچه‌ ايللر عرضينده‌ الده ‌ائتديكلري‌ ميللى- دموكراتيك‌ نايليتلري‌ هئچه‌ چيخاردير. اؤلكه‌نين‌ ميللى ثروتيني‌ يئني‌دن‌ بؤلوشمك‌ اوچون‌ تازا بير كونسرسيوم‌ دوزه‌ديلير ونفتين ‌ميللىلشديرمه‌سينده‌ جانلانان‌ حركات‌ بير ده‌ آلوولانماسين‌ دئيه‌، هر جور سياسي ‌فعاليت‌ ياساق‌ ائديلير. هيچقيريقلار سينه‌لرده‌ بوغولور و هئچ‌ كسين‌ جينقيريني ‌چيخارتماغا جورأتي‌ قالمير. بئله‌ بير آغير ايختيناق‌ شراييطينده‌ آذربايجان‌ ديلي ‌ادبياتي‌ و فولكلوري‌ ايله‌ گؤزله‌نيلمز بير مؤعجوزه‌ باش‌ وئرير. بؤيوك‌ سؤز اوستادي‌ شهريارين‌ حيدر بابايا سلام‌ منظومه‌سي‌ اورتايا چيخير. حيدربابا اثري‌نين‌ بئله‌ گؤزله‌نيلمز ظوهورو و اونون‌ هله‌ چاپ‌ اولمادان‌ اليازماسي‌ حاليندا ال‌ به‌ ال‌ گزمه‌سي‌ و ديللر ازبري‌ اولماسي‌، جنوبي‌ آذربايجان‌ شعرينده‌ يئني‌ بيرجانلانما يارادير. بو جانلانما تهراندا حيدربابا درنگي‌نين‌ يارانماسينا و تبريزده‌يئني‌ نسيلين‌ آذربايجان‌ ديلي‌، ادبياتي‌ و فولكلورو ايله‌ اوغراشماسينا شراييط ‌يارادير.

حيدربابا منظومه‌سي‌ و اونون‌ ديل‌، اوسلوب‌ و مضمون‌ اعتيباري‌ ايله‌ آذربايجان ‌فولكلورو و شيفاهي‌ خلق‌ ادبياتي‌ ايله‌ ياخين‌ و آيريلماز سيرداشيليغي‌، گؤز اؤنوندن‌ ييغيشديريليب‌ سينه‌لرده‌ ياشايان‌ فولكلور و خلق‌ ادبياتينا هارايچي ‌اولور. تهراندا حيدربابا درنگي‌ عوضولري‌ ديل‌ قايدالاري‌ يازماغا، آذربايجان ‌نظم‌ و نثر اثرلري‌ ايله‌ اوغراشماغا باشلاييرلار.

همين‌ ايللرده‌ تبريزده‌ ده‌ جوان‌ نسيل‌ بو مسأله‌لريله‌ ماراقلانير و بير سيرا آختاريشلارا ال‌ آتير. لاكين‌ بو تلاشلارين‌ نتيجه‌سي‌ ۱۳۴۲-۱۳۴۱ جى ايللردن‌ قاباق ‌اؤزونو گؤسترمگه‌ ايمكان‌ تاپا بيلمير. بو ايللرده‌ آمريكا ايمپرياليزمي‌ ايراندا اؤزسياسي‌ ايقتيصادي‌ سولطه‌سيني‌ داها دا مؤحكملنديرمك‌ و اؤلكه‌ني‌ آرتيقدان ‌آرتيغا آسيلي‌ حالا ساليب‌ مصرف‌ بازارينا چئويرمك‌ قصديله‌ ايرانا آغ‌اينقيلاب‌ آدلي‌ بير سووقات‌ گتيرير. او بو گتيرديگي‌ سووقاتي‌ پهلوي‌ رژيمي‌ و ايران‌ حاكيميتينه‌ دوشورمك‌ اوچون‌، ايراندا زاپاس‌ كيمي‌ ال‌ آلتي‌ ساخلاديغي‌ عاميللردن‌ فايدالانماق‌ قرارينا گلير.اورتايا چيخان‌ چارپيشمالارين‌ گئديشينده‌ موقتي‌ اولاراق‌ بير آچيق‌ فضا يارانير. ايكي‌ يا اوچ‌ ايل‌ دوام‌ ائدن‌ بو فضادا تهراندا نصرت‌ الله‌ فتحي‌نين‌ يادي‌ از حيدرباباسي‌، دكتور سلام‌ الله‌ جاويدين‌آذربايجان‌ فولكلورو نومونه‌لري‌، م‌.ع‌.فرزانه‌نين‌ باياتيلاري‌ و مباني‌ دستورزبان‌ آذربايجاني‌نين‌ بيرينجي‌ جيلدي‌، بولود قارا چورلونون‌(سهندين‌)سازيمين‌ سؤزونون‌ بيرينجي‌ جيلدي‌ و بير سيرا باشقا شئيلر اورتايا چيخير.تبريزده‌ صمد بهرنگي‌ و اونون‌ امكداشلاري‌ بير مودت‌ كيهان‌ روزنامه‌سينده‌ وسونرا مهدآزادي‌ نشريه‌سينده‌ چاپ‌ ائتديكلري‌ يازيلارلا باشلاسا دا، بو بيرطرفدن‌ صمد ايله‌ بهروزون‌ ايش‌ بيرليگي‌ ايله‌ آذربايجان‌ شيفاهي‌ خلق ‌ادبياتيندان‌ آذربايجان‌ ناغيللاريني‌، قوشماجا و تاپماجالاريني‌ چاپ ‌ائتديرمه‌لرينه‌ و او بيري‌ طرفدن‌ حسين‌ صديقين‌ فولكلورون‌ بير سيرا ساحه‌لرينده‌ چاليشمالرينا يول‌ آچير. بو حركت‌، دئمك‌ اولار كي‌، جنوبي‌ آذربايجاندا پهلوي‌ رژيمي‌ ايللرينده‌ خلق‌ ادبياتي‌نين‌ توپلانماسي‌،آراشديريلماسي‌ و نشري‌ طالعينده‌ سون‌ شانس‌ حساب‌ اولور. اوندان‌ سونرا آذربايجان‌ فولكلورونا عاييد بير شئيلر چيخا بيلسه‌ ده‌ يالنيز فارس‌ ديلينده ‌چيخير. سؤز يوخ‌ كي‌، حتي‌ همان‌ ايكي‌ اوچ‌ ايلين‌ عرضينده‌ فولكلور ايله ‌مشغول‌ اولانلاردان‌ بعضيلري‌ توپلاديقلاري‌ ملزمه‌لري‌ و يازديقلاري ‌آراشديرمالاري‌ فارسجا يازماغا مجبور قالميشديلار.

بئله‌ليكله‌ پهلوى رژيمي‌نين‌ آچيق‌ آسيميلياچيليق‌ حاكيميتي‌ ايللرينده‌ آذربايجان‌ديليني‌، خلق‌ ادبياتيني‌ و ميللى وارليغيني‌ قورويانلار و ياشادانلار اساسدا خلق ‌كوتله‌لري‌ اولدوغو حالدا بو يولدا زحمته‌ قاتلاشان‌ نئچه‌ نفرين‌ جاندان‌ مايا قويماقلا نئچه-نئچه‌ فولكلور اثري‌ مئيدانا چيخارتديقلاري‌ اونودولماز غئيرته‌ واهميته‌ ماليكدير. بيز بو معروضه‌نين‌ سون‌ حيصه‌سيني‌ بو اثرلره‌ و اونلاري ‌دوغرولدانلارا حصر ائديريك‌.

