Ana Dil
آنا ديل

 

 

 

 

 

 

 

                                                                        

 

 

 

 

فريده اصغرنيا

 

DİLSİZ ANALARاوشاقليق چاغلاريندان آنا ديليمه ايچدن سئوگيم اولدوغونا گؤره، هميشه اورك دويغولاريمي توركجه يازماغا اوركدن ماراغيم اولوب. آنجاق بو ياشادك آنا ديليميزده اوخول (مدرسه) اولماماسينين حسرتيني مينلرجه آذربايجانلي تک اؤز ايچيمده داشيميشام , بونا باخماياراق کندي ديليميزي قوروماق اوچون هر زامان بيليم (علم) يؤنونده چاليشماغي دوشونموشم.

بوتون آذربايجانين باشا ـ باشين، باتي‌سين , دوغوسون و ياخود اردبيل و زنجانيندا هر باخيمدان آناديليميزه نه قدر اؤنم وئريلديگيني آيدينجا گؤرمك اولار، اما بونا باخماياراق تبريزده هر يئردن چوخ آناديليميزدن سؤز صحبت، بوتون يازارلار قونوسو اولوب، حال بو كي اؤزل تورك

 

ديليني اؤيردن يئرلرده بير چوخ بوشلوق گؤرونور. نئجه دئييرلر، اگر باشقا شهرلرده يوزلرجه اؤيرنجي وارسا، اوزونتويله دئمه‌لي‌يم كي بو بويدا تبريزده بئش نفر اؤيرنجيني چتين بير يئره ييغماق اولور، گرچكدن بونون ندني ندير؟

رسمي اولاراق ديل اوخولوموز يوخدور بو گئرچك، اما بو او دئمك دئييل كي , بيزيم شهرده بو قدر بيليملي اوستادلاريميز اولان يئرده، هر كس نئجه ايسترسه يازا بيليب و ياخود كيتاب دا چيخارا بيلسين‌لر.

دانيشديغيم قونو دا بودور. هاميميز آناديليميزله ايلگي‌لنمه‌لي‌ييك. اؤزل‌ليكله گنج يازيچيلاريميز موطلق ديليميزين هر شئي‌دن اؤنجه بيليم يؤنونه ديقّت گؤسترمه‌لي‌ديلر. ديليميزي ايرلي سوردورمك ـ چون بئله بيليملي اوستادلاردان باشارديقجا فايدالانماق هر بير قلم صاحيبي‌نين گؤرَو‌ي‌دير.

اوندادير كي ديليميزين بيليم يؤنونده قراماتيك قايدالاريني بيلمك‌له بو ديلين نه قدر باجاريقليغينا گؤزل‌ليگينه و اؤنمينه، داها دا آرتيق ايچدن واراجاقلار.

اؤتن ايللرده بوتون بوراخيلان توركجه يازيلاردا، ايستر قزئتلرده, درگيلرده و يا معروضه‌لرده, اگر ديقّت يئتيرسك، بير پارا چاتيشمازليقلاري آچيق آيدين گؤره‌ بيلريك.

نييه كي ديليميزين قايدا قورولوشو، اؤنجه سسلي ـ  سس سيزلري , هاوا ياساسي آهنگ قانونو، دانيشيق بؤلومو، سونرا هر سؤزون كؤكون چئشيتلي آنلام داشيماسي , اؤزل‌ليكلري, چاغلا باغلي قراماتيك قايدالاري , فونتيك اولايلاري و ياخود يابانجي ديللردن آلديغيميز سؤزلرين نئجه قونلانماسي هابئله اونلارلا ياناشي متنلرين داشيديغي آنلاملاري , يئني سوزجوكلري , عيباره‌لرينين و..... اؤيرنمه‌سي ديليميزين بيليمسل اولاراق , دوز چرچيوه‌ده قولانيلماسيني آيدينجا گؤره بيلريك.

گرچكدن بو آنلاملارين هر بيري ياشيل ياماجلاري ايسلادان ياغيش داملالاري تك دوشونجه داشييان بئيين‌لريميزه ياغيب‌, بيليم باغيميزي ياشيللاشديراجاقدير.

بو اونو گؤستريركي ديل بيليميميز آرتيقجا يئر كوره‌سينده ياشايان بير اينسان كيمي , ايتميش وارليغيميزي يئنيدن تاپميش كيمي‌, دوغال حاقيميزي الده ائديريك و گله‌جگي دوشونرك...

تاريخيميزين توركجه يازينتي‌نا (ادبياتينا) ديقّت يئتيرمه‌ميز البت كي گركليدير‌, بير چوخ شاعيرلريميزين سؤي‌لريني (شعرلريني) اوخوماقلا يازين دونياسيلا تانيش اولوروق. اؤزل‌ليكله قادين سؤيچولريله (شاعيرلريله). آيديندير كي بئله بير قادين‌لارلا تانيش اولماق اولدوقجا گركلي گؤرونور.

بو سؤيچو قادينلارين بير نئچه‌سي قارابيلمز(ساوادسيز) اولاراق, اوخو بيلمه‌دن, سؤي و باياتيلاريني بو قدر گوجلو دؤشدن سؤيله‌مه‌لري گئرچكدن اينانيلماز گلير.

اؤتن يوز ايل‌ليكلردن بري بئله بير قادينلارين اونلو، اونسوز (شهرتلي ـ  شهرتسيز) اوتايلي ـ  بوتايلي , بوتون آذربايجانين باشا ـ  باشيندا كيچيك شهرلريندن كندلريندن , بئله‌جه گوجلو سؤيلري , دوزوكلري (نثرلري) باشقا سؤيچولرله سؤيله‌شمه‌لري توركجه ديلي‌نين باجاريليغيني و زنگين يازينيني يامسيدير.

اؤرنك اوچون بئله بير قادينلارين نئچه‌سيند‌ن آد آپارماق اولار او بؤلومودن:

فاطما خانيم آني , حيران خانيم , زينب ضربعلي , قمر بيگم شيدا , نيمتاج خانيم و آشيق سؤيونون ان گؤركمليسي اولان آشيق پري و آجيناجاقلي حياتي اولان آشيق بستي‌دن آد آپارماق اولار.

اوزونتويله سؤيله‌مه‌لييم كي 21نجي يوز ايل‌ليگينده ياشاياراق بئله گوجلو سؤيچو قادينلاريميزين سايي بارماق سايي قدر اولموش و بونون ندني ‌ده‌ هامييا آچيق، آيديندير.

سون سؤز اولاراق دئمه‌لييم كي، اينسانلارين توپلومدا ديلدن يارارلانماسي، ايستر عادي حياتدا, ايسترسه بيليم, يازين, فلسفه, دوشونجه و موباحيثه‌لرده بؤيوك اؤنمه ماليكدير.

آناديليميز نه تك قونوشدوغوموز ديل بلكه تاريخيميز، زنگين‌ليگيميز , كولتوروموز , وارليغيميز و هر شئيدن اؤنملي كيمليگيميزدير. هر كس اؤزونو تانيماق‌ ـ ‌چون‌ و دونيايا تانيتديرماق‌ ـ چون بو كيمليگي داشيماليدير.

كندي ديليميزي منيمسه‌ييب, قورويوب گؤزل قونوشوب و يايماق اوچون , اؤنجه اؤيرنيب سونرا اؤيرتمه‌ميز كولتورل بورجوموزدور.

هاميميز بير آذربايجانلي , بير تورك اولاراق بو بورجو اؤده‌مه‌لييك.