آذربايجان فدرال دموکرات حرکاتى نين اوچونجو قورولتايى نين تشکيلى

آذربايجان فدرال دموکرات حرکاتى نين اوچونجو نٶوبتى قورولتايى 2009 جو ايلين آقوست آيى نين سککيز و دوققوزوندا ٬ ايرانين اونونجو جومهور رئيسى سئچيملرى سونراسى٬ حاکيم رژيمين علئيهينه باش قالديران اعتيراض و سيويل ايطاعتسيزليک حرکاتى نين يوکسليشى نين توفانلى گونلرينده تشکيل تاپدى.

قورولتاى آذربايجان ميلى سورودو ايله باشلاندى.

آقاى هدايت سلطانزاده قورولتايين رييسه هئياتى (هدايت سلطانزاده٬ سيف الدين حاتملويى و حسين انور حقيقى) طرفيندن ايجلاسى آچيب٬آذربايجان ميلى حرکاتى نين و ايراندا گئدن اعتيراض حرکاتى نين شهيدلرى خاطيرينه بير دقيقه سوکوت اعلام ائتديکدن سونرا٬ ايشتيراکچيلارا خوش گلدين دئييب و اوستاد محمد على فرزانه دن ياد ائدرک دئدى: اوستاد نه تکجه آذربايجان فدرال دموکرات حرکاتى نين قوروجولاريندان اولوب بلکه محمدرضا شاهين و ايسلام جومهوريتى نين دیکتاتورلوقلاريندا آذربايجان کولتورونون و تورکجه سى نين دوزگون خاديملريندن و ميلى حقلرى الده ائتمک اوغروندا گورکملى موباريزلردن بيرى اولوبدور. خاطيره سی ابدی قالسین!

سونرا محمد آزادگر آذربايجان فدرال دموکرات حرکاتى نين ايکينجى و اوچونجو قورولتايلار آراسينداکى ايشلرينين حساباتينى وئريب٬ تشکيلات عوضولرينين و طرفدارلارينين موختليف ساحه لرده کى فعاليتلرينه ايشاره ائتدى. يولداشيميز آ.ف.د.ح.نين آيدين آچيق پلاتفورمايا و سياسى خطه صاحيب اولان يئتگين بير تشکيلات اولماسينى ووورغولادى.او سٶزونون دواميندا دئدى: آ.ف.د.ح.مظلوم ميلتلره منسوب اولان سياسى تشکيلاتلارين ايچينده يوکسک معنوى اعتيبارا ماليکدير. عوضولرين و طرفدارلارين سياسى و تشکيلاتى تجروبه لرى و معنوى اعتيبارى اولمادان صداقت و صميميتله فعاليت ائتمه دن بو نائليتلرى قازانماق اولمازدى.

حساباتين باشقا بٶلومونده تشکيلاتين چاتيشمازليقلارينا ايشاره ائده رک دئدى: بيز هله بوتون يولداشلاريميزين باجاريقلاريندان و تشکيلاتيميزين مٶوجود ايمکانلاريندان يئترينجه ايستيفاده ائده بيلمه ميشيک. بيزيم٬ تشکيلات ،ايرتيباطات و تبليغات ساحه لرينده جيدى چاتيشمازليقلاريميز واردير. بیرینجی گوندن قادينلار مساله سى حقده حساسيت گٶسترمه ميزه٬ پلاتفورمادا بوناگٶره بير نئچه بند آييرماغيميزا و سياسى دوروملاريميزدا قادين مساله سى نين قابارديلماسينا باخماياراق٬ بو مساله يه عاييد اولان فعاليتلريميزدن هله راضى دئييليک.

قورولتاى حساباتا جيديت و مسوليتله ياناشيب٬ موذاکيره ائتدى و ايشلرين ياخشيلاشماسينا گٶره تاپشيريقلار وئردى. وئريلن تاپشيريقلار قورولتايين ایشینده وقرارلاریندا نظرده آليندى.

قورولتاى اٶز ايشي نين دواميندا٬ايجرائيه هئياتى نين حاضيرلاديقى سندلرى موذاکيره ائتدى. بيرينجى نٶوبه ده اونونجو دٶور جومهور رييسليگى سئچيميندن سونرا ايران ايسلام جومهوريتى و آذربايجان ميلى حرکتى و ايرانين ايسلامى رژيمى نين بٶحرانى باشليقلارى آلتيندا وئريلن سندلر يئترلى موذاکيره دن سونرا قورولتايدا سئچيلن آيريجا کوميسيونلارا گٶندريلدى.ايکى کوميسيون قورولتايين تکليفلرينى و تاپشيريقلارينى سندلره کئچيرندن سونرا سندلر نشر اولوناجاقدير.

بونلاردان عللاوه:

قورولتاى قادينلار و گنجلر حقينده ايکى قطعنامه تصويب ائتدى.

گئچن ایل آذربایجان فدرال دموکرات حرکاتی نین گئنيش پلئنوموندا تصويب اولونموش ائتيلافلار حقينده کى سند يئنيدن تصديق اولوب و اونون حياتا کئچيريلمه سينه گٶره قرار آليندى.

مظلوم ميلتلرين تشکيلاتلارى ايله امکداشليق: آذربايجان فدرال دموکرات حرکاتى٬ کنگر مليتهاى ايران فدرال تشکيلاتيندا ناظير کيمى ايشتيراک ائديردى. قورولتايين وئرديگى قرار اساسيندا آذربايجان فدرال دموکرات حرکاتى اٶز ايشتيراکينى کنگره ملیتهای ایران فدرال دا عوضو سوييه سينه قدر يوکسلده جکدير.

قورولتاى قادينلار٬ ايرتيباطات٬ ترويج و تبليغات کوميسيونلارينى سئچدى.

 

اوچونجی قورولتاى مرکزى شورانى سئچيب ومرکزی شورا دا گيزلى سس ايله٬ محمد آزادگر محمد رضا الاردبیلی حسین انور حقیقی - هدایت سلطات زاده صدیقه عدالتی- علی قره جه لو . علیرضا قزوينى (اردبیلی) يولداشلاردان عيبارت يئددى نفرليک ايجراييه هئياتى نين عوضولرينى سئچدى. قورولتاى آذربايجان ميلى سورودو ايله اٶز ايشينى بيتيردى.

ايجراييه هئياتى اٶزونون ايلک ايجلاسيندا محمد آزادگر يولداشى آ.ف.د.ح. نين ايجراييه هئياتى نين مسولو کيمى سئچدى.