 

 

 

آذربايجان‌ فولكلوروندان‌ نومونه‌لر، جيلد 1 و 2

(دكتور سلام‌ اللۂ جاويد)

عؤمرونون‌ چوخ‌ حيصه‌سيني‌ سياسي‌ فعاليتلرده‌ باشا وورموش‌ و جنوبي ‌آذربايجانين‌ ۲۵-۱۳۲۴جى حركاتيندا ياخيندان‌ ايشتيراك‌ ائدن‌ (اول‌ داخيله ‌ناظيري‌ و سونرا دا آذربايجان‌ واليسي‌ اولان‌) و او ايللرده‌ باش‌ وئرن‌ حاديثه‌لر ايله ‌رابيطه‌ده‌ سياسي‌ شخصيتي‌ چوخلو موباحيثه‌لر دوغوران‌، لاكين‌ هر حالدا آذربايجاني‌ اوركدن‌ سئون‌ و حيدربابا درنگي‌ تشكيل‌ اولان‌ گوندن‌ (۱۳۳۵-جي‌ايلدن‌)اونون‌ فعال‌ ايشتيراكچيلاريندان‌ اولان‌ و اوزون‌ ايللر تهراندا ياشاديغي ‌حالدا، اؤلندن‌ سونرا وصيتي‌ اوزره‌ تبريزده‌ تورپاغا تاپشيريلان‌ دوكتور سلام‌ اللۂ جاويد، ۱۳۴۴-جو ايلدن‌ آذربايجان‌ فولكلورونون‌ توپلاييب‌ نشر ائتمك‌ قرارينا گلميش‌ و توپلاديغي‌ اؤرنكلري‌ آذربايجان‌ فولكلوروندان‌ نومونه‌لر آدي‌ ايله ‌ايكي‌ جيلدده‌ نشر ائتميشدير. بو ايكي‌ جيلددن‌ علاوه‌، او سونرادان‌ ييغديغي ‌تازا نومونه‌لري‌ ده‌ كيچيك‌ جوزوه‌لر شكيلينده‌ بوراخميشدير.

دوكتور جاويدين‌ ۱۳۵۸ - جي‌ ايلده‌ آذربايجان‌ فولكلوروندان‌ نومونه‌لراثري‌نين‌ ايكينجي‌ چاپينا يازديغي‌ موقديمه‌ده‌ آشاغيداكي‌ ايضاحاتي ‌اوخويوروق‌:

محترم‌ اوخوجولار! نظروزه‌ چاتان‌ نمونه‌هاي‌ فولكلور آذربايجان‌ ۱۳۴۴-جو ايلده‌ آغير زحمتله‌ نشر اولونموشدور. اونون‌ ايكينجي‌ جلدي ۱۳۴۸-جي‌ ايلده‌ چاپدان‌ چيخاندان‌ سونرا ساواك‌ طرفيندن‌ ضبط‌ اولوب ‌آرادان‌ آپاريلدي‌. آوندان‌ سونرا آذري‌ ديلينده‌ داها هئچ‌ بير يازييا اجازه ‌وئريلمه‌دي‌. خوشبختانه‌ استبداد رژيمي‌ ييخيلديقدان‌ سونرا آذري‌ ديلينده ‌كتابلارين‌ چاپي‌ ممكن‌ اولموشدور.

ايراندا آذري‌ ديلينده‌ چيخان‌ بوتون‌ كتابلار، تورك‌ ديللي‌ خلقلر آراسيندا بؤيوك‌ علاقه‌ ايله‌ قارشيلانير. يازيلاري‌ يئني‌ الفبا اولان‌ يئرلرده‌ بو كتابلار اوالفبايا دؤنده‌ريلير و اونلارين‌ حقينده‌ نظريه‌لر و نظيره‌لر يازيلير. نئجه‌ كي‌ استاد شهريارين‌ حيدربابايه‌ سالام‌ كتابي‌ حقينده‌ شوروي‌ آذربايجانيندا، توركيه‌ده‌، كركوكدا مختلف‌ نظيره‌لر و نظريه‌لر يازيليب‌، كتابين‌ اصلي‌ده‌ مينلرجه‌ نسخه‌ده ‌چاپ‌ اولونوبدور. مرحوم‌ قاراچورلونون‌ سازيمين‌ سؤزو و منيم‌ يازديغيم‌آذربايجان‌ فولكلور نمونه‌لري‌ حقينده‌ شوروي‌ آذربايجاني‌نين‌ معروف‌ عالم‌ و يازيچيسي‌ ميرزا ابراهيموف‌ ۱۳۴۵-نجي‌ ايلده‌ ادبيات‌ و اينجه‌صنعت‌روزنامه‌سينده‌ گئنيش‌ بير مقاله‌ يازميشدير. نمونه‌هاي‌ فولكلور آذربايجان‌حقينده‌ يازيلان‌ سؤزلرين‌ بير قيسميني‌ بورادا نقل‌ ائتمگي‌ يئرلي‌ گؤردوم‌:

جاويدين‌ كيتابي‌نين‌ قيمتلي‌ جهتلريندن‌ بيري‌ اودوركي‌، ايراندا وجنوبي‌ آذربايجاندا سون‌ ايللر خلق‌ ياراديجيليغيني‌ اؤيرنمكده‌ علاقه‌نين ‌آرتديغيني‌ گؤسترمكله‌ موعين‌ درجه‌ده‌ بو احتياجي‌ اؤده‌يير...

بئله‌ بير نجيب‌ و خيرخواه‌ مقصدله‌ حركت‌ ائدن‌ موليف‌، آذربايجان‌ شيفاهي‌ ادبياتي‌نين‌ آتالار سؤزلري‌، باياتيلار، داستانلار، شرقيلر، اويونلار،قاراولليلر و سايرنؤوعلريندن‌ بعضي‌ نومونه‌لر كيتابا داخيل‌ ائتميشدير. هئچ‌ بيرآپاراتا ماليك‌ اولمادان‌، تك‌ باشينا و يا بير - ايكي‌ هوسكارين‌ پولسوز پاراسيز كؤمگي‌ ايله‌ خلق‌ ادبياتي‌نين‌ نومونه‌لريني‌ توپلاييب‌ چاپ‌ ائتمك‌ آغيرليغيني‌ وچتينليگيني‌ نظره‌ آلاراق‌ موليفين‌ زحمتينه‌ اينصافلا قييمت‌ وئريب‌، چوخ ‌فايدالي‌ ايش‌ گؤردوگونو دئمه‌لي‌ييك‌.

دوكتور جاويد آغيز ادبياتي‌ آدلانديرديغي‌ شيفاهي‌ خلق‌ ادبياتيندان‌ گتيرديگي ‌آيري‌- آيري‌ نومونه‌لري‌ هارادان‌ و كيمدن‌ اؤيرنديگيني‌ قئيد ائتمه‌ميش‌ و يا بلكه‌ده‌ قئيد ائتمك‌ ايسته‌مه‌ميشدير. او كيتابين‌ بيرينجي‌ جيلدينده‌ كيچيك‌ بير باشلانيشدان‌ سونرا، آغيز ادبياتي‌نين‌ آشاغيداكي‌ نؤوعلريندن‌:

آتالار سؤزو يا ائل‌ سؤزلري‌، باياتيلار، لايلالار، تاپماجالار، ناغيللار، داستانلار،شرقيلر (ماهنيلار)، حكايه‌لر، اويونلار، و... نومونه‌لر وئرميشدير. ايكينجي‌ جيلدده‌ فولكلور حقينده‌ گئنيش‌ بحث‌ آپارديقدان‌ سونرا حيات‌ و معيشت ‌روسوم‌- مراسيميندن‌، يعني‌ دوغولوش‌ و آد قويماق‌ مراسيميندن‌ باشلاميش‌ تا ائولمك‌ و دونيادان‌ گئتمك‌ و ياس‌ عادتلري‌ باره‌ده‌ معلومات‌ وئرديكدن‌ سونرا،يئنه‌ بيرينجي‌ جيلدده‌ اولدوغو كيمي‌ خلق‌ ادبياتي‌نين‌ آيري‌-آيري‌ نؤوعلريندن ‌نومونه‌لر گتيرميشدير. دوكتور جاويدين‌ ايكي‌ جيلدليگينده‌ درج‌ اولموش ‌ماترياللار يازي‌يا و سيستمه‌ سالينما جهتدن‌ بير پارا نوقصانلار داشيسا دا، بيرچوخ‌ تازا نومونه‌لر ايله‌ راستلاشماق‌ اولار. نومونه‌ اولاراق‌ بورادا ايكينجي‌جيلدده‌ تبريزين‌ دوببه‌لريندن‌ (مزه‌لي‌ و حاضير جواب‌ سيمالاريندان‌) وئرديگي ‌لطيفه‌لردن‌ ايكيسيني‌ آشاغيدا گتيريريك‌:

