قوروجولار قورولتايى نين تصويب ائتديگى

"آذربايجان فدرال- دموکرات حرکاتى"نين پلاتفورمو

اؤن سؤز:

 

سياسى حاکيميت خلقين دانيلماز حقى ساييلير و اونون صاحيبى خلقدير! چوخ ميلتلى بير اؤلکه ده دموکراسينى، ميلتلرين اؤز موقدراتينى تعيين ائتمک حقينى و ميلتلرين برابر حوقوقلوغونو قبول ائتمه دن، خلقين حقيقى حاکيميتى هئچ زامان دوغرولماز!

بيزيم آماجيميز ايراندا دموکراسى و فدرال جومهوريت تاسيس ائتمک اوچون ايران تورکلرينين فدراتيو دؤولتينى (آذربايجان خلقى نين فدرال دؤولتينى و ايران تورکلرينين يئرلى حاکميت اورقانلارينى) قورماقدير.

آذربايجانلى لارين ميلى- آزادليق موباريزه سى مشروطه انقلابى دؤرونده يارانان آذربايجان ميلى مجليسى، ايالت- ويلايت انجومنلريله باشلاميش، شئيخ محمد خيابانى نين رهبرليگى ايله يارانان آزاديستان حؤکومتى، سيد جعفر پيشه ورينين باشچيليغى ايله برپا اولونان آذربايجان ميلى حؤکومتى ايله دوام ائديب، هابئله بهمن انقلابيندا و بوگونه قدر دوام ائدن موباريزه ده منعکس اولونوبدور.

امپرياليستلرين رضاخانين اليله قانوني مشروطه دؤولتى علئيهينه ائتديکلرى کودتادان سونرا، ايراندا غئيرفارس ميلتلرين حقينده شيدتلى آسيملاسيون (اريتمه) سياستى اعمال اولونوب و فارس ديلى اساسيندا واحيد ميلت ياراتماق تشبوثى رسمى دؤولت سياستينه چئوريليبدير. بو سياست بهمن انقلابيندان سونراکى دؤورده ده دوام ائديبدير. آنجاق آذربايجانليلارين ميلى موباريزه سى هر ايکى دؤورده موختليف شرايطده و شکيللرده اؤز يولونو آچيب و ايره لى گئديبدير.

ايران ايسلام جومهوريتى بير دينچى ايدئولوژيک دؤولتين قورماسيله بوتون ايرانليلارى قارا و تايى تاپيلماز ايستيبداد و بوغونتويا محکوم ائديبدير.

ايسلام جومهوريتى، ايش باشينا گلندن فارس اولمايان ميلتلرين او جومله دن تورکلرين اوزرينده پهلويلرين دئوريلميش شاهليق رژيمى نين يوروتدوگو تبعيض و آسيميلاسيون سياستى نين دوامچيسى کيمى اولوبدور. آشيرى فارس ناسيوناليزمى و شوونيزمى، حاکيميتين يوروتدوگو عومومى سياستين آيريلماز ترکيب حيصه سي اولدوغونا گؤره، بوسياستين علئيهينه موباريزه آپارماق اؤز نؤوبه سينده ايسلامى جومهوريتين علئيهينه آپاريلان موباريزه نين آيريلماز حيصه سى ساييلير.

 

غئير فارس ميلتلرين ميلى حقلرينى تاپدالاماقدا ايسلامى حاکيميت ايله ايش بيرليگى آپاران اوپوزيسيونون شوونيستى و پان ايرانيستى (فارس محورليک و آريا پرستليک) باخيشلارى ايله موباريزه ائتمک ده اونودولماماليدير.

جينسى آپارتايد و قادينلارين تاپدانيلماسى و تحقيرائديلمه سى ايسلامى جومهوريتين دونيا گؤروشونون تمل داشلارينداندير.

