بير مای بايرامی تبريزه خوش گليب صفا گتيردی

 

م. بيريا

آ دوستلار سئوديگيز بير مای بايرامی

تبريزه خوش گليب صفا گتيردی

الينده ساقی‌نين عدالت جامی

فعله‌نين روحونا غذا گتيردی

 

باخان زامان چمنلره، دوزلره

فرح گلير چوخ، سارالميش اوزلره

حسرتيمدن نوردان دوشن گؤزلره

تاباخ- تاباخ بوگون ضييا گتيردی

 

تجروبه‌لر ازل وئريبدير نيشان

بيرليک قيلار زحمتکشی کامران

ايستعمارين پنجه‌سينده چيرپينان

دردلی کؤنوللره داوا گتيردی

 

بيرلشمه‌سک اولار بوتون ايش کلک

قوردلار باسار، يئيه‌ر بيزی قويون تک

قاناد چاليب دئيه‌ر گؤيده بير ملک:

هر يارايا بيرليک شفا گتيردی

 

 

اربابلارين ديليندن کارگرلره خيطاب

 

م. بيريا

آی کيشی دال بادال وورور قلبيمه يارا کارگر

دينجه‌لی، چورلاديب منی، سوخسا مزاره کارگر

 

ايندی قديمکيلر کيمی، سؤزلريمه اينانمايير

ديک اوزومه دورور هله، ذره قدر اوتانمايير

خاصيتی اولوب عوض، بئينی دؤنوبدو قانمايير

اؤز جيزيغيندان آتلاييب، چيخدی کنارا کارگر

دينجه‌لی، چورلاديب منی، سوخسا مزاره کارگر

 

يومروغونو دويونله‌ييب، قاشلارينی چاتير منه

حيزبده عوضو اولوب گئده، گونده فاسون ساتير منه

ايسته‌ييرم ميريلدايام، فوری تپيک آتير منه

چيخماياسان گؤروم سنی بيرده باهارا کارگر

دينجه‌لی، چورلاديب منی، سوخسا مزاره کارگر

 

دوغروسو من زمانه‌ده انگله دوشموشم عجب

هئچ گؤرونوبدو کارگر حقينی ائيله‌سين طلب؟

يوخ هونريم کی، سالديرام، بونلاری حبسه بی‌سبب

غوصه‌دن ائتميشم داها بؤرکومو پارا کارگر

دينجه‌لی، چورلاديب منی، سوخسا مزاره کارگر

 

آی بالا، کارگر ندير، دوکتور ايله داوا ندير؟

درس اوخوماق، ساواد ندير؟ علميله تئخنيکا ندير؟

کور اولا کارگر گرک، بيلمه‌يه کی، ضييا ندير!

سن هله گئت چؤرک قازان، شامو- ناهارا کارگر

دينجه‌لی، چورلاديب منی، سوخسا مزاره کارگر

 

کارگرين نه حقی وار مونکير اولا رياسته؟

يا، بيله ايقتيصاد ندير، ال آپارا سياسته!

سئچگيده ايشتيراک ائدير، گل قولاق آس حکايته

سن نه اود اولموسام مگر؟ ائی اوزو قارا کارگر؟

دينجه‌لی، چورلاديب منی، سوخسا مزاره کارگر

 

چيخدی اليمدن ائی فلک، شانيله شؤهرتيم منيم

گئتدی هميشه‌ليک بوتون، فخرله عزتيم منيم

يوخدو ازلکيلر کيمی، اينديليک حؤرمتين منيم

آز قالير ائتسين ايشلری ايندی ايداره کارگر

دينجه‌لی، چورلاديب منی، سوخسا مزاره کارگر

تبريز ١٣٢٢

 

 

گؤز آچ آی کارگر!

 

م. بيريا

گؤز آچ آی کارگر بسدير، آييل بو خابی غفلتدن

جاهاندا مرحمت اومما، بو قانوندان، بو دؤولتدن

 

سارالدين، گول کيمی سولدون، ازيلدين، پايمال اولدون

بوکولدو قامتين غمدن، قوجالدين درد و محنتدن

 

هميشه گؤزلرين گيريان، سويوقدا آج، سوسوز، عوريان

داش اولسا ديلله‌نر اينسان، گلر جانا بو ذيلتدن

 

الين بوش، ائوده ائولادين عيالين هر شئيه حسرت

سنی دينديرسه‌لر دينمه، قيزار شرم خجالتدن

 

دگيلسن کيمسه‌دن اسکيک، دئمک اولماز بونا ديريليک

سنی آزاد ائدر بيرليک بو زنجير و اسارتدن

 

قولوندا قودرتين واردير، اورکده جوراتين واردير

سنين اؤز حؤرمتين واردير، ال اوز ارباب ظولمتدن

 

سنين سايه‌نده ظاليملر، توتوب کاشانه‌ده مسکن

آلير اؤز کامينی هر گون ملک منظر بير آفتدن

 

آماندير فؤوت اولور فورصت، چاليش اول حقيوه صاحيب

خيانتکاره توت ديوان، قصاص آل بی‌مورووتدن