ايران آذربايجانليلاری- تورکلری‌نين سياسی تشکيلاتينی ياراتماماق اوچون تشبوثکارلار توپلومونون ايجلاسىنين گوزاريشی

 

ايش بير يئردن باشلانماليدير!

 

چوخدان بريدير کی، خاريجی اؤلکه‌لرده ياشايان و ميلی(اتنيک) فدراليزمی مودافيعه ائدن، دموکرات و آزاديخواه آذربايجانليلاردان بير عيده‌سی، آذربايجانليلارين و ايران تورکلرینين منافعينی قورويان جيدی سياسی تشکيلاتين يئرینين بوشلوغونو دريندن حيس ائديب و ايران تورکلرينه مخصوص قاباقجيل بير جريانين يارانماسینين ضروریليگينه گليب چاتميشلار.

مودتلرله بير- بيرلريله موختليف موناسيبتده اولوب و تبادول نظر ائدن آذربايجانليلاردان بير سيرا‌سی،آذربايجانلی دوستلارين بير نئچه‌سی‌نين تشبوثی ايله بير نئچه آی آذربايجان- ايران تورکلری‌نين چتين‌ليکلری حاقدا اينترنت واسيطه‌سيله قورولموش اجلاسلاردا و موذاکيره‌لرده اشتيراک ائتديلر.

بير نئچه داخيلی جلسه‌دن سونرا ايران تورکلری نين سياسی تشکيلاتی‌نی ياراتماق ايدياسی، مطرح اولوب و يولداشلار بو فيکيری بگنديلر.

 

پروقرام و تشکيلات قورولوشو حاقدا چوخلو شيفاهی و يازيلی موباحيثه‌لر آرايا گليب و نهايتده سياسی تشکيلاتين موقتی پلاتفورمو لاييحه‌سی و و موقتی تشکيلات قورولوشو لاييحه‌سی کوميسيونلاری ياراندی.

 

موقتی پلاتفورمون لاييحه‌سی اينترنت اجلاسلاريندا اشتيراک ائدن يولداشلارين شيفاهی و کتبی نظرلرينين اساسيندا کوميسيون واسيطه‌سيله حاضيرلانيب و ياخين يولداشلارا و دوستلارا چاتديريلدی و اونلارين فيکيرلری و تکليفلرینی نظرده آلماقلا موقتی پلاتفورمون نهايی لاييحه‌سی حاظيرلاندی.

 

۲۰۰۴- جی ايلين سپتامبر آيی‌نين ۱۰و ۱۱ و -۱۲ جی گونلرينده، ايران آذربايجانليلارينا- تورکلرينه مخصوص سياسی تشکيلات ياراتماق اوغروندا پلاتفورم و نيظامنامه موباحيثه‌لرينده فعالجاسينا و موثير صورتده قاتيلان يولداشلارين اشتيراکی ايله سوئدين (ايشوئچين) ايستوکهولم شهرينده بير توپلوم قورولدو.

 

ايران آذربايجانليلاری- تورکلرينين سياسی تشکيلاتينی قورماغا چاليشان تشبوثکارلار توپلومو، اجلاسين رياست هئياتینی و کاتيبی‌نی سئچندن سونرا ايش گئديشاتی نيظامنامه‌سينی تصديق ائديب و اجلاسين گونده‌ليگينده اولان مساله‌لرين موذاکيره ائتمه‌سينه داخيل اولدو..

 

ايجلاس پروقرام کوميسيونونون تکليف ائتديگی موقتی پلاتفورمون لاييحه‌سينی موذاکيره‌يه قويماقلا ايشه باشلادی.

 

موقتی پلاتفورمون لاييحه‌سی تفصيلاتلا و چوخ جيدی صورتده موذاکيره ائديليب و بيرينجی نؤوبه‌ده اونون کولياتی باره سينده رای آليندی. موقتی پلاتفورمون لاييحه سی‌نين کولياتی اتفاق آرا ايله تصديق ائديلدی. سونرا اونون موقديمه‌سی و ماده‌لری بير- بير اوخونوب و اجلاسين کافی و قانع ائديجی متودلا موذاکيره‌لريندن سونرا، يئری گلديکده فورموللاشمالارين دقيقلشديريلمه‌سی و اصلاح ائديلمه‌سيندن سونرا، لاييحه‌نين هربير ماده‌سی اکثريتين رای وئرمه‌سی ايله تصويب ائديلدی.

