تبریزین آخشام یئلی

 

آخشام چاغی شاه گؤلو یولوندا اوزیه ییر حاجی بیگلی آدینا تیکیلن محتشم اپرا تئاتر سا لونوندان یئنیجه چیخمیشدیق. تبریزین سرین آخشام یئلی بیزی گؤل دؤره سین دولاشماغا هوسلندیرمیشدی. صاباح باریشین اوخولدا تورک دیلی سیناقی اولماغینا گؤره ائوه تئز قاییتماغی دوشنوردوک. نه ایسه قیسسا جا دا اولموشسا گزمگه قرار وئردیک. غربتده اولارکن تبریزین یئللی آخشاملارین همیشه اؤزله میشدیک ، سانکی بو جانلاندیریجی یئل بیزی آرتیق اوشاقلیق و ارکن چاغلاریمیزا، اؤز کوکوموزه قایتاریردی. گؤله ساری سوررکن ،ائشیمله بیر آز اؤنجه گؤردویوموز و ائشیتدیگیمیز کؤر اوغلو اوپئراسی حاقدا دانیشیردیق. تبریزین اوپئرا صنعتچی لری هله جاوان و تجربه سیز اولدوغونا باخمایاراق ایجرالارین به یه نمیشدیک ، نه ایسه ائله بودا بیر نئچه ایل اؤنجه تبریزده یوخ ایدی.... بو شیرین خیاللارا دالمیشکن امکداشلارین بیری بیردن ایش اوتاغیمیزا آتیلدی ، اوجا سسله سویلدی : بچه ها یک جوک تازه ترکی باحال.... دوزسوز لطیفه سینه آجی و قورو بیر گولومسه دن سونرا ساعاتا باخدیم ، گئتمک واختی ایدی ائوه گئتمه میش کتاب ائوینه گئتمک ایستردیم . یولوم چوخ اوزون ایدی ، یوغون ترافیک ده یورویه جک اداره سرویسینده هوشلانماقلا یورغونلوغومو آلماق ایستیردیم. "تورکجه انسان آدلاری" کیتابین آلماغا گئدیردیم. تبریزین سرین یئلی یئرینه تهرانین توستولو هاواسی سرویسین آچیق پنجره سیندن اوزومه پوسگوروردو. اوشاق آدینا فیکیرله شیردیم ، باریش آدین چوخ به یه نیرم، آمما ائشیم دئییر کی باریش (Barış) آدینین قالین سسی اولماغینا گؤره فارسلار بو آدی اینجه "ی" ایله (Bariş) چاغیراجاقلار ، اودا صاباح مدرسه ده اؤز آدیندان اوتاناجاق . بیز اؤز وارلیق و کیملیگیمیزه گووه نه رک فارسلارین سیستمینه اویغونلاشیب ، تسلیم اولماغا احتیاجیمیز اولمادیغینا ایناناراق ائشیمله تارتیشمیشدیم. آمما ائشیتدیگیم جاواب بو ایدی : خیال دونیاسیندان چیخ ، سن فارسلارین ایچینده یاشاییرسان! منده آلاجاغیم تورک کتابیندا ائله تورک آدی تاپماق ایستیردیم که یازیق فارسلار اونو دئمگه زورلانماسینلار! اودا اگر "اداره ثبت احوال " منه اذن وئرسه! نه ایسه تبریزین آخشام سرین یئللرین آرزولادیم کی یئنه ده منی خیاللارا آپارسین. باری سرحد سیزخیال دونیاسیندا ایسته دیگیم آدی اوغلوما سئچه بیله رم!

 

خان اوغلان

20 اسفند 83