۱ - عباچى‌ اوغلو و گليردن‌ وئرگي‌ مأمورلاري‌: بير گون‌ عباچى اوغلونو ماليه‌ ايداره‌سينه‌ چاغيريب‌ اوندان‌ سوروشورلار كي‌، سيزين‌ گليريز آيدا نه ‌قدردير؟ جواب‌ وئرير٬ آيدا ۲۵- ۲۰ تومن‌، سوروشورلار سن‌ بو آز پولونان‌ نئجه ‌دولانيرسان‌؟ جواب‌ وئرير- سيزين‌ آژانلار كيمى (او تاريخده‌ آژانلار آيدا يئددي‌تومن‌ حوقوق‌ آليرديلار).

۲ - هونري‌ وار گليب‌ ايكي‌ دانا سنگك‌ آلسين‌: ايكينجي‌ دونيا موحاريبه‌سينده‌ تبريزده‌ چؤرك‌ آزالدي‌. اونو آلماق‌ اوچون‌ ساعاتلار وقت‌لازيم‌ ايدي‌. بو مسأله‌ني‌ حل‌ ائتمك‌ اوچون‌ جماعت‌ شهرداري‌ سالونونا ييغيشيرلار. چورك‌ حقينده‌ دانيشاندا بعضيلري‌ ده‌ هيتلرين‌ (جيبهه‌لرده‌)فتوهاتيندان‌ دانيشيرلار. اصغر قيليفتي‌ (جماعتين‌ آراسيندان‌) دانيشماغا ايجازه‌ايستير. سؤز آلاندان‌ سونرا دئيير: بو قدر هيتلري‌ تعريف‌ ائتمه‌يين‌، اگر غئيرتي‌ وقودرتي‌ وار گليب‌ تبريزده‌ ايكي‌ دانا سنگك‌ آلسين‌!

 

آذربايجان‌ ناغيللارى‌ (تولكو و كئچله‌ عايد ناغيللار)، سايالار،مقاله‌لر...حسين‌ محمدزاده‌ صديق‌

 

صمد و بهروزون‌ فولكلور توپلاما و آراشديرما ايشلرينه‌ آليشديقلاري‌ سيرادا،آذربايجان‌ كند و شهرلرينده‌ موعليمليك‌ وظيفه‌سينده‌ چاليشان‌ حسين‌محمدزاده‌ صديق‌ ده‌ اوزون‌ ايللر اؤز مطبوعاتي‌ و قلم‌ فعاليتلريله‌ ياناشي ‌آذربايجان‌ فولكلورونو توپلاما و آراشديرما ايشلرينده‌ ده‌ بير سيرا چاليشمالارا ال ‌آتميشدير. ايشلرينده‌ چوخ‌ چاليشقان‌ و يورولماز اولان‌ صديق‌ بو ايللرده ‌فولكلور ساحه‌سينده‌ فعاليت‌ گؤسترن‌ باشقالاري‌ كيمي‌ بير سيرا اثرلريني ‌فارسجا يازماغا مجبور قالميشدير:

باشلانيش‌. فولكلور يا فرهنگ‌ عاميانه‌ يا به‌ گونه‌اي‌ كه‌ برخي‌ استادان‌ به‌ كاربرده‌اند (هامويد) يعني‌ آنچنان‌ فرهنگ‌ و ادبياتي‌ كه‌ به‌ درازاي‌ صده‌ها و هزاره‌ها در ميان‌ مردم‌ و به‌ دست‌ مردم‌ ايجاد و پخش‌ شده‌است‌. هامويد همه‌ ‌نمودارهاي‌ زندگي‌ ملي‌، اعم‌ از باورهاي‌ ديني‌ و مذهبي‌، حماسه‌هاي‌ ملي‌، آداب و رسوم‌، رقصها و ترانه‌ها، سرگرميهاي‌ گوناگون‌، فرهنگ‌ و هنر و بطور كلي‌ طرزتفكر و انديشه‌هاي‌ ملتي‌ را دربر مي‌گيرد...بايك‌ سخن‌ نيكوترين‌ شناساننده ‌ملتي‌، هامويد آن‌ ملت‌ است‌.

بدين‌ گونه‌ اهميت‌ دانش‌ هامويد شناسي‌ شناخته‌ مي‌آيد و اينكه‌ چرا دركشورهاي‌ پيشرفته‌ به‌ اين‌ فن‌ ارزش‌ مي‌نهند، معلوم‌ مي‌گردد. سالها و قرنهاست ‌كه‌ بسياري‌ دانشمندان‌ درجه‌ اول‌ ملتها زندگي‌ خود را برسر اين‌ فن‌ گذاشته‌اند.مدتهاست‌ كه‌ كار خيلي‌ ملل‌ در مورد فولكلورشان‌ پايان‌ يافته‌ و مواد آن‌ با پژوهشگريهاي‌ گوناگون‌، مكرر در مكرر پخش‌ شده‌ است‌. و شايد كتابهايي‌ كه‌ دربرخي‌ از آنها تاكنون‌ در اينباره‌ انتشار يافته‌ است‌، بالغ‌ بر همه‌ كتابهاي‌ فارسي ‌نوشته‌ و پخش‌ شده‌ي‌ سالهاي‌ اخير (در) ايران‌ باشد!

در كشور ما، متأسفانه‌ از سوي‌ مقامات‌ رسمي‌ و دولتها تاكنون‌ رغبتي‌ به‌ اينكار نشان‌ داده‌ نشده‌است‌ و آنچه‌ كه‌ تاحال‌ حاضر در اين‌ مورد رفته‌، تلاشهاي‌ فردي ‌و شخصي‌ بوده‌ است‌... نگارنده‌ به‌ پيروي‌ از ذوق‌ شخصي‌ خود، مدتهاست‌ بخشي‌ از اوقاتش‌ را صرف ‌اين‌ مسئلۂ مهم‌ كرده‌ است‌ و آنچه‌ را كه‌ از مواد هامويد آذربايجان‌ يا (ضمن‌) زندگي‌ در ده‌ها و شهرها و نشست‌ و برخاست‌ با كسان‌ گوناگون‌ و رفت‌ و آمد به‌ محافل ‌مختلف‌ تاكنون‌ گرد آورده‌ است‌، هم‌ اكنون‌ زيردست‌ دارد و در نخستين‌ فرصت‌ انتشار خواهد داد.

بخش‌ بزرگي‌ از اين‌ كوششها را (افسانه‌ها و قصه‌ها) دربر مي‌گيرند كه‌ در چندين ‌زمينه‌ بخشبندي‌ شده‌اند و اينك‌ در اين‌ گفتارها بخشي‌ از آنها يعني‌ (افسانه‌ها وقصه‌هاي‌ وابسته‌ به‌ روباه‌) و نيز نقش‌ اين‌ حيوان‌ در موارد ديگر هامويد آذربايجان‌ را با سنجش‌ و بررسي‌ آن‌ در ادبيات‌ پارسي‌ و آذربايجاني‌ مي‌آورد واينك‌ لازم‌ مي‌داند بعنوان‌ سرآغاز، آگاهيهايي‌ درباره‌ هامويد (فولكلور)آذربايجان‌ و نحوه‌ كار خود به‌ علاقمندان‌ بدهد.

