آنا ديلى

 

کونستانتين ديميتريئويچ اوشينسکى (1871ـ1824)

ترجومه ائدنى: پروفسور فخرالدين و.يادگار

 

 

ترجومه چي‌دن‌ نئچه‌ سؤز:

 

دونيا پداقوژى ادبياتينين اينجي‌سي ساييلان‌ بو مقاله‌ني‌ ك‌. د.اوشينسكي‌ ايلك‌ دفعه‌ خالق‌تحصيلي‌ ناظيرليگي‌ ژورناليندا (1861- جي‌ ايل‌، نؤمره‌ 5) چاپ‌ ائتديرميشدير. مقاله‌ اؤزمضمونو اعتيباري‌ ايله‌ او دؤورده‌كي‌ روسيا مکتبلرينده‌ حؤكم‌ سور‌ن‌ كلاسيك‌ تحصيل ‌سيستمينه‌ قارشي‌ يؤنلميشدير. ك‌. د. اوشينسكي‌ اؤز علمي‌ ـ پداقوژي‌ كونسپسياسيندا آنا ديلينى اؤن‌ پلانا چكير، خاريجي‌ ديللرين‌ آنا ديليند‌ن‌ قاباق‌ اؤيره ‌نيلمه‌سينين اوشاق‌ پسيكوژي‌سينه ‌وورا بيله‌جه‌يي‌ زياني‌ آچيب‌ گؤسترير. سونرالار او، آنا ديلي‌ درسليگينده‌ ايبتدايي‌ مكتبده‌ تحصيلين‌ آنا ديلي‌ اساسيندا قورولماسي‌ ايده ‌ياسينين دوزگون‌لوگونو بير داها تصديق‌ ائدير.

 

فلسفي‌ باخيمدان‌ ديله‌ بوتؤو كيمي‌ ياناشان‌ ك‌. د. اوشينسكي‌ اونو خالقين‌ معنوي‌ حياتي‌ حساب‌ائدير، و.ق‌.بلينسكينين فردلر ديل‌ يارادا بيلمز، چونكو‌ اونو خالق‌ يارادير فيكيرينه‌ تام‌ شريك‌اولدوغونو بيلديرير. گؤركملى پئداقوق، زادگان‌ (اشراف‌) عاييله لرينده خالقا اعتيناسيزليغي‌ كسگين ‌تنقيد ائدير، چار موطلقيتي‌ (تزار استيبدادي‌) طرفيند‌ن‌ ميلي‌ آزادليق‌ حركاتينين تعقيب‌ اولوندوغونو پيسله‌يير، خالقي‌ كئچميشد‌ن‌ آييرماغا چاليشانلاري‌ حيدت‌له‌ قامچيلايير.

 

ك‌. د. اوشينسكي نين آنا ديلي‌ مقاله‌سيني‌ ترجومه ائديب‌ اوخوجولارا تقديم‌ ائتمکله‌ دوشونورم‌ كي‌، بو مقاله‌ده‌ قالديريلان‌ مساله‌لرين‌ بير چوخو بو گون‌ بئله‌ اؤز يئريني‌ايتيرمه‌يگيند‌ن‌ هموطنلريميز اوچون‌ ماراقلي‌ اولاجاق‌.

 

 

 

ديل‌ اؤيرتمه‌، ديللرى اؤيرنمگه‌ نيسبتن داها يوكسك‌ شئي‌دير. تدريس‌ واسيطه‌سي‌ كيمي ‌قديم‌ ديللرين‌ پايينا دوشن‌ تعريفلر ايکى ‌قات‌ آنا ديلينه‌ عاييد دير، اونو ديللرين آناسي ‌آدلانديرماق‌ داها دوزگون‌ اولاردي‌. ژان‌ پول

 

بئش‌ ياشلي‌ اوشاق‌ لاکين، حالبوكي‌، اؤزوده‌، (يعني‌)، يالنيز، بونون‌ عكسينه ‌اولاراق‌، البته‌ سؤزلريني‌ باشا دوشور. آنجاق‌ اونلاري‌ بير كره‌ اوشاغا يوخ‌، آتاسينا ايضاح ‌ائتمگه چاليشين‌. تكجه‌ يعني‌ سؤزونده‌ درين‌ بير فلسفه‌ گيزله نير. ژان‌ پول‌

 

"من‌ فرانسيز ديليني‌ اؤيرنيم ‌مي‌؟ بونا دگرمي‌؟. آخي‌ ياد ديلده‌ سن‌ اؤزونو هميشه‌ عاجيز حيس‌ائدير، دائما سونسوزلوغا قدر اونا اويغونلاشماغا چاليشيرسان‌. او ديلده‌ ان‌ عومومي‌، ان‌ كوبود جيزگيلريني‌ ايفاده‌ ائده‌ بيلرسن‌". ي‌. و. گؤته

 

"من‌ خوشلاييرام‌ كي‌، روس‌ روس‌ اولسون‌، اينگليس ‌ده‌ اينگليس؛ اگر پروسدا پروس ‌لي‌اولماق‌ لازم‌ ديرسا، اوندا گرک‌ فرانسادا دا فرانسيز اولسون‌". برانژه

 

اينسان اوزون‌ مودت‌ نفس‌ آلير، آنجاق‌ هاوانين‌ مؤوجودلوغوندان‌ اونون‌ خبري‌ اولمور.اوزون‌ مودت هاوانين‌ وارليغيني‌ بيلير، لاکين خاصه‌لريني‌، تركيبيني‌، اورقانيزمين‌ حياتيندا اونون‌ نه ‌كيمي‌ اهميته‌ ماليک اولدوغونو بيلمير. اينسانلار اوزون‌ مودت آنا ديلي‌نين خزينه‌سيندن‌ ايستيفاده ائديبلر، آنجاق‌ اونون‌ طبيعتينين مورکبليگينه‌، درينليگينه‌ فيکير وئرمه ييبلر، اؤز معنوي‌ حياتلاريندا اونون‌ معناسيني‌ قيمتلنديرمه ‌ييبلر. گؤره سن‌ايندي‌ اونو لاييقينجه‌ قيمتلنديريرلرمي‌؟ معلوم‌ ايجتيماعى فيکيردن، پئداقوژي‌ پراكتيكادا قبول‌ اولونموش‌ اصوللاردان‌، موختليف موسيسه‌لرده‌ تدريس‌ حيصه‌سينين قورولوشوندان ‌چيخيش‌ ائتسك‌، درك‌ ائتمك‌ چتين‌ دئيلدير كي‌، لاييقينجه‌ قيمتلنديرمگه‌ هله‌ چوخ ‌قاليب‌.

 

اينسان ديلينين باشلانغيجي‌ عوموميليکده‌ بو و يا ديگر خالقين‌ ديلينين ازلي‌ باشلانغيجي ‌بشريت‌ تاريخينده‌ بوتون‌ بؤيوك‌ خالقلارين‌ يارانماسينين باشلانغيجي‌ كيمي‌ كئچميشين ‌قاتلاريندا ايتير؛ لاکين بوندان‌ آسيلي‌ اولماياراق‌ بيزده‌ بئله‌ بير قطعي‌ قناعت‌ واركي‌، هر بيرخالقين‌ ديلينين ياراديجي‌سي‌ باشقاسي‌ دئييل، ائله‌ همين‌ خالقين‌ اؤزو دور. بونو آكسيون ‌كيمي‌ قبول‌ ائتسك‌ ده‌، تئزليکله‌ ائله‌ شئيين‌ شاهيدي‌ اولوروق‌ كي‌، او بيزي ‌ايستر ـ ايسته‌مز مات‌ قويور؛ دوغردان ‌مي‌ خالقين‌ ديلينده‌ ايفاده‌ اولونموش‌ هر شئي‌،خالقين اؤزونده‌ گيزله نير؟ ديلده‌ چوخلو درين‌ فلسفي‌ فيکير، اصيل‌ پوئتيك‌ حيس، اينجه ‌واله ‌ائديجي‌ ذوق‌، گوجلو شكيلده‌ عومومى لشميش‌ فيکيرلرين‌ ايفاده‌سينه‌ چكيلن ‌زحمتين‌ ايزلري‌، زنگين‌ موشاهيده چي‌ليك‌، اَن‌ جيدي‌ منطيق، يوكسك‌ معنوي‌ هونر، فيکيرلراويناغي‌ وار كي‌، بونلارا اَن‌ قودرتلي‌ شاعير، درين‌ دوشونن‌ فيلوسوف‌ بئله‌ گوجله‌ ناييل‌اولور. بيز قطعي‌ اينانا بيلميريك‌ كي‌، بوتون‌ بونلاري‌ گؤروندوگو كيمي‌ فلسفه‌يه‌ ده‌ اينجه‌صنعته‌ ده‌، پوئزيايا دا بو قد‌ر ياد اولان‌، ذؤوقونده‌ هئچ‌ بير اينجه ‌ليگى‌ ايله ‌سئچيلمه ‌ين‌، جيد‌ ـ جهدينده‌ هئچ‌ بير يوکسکليك‌ و بديعيليك‌ بيلمه‌ ين‌ بو كوبود،بيسواد خالق‌ كوتله‌سي‌ ياراتميشدير. آنجاق‌ بيزده‌ يارانان‌ شوبهه ‌يه‌ جاواب‌ اولاراق‌، همين ‌بو عاغيل ‌سيز، نادان‌، كوبود كوتله‌د‌ن‌ ائله‌ گؤزل‌ خالق‌ ماهني‌سي‌ چاغلاييركي‌، بوندان‌ هم شاعير، هم‌ صنعتكار، هم‌ ده‌ بسته‌كار اؤز ايلهاميني‌ آلير؛ دقيق‌ و درين‌ معنالي‌ ائله‌ سؤزلرائشيديلير كي‌، بونو علمين‌ و اَن‌ چوخ‌ اينکيشاف ائتميش‌ عاغلين‌ كؤمگي ‌ايله‌ فيلولوق‌ وفيلوسوف‌ تحليل‌ ائدير. اَن‌ قديم‌، اَل ‌چاتماز و نادانليق‌ دؤوروندن‌ گلن‌ بو سؤزلرين ‌درينليگينه‌ و حقيقيليگينه‌ تعجوبوني‌ گيزله ‌ده‌ بيلمير. بو هر هانسي‌ بير حاديثه ‌يه‌ نيسبتن ًبيزه‌ اؤز بيليگيميز، ساواديميز و اينکيشافيميزلا شخصن فخر ائتمگه‌ داها چوخ‌ اساس ‌وئرير، هر هانسي‌ حاديثه‌يه‌ نيسبتن بيزه‌ خاطيرلادير كي‌، آيري‌ ـ آيري‌ شوعورلو شخصيتلردن‌، آيري‌ ـ آيري‌ اينساني‌ اورقانيزملردن‌ باشقا يئر اوزونده‌ نهنگ‌ اورقانيزملرواركي‌، اونلارين‌ هر بيرينه‌ اينسان اؤز بدنينده‌ قار دنه‌ جيگى ‌نين‌ بوتون‌ اورقانيزمه ‌بسله‌ديگي‌ موناسيبتده‌ اولور. اؤز ساواديميزلا فخر ائده رک بيز آشاغي‌ و گئنيش‌ خالق ‌كوتله‌لري‌ آراسيندان‌ چيخميش‌ ساده‌، آز ساوادلي‌ آداما عادتن يوخاريدان‌ باخيريق‌؛ لاکين بيزيم‌ حقيقتن ساواديميز وارسا، مينتدارليقلا همين‌ خالقين‌ تاريخي‌ وارليغي‌ قارشيسيندا باش‌ اَگمه ‌لي‌، اونون‌ سونسوز، هئچ‌ واخت‌ يامسيلايا بيلمه‌ ديگيميز ياراديجيليغينا حئيران‌ قالمالي‌ييق‌. اگر اؤز عمللريميز اوچون‌ خالقين سوي ‌كؤكونده‌ سير كيمي‌ گيزله ‌نن‌ معنوي‌ حيات‌ قايناقلاريندان‌ گوج‌ و روح‌ آلا بيلسك‌، اوندا خوشبخت‌ اولاريق‌. بلي‌،خالقين بيزه‌ بخش‌ ائتديگي‌ ديل‌ اؤزو گؤسترير كي‌، هر بير شخص‌ نه‌ قدر ساوادلي‌،اينکيشاف ائتميش‌ اولورسا ـ اولسون‌، او خالقين بؤيوك‌ وارليغي‌ قارشيسيندا حدسيز درجه‌ده‌ كيچيکدير.

 

خالق‌ اؤز ديلينى نئجه‌، هانسي‌ قانونلارا اساسن يارادير، هانسي‌ نيتلره‌ اساسلانير،كيمدن‌ و نه ‌ده‌ درس‌ آلير، چايين ‌مي‌ دانيشيغينا، كولگين ‌مي‌ نفسينه‌ قولاق‌ آسير؟ نييه‌ ديللرده‌ بو قدر دوغماليق‌، هم‌ ده‌ يادليق‌ وار؟ هارادا، هانسي‌ اوزاق‌ زامانلاردا، هانسي ‌اؤلكه‌لرده‌ اونلار دوغمالاشديلار و يادلاشديلار؟ نه‌ ايدي‌ بير ديلي‌ بير طرفه‌، او بيريني ‌باشقا سمته‌ يؤنلدن‌ كي‌، نتيجه‌ده‌ دوغما قارداشلار راستلاشاندا بير ـ بيريني‌ تانيماديلار؟ بوتون‌ بو سوآل‌لار فيلوسوفون‌ و تاريخچينين قارشيسيندا سونو گؤرونمه ‌ين‌ مساله لر كيمي‌ دورور. اوز آنا ديلي‌ حاقيندا آز ـ ماز دوشونه بيلن ‌يقين‌ ائدر كي‌، ديل‌ خالقين اؤزنون‌ ايچيندن‌ گلن‌ وارليقدير، خالق‌ روحونون ‌درينليگينده‌ گيزلنميش‌ بوتون‌ خالق‌ خوصوصيتلريني‌ اؤزونده‌ احتيوا ائدن‌ بير توخومدان ‌يارانميشدير.

 

خالقين ديلي‌ اونون‌ اؤز تاريخي‌ حودودلاريندان‌ چوخ‌ ـ چوخ‌ اول‌ باشلانان‌، بوتون‌ معنوي ‌حياتي‌ بويو هئچ‌ واخت‌ سولمايان‌، هميشه‌ يئنيدن‌ پارداقلانان‌ اَن‌ ياخشي‌ چيچکدير.ديلده‌ بوتون‌ خالق‌، اونون‌ سوي‌ كؤكو جانلانير، اوندا خالقين‌ روحو ياراديجي‌ قووه ‌ايله ‌فيکيرده‌ اري ‌يير، وطنين‌ سماسي‌ اولور، اونون‌ هاواسي‌، فيزيكي‌ حاديثه‌لري‌، ايقليمي‌، چؤللري‌، داغلاري‌، دره ‌لري‌، مئشه‌لري‌، چايلاري‌، قاسيرغا و توفانلاري‌ شكيله‌ و سسه‌ چئوريلير. بونلار دوغما نغمه‌لرده‌ شيرين‌ ماهنيلاردا، شاعيرلرين‌ ديلينده‌ نه‌ قدر شاقراق‌ (اودلو آلوْولو) و آيدين‌ سسلنير. لاكين‌ خالق‌ ديلى نين‌ ايشيقلي‌ آيدين‌ گؤرونن ‌اَنگينليکلرينده‌ تكجه‌ دوغما وطنين طبيعتي‌ دئييل‌، همچنين‌ خالقين معنوي‌ حياتى نين بوتون‌ كئچميشي‌ عكس‌ اولونور. نسيل‌لر گليب‌ ـ گئدير، بير ـ بيريني‌ عوض‌ ائدير، آنجاق ‌ديلده هر نسيلين‌ اؤز حيات‌ گئرچکليکلري‌ ايرث‌ كيمي‌ گله‌جك‌ نسيللره‌ قالير. آنا ديلي ‌خزينه ‌سينده‌ نسيللرين درين‌ اور‌ك‌ چيرپينتيلارينين‌ ايزي‌ قالير، تاريخي‌ حاديثه لرين،اينام‌ و گؤروشلرينين محصولو قالير، بير سؤزله‌، خالق‌ اؤز معنوي‌ حياتي ‌نين‌ بوتون ‌ايزيني‌ آنا دلينده‌ قورويوب‌ ساخلايير. ديل‌ خالقين ياشاميشلاريني‌، ياشايانلاريني‌ وگله‌جك‌ نسيللريني‌ ان‌ گوجلو، زنگين‌ و مؤحكم‌ تئللرله‌ تاريخن جانلي‌ بير بوتؤوده‌ مؤحتشم‌ شكيلده‌ بيرلشديرن‌ واسيطه‌ دير. او، تكجه‌ خالقين حياتيني‌ ياشاتمير، او، عئين‌ زاماندا بوتون‌ حياتين‌ اؤزودور. خالقين ديلي‌ يوخدورسا، او خالق ‌داها ياشامير. محض‌ بوناگؤره ‌ده‌ بيزيم‌ غرب‌ قارداشلاريميز ياد ائللى لرين‌ هر جور تعقيبينه‌ معروض‌ قالديقدا وبو زوراكيليغين‌ ديله ‌ده‌ تطبيق‌ اولوندوغونو گؤردوكده ‌ باشا دوشدولركي،‌ صؤحبت‌ خالق ‌اوچون‌ اوْلوم‌، يا اؤلوم‌ مساله‌ سيندن‌ گئدير. خالقين ديلي‌ مؤوجود دورسا، خالق ‌دا ياشايير. و ان دؤزولمز زوراكيليق‌ دده‌ ـ بابالارين‌ سايا گلمز نسيللرينين ياراتديغي‌ ايرثي ‌خالقين ا‌ليندن‌ آلماق‌ ايسته مکدير‌. خالقين اليندن‌ هر شئيين‌ آلين‌ او دؤزر؛ لاکين اونون ‌ديلينى ا‌ليندن‌ آلسانيز، او هئچ‌ واخت‌ بير داها اونو يارادا بيلمز. خالق‌ حتي‌ يئني ‌تورپاقدا مسكونلاشا بيلر، لاکين ديلي‌ تزه ‌دن‌ يارادا بيلمز؛ هئچ‌ واخت‌! خالقين ديلي‌آغزيندا اؤلدوسه‌، دئمه ‌لي‌، خالق‌ اؤزو محو اولدو. اگر اينسان روحو اوزون‌ عؤمور سورمه ‌ين‌ بير آدامين‌ اؤلوموندن‌ سارسيليرسا، بس‌ بو روح‌ خالقين چوخ‌ عصيرليك ‌تاريخي‌ طالعينه‌ ـ يئر اوزونده‌ تانرينين‌ ياراتديقلاريندان‌ ان مؤحتشمي‌ اولان‌ ديله‌ قصد ائديلديكده‌ هانسي‌ حيسلري‌ كئچيرمه‌ليدير.

 

بئله ‌ليکله‌، خالقين معنوي‌ و چوخ‌ عصيرليك‌ حياتي ‌نين‌ تام‌ و دقيق‌ سالنامه‌ سي‌(كارنامه‌ سي‌) اولان‌ ديل‌ عئين‌ زاماندا هله‌ كيتاب‌ و مكتب‌ اولماياندا خالقي‌ اؤيردن، تاريخ ‌بويو اؤيرتمکده‌ داوام‌ ائدن‌ ان اولو (موقدس‌) خالق‌ موعليمى دير. آنا ديلينى آسانليقلا بؤيوك‌ زحمت‌ چكمه ‌دن‌ هر بير نسيل‌، عئين‌ زاماندا چوخدان‌ تورپاقدا ياشايان‌، اؤزو ده ‌راين‌- ين‌، دنِپر- ين‌ يوخ‌، هيمالاي‌ين‌ آلتيندا اويويان‌ مينلرله‌ اؤزوندن‌ اول‌كي‌ نسيلين ‌فيکيرينين‌ محصولونو و حيسلريني‌ منيمسه‌يير. بابالارين‌ بو سايا گلمز نسيللرينين ‌بيرر ـ بيرر دوشوندوكلري‌، حيس ائتديکلري‌، ياشاديقلاري‌ هر شئي‌ آسان‌، زحمتسيز يئنيجه‌ ايشيقلي‌ دونيايا‌ گؤزونو آچان‌ اوشاغا اؤتورولور (منتقل‌ اولور) و آنا ديلينى اؤيرنن بو اوشاق‌ حياتا اؤلچويه‌ گلمز محبتله‌ گلير. آنا ديلينى اؤيرنمکله‌ اوشاق‌ تكجه ‌شرطي‌ (قراردادي‌) سسلري‌ اؤيرنمير، او، هم‌ ده‌ آنا ديلينين دوغما دؤشوندن‌ معنوي ‌حيات‌ و گوج‌ آلير. آناديلي‌ اونا طبيعتي‌ ائله‌ ايضاح‌ ائديركي،‌ بونو هئچ‌ بير طبيعت‌ شوناس ‌باجارا بيلمز. اونو احاطه‌ ائدن‌ آدملارين‌ کاراكتريله‌ تانيش‌ ائدير، ياشاديغي‌ جمعيتله‌، تاريخي‌ سعيلريله‌ ائله‌ ياخينلاشديرير كي‌، بونو هئچ‌ بير تاريخچي‌ ائده‌ بيلمز؛ آناديلي ‌اوشاغي‌ خالق‌ ايناملارينا و پوئزياسينا ائله‌ باغلاييركي‌، بونو هئچ‌ بير ائستئتيك‌ ائده‌ بيلمز، نهايت‌، آناديلي‌ ائله‌ منيطقى آنلاييشلار و فلسفي‌ گؤروشلر آشيلايير (اؤيره‌دير) كي‌، بونو ‌هئچ‌ بير فيلوسوف‌ باجارماز.

