تورکجه میزه صاحیب اولاق

 

پروفئسور دوکتور جواد هیئت 

ديل نه دير ؟آنا ديلي نه‌دير ؟ اهميتي نه ‌دير؟

ديل اينسانلار آراسيندا اونسيّت ، آنلاشما (تفاهم) و خبرلشمه‌ني تامين ائدن بير واسيطه‌دير. دئمه‌لي ، ديل بير ايرتيباط وسيله‌سيدير.

ديل، سؤزلر و سسلردن تشكّول ائدن بير دستگاه ، شبكه و يا جومله‌لر توپلوسودور. ديل ، كولتورون (فرهنگ) آيناسي و اونون تَمَل (اساس) روكنودور.

اينسانين دوشونجه و دويغولاريني ، خيال و ايستكلريني بوتون اينجه‌ليكلري ايله آچيقلايان و ياشاماسينا ايمكان حاضيرلايان ديلدير.

جمعيّتي ميلت حالينا گتيرن باغلارين اَن گوجلوسو ديلدير.

ديل ، بير ايجتيماعي و ديري وارليقدير و زامانلا و ايشلنمكله تكامول ، اينكيشاف ائدر ، گئريلَر و حتا محو اولا بيلر. ديلين اينكيشافيندا ايكي جور عاميل تاثير گؤسترير:

1ـ داخيلي عاميللر .

2ـ خاريجي عاميللر.

داخيلي عاميللر : ديلين داخيلي قانونلارينا تابعدير و تاثيري موثبتدير . ديل ايشلنه ـ ايشلنه جيلالانير ، احتياجا گوره يئني سؤزلر و تريملر تؤرنير، ديلچي عاليملر ديلين قايدا ـ قانونلاريني كشف ائدر و يازي ديلي ، ديل قايدالارينا و عومومي خالق ديلي و يا بير لهجه اوزرينده قورولور و اينكيشاف ائدر. هر ديلين بير يازي و يا ادبي ديلي و بير نئچه دانيشيق لهجه‌سي واردير.

خاريجي عاميللر : بوتون ديللر ، هله قونشو ديللر بير ـ بيرينه تاثير ائدر و بعضي كلمه‌لر و ايصطيلاحلار آليرلار. بو حاديثه ايفراط شكليني ‌آلارسا و ديلين قرامرينه و سؤز تركيبينه ده تاثير ائدرسه ، ديلي پوزار و ديل اؤز هوويّتيني ياواش ـ ياواش الدن وئرر. اينگيليسلرين پيجين ديل (pidgin language ) دئديكلري چينجه ـ اينگيليسجه قاريشيغي بير ديل معجونو عمله گلر. بو پروسس اوزون مودّت داوام ائدرسه، خالقين ديلي و كيمليگي ده دييشه بيلر.

19 ـ جو عصرين مشهور روس پداقوقو ك . د . او شينسكي بو باره‌ده بئله دئميشدير:
خالقين اليندن هر شئيي آلين ، او هر بير شئيي قايتارا بيلر. آنجاق ديليني آلسانيز ، او هئچ بير واخت اونو يارادا بيلمز، حتا يئني وطن ده يارادا بيلر ، آنجاق ديلي هئچ واخت! خالقين آغزيندا ديل اولورسه ، خالق دا اؤلر.

بير ديلين يازي ديلي قاداغان اولورسا و اوشاقلاري باشقا بير ديلده يازيب ـ اوخوماغا مجبور قالسا ، او خالقين ديلي ايستيحاله‌يه اوغرار و بير مودّت سونرا پيجين شكليني آلار.

بيز ده پهلويلر دؤورونده ديليميز (يازي ديلي) بو گئريله‌مه و ايستيحاله پروسسينه معروض قالميش و يازي ديليميز ياساقلانميشدي.

دونيادا 6000 حودودوندا ديل واردير. آنجاق هر ايل بير نئچه‌سي آرادان گئدير. بو ديللرده دانيشانلارين سايي يوزميندن داها آزدير. البته يونسكو تشكيلاتي نئچه ايلدير ديللرين آرادان گئتمه‌سيله موباريزه آپارير. يونسكو و
بيرلشميش ميلتلر ـ ين قبول ائله‌ديگي قرارلارا گؤره هر كس اؤز اؤلكه‌سينده‌كي مكتبلرده اَن آز اوچ ديلي اوخويوب اؤيرنمه‌ليدير. بونلار آنا ديلي ، دؤولت ديلي و يا اورتاق اؤلكه‌ ديلي و بير ده اينگيليسجه كيمي بين الملل ديللردير.

