8- مارت قادينلارين بين الخلق همرايليک گونونه عشق اولسون!

 

قادينلار حقينده اولونان ظولم ميلی ظولم کيمی، او قدر گنيش و کؤک سالميش ديرکی، چوخوسو اونو گؤز قاباغيندا اولماسینا گؤره ، گؤره بيلمه ييب طبيعی سانير و يا گؤرمک ايسته مير.

 

قادينلار ايسلام جومهوريتی نين اونلارا غدار دوشمن اولدوغونو هاميدان آرتيق دويور و بيليرلر! قادينلار ايراندا رسمی اولاراق ايکينجی درجه لی آدام ساييليرلار. هامييا گوندن دورو و آيدان آريدير کی، ايراندا حؤکم سورن جينسی آپارتايد ايسلام جومهوريتی نين توخونولماز اصللريندن و تمل داشلارينداندير.

 

بو دؤزلمز وضعيته سون قويماق و قادينلارين آزاد اولماسی، ايسلام جومهوريتی نين آرادان قالديريلماسی ايله سيخ علاقه ده دير.

 

بو او دئمک دئييل کی، رژيمين آرادان گئتمه سيله قادينلار آزادليغا چاتاجاقلار، آنجاق رژيمين مؤوجوديتی ايله باغلی اولان بير سيرا آيری سئچگيليکلر و تحقير- تؤوهينلر، قانونی لشميش حقسيزليکلر محو اولوب و قادينلارين هرجهتدن کيشيلرله برابر حوقوق اولمالارينا و تام آزاد اولمالارينا يول آچيلاجاقدير.

 

تاسوفله، باشا- باش ايراند و اوجومله دن ايراندا ياشايان تورک ميلتی نين ايچريسينده هله ده پاتريارکاليسم و کيشيلرين حاکيميتی و اسکی ايرتيجاعی سونتلر و دبلر گوجلودورلر! اونلارلا موباريزه ائتمک ميلی آزادليق اوغروندا دؤيوشن بوتون اينسانلارين بورجودور!

 

قادينلارين آزادليغي، ايراندا ياشايان ميلتلرين، ائله جه ده ايران تورکلرينين آزادليغينا يول آچار! قادينلار آزاد اولمازسا، هئچ توپلوم آزادليق اوزو گؤرمزو دموکراسی آياق توتا بيلمز.

 

آنجاق تاسوفله بير سيرا سياسی قووه لرين فيکيرينجه قادينلارين مساله سينی و هابئله ميلی مساله نی اينديکی دورومدا ايره لی سورمک و عومده ائتمک عومومی دموکراسی اوغروندا گئدن موباريزه يه ضرر يئتيرر. بونا گؤره، اونلارين فيکيرينجه گرک ايسلام جومهوريتی ييخيلانا دک دؤزک کی، سونرا قادين مساله سی و ميلی مساله حل اولونسون! بو فيکير اولدوقجا يانليشدير! ايسلام جومهوريتی نين آرادان گئتمه سينده ميلتلرين و قادينلارين حرکاتی چوخ بؤيوک رول اويناييرلار. بونا گؤره قادينلار و مظلوم ميلتلر گونو بوگوندن اؤز ايستکلری و شوعارلاری ايله مئيدانا گلمه ليديرلر!

 

ايسلام جومهوريتی يارادان جينسی آپارتايد سيستمينی محو ائتمک اوچون، قادينلار اؤز باغيمسيز و موستقيل تشکيلاتلارينی قورماليديرلار. قادينلارين آزادليغينی آنجاق اونلارين اؤزونو قورتارما حرکاتی تامين ائده بيلر.

 

آذربايجان حرکاتی قادينلارين تاپدالانميش حقلرينی و اونلارين جينسی ظولم بويوندوروغوندان قورتارمالارينی رسمی تانيماقلا کيفايتلنمه مه لی، بلکه اونلاردان جيدی حيمايت ائتمه ليدير.

 

آزاد و برابر حوقوق جمعيت و دموکراسی قورماق، فمينيستی قورتولوش حرکاتی ايله ميلی قورتولوش حرکاتی ني بيرلشديرمه دن، مومکون دئييل! آذربايجان فدرال دموکرات حرکاتی اؤزونون موقتی پلاتفورموندا قادينلار* حقينده وئريلميش ماده نين اوزرينده تاکيد ائدرک، ايرانين گله جک فدرال جومهوريتی نين قئيد شرطسيز اولاراق قادينلار اوزرينده آيری سئچگيليگين لغو ائديلمه سی کونوانسيونو نا قوشولماسيندان حيمايت و مودافيعه ائدير.

 

 

آذربايجان فدرال دموکرات حرکاتی نين موقتی ايجرائيه هئياتی

 

 

 

 

 

 

 

*: قادينلارلا کيشيلرين حوقوق برابرليگى بوتون سياسى-اجتماعى و اقتصادى ساحهلرده تامين ائديلمهليدير. بوتون حاکيميت اورقانلاريندا قادينلارين اشتراکى، اونلارين جمعيتده اولان سايلاريله موتناسيب اولماليدير! گئرچک حياتدا موجود اولان برابرسيزليگى آرادان قالديرماق اوچون لازيم تدبيرلر، او جوملهدن قادينلارين خئيرينه موثبت تبعيض حياتا کئچيريلمهليدير! زحمتکش عايلهلره منسوب اولان قادينلارين گليشمهسى اوچون الوئريشلى شرايط يارانمالى و بوتون قادينلارين موستقيل اولاراق تشکيلاتلانمالاريندان حيمايت اولونماليدير!