آذر سس سايتيندان

آنا دیلی گونو حاقدا آپاق درنگی طرفیندن مراسیم کئچیریلدی

 

1384-جو ایل ایسفند آیینین 6-سی تبریزده آپاق درنگی طرفیندن آنادیلی حاقدا بیرمراسیم کئچیریلدی.

مراسیم ناهاردان سونرا ساعات 4-دن آخشام ساعات 8-ه قدر داوام ائتدی.

برنامهلر ایکی بؤلومده   ایرلی گئتدی. بیرینجی بؤلومده آنادیلی حاقدا مقاله و دانیشیقلار سونولدو، ایکینجی بؤلومده ایسه شاعیرلرین و لاچین آدلی اوشاقلار قوروپونون ایفالارینا شاهید اولدوق.

برنامهنین باشلانقیجیندا موهندیس صرافی  قوناقلارا خوش گلدین دئییب، بو گونو اونلارا تبریک ائتدی.

بیرینجی دانیشان موهندیس آیدین صادقی (آذربایجانلی بیلییوردلولار توپلومونون چالیشانلاریندان) ایدی. او، "دیل و سیاست" آدلی معروضه‌سینده رسمی دیل، میلی دیل، اورتاق دیل و آنادیلی‌نین نه اولدوغوندان بحث ائتدی. او بو ترمینلرین اؤزویله داشیدیغی سیاسی مفهولاری آچیقلادی.

ایکینجی دانیشان جناب دوکتورحسن فرهودینیا ایدی. فرهودینیا شرقی آذربایجان وکیللر مرکزینین (کانون وکلای آذربایجانشرقی) باش اویهلریندن  اولموش و بشر حاقلاری زمینه‌سینده چوخلو چالیشمالاردا بولونموشدور.

فرهودینیا جنابلاری اؤز سؤزلرین آنادیلی حاقدا باشلادی و دئدیکی، آنا دیلینین توخونولمازلیغینا قرآن و بشری قانونلاردا تاکید اولونوب و بونو یاساق ائتمه اینسانلار اوچون بؤیوک ظولم  ساییلیر.

اوچونجو دانیشان دگرلی اردبیللی یازیچیمیز ممی‌زاده جنابلاری ایدی. ممی‌زاده تاریخی دیل، تصویری دیل و هابئله اونلارین ایلگیسین بوگونکو آنا دیلیمیز ایله آچیقلادی و آذربایجان  توپونیملری حاقدا بعضی مولاحیظه‌لرینی قئیده ائتدی.

او، "آنا دیلیمیزه یانیریقسا، گرک اونا اطرافلی یاناشاق و اطرافلی باخاق" دئیه سؤزلرینه سون قویدو.

سونرا فرانک خانیم فرید (ایپک خانیم) تریبون آرخاسینا چاغریلدی. او کورهسللشمه (جهانی‌شدن) پروسهسینده آنادیلی پروبلملریندن دانیشدی و خوصوصیله قئید ائتدی کی: "بیز کورهسللشمه پروسهسین دریندن دوشونمه‌لی‌ییک و او پروسه‌یه باخاراق  اؤز مساله‌لریمیزی حل ائتمه‌لی‌ییک. کولتوروموزه احتیرام قویولماسینی ایسته‌ییریکسه، بیز ده باشقا کولتورلره احترام قویمانی گرک میلتیمیزه اویرهدک. اگر بیر کولتور اؤزگورلوغونه اینانماسا یقین کی آسیمیله اولاجاق".

سونرا امید شکری جنابلارینا چاتدی. شکری جنابلاری اردبیلده سایان آدلی اؤیرنجیسل بیر درگی‌نین اساس فعاللاریندان اولموشدور.  

روشنی جنابلاری بورادا تریبون آرخاسینا چاغریلدی. روشنی جنابلاری آنادیلینی میلتلشمه پروسهسینین عونصورلریندن بیلیب، بو قونودا میلتلرین چالیشماغین ایستهدی. هابئله او B.M.T (بیرلشمیش میلتلر تشکیلاتی) و اونون میثاقلاریندان سؤز ائتدی.  

"آنا دیلیمیزی میلتیمیزین ایچینده نئجه یایمالی‌ییق؟" بو قونو فریده خانیم اصغرنیانین دانیشیق موضوعو ایدی.  فریده خانیم آنا دیلیمیزین ائولرده یاییلماسینین بیر قولونو موسیقی بیلیب. و دئدی کی، بیز گرک اؤز موسیقیمیزی ائولرده گوجلندیریب و بو یول ایله اؤز آنا دیلیمیزی ده یاشاداق. او دئدی:

دیلیمیزی قوروماق اوچون اساس یؤن اونو خالقا یاخینلاشدیرماقدیر نه آییرماق.

بیزیم دیلی قورویانلار آشاغی طبقهدی و تاسوفله تورکجه یازیلان متنلرین اوخوجوسو چوخ آزدیر. گرک توپلانتیلاردا اؤز دیلیمیزی میلتیمیزین ایچینده یایماغینا یوللار تاپاق.

بیرینجی بؤلومون سون دانیشانی  نوید محمدی جنابلاری ایدی. نوید بگ آنادیلیمیزین ایلکین مودافعلریندن او جومله‌دن کاشغرلی ماحمود و اونون دیوان اللغات الترک کیتابی، یوسف خاص حاجب، امیر علیشیر نوایی، آشیق پاشا  حاقدا دانیشیب و اونلارین تورک دیلی و ادبیاتینا ائتدیکلری خیدمتلردن سؤز ائتدی.

 

بیر قیسا آرادان  سونرا برنامهنین 2-جی بؤلولومو شاعیرلرین اوخودوغو شعرلر ایله باشلادی. بو بؤلومده آشاغیدا آدی گئدن شاعیرلر گلیب و اؤز شعرلرین اوخودولار. محمد ثانی، فریدون حیصاری، ملیحه عزیزپور، بهرام ائلچین، حسن اوموداوغلو، ساناز صفری، زینب پاشا، رسول قربانی، آشیق غافار ابراهیمی، آشیق احمد رستم و رقیه صفری.

هابئله  لاچین آدلی اوشاقلار قوروپوندان دعوت ائدیلدی اؤز وئرلیشلرینی تریبون آرخاسیندا ارائه وئرسینلر. بو قوروپ اویهلریندن، آیگون، پارمیدا، ائلشن، بابک، آیدین، آیدا، سعید گلیب و اؤز شعرلر و مقالهلرین اوخودولار. قئید ائتمک لازیمدیر کی یو اوشاقلار عینی حالدا آنا دیلی موضوعوندا رساملیق ائتمیشدیلر.  بو رسیملر ده پروژکتور واسیطهسی ایله گؤز گؤستریلدی.

برنامهنین سون حیصهسینده سحر آدلی شبسترلی کیچیک بیر قیز تریبون آرخاسینا گلیب و پروفسور زهتابی‌نین "سو دئییبدیر منه اولده آنام آب کی یوخ" شعرینی چوخ یئرلی-یاتاقلی اوخویوب، دؤنه-دؤنه ایشتیراکچیلارین آلقیشینی قازاندی.

بو ایل دونیا آنا دیلی موناسیبتینه گؤره تبریزده اوچ تؤرن، مرند و تهرانیمیزدا بیر تؤرن کئچیریلدی، تبریز شهرینده عینی حالدا اوشاقلار آنالاریله بیرگه  قیسا بیر یورویوش آپاریب، سونوندا بیر قطعنامه اوخودولار.  

قئید ائتمک  لازیمدیر کی آنا دیلی قورولتایی‌نین بانیسی اولان تبریزلیلره بو ایل ده بیلدیرکی کیمی آنا دیلی قورولتایینا ایذین وئریلمه‌دی. بو ایل اوچونجو آنادیلی قورولتاییمیز، اورمیه اونیورسیته‌سینده قورولدو. (ایکینجی قورلتای ایسه  بیلدیر تهراندا قورولموشدور).  

خبری حاضیرلایان: آیتان دؤنمز

Aytan_donmaz@yahoo.com

1384/12/5