ديللري مورفولوژي ( خاريجي شكيللري) و منسوب اولدوقلاري ديل عائيله سينه گؤره موختليف قروپلارا بؤلورلر. مورفولوژي باخيميندان ديللر اوچ قروپا بؤلونورلر :

1ـ يالين و يا يالينلايان ديللر (isolating) : چين ديل كيمي . بو ديللره اسكيدن تك هجالي ديللر دئميشلر. بونلاردا سؤزلرين آنجاق بير حيصّه‌سي تك هجاليدير.

بو ديللرده صرف يوخدور. كلمه‌لر شكيلچي (پسوند و پيشوند) آلمادان و دييشمه‌دن
(
reflexion) ايشلنير. آنجاق جومله‌ده كي يئرلري ايله و باشقا كلمه‌لرله يان ـ يانا گلمه‌لري ايله موختليف معنا و وظيفه گؤرورلر. چين ديلينده وورغو (تاكيد ، استرس بير هجا اوزرينه) چوخ موهومودور. بير كلمه بو اوزدن موختليف معنالار ايفاده ائده بيلر. هم ده موتشابه سؤزلر چوخدور.

چين يازيسيندا هر كلمه بير ايشارتله گؤستريلير، آنجاق گون (گونش) ، آي و حئيوانلار كيمي مفهوملار شكيللري ايله ايفاده ائديلير.

2ـ آناليتيك ديللر (flexible) : هيند و آوروپايي و سامي ديللر كيمي . بو ديللرده صرف اثناسيندا كلمه‌نين كوكو دييشيلير ، يعني تحليله اوغرايير. مثلا رفتن فعلي صرف اولوندوغو زامان رفت ، مي‌رود اولور و كلمه‌نين كوكو (رفت) دييشير.

سامي ديللرده بئله دير . بونلارين موهوم خوصوصيتلري ، كؤكلرين اوچ سس سيزدن قورولماسي (ثلاثي مجرد) و كؤكون دييشمه‌سيدير.

3ـ ايلتيصاقي ديللر (aglutinatif) : تورك ديلي كيمي . ايلتيصاقي ديللرده صرف اثناسيندا كلمه‌نين كوكو دَييشمير. صرف شكيلچيلرين (سون اك / suffix) كؤكون سونونا ياپيشماغيلا عمله گلير :آلماق آلدين ، آلاجاغام ، آلميشديم / قوناق قوناقلار. آلتاي ديللري و حتا اورال ـ آلتاي ديللري بو قروپ ديللردندير.

ديللري بير ده منسوب اولدوقلاري عائيله‌يه گؤره (genealogy) بؤلورلر (شجره).

بو بؤلگوده ، موغول ، منچو ديللري آلتاي ديللري و يا اورال ـ آلتاي ديللري حساب اولونموشدور. چونكي بو ديللري دانيشان خالقلار قديمدن آلتاي ـ اورال داغلاري آراسيندا ياشاميشلار.

آنا ديلي و اهميتي

آنا ديلي ، اوشاقليقدا آنادان اؤيرنيلن ديلدير. اوشاقدا ديل اؤيرنمه قابيليتي يول يئريمه و ديگر اينكيشاف پروسسلري كيميدير.

بو پروسس اؤز ـ اؤزونه گئرچكلشير. بونون تكجه شرطي ، اوشاغين عائيله موحيطينده و جاماعات ايچينده ياشاماسي و آناسي و اطرافينداكيلارين اونونلا صؤحبت ائتمه‌سيدير. اوشاق ، آنا و اطرافينداكيلارين سؤزلريني ائشيدر و زامانلا اونلارين معنالاريني اؤيرنر ، سونرا اونلارين ايشلتمه‌سيني و يا تؤرتمه‌سيني تجروبه ائدر. بو ايشي گؤرركن اؤنجه تك سؤزلرله باشلار و ياواش ـ ياواش ساده جومله‌لر و سؤز بيرلشمه‌لريني ايفاده ائدر و زامانلا ديل قايدالاريني (قرامر) منيمسَر و يا اونو اؤيرنديكلريندن چيخاردار (استخراج) . بو ايشي بيله‌رك يوخ ، ديقت ائتمه‌دن گؤرر.

