خانیم سکینه محمدی آشتیانی نین داشلاما حؤکمو موناسیبتییله آذربایجان فدرال دموکرات حرکاتینین بیلدیریشی

ایسلام جومهوریتی نین وحشی یانا حؤکملرینه سون وئریلمه لیدیر!

سکینه محمدی آشتیانی 84 ایلیندن بو یانا زینا و حایات یولداشی نی اؤلدورمه ایتتیهامیلا تبریز زیندانیندا حبسدیر. خانیم آشتیانی نین85 ایلینده بو جینایتی ایشله دیگینه داییر یئترلی مدرک اولمادیغی ایچین تکلیفسیز قالیبدیر. اما آذربایجانین کیفری دادگاهینین آلتینجی شعبه سی ائولیلیق دیشی جینسل ایلیشکی ایتتیهامییلا اونو 99 شالاق ضربه سینه و داشلانما جزاسینا چاتتیردی. بو حؤکم اؤلکه نین عالی دیوانینین طرفیندن ده تأیید اولوندی و گلجک گونلر ایچینده بو اینسانلیق دیشی حؤکم ایجرا اولوناجاقدیر.

خانیم سکنینه آشتیانی نین مودافیعه وکیلی نین آچیقلامالارینا گؤره:

خانیم محمدی آشتیانی چوخ گنج یاشدا ائولنمیشدیر. حایات یولداشییلا بویوک چتینلیکلر ایچینده ایمیش و عائله لری نین مادی سیخینتیلاری وارمیش. بو آرادا ایکی کیشی ایله ایلیشکی قوروبدور اما زینا ایشلنمه میشدیر. بونا گؤره ده خانیم آشتیانی یاخالانیب و دادگاه حؤکمویله 100شالاق جزاسینا چاتدیریلیبدیر. شالاق جزاسی نین ایجراسیندان سونرا اونون حایات یولداشی اؤلدورولوبدور. بوندان سونرا خانیم آشتیانی یه باشقا بیر جینایی دوسیا آچیلیب و بو اساسدا اونو مجبور ائتمیشلر کی باشقا کیشیلرله زینا ائتدیگینه داییر اعتراف ائتسین. حالبوکی او دادگاهدا دفعه لرله بو اعترافی تکذیب ائدیب و بو اعترافین زورلا اوندان آلیندیغینی تأکیدأ سؤیله میشدیر.

ایسلام جمهوریتینین تملی انسان حقلرینی گوبود جاسینا پوزماق، یانی بو دینی حکومت زیندان، تجاووز، اعدام و داشلاما اوزرینده قورولوبدور. بو داشلاما واعدام حؤکملری انسانین شأنیندن اوزاق و محض بربریتدیر.بئلنجی حؤکم لر آچیقجاسینا انسان لارین یاشاماق حاقینا وبوتون انسان حاقلاری قورالارینا قارشی دیر.آذربایجان تورکلری آیشکنجه یه ، اعداما وداشلامایا قارشی دیرلار وبئلنجی وحشیلیکلردن مونزجیردیر لر.

آذربایجان فدرال دمکرات حرکاتی ایسلام جومهوریتی نین قضایی قووه سی نین بواینسانلیق دیشی و وحشی یانا حؤکمونو محکوم ائدیر و بوتون اینسان سئور وطنداشلاری و ایرانلی ، آذربایجانلی و اولوسلارآراسی اینسان حاقلاری اورقانیزاسیونلاری بو حؤکمه قارشی اعتراض ائتمه یه و داشلاما حؤکمونودوردورماغا چاغیریر.

آذربایجان فدرال دموکرات حرکاتی

07.07.2010