 

زور- گوج ايله‌ اينکيشافى پوزولمايان‌ اوشاق‌، ان اوزاغي‌ 5 ـ 6 ياشيندا اؤز آناديلينده ‌جسارتله‌، دوزگون‌ دانيشير. آنجاق‌ تصوور ائدين ‌كي‌، آز ـ ماز عاغلي‌ اولان‌ 6 ياشلي‌ بيراوشاغين‌ اؤز آناديلينده دانيشديغي‌ كيمي‌ هر هانسي‌ باشقا ديلده‌ دانيشا بيلمه‌ سي‌ اوچون ‌نه‌ قدر بيليگي‌، حيسي‌، تفکورو، منيطقى و فلسفه‌ سي‌ اولماليدير. اوشاغين‌ اؤز آنا ديلينى بوجور منيمسه‌مه‌ سينده‌ يالنيز يادداشي‌ اساس‌ گؤتورنلر چوخ‌ سهو ائديرلر. هئچ‌ بيريادداش‌ (حافيظه‌) نه‌اينكي‌ هر هانسي‌ بير ديلين بوتون‌ سؤزلريني‌، حتي‌ بو سؤزلرين‌ مومكون ‌بيرلشمه‌لريني‌ و دگيشيکلريني‌ دوزلتمگه‌ ناييل‌ اولا بيلمز؛ يوخ‌، اگر ديلي‌ يالنيز يادداشلا اؤير‌نسه ‌يديلر، اوندا هئچ‌ بير ديلي‌ دوز ـ عمللي‌ اؤيره ‌نه‌ بيلمزديلر. خالقين ياراتديغي ‌ديل‌ اوشاقدا اونو حئيواندان‌ فرقلنديرن‌ سؤز ياراتما قابليتيني‌ اينکيشاف ائتديرير. سيزحيس ائديرسينيز كي‌، اؤز فيکيريني‌ ايفاده‌ ائتمك‌ ايسته‌ين‌ اوشاق‌ گاه‌ بير ايفاده‌، گاه ‌دا باشقا ايفاده‌ ايشله‌دير و ايستر ـ ايسته‌مز تعجوبلنير،دئيه سن ‌كي‌، بير ـ بيرينه‌ چوخ‌ ياخين‌ اولان‌ ايكي ‌سؤز آراسينداكي‌ اينجه‌ فرقي‌ حددن‌ آرتيق‌ ياخشي‌ حيس ائدير. سيز همچنين‌ حيس ائديرسينيزكي‌، اوشاق‌ يئني‌ سؤز ائشيدنده‌ اكثر حال‌لاردا اونو دوز حال‌لانديرير (صرف‌ائدير)، تصريف‌ ائدير و باشقا سؤزلرله‌ بيرلشديرير. اولابيلردي‌مي‌ كي‌، آنا ديلينى اؤيره نركن‌ اوشاق‌ خالقا ديل‌ ياراتماق‌ ايمكاني‌ وئرميش‌ ياراديجي‌ قووه ‌نين ‌حيصه‌جيك‌لريني‌ منيمسه‌ مه‌ سين‌؟ باخين‌، خاريجي‌ ديلين‌ بو اينستيکتيني‌ (غريزه‌سيني‌) خاريجيلر نئجه‌ چتينليکله‌ منيمسه‌ييرلر، اصلينده‌ بو هئچ‌ منيمسه‌نيلمير. روسيادا 20 ايل‌ ياشايان‌ آلمان‌ حتي‌ 3 ياشلي‌ روسون‌ اؤز دوغما ديلينده‌ بيلديكلريني‌ قازانا بيلمير.

 

بو غريبه‌ پئداقوق ـ آناديلينه‌ نه اينكي‌ چوخ‌ شئي‌ اؤيره‌دير، هم‌ده‌ آسان‌ و غئيرعادي‌ راحات بير متُودلا اؤيره‌دير. اوشاغا 5 ـ 6 نامعلوم‌ آد وئريريك‌، 7 ـ 8 خاريجى سؤز، 2 ـ 3 آنلاييش‌،بير نئچه‌ موركب‌ حاديثه‌ اؤيره‌ديريك‌ و بونا چوخ‌ چتينليکله‌ ناييل‌ اولوروق‌. اوشاق‌ اوچون ‌ايسه‌ بو داها چتين‌ اولور. او، گاه‌ ازبرله‌يير، گاه ‌دا اونودور. اگر وئريلن‌ آنلاييشلار آز و ياچوخ‌ درجه‌ده‌ موجرد اولورسا، هر هانسي‌ بير منيطقى و قراماتيك‌ اينجه‌ليك‌ ايفاده‌ ائديرسه‌،اوشاق‌ قطعي‌ شكيلده‌ اونلاري‌ منيمسه‌يه‌ بيلمير، حالبوكي‌ بيزيم‌ اونا عبث‌ يئره‌ صرف ‌ائده رک آيدينلاشديرماغا چاليشديغيميز اينجه‌ليکلري‌ او تجروبه‌ده‌ آسانليقلا، سربست ‌شكيلده‌ منيمسه‌يير. بيز اؤزوموزو اونونلا ساكيتلشديريريك‌ كي‌، اوشاق‌ آنا ديلينده‌ ائله‌بئله‌ فيکيرلشمه‌دن‌ دانيشير، آنجاق‌ بو فيراز (عيبارت) هئچ ‌نه‌ ايضاح‌ ائتمير. اگر اوشاق‌ بو و يا ديگر قراماتيك‌ دؤنومو يئرينده‌ ايشله‌ديرسه‌، دانيشيغيندا سؤزلرله‌ قراماتيك‌ فورمالار آراسينداكي‌ اينجه ليکلري‌ گؤره‌ بيليرسه‌، دئمه‌لي‌، او، بونلاري‌ حيس ائدير، اولابيلسين ‌كي‌ او بيزيم‌ ايسته‌ديگيميز يول‌لا گئتمير. آنا ديلينى اؤيره ننده‌ اوشاق‌ تكجه‌ سؤزلرين‌ وسؤز بيرلشمه‌لرينين يارانماسينى، دگيشيکليگه‌ اوغراماسينى‌ يوخ‌، همچنين‌ سونسوزميقداردا آنلاييشلاري‌، اشيالارا موناسيبتلري‌، فيکيرلري‌، حيسلري‌، بديعي‌ اوبرازلاري‌،ديلين‌ منطقينى‌ و فلسفه‌ سيني‌ اويره‌نير. اؤزو ده‌ اونلارا آسان‌ و تئز، جمعي‌ ايكي‌ ـ اوچ‌ ايل ‌عرضينده‌ يييه ‌له ‌نير. سعي‌ ومئتوديك‌ جانفشانليق‌ گؤسترمکله‌ آدام‌ 20 ايل‌ عرضينده‌ هئچ ‌بونلارين‌ ياريسينا دا يييه لنه‌ بيلمز. بودور آنا ديلى نين ـ بو بؤيوك‌ خالق‌ موعلمينين ـ گوجو!

 

سوروشا بيلرلر، بس‌ نييه‌ بيز آنا ديلي‌ دئييريك‌؟ مگر اوشاق‌ عئيني‌ آسانليقلا خاريجي‌ ديلي ‌اؤيره‌نه‌ و بوندان‌ آنا ديلي‌نين‌ اونا وئرديگي‌ خئيري‌ گؤتوره‌ بيلمزمي‌؟ فرانسيز و آلمان ‌ديللرى ده‌ روس‌، لاتين‌ و يونان‌ ديللرى كيمي‌ بو خالقلارين‌ اوزون‌ عصيرليك‌ معنوي‌ حياتي‌نين‌ نتيجه‌سيددير. دئمك‌، آدام‌ اوشاقليقدان‌ هر هانسي‌ بير خاريجى ديلده ‌دانيشماغي‌ اؤيره‌نيرسه‌، اونون‌ معنوي‌ اينكيشافي‌ بوندان‌ هئچ‌ نه‌ ايتيرمير، عكسينه‌ اودور.كيچيك‌ فرانسيز، اينگليس‌، ايتاليالي‌ اؤز دوغما ديللريندن‌ روس‌ كيمي‌ بلكه‌ داها چوخ ‌خزينه‌ قازانير. بونلارين‌ هاميسي‌ دوزدور. اگر روس‌ اوشاقي‌ لاپ‌ اوشاقليقدان‌،فرانسيزجا و يا آلمانجا دانيشارسا، كيچيك‌ فرانسيز و يا كيچيك‌ آلمانلي‌نين‌ اولدوغووضعيته‌ دوشرسه‌، اوندا شوبهه‌سيز، اونون‌، معنوي‌ اينكيشافي‌ عئيني‌ ايله‌ او يول‌لا، اولا بيلسين ‌كي‌، آشاغيدا گؤره‌جگيميز كيمي‌ ميلي‌ کاراكترلرين‌ شوبهه دوغورمايان‌، ايرثهً كئچمه‌سي ‌فاكتيني‌ قبول‌ ائتمه‌سك‌، تماميله‌ همين‌ يول‌لا گئتمه‌سين‌.

 

ديلين خالقين‌ معنوي‌ حياتي‌نين‌ نتيجه‌لريني‌ ايفاده‌ ائتديگيني‌، فيکير و حيسلرين‌ اورقانيك ‌وارليق‌ اولدوغونو قبول‌ ائتسك‌، اوندا البت‌ كي‌، نه‌ اوچون‌ هر خالقين‌ ديلينده‌ اونون ‌خوصوصي‌ کاراکترلرينين عكس‌ اولدوندوغونو، ديلين خالقين‌ اَن‌ ياخشي‌ سجيه‌سي ‌اولدوغونو باشا دوشريك‌. يونگول‌، جينگيلتي‌لي‌، كسگين‌، تبسوملو، كوبودلوق چالارليغي ‌ايله‌ ياناشي‌، نزاكتلي‌، چؤزه‌له‌نن‌، پروانه ‌كيمي‌ پرواز ائدن‌ فرانسيز دانيشيغي‌،آلمانين‌ آغير، دومانلي‌ فيکيرلرينه‌ غرق‌ اولان‌، گؤتور ـ قوي‌ ائدن‌ دانيشيغي‌، آيدين‌،ييغجام‌، غئيرموعينليگه‌ محل‌ قويمايان‌، بير باشا ايشه‌ باشلايان‌ بريتانيالي‌نين‌ پراكتيك‌ نيطقي‌،ايتاليالي‌نين‌ نغمه‌لي‌، پارلاق‌، رنگارنگ‌ و بلاغتلي‌ نيطقى، سونسوز چاغلايان‌، داخيلي ‌حيسلري‌ تلاتومه‌ گتيرن‌ و هردن ‌بير برك‌ گورولتوسو ايله‌ سئچيلن‌ ايسلاويان‌ نيطقى ـ بوتون ‌وممكون‌ مزيتلردن‌، بعضنً، خالقين‌ اؤزونون‌ او قدرده‌ ياخيندان‌ ايشتيراک ائتمه‌ديگي ‌تاريخين‌ اؤزوندن‌ بو ديللرى ياردان‌ خالقلارين‌ کاراكتريله‌ داها ياخشي‌ تانيش‌ ائدير.محض‌ بونا گؤره‌ ده‌، خالقين‌ کاراكترينه‌ بلد اولماق‌ اوچون‌ داها ياخشي‌، بلكه‌ ده‌، يئگانه ‌دوزگون‌ يول‌ اونون‌ ديلينى اؤيره‌نمك‌ دير و بيز خالقين ديلينه‌ دريندن‌ واريد اولدوقدا اونون‌ کاراكترينه‌ داها دريندن‌ بلد اولوروق‌.