اوشاق ، ديل تجروبه‌سيني آپاراركن بعضا سؤزلردن معناسيز سؤز بيرلشمه‌لري و جومله‌لر قورار و سؤزلرله اوينار و اؤز ـ اؤزونه دانيشار و بو شكيلده ديل بيلگيسيني تجروبه ائدر و تكميللشديرر.

اوشاق ، آلتي ياشينا چاتاندا ديل باخيميندان يئتگين بير آدام كيميدير. يعني ديل قرامريني اؤيرنميش و اونو ايشلتمك و اويغولاماق قابيليتينه ماليك اولموشدور. اونون اؤيرنديگي سؤزلر موحيطيندن آلديغي تجروبه‌لره گؤره‌دير و اونون احتياجلاريني قارشيلاماغا كيفايت ائدر.

اوشاغين ديل آچماق قابيليتي بئينين موعيّن اينكيشاف مرحله‌سيله علاقه‌داردير. بو قابيليّت 12 ـ 2 ياشلاريندا ظوهور ائدر، يعني اوشاق بو ياشلاردا دانيشان عائيله و ديگر اينسانلاردان اوزاقدا (مثلا مئشه ده) قالارسا و سونرادان عائيله و يا جاماعات آراسينا گلسه ، بير داها ديل آچا بيلمز.

اوشاغين ديل آچماق جرياني‌نين ماهيتي باره‌ده موختليف فرضيه و يا هيپوتزلر ايرلي سورولموشدور.

1ـ معرفت و يا تانيماق ـ بيلمك فرضيه‌سي : بو فرضيه‌يه گؤره اوشاقدا ديل اؤيرنمك ، اوشاغين اطرافيني تانيماق و فيكري اينكيشافي‌نين بير حيصه‌سيني تشكيل ائدير.

2ـ داورانيشچي (رفتاري) فرضيه و يا (B.F.Skinner ) behaviourist : بو فرضيه‌ تجروبه‌يه دايانان آمپريسم فلسفه‌دن قايناقلانميشدير. بو فلسفه مكتبيني 17 ـ جي عصرده اينگيليس فيلوسوفلاري جان لاك (John Locke) (حكيم) و دئيويد هيوم قورموشلار. بو فلسلفه‌يه گؤره اينسان بيلگيسي‌نين قايناغي تجروبه‌دير. جان لاك ، اوشاغين ذهنيني بوش بير صانديق و يا آغ بير صحيفه‌يه بنزديردي. دئمه‌لي ، بيز بيلديكلريميزي حيسلريميز واسيطه‌سيله ، خوصوصيله ائشيتمه ، گؤرمه ، توخونما حيسلري ايله گتيريريك.

داورانيشچيلار ديل اؤرنمگي بير سيرا سسلرين عادتلري كيمي قبول ائديرلر. اوشاغين آنا ـ آتاسي و اطرافينداكيلار اوشاقلا دانيشيرلار، اوشاق بو سسلري و سؤزلري ائشيدير و ياواش ـ ياواش اونلاري تقليد ائدير. بو حيسي تحريكلري (stimulus) و اونلارين جاوابلاري زامانلا شرطيلَشه‌رك عادت شكليني آلير و اوشاق آلديغي تاثيرلري ايستقرا (induction) يولو ايله عوموميلشديرير و ديل قايدالاريني اؤيرنير. بو فرضيه‌نين طرفداري اولان واتسون (J.Watson) دوشونمگي ده داورانيش (رفتار) حساب ائديردي و دئييردي كي ، دوشونمك اؤز ـ اؤزونه دانيشماقدان عيبارتدير.

3ـ چامسكي‌نين نظريه‌سي : نوآم چامسكي 1959 ـ جو ايلده اسكينرين ديل داورانيشي و يا رفتار زباني آدلي كيتابينا يازديغي تنقيدي مقاله‌سينده دئييركي ، ديلي اؤيرنمك يالنيز بير ييغين پراكنده سؤزلري اؤيرنمك دئييل ، بلكه ديل قورولوشلاريني (جومله و...) تؤرتمك اوچون لازيم اولان اساس قايدالار مجموعه‌سيني اؤيرنمكدير. چامسكي ذهنيلشميش بو نيظاما (قايدالار مجموعه‌سي)
ديل قابيليّتي و يا ديل باجاريغي و يا
قرامر باجاريغي دئيير. بو قايدالار سايه‌سينده‌دير كي ، اينسان حودودسوز جومله‌لري قورا بيلر. اگر ديل اؤيرنمك بير سيرا موحرّيك (stimuls) و جاوابدان عمله گلن سسلر قروپونون عادتي اولسايدي ، او زامان هر كس ديلين بوتون جومله‌لريني تك ـ تك اؤيرنيب ازبرله‌مه‌سي لازيم گلردي.

