حصير آباد

 

١٣۶٢- جى ايلين خورداد آيى‌نين ١- ده ايشکنجه آلتيندا شهيد اولموش حوسئن حوسئنپور تبريزى

 

سن ده گز تهرانى گؤر، شؤوق ايله آرتسين هوسين -٢

گؤر گيلن تازه‌ليگين جور به جوره منظره‌سين

هردم اودلانميش اولان بير سورو کرپيج کوره‌سين

بو گؤزل تهرانيمين گزمه‌لى هرزادينا باخ

سنگر و جيبهه‌يه بنزر حصيرآبادينا باخ!

 

حصيرآباد دئييرم بير گؤره‌سن سنگلجين -٢

نه اوزاقدير، نه ياخيندير، نه ده هوندور، نه درين

يايدا بوزلاق کيميدير، قيشدا بهيشتدن ده سرين

اوردا مسکنلرى اولان بير وطن ائولادينا باخ

سنگر و جيبهه‌يه بنزر حصيرآبادينا باخ!

 

گل سنه تعريف ائديم دروازا قزوينده نئجه ٢

اينسانى واله ائدير وقتى گلير آدى ديله

گز گيلن هر کوچه‌سين، هر طرفين ديقتيله

اوردا ارسيز ياشايان اللى مين آروادينا باخ

سