آذربايجان فدرال دموكرات حرکاتى، ايران ايسلام جومهوريتينين

آنتي آذربايجان سياستلريني محكوم ائدير!

آذربايجان فدرال دموكرات حرکاتى بازار گونو 6 فورال تاريخينده، آفي نين (ايسوئچ آذربايجان فدراسيونونون)، استوكهولمدا، ايران سفيرليگي قارشيسيندا دعوت ائتديگي نوماييشدن حيمايت ائدير.

آذربايجان فدرال دموكرات حركاتي، ايران رژيمينين 35 ميليون گونئي آذربايجان توركونه قارشى راسيستي سياست اعمال ائتمهسي و همن سياستين، خاريجي دوامي اولاراق، آذربايجان جومهوريتينه قارشي فاناتيسم و ترور صادر ائتمك سياستيني محكوم ائدير. ايران ايسلام جومهوريتي قوزئي آذربايجانين ايكينجي جومهوريتينين يارانديغي گوندن بري، دونيانين دؤرد گوشهسينده ياشايان آذربايجانليلارين اوميد و آرزولاريني اؤزونه جلب ائتميش بو گنج و ميللي وارليغيميزا قارشي هر بير تخريبات و غير انساني ايشه ال وورموشدور. آذربايجانا حربي هوجوم ائتميش ائرمنى قوشونلارينى سيلاح و ياناجاقلا تأمين ائتمكدن توتموش، خزرده آذربايجانا قارشي هده قورخو گلمك و آذربايجان اهاليسي آراسيندا ديني فاناتيسمين تبليغي و كور تروريسم صادير ائتمک كيمي ايشلر، ايران رژيمينين بو چيرکين عمللري سياهيسينا داخيلدير.

 

آذربايجان فدرال دموكرات حركاتي، آذربايجانين قوزئينده موستقيل آذربايجان جومهوريتينين سكولار دؤولت قورلوشونو، بو جومهوريتده اعدام جزاسينين لغو اولماسيني و بوتون آذربايجان وطنداشلارينين بيرگه امكلرينين نتيجهسي اولان ايستقلاليت و دؤولتچيليييني دستكلهيير. بللى اولدوغو کيمى قوزئي آذربايجانين ايكي عصره ياخين روس اسارتينده اولماسى و 70 ايل دمير پرده آرخاسيندا مجبوس ساخلانماسي، گونئي له قوزئي آراسيندا يادليغا سبب اولا بيلمهميشدير. آيدين دير کى، اؤز حاكميتيني اعدام، ترور، جينايت و ديني فاناتيسم اساسيندا قوروموش ايران رژيميده بئله بير يادليق يارادا بيلمهيه جكدير.

آذربايجان فدرال دموكرات حرکاتى ايران اسلام جومهوريتينين اؤز وطنداشلاريني دسته-دسته اعدام ائديب، 35 ميليون گونئي آذربايجانلييا ديوان توتماسيني و قونشو آذربايجان جومهوريتتينه ترور و ديني فاناتيسم صادير ائتمه سيني محكوم ائدير و بو چيركين سياستلره اعتراض مقصديله كئچيريلن نوماييشلردن و ايلك نؤوبهده آذربايجان ايسوئچ فدراسيونونون بازار گونو 6 فورال تاريخينده استوكهولمدا ايران سفيرليگي قارشيسيندا دعوت ائتديگي نوماييشدن حيمايت ائدير.

ياشاسين آزاد و دموكراتيك آذربايجان

آذربايجان فدرال دموكرات حركاتينين ايجرائيه هيئتي

3 فئورال 2011