 

ديللرين بو شوبهه دوغورمايان‌ سجيه‌لريندن‌ نتيجه‌ چيخارماغا حاقيميز وار كي‌، آدامين ‌اوشاقليقدان‌ هانسي‌ ديلده‌ دانيشماغي‌، اونون‌ معنوي‌ اينکيشافى اوچون‌ هئچ ‌ده‌اهميتسيز دئييلدير. هر اوشاغين‌ معنوياتيندا و اينکيشافيندا او احاطه‌ ائدن‌ طبيعتين‌، آداملارين‌، اوتاغيندا آسيلميش‌ شكيللرين‌، حتا‌ اونون‌ اويونجاقلارينين‌ دا تأثيري ‌اولدوغونو اعتيراف‌ ائديريک سه‌، اوندا بيز بو و يا ديگر خالقين‌ مزيتلريله‌ دولو ديل‌ كيمي ‌بير حاديثه‌نين‌ تأثيريني‌ اينكار ائده‌ بيلريك‌ مي‌؟ طبيعتين، حياتين‌، اينسانلارا موناسيبتين ‌ايلك‌ يوزوجوسونون‌، هر شئيى‌ گؤرن، دويان‌ و باشا دوشن‌ بو اينجه‌ آتموسفرين ‌تأثيريندن‌ ايمتيناع‌ ائده‌ بيلريك‌ مي‌؟ دئيه‌جك ‌سينيز كي‌، بو آتموسفر روس‌ ديلينده‌ يوخ‌،هر هانسي‌ بير اجنبي‌ ديلده‌ اولسا، نه‌ فلاكت‌ گتيره‌ بيلر كي‌؟ دوغوردان ‌دا هئچ‌ بير بلااولمازدي‌، اگر:

 

بيرينجي‌سي‌، اگر ديل‌ اوشاغين‌ اورقانيزمينده‌ آرتيق‌ اؤزونه‌ حاضرلانميش‌ دوغما يوآ تاپيرسا، ايكينجي‌سي‌، اگر اوشاق‌ دوغوردان‌ دا، ديلي ‌ايله‌ دونياني‌ شرح‌ ائتديگي‌ خالقين ‌موحيط‌ينه‌ تماميله‌ دوشورسه‌، اوچونجوسو، اگر طالعين حؤكمو ايله‌ اوشاغين‌ ايچريسينده ‌ياشاديغي‌ و فعاليت‌ گؤسترديگي‌ خالقين‌ ديلي‌ اونون‌ آنا ديلينى عوض‌ ائديرسه‌، بيرسؤزله‌، اگر كيچيك‌ روس‌ بالاسي‌ بوتون‌ جهتلردن‌ فرانسيز، آلمان‌ و يا اينگليس‌ اولماق ‌مجبورييتينده‌ قاليرسا. لاكين‌ بلا بوراسيندادير كي‌، بو شرط‌لردن‌ بيرينجي‌سي‌ قطعي ‌يئرينه‌ يئتيريله‌ بيلمز، ايكينجي‌سي‌ اوزامان‌ اولابيلر كي‌، روس‌ اوشاغي‌ خاريجده‌ بويوسون ‌و يا تربيه‌ آلسين‌، اوچونجوسو او زامان‌ اولار كي‌، والدئينلر اوشاغين ‌ وطنينى ‌دييشديرمگى قرارا‌ آلسينلار.

 

ميلي‌ کاراکترين اوشاغا ايرثن‌ كئچمه‌سي‌ حاقدا دانيشماق‌ اولارمي‌؟ بيز دئييريك ‌سه‌ كي‌،اوشاقلارا والدئينلريندن‌ فيزيونوميانين‌ چوخ‌ بؤيوك‌ جيزگيلري‌ ـ گؤزون‌ رنگي‌، بورنون‌، دوداقلارين‌، ساچلارين‌ فورماسي‌، قد ـ قامت‌، يئريش‌ طرزي‌، ميميكا كئچير، اوندا، البته‌،گومان‌ ائتمك‌ اولاركي‌، اوشاقلارا والدئينلريندن‌ داها اينجه‌ و درين‌ سجيه‌وي ‌خوصوصيتلر كئچير. چونكي‌ اينسانين‌ خوصوصي‌ مزيتلرينين‌ سببي‌ داها درين‌ و گيزلي ‌اولدوقدا، او، ايرثن‌ چوخ‌ دوزگون‌ كئچير. كور والدئينلردن‌ گؤرن‌ اوشاقلار دوغولور،عليل‌ و قيچي‌ اولمايان‌ آتا بو ناقيص‌ليگي‌ هئچ‌ واخت‌ اوشاغينا اؤتورمور، لاكين‌ بونونلا ياناشي‌ سببي‌ عصب‌ سيستمي‌نين‌ درينليگينده‌ كؤك‌ سالميش‌ و حكيمين‌ آختاريب‌ تاپابيلمه‌ديگي‌ خسته‌ليکلري‌ مثلن، ورم‌، اوره‌ك‌ كئچمه‌/اِئپي‌ليپسيا، ايرثي‌ دليليك‌ و ساييره‌ والدئينلردن‌ اوشاقلارا كئچير و بعضن ًبير نسيل‌ اؤتور، او بيرينده‌ تظاهور ائدير. ميميكا كيمي‌هئچ‌ بير شئي‌ ايرثن‌ بو قدر دوزگون‌ وئريلمير، هئچ‌ بير ميكروسكوپلا گؤرونمه‌ين‌ داخيلن ‌گيزلي‌ علامتلرين‌، تظاهورودور و اكثر حال‌لاردا دوشونجه‌ طرزينين‌ و حركتلرين ‌تأثيري‌ آلتيندا دييشيکليگه‌ اوغرايير.

 

کاراکترين ميلى خوصوصيتى نين ديگر باشقا علامتلره نيسبتنً والدئينلردن‌ اوشاقلارا داها دوزگون‌ اؤتورولمه‌سينى بيز موباحيثه دوغورمايان‌، اؤزو ده‌ چوخ‌ كسگين‌ شکيلده تظاهورائدن‌، بو سببدن ده‌ شوبهه دوغورمايان‌ فاكت‌ كيمي‌ قبول‌ ائده‌ بيلريك‌. بئله ليکله‌،کاراکترين بو ايرثى اساسي‌، باشقا مقاله‌ده‌ گؤسترديگيميز كيمي‌، اينسانين‌ واخت ‌اؤتدوكجه‌ بوتون‌ کاراکترينى تشكيل‌ ائدن‌ اَن‌ مؤحکم خوصوصيته‌ چئوريلير. آنادان‌ گلمه ‌مئييللريمزه‌ اويغون‌ گلن‌ شئيى آسانليقلا و مؤحکم منيمسه‌ييريك‌، بو اساسلارا ضيد اولان‌ و يا اونلارا ياد اولان‌ شئيى چتينليکله‌ اؤيره‌نيب‌، ضعيف‌ ياددا ساخلاييب‌ و يالنيزاوزون‌ سعيلردن سونرا اؤز دوغما کاراكتريميزه‌ چئويره‌ بيليريك‌. بورادان‌ آيدين‌ اولوركي‌، اگر اوشاغين‌ دانيشماغا باشلاديغي‌ ديل‌ اونون‌ آنادان‌ گلمه‌ کاراکترينه ضيد ديرسه‌، بوديل‌ هئچ‌ واخت‌ اونون‌ معنوي‌ اينکيشافينا آنا ديلي‌ قدر گوجلو تأثير گؤستره‌ بيلمز، هئچ ‌واخت‌ اونون‌ روحونا و بدنينه‌ بو قدر درين‌ كؤك‌ سالا بيلمز، هئچ‌ واخت‌ اونون‌ زنگين‌ و هرطرفلي‌ اينکيشافينا کؤمک ائده‌ بيله‌جك‌ قدر درين‌ و ساغلام‌ كؤك‌ سالا بيلمز.

 

اکين بو آز دير. يوخاريدا گؤردويوموز كيمي‌، خالقين ديلي‌، وطني‌ و معنوي‌ حياتي‌ تام ‌عكس‌ ائتديرير، عئين زاماندا او، اوشاغي‌ احاطه‌ ائدن‌ موحيطين و حياتين‌ شرحچيسى دير. اوشاغين‌ آنا ديلينى عوض‌ ائدن‌ ديل‌ اونا يابانجي‌ موحيطي‌ و حياتي‌ تبليغ‌ ائدنده‌ نه ‌باش‌ وئرير؟ هئچ ‌نه‌، يالنيز اوشاغين‌ چوخ‌ چتين‌، كوت ‌بئيين‌ اولماسي‌، طبيعتين و حياتين درينليگينه جوزيى شکيلده وورماسيندان‌ باشقا هئچ ‌نه‌! باشقا سؤزله‌، او، داها لنگ‌ و داها ضعيف‌ اولور. فرانسانين‌ و اينگيلتره‌نين‌ طبيعتيني‌ روسيادا ياراتماق‌ اولماز، يوخ‌، اگر اؤزائوينده‌ حياتا‌ ضيد موحيط‌ ياراتماق‌ مومكونسه‌، بو ومحيط‌ نه ‌قدر ميسكين‌، نه‌ قدر جليز اولار،هر آدديمدا اوندا دگيشيکليکلر عمله‌ گلر كي‌، اونون‌ آراسيندان‌ بيزيم‌ مليتيميز بويلانير، بونودا باشا دوشمك‌ و ايفاده‌ ائتمك‌ اوچون‌ اوشاق‌ آنا ديلينده‌ اولماديغينا گؤره‌ باشا دوشوب‌ايفاده‌ ائده‌ بيلمير.

 

خاريجدن‌ دايه‌لر و ننه‌لر، قووِئرنِئرلر، قووئرنانت‌ قادينلار، حتي‌ خاديملر گتيزديريرديلر، آتا ـ آنا بير كلمه‌ده‌ اولسون‌ روسجا دانيشمير، بير سؤزله‌ ائوده‌ بير تيكه‌ فرانسا، اينگيلتره و ياآلمانيا، بعضن ده‌ بير تيكه‌ اوندان‌، بوندان‌ بير آز دا اوچونجودن‌ ياراديرلار. آنجاق‌ بونلار نه ‌قدر ميسكين‌ دير، نه ‌قدر موختليف ميلتلرين پارچالارينين‌ بي‌آبيرجاسينا قاريشيغيدير! اؤز ميلى ماراقلاريندان‌ آيري‌ دوشموش‌ بو شخصلر نه‌يي‌ و نئجه ‌اويره‌ديرلر؟ بوجور ميسکين صونعي‌ آتموسفرله‌ سونسوز درين‌ و قيدا وئريجي‌ خالق ‌آتموسفريني‌ عوض‌ ائتمگه چاليشيرلار. آنا و آتا فرانسيزجا، آلمانجا، انگليسجه ‌دانيشيرلار، اؤزو ده‌ چوخ‌ سليس‌ دانيشيرلار، اونلار اينانيرلارمي‌ كي‌، بو ديللرى اؤزاؤلكه‌لرينده‌ بويوموش‌ فرانسيز، آلمان‌ و يا اينگليس كيمي‌ دانيشيرلار؟ يوخ‌، اگر پوشكين ‌روس‌ ديلينى موسقوا كليسه‌ خاديملريندن اؤيره‌نيبسه‌، بيزيم‌ فداكار فرانسيزلار وآلمانلار دا فرانسيز و آلمان‌ كندليلريندن‌ اؤيره‌نمگه شئي‌ تاپا بيلر. بيز ديل‌ داخيلينده ‌فعاليتده‌ اولوروق‌، لاکين هئچ‌ واخت‌ اونون‌ مين‌ ايللرين‌ داوامي‌ اولاراق‌ هميشه ‌جاوان ‌حياتي‌ و قووه‌ قايناقلارينا باش‌ وورماميشيق‌ و وورا دا بيلمه‌ريك‌، همين‌ قايناقلار اؤزونده‌ وطنين طبيعتينى، خالقين معنوي‌ و هميشه ‌يانار حياتيني‌ عكس‌ ائتديرن‌ بوخالق‌ درياسيني‌ قوروماغا و ليل‌لنمگه قويمور. بس‌ حياتين‌ بوتون‌ وضعيتي‌، بس‌ دين‌،اينسانلار موناسيبت‌، حيسلر، آنلاييشلار؟ بيز هئچ‌ واخت‌ حياتيميزين بوتون‌ ساحه‌سيني ‌ائله‌ دگيشه‌ بيلمه‌ريك‌ كي‌، اونون‌ آراسيندان‌ ميليتيميز و ياشاديغيميز خالق‌ آتموسفري ‌گؤرونمه‌ سين‌. دئمك‌ اوشاغين‌ آنا ديلينى اجنبي‌ ديل ايله‌ عوض‌ ائتمکله‌، روسيادا ياشاياـ ياشايا بيز هر دفعه‌ اونا حقيقي‌ و زنگين‌ بولاق‌ عوضينه‌ ساختا و كاسيب‌ بير قايناق ‌تقديم‌ ائتميش‌ اولوروق‌.

 

فرض‌ ائده‌ك‌ كي‌، هر هانسي‌ بير وارلي‌ آدام‌ فرانسانين‌ و يا اينگيلتره نين‌ بير پارچاسيني‌ اؤزائوينده‌ يارادا بيلدي‌، ائوده‌ بوتون‌ شراييط‌، حيات‌ بورادا دانيشيلان‌ ديلين کاراکترينه اويغون‌ گلير، حتي‌ فرض‌ ائده‌ك‌ كي‌، قاچيلماز اولاراق‌ بو ائوده‌ ياشايانلارين‌ ديني‌ همين ‌ديله‌ اويغون‌ گلير، اوندا دونيادا بو جور هفتي‌بئجاردان‌ پيس‌ اولان‌ پراووسلاو ايكي ‌اوزلولويون‌ فرانسيز شيوه‌سيله‌ عيبه‌جر قاريشيغي‌ يوخدور، فرض‌ ائده‌ك‌ كي‌، بيرسؤزله‌، بو خوشبخت‌ عاييله‌لردن‌ اولان‌ اوشاقلار فرانسادا فرانسيز عاييله‌لرينده‌ و يااينگيلتره ده‌ اينگليس عاييله‌لرينده‌ اولدوغو كيمي‌ اينکيشاف ائديرلر، اوندا نه‌ اولار؟ تكجه ‌اوشاغين‌ ديل ايله‌ بيرليکده‌ اؤزونه‌ فرانسيز و يا اينگليس کاراکترينى آشيلاماقدان‌ ووالدئينلرين‌ شيلتاق‌ليغي‌ ايله‌، مودانين (mode) آخماق‌ طلبي ‌ايله‌ خالقين زنگين‌ معنوي‌ ايرثى نين ‌اؤزونه‌ چاتان‌ حيصه‌سيندن‌، او حيصه‌دن‌ كي‌، اونو وطنينه‌ و خالقينا اؤولاد ائتميشدير، ايمتيناعدان‌ باشقا هئچ ‌نه‌ دئييلدير. قوي‌، او سونرا خاريجى ديل‌ كيمي‌ روسجا دانيشماغي‌ اؤيره‌نسين‌، بو هئچ‌ واخت‌ اونون‌ قلبيندن‌ ايلك‌ بئشيکده‌ آلديغي ‌تاثوراتلاري‌ سيله‌ بيلمز. اونون‌ دانيشديغي‌ ديلين‌ و بو ديلي‌ ياردان‌ خالقين روحو اوشاغين قلبينده درين‌ كؤك‌ سالير، اونون‌ قانينا و جانينا هوپور، خالقين ديلي‌ اؤز مؤوقعيني ‌(دورومونو‌) تاپير و ياد كؤكلري‌ قوپاريب‌ آتمير، چونكي‌ عادي‌ پسيكولوژي‌ قانونا اساسن ًاؤزونه‌ بيرينجي‌ يئر تاپان‌ هر بير تاثورات بوتون‌ سونراکيلاردان‌ درينده‌ اولور. بو يول‌لا تربيه ‌آلميش‌ اينسانين‌ حياتا قدم‌ قوياندا اؤزونون ‌كؤکلرين‌ آراسيندا ياد اولماغي‌، اوزو كيمي ‌بدبختلرين‌ آراسيندا اونلارين‌ ياراتديغي‌ و صونعي‌ شراييطده‌ ياشاياراق‌، بلكه‌ده‌ بو حياتدا پاريلداياجاغي‌، لاکين هميشه‌ خالقا يابانجي‌ قالاجاغي‌ و اونون‌ اورقانيك‌ حياتينا بيرذرّه‌ ده‌ خئيير وئرميه جگي‌ تعجوبلودورمو؟ بئله‌ آدامين‌ ادبيات‌ و دؤولت‌ فعاليتي ‌ساحه‌سينده‌ ايشلري‌ اجنبي‌ بزه‌گي ايله‌ دامغالاناجاقسا و خالقين خوشونا گلميه جكسه‌،اونون‌ بوينوندا آغير يوك‌ كيمي‌ قالارسا و يا هئچ‌ كيمه‌ لازيم‌ اولمايان‌ و باشا دوشولمه‌ين ‌شئي‌ كيمي‌ رد اولونارسا، بورا دا تعجوبلو‌ نه‌ واركي‌؟ بوجور تربيه‌ آلميش‌ آدام‌ خالق ‌ايرثينه‌ هئچ‌ بير شئي‌ وئره‌ بيلميه جك‌، اجنبيني‌ اؤز خالقي‌نين‌ مالي‌ ائده‌ بيلميرسه‌، هئچ ‌واخت‌ خالقي‌ باشا دوشمورسه‌ و خالق‌ طرفيندن‌ آنلاشيلميرسا، جمعيتين و خالقين‌ ياراماز عوضوو، بعضن اَن‌ آغير يوك‌ كيمي‌ قاليرسا، اؤزونه‌ وطنپرورماسكاسيني‌ نئجه ‌تر تؤكه‌ ـ تؤكه‌ گئيسه‌ بئله‌، وطنسيز يازيق‌ كيمي‌ گؤرونورسه‌، بورادا تعجوبلو‌ نه‌واركي‌؟

 

داها پيس‌ اودور كي‌، اوشاق‌ عئين زاماندا بير نئچه‌ ديلده دانيشماغا باشلايير و نتيجه‌ده‌اونلارين‌ هئچ‌ بيري‌ اونون‌ اوچون‌ طبيعي‌ ديل‌ يئريني‌ توتا بيلمير. اوشاغين‌ اينکيشافيندا آنا ديلي‌نين‌ اهميتينى بيز ايضاح‌ ائده‌ بيليريك‌، لاکين هئچ‌ بيرينين‌ دوغما آدلانديرا بيلميه‌جگى ديللرين اوشاقليقدا بوجور چارپازلاشماسي‌نين‌ (توققوشماسي‌نين‌) نه‌كيمي‌ نتيجه‌لر وئره‌جگينى‌ ايضاح‌ ائتمگه احتياج‌ يوخدو. اؤزلويونده‌ آيدين‌ دير كي‌،بئله‌ چارپازلاشمادا اينسان جمعيتي‌نين‌ اَن‌ بويوك‌ مورشدو‌ اولان‌ ديل‌، دئمك‌ اولار كي‌،اوشاغين‌ اينکيشافينا تأثير گؤسترميه‌‌جك‌، آنجاق‌ بو پئداقوقون‌ (ديلين) كؤمگى‌ اولمادان ‌هئچ‌ بير پداقوق‌ بير شئي‌ ائده‌ بيلمز. بيز بو جور تربيه‌ آلميش‌ اوشاقلاري‌ گؤرموشوك‌.اونلار يا تام‌، هر جور کاراکتردن حتي‌ اَن‌ آز اينکيشاف ائتميش‌ آداملارداكي‌ هر جور ياراديجي‌ قووه‌دن‌ محروم‌ اولموش‌، لاکين تربيه‌سي‌ پوزلمايان‌ كوت ‌بئيينلر دير، اونلاري‌ خيلاص ‌ائديجي‌ عيبرت‌ درسي‌ اوچون‌ جمعيته‌ نومونه‌ گؤسترمگه دگردي‌. يازيق‌ اوشاقلار، چوخ‌ قايغي‌كش‌ والدئينلرينيز سيزي‌ نئجه‌ دهشتلي‌ اؤلومه‌ محكوم‌ ائديبلر: اونلار نه‌اينكي ‌سيزي‌ وطنداش‌ کاراكتريندن‌، پوئزيادان‌، معنوي‌ حياتدان‌ محروم‌ ائديب‌، اؤزونو گولونج وضعيته‌ سالماق‌ اوچون‌، موُدانين‌ قورباني‌ اولماقلا، خالق‌ حياتيندا بوتون‌ محصولدار فعاليتدن‌ كونوللو شکيلده ايمتيناع‌ ائدن‌ جمعيته‌ اَگلنجه‌ وئرمك‌ اوچون‌ اويونجاقلارا چئوريليبلر. بونون‌ هاميسي‌ نه‌دن‌ و نه‌ اوچون‌ ائديلير؟

 

خاريجى ديللرى موختليف باخيمدان‌ اؤيره‌نمك‌ اولار:

 

بيرينجي‌سي‌، ديلي‌ اؤيره‌نيلن‌ خالقين‌ ادبياتي ‌ايله‌ تانيش‌ اولماق‌ مقصدي‌ايله‌، ايكينجي‌سي‌، آغلين‌ منيطقى اينکيشافينا ايمکان وئرمك‌ اوچون‌. چونكي‌ هر بير يئني‌ ديلي‌ منيمسه‌مك‌، بو معنادا عقلي‌ مشغوليت‌ اوچون‌ اَن‌ ياخشي‌ واسيطه‌ دير، خوصوصيله‌ بو ديل ‌روُم‌ و يونانيستاندا اولدوغو كيمي‌ اورقانيك‌ جهتدن‌ اينکيشاف ائديبسه‌، اوچونجوسو، خاريجى ديللر شيفاهي‌ و يازيلي‌ شکيلده ديلينى اويره‌نديگيميز ميلتين‌ نوماينده‌لريله‌ علاقه‌يه‌ گيرمك‌ اوچون‌ واسيطه‌ دير و نهايت‌ دؤردونجوسو، پراكتيك‌ جهتدن همين‌ خاريجى ديللردن ايستيفاده ائديب‌ و اؤزهموطنلريميزله‌ دانيشماق‌ و يازيشماق‌ اوچون‌.

 

ديله‌ باشقا خالقين اؤز زنگينليگى ‌نين‌ آچاري‌ كيمي‌ ياناشان‌ بيرينجي‌ حالين‌ زنگين‌ و موهوم ‌نتيجه‌لر اَلده‌ ائتديگي‌ شوبهه دوغورمور، آنجاق‌ آخرينجي‌نين‌ معناسيز، بوش‌ شئي‌اولدوغو دا شوبهه سيز دير، چونكي‌ بورادا بيز غريبه‌ و وحشي‌ بير مُودانين‌ طلبيني‌ يئرينه يئتيرميش‌ اولوروق‌، اؤز هموطنلريميزله‌ خاريجى ديلده دانيشيريق‌. عئين زاماندا معلومدوركي‌، محض‌ يئني‌ خاريجى ديللرين اؤيره‌نيلمه‌سينده‌ آخرينجي‌ غريبه‌ و يابانجي‌ مقصدبيزيم‌ اكثر ساوادلي‌لاريميزدا، همچنين‌ بير چوخ‌ مكتبيميزده‌ اؤزونه‌ يئر توتوب‌ و بومقصده‌ نائيل‌ اولماق‌ اوچون‌ حاضيردا اَن‌ چوخ‌ پاپاشا و ماماشالاريميز، اينستيتوت‌ وپانسيونلاريميز چاليشيرلار.

 

خاريجى ديللرى اؤيره‌ننده‌ بيزي‌ عقلي‌ ژيمناستيك‌ ماراقلانديريرسا، اوندا لاتين‌ و يونان ديللرينى اؤيره‌نمه‌لي‌ييك‌، بيزي‌ غرب‌ خالقلارينين‌ زنگين‌ ادبياتي‌ ماراقلانديريرسا،اينگليس و آلمان‌ ديللرينه‌ اوستونلوك‌ وئرمه‌لي‌ييك‌. بيز ايسه‌ داها چوخ‌ فرانسيز ديلينه‌ واونون‌ نيسبتن كاسيب‌ و باشقالاري ‌ايله‌ موقاييسه‌ده‌ روحن داها چوخ‌ يابانچي‌ اولان‌ ادبياتينا جان‌ آتيريق‌. بيزيم‌ دبده‌ اولان‌ مکتبلريميزده‌ فرانسا ادبياتي‌ اؤيره‌نيليرسه‌، بو ديلده داها چوخ‌ پراكتيكا اَلده‌ ائتمك‌، همچنين‌ اساس‌ مقصدين‌ بوشلوغونو و معناسيزاولدوغونو قيسمن اؤرت‌ ـ باسدير ائتمك‌ اوچون‌ ائديلير. بو و يا ديگر خاريجى ديلي‌ هانسي ‌مقصدله‌ اويره‌نمگيميز چوخ‌ واجيبدير، چونكي‌ او، ديل‌ اؤيره‌نمه‌نين‌ متدونو موعينلشديرير. خاريجى ديلي‌ خالقين‌ ادبياتينا بير آچار كيمي‌ اؤيره‌نديكده‌، اساس‌ ديقت ‌يازيچيلارين‌ اوخونماسينا يؤنلير. ديل‌ عقلي‌ ژيمناستيك‌ كيمي‌ اؤيره‌نيليرسه‌، ديل‌اؤيره‌‌نمه‌ني‌ اساسن ديلين منطيقينه‌ يؤنلديرلر و ادبياتدان بؤيوك‌ نومونه‌لر يامسيلاماقلاعقلي‌ مشق‌ ائتمگه مجبور ائديرلر. ديله‌ پراكتيك‌ جهتدن يييه‌لنمك‌ ايسته‌ييريک سه‌،اوندا بوتون‌ ديقتيميز مضمونا دئييل، پراكتيك‌ ورديشلرين‌ اَلده‌ ائديلمه‌سينه‌، دوزگون ‌دانيشماغا، قيراماتيك‌ جهتدن دوزگونلوگه‌، ايفاده‌لرين‌ چئويکليگينه‌ و عمومي ‌ايشلکليگينه‌ يؤنلديلمه‌ليدير. ديل‌ اؤيره‌نمه‌نين‌ مقصديندن‌ آسيلي‌ اولاراق‌، موعليمي‌،درسليگى‌ و اوشاغا خاريجى ديلي‌ نه‌ واخت‌ اؤير‌ده‌جگيميزي‌ سئچيريك‌.

 

ديل‌ اؤيره‌نمه‌ ادبياتا و منطيقه‌ يييه‌لنمك‌ مقصدي‌ گودورسه‌، اوندا ائركن‌ ياشلاردان ‌اوشاغين‌ اؤز آنا ديلينى تام‌ اؤيره‌تمه‌دن‌ باشلاماغا احتياج‌ يوخدور، بو اصلينده‌ ضررگتيرر. يوخ‌، اگر بيز دانيشيق‌ ديلينى اؤيره‌نمگي‌ قارشيميزا مقصد قويموشوقسا، و اَن‌ چوخ‌ دانيشيغيمزين‌ تميزليگينه‌ چاليشيريقسا، اوشاغا فرانسيزجا دانيشماغي‌ مجبورائتمگيميز آيديندير، چاليشمالي‌ييق‌ كي‌، بيزيم‌ دوغما ديليميز اونا دانيشماغا مانع ‌اولماسين‌: بورادان‌ دا فرانسيز تربيه‌چيلريني‌ و قووئرنئرلريني‌ توتماغيميزين‌ مقصدي ‌آيدينلاشير، روس‌ ديلي ‌ايله‌ ياناشي‌ مكتبين‌ ايلك‌ صينيفلريندن‌ فرانسيز ديلينى اويره‌نمك‌ طلبي‌ و سايير آيدين‌ اولور. فرانسيز ديليني‌ مکتبلريميزده‌ و خوصوصيله‌ قادين ‌مکتبلرينده‌ ادبيات‌ و يا عقلي‌ اينکيشاف خاطيرينه‌ اؤيره‌نيلمه‌ديگى‌ يقين‌ كي‌، هئچ‌ كسده ‌شوبهه يئري‌ دوغورمور. بير باخين‌، بو مکتبلرين‌ تربيه‌چيلري‌ اوشاقلارا فرانسيزادبياتيندان‌ هئچ‌ بير شئي‌ وئره‌ بيلميرلر و اونلار عادتن موختليف موليفلردن‌ پارچالار توپلانميش‌، اکثرن اهميتينى ايتيرميش‌ و يالنيز سؤز گولشديرمك‌ خاطيرينه، ترتيب ‌اولونموش‌ عادي‌ ميسکين منتخباتلار تكليف‌ ائديرلر. دوغوردان‌ دا، قيزلارا ووُلتري‌، روُسونو، هوقونو، (آلكساندر) دوماني‌، برانژني‌ تؤوصيه‌ ائتمك‌ اولارمي‌؟ هم‌ والدئينلريميز،هم‌ ده‌ تربيه‌چيلريميز ناراضي‌ قالارديلاركي‌ مکتبلريميزده‌ تربيه‌ آلان‌ اوغلان‌ و قيزلار ديل ايله‌ ياناشي‌ فرانسيز ادبياتي‌نين‌ ياخشي‌ نومونه‌لرينين‌ فيکير و روحونو منيمسه‌سينلر.محض‌ بونا گؤره‌ ده‌ عادتن قيزي‌ عيبه‌جر كورنل‌، راسين‌ اوبرازلاري‌ و موليئرين‌ كيچيك ‌پارچالاري‌ايله‌ تانيش‌ ائده رک اونلارا اَن‌ چوخو اورتاباب‌ اثرلري‌ تقديم‌ ائديرلر كي‌، بونلاردا حقيقي‌ تميز حيسلر كيمي‌ فيکير آز دير، سونرا دا اونلاردان‌ اساسن بيزيم ‌ماغازالاريميزي‌، تاسوف كي‌، قادينلاريميزين‌ كيتابخانالاريني‌ دولدوران‌ فرانسيز ادبياتي‌نين جلب‌ائديجي‌ اثرلريني‌ گيزله‌ديرلر، بو عجاييب‌ تربيه‌ ايشينده‌ نه‌ قدر يازيق‌، گولمه‌لي‌،نه‌قدر آز دوشونولموش‌، دريندن‌ حيس اولونان‌ جهتلر وار.

 

وضعيت‌ آلمان‌ ديلينده‌ ده‌ عئينى ايله‌ بئله‌ دير، آنجاق‌ آلمان‌ ديلي‌ ايكينجي‌ سيرادا دورورو. اونا گؤره‌ ده‌ اونون‌ اؤيره‌نيلمه‌سي‌ نتيجه‌لري‌ داها آجيناجاقلي‌ دير. بير نئچه ‌عومومي ‌ايشلك‌ ايفاده‌لريني‌ بيرلشديرمگى سهوسيز بير قئيد يازماغي‌ باجاران‌، دبده ‌اولان‌ مکتبلريميزده‌ تحصيل‌ آلان‌ اوغلان‌ و قيزلار ايمتاحاندا گؤته‌ني‌، شيللري‌، لئسينگي ‌گوجلو تنقيد آتشينه‌ توتوب‌، هيبئلونقلار و سايير حاقيندا دانيشير، موعليملريندن ‌ائشيتديكلري‌ هر شئيى توتوقوشو كيمي‌ تكرار ائديرلر، لاکين شيللردن‌، بيز هله ‌گؤته‌ني‌ دئميريك‌، بوتؤو بير صحيفه‌ني‌ باشا دوشمورلر، اودور كي‌، آلمان‌ ادبياتي ‌ايله ‌مشغول‌ اولماغا اونلاردا نه‌ هوس‌، نه‌ ده‌ ايمکان اولور. روس‌ جمعيتلرينده‌ آلمان‌ ديلي ‌اؤيره‌نيلمه‌ديگيندن‌، ايشلنمه‌ديگيندن‌ بو ديلين اوزون‌ ـ اوزادي‌ اؤيره‌نيلمه‌سي‌ چوخ‌گؤز‌ل‌ بهره‌ وئرير، جاوان‌ اوغلان‌ و يا قيز آلمان‌ چؤره‌كچيلري‌ و چكمه‌چيلري‌ ايله ‌دانيشا بيلير، خاريجه‌ گئتديکده‌ ايسه‌ عئينى ايله‌ اونون‌ كيمي‌ بلكه‌ ده‌ اوندان‌ ياخشي‌ اوچ‌ و يا دؤرد آوروپا ديلينده‌ دانيشا بيلن‌ هر هانسي‌ بير مهمانخانا كئلنريني‌ (نظافتچي‌سينى) اؤز آلمان‌ دانيشيغي ‌ايله‌ واله ائتمك‌ ايمكاني‌ الده‌ ائدير.

 

اگر خاريجى ديللرى اؤيره‌نمه‌نين‌ بو گؤز‌ل‌ بهره‌لري‌ اَن‌ ياخشي‌ جاوانليق‌ ايللري‌ حسابينا، تحصيل‌ واختي‌نين‌ چوخ‌ حيصه‌سيني‌ توتماق‌، آنا ديلي ايله‌ مشغول‌ اولماقدان ‌محروميتلري‌ باهاسينا باشا گلمه‌سه‌يدي‌، ـآنا ديلينده دانيشانلار جزالانديريلير و ياجريمه‌ اولونور، ائله‌بيل‌ نه‌سه‌ نالاييق‌ سؤز ايشلدير، نه‌سه‌ آخماق‌ ايش‌ گؤروب‌،ـ بوتون ‌بونلار كدر دوغورماسايدي‌ گولمه‌لي‌ گؤرونردي‌. اوشاق‌ اؤز روحونا اويغون‌ دانيشماغا جان‌ آتير، بو اونا چوخ‌ آسان‌ گلير، اونون‌ اينکيشافينا شراييط يارادير، آنجاق‌ تربيه‌چي‌ دئيير: اولمازـ بو اونون‌ معنوي‌ اينکيشافينى‌ نه‌اينكي‌ لنگيدير، حتي‌ اونو اينکيشافدان‌ ساخلايير وبودا سؤزسوز اونون‌ بوتون‌ اينکيشافى نين‌ حياتينا اؤز تأثيريني‌ گؤسترير. عاغلين‌ و حيسين ‌كوتلويو، داخلي‌، صميميتين‌ و پوئزيانين‌ اولماماسي‌، فيرازانين‌ فيکيره‌ آغاليق‌ ائتمه‌سي‌ ـ بودور بئله‌ تربيه‌ قايغيسي‌نين‌ نتيجه‌لري‌.

 

البته‌، تعجوبلي‌ اولسا دا بير شئي‌ آيدين‌ دير كي‌، خاريجى ادبياتلا بيزده‌ او آداملار مشغول ‌اولورلار كي‌، اونلار اؤزلري‌ خاريجى ديللرى اؤيره‌نيرلر، هر هانسي‌ بير گيمنازيست‌ و ياسميناريست‌ فرانسيزجا قيميلداسا، هئچ‌ بير فرانسيز اونون‌ نه‌ دئمك‌ ايسته‌ديگينى‌ باشادوشمز. روسياني‌ اينگليس ادبياتي‌ خزينه‌سيله‌ آز ـ چوخ‌ تانيش‌ ائدن‌ اينگليسجه‌دن‌ ترجومه ائدنلريميزين‌ چوخو بو ديلده نه‌ اينكي‌ اون سؤزو بير ـ بيرينه‌ جالايا بيلير، حتي ‌سئوديکلري‌ و دريندن‌ باشا دوشدوكلري‌ مؤليفدن‌ بيرجه‌ سطيري‌ برکدن‌ اوخويا بيلسه‌لر، اونلارين‌ اؤزلري‌، فيکيريميزجه‌، چيخارديقلاري‌ ياباني‌ سسدن‌ قورخويا دوشرلر. البته‌، بيز فورمايا بوجور تام‌ بيگانه‌ قالماغا حاق‌ قازانديرميريق‌، چونكي‌ ديلين بيرخوصوصيت‌ و گؤز‌لليگي‌ سسلرين‌ اؤزونده‌ گيزلنير، آنجاق‌ آچيق‌ اعتراف‌ ائده‌ك‌ كي‌،سئچگي‌ قارشيسيندا قالديقدا، باشقالارينا تعجوبلي‌ گؤرونسه‌ ده‌، هر حالدا قوزون ‌لپه‌سيني‌ (ايچيني‌) قابيغيندان‌ اوستون‌ توتارديق‌. اگر اوشاق‌ ياشلاريندان‌ چتينليك ‌چكمه‌دن‌ بير نئچه‌ ديل‌ اؤيره‌نن‌ هر بير كس‌ اؤز بيليکلريندن‌ آز ايستيفاده ائديرسه‌، بونون ‌اساس‌ سببلريندن‌ بيري‌ آنا ديلي‌نين‌ اونون‌ معنوي‌ اينکيشافينا كيفايت‌ قدر تأثير گؤستره‌بيلمه‌مه‌سي‌ دير. بو يول‌لا خاريجى ديلي‌ اؤيره‌نمك‌ آدامي‌ مدني‌ ائتمير...

 

لاکين اوميد ائديريك‌ كي‌، دئييلنلردن‌ هئچ‌ كس‌ ائله‌ نتيجه‌ چيخارماز كي‌، بيز، عموميتله‌، خاريجى ديللرين اؤيره‌نيلمه‌سي‌نين‌ علئيهينه‌ چيخيريق‌، عكسينه‌، ساوادلي‌ آداملارين ‌يئتيشمه‌سينده‌ خوصوصيله‌ بيزيم‌ روسيادا بونو واجيب‌ حساب‌ ائديريك‌. داها قطعي ‌دئسك‌، آوروپا ديللريني‌، خوصوصن موعاصير ديللرى بيلمك‌ روسلارا تام‌، سربست‌ و هرطرفلي‌ اينکيشاف اوچون‌ ايمکان وئرير، بونلارسيز اونلارين‌ علمه‌ بير باشا گئنيش‌ يولوهميشه‌ليك‌ باغليدير. غرب‌ علمي‌ و مدنيتي‌ خزينه‌سينه‌ آچار تاپا بيلمه‌ين‌ آداما معلومات ‌و آنلاييشلارين‌ ياريمچيقليغي‌، قارانليق‌ قالماسي‌، ناتمامليغي‌، بير طرفليليگي‌ وثوبوت ‌اولونمازليغي‌ هميشه‌ آغير يوك‌ اولوب‌ بوينوندان‌ آشاغي‌ باساجاقدير. بيز نه‌اينكي ‌ديلچيليگين‌ علئيهينه‌ چيخيش‌ ائديريك‌، عكسينه‌، بئله‌ حساب‌ ائديريك‌ كي‌، تدريس ‌موسيسه‌لريميزده‌ ديلچيليك‌ هله‌ ده‌ لازيمي‌ سوييه‌ده‌ دئييلدير، نه‌ اينكي‌ گيمنازيالار،سميناريالار و تدريس‌ كورپوس‌لاريندا، حتي‌، بير و يا ايكي‌ خاريجى ديلده پراكتيك‌ جهتدن ياخشي‌ دانيشماغي‌ باجاران‌ گنجلرين‌ اوخودوقلاري‌ تکنيكوم‌ واينستيتوتلاردا ديلچيليك‌ هله‌ده‌ لازيمي‌ اينکيشاف سوييه‌سينه‌ چاتماييب‌. حساب ‌ائديريك‌ كي‌، تدريسين‌ تكميل‌لشمه‌سينه‌ جان‌ آتان‌ بوتون‌ مکتبلرده‌ اينگليس، آلمان‌ وفرانسيز ديللريله‌ برابر سوييه‌ده‌ اؤيره‌نيلمه‌لي‌ دير. بيز عئين زاماندا آشاغيداكيلاري ‌واجيب‌ ساييريق‌:

 

1ـ هر بير اجنبي‌ ديلي‌ اؤيره‌نمکده‌ اساس‌ مقصد ادبياتلا تانيش‌ اولماقدير، سونرا عقلي ‌ژيمناستيك‌ و نهايت‌، اگر ايمکان وارسا اؤيره‌نيلن‌ ديله‌ پراكتيك‌ جهتدن يييه‌لنمك‌ دير، بيزده ‌ايسه‌ ايش‌ تامام‌ عكس‌ ايستيقامتده‌ گئدير.

 

2ـ خاريجى ديللرى اؤيرنمك‌ هئچ‌ واخت‌ ائركن‌ واختدان‌ باشلانمامالي‌ دير و آناديلي‌نين‌اوشاغين‌ معنوي‌ دونياسينا درين‌ كؤك‌ سالديغيني‌ حيس ائتمه‌ينه‌ قدر هئچ‌ واخت‌ بو ايشه‌ باشلاماق‌ اولماز. بعضي‌ اوشاقلار خاريجى ديلي‌ 7 و يا 8 ياشيندان‌،(آنجاق‌ هئچ‌ واخت‌ بوندان‌ تئز اولا بيلمز)، باشقالارينا ايسه‌ 10 و 12 ياشيندان‌ اؤيره‌تمگه باشلامالي‌ييق‌، حددن‌ آرتيق‌ ضعيف‌ درك‌ ائتمه‌ قابليتي‌ اولان‌ اوشاقلارا هئچ‌ خاريجى ديل‌ اؤيره‌تمك‌ لازيم‌ دئييل، خاريجى ديل‌ اونون‌ اونسوز دا ضعيف‌ اينکيشاف ائتميش ‌قابليتيني‌ تماميله‌ محو ائده‌ بيلر. ياخشي‌ اولمازمي‌ كي‌، اينسان باشقا ديلده اؤزونون‌ سون ‌درجه‌ سفيه ليگيني‌ گؤسترينجه‌، اؤز آنا ديلينده فيکيريني‌ دوز ـ عمللي‌ ايفاده‌ ائتسين‌؟ بيليريك‌ كي‌، فرانسيز ديلي‌ قيسمن آدامين‌ گيج‌ليگيني‌ گيزله‌دير، اونا آغلي‌ نوماييش ‌ائتديرمگه ، چئويك‌ و كسگين‌ ايفاده‌لرله‌ دانيشماغا ايمکان وئرير. آنجاق‌ بو جنابي‌ روسجا دانيشديرديقدا، اوساعات‌ آيدين‌ اولور كي‌، او نه‌ قدر سفيه‌ دير، آنجاق‌ بو قبيلدن‌ اولان ‌تربيه‌ مقصدلري‌ پئداقوقيكايا عاييد دئييلدير.

 

3ـ خاريجى ديللرى هئچ‌ واخت‌ عئين واختدا يوخ‌، بير ـ بيرينين‌ آردينجا اويره‌نمك‌لازيمدير، بو دا ديل‌ حاقيندا ايره‌ليده‌ اينکيشاف ائتديرديگيميز آنلاييشدان‌ ايره‌لي‌ گلير.

 

بيرينجي‌ خاريج‌ ديلده سربست‌ دانيشيغا يييه‌لنديکدن‌ سونرا، اوشاق‌ ايكينجي‌نين ‌اؤيره‌نيلمه‌سينه‌ باشلايا بيلر. نيظامنامه‌لرده‌ سيستمليگه‌ جان‌ آتماق‌ مکتبلريميزين ‌اكثريتينده‌ عئين واختدا، تماميله‌ پارالل‌ شکيلده گئدن‌ ايكي‌ خاريجى ديل‌ اؤيرتمگه اساس‌ وئريب‌، لاکين نتيجه‌لر چوخ‌ آجيناجاقلي‌ دير. ايكي‌ دووشان‌ دالينجا قاچان‌، عادتن هئچ‌ بيريني‌ توتا بيلمز، اوشاق‌ مكتبي‌ هر ايكي‌ ديلده بير نئچه‌ قيراماتيك‌ فورما و بير نئچه ‌يوز سؤز بيلمکله‌ بيتيرير. بو بيليکلر اونلارين‌ نه‌يينه‌ گر‌ك‌ اولوركي‌، آدام‌ بو ديلده هئچ ‌اولماسا سربست‌ اوخوسون‌، عكس‌ تقديرده‌ بو تماميله‌ معناسيز بير شئي‌ دير.

 

ايندي‌ بو يا ديگر مكتبده‌ ايكي‌ خاريجى ديلي‌ ياخشي‌ اؤيره‌نمك‌ اوچون‌ وساييط ‌يوخدورسا، ياخشي‌ اولمازمي‌ كي‌، بيز تكجه‌ آلمان‌ ديلي ايله‌ كيفايتله نك‌، ايكي‌ ديله‌ صرف ‌ائتديگيميز واختي‌ بونا يؤنلده‌ك‌. ياخشي‌ اولمازمي‌ كي‌، ايكي‌ ديلدن‌ هئچ‌ بيريني ‌بيلمه‌مکدن سه‌، بيريني‌ ياخشي‌ اؤيره‌نك‌؟ گؤروندويو كيمي‌، حقيقت‌ گؤز قاباغيندا دير،آنجاق‌ عبث‌ يئره‌ دؤرد ايل‌ عرضينده‌ بيز بونو پئداقوقا ايضاح‌ ائتمگه چاليشديق‌، اونا گؤره‌ده‌، قوي‌ اوخوجو بيزي‌ باغيشلاسين‌، بورادا آيدين‌ بير حقيقتي‌ سؤيله‌مگي‌ قراره‌ آلديق‌.

 

4ـ بو و يا ديگر خاريجى ديلين اؤيره‌نيلمه‌سي‌ ايمکان داخلينده‌ سورعتله‌ گئتمه‌لي‌ دير،چونكي‌ بورادا اونوتماني‌ خبردار ائدن‌ آراكسيلمز مشغله‌لر و تكرارلار قدر هئچ‌ بير شئي ‌اولا بيلمز.

 

بيزده‌ تئز ـ تئز موشاهيده‌ اولونان‌ هفته‌ده‌ ايكي‌ ساعاتليق‌ آلمان‌ و ايكي‌ ساعاتليق‌ فرانسيزديلي‌ درسلري‌ بونلارين‌ تعيين‌ ائدنلرين‌ قطعي‌ ،پئداقوژى ساوادلارينين‌ اولماديغيني ‌گؤسترير. اگر اوشاقلاريميزين‌ ديل ‌اؤيره‌نمه‌سينده‌ ياخشي‌ نتيجه‌لر اَلده‌ ائتمك ‌ايسته‌ييريك ‌سه‌، واختي‌ بوش‌ ـ بوشونا كئچيرمك‌ ايسته‌ميريك ‌سه‌ اجنبي‌ ديللره‌ هفته‌ده ‌ايكي‌ يوخ‌، حتي‌ دؤرد يوخ‌ آلتي‌، يئددي‌، سككيز ساعات‌ آييرمالي‌ييق‌. هر بير اجنبي ‌ديلين اؤيره‌نيلمه‌سينده‌ ايلكين‌ مرحله‌ چوخ‌ داريخديريجي‌ و چتيندير، بونلاري‌ اوشاق ‌ايمکان داخيلينده‌ تئز آرادان‌ قالديرماليدير. او، آز ـ ماز بير شئي‌ باشا دوشنده‌، آسان‌شئيلري‌ بير ته‌هر اولسا دا اوخوماغا باشلاياندا، مشغله‌ اونون‌ اوچون‌ ماراقلي‌ اولور، اوندا آرتيق‌ اوشاق‌ اول‌ اَلده‌ ائتديگي‌ بيليکلري‌ آرتيرماق‌ و اينکيشاف ائتديرمك‌ اوچون‌ اوقدرده‌ واخت‌ صرف‌ ائديب‌ سعي‌ گؤسترمير. محض‌ اوندا غيبطه‌ دوغوران‌ ايكينجي‌ ديلين اؤيره‌نيلمه‌سينه‌ باشلاماق‌ اولار. خاريجده‌ هميشه‌ بئله‌ اولور. اورادا ديل‌ اؤيره‌نمك ايله‌، نه‌اينكي‌ وئريلن‌ پروقرامي‌ يئرينه‌ يئتيرمك‌، هم‌ ده‌ موعين مقصده‌ ناييل‌ اولماق‌ ايسته‌ييرلر. بيزيم‌ بير سيرا مکتبلريميزده‌ يئددي‌ و سككيز ياشلي‌ اوشاقلارين‌ فرانسيز و آلمان ‌ديللرينده‌ ايندييه‌ قدر فعلين‌ تصريفيني‌ اؤيرنمه‌لريندن‌ ده‌ گولمه‌لي‌، معناسيز ومنطيقسيز نه‌ اولا بيلر؟

 

5ـ اوشاقلا نئجه‌ غيبطه‌ ائديجي‌ بير طرزده‌ خاريجى ديلي‌ اؤيرتمك‌ اوچون‌ مشغول‌اولوروقسا، ائله‌جه‌ ده‌ آنا ديلينى اؤيره‌دنده‌ حركت‌ ائتمه‌لي‌ييك‌.

 

بونونلا خاريجى ديل‌ درسلرينده‌ ايلك‌ مشغله‌لرده‌ چاليشماسي ‌ايله‌ اوشاغين‌ معنوي‌اينکيشافى اوچون‌ يارانا بيله‌جك‌ قاچيلماز ضرري‌ كنار ائتمك‌ اولار. اوشاق‌ خاريجى ديلده چتين‌ اولمايان‌ بير شئيى كيفايت‌ قدر سربست‌ شکيلده باشا دوشمك‌ ايمكاني‌ الده‌ائتديکده‌، او ساعات‌ بو بيليکدن‌ خاريجى ديلدن‌ روس‌ ديلينه‌ ترجومه ده‌ روس‌ ديلي موعيلمي‌نين‌ رهبرليگي‌ آلتيندا آنا ديلينى اؤيره‌نمك‌ اوچون‌ ايستيفاده ائتمه‌لي‌ دير، خالق‌ادبياتيندان‌، خالق‌ ماهني‌لاريندان‌، خالق‌ يازيچيلارينين‌ يارديجي‌ليغيندان‌، جانلي‌دانيشيقدان‌ روس‌ ديلى نين‌ اؤيره‌نيلمسي ‌ايسه‌ ياباني‌ اِئلِمنتلره‌ قارشي‌ دورمالي‌ و اونلاري ‌روس‌ روحونا چئويرمه‌ليدير.

 

بيزه‌ اعتيراض‌ ائديب‌ دئيه‌ بيلرلر، بئله‌ اولدوقدا اوشاقلار هئچ‌ واخت‌ گؤزل‌ سليس‌ فرانسيز دانيشيق‌ طرزينه ‌يييه‌لنه‌ بيلمزلر، نئجه‌ كي‌، اونلار بونو، غئيري‌ ديلي‌ اؤز آنا ديلي ‌كيمي‌ حتي ‌اونداندا قاباق‌ اؤيره نركن‌ اَلده‌ ائديرلر. بو موباحيثه اولونماز حقيقتدير. كيمين‌ اوچون سه ‌اوشاقلارين‌ دوزگون‌ عقلي‌ اينکيشافى، معنوي‌ حياتي‌نين‌ بوتؤولويو، اوره‌يينده‌ فيکيرين‌، حيسين‌ و پوئزيانين‌ اينکيشافى، اونون‌ مليتي‌، وطنه‌ خئير وئرمك‌ يارارليغي‌، اخلاقي‌ و حتي ‌ديني‌، ياخشي‌ پاريس‌ لهجه‌سينده‌ دانيشماقلا موقاييسه‌ده‌ هئچ ‌نه‌ ديرسه‌، اوندا بيزيم ‌مقاله‌ني‌ اوخوماغا ناحاق‌ يئره‌ جهد گؤستريبلر.

 

 

***************************

مقاله‌ني‌ ترجومه ائدن‌ پروفسور فخرالدين‌ و. يادگار اؤزو دونيا شهرتلي‌ ديلچي‌ عاليم‌ و ژئرمانيست‌دير. 78ـ1977ـ جي‌ ايللرده‌ برلين‌ده‌ هومبولت‌ اونيورسيتئتينده‌ موعاصير آلمان‌ ديلينده‌ صاييت ‌فونملرين‌ وارياتيولي‌يي‌ آدلي‌ دوقتورلوق‌ ريساله‌سيني‌ تماملاييب‌، اونو لنينگراددا اوغورلا مودافيعه ‌ائديب‌ و ژئرمانيستكا اوزره‌ ايلك‌ فيلولوژي‌ علملري‌ دوقتورو اولموشدور. 1980ـ جي‌ ايلدن ‌پروفسور دور. چوخلو‌ كيتاب‌ و دونيانين‌ موختليف علمي‌ ژورنال‌لاريندا چاپ‌ اولموش‌ 50 ـ دن‌ آرتيق ‌مقاله‌ و ريساله‌لرين‌ موليفي‌ دير.