رضا براهنی: " تبریز شعرلری"

 

آذربایجان تورکجه سینه چئویره ن: علی قره جه لو تورنتو ( یاز 2000)

 

 

 

(1)

قادینلارین باشیندان چادرالارینی قاچیران

یئشیل بیر یئل

و عزیز بیر خاطره

 

سن هله

اوراداسان

کی یگیرمی ایل قاباق تبریزین او کوچه سینده ایدین

 

یونوسو اودان

بالیخ دیر

چادرا

(2)

منیم خلقیم

صمیمیت له دوعا اوخوموشلار

صمیمیت له

 

توفنگ

اله آلیب ساواشمیشلار

توفنگ

 

ایللر بویو

اللرینده ایدی ایللر بویو

ایندی

قورخوسو یوخ

اگر

سکوت ائله میشلر

 

چونکو

آیاغا قالخدیقلاریندا

باهارین اوجا آغاجلارینا بنزه یجه کلر

کی چیچکله نیر

گول آچیر

و ئوره ک

 

ایریلیکده

میوه لر ده وئررله ر

صمیمیت له

 

(3)

گئجه یاریسی

تپه باشیندا

قهوه ده

 

یولداشلاریملا

من

سبلان بالی

 

یئدیک

قولاق آسدیق

کندین

 

ایت لرینین هورویوش لرینه

 

شعر اوخودوق

و زندان دان

 

دانیشدیق

کسدی سؤزوموزو

قهوه چی نین آغلاماسی

 

او

تورکجه چهچه ووران اوخویانا

قولاق آسیردی

 

کی کوله ک دالقالاریندا اوزاقدان گلن ایرماق سسی

کیمی

گلیردی

 

بیز داها

هئچ

دانیشمادیق

 

(4)

سحرلری

برشته چؤره گه بنزه ر تبریز

 

گون اورتاسی

قوزو کبابینا بنزه ر تبریز

بؤگرونده ایسدی قان داملاسی ایله

 

آخشاملاری

بوز کیمی ودکادیر یاندیرآر

ائله کی سن

باغیرآرآق ائوه گله سن

 

و یاری گئجه سی

قو توکلو بالیش کیمی بیر قادیندیر

باشینی اوستونه قویمادان یاتارسان

 

اویاندیغیندا

تبریز ایشیق فصیل لرینه

بنزه ر

 

(5)

سن کی شرقین ایلک اینقلابینی

گوجلو قوللارین اوستونده قالدیردین

اوجا آلنین اوجاراق قالسین ای شهه ر

 

ای حرکتین جهتی

ای منیم دوامیم

ای منیم کؤکوم

 

گونش لاپ ائله

سنین اؤز گؤگسونده ن گؤوریر

من بئله سنین قبریستانلیقلارینی دا سئویره م

 

(6)

سنده ن دانیشاندا

کاغاذیم قورتاریر

 

منه باشقا بیر کاغاذ وئر

بؤیوکلوگو گؤک قده ر

 

تا کی سنده ن یئنه

باشقا سؤزلر دانیشیم

 

(7)

یانیندا یاشاماق سنین

گونشین یانیندا یاشاماق دگیل

اونا اوستوندور

 

یانیندان

اوزاق یاشاماق

جهنم کیمی دیر

داها یامان بلکه ده

 

ای منیم جنتیم هانکی شهه رین باجیسی سان

تا کی شعریمی اونون دیزلرینه نثار ائیله ییم

 

(8)

سنین آدینین موسیقیسی یانیندا

باخ بیر کیشی گئچیر رنگلی قناره لر قفسی ایله

 

( سسله آدیمی آدیمی سسله)

 

فرشین ایپه گی دلی اولوب

مظفریه دالانیندا

سیندیریب سس سیزلیگی، دانیشیر

سن ایپه ک تصویر لرین دیلی سن

 

(سسله آدیمی آدیمی سسله)

 

سو شیرینی آچدی بیر قادین

راستا کوچه ده

بو هوژم* ایله دولچایا تؤکولمه میشدی هئچ بیر زامان سو

 

( سسله آدیمی آدیمی سسله)

 

گؤرونور دووآر اوستوندن

دوه نین بوینو و هؤرگوجو*

دوه لر اوجا دووآرلار قیسسا

 

( سسله آدیمی آدیمی سسله)

 

سوواخ دووآرلاری بئله شیرینلتدی

قیزلارینین بال رنگلی گؤزلری

 

( سسله آدیمی آدیمی سسله)

 

قارداشیم دیر منیم

شیهه چکه ن آت

کوچه ده ن گئچه ن طاووس

باجیم دیر منیم

 

( سسله آدیمی آدیمی سسله)

 

ساطیر

سیندیردی شیشه گین سوموکلرینی

او ات د ن من یازیقا دا بیرتیکه وئرین

 

( سسله آدیمی آدیمی سسله)

 

گوله شیر

میدانچادا شئر بالیخلاریمیز

دوشونور قادینلار اونلارین قوللارینی

 

( سسله آدیمی آدیمی سسله)

 

دونیانین ان قالین کیتابی دیر

ارک

دوروب اوزبه اوزموزده

بیزیم دیک

تاریخ سن سن

 

( سسله آدیمی آدیمی سسله)

 

چای قیراغیندا

بیر کیشی

قئین آتاسی ایله گلیر

قاریسی ایله گلیر

آتاسی ایله گلیر

اوغلو ایله گلیر

آناسی ایله گلیر

قیزی ایله گلیر

یوخاری چیخیر اینقلاب پلله لریندن منیم ائلیم

 

آدین اولدوزلارلا دولسون ای تبریز

 

( سسله آدیمی آدیمی سسله)

 

(9)

چیچک لنه ن دان یئری

و بولور بولبوللر

و یوخسوللوق آزقین یوخسوللوق

سنین اوزونون چئوره سینده

یاری توتولموش آی کیمی دولانان

بیر چاخیشمادیر

 

بیر جوان قادینا بنزه رسن

گؤزه ل

رعنا

کی اندامینی کهنه پالتارلا چورقالار

 

خالقین بو ده ییشی نه ده دوغرودور بورآدآ

خرابه ده قالمیش خزانه یه بنزه رسن

 

(10)

یولداش !

شهه ر !

تک بیر شهه ر !

منیم اوچون !

 

اورادا بیر بالاجا اوطاق وار

اوزون، قدیم و بوروخ بوروخ کوچه لره آچیلار

من ایلک غزه لیمی

او اوطاقدا یازدیم

 

او بالاجا اوطاقی منیم اوچون ساخلا

 

یوخسا آل گؤگوسونون دؤره سینده

درین بیر قبیر قاز

گؤر شاعرین جنازه سی

کلمه لر جماعتی

چیگنینده

و ان سئچیلمیش شعریله گلمکده

 

یولداش !

شهه ر !

منیم اوچون !

تک بیر شهه ر !

 

 

 

* هوژم: سرعتله حرکت

* هؤرگوج: دوه نین کوره گی ( کوهان)

* یوخاریداکی شعرلری ( تبریز شعرلری)، رضا براهنی انقلابدان قاباق فارسجا یازمیشدیر. بو شعرلرین فارسجاسی (شعر های تبریز) ایندییه قده ر هئچ بیر یئرده چاپ اولمامیشدیر. ایندی ایسه بو شعرلری آذربایجان تورکجه سی چئویریسی ایله بیرلیکده شعر سئونلره تقدیم ائدیریک.