٢١ آذر حرکاتى نين ۶٠- جى ايلدؤنومو موناسبتيله قطعنامه


تشکيلا تلا نما و حيزبيت

 

١) آذربايجان فدرال- دموکرات حرکاتى‌نين ايجرائيه هئياتى، ٢١ آذر حرکاتى‌نين ۵٩- جو ايلدؤنومو موناسبتيله (١٣٨٣- جو ايلين آذر آييندا) وئرديگى بيانيه‌نين آکتوئل‌ليگينى نظرده توتاراق، اونو يئنيدن مونتشير ائدير! ( ضميمه)

٢) آذربايجان فدرال- دموکرات حرکاتى‌نين ايجرائيه هئياتى، ٢١ آذر حرکاتى نين ۶٠- جى ايلدؤنومو ايله علاقه دار، ايرانين ايچريسينده و ديشاريندا چاليشان بوتون سياسى- کولتورل آکتيويستلرين نظرين آشاغيداکى مساله‌‌لره جلب ائدير:

 

حيزبيت و تشکيلاتلانما مفکوره‌ سى‌نين ايلک دفعه ايرانا گتيرنى، تورک ميلتى و آذربايجان خلقى اولموشدور. ايراندا حيزب، انجومن، جمعيت، سينديکا و عوموميتله دئسک تشکول ياراتماغين اساسينى آذربايجانليلار قويموشلار!

 

آذربايجان خلقى، مشروطه اينقيلابيندا موختليف گيزلى و آچيق انجومنلرى و جمعيتلرى، خيابانى حرکاتيندا آذربايجان دموکرات حيزبينى و ۶٠ ايل اؤنجه پيشه‌ورى‌نين باشچيليغى ايله آذربايجان خلقى‌نين اؤز ميلى حيزبين، آذربايجان دموکرات فيرقه‌سين ياراديبلار!

 

آذربايجان دموکرات فيرقه‌سى اؤز زامانينا اويغون بير حيزب و مرامنامه- نيظامنامه باخيميندان اولدوقجا مودئرن بير تشکيلات ايدى.

 

کسگينليکله دئمک اولار کى، ٢١ آذر حرکاتى و ميلى حؤکومتين يارانماسى، بير ايل دوام گتيرمه‌سى و بو بير ايلده خلقين منافعى اوغروندا بؤيوک و گؤرکملى ايشلر گؤرولمه‌سى، فيرقه سيز مومکون دئييردى.

 

آذربايجان دموکرات فيرقه‌سى‌نين بؤيوک سياسى و تاريخى اهميتى واردير.

 

فيرقه ۶٠ ايل اؤنجه گؤسترميشدير کى، مودئرن حيزب نه دئمکدير و نئجه خالق کوتله‌سينى سياست ايله ماراقلانديريب(سياسى لشديريب) و مئيدانا گتيرمک اولار.

 

ايندى ايراندا ياشايان تورک ميلتى‌نين و آذربايجان خالقى‌نين سياسى-ايجتيماعى و مدنى- کولتورل چاليشقانلارى‌نين (آکتيويستلرينين) اوزرينه بؤيوک بير وظيفه دوشور:

ايران تورکلرينين-آذربايجانليلارين تشکول تاپمالارينا و تشکيلاتلانمالارينا جيدى يارديم ائتمک وظيفه‌سى!

 

قوى ايرانين هر بوجاغيندا تورک ياشاييرسا، اؤزونون اولدوغو يئرينده، ايشله‌ديگى مکاندا، ياشاديغى محله ده و تحصيل آلديغى دانيشگاهدا... ال‌بير و موتشکيل اولسون!

 

کارخانالاردا، ايداره‌لرده و بوتون ايش يئرلرينده، گرک تورکلرين اؤزلرينين اؤزلرينه مخصوص تشکيلاتلارى اولسون. تورکلرين ايتيحاديه‌سى، تورکلرين سينديکاسى! تورک و آذربايجان اوستادلارينين و طلبه‌لرينين اؤزلرينين جمعيتلرى، انجومنلرى....اولماليدير!

 

تورک- آذربايجان قادينلارينين موستقيل تشکيلاتلارى يارانيلماليدير!

 

آذربايجانين بوتون کارخانالاريندا، مدرسه‌ و دانيشگاهلاريندا، و محله‌لرينده بئله، آذربايجانليلارين تشکوللرى اولماليدير. تشکيلاتسيز هئچ نه ائتمک اولماز! ايراندا ياشايان تورک ميلتى‌نين و آذربايجان خالقى‌نين نيجات و قورتولوش يولو آنجاق اونلارين بير آذربايجانلى تورک کيمى موختليف تشکيلاتلاردا بيرلشمه‌لريندن آسيليدير!

 

ايراندا سياسى دموکراسى‌نين يارديلماسى، مظلوم ميلتلرين ميلى ظولمدن قورتارماسى و فدراليستى بير سيستمين قورولماسى اوچون، موختليف حيزبلرين و تشکيلاتلارين يارانماسى و مؤوجود اولماسى چوخ اساسى رول اوينايير.

 

گؤزل سؤزلرين و ايده‌لرين دوغرولماسى و حياتا گئچمه‌سى، يعنى خالقين اينامينا چئوريلمه‌سى و ايجتيماعى- سياسى حياتدا تاثير قويما‌سى آنجاق حيزبلرين و تشکيلاتلارين واسيطه‌سيله مومکوندور.

 

آذربايجان فدرال- دموکرات حرکاتى ‌نين ايجرائيه هئياتى ١٣٨۴- جى ايلين آذر آيى

 

 

 

ضميمه:

٢١ - آ ذر حرکاتى نين ۵٩- جو ايلدؤنومو موناسيبتيله!

 

آذربايجان فدرال- دموکرات حرکاتى توتدوغو پرنسيپلر اساسيندا، اؤزونو ٢١- آذر حرکاتى‌نين دوامچيلاريندان بيلير!

 

طبيعيدير کى، دونيا عوض اولوب و داها بيزيم ياشاديغيميز شرايط و وضعيت فيرقه‌نين تشکيلى و يا ميلى حؤکومتين يارانماسى دؤوره ايله هر جهتدن فرقلنير.

 

فيرقه‌نين ايستکلرى و ميلى حؤکومتين سرلؤوحه سينده اولان ايشلرين بير سيراسى زامان اليله آرادان قالديريليب و بير پاراسى داها آکتوئل‌ليگينى الدن وئريبدير. آنجاق ٢١- آذر حرکاتى‌نين اساس استقامتلرى عوموميتله وار گوجيله اؤز يئرينده دورور:

 

٢١- آذر حرکاتى تورک ديلينى، آذربايجان تورکجه‌سينى، آذربايجان خلقى‌نين ميلى کيلمليگى‌نين تملى کيمى قيمتلنديردى. ٢١- آذر حرکاتى‌نين باشچيسى س. ج. پيشه‌ورى چوخ ياخشى بيليردى کى، بير خلقى بير ميلت سويه‌سينه يوکسلتمکده و ميلتلرين اؤز موقدراتينى تعيين ائتمک حقينى الده ائتمکده، ديلين اولدوقجا بؤيوک رولو و اهميتى واردير.

 

سبب سيز دئيل کى، کئچن يوز ايلده، بوتون فارس شووينيستلرى و ايفراطى ايرانچى ناسيوناليستلر فارس ديلينى گؤيلره قالديريب و ايراندا ياشايان باشقا ميلتلرين ديللرينى ازيب و محو ائتمکدن بير لحظه ده اولورسا بئله غافيل اولماييبلار.

 

پيشه‌ورى بو حقده بئله يازير:ديليميز دوشمنلرين بوش ايديعالارينا باخماياراق چوخ گئنيش و غنى بير ديلدير. اونون ريشه‌سى خلقيميزين قانيندا و اوره گينده دير. بيز اونو آنا سودى ايله اميب ، وطنيميزين روحنواز هاواسى ايله تنفوس ائتميشيک. .اونا توهین ائدنلر، اونو تحمیلی ومصنوعی گوسترمک ایسته‌ينلر بیزیم حقیقی دوشمنلريميزدير. او يازيردى: آلتى- يئدى ياشيندا تازا ديل آچميش اوشاغا يابانچى بير ديل تحميل ائتمک جينايتدير...آنا ديلينده يازيب اوخوماغى قدغن ائتمک فرهنگ (ماعاريف) تکامولونون قاباغينى آلماق دئمکدير.

 

٢١- آذر حرکاتى اصلينده سياسى حاکميته (پهلوى رژيمينه) قارشى بير حرکت ايدى. يعنى ميلى ظولمون آرادان قالديريلماسى و آذربايجان خلقى‌نين ميلى و فرهنگى حقلرينى ايالتى و ويلايتى انجومنلر شکيلينده الده ائتمک استيقامتينده بيرحرکت ايدى. البته فيرقه نين او گونکو ايالتى و ويلايتى انجومنلر شوعارى و ايستگى‌نين بوگونکو اتنيک فدراليزم ايستگينه چوخ اوخشارليغى وار ايدى.

 

٢١- آذر حرکاتى محروم و تاپدالانميش صينيفلرين و موختليف ظولملرين آلتيندا ازيلميش خلق کوتله‌لرينين دانيشان ديلى ايدى. بونا گؤره ٢١- آذر حرکاتى‌نين برنامه سينده و اقداماتيندا اجتيماعى عدالته چوخ بؤيوک يئر وئريلميشدير.

 

٢١- آذر حرکاتى‌نين دموکراتيک آزادليقلارا و اينسان حقلرينه موناسيبتى او گونه قدر ايران تاريخينده ميثيل سيز ايدى. ايراندا بيرينجى دفعه اولاراق قادينلارا سئچيب- سئچيلمک حقى ميلى حؤکومت دؤورونده وئريلدى و دؤولت اورقانلارينا نظارت ائتمک اوچون محلى سويه لرده شورالار تشکيل تاپدي.

 

٢١- آذر حرکاتى گئنيش اجتيماعى اصلاحات آپاردى و بيرينجى دفعه اولاراق ايراندا تورپاق اصلاحاتينى حياتا کئچيردى. آذربايجانين اقتيصادياتى‌نين انکيشافى ٢١- آذر حرکاتى‌نين اساس هدفلريندن بيرى ايدى.

 

٢١- آذر حرکاتى ايراندا ياشايان ميلتلرله، اوجومله دن کورد خلقى ايله آرخاداشليق قورموش و ايش بيرليگى آپارميشدير.

 

***

 

ايندى، آذربايجان دموکرات فيرقه‌سى‌نين يارانماسيندا و ميلى حؤکومتين برپا اولونماسيندا بؤيوک تاثيرى اولان عاميللرين رولو هر جهتدن دگيشيليبدير! بيزيم دؤوران آرتيق ٦٠ ايل بوندان قاباقکى دؤوران دئييل. داخيلى عاميللر دگيشيليب و بين‌الخلق شرايط بوس- بوتون تغيير تاپيبدير! آنجاق بو تغييرات ايراندا ياشايان ميلتلرين خئيرينه تامام اولوبدور. ايندى دونيا مقياسينداکى دموکرات و قاباقجيل قووه لر، سوئتلر اؤلکه‌سى‌نين داغيلماسيندان نه تک ضعيفلنمه‌ييب، بلکه داها آرتيق راق گوجلنيبلر!

 

سوئتلر اؤلکه‌سى‌نين ويجودو و حمايت ائتمه‌سى، فيرقه‌نين تشکيلينه و ميلى حؤکومتين يارانماسينا موناسيب شرايط ياراتديسا دا ، ائله بونون اؤزو ده ميلى حؤکومتين داغيلماسيندا و سينماسيندا بؤيوک رول اوينادى!

 

سوئتلرين پارچالانيب- داغيلماسى‌نين تاثيرى، ايرانين گله‌جگينده و ائله‌جه‌ده ايراندا ياشايان ميلتلرين قورتولوش يولولوندا آپارديقلارى موبارزه لرينده موثبت دگرلنديريلمه‌ليدير!

 

ايندى آرتيق دونيا مقياسيندا اينسان حقلرى‌نين تامين ائديلمه‌سى و تضمين اولونماسى او جومله‌دن ميلتلرين اؤز موقدراتينى اؤزلرى تعيين ائتمه‌سى حقى- رسميتله تانينير!

 

ايندى بين‌الخلق و خارجى عاميللرين رولو و تاثيرى موستبيد رژيملرى ديزه چؤکدورمکده و ميلتلرين قورتولوش موباريزه سينده، گئچميشدن داها آرتيق راق دير. بو اؤزو ده ايران تورکلرينين و هابئله ايراندا ياشايان و ميلى ظولمه معروض قالان ميلتلرين موباريزه‌سينه جيدى تاثير بوراخيب و اتنيک فدراليزمين قورولماسينا الوئريشلى شرايط يارادير.

 

ايران اسلام جومهوريتى‌نين سياستلرى و حؤکم سورن سيخينتى- بوغونتو، ابتيدايى آزادليقلارين تماميله تاپدالاماسى، اينسان حقلرينه قارشى يوروتدوگو دوشمنچيليکلر، ايراندا ياشايان ميلتلرين اؤز ميلى حقلريندن محروم ائديلمه‌سى و موختليف باهانالارلا اونلارى ازمه‌سى و ايرانين ايچينده و ديشاريندا دؤولتين رسمى سياستينه چئوريلميش تروريستى سياست، دونيانين دموکرات و قاباقجيل قووه‌لرى طرفيندن محکوم ائديليب و ايران خلقلرى‌نين عاديلانه و حقلى موباريزه لريندن حيمايت اولونور!

 

١٣۵٧- جى ايلين انقيلابى، ايراندا بؤيوک دگيشيکليکلره باعيث اولدو. موستبيد و امپرياليزمه باغلى اولان شاه رژيمى دئوريلدى و ٢۵٠٠ ايلليک شاهليق رژيمينه سون قويولدو.

لاکين اونون يئرينه گلن اسلام جومهوريتى شاه رژيمى دؤورونده آز- چوخ مؤوجود اولان عورفى آزادليقلارى دا محو ائديب آرادان آپاردى و بوتون ايرانليلارين قانينى شوشه‌يه توتوب و ١٢- اماملى شيعه مذهبى اساسيندا بير اسلامى ايدئولوژيک دؤولت ياراتدى.

 

آنجاق انقيلابين بير باشقا جهتى ده وار ايدى. کوتله‌لر بؤيوک ميقياسدا سياسى‌لشيب، آزادليق و دموکراسى‌نين نه اولدوغونو دريندن منيمسه‌ديلر. اونون نتيجه‌سينده، ميلى ظولمه معروض قالميش ميلتلرين ميلى شوعورو قات- قات يوکسليميشدير!

 

 

٢١- آذر حرکاتى دؤورونده آذربايجان دموکرات فيرقه‌سى‌نين فعاليتى و ايران تورکلرينين ميلى- دموکراتيک حرکاتى آنجاق آذربايجانين بير حيصه‌سينده محصور قالميشدى. حالبوکى، بوگون ايران تورکلرينين ميلى- دموکراتيک حرکاتى آذربايجان تورپاقلاريندا محصور دئييل، بلکه ايندى خوراساسن تورکلريندن توتموش ايرانين جنوبو تورکلرينه قدر، ايصفاهان، قوم، ...و نئچه ميليونلوق تهران تورکلرينى بورويوب و هامى ميلى قورتولوش اوغروندا قول- قولا و چيگين- چيگينه وئريب و بير يئرده ايره ليله ييرلر!

ميلى حقلرين الده ائديلمه‌سى يولوندا بئله بؤيوک بير مقياسدا حرکاتين ويجودو، ايران تورکلرى‌نين تاريخينده سابيقه سيزدير!

 

ايندى ميلى مساله‌نى مظلوم ميلتلر آراسيندا مطرح ائدنلر داها بئش اوچ نفر ضييالى دئييلدير! مظلوم ميلتلر آرتيق، کوتله‌وى اؤلچوده اؤز ميلى ايستکلرينى و برابرحقلى وطنداش کيمى ياشاماق ايسته ديکلرينى اوجا سسله ديله گتيرمکدن چکينمه‌ييب، بلکه بو حقلرى الده ائتمگه و ايستکلرينى حياتا کئچيرمگه گؤره کونکرت ايشلره ال آتيرلار. اونلار اؤز موستقيل ميلى تشکيلاتلارينى ياراديرلار!

 

آذربايجان فدرال- دموکرات حرکاتى ٢١- آذر حرکاتى‌نين ۵٩- جو ايلدؤنومو ايله علاقه‌دار بوتون آذربايجانليلارا و ايران تورکلرينه موراجيعت ائدير و اونلارى اسلامى حؤکومت علئيهينه و ائله‌جه ده فارس شووينيزمى و افراطى ايرانچى ناسيوناليستلر علئيهينه بيرگه موباريزه آپارماغا چاغيرير!