 

توپلوم ايران تورکلرينه- آذربايجانليلارينا مخصوص سياسی تشکيلاتين موقتی پلاتفورمو لاييحه‌سی‌نی تصويب ائتديکدن سونرا، نيظامنامه کوميسيونونون تکليف ائتديگی نيظامنامه و تشکيلات قورولوشو لاييحه‌سی اوزرينده موباحيثه ائتمگه باشلادی. بو حاقدا اطرافلی موباحيثه‌لردن سونرا ، توپلوم بو قرارا گلدی کی، نيظامنامه و تشکيلات قورولوشو لاييحه‌سی گله‌جکده ياراديلان نيظامنامه کوميسيونونا تاپشيريلسين و بو کوميسيون اونو دقيقلشديريب و اوندا لازيمی اصلاحاتی آپارديقدان سونرا لاييحه آچيقجاسينا نشر ائديلسين. بونونلا بيرليکده نيظامنامه و تشکيلات قورولوشو لاييحه‌سی باره‌سينده موباحيثه‌لر تشکيل ائديب و اونون سونکو نتيجه‌سينی تاسيس چيلر قورولتايينا ايرائه وئرسين.

 

استوکهولم توپلومونون اشتيراکچيلاری، ايران آذربايجانليلاری- تورکلرينه مخصوص سياسی تشکيلات ياراتماقدا، همده پلاتفورم و نيظامنامه ايله علاقه ده گئدن موباحيثه‌لرده موستقيم يا غئير موستقيم اولاراق اشتيراک ائدن يولداشلار و هابئله موجه دليللر اوزره اجلاسدا حاضير اولابيلمه‌ين يولداشلار اؤزلرينی ايران آذربايجانليلارينا- تورکلرينه مخصوص سياسی تشکيلات قورماغين تشبوثکار توپلومو کيمی تانی يير و بو قرارا گليب کی.تشبوثکارلار توپلومونون تکليف ائتديگی موقتی پلاتفورمون لاييحه‌سی‌نين کولياتی‌نی قبول ائدن ايران تورکلری- آذربايجانليلاری‌نين امضالارينی ييغاندان سونرا موعين بير واختدا- بير ايلين ايچينده، نظرده آلديقلاری سياسی تشکيلاتين تاسيس‌چيلر قورولتايی‌نی چاغيرسينلار.

 

تاسوفله تشبوثکارلار توپلوموندا يالنيز بير قادين اشتراک ائتميشدير. اشتراکچيلار هاميسی بيرليکده مؤعتقيد ايديلر کی، ايسته‌ديکلری تشکيلات قادينلارين گوجلو و تاثيرلی اشتراکی اولمادان هئچ زامان مودرن، دموکرات و گونوموزه اويغون بير تشکيلات اولابيلمه‌يه‌جکدير.

 

تشبوثکارلار توپلوموندا اشتراک ائدنلرين هاميسی‌نين نظرينجه تاسيس‌چيلر قورولتاييندا قادينلارين حضورو و اشتراکینی تامين ائتمک اوچون حقيقی تسهيلات حاضيرليغی آپاريلماليدير.

 

قورولاجاق تشکيلاتين آدی حاقيندا دا، تشبوثکارلار توپلوموندا دقيق و ييغجام موباحيثه‌لر گئتدی. توپلوم يولداشلارين تکليف ائتديکلری موختليف آدلارين اطرافيندا مووافيقلرين و موخاليفلرين سؤزلرينی و موباحيثه‌لرينی دينله‌ييب و گؤتور- قوی ائدندن سونرا آذربايجان فدرال- دموکرات حرکاتی- نی تشکيلاتين آدی کيمی بگه‌نيب و اکثريت آرا ايله اونو تصويب ائتدی. تاسيس‌چيلر قورولتايی، پلاتفورم و تشکيلات- قورولوشو لاييحه‌سی کيمی، آدين باره‌سينده نهائی تصميم توتماق حقينه ماليکدير. استوکهولم اجلاسيندا ييغيشان تشبوثکارلار آشاغيداکی قرارلاری دا اتفاق آرا ايله تصويب ائتديلر:

 

يالنيز تاسيس‌چيلر قورولتايی آذربايجان فدرال- دموکرات حرکاتی- نين موقتی پلاتفورموندا دگيشيکليک آپارماق اختيارينا ماليکدير.

 

اسلام جومهوری‌سی‌نين عاميللری و اونا باغلی اولان شخصلر آذربايجان فدرال- دموکرات حرکاتی- نا عوضو اولا بيلمزلر.