چامسكي‌يه گوره ديل اؤيرنمك پروسسي ضرب (چارپي) قايداسيني اؤيرنمگه‌ بنزر. بيز آنا ديليني اؤيرنر كن بير سيرا قايدالاري اؤيرنيريك. بو قايدالار بيزه حودودسوز جومله قورماغي اؤيردير. بيز ضرب جدوليني اؤيرنمگه مجبور اولدوغوموز كيمي بو محدود ديل قايدالاريني دا اؤيرنيريك ، هم ده سؤزلرله معنالاري‌نين علاقه (رابطه ) لريني موحريك ـ جاواب يولو ايله اؤيرنمه‌لي‌ييك. اوندان سونرا ديلين تؤرَديجي خوصوصيتي ايشه قاريشير ، نه موحرّيك ـ جاواب و نه ده عادت.

اينساندا بو قابيليت و ايستعداد ايرثيدير و ژنتيك يوللا اينتيقال ائدير.

چامسكي يه گؤره بوتون ديللرين اورتاق تَمل (اساس) خوصوصيتلري واردير و اوشاق آنادان اولار كن بو اورتاق تمل خوصوصيتلر اونون ذهنينده ديلين اساس تملي (پايه) كيمي موؤجوددور و اوشاق آنا ديليني بو تمل اوزرينده قورار و اؤيرنير. دئمه‌لي ، بالقوه مؤوجود اولان بو ايستعداد و يا قابيليت موحيطله تماس ائتديكدن سونرا بالفعل شكله چئوريلير و فعاللاشير . البته سؤزلري اؤيرنمكده و ديل فورمالاري‌نين تلفوظونده تقليد و تكرار و عادتين رولو اينكار ائديلمزدير.

چامسكي گؤره هر ديل بير اوست قورولوش و بير ده آلت قورولوش و يا درين قورولوشدان تشكّول ائدير. اوست قورولوش ديللره گؤره دييشير ، آما اينسانين بدني و ذهني قورولوشونو عكس ائتديرن درين قورولوش بوتون ديللرده تقريبا عئيندير.

مثلا بوتون ديللر ايكي درجه‌لي تحليله (تجزيه) موناسيبدير. بوتون جومله‌لر ايكي مرحله‌ده كلمه‌لره يعني معنالي واحيدلره (morpheme) بؤلونور. بو واحيدلر ايكينجي درجه بؤلگوده فونم دئييلن سس واحيدلرينه بؤلونور.

بوتون ديللرين سس سيستمي صامت ( سس سيز ) و صائيت (سسلي ) لردن عمله گلير و بونلارين سايي محدوددور (40 ـ 20) ، هم ده بونلار محدود سايدا سس خوصوصيتلريندن تؤره‌ميشدير. ديللرين بو اورتاق خوصوصيتلري اينسانين بيولوژيك قورولوشوندان قايناقلانير.

اوشاغين فيزيكي روشدو ( بؤيومه و اينكيشاف) ايله ديل آچماغي آراسيندا گوجلو باغليليق واردير.

اوشاق مخصوص ياشلاردا (12ـ 2) ديل آچا بيلر. اگر بو ياشلاردا اونون ديل اؤيرنمك ايمكاني اولماسا ، سونرا ديل آچماق ايمكاني دا قالماز.

اوشاق آنا ديليني اؤيرنركن ديلين سسلري و سس دستگاهي ايله بيرليكده پارچالار اوستو سس واحيدلري (suprasegmental) يعني وورغو و تاكيد : بير هجا اوستونه وورغو يا تاكيد (stress) ، توْن، يعني سسلرين زير و بم تلفّوظو ، اينتوناسيون ، يعني كلمه و مورفملرين زير و بمليكلري‌نين صؤحبت اثناسيندا دييشمه‌سي و يا آهنگ ، دورغو (فاصيله ، مكث) اونون ذهنينده ، حافيظه‌سينده يئرلشير و دانيشاندا اساس خوصوصيتلري كيمي تظاهور ائدير. بو خوصوصيتلرين دييشديريلمه‌سي و يا اونودولماسي چوخ چتيندير . اينسان آناديليندن باشقا ديلي دانيشاندا لهجه‌لي دانيشماغي دا قيسماً بوندان ايرلي گلير.