مواد هامويد آذربايجان‌ را مي‌توان‌ بدينگونه‌ شمرد: افسانه‌ها و قصه‌ها،استادنامه‌ها و دستانها، عاشيقنامه‌ها، تعريفنامه‌ها و منظومه‌هاي‌ گوناگون‌، باغلاماها، قوشماجاها و دوزگيها، وضرب‌المثلها، باياتيها و لايلاها، آغي‌،ازخزما، ماهني‌، تصنيف‌ و ترانه‌هاي‌ گوناگون‌، قطعات‌ موزون‌ و سرگرميها وبالاخره‌ چيستانها كه‌ هر كدامشان‌ را مي‌توان‌ در چندين‌ رديف‌ بخشبندي‌ كرد وهر يك‌ خود بحثي‌ جداگانه‌ دارند و اينك‌ درباره‌ افسانه‌ها و قصه‌هاي‌ مربوط‌ به‌روباه‌ (روباه‌ نامه‌) داريم‌...

صديق‌ بو باشلانيشدا تولكونون‌ خوصوصيتلري‌ ايله‌ رابيطه‌ده‌ توپلاديغي‌ بيرسيرا ناغيللاري‌ گتيرمكدن‌ اول‌ ناغيللارين‌ يارانماسيندا طبيعي‌-ايجتيماعي‌ حاديثه‌لرين‌ تأثيريندن‌، اينسانلارين‌ منيمسه‌ديكلري‌ ياشاييش‌ يوللاريندان‌ وخوصوصيله‌ حيوانلارا بسله‌ديگي‌ موناسيبتلردن‌ دانيشير.

وقتيله‌ دؤوري‌ مطبوعاتدا (اميد ايران‌ مجله‌سينده‌) چيخان‌ بو آراشديرمادان‌ علاوه‌، صديق‌ هفت‌ مقاله‌ - يئددي‌ مقاله‌ ده‌ بير داها ناغيللارين‌ يارانما مسأله‌سينه‌ قاييدير:

نمي‌توان‌ براي‌ به ‌وجود آمدن‌ آثار فولكلوريك‌ و از آن‌ ميان‌ افسانه‌ها وقصه‌ها تاريخ‌ معيني‌ قيد كرد. خلق‌ آنها را از دوران‌ حيات‌ ابتدايي‌ بشر ودگرگوني‌ زندگي‌ ميآغازد و مي‌كشد تا زمان‌ حاضر. يعني‌ از دوران‌ تحول‌ حيات‌، دوره‌هاي‌ گردآورى‌ خوراك‌ و دوره‌هاي‌ شكارچيگري‌، گله‌داري‌ وكشاورزي‌ تا عصر راديو و تلويزيون‌.

طبيعت‌ ملموس‌ براي‌ انسان‌ ابتدايي‌ دوره‌هاي‌ اوليه‌، پيوسته‌ منبع‌ الهام‌ وسرچشمه‌ تلقينات‌ و كتاب‌ آموزش‌ بوده‌ است‌. لطف‌ و قهر طبيعت‌، گردش‌ مرتب‌ شب‌ و روز و ماه‌ و سال‌ و حوادث‌ گوناگون‌ طبيعي‌ هميشه‌ فكر و انديشه‌ وخيال‌ او را به‌ سوي‌ خود كشيده‌ و وادارش‌ ساخته‌ كه‌ پديده‌هاي‌ طبيعي‌ وديده‌هاي‌ خود را تبيين‌ كند و به‌ خلق‌ افسانه‌ها كه‌ در حقيقت‌ توجيهي‌ ازحوادث‌ مختلف‌ دنياي‌ اطرافش‌ و معنايي‌ از رويدادهاي‌ طبيعت‌ است‌ به‌ پردازد.

بنابراين‌ پديده‌ها و عوامل‌ طبيعي‌ زاينده‌ قسمتي‌ از افسانه‌هاي‌ فولكلوريك‌ هستند. به‌ ديگر سخن‌، علت‌ زايش‌ ابتدايي‌ترين‌ افسانه‌ها، همانا حوادث‌ عالم‌ ورويدادهاي‌ طبيعت‌ ملموس‌ بوده‌ است‌.

اما رفته‌ - رفته‌ كه‌ حيات‌ انساني‌ دگرگون‌ شد و جامعه‌ها و اجتماعات‌ تشكيل‌گرديد، آفرينش‌ هنري‌ انسان‌ (نيز) در مسير تازه‌اي‌ افتاد و منبع‌ الهام‌ ديگري ‌يافت‌ كه‌ از آن‌ به‌ عوامل‌ و رخدادهار اجتماعي‌ تعبير مي‌شود.

اين‌ قسمت‌ از افسانه‌ها، عظيمترين‌ بخش‌ فولكلور هر سرزميني‌ را فرامي‌گيرد ومدتهاست‌ نظر دانشمندان‌ را به‌خود جلب‌ كرده‌است‌ كه‌ در تدوين‌ تاريخ ‌اجتماعي‌، فرهنگي‌. اقتصادي‌ و غيره‌ به‌ نحو شايسته‌اي‌ از آنها سود جويند. واينان‌، افسانه‌ها را منابعي‌ غني‌ و پر ارزش‌ در پژوهشهاي‌ جامعه ‌شناسي‌ تلقي ‌مي‌كنند. زيرا در اين‌ نوع‌ از افسانه‌ها، به‌ وضوح‌ تمام‌ فراز و نشيبها و جريانهاي ‌اجتماعي‌، جنگهاي‌ گروهي‌ و قبيله‌اي‌ و تمام‌ حوادثي‌ كه‌ در اجتماعات‌ بشرى ‌رخ‌ داده‌ به‌ دست‌ خود مردم‌ تصوير شده‌ است‌. (هفت‌ مقاله‌، ص‌ ۶۸ - ۶۵)

 

آذربايجان‌ ناغيللارى- افسانه‌هاى آذربايجان‌. قوشماجالار، تاپماجالار -متلها و چيستانها (صمد بهرنگى‌ و بهروز دهقانى)

 

پهلوي‌ حاكيميتي‌ ايللرينده‌، جنوبي‌ آذربايجاندا فولكلور و شيفاهي‌ خلق ‌ادبياتي‌نين‌ توپلانماسي‌، آراشديريلماسي‌ ونشري‌ ساحه‌سينده‌ چاليشانلار ايچريسينده‌ ايكي‌ امكداش‌، صمد بهرنگي‌ و بهروز دهقاني‌ گؤركملي‌ يئر توتورلار. اونلار هر ايكيسي‌ آلتي‌ - يئددي‌ ياشلاريندا ايكن‌ آذربايجاندا آنا ديلينده‌ درس‌ كئچيريلمه‌سي‌نين‌ و سونرا بوتون‌ خاطيره‌لره‌ چئوريليب‌ خلق‌ آراسيند اياشاديغي‌نين‌ شاهيدي‌ اولموشلار. بو ايكي‌ امكداش‌ مكتبي‌ بيتيرديكدن‌ سونرا آذربايجان‌ كندلرينده‌ موعليم‌ اولموش‌ و ائله‌ آشاغي- يوخاري‌ بو ايللردن‌ ده ‌آذربايجان‌ ادبياتي‌ و فولكلورو ايله‌ ماراقلانميشلار. بيز بورادا بو ايكي‌ امكداشين‌ آذربايجان‌ شيفاهي‌ خلق‌ ادبياتي‌نين‌ توپلانماسي‌، آراشديريلماسي‌ و نشري‌باره‌ده‌ صرف‌ ائتديكلري‌ شرفلي‌ امگين‌ ماجراسيني‌ م‌.ع‌.فرزانه‌نين‌ ديليندن‌دينله‌مگي‌ داها يئرلي‌ سانيريق‌:

اونلار هر ايكيسي‌ ده‌ آذربايجان‌ ديلي‌نين‌ يازيب‌ - اوخوماغي‌ ياساق ‌اولدوغو ايللرده‌ بويا - باشا چاتديلار. اونلار آنا ديلينده‌ درس‌ اوخويا بيلمه‌سه‌لر ده‌، بو ديلده‌ يازيلان‌ كيتابلارين‌ يانديريلماسيني‌ ائشيتديلر ودويدولار. ائشيتديكلري‌ و دويدوقلاري‌ بو ماجرادان‌ يوكسلن‌ آلوو، اونلارين ‌روحونا و ووجودونا گومدو و بوتون‌ حيات‌ بويو اونلاري‌ دوشوندوردو.

اونلاردان‌ بيري‌، صمد، اؤز آنا ديلينه‌ بسله‌ديگي‌ اينامي‌ ۱۳۴۲ جي ‌ايلده‌، ايلك‌ اثري‌ ساييلان‌ و اؤزو دئميشكن‌ اونو تأليف‌ صاحيبي‌ ائله‌ين‌پاره‌-پاره‌ ايله‌ گؤستردي‌. بو ياراشيقلي‌ و ييغجام‌ اثره‌ عومومو بير باخيش ‌بئله‌، اونو توپلايانين‌ اؤز آنا ديلينده‌ درس‌ اوخويا بيلمه‌ديگينه‌ باخماياراق‌، بو ديلده‌ چاغلايان‌ شعرين‌ ان‌ درينليكلرينه‌ وارماسينا جانلي‌ ثوبوتدور. او، بومجموعه‌ ده‌ نظره‌ آلديغي‌ و توخوندوغو اوتاي‌ - بوتاي‌ شاعيرلري‌نين‌ ان‌ گؤزل‌و مضمونلو شعرلريني‌، يوزدن‌ چوخ‌ خلق‌ باياتيسي‌ ايله‌ يئرلشديرميشدير. بوايلك‌ اثرين‌ بوراخيليشي‌ صمده‌ چوخ‌ باها باشا گلدي‌. محكمه‌يه‌ چاغريلدي‌.كيتابدا آذربايجان‌ شعرينه‌ يئر وئرديگي‌ اوچون‌ تؤهمتلنديريلدي‌. بئله‌ليكله‌ ده‌ كيتاب‌ ياساق‌ ائديلدي‌ و پهلوي‌ راژيمينده‌ اونون‌ بير داها چاپ‌ ائديلمه‌سينه‌ يول ‌وئريلمه‌دي‌.

منله‌ بو ايكي‌ امكداشين‌ آراسيندا بيري‌ - بيرميزي‌ گؤرمه‌دن‌ جانلانان حضورى دوستلوق‌ و ياخينليق‌ دا ائله‌ بو كيتابلا باشلادي‌. بو ايكيسي‌، او بيري ‌امكداشلاري‌ ايله‌ بيرليكده‌، آذربايجاندا ايللرجه‌ غريبسه‌ميش‌ و بوخوولانميش ‌آنا ديلين‌ و ميللى وارليغين‌ جارچيسي‌ و موشتولوقچوسو كيمي‌، چوخدان‌ بري ‌يوردوندان‌-يوواسيندان‌ ديدرگين‌ دوشموش‌بيزيم‌ كيميلرين‌ دوامچيسي ‌اولدولار.

اونلار كيتاب‌ چانتاسي‌ چيگينلرينده‌، كاغاذ - قلم‌ اللرينده‌، خلقه‌ و وطنه ‌بسله‌ديكلري‌ دويغولار اوركلرينده‌، بيرينجي‌ مكتب‌ موعليمي‌ وظيفه‌سينده ‌آذربايجان‌ كندلرينه‌ يول‌ آچديلار، جانلاريندا آليشان‌ آلووو اوشاقلارا آشيلاديلار، اونلارلا قايناييب‌ قاريشديلار. اوشاقلار اوچون‌ آقا موعليم‌ يوخ‌، بلكه‌ صمد عمي‌، بهروز عمي‌ اولدولار. تبريز اونيورسيته‌سيني‌ بيتيرديكلري ‌اوچون‌، اورتا مكتبده‌ درس‌ وئرمگه‌ حقلي‌ اولسالار دا، بيرينجي‌ مكتبده‌ درس ‌وئرمگي‌ داها دگرلي‌ سانديلار. آذربايجان‌ فولكلور نومونه‌لريني‌ ده‌ ائله‌ همين ‌مكتبلرينده‌ درس‌ وئرديكلري‌ كندلردن‌ و خلق‌ ايچريسيندن‌ توپلاماغا باشلاديلار. آغيزلاردان‌ چوخلو ناغيللار، باياتي‌، تاپماجا، قوشماجا و ائل‌سؤزلري‌ توپلاديلار. بير سيرا كندلرين‌ مونوقرافياسيني‌ يازديلار. بو اله گتيرديكلري‌نين‌ بير قيسميني‌ يئري‌ گلينجه‌ او گونكو مطبوعاتدا و بير قيسميني‌ده‌ آذربايجان‌ افسانه‌لري‌ (فارسجا)، قوشماجالار و تاپماجالار عونواني‌ ايله ‌چاپ‌ ائده‌ بيلديلر، لاكين‌ اونلارين‌ توپلاديقلاري‌ فولكلور نومونه‌لريندن‌ هله‌چاپ‌ اولمايانلاري‌ دا واردير...

صمدله‌ بهروزون‌ آذربايجان‌ ناغيللاريندان‌ توپلاديقلاري‌ ناغيللار،جنوبي‌ آذربايجاندا بو گونه‌ قدر ييغيلميش‌ ان‌ دگرلي‌ مجموعه‌لردن‌ بيريسيدير.ماراقلي‌ بوراسيدير كي‌، بو مجموعه‌نين‌ ده‌ ائله‌ اونو توپلايانلارين‌ اؤزلري‌ كيمي ‌غريبه‌ طالعي‌ اولموشدور.

اونلار، ائل‌ ايچيندن‌ توپلاديقلاري‌ بو ناغيللاري‌ وقتيله‌ آذربايجان ‌ديلينده‌ نشر ائتمگه‌ ايمكان‌ الده‌ ائده‌ بيلمه‌ديكلري‌ اوچون‌ چارە سيز اونلاري‌ فارسجايا چئويرميش‌، اونون‌ بيرينجي‌ جيلديني‌ تبريزده‌ و ايكينجي‌ جيلديني‌ ده‌ تهراندا نشر ائتديرميشلر.

همين‌ ايللرده‌ بئله‌ بير تصادوف‌ اورتايا چيخدي‌ كي‌، من‌ باياتيلاردان ‌توپلاديغيم‌ مجموعه‌ني‌ تبريزده‌ و آذربايجان‌ ديلي‌ قرامري‌نين‌ اساسلاري‌(مباني‌ دستور زبان‌ آذربايجاني‌) كيتابيني‌ تهراندا چاپ‌ ائتديره‌ بيلديم‌. بوكيتابلارين‌ چاپ‌ اولوب‌ ياييلماسي‌ صمده‌ و بهروزا قاناد وئردي‌ و اونلاري ‌گؤردوكلري‌ ايشده‌ بير داها روحلانديردي‌. صمد محبتله‌ دولو بير مكتوبدا قرامر كيتابي‌نين‌ اورتايا چيخماسيني‌ بؤيوك‌ حاديثه‌ ساندي‌ و اوندان ‌دؤنه‌-دؤنه‌ فايدالانديغيني‌ بيلديردي‌ و بهروز باياتيلارين‌ ايكينجي‌ چاپيني‌ حاضيرلاماقدا جان‌ آتماغا، اونا تصويرلر و تابلولار چكديرمگه‌ باشلادي‌.

۱۳۴۷- جي‌ ايلين‌ ياييندا من‌ يئنه‌ تبريزه‌ گلديگيم‌ سيرادا صمد و دوستلاري‌ ايله ‌گؤروشدوم‌. بهروز او ايل‌ هانسي‌ سميناردا - اولا بيلسين‌ اوشاق‌ ادبياتي‌سميناريندا - ايشتيراك‌ ائتمك‌ اوچون‌ اسپانيايا گئتميشدي‌. بيز آيريلاندا صمد مني‌ بير طرفه‌ چكيب‌ و دئدي‌: من‌ فولكلور باره‌ده‌ يازي‌ - پوزولاريميزي‌، هر نه ‌وارسا سيزه‌ تاپيشيراجاغام‌. بونو بهروز دا بيلير. سيز اونلاردان‌ ايسته‌ديگينيز كيمي‌، حتي‌ بيزلردن‌ آد آپارمادان‌ بئله‌ يئري‌ گلينجه‌ ايستيفاده‌ ائده‌ بيلرسيز.درديزه‌ دگمسه‌ ده‌ بير طرفه‌ بوراخارسيز. ايندي‌ ايستيرسيز من‌ اونلاري‌ سيزه‌ گتيريم‌ و ايستيرسيز ده‌ تهرانا گؤندريم‌؟ دئديم‌ تهرانا گؤندرمه‌نيز داها ياخشي ‌اولور.

آز مودّت‌ سونرا صمدين‌ گؤندرديگي‌ باغلاما ان‌ تهلوكه‌لي‌ گونلرده‌ منه‌ گليب‌ چاتدي‌ و من‌ اونا ال‌ وورمادان‌، هله‌ليك‌ اؤز ال‌يازمالاريم‌ ايله‌ بيرليكده‌ بيريسينه ‌امانت‌ تاپيشيرديم‌. او امانت‌ بورادا دانيشماغا لوزومو اولمايان‌ سببلردن‌ آسيلي ‌اولاراق‌، ۲۵ ايل‌ سونرا گليب‌ يئنيدن‌ منه‌ چاتدي‌ و هله‌ نه‌ ياخشي‌ كي‌ گليب‌ چاتدي‌. اؤز يازي‌ - پوزولاريمدان‌ چوخ‌ صمد و بهروزون‌ فولكلور باره‌ده ‌توپلاديقلاري‌ مني‌ چوخ‌ سئوينديردي‌، ايلك‌ زنگي‌ عزيز دوستوم‌ دكتور حميد محمدزاده‌يه‌ ووردوم‌ و ناغيللاردان‌ ياخين‌ گونلرده‌ بير نوسخه‌ زيراكس‌ چيخاريب‌ گؤندرمگي‌ وعده‌ ائتديم‌. سونرا ايكينجي‌ زيراكس‌ نوسخه‌سيني‌ ده‌ باكيدا علملرآكادمياسي‌نين‌ نظامي‌ آدينا ادبيات‌ و فولكلور شوناسليق‌ اينستيتوتونا تاپيشيرديم‌.آرزو ائديرم‌ و ائله‌ بيليرم‌ بو ائله‌ صمدين‌ و بهروزون‌ دا آرزوسو اولموش‌ اولسون‌،بو ناغيللار ائله‌ هامان‌ يازيلديغي‌ اوسلوب‌ و ايملادا و ايمكان‌ قدر اونلاردا ال ‌آپارمادان‌ چاپ‌ ائديلسين‌. (صمد بهرنگي‌ و بهروز دهقاني‌نين‌ سونرادان‌ تاپيلميش‌ آذربايجان‌ ناغيللارينا يازيلميش‌ موقدمه‌دن‌)

صمدين‌ منه‌ تاپيشيرديغي‌ ال ‌يازمالاري‌ ايچريسينده‌ ايكي‌ دفترچه‌ ده‌ وار.اونلارين‌ بيرينده‌ آذربايجان‌ آتالار سؤزلريندن‌، مثللردن‌ و ايصطيلاحلاردان‌ بيرچوخ‌ نومونه‌لر ثبت‌ اولموش‌ و او بيري‌ دفترچه‌ده‌ بير سيرا ماهنيلار، ترانه‌لر،تيرينگه‌لر، اوشاق‌ اويونلاري‌ و ساييره‌ درج‌ ائديلميشدير.

بيرجي‌ دفترچه‌ده‌ آتالار سؤزو و مثللرين‌ سيراسيندا ثبت‌ اولان‌ ايصطيلاحلار(ترمينلر يا دئييملر) سؤز قورولوشو و ايفاده‌ باخيميندان‌ آتالار سؤزونه‌ وخوصوصيله‌ مثللره‌ ياخين‌ اولدوقلاري‌ اوچون‌ اونلارين‌ خلق‌ ادبياتي‌ ملزمه‌لري ‌سيراسيندا اولماقلاريني‌ ايجاب‌ ائدير. دفترچه‌ده‌ اولان‌ ايصطيلاحلاردان ‌آشاغيدا نومونه‌لر وئريلير:

 

تيكان‌ اوسته‌ اوتورماق‌،

تويدا دونون‌ تانيماق‌،

توكوني‌ اودا توتماق‌،

تولكي‌ توزاناغي‌ سالماق‌،

چؤرگينده‌ چيگي‌ اولماق‌،

دوز كيمي‌ يالاماق‌،

دالي‌ ايله‌ ديوارا چيخماق‌،

ديلي‌نين‌ اوجوندا اولماق‌،

ديل‌ بوغازا سالماق‌،

قاش‌ - قاباغي‌ يئر سوپورمك‌،

قولاق‌ ياتيرماق‌،

قولاق‌ گوناهكاري‌ اولماق‌،

قايناييب‌ سويون‌ چكمك‌،

قويروغي‌ قاپي‌ آراسيندان‌ چيخماق‌،

قاباقدان‌ گلنليك‌ ائله‌مك‌،

قره‌ سودان‌ قئيماق‌ توتماق‌،...

ايكينجي‌ دفترچه‌دن‌ ايسه‌ بير نومونه‌ اولاراق‌ فرش‌ توخويان‌ اوشاقلارين‌سيخينتيلاريني‌ بيلديرن‌ اوخوماقلاردان‌ نئچه‌ خط‌ گتيريريك‌:

 

علي‌ بالا، دو بالا، دو٬

گون‌ دوشدو يورقانووا،

اوستا گليب‌ دالونجا،

شوي‌ گتيريب‌ بويونجا،

سني‌ وورا دويونجا.

 

ائي‌ واي‌ آنا كرخانا،

باغريمي‌ قان‌ ائيله‌دي‌،

ايلمك‌ سالان‌ بارماغيم‌،

بويلاري‌ قان‌ ائيله‌دي‌.

 

اولسون‌ اوغول‌ گئت‌ گيلن‌،

گون‌ باتاني‌ گود گيلن‌،

آخشام‌ ائوه‌ گلنده‌،

بير شاهيني‌ وئر پي‌يه‌،

بارماغووا سورت‌ گيلن‌.

 

ائي‌ آتاي‌ مهريبان‌،

قويما مني‌ بو ايشه‌،

بو ايشدن‌ فايدا يوخدي‌،

ايلمك‌ سالان‌ بارماغيم‌،

آز قالدي‌ ديبدن‌ دوشه‌...

صمد و بهروز فولكلورا عاييد بوتون‌ مطلبلري‌ شهر و كندلرده‌ گزيشديكلري‌ زمان ‌ائل‌ آغزيندان‌ توپلاميشلار. اونلارين‌ قوشماجالار و تاپماجالارا يازديقلاري ‌ييغجام‌ موقديمه‌ ده‌ دئييلير:

سؤز خلقين‌ ياشاييش‌ شعريندن‌ گئدير. آذربايجانين‌ شهر و كندلرينده‌ خلق‌ هله‌دا باياتي‌ اوخورلار و عزيزلري‌نين‌ مزاري‌ اوستونده‌ آغي‌ سؤيلرلر. طبيعتي‌،اؤكوزو، قويونو و كئچيني‌ اؤيمكده‌ سايا قوشارلار. مشغوليت‌ اوچون‌تاپماجا دئيرلر، قوشماجا اوخورلار و ناغيل‌ دئيرلر. هله‌ ده‌ گاهدان‌ بيراوزون‌ قيش‌ گئجه‌لرينده‌ كورسو تووندا اوتوروب‌ ننه‌لرين‌ ناغيليني‌ دينله‌مك ‌اولور. لاكين‌، هاني‌ او گئجه‌لر كي‌، اوتاق‌ دولو اولاردي‌ و ايگنه‌ سالماغا يئراولمازدي‌ و سحره‌جن‌ اوتوروب‌ ناغيل‌ ائشيدردين‌. حتي‌ پيچاقلا كسديگين ‌بارماغي‌نين‌ درديني‌ اونوداردين‌.

كئچن‌ ايل‌ يايدا شهرلرين‌ بيريندن‌ يولا دوشدوك‌. اورانين‌ كندلرينده ‌گزيشيرديك‌، اولا بيلسين‌ بير ناغيل‌، متل‌ و تاپماجا اله‌ سالاق‌. گونوزلر جماعت‌ يا اؤكوز دالينجا قاچير، يا قاتي‌ يئر ايله‌ ال‌ به‌ ياخايديلر. اما گئجه‌لر اوراجاق‌ يورغون‌ دالغين‌ ايديلر كي‌ دانيشماغا اينجارلارى‌ يوخ‌ ايدي‌. باشا دوشوردوك‌كي‌ اونلارين‌ سوراغينا قيشدا گئتسه‌ك‌ گرگ‌.

قيشدا دا گئتديك‌، ايكيندي‌ كنده‌ چاتديق‌. چوخلو كاغاذ مدادلا.ميرولي‌نين‌ اؤكوزو اؤلدوگو اوچون‌ كيمسه‌ ايله‌ دانيشماق‌ ايسته‌ميردي‌.مشدي‌ زمان‌ اوغلونو شهرده‌ دوكتورا آپارميشدي‌.او بيريلرين‌ده‌ باشي‌ اؤز غم‌- غصه‌لري‌ ايله‌ ايدي‌. و اونلاردان‌ ايكي‌ كلمه‌ سؤز چكمك‌ چوخ‌ چتين ‌گؤرونوردو.

بو هاميسيني‌ اوركلرين‌ ياتاغيندان‌ ديشارا چكمگين‌ بئلنچي‌ چتينليكلي‌ده‌ وار...

صمد و بهروزون‌ آذربايجان‌ فولكلورو و خلق‌ ادبياتيندان‌ توپلاييب‌ نشرائتديكلري‌ و يا نشره‌ ائده‌ بيلمه‌ديكلري‌ اثرلردن‌ علاوه‌، اونلارين‌ موشترك ‌امكداشليغي‌ ايله‌ حاضيرلانميش‌ ديداري‌ از روستاها - كندلرله‌ گؤرؤش‌عونوانلي‌ مونوقرافيالاريندان‌ و هابئله‌ صمدين‌ تكجه‌ شخصي‌ فعاليت‌ وياراديجيليق‌ قودرتيندن‌ باش‌ آليب‌ گلن‌ ادبيات‌ و فولكلور آذربايجان‌، مشخصات‌قهرمان‌ در افسانه‌هاي‌ آذربايجان‌، عاشيق‌ شعري‌، ساري‌ عاشيق‌، آذربايجان‌ ديل ‌و لهجه‌ شوناسليغينا عاييد يازيلار و بونلارين‌ آراسيندا هاميدان‌ اوستون‌ يئرتوتان‌ و صمدين‌ تام‌ باجاريقلا فولكلوردان‌ و خلق‌ ناغيللاريندان‌ فايدالاناراق ‌اوشاقلار (و هابئله‌ بؤيوكلر) اوچون‌ يازديغي‌ قصه‌هاي‌ بهرنگ‌ - بهرنگين ‌ناغيللاري‌ حقينده‌ دانيشماغي‌ گله‌جك‌ فورصته‌ بوراخيريق‌.

بونلاردان‌ علاوه‌، بو ايللرده‌ م‌.ع‌.فرزانه‌نين‌ آذربايجان‌ شيفاهي‌ خلق‌ ادبياتيندان‌باياتيلار مجموعه‌سي‌ مونتشير اولور. اونون‌ فارسجا باشلانيش‌ سؤزونده‌ (او واختلار توركو يازماق‌ موطلق‌ ياساق‌ ايدي‌ و اگر مطلب‌، هرنه‌ اولور اولسون‌،توركجه‌ يازيلسا، اونون‌ چاپينا دينمز - سؤيله‌مز مانع‌ اولوردولار) باياتيلاردان چوخلو نومونه‌لر و اؤرنكلر ايله‌ بيرليكده‌ آراشديرمالار وئريلميشدي‌. او واختلار حسين‌ صديق‌ باياتيلارا يازديغي‌ بير نقدده‌ اونلارين‌ آنلام‌ جهتدن‌ بير- بيرلريندن ‌آييرماق‌ و هر بؤلومو، مثلاً آغيلاري‌، غوربت‌ و هيجران‌ باياتيلاريني‌، سئوگي ‌باياتيلاريني‌، فلسفي‌ اخلاقي‌ باياتيلاري‌ و ماهني‌ ماهيتده‌ اولانلاري‌ آيري‌-آيري‌ باشليقلار آلتيندا وئرمك‌ داها دوزگون‌ اولار- مسأله‌سينه‌ ايشاره‌ ائتميشدير. بو يازي‌يا بعضيلري‌ دوداق‌ بوزسه‌لر ده‌، من‌ اونو دوزگون‌ بيليرديم‌.

ها بئله‌ بو ايللرده‌ م‌.ع‌.فرزانه‌نين‌ آذربايجان‌ ديلي‌ قرامري‌ اولماقلا خلقيميزه‌ آناديليميزين‌ قايدا - قانونلاريني‌ تانيماقدا يارديمجي‌ اولدو. بو ايش ‌فولكلوروموزون‌ توپلانماسيندا و اونو فونتيك‌ (صوتي‌) اليفبا ايله‌ ثبت‌ ائتمگه ‌يول‌ آچدي‌. ب‌.ق‌.سهندين‌ سازيمين‌ سؤزو ده‌ چتينليكلره‌ باخماياراق‌ بوايللرده‌ نشر اولدو. بونونلا بئله‌، بو ايللرده‌ ديليميز اوچون‌ هاميدان‌ اوغورلو ساييلان‌ اوستاد محمد حسين‌ شهريارين‌ حيدر بابايا سلام‌ شاه‌ اثري‌نين‌ مئيدانا چيخماسيدير. بو اثر ظاهيرده‌ شاعيرين‌ خاطيره‌لر و نيسكيللر دفتري‌ اولسا دا،آنلام‌ جهتدن‌ فولكلوروموزون‌ رنگارنگ‌ دونياسينا پنجره‌ آچيردي‌. و ايندي‌ بو كيتابلاردان‌ شخصاً اونلارين‌ چاپ‌ و نشر ايشينده‌ نظارت‌ ائتديگيم ‌اوچون‌ ايكي‌ اثر حقينده‌، بيري‌ قرامر و اوبيريسي‌ سهندين‌ سازيمين‌ سؤزونون‌ چاپ‌ و نشرينده‌ باش‌ وئرميش‌ چتينليكلره‌ ايشاره‌ ائتمك‌ يئرلي‌ اولاجاق‌.

آذربايجان‌ ديلي‌ قرامري‌نين‌ اساسلاري‌ (مباني‌ دستور زبان‌ آذربايجان‌)كيتابي‌نين‌ چاپ‌ ماجراسي‌ (قيسا وئريلميشدير)

 

آذربايجان‌ ديلي‌ قرامري‌نين‌ تملي‌ اصلينه‌ دورسان‌ ۱۳۳۵-۱۳۳۴ جى ايللرينده ‌زينداندا قويولموشدو. او ايللرده‌ حيدر بابايا سلام‌ منظومه‌سي‌نين‌ چاپدان ‌چيخماسي‌ و سؤزلري‌نين‌ آز بير مودّتده‌ ديله‌ - ديشه‌ دوشمه‌سيله‌ بيرچوخلاريندا آذربايجان‌ ديليني‌ اؤيرنمگه‌ قايغي‌ يارانميشدي‌ و بير چوخلاري ‌زينداندا (ايستر تورك‌ و ايسترسه‌ ده‌ فارس‌) بو ديلي‌ اؤيرنمگه‌ چاغيريردي‌.اونلار منه‌ موراجيعت‌ ائتديلر و من‌ بو خوصوصدا بيلديكلريم‌ يئتگين‌ اولماسا بئله‌، بو ايشده‌ اونلارا يارديمجي‌ اولاجاغيما سؤز وئرديم‌.

بو مسأله‌ مني‌ گئجه‌لر و گوندوزلر دوشوندوردو و ان‌ سونوندا اورادا اولانلاردان ‌نئچه‌لري‌ ديليميزين‌ قايدا - قانونلاريني‌ اؤيرنديلر. اونلارين‌ ايچينده‌ يوكسك ‌تحصيل‌ آلان‌ دوكتورلاردان‌ توتموش‌ تا دانيشگاه‌ طلبه‌لري‌ و ايشچيلر ده‌ وارايدي‌. اونلار بير سسه‌ منيم‌ بو درسلري‌ يازاجاغيما تأكيد ائتديلر و همين‌ تأكيد نئچه‌ ايل‌ سونرا يعني‌ ۴۲-جي‌ ايلده‌ يازيليب‌ حاضيرلانماسينا سبب‌ اولدو.كيتاب‌ فارسجا يازيلديغي‌ حالدا، اوندا آذربايجان‌ ديليندن‌ سؤز گئتمه‌سي‌ وبوندان‌ علاوه‌ كيتابدا يئر به‌ يئر صوتي‌ (فونتيك‌) اليفبادان‌ ايستيفاده‌ ائديلمه‌سي‌ كيتابي‌ ايستر-ايسته‌مز گيزلي‌ كيتابلار جرگه‌سينه‌ گتيريب‌ چيخارديردي‌. چوخلو چاپخانالارا باش‌ ووردوم‌. بير گون‌ لاله‌زار چاپخانالارينا باش‌ ووراندا گؤردوم ‌رحمتليك‌ نصرت‌الله‌ فتحي‌ (آتشباك‌) بير چاپخانادان‌ چيخدي‌. گؤزو منه‌ساتاشجاق‌ دئدي‌: بوردا نه‌ عجب‌؟ دئديم‌: بير چاپخانا دالينجا گزيرم‌ كي‌، قرامركيتابيني‌ چاپ‌ ائدم‌. دئدي‌: آي‌ جانيم‌، بس‌ بونو منه‌ نييه‌ دئمه‌ميسن‌؟

او گونلرده‌ فتحي‌ يادي‌ از حيدربابا اثريني‌ چاپ‌ ائديردي‌ و مندن‌ ده‌ او كيتاب ‌اوچون‌ بير مقاله‌ آلميشدي‌. فتحي‌ مني‌ آپاردي‌ مظاهري‌ چاپخاناسينا وچاپخاناچي‌يا دئدي‌: آقا گؤر سنه‌ نه‌ موشتري‌ گتيرميشم‌! آقاي‌ فرزانه‌ او گون‌ سيزه ‌اوخودوغوم‌ مقاله‌نين‌ مولّيفيدير. او حيدربابا درنگينده‌ بيزيم‌ هاميميزا اوستادليق ‌حقي‌ وار. بير دانا گؤزل‌ كيتابي‌ وار گتيريردي‌ سيز چاپ‌ ائلييه‌سيز، من‌ ده‌ اونا قوشولوب‌ گلديم‌. مظاهري‌ چاپخانا موديري‌ مصدقچي‌ ايدي‌، يا اؤزونو اوجور گؤستريردي‌. كيتابي‌ مندن‌ آليب‌ ورقلاياندان‌ سونرا دئدي‌ لاتيني‌سي‌ دا وار.دئديم‌ بعلي‌، لاتينيدان‌ صوتي‌ (فونتيك‌) اليفبا يئرينه‌ ايستيفاده‌ ائديليب‌. دئدي‌عئيبي‌ يوخدو، بيزيم‌ لاتيني‌ اليفبا كاساميز تكميلدير. سيز بويورون‌ گؤروم‌ كيتابي ‌اؤزوز تصحيح‌ ائده‌جكسيز يا اؤزگه‌سي‌؟ دئديم‌ البته‌ اؤزوم‌. دئدي‌ اگر ميللى كيتابخانا ايجازه‌سي‌ اولماسا( او واختلار كيتاب‌ سانسورو ميللى كيتابخانا موهري ‌آلتيندا وئريليردي‌ و من‌ كيتابي‌ اورا وئرسئيديم‌ جاواب‌ آلماياجاغيديم‌ كي‌ هئچ‌،كيتاب‌ اؤزو ده‌ گئده‌جك‌ ايدي‌) گرك‌ گليب‌ بوردا تصحيح‌ ائده‌سيز، بو بير،ايكينجيسي‌ ده‌ بودور كي‌، اگر گليب‌ كيتابي‌ گؤرسه‌لر و مندن‌ سوروشسالار كي ‌كيتاب‌ كيميندير، ناچار دئمه‌لي‌يم‌. اوندا آدامدي‌ ايشدي‌ سيزي‌ ياخالاديلار مني ‌گوناهكار بيلميه‌جكسيز. خولاصه‌ اگر اوزالتسالار سنين‌ اؤزونو اوزالداجاقلار.دئديم‌ بونا سؤز اولا بيلمز، كيتابي‌ من‌ يازميشام‌، اگر جزا علاقه‌ باغلاسا، او جزايادا قاتلاشمالي‌يام‌. چاپخانا چوخ‌ موجهز ايدي‌. كيتابي‌ آز مودّتده‌ دوزدولر، منده هرگون‌ تصحيح‌ اوچون‌ گئديرديم‌. كيتابين‌ چاپي‌ قورتاردي‌، دئديم ‌صحافليغي‌نين‌ دا زحمتيني‌ اؤزوز چكين‌. دئدي‌ قيسمت‌ اولسا باش‌ اوسته‌!دئديم‌ نئجه‌ يعني‌ قيسمت‌ اولسا، دئدي‌ كيم‌ بيلير بيرده‌ گؤردون‌ صحافليقدا كيتابين‌ اوستونه‌ ال‌ قويدولار و من‌ سيزدن‌ خجالت‌ اولدوم‌. ايش‌ يئريمه‌ تازاجا چاتميشديم‌ مظاهيري‌ زنگ‌ ووردو. دئديم‌ نه‌ خبر؟‌ اوزادانلار گليبلر؟ دئدي‌يوخ‌ اؤزون‌ كيمي‌ بير ديلچي‌ بو كيتابي‌ گؤروب‌ ايستير سيزايله‌ دانيشسين‌. سونرادا دسته‌يي‌ وئردي‌ او آداما. سلام‌ صاباحدان‌ سونرا آدام‌ اؤزونو دوكتور يزدگردي‌آديله‌ تانيتديردي‌. بو آدي‌ ائشيتميشديم‌. او تهران‌ دانيشگاهيندا ادبيات‌ و علوم‌انساني‌نين‌ دوكاني‌ ايدي‌. دئدي‌ من‌ چاپخانايا گئديب‌ گلرم‌. بورادا سيزين‌ كيتابيزگؤزومه‌ ساتاشدي‌. خاهيش‌ ائدرديم‌ آقاي‌ مظفري‌يه‌ امر ائدين‌ اوندان‌ بير نوسخه ‌منه‌ وئرسين‌. دئديم‌ كيتاب‌ هاميسي‌ مظاهري‌نين‌ دي‌ و هر نئچه‌ دانا لازيم‌ اولسا،سيزدن‌ موضاييقه‌ ائتمز. تشكور ائله‌دي‌ و دئدي‌: بو بير آكادميك‌ كيتابدي‌، من‌اونو دانيشگاه‌ حددينده‌ تانيتدراجاغام٠٠٠

 

سازيمين‌ سؤزو اثرينين‌ بيرينجى دفعه‌ چاپ‌ اولما داستانى (خولاصه ‌وئريلميشدى‌)

 

ب‌.&