 

ميلتلرين اؤزلرينين اؤز موقدراتينی تعيين ائتمک حاقينا اينانيب لاکين باشقا سياسی تشکيلاتلاردا عوضو اولان شخصلرين آذربايجان فدرال- دموکرات حرکاتی- نا عوضو اولمالاری مانع سيز دير.بوباره ده نهايی تصميمی قورولتای توتاجاقدير.

 

تشبوثکارلار توپلومو، آذربايجان فدرال- دموکرات حرکاتی- نين تاسيس‌چيلر قورولتايينا قدر ايشلرين قاباغا آپارماسی و کؤرديناسيونو (هماهنگ ليگی) اوچون اؤز ايچيندن ۷ يئددی نفرليک موقتی اجرائيه هئياتی نی سئچدی.

 

۷ يئددی نفرليک موقتی اجرائيه هئياتی توپلومون جواريندا،اؤزونون بيرينجی اجلاسيندا ايشلر و مسوليتلری اؤز آرالاريندا بؤلوشوب و تشبوثکارلار توپلومونون نظرينه يئتيردی. تشبوثکارلار توپلومواتفاق آرا ايله اونو تصويب ائتدی.

 


 

"آذربايجان فدرال- دموکرات حرکاتى"نين موقتی پلاتفورمو

 

گيريش:

ايرانليلارين موعاصير تاريخى، بير طرفدن اونلارين آزادليق و اجتماعى عدالت يولوندا موباريزهلرىنين تاريخى، و ديگر طرفدن تورک، کورد، عرب، بلوچ و تورکمن ميلتلرىنين ميلى- آزادليق موباريزه لرىنين تاريخىدير.


آذربايجانلىلارين ميلى- آزادليق موباريزه سى مشروطه انقلابى دؤرونده يارانان آذربايجان ميلى مجليسى، ايالت- ويلايت انجومنلريله باشلاميش، شيخ محمد خيابانىنين رهبرليگىايله يارانان آزاديستان حؤکومتى، سيد جعفر پيشهورىنين باشچيليغىايله برپا اولونان آذربايجان ميلى حؤکومتى ايله دوام ائديب، هابئله بهمن انقلابيندا و بوگونه قدر دوام ائدن موباريزه ده منعکس اولونوبدور.

امپرياليستلرين رضاخانين اليله قانوني مشروطه دؤلتى عليهينه ائتديکلرى کودتادان سونرا، ايراندا غئيرفارس ميلتلرين حقينده شدتلى آسيملاسيون (اريتمه) سياستى اعمال اولونوب و فارس ديلى اساسيندا واحد ميلت ياراتماق تشبوثى رسمى دؤلت سياستينه چئوريليبدير. بو سياست بهمن انقلابيندان سونراکى دؤورده ده دوام ائديبدير. آنجاق آذربايجانليلارين ميلى موباريزه سى هر ايکى دؤورده مختلف شرايطده و شکيللرده اؤز يولونو آچيب و ايره لى گئديبدير.

سون زامانلار ايراندا اجتماعى- سياسى و مدنى- کولتورل موباريزه لر وسعت تاپيبدير. بونونلا برابر، ايراندا ياشايان غيرفارس ميلتلر ده، ميلى حقلرينى الده ائتمک يولوندا موباريزهلرينى گوجلنديريبلر. ميلى موباريزه نين درينلشمه سى و انکشافى اوچون گرک شوعورلو موباريزه نين موختليف شکيللريندن استفاده اولونسون. بونا گؤره، چوخ موختليف شکيللرده و سطح لرده تشکيلاتلانماق ايشى بوگونونکو موباريزه نين ان آکتوئل و گونده ليک مساله سى دير. تاريخى تجربه گؤسترميشديرکى، شوعورلوجاسينا قورولماميش و دوزگون تشکيلاتلانماميش اجتماعى- سياسى حرکات نه قدر گئنيش و کوتلهوى اولسادا، تئز و يا گئج ديزه چؤکدورولوب و مغلوب ائديليبدير. حرکاتين اؤزونون داخيلى منطقى و تاريخين حؤکمو بئلهدير. بيزجه هر هانسى بير حرکاتين وارليغينى زامان بويوندا قورويان، درينلشديرن و الوئريشلى شرايطين اولدوغوندا، حرکاتى اؤز هدفلرينه چاتديران باشليجا و ضرورى عاميل موناسيب بير تشکيلاتين موجود اولماسيدير. بونا گؤره بيز بينالخلق اينسان حقلرينه داياناراق ايرانين سياسى- اجتماعى قورولوشوندا کؤکلو- ديبلى دگيشيکليک لرين يارانماسى و غير موتمرکيز و دموکراتيک اساسلار اوزره ميلى (اتنيک) فدرال دؤلت سيستمىنين برپا اولونماسى آماجىايله سياسى بير حرکت کيمى تشکيلاتلانمانى اينديکى شرايطده لازيم و ضرورى بيليريک و اونون اوچون آشاغيداکى آماجلارى حياتا کئچيرمک اوچون بوتون آزاديخواه و وطنپرورتورکلر- آذربايجانليلارى بیرگه موباريزه ائتمگه چاغيريريق!

