آذربايجان فدرال- دموکرات حرکاتى تشکيلاتى نين اساسلارى

 

 

نيظامنامه نين عومومى پرنسيپلرى

 

١- آذربايجان فدرال- دموکرات حرکاتى قاباقجيل ايرانلى تورکلردن و آذربايجان خلقيندن عيبارت بير تشکيلاتدير.اونون آماجى ايراندا حؤکم سورن سياسى رژيمى کؤکلى ديبلى دگيشديرمک و دموکراسى، آزادليق و برابرليگه و ايجتيماعى عدالته داياناراق ايران فدرال و دموکراتيک جومهوريتينى و ايران تورکلرينين فدرال دؤلتينى قورماقدير.

 

٢- آذربايجان فدرال- دموکرات حرکاتى- نا عوضواولماق. داوطلبانه و آزادجاسينادير.آذربايجان فدرال- دموکرات حرکاتى نين عمومى پرنسيپلرينى بگه نيب قبول ائدن، پلاتفورمدا گلن ايجتيماعى آماجلارين دوغرولماسى يولوندا آذربايجان فدرال- دموکرات حرکاتى ايله بيرليکده موتشکيل (اورقانيزه) موباريزه ائتمک ايسته ين بوتون ايران تورکلرى و آذربايجانليلار آذربايجان فدرال- دموکرات حرکاتيندا عوضو اولا بيلرلر.

تشکيلاتين عوضولوگوندن چيخماق دا آزاد و داوطلبانه دير.

 

٣- آذربايجان فدرال- دموکرات حرکاتيندا عوضو اولماق کيمسه نين فردى و سيويل حوقوق و آزادليقلارين محدود ائتمه ييب و شرطلنديرمير. آذربايجان فدرال- دموکرات حرکاتى عوضولرين خوصوصى حيات طرزينده موداخيله ائتمير.

 

۴- تشکيلات ايچينده (سلسله مراتب). آشاغى کوميته لر يوخارى کوميته لرين تصويب ائتديگى قرارلارى يئرينه يئتيرير و بوتون کوميته لر ده اؤز نؤبه لرينده مرکزى شورا نين قرارلارينى يئرينه يئتيريرلر.

 

۵- تاپشيريلان تشکيلات ايشلرى و وظيفه لر بير عوضوون باجاريقى، حاضيرليغى و اؤزونون شوعورلوجاسينا سئچمه سى نين اساسيندا اولماليدير. عوضولرين هئچ بيريسينه مئيلى نين خيلافينا اولاراق مسوليت و وظيفه داشيماق، تاپشيريلماماليدير. آنجاق، هر بير تشکيلاتى ايشى، و مسوليتى قبول ائتمک و تشکيلاتى اورقانلاردا ايشتيراک ائتمک اونو دئمکدير کى، وظيفه نى بوينونا گؤتورن عوضو هامان اورقانين و پوستون تشکيلاتى قايدالارينا بويون قويوب و وظيفه لرينى قبول ائتمگه شوعورلوجاسينا حاضيرليغى واردير.

 

 

آذربايجان فدرال- دموکرات حرکاتى تشکيلاتى-نين نيظامنامه سى

 

 

عوضو و عوضوون وظيفه لرى


١- جى ماده: عوضولوک شرطلرى:

a)     ١۶ ياشينا دولموش ايران تورکو و يا آذربايجانلى اولمالى،

b)    آذربايجان فدرال- دموکرات حرکاتى- نين پلاتفورمون قبول ائديب، عملده حياتا کئچيرمگه چاليشمالى، اونون آماجلارينين تبليغينده، ياييلماسيندا و آچيقلاماسيندا فعاليت گؤسترمه لى، و نيظامنامه نى ايجرا ائتمه ليدير

c)     گلير و مالى ايمکانالارينا موناسيب مورتب اولاراق عوضويت حقينى وئرمه لى،

d)    حرکانين اموالى نى، سندلرينى و سيرلرينى قورومالى

 

تبصره: تورک و آذربايجان خلقيندن اولماييب آنجاق آذربايجان فدرال- دموکرات حرکاتى نين پلاتفورمونا موناسيبتده تعهودلو اولان و ايرانين باشقا ميلتلريندن اولان شخصلر، آذربايجان فدرال- دموکرات حرکاتى ايله امکداشليق ائده بيلرلر.

 

٢- جى ماده: عوضوون حقلرى:

a)     بوتون تشکيلات اورقانلارينين سئچگيلرينده ايشتيراک ائديب، سئچيب و سئچيله بيلر،

b)    آذربايجان فدرال- دموکرات حرکاتى نين سياستلرى و مواضعى باره سينده گئدن بوتون موذاکيره لرده ايشتيراک ائده بيلر،

c)     اؤزونون نظرلرينى، فيکيرلرينى، تنقيدلرينى، تکليفلرينى و سواللارينى اولدوغو اورقانا و يوخارى اورقانلارا وئره بيلر.

d)    هر عوضو اؤز نظرينى تشکيلاتين ايچينده و ائشيگينده يايماغا حقى وار

e)     هر عوضوون حقى وار کى، اونون تشکيلاتدان چيخارماغينى بررسليق ائدن جلسه ده ايشتيراک ائديب ويوخارى اورقانلارا و قورولتايا شيکايت ائتسين

 

 

٣- جو ماده: عوضولوگه قبول ائتمه شرطلرى:

بير داوطلبين آذربايجان فدرال- دموکرات حرکاتى عوضولوگونه قبول اولماغى اوچون آذربايجان فدرال- دموکرات حرکاتى نين ايکى عوضوونون موعريفچيليگى لازيمدير. عوضولوگه قبول اولماق واحيدلرين واسيطه سى ايله و تشکيلات کوميسيونون تصويب ائتمه سى ايله حياتا کئچير

 

بيرينجى تبصيره: استيثنا حاللاردا، عوضولوگه قبول اولماق اوچون تشکيلاتين خاريجينده اولوب آنجاق تشکيلاتين اينانديغى ساغلام شخصلرين موعريفچيليگى قبول اولا بيلر.

ايکينجى تبصيره: درنکلرى و قروپلارى آذربايجان فدرال- دموکرات حرکاتى عوضولوگونه قبول ائتمک مرکزى شورا نين ايختييارا تينداندير.

 

 

اينظيباط قايدالارى

 

۴- جو ماده: عوضوون ايشتيراک ائتديگى تشکيلاتى اورقان، اونون مسوليتلرينى اليندن آلماق، تعليق حالينا ساليب و يا تشکيلاتدان چيخارماق اوچون قرار وئرمک حقى وار،آنجاق بونون اوچون اولدوغو يئرلى اورقانين اعضاسى نين دؤردده اوچونون سسى گرکدير و بئله بير قرار تشکيلات کوميته سى نين تصويبيندن سونرا ايجرا اولونا بيلر.

 

۵- جى ماده: مرکزى شورا نين (اصلى و مشورتى )عوضولرينى توبيخ ائتمک و يا اونلارين مسوليتلرينى اللريندن آلماق مرکزى شورا نين عومومى ايجلاسى نين ايختيياريندادير. بو تصميمى مرکزى شورا نين عوضولرينين ان آزى اوچده ايکيسى نين سسى ايله توتماق اولور.

نهايى تصميم نوبتى و يا فوق العاده قورولتايين عؤهده سينده دير.

 

 

تشکيلات ا وصوللارى

 

۶- جى ماده: آذربايجان فدرال- دموکرات حرکاتى نين تشکيلات اوصوللارى،گنيش تشکيلاتى دموکراسى، تشکيلاتين حياتيندا و سرنوشتينده عوضولرين ايشتيراکى نين تامين ائديلمه سي، و قورولتايلاردا و رهبرليک اورقانلاريندا توتولان سياسى و عملى پروقراملارين گؤستريشلر وقرارلارين موفقيتله ايجرا ائتمه سينده عووضولرين و حيزبى تشکيلاتين شوعورلوجاسينا و مسوليت حيسى ايله ياناشيب و ايشتيراک ائتمه لرى اوزرينده اساسلانير.

 

a)     فردلرين، تشکيلاتين سياستلرى و گؤستريشلريندن تبعيت ائتمه سى

b)    اقليتين (اؤز نظرلرينى قوروماقلا) اکثريتدن تبعيت ائتمه سى

c)     تشکيلاتين بوتون رهبرليک اورقانلارينين آشاغيدان يوخارييا قدر،سئچيلمه سى

d)    تشکيلاتين بوتون اورقانلارينين يئرلى و داخيلى اوموراتيندا موختاريتلرى

e)     آشاغيدان يوخارى اورقانلارا و يوخاريدان آشاغى اورقانلارا نوبتى حسابات (گوزاريش) وئرمه

f)      آذربايجان فدرال- دموکرات حرکاتيندا فراکسيون قورماق آزاد دير.آنجاق، اکثريت تشکيلات آدينى داشى يير و اقليت (لر) اؤز نظرينى (لرينى) اقليت (لر) نظرى کيمى يايماق حوقوقونا ماليکدير.

 

تبصيره: فراکسيونلارين عومومى فيکير و باخيشلارى پلاتفورمون کوللياتى نا و پرنسيپلرينه موغايير اولماماليدير.

 

 

تشکيلاتين استروکتورو

 

٧- جى ماده: قورولتاى، بوتون تشکيلاتين ان يوکسک تصميم توتما اورقانى ساييلر. و ان آزى ايکى ايلدن بير چاغيريلماليدير. تشکيلاتين مرکزى شورا سى، ايکى قورولتاى آراسيندا تشکيلاتى رهبرليک ائدير.مرکزى شورا نين عوضولرى قورولتايدا سئچيلير.

فوق العاده قورولتاى، ايجراييه هئياتى نين يا مرکزى شورا نين تشبوثو ايله ،و يا عوضولرين اوچده بيريسى نين ايسته ديگينه گؤره حد اکثر اوچ آى ايچينده قورولماليدير.

 

تبصيره: قورولتاى، قورولتايا سئچيلن نوماينده لرين ياريسيندان چوخونون ايشتيراک ائتمه سيله رسمى ساييلير.

 

٨- جى ماده: بوتون رهبرليک اورقانلارى گيزلى سس وئرمه يوليله سئچيليرلر. رهبرليک اورقانلارينا کانديد اولانلار، ايجلاسدا حاضير اولان عوضولرين ياريسيندان چوخونون سسى ايله سئچيله بيليرلر.

 

٩- جو ماده: سئچگى اؤلچولرى، بوتون سئچگيلرده، قادينلارين خئيرينه يؤنلديلمه ليدير

تبصيره: قادينلارين سئچيلمه سى خئيرينه يؤنلديلمش اؤلچولر سئچگى آئين نامه سينده (قوراللاريندا) آچيقلانير.

 

١٠- جو ماده: بوتون تصميملر و قرارلار ا يجماع ايله و نهايتده موطلق سس چوخونلوغو (ياريدان بير سس يوخارى) ايله تصويب اولوب و رسميت تاپير.

 

١١- جى ماده: قورولتايين ايختيياراتى

a.      مرکزى شورا نين حساباتينى (گوزاريشينى) دينله مک و بررسليک ائتمک

b.     تشکيلاتين پلاتفورمونو (پروقرامينى) و نيظامنامه سينى يئنيدن گؤزدن گئچيرمک و گرکن ايصلاحات آپاريلاندان سونرا تصويب ائتمک

c.     تشکيلاتين موختليف عرصه لرده کى خط مشيينى موعينلشديرمک و تشکيلاتلانمايا عاييد اولان مساله لرين ان اؤنملى سى حقينده تصميم توتماق

d.     مرکزى شورا نين اصلى و مشورتچى عوضولرينى سئچمک

e.      تفتيش کوميته سينى سئچمک

 

 

مرکزى شورا

١٢-جى ماده: مرکزى شورا ايکى قورولتاى آراسيندا تشکيلاتى رهبرليک ائدير

 

١٣- جو ماده: مرکزى شورا نين وظيفه لرى و ايختيياراتى:

a)     قورولتايين آلديغى قرارلارين يئرينه يئتيريلمه سى نين مسولو و جاوابدهى دير

b)    تشکيلاتين بوتؤونون موختليف ساحه لرده کى ايشلرينه رهبرليک ائديب و اونون يئرلى تشکيلاتلارينين ايشلرينه کؤرديناچيليق ائتمک

c)     موختليف قوروملارين (اينستيتوتلارين)، قورولوشلارين و تشکيلاتلارين يانيندا آذربايجان فدرال- دموکرات حرکاتى نى نوماينده ليک ائتمک

 

١۴- جو ماده: مرکزى شورا نين عومومى ايجلاسى (ان آزى آلتى آيدان بير) و فوق العاده ايجلاسى ايجراييه هئياتى نين چاغيريشى ايله يا شورا عوضولرينين اکثريتى نين ايسته مه سى ايله قورولور.

 

١۵- جى ماده: مرکزى شورا، شورا عوضولرينين آراسيندان گيزلى سس وئرمه يوليله ايجراييه هئياتى نين عوضولرينى و بير نفر ايجراييه هئياتى نين مسولونو سئچير. بو دا ايکى ايجلاسين آراسيندا مرکزى شورا نين ايشلرينى قاباغا آپاريب و کوورديناچيليق ائدير.

 

١۶- جى ماده: مرکزى شورا نين قرارلارينين عملده حياتا کئچيريلمه سى نين مسوليتى ايجراييه هئياتى نين بوينوندادير

 

١٧-جى ماده: مرکزى شورا آلتى آيدان بير اؤز ايشلرينين حساباتينى تشکيلاتا وئرمه ليدير

 

 

قورولوشون مالى منبعلرى


١٨-جى ماده: قورولوشون مالى احتياجلارى، عوضويت حقلرى، طرفدارلارين و عوضولرين مالى يارديمى، و اينتيفاعى ايشلردن تامين اولونور

 

آذربايجان فدرال- دموکرات حرکاتى