هر ديلين اؤزونه مخصوص بير آنلاما و دوشونمه يولو و آنلاتما يولو و يا ايفاده طرزي واردير كي ، بونا ديلين ايچ بونيه‌سي ، ايچ شكلي دئييرلر. مثلا توركجه دانيشاندا بيز بيريسي‌نين حاليني سوروشاندا ، نئجه سن؟ دئييريك. فرانسيزلار بو دورومدا Comment vas tu? دئييرلر. توركجه ترجومه‌سي : سن نئجه گئديرسن ؟. آلمانلار همين سواآلي بئله سوروشورلار : Wie gehtes ihnen? يعني : نئجه سنه گئدير؟.

توركجه ده منه سويوق دَييب دئييريك. بونون قارشيسيندا فارسجادا من سرما خوردم، توركجه لفظي ترجومه‌سي من سويوق يئميشم اولور.

اوشاق آنا ديليني اؤيرنركن اونون ذهنينده آنا ديلي‌نين قورولوشو (شبكه‌سي) يئرلشير و اينسان ، هر شئيي بوتون ديل ماترياللاري‌نين مئيدانا گتيرديگي بو تمل شمايا (اساس شبكه) گؤره آنلار و آنلادار. بونا ديلين مخصوص ايفاده طرزي و دونيا گؤروشو دئييلير.

وايسبرگر (Leo weisberger) ديلي دونياني سؤزه چئويرمه حاديثه‌سي بيلير و ديلين ايفاده ائتديگي گئرچگي ده اينسان ذهني‌نين سوزگجيندن (فيلتر) كئچميش گئرچك سايير. دئمه‌لي ، اينسان گئرچگي (واقعيت و حقيقت) آنجاق ديل واسيطه‌سيله تانييار.

بيز چئوره‌ميزه آنا ديليميزين پنجره‌سيندن (شبكه) باخيريق و دونياني آنا ديليميزين آنلاما و آنلاتما يولوندان گئده‌رك آدلانديريق.

هومبولتون (F.H.Von Humboldt , 1769 _ 1859) فيكرينه گؤره ، ديل بير ميلتين روحونون تظاهورودور ، ميلتين ديلي روحودور و روحودا ديليدير.

اينسان آنا ديلينده دوشونر و دوشندوگونو دانيشاندا ديله گتيرير (نطق) و يا كاغيذ اوزرينه يازار (يازي) . اگر آنا ديليندن باشقا بير ديلله دانيشماق و يا يازماق ايسترسه ، دوشوندوگونو ذهنينده او ديله ترجومه ائدر. بو ترجومه هر زامان و هر كس اوچون آسان و قوصورسوز اولا بيلمز. خوصوصا دانيشاندا فوري و آني (instantane) ترجومه گركديگي اوچون بو ترجومه اصلي ديلده‌كي نين عئيني و موكمل اولماز. همده آنا ديلي‌نين خوصوصيتلري (لهجه) ده ايكينجي ديلده اؤزونو گؤسترر. البته بعضي حقيقي ايكي ديللي (biglotte) اينسانلار ، خوصوصا پئشه‌كار (حرفه‌اي) موترجيملر بو ايشي داها ياخشي باجاريرلار. حقيقي ايكي ديللي اينسانلار اوشاقليقدان ايكي ديللي موحيطده ياشايان و هر ايكي ديلي طبيعي اؤيرنمه يوللاري ايله اؤيرنن و ايشلدن كيمسه‌لردير. البته ايكي ديلليليك ايكي ديلي بيلمكدن فرقليدير و هر ايكي ديل بيلن ايكي ديللي (biglotte) ساييلماز.

چوخ ديللي توپلوم ( جامعه) لاردا آنا ديليني ايلك مكتب‌ده اوخوياراق ياخشي باشا دوشمك و دوزگون ايشلتمك، مكتب‌ده و سونرا كي ايللرده ايكينجي / رسمي ديلي اؤيرتمكده و بو ديلده كي بوتون چاليشمالاردا باشاريلي اولماغين اؤن شرطي دير.

