بالاش آذراوغلو

 

محمد آزادگر 25 آپریل 2011

همیشه بئله دیر. بیزلر (ان آزی بیزیم نسيل ) نیسگیل اوستونه نیسگیل قالاییر. شهریارین دیلی ايله دئسک غم اوستونه غم قالايير. چوخداندیر ایستردیم بالاش حقینده بیر شئی لر یازام. گونو گونه ساتیب گئجیکدیم. ایندی بالاش یوخدور. داها من نه یازا بیلرم؟

من بیرینجی دفعه بالاش ايله اينقيلابدان بیرایل، بیر- ایکی آی سونرا باکیدا آذربایجان دموکرات فرقه سینین دفترینده وسونرا آذربایجانین یازیچی لار جمعیتى‌نین بیناسیندا يئرلشن ايش اوتاغیندا گؤروشدوم. او واخت من قوزئی آذربایجانین کومونیست پارتییاسینین بیرقیسا مدت قوناغی ایدیم.

اينقيلابين اونو جوشدورماسى و اورگينى سئوينجله دولدورماسى گؤزه چارپيردى. اينقلابين حسرتلره سون قويماسينا اينانيردى. بالاش دا، مينلرجه گونئى آذربايجانلى کيمى ميلى حؤکومتين يئنيلمه‌سيندن سونرا قوزئى آذربايجانا موهاجيرت ائتميشدير. ايندى تبريزه دؤنمگه حاضيرلانيردى.

بالاشین شعرلری ایله چوخ اؤنجه دن تانیش ایدیم. حزب توده نین پیک ایران رادیوسونون آذربایجان تورکجه‌سينده‌کى وئريليشلرينده اونون شعرلرینین دئکله‌مه‌سینی اسماعیل بهزادینین سسی ایله ائشیتمیشدیم. او واختلاربیلمزدیم او شعرلر بالاش آذراوغلوندان دير. سونرالار،1340 جى ايللرينين سونلاريندا آذربایجان ژورنالی وادبیات اینجه صنعت هفته لیگینده (باکیدا نشر اولوب تبریزه ده چاتیردی) بالاش، مدینه گولگون و باشقا جنوب شاعرلرينین شعرلری ایله تانیش اولدوم . پیک ايران دان ائشیتدیگیم شعرلرین هانسی سی‌نين بالاشین شعرى اولدوغونو اوندا بيلديم.

او زامانلارحسین محمد زاده صدیق مدینه نین وباشقا جنوب شاعرلرينین شعرلرينى فارس دیلینه چئويرن بيرينجى آداملاردان ايدى.

بالاش آذراوغلی 1921 نجی ایلده باکی دا دونیایا گؤز آچیب و2011 جی ايلین آپریل آییندا باکیدا حیاتلا ویداع لاشدی!

بالاش اوزون عمرونون چوخ آزینی، دئمک بیرقیسا مودتينى گونئی آذربایجاندا اولموش ایدی. وور- توت 8 ایل (1938/ 1946). آنجاق بو قیسا مدت اونون بوتون حیاتینا جدی تاثیر وائتگی بوراخمیشدیر. بالاش آذراوغلو بو باره ده دئميشدير: او منی شاعير ائدیبدیر. اونون شعرلرینده آذزبایجان دموکرات فیرقه سینین آمال وآرزولاری : گونئی آذربایجان تورکونون آزاد وسربست یاشاماسى، ايجتيماعی عدالت و... اساس ايستيقامت داشى‌ییر.

1982 ایل اسلام جمهوریسی ايران توده پارتى سينه هوجوما گئچندن سونرا شورالار اؤلکه سینه پناه آپارديم؛ 1983 جو ایلین دئکابریندا چک اسلاواکی دا ايران توده پارتى سى نين 18جى پلونوموندا یئنی دن گؤروشدوک. بالاش داها یاخشی بیلیردی کی بو تئزلیکده وطنه دؤنه بیلمه‌یه‌جک دير. يئنه ده ایرانین هر گوشه سینده دار آغاچلاری برپا اولموشدی رژیم سیاسی وصینفی تشکیلاتلارا هوجوما گئچمیشدی. او پلونومدا، بیربیریمیزه چوخ یاخین اولوب ودئمک اولار کی، چوخلو مسئله لرده دوشونجه لریمیز اوست اوسته دوشوردو. چک دن گئرى دؤننده بیر نئچه گون ده مسکوادا بیرهوتلده قالدیق. سونرا اوباکى‌یا قايیتدی ومن ایسه مینسک شهرينه (بیلا روس). نئچه آيدان سونرا من باکی‌يا گئتمه‌لی اولدوم. اورادا چوخ سیخ علاقه ده ایدیک. اواینانیردی: هرکسین یوخدور وطنی یوخدور سؤزونونده کسری!

من او سوسیالیستی اؤلکه نی 1986 جی ایلده ترک ائدندن سونرا علاقه‌میز قیریلدی.

2009 جو ايلى نين پاييزيندا- 24 ايلدن سونرا- بیرنئچه گون باکیدا اولدوم .او مدتده چوخ چالیشدیم بالاشی گؤرم، آنجاق گؤره بیلمه دیم. آذربایجان یازیچی لارجمعیتینده گؤروشدوگوموز آداملار اونون دقیق ائو آدرسينى وتيلفونونو تاسوفلرله تاپا بیلمه دیلر. تیلفون نومره سی دئیشیلیب، دئدیلر!

همیشه بئله اولور. نیسگیل اوستونه نیسگیل قالانیر!