ايسلام جومهوريتى زحمت آداملارينين و امک حقى ايله ياشايانلارين دوشمنى و قدرت و ثروت مافياسى نين حيمايه چيسى و مودافيعه چيسى دير. تورک ميلتى نين اوزرينده اعمال اولونان ميلى ظولمى محو ائتمک، تورک تورپاقلارينين و بؤلگه لرينين هر جهتدن و خوصوصيله اقتيصادى باخيمدان گئريده ساخلانيلماسينا سون قويماق، و هابئله ميلى ظولوم بويوندوروغو آلتيندا ياشايان باشقا ميلتلرين آزاد اولونماسى و ايراند ياشايان بوتون ميلتلره برابر ايمکانات ياراتماق اوچون، جينسى آپارتايدا و قادينلارين تاپدانماسينا سون قويماق و زحمت آداملارينين حقينده اعمال اولونان ساناگلمز عدالتسيزليکلرى آرادان آپارماغا گؤره، آذربايجان فدرال- دموکرات حرکاتى اؤزونون عومومى سياسى پلاتفورمونو ايره لى سورور.

 

 

عومومى پرينسيپلر

 

١- ايران اؤلکه سى: ايران چوخ ميلتلى بير اؤلکه دير. بو اؤلکه ده ياشايان ميلتلرين باشليجاسى بونلاردان عيبارتديرلر: تورک ميلتى، فارس ميلتى، کورد ميلتى، عرب ميلتى، بلوچ ميلتى و تورکمن ميلتى. پهلويلر و ايسلام جومهوريتى دؤرلرينده فارس ميلتى نين آشيرى ناسيوناليزمينى و شوينيزمينى نوماينده ليک ائدن و آپاريجيسى اولان مرکزى حؤکومتلر ايراندا ياشايان باشقا ميلتلره ميلى ظولم و ميلى اريتمه (آسيملاسيون) سياستينى تحميل ائديبلر.

 

٢- ميلى کيمليک و هويت: تورک ديلى (آذربايجان تورکجه سى) ايران تورکلرينين ميلى کيمليگى نين ايچ اؤزه گى و تمل داشيدير.

 

٣- ميلى مساله و حاکميت مساله سي: ميلى مساله و او جومله دن ايران تورکلرينين مساله سى اصلينده سياسى بير مساله دير. اونون حلى و ميلى ظولمون آرادان آپاريلماسى ميلتلرين اؤز موقدراتينى تعيين ائتمک حقى نين تامين ائديلمه سى ايله مومکوندور. بو يولدا بوگون اساس مانع ايسلام جومهوريتيدير.

 

۴- ايراندا فدرا ل و دموکراتيک بير جومهوريت تاسيس ائتمک و ايران تورکلرينين فدرال جومهوريتينى ياراتماق اوغروندا، اجتيماعى عدالت، دموکراسى، بوتون وطنداشلارا و ميليتلره سياسى حوقوق برابرليگينى تامين ائتمک، جينسى آپارتايدين لغو ائديلمه سى، هابئله اينسان حقلرى يولوندا موباريزه آپارماق، آذربايجان فدرال- دموکرات.حرکاتينا بير اصل ساييلير.

 

ايران فدرال جومهوريتى و ايران تورکلرينين فدرال دؤولتي

 

١- ايران فدرال جومهوريتى: دموکراتيک اساسلار اوزره ميلى (اتنيک) فدراليستى قورولوش اساسيندا او جومله دن ايکى پارلامئنتلى ليق پرينسیپى اساسيندا- ايراندا ياشايان ميلتلرين فدرال دؤولتلرى، خودموختار بؤلگه لرين دؤولتلرينين و اؤزل شهرتهرانين حاکيميتى نين آزاد و کؤنوللوجه سينه بيرلشمه سيندن يارانيلماليدير!

 

٢- تورکلرين يئرلى حاکيميتى، آذربايجانين تاريخى اراضى سينده (تورکلرين تاريخن بيتيشيک شکيلده ياشاديقلارى تورپاقلاردا) يارانيلماليدير. عئين حالدا خوراسان تورکلرى و ايرانين جنوبوندا يئرلشن تورکلر وقاشقايى تورکلرى يئرلى حاکيميتلر ياراتماق حقينه ماليک اولماليديرلار!

 

٣- آذربايجانين يئرلى حاکيميتى حقينده: قانون وئريجى ليک، محکمه و قضاييه، انتظامات، اقتيصاديات، ايرتيباطات، وئرگى،ياشام موحيطى، ايدارى و کولتورل ايشلر آذربايجانين يئرلى حاکيميتى نين عؤهده سينده دير. آذربايجانين يئرلى حاکيميتى، آذربايجانين اساسی قانونو چرچيوه سينده يارانان يئرلى پارلامئنت، قضاييه قووه سى و دؤولتدن عيبارتدير و ميلى سورود و پرچم قوللانماق حقينه ماليک اولماليدير!

 

۴- خوراسان تورکلرى و ايرانين جنوبوندا ياشايان تورکلر وقاشقايى تورکلرى حقينده: خوراسان، قاشقايى و ايرانين جنوبو تورکلرى، ميلى ايستکلرينى حياتا کئچيرمک اوچون ايسته ديکلرى صلاحيتلى حاکيميت اورقانلارينى ياراتماق حقينه ماليک اولماليديرلار!

 

۵- خاريجى سياست ايشلرى، خاريجى تجاووز قارشيسيندا مودافيعه، اوزون وعده لى ایقتیصادى سياستلر و پلانلارين تنظيماتى، اؤلکه نين پول سيستمى، هابئله ايرتيباطات اوموراتى و ياشام موحيطى مرکزى فدرال حاکيميتى نين ایختياراتينداندير. يئرلى فدرال دؤولتلرين ايشينه تاثير قويان تصميملر يئرلى دؤولتلرين و پارلمانلارين تصويبينه يئتيشمه ليدير. عوموميتله تورک ميلتى نين منافعى ايله ايليشگيسى اولان بوتون قرارلار و تصميملرآذربايجان فدرال دؤولتى و پارلمانتى ايله هابئله خودموختار تورک بؤلگه لرينين حاکيميتلريله مشورتلشمه و آنلاشمادان سونرا حل و فصل اولونوب واونلارين تصويبينه يئتيشمه ليدير.

 

۶- تورک، فارس، کورد، عرب، بلوچ و تورکمن ديللرى ايرانين رسمى دؤولت ديللرى اولماليديرلار. ايران فدرال دؤولتى نين بوتون سندلرى ايرانين رسمى ديللرينده تنظيم اولماليدير. تورک ديلى (آذربايجان تورکجه سى) رسمى دؤولت ديلى اولاراق آذربايجانين و خودموختار تورک بؤلگه لرينين بوتون دؤولت اورقانلاريندا، سندلرينده، مکتبلرينده، عالى تحصيل اوجاقلاريندا، کولتور، اينجه صنعت و مديا واسيطه لرينده ايشله نيلمه ليدير.

 

٧- تهران اوزل شهر اولاراق، اوردا ياشايان اهالى نين ميلى-مدنى حاقلارينى تامين ائدن و اؤزونه مخصوص اولان حاکيميت اورقانلارى واسيطه سيله ايداره اولونماليدير! بوتون ايرانين ضررينه تهراندا جريان ائدن مرکزلشمه خطينى دايانديريب، ايراندا هارمونيک و موتعاديل سياسى- ایقتیصادى و ایجتيماعى- اينسانى اينکيشافى تامين ائتمک اوچون اوزون مودتلى پلانلار ايجرا اولونماليدير.

 

٨- فدرال دؤولتلرينين ايچريسينده يئرلشن ايکى ديللى و نئچه ديللى شهرلرده و بؤلگه لرده، بوتون حاکميت و ايجراييه اورقانلارى دموکراتيک پرنسيپلر اوزره ديلداش توپلوملارين سايى ايله اويغون سئچيلمه ليدير و ايش بؤلگوسو ده بو اساسدا اولماليدير.

 

آماجلاريميز

 

١- بوتون وطنداشلار، اونلارين جنسيت، دين، سياسى مرام و اجتيماعى مؤقعلريندن آسيلى اولماياراق، قانون قارشيسيندا برابرديرلر. هر بير وطنداش ايسته ديگى شخصى حيات طرزينى سئچمک حقينه ماليک دير. اونلارين اجتيماعى، دينى و سياسى شخصيتلرى،- فرديت بوتؤولوکلرى integritete- حاکيميت و حاکيميته منسوب اولان اورقانلارين قارشيسيندا توخونولمازدير.

 

٢- مودرن و دموکراتيک فدرال بير دؤولت کيمى، بوتون صلاحيتلى اورقانلار دين، مرام- مسلک، جنسيت و ميليتيندن آسيلى اولماياراق 18 ياشا دولموش بوتون وطنداشلارين گيزلى و مستقيم سس وئرمه لريله سئچيلمه ليديرلر!

 

٣- پولوراليزم و مرام-مسلک و عقيده آزادليغى بوتؤولوکله حياتا کئچيريلمه ليدير. ييغيناجاق، سؤز، درگى، مطبوعات و اينفورماسيانين ياييلماسى نين آزادليغى، بوتون سياسى- اجتيماعى و مدنى قورولوشلارين، درنک و تشکيلاتلارين فعاليت آزادليغى تامين ائديلمه ليدير. بوتون وطنداشلارين او جومله دن ايشچيلرين، زحمت آداملارينين امک حقى ايله ياشايانلارين سينديکالارينين، شورالارينين، صينفى و سياسى فعاليتلرينين آزادليغى قئيد- شرطسيز قورونماليدير!

 

۴- دؤولتين هر بير ديندن و ايدئولوژيدن ايستيقلالى: دين و مرام- مسلک اينسانلارين خوصوصى اموراتينداندير و بوتون اينسانلار دينه اينانيب-اينانماماقدا، بير مرام- مسلکه صاحيب اولوب- اولماماقدا آزادديرلار. بوتون مذهب صاحيبلرى اؤز مذهبلرينين دیلرينى و مراسيمينى قانون چرچيوه سينده ايجرا ائتمکده آزاد ديرلار. دين و مرام- مسلک اؤلکه نين تعليم- تربيه سيستميندن و دؤولتدن تماميله آيرى اولماليدير!

 

۵- قادينلارلا کيشيلرين حوقوق برابرليگى بوتون سياسى-ایجتيماعى و ایقتیصادى ساحه لرده تامين ائديلمه ليدير. بوتون حاکيميت اورقانلاريندا قادينلارين ايشتيراکى، اونلارين نوفوسونون سايى ايله موتناسيب اولماليدير! گئرچک حياتدا موجود اولان برابرسيزليگى آرادان قالديرماق اوچون لازيمى تدبيرلر، او جومله دن قادينلارين خئيرينه موثبت تبعيض حياتا کئچيريلمه ليدير! زحمتکش عايله لره منسوب اولان قادينلارين گليشمه سى اوچون الوئريشلى شرايط يارانمالى و بوتون قادينلارين موستقيل اولاراق تشکيلاتلانمالاريندان حيمايت اولونماليدير!

 

۶- دوققوزونجو درس ايلى نين سونونا دک پولسوز و ايجبارى تعليم-تربيه سيستمى قورولماليدير. کيمسه نى آيرى سئچمه‌دن بوتون وطنداشلارى علم اساسيندا قورولموش قاباقجيل تعليم-تربيه سيستمى ايله تامين ائتمه لى، ساوادسيزليغى آرادان قالديرماغا گؤره، ياشليلارين ساوادلانماسى اوچون آيريجا مکتب و صنعت ائولرى آچيلمالى و اونلارا مادى يارديم و الوئريشلى تحصيل شرايطى ياراديلماليدير. عئين زاماندا عالى تحصيلاتين پولسوز شکيلده گئنيشلنمه سى اوچون هرطرفلى شرايط حاضيرلانماليدير!

 

٧- ایجتيماعى عدالتين گئنيشلنديريلمه سى و بوتون ايشچيلرين، زحمت آداملارينين و امک حقى ايله ياشايانلارين آجيناجاقلى ياشاييش شرايطى نين ياخشيلاشديريلماسى، بهداشت، تعليم- تربيه و اجتيماعى خدماتين بوتون وطنداشلاراوچون تامين ائديلمه سى يولوندا چاليشمالى و ايشسيزليک و طيبى خدمات بيمه لرى حياتا کئچيريلمه ليدير!

 

٨- عومومون ريفاهينى قوروماق اوچون ایجتيماعى بيمه سيستمى ياراديلمالى، وطنداشلارين قازانجلارينين اؤلچوسو ايله موناسيب وئرگى اؤده مه لرى تشکيل ائديلمه لى و گلير، مولکيت و ارث اوزرينده موتناسيب وئرگى سيستمى قورولماليدير!

 

٩- اون آلتى (١۶) ياشا دولماميش اوشاقلارين ايش قووه سى کيمى ايشله ديلمه سى قاداغان ائديلمه ليدير. گنجلرين و يئنى يئتمه لرين موعاصير دؤرون ايستکلرينه موافق بويا- باشا چاتيب، تعليم آلييب، بسلنمه لرينه گؤره، اونلارى ايدمان و ساغلام اگلنجه لرله تامين ائتمه لى. کولتور و اينجه صنعتين چيچکلنمه سينه و انکشافينا الوئريشلى ايمکانلار ياراديلماليدير. قزئتلرين و درگيلرين، عومومى کيتاب ائولرى نين آچيلماسينا و مدنيت اوجاقلارينين گئنيشلنديريلمه سينه تدبيرلر تؤکولمه ليدير. بير سؤزله دئسک بوتون وطنداشلارا و خوصوصيله زحمتکش عايله لره منسوب اولان گنجلر اوچون تکنولوژى و اينفورماسيانين نائيليتلريندن فايدالانماغا گؤره الويريشلى شرايط يارانماليدير!

 

١٠- ياشام محيطى قورونوب ساغلاملاشديريلماليدير. اوندان جمعيتين اينکيشافى و عومومون ريفاهى يولوندا ايستفاده اولونماليدير!

 

١١- ايراندا ياشايان باشقا ميلتلرله آرخاداشليق و يولداشليق موناسيبتلرى قورولماليدير!

 

١٢- فدرال آذربايجان اؤلکه سينده و خودموختار تورک بؤلگه لرينده ياشايان بوتون ميلى و کولتورل اقليتلرين برابر وطنداشليق حقلرى تامين ائديلمه ليدير!

 

١٣- اينسان حقلرينين قورونماسى بيزيم اساس آماجلاریمیزدان بيريدير. بو اساسدا اوشاقلارين و قادينلارين حقلرينى قورويان بين الخلق کونوانسيونلاردان حمايت ائده رک، اؤلکه ده اعدام جزاسى نين قالديريلماسينى و هر جوره شيکنجه نين لغو اولماسينى ايسته ييريک!

 

١۴--سکسن ايل ميلى ظولوم بويوندوروغو آلتيندا عؤمور سوردوکدن سونرا، خوصوصيله ايسلام جومهوريتى نين بيله رک اعمال ائتديگى آيرى سئچگيليک نتيجه سينده، آذربايجان ایقتيصادياتى، سرمايا ايشه سالينماسى نين آزالماسى، سرمايا قاچقينليغى و باجاريقلى امک قووه لرينين گئنيش شکيلده آذربايجاندان کؤچمه سينه دوچار ائديليب و ایقتيصادى و ایجتيماعى باخيمدان هرطرفلى گئريده قالماغا محکوم اولوبدور. بونا گؤره آذربايجان ایقتيصادياتى نين گليشديرمه سى و اينکيشافى آذربايجان فدرال دؤولتى نين و ايران فدرال دؤولتى نين ایقتيصادى پلانلاريندا اوستونلوک قازانماليدير.

 

بو مقصده چاتماغا گؤره، آذربايجان فدرال دؤولتى نين باشليجا وظيفه سى علمين نايليتلرينه داياناراق، ایقتيصادى محصولدارليغى ياخشيلاشديرماق، و رقابت عرصه سينده گوجلنديرمک ايله باجاريقلى امک قووه سينى گليشديريب، تعليمات وئرمکله ايستروکتور باخيميندان مودرنلشديرمک و سرمايا جذب ائتمک اوچون لازيمى تمل قوروملارى ياراتماقدير.

 

 

١۵-بيز خاريجى دؤولتلرين هربير نيظامى موداخيله سينه و هوجومونا موخاليفيک. ايراندا ياشايان ميلتلرين و وطنداشلارين آزاد ايراده سى يئرينه، خاريجى قووه لرين آلترناتيو قوراشديرماغا جان آتمالارينى و بيگانه ال آلتى لارينين سياسى قودرت باشينا گتيريلمه سينى ضيد دموکراتيک و ايرتيجاعى بير ايش ساييب و رد ائديريک.

يوخاريدا قئيد اولونان آماجلار، يالنيزايران تورکلرى نين بيرگه موباريزه سى ايله و ايراندا ياشايان ديگر ميلتلرله بيرليکده، حياتا کئچيريله بيلر.

 

www.achiq.info

www.achiq.com

www.achiq.org

achiqnet@yahoo.se