اوشاقلار آنا ديللريني اينكيشاف ائده بيلديكلري نسبت ده داها بيلگيلي ، ديللري‌نين ده ايفاده باخيميندان داها زنگين ، اثرلري‌نين داها اولغون و يئتگين اولوب كولتورل ( فرهنگي) كيمليكلري (هويت) مسئله‌سينده حقارت دويغوسو دويماياجاقلار.

واين رايخا (Weinreich) گؤره ، هر اينساندا دوغوشدان بير آنا ديلي سئوگيسي واردير ، چونكي بو ديل آنانين محبتي و اوخشامالاري (نوازش) ايله اؤيرنيلميش و عائيله ، خالق و دونياني تانيماق اوچون وسيله اولموشدور. پاريسده سوْربون دانيشگاهي‌نين علمي هيئتي عوضوو اولان چاداش آنسيكلوپديك ايرانلي و آذربايجانلي (تبريز) عاليملريميزين ان گؤركمليلريندن بيري ساييلان دوكتور ضيا صدر ، پاريسده چيخان
نيما درگيسينده يازديغي فارسجا مقاله‌سينده ( نژاد انسان ، نژاد، آرايي ، سامي و ترك. آذر 1381) يازير كي : بيزيم ديليميزه جهالت و غرض اوزوندن بعضيلري تحميلي (زبان تحميلي) دئييرلر. من آن زبان تحميلي را كه آيه‌هاي لطف و محبت مادرم در آن زمزمه شده است ، به هر زبان اصلي كه شما در نظر بگيريد ، ترجيح ميدهم و مي‌دانم ...

ترجومه‌سي : من آنانين محبت و اوخشامالاريني پيچيلدايان ديلي تحميلي ده اولسا ، سيزين دوشودوگونوز و منيم اوچون نظرده توتدوغونوز هر بير ديلدن اوستون توتارام... مولّيف سونرا بو مساله‌نين علمي و منطيقي طرفيني اينجه‌له يير و آنا ديليني مودافيعه ائدير.

ايكينجي ديلي اؤيرنمك

ايكينجي ديلي اؤيرنمك ، ايكي شكيلده اولا بيلر :

1ـ طبيعي يول و يا ائشيتمك ، دانيشماق يولو ايله. اينسان بو ديلي دانيشان جاماعاتين آراسيندا ياشار و خوصوصي ديل تعليمي آلمادان ائشيتمك ـ دانيشماق يولو ايله ديلي اؤيرنر.

2ـ اؤيرنمك يولو ايله : بو دا ايكي شكيلده اولا بيلر:

الف ـ ديل اؤيرنجيسي‌نين بو ديلي دانيشان خالق ايله علاقه‌سي يوخدور. آنجاق درس آلاراق ديلي اؤيرنير. بونا خاريجي ديل دئييلير. مثلا مكتبلريميزده اينگيليسجه و يا فرانسيزجا تعليمي كيمي.

ب ـ اينسان آنا ديلي‌نين يانيندا ايجتيماعي موناسيبت و احيتاجلاريني تامين ائتمك اوچون ايكينجي ديلي ده اؤيرنير. بونا ايكينجي ديل دئييرلر. موختليف ديللري دانيشان اؤلكه‌لرده رسمي ديل آنا ديلي اولمايانلارين رسمي ديلي اؤيرنمه‌لري بونا بير ميثالدير.

ايكينجي ديلي اؤيرنمك اوشاقليقدا ، يعني آنا ديلي ايله برابر و يا اوندان سونرا اولا بيلر. چوخ واخت ايكينجي ديل داها سونرا موختليف ياشلاردا اؤيرنيلير.

بيزلرين ، يعني آذربايجاندا و يا تورك موحيطينده ياشايان خالقين دورومو يوخاريدا كي متودلارين هئچ بيري ايله اوُزلاشمير. اوشاقلاريميز آلتي ياشا قدر آنا ديليندن (توركجه) باشقا ديلين سؤز و جومله‌لريني ائشيتمير و عائيله و اطرافينداكيلارلا توركجه دانيشيرلار. آنا ديلي‌نين اؤزونه مخصوص ديل سيستمي و يا ديل شبكه‌سي و ايفاده طرزي تشكول ائديب . هر شئيي آنا ديلينده آنلاييب ايفاده ائدن ، واختيندا ، يعني آلتي ياشي قورتاراندان سونرا مكتبه گئدير و اورادا فارسجا اؤيرنمگه باشلايير و هر شئيي فارس ديلي‌نين قاوراييشي و ايفاده طرزي ايله اؤيرنمك ايسته‌يير، بو دا ذهنينده كي ديل سيستمي ايله اوست ـ اوسته دوشمه‌ديگي اوچون اوشاق چاشيب لنگيله‌يير. اوشاق ، سؤزلري اؤيرنمكده و جومله‌لري قوروماقدا غئير ـ عادي چتينليكلرله قارشيلاشير. چونكي اوشاق ايفاده طرزي فرقلي اولان بير ديلي اؤيرنمك ايسته‌يير ، هم ده آنا ديلينده ساوادي (اوخويوب ـ يازماق) اولماديغي اوچون يئني ديلين سؤز و جومله‌لريني ، قايدالاريني آنا ديلينده ثبت و ضبط ائتمه‌سيني ده باجارمير. بئله‌ليكله اوشاغين ذهنينده بير حودودا قدر چاشغينليق و دورغونلوق عمله گلير، هم ده ذهنين و ديل قابيليتي‌نين اينكيشافيندا دوراقلاما و ياواشلاما اولور ، خوصوصيله نطق باخيميندان فارس ديللي اوشاقلارا قياساً گئريده قالير. بئله اوشاقلار فارس ديليني بير علم كيمي فارس ديللي اوشاقلاردان داها ديقتلي و داها دريندن اؤيرنسه‌لر ده ، بو ديلي ايشلتمه (نطق ) ده اونلار قدر باجاريقلي اولا بيلمه‌يه جكلر ، البته ايستيثنالار باشقا ائله بونا گؤرده‌دير كي ، مشهور ناطيقلر و معروف واعيظلريميز داها چوخ فارسلاردان چيخير !

حال بو كي ، بيزيم ديلده دانيشان قونشو خالقلاردا آنا ديلده تحصيل آلديقلاري اوچون هركس بير ناطيق كيمي و چوخلاري باجاريقلي بير خطيب كيمي دانيشيرلار.

بيزيم بو تاسّوفلو دوروموموزا سبب ، پهلويلر رژيمي‌نين شووينيست فارسلاشديرما سياستي اولموشدور. آلتميش ايل يازي ديليميز تعطيل اولموش ، حتا مكتبلريميزده آنا ديلده دانيشماق دا قاداغان و جريمه وئرمگه باهانه اولموشدور.

ايسلام اينقيلابيندان سونرا وئريلن نيسبي ديل آزادليغي سايه‌سينده ديليمز يئنيدن ديرچلمگه باشلاميش و توركجه قزئت ، درگي و كيتابلار چاپ اوزو گؤرموش ، شاعيرلريميز آنا ديلينده يازديقلاري شعر مجموعه‌لريني چاپ ائتديرمگه مووفق اولموشلار. اونيورسيته‌لرده خوصوصي توركجه كورسلار آچيلميشدير.

بو گون تهراندا ، تبريزده و اروميه‌ده رسمي اولاراق دؤولت اونيورسيته‌لرينده تورك ديلي و ادبياتي شبعه‌لري قورولموشدور.

بونلار يازي ديليميزين يئنيندن ديرچلمه‌سينه يول آچسادا ، اوشاقلاريميزدا ديل تحصيلي موشكولوموزو هله ده چؤزه بيليمه ميشدير. منجه بو مساله‌نين ايندييه قدر كؤكدن حل ائديله بيلمه‌مه‌سينه سبب ، پهلويلر زامانيندان ميراث قالان شووينيست دوشونجه و فرهنگدير. پهلويلر زامانيندا سيستملي و داواملي شكيلده بئله تبليغ ائديليردي كي ، فارس ديلي ايرانين و ايرانليلارين بيرليك ( وحدت ملي) رمزيدير و فارسجادان باشقا ديللرين ، خوصوصيله توركجه‌نين ياشاماسي ، هله اونون مكتبلرده تحصيلي و ايشلنمه‌سي ، ميلي بيرليگه خطر حساب ائديلير و ايرانين بؤلونمه‌سينه يول آچار ! بير طرفدن ده بيزيم اوشاقلارا تلقين ائديرديلر كي ، توركجه سيزين آنا ديلينيز اولسادا ، سيز تورك دئييلسينيز ، سيزلري موغوللار تورك ائتميشدير ! ائله اونا گؤرده ده سيز بو ديلي بوراخيب فارسجا اؤيرنمه‌لي و فارس اولماليسينيز !