 

عومومى پرينسيپلر

ايران اؤلکهسى: ايران چوخ ميلتلى (کثيرالملله) بير اؤلکهدير. بو اؤلکهده ياشايان ميلتلرين باشليجاسى بونلاردان عيبارتديرلر: تورک -آذربايجان ميلتى، فارس ميلتى، کورد ميلتى، عرب ميلتى، بلوچ ميلتى و تورکمن ميلتى. پهلويلر و اسلام جومهوريتى دؤرلرينده فارس ميلتىنين آشيرى ناسيوناليزمينى و شوينيزمينى نماينده ليک ائدن و آپاريجيسى اولان مرکزى حؤکومتلر ايراندا ياشايان باشقا ميلتيلره ميلى ظولم و ميلى اريتمه (آسيملاسيون) سياستينى تحميل ائديبلر.


ميلى کيمليک و هويت: تورک ديلى (آذربايجان تورکجهسى) بيزيم ميلى کيمليگيميزين ايچ اؤزه گى و تمل داشيدير.

ميلى مساله و حاکميت مسالهسي: ميلى مساله و او جوملهدن ايران تورکلرىنين مسالهسى اصلينده سياسى بير مسالهدير. اونون حلى و ميلى ظولمون آرادان آپاريلماسى ميلتلرين اؤز موقدراتينى تعيين ائتمک حقىنين تامين ائديلمهسىايله مومکوندور. بو يولدا اساس مانع اسلام جومهوريتىدير.



ايران تورکلرينين فدرال دؤلتي

 

١- ايران فدرال جومهوريتى: دموکراتيک اساسلار اوزره ميلى (اتنيک) فدراليستى قورولوش اساسيندا او جوملهدن ايکى پارلامنتلىليک پرينسپى اساسيندا- ايراندا ياشايان ميلتلرين فدرال دؤلتلرى، خودموختار بؤلگهلرين دؤلتلرىنين و اؤزل شهرلرين آزاد و کؤنوللوجهسينه بيرلشمهسيندن يارانيلماليدير!

٢- آذربايجان تورکلرينين يئرلى حاکيميتى، آذربايجانين تاريخى اراضىسينده (تاريخا بيتيشيک شکيلده ياشاديقلارى تورپاقلاردا) يارانيلماليدير. عين حالدا خوراسان تورکلرى و ايرانين جنوبوندا يئرلشن قاشقايستان تورکلرى يئرلى حاکيميتلر ياراتماق حقينه ماليک اولماليديرلار!

٣- آذربايجانين يئرلى حاکيميتى حقينده: قانونوئريجىليک، محکمه، انتظامات، وئرگى، ادارى و کولتورل ايشلر آذربايجانين يئرلى حاکيميتىنين عؤهدهسينده دير. آذربايجان يئرلى حاکيميتى، آذربايجانين اساس قانونو چرچيوهسينده يارانان يئرلى پارلامنت و دؤلتدن عيبارتدير و ميلى سورود و پرچم قوللانماق حقينه ماليک اولماليدير!

۴- خوراسان تورکلرى و قاشقايستان تورکلرى حقينده: خوراسان و قاشقايستان تورکلرى، ميلى ايستکلرينى حياتا کئچيرمک اوچون ايستهديکلرى صلاحيتلى حاکيميت اورقانلارينى ياراتماق حقينه ماليک اولماليديرلار!

۵- خارجى سياست ايشلرى، خارجى تجاوز قارشىسيندا مودافيعه، اوزون وعده لى اقتصادى سياستلر و پلانلارين تنظيماتى، اؤلکهنين پول سيستمى، هابئله ارتباطات اموراتى و ياشام موحيطى مرکزى فدرال حاکيميتىنين اختياراتينداندير.

۶- تورک، فارس، کورد، عرب، بلوچ و تورکمن ديللرى ايرانين رسمى دؤلت ديللرى اولماليديرلار. ايران فدرال دؤلتىنين بوتون سندلرى ايرانين رسمى ديللرينده تنظيم اولماليدير. فارس ديلى رابيطه چى کيمى ايشلهنيلهجکدير. تورک ديلى (آذربايجان تورکجهسى) رسمى دؤلت ديلى اولاراق آذربايجانين و خودموختار تورک بؤلگهلرىنين بوتون دؤلت اورقانلاريندا، سندلرينده، مکتبلرينده، عالى تحصيل اوجاقلاريندا، کولتور، اينجهصنعت و مديا واسيطهلرينده ايشلهنيلمهليدير.

٧- تهران و بو کيمى اؤزل شهرلر، اوردا ياشايان بوتون اهالىنين ميلى-مدنى حاقلارينى تامين ائدن و بو شهرلره مخصوص اولان حاکيميت اورقانلارى واسيطهسيله ايداره اولونماليديرلار!

آماجلاريميز

١- بوتون وطنداشلار، اونلارين جنسيت، دين، سياسى مرام و اجتماعى مؤقعلريندن آسيلى اولماياراق، قانون قارشىسيندا برابرديرلر. هر بير وطنداش ايستهديگى گئينيش و شخصى حيات طرزينى سئچمک حقينه ماليکدير. اونلارين اجتماعى، دينى و سياسى شخصيتلرى حاکيميت و حاکيميته منسوب اورقانلارين قارشىسيندا توخونولمازدير.

٢- مودرن و دموکراتيک فدرال بير دؤلت کيمى، بوتون صلاحيتلى اورقانلار، دين، مرام-مسلک، جنسيت و ميليتيندن آسيلى اولماياراق 18 ياشا دولموش بوتون وطنداشلارين گيزلى و مستقيم سس وئرمهلريله سئچيلمهليديرلر!


٣- پولوراليزم و مرام-مسلک و عقيده آزادليغى بوتؤولوکله حياتا کئچيريلمهليدير. ييغيناجاق، سؤز، درگى، مطبوعات و اينفورماسيانين ياييلماسىنين آزادليغى، بوتون سياسى- اجتماعى و مدنى قورولوشلارين، درنک و تشکيلاتلارين فعاليت آزادليغى تامين ائديلمهليدير. بوتون وطنداشلارين او جوملهدن ايشچيلرين، زحمت آداملارىنين امک حقىايله ياشايانلارين سينديکالارىنين، شورالارىنين، صينفى و سياسى فعاليتلرينين آزادليغى قئيد- شرطسيز قورونماليدير!

۴- دؤلتين هر بير ديندن و ايدئولوژيدن استقلالى: دين و مرام- مسلک اينسانلارين خصوصى اموراتينداندير و بوتون اينسانلار دينه اينانيب-اينانماماقدا، بير مرام- مسلکه صاحيب اولوب- اولماماقدا آزادديرلار. بوتون مذهب صاحيبلرى اؤز مذهبلرينين دبلرينى و مراسيمىنى اجرا ائتمکده آزادديرلار. دين و مرام- مسلک اؤلکه نين تعليم- تربيه سيستميندن و دؤلتدن تماميله آيرى اولماليدير!

۵- قادينلارلا کيشيلرين حوقوق برابرليگى بوتون سياسى-اجتماعى و اقتصادى ساحهلرده تامين ائديلمهليدير. بوتون حاکيميت اورقانلاريندا قادينلارين اشتراکى، اونلارين جمعيتده اولان سايلاريله موتناسيب اولماليدير! گئرچک حياتدا موجود اولان برابرسيزليگى آرادان قالديرماق اوچون لازم تدبيرلر، او جوملهدن قادينلارين خيرينه موثبت تبعيض حياتا کئچيريلمهليدير! زحمتکش عائلهلره منسوب اولان قادينلارين گليشمهسى اوچون الوئريشلى شرايط يارانمالى و بوتون قادينلارين موستقيل اولاراق تشکيلاتلانمالاريندان حيمايت اولونماليدير!

۶- دوققوزونجو کلاسين سونونا دک پولسوز و اجبارى تعليم-تربيه سيستمى قورولماليدير. کيمسهنى آيرى سئچمه‌دن بوتون وطنداشلارى علم اساسيندا قورولموش قاباقجيل تعليم-تربيه سيستمى ايله تامين ائتمهلى، ساوادسيزليغى آرادان قالديرماغا گؤره، ياشليلارين ساوادلانماسى اوچون آيريجا مکتب و صنعت ائولرى آچيلمالى و اونلارا مادى يارديم و الوئريشلى تحصيل شرايطى ياراديلمالىدير. عين زاماندا عالى تحصيلاتين پولسوز شکيلده گئنيشلنمهسى اوچون هرطرفلى شرايط حاضيرلانماليدير!

٧- اجتماعى عدالتين گئنيشلنديريلمهسى و بوتون ايشچيلرين، زحمت آداملارىنين و امک حقىايله ياشايانلارين آجيناجاقلى ياشاييش شرايطىنين ياخشيلاشديريلماسى، بهداشت، تعليم- تربيه و اجتماعى خدماتين بوتون وطنداشلاراوچون تامين ائديلمهسى يولوندا چاليشمالى و ايشسيزليک بيمهلرى حياتا کئچيريلمهليدير!

٨- عمومون رفاهينى قوروماق اوچون اجتماعى بيمه سيستمى ياراديلمالى، وطنداشلارين قازانجلارىنين اؤلچوسو ايله موناسيب وئرگى اؤده مهلرى تشکيل ائديلمه لى و گلير، مولکيت و ارث اوزرينده تصاعودى وئرگى سيستمى قورولمالىدير!

٩- اون آلتى (١۶) ياشا دولماميش اوشاقلارين ايشلهديلمهسى قاداغان ائديلمهلىدير. گنجلرين و يئنىيئتمهلرين موعاصير دؤرون ايستکلرينه موافق بويا- باشا چاتيب، تعليم آليب، بسلنمهلرينه گؤره، اونلارين ايدمان و ساغلام اگلنجهلرى تامين ائديلمهلى دير. کولتور و اينجهصنعتين چيچکلنمهسينه و انکشافينا الوئريشلى ايمکانلار ياراديلمالىدير. قزئتلرين و درگيلرين، عومومى کيتاب ائولرىنين آچيلماسينا و مدنيت اوجاقلارىنين گئنيشلنديريلمهسينه تدبيرلر تؤکولمهليدير. بير سؤزله دئسک بوتون وطنداشلارا و خوصوصيله زحمتکش عايلهلره منسوب اولان گنجلر اوچون تکنولوژى و اينفورماسيانين نائيليتلريندن فايدالانماغا گؤره الويريشلى شرايط يارانمالىدير!

١٠- ياشام محيطى قورونوب ساغلاملاشديريلمالىدير. اوندان جمعيتين انکشافى و عمومون رفاهى يولوندا استفاده اولونماليدير!

١١- ايراندا ياشايان باشقا ميلتلرله آرخاداشليق و يولداشليق موناسيبتلرى قورولماليدير!

١٢- فدرال آذربايجان اؤلکهسينده و خودموختار تورک بؤلگهلرينده ياشايان بوتون ميلى و کولتورل اقليتلرين برابر وطنداشليق حقلرى تامين ائديلمهليدير!

١٣- اينسان حقلرينين قورونماسى بيزيم اساس آماجلاردان بيريدير. بو اساسدا اوشاقلارين و قادينلارين حقلرينى قورويان بينالخلق کونوانسيونلاردان حمايت ائدهرک، اؤلکهده اعدام جزاسىنين قالديريلماسينى و هر جوره شيکنجهنين لغو اولماسينى ايسته ييريک!

١۴- سون 80 ايلده ميلى ظولم و سرمايه قاچقينليغى نتيجهسينده آذربايجان اقتصادياتى گئرى ساخلانيلميشدير. اونا گؤره آذربايجانين اقتصادى انکشافى آذربايجانين يئرلى حاکيميتىنين اساس هدفلريندن بيرى اولماليدير!

يوخاريدا قئيد اولونان آماجلار، يالنيزتورکلرين- آذربايجانليلارين بيرگه موباريزه سى ايله و ايراندا ياشايان ديگر خالقلارلا بيرليکده، حياتا کئچيريله بيلر. بو آماجلارى الده ائتمک، اؤلکهنين داخيلى مسالهسى اولدوغو اوچون، بيز هربير خارجى موداخيلهيه قارشىييق.

آدرس تماس:

achiqnet@yahoo.se