باتي آذربايجاني هدهلهين اكولوژي فاجيعهيه اعتيراض آكسيالاريندان حيمايت ائديريك!

اورمو گؤلونون محو اولماسي ايله گئنيش ميقياسلي بير اكولوژي فاجيعه، باتي آذربايجاني چوخ جيدي بير طرزده هدهلهيير. تهران رئژيمي بوتون ساحهلرده اولدوغو كيمي، بو سوروندا دا سون درجه لياقتسيزليكله عمل ائديب، بؤيوك بير بؤلگهني اكولوژيكي و اينساني فاجيعهايله اوز-اوزه قويماقلا گويا سو بندلري وورماقدا دونيادا ركورد سينديرماق ايستيرميش. بو هوسله تهران رئژيمي مسئوليتسيزليكده يئني بير ركورد وورماقلا، بوتون گليشميش اؤلكهلرده، اكولوژيكي زيانلارينا گؤره سو بندي وورماق پروژهلرينين چوخدان دايانديريلديغي حالدا ، اورموگؤلونو سو ايله تأمين ائدن چايلارين اوستونه بير چوخ حئسابسيز سو بندلري وورماقلا، بو گؤلو و اونونلا برابر آذربايجانين بؤيوك بير حيصهسيني اوچوروما دوغرو آپارير. بئلهلكيله بير چوخ طبيعي فاجيعهلردن فرقلي اولارق، اورمو گؤلونون يئر خريطهسيندن سيلينمهيه سورعتله آپاران فاجيعهنين معماري، طبيعت يوخ، ايران اسلام جمهوريتينين باجاريقسيز و مسئوليتسيز رهبرليگيدير.

 

سون ايللرده گونئي آذربايجان ميللي حركاتي بو حاقدا اؤز ميللي و تاريخي مسئوليتيني دوزگون اولاراق بوينونا آلميش و اورمو گؤلو و گؤلون جواريندا كي اراضينين ياشاماق حقيندن مودافيعه ائتمهني، بير ميللي گؤره‌و كيمي گوندهليكده ساخلاميشدير.  

 تأسسوفله بو اكولوژي و اينساني فاجيعهيه قارشي گئدن موباريزهده ده، آذربايجان يالنيز قالميش و آذربايجان دان قئيدشرطسيز حيمات اومان قوهلر، بو حاقدا آغيزلاريندان مؤهوري گؤتورمهيي هله مصلحت بيلميرلر.

 

آذربايجان فدرال دموكرات حركاتي بو ايل 13 فروردين  /  2 آپريل تاريخينده آذربايجان شهرلرينده تداروك گؤرونن اعتيراض آكسيالاريندان حيمايت ائدير  . آذربايجان فدرال دموكرات حركاتي، وطنداشلاريميزي آذربايجاندا بو آكسيالاردا ايشتيراك ائتمهيه و خاريجده اورموگؤلونو هدهلهين فاجيعه حاقيندا بيلگيلر يايماق و بو حاقدا آذربايجان ميللي حركاتينين سسيني دونيايه چاتديرماغا دعوت ائدير.

ياشاسين آذربايجان!

آذربايجان فدرال دموكرات حركاتىنين اجراييه هئياتى

29 مارت 2011