بو اويدورما ـ قاييرما نظريه‌لر بو گون چوروموش ساييلر ، اونا گؤرده بو باره‌ده ايضاحات وئرمگي لازيم گؤرمورم.

جمهوري اسلامي‌نين آناياساسيندا بوتون ايران خالقلاري‌نين ( فارس ، تورك ، كورد ، عرب ، توركمن ، بلوچ و...) ديللري تانينميش و مكتبلرده فارسجانين يانيندا آنا ديللريني ده اوخويوب اؤيرنمهْ‌لري موجاز و قانونا اويغون گؤرولموشدور. ايسلام ، اينسان حوقوقو (حقوق بشر) ، بيرلشميش ميلتلر و يونسكو نون دا چيخارديغي قرارلار آنا ديلده اوخوماغي لازيم و واجيب بيلميشلر. بوتون بونلارا راغماً هله ده پهلويلر دؤوروندن قالان و او دؤورون ايفراط فارس ناسيوناليستي ايدئولوژي و فرهنگي ايله تعليم و تربيه گؤرن بعضي شخصلر ، بو اويدورما فيكير و عقيده‌لره سؤيكنه‌رك ميلي بيرليك باهانه سيله فارس اولمايان 50 ميليونا ياخين ايرانلي اوشاقلاري‌نين آنا ديلينده داخي اوخومالارينا مانيع تؤرَديرلر.

بو شووينيستلر بئله گومان ائديرلر كي ، بو غئير ـ اينساني و آنتي ـ دموكراتيك مفكوره و عمللري ايله ايرانا و اونون ايستيقلال و بيرليگينه خيدمت ائديرلر ، حال بو كي ، عملده ايران خالقلاري‌نين آراسيندا ايختيلاف و نيفاق ساليرلار و ايران ميلتي‌نين اوچده ايكيسيني تشكيل ائدن غئير ـ فارس خالقلاريني ناراضي و اؤزلرينه موخاليف ائدير و بئله‌ليكله ميلتي‌نين ايرانين بوتونلوگونه و ميلتن بيرليگينه ضرر و صدمه وورورلار.

نويد آذربايجان ژورنالي‌نين حؤرمتلي حوقوق شوناس يازيچيسي دوكتور عيسي نظري چوخ حاقلي اولاراق يازيركي ترك ستيزي پان تركيسم مي‌سازد....

بيز ، بير دفعه داها اونلارا دئييريك كي، وطن سئوگيسي ، هله چوخ ديللي اؤلكه‌لرده ديله تابع دئييل ، يوخسا سوئيس ، بلژيك و بو كيمي اؤلكه‌لر ايندييه قدر داغيلاردي . بير ميلتين تشكيل و بيرليگينه موختليف عاميللر دخالت ائدر. آنجاق ، ان موهوم عاميل ، او ميلتين و اؤلكه‌نين فردلري‌نين و خالقلاري‌نين آراسيندا مؤوجود اولان بير ـ بيرينه باغليليق و برابر ياشاماق و اورتاق ايستك و آرزولاريدير. بو باغليليق و برابر ياشاماق حيسلري ده خالقين و يا خالقلارين رژيمدن و بير ـ بيريندن راضيليغينا باغليدير.

ميلي بيرليگي و ميلي امنيتي قوروماق اوچون ميلتي راضي ساخلاماق لازيمدير. بودا آنجاق خالقين مشروع حاقلاريني وئرمك و ميلي وظيفه‌لري يئرينه يئتيرمكله مومكون اولور.

بيز مدني وارليغيميزي اينكار ائدن و پان ايرانيست آدي آلتيندا پان فارسيست دوشونجه‌لريني حياتا كئچيرمك ايسته‌ينلره و آنا ديليني سئون آذربايجانليلارا پان توركيست و تجزيه طلب دئينلره دئييريك كي ، بيز ده ان آز اونلار قدر ايرانلي‌ييق و اونلاردان چوخ وطنيميزي سئويريك و اونون ايستيقلال و بوتؤولوگونه بوتون وارليغيميزلا باغلي‌ييق. بيزيم و ايرانين بؤيوك ايكي ديللي شاعيري اوستاد شهريار ، آنا ديلي حاقيندا

توركي ديلي تك سئوگيلي ، ايستكلي ديل اولماز ،

اؤزگه ديلي قاتسان بو ديله ، ديل اصيل اولماز .

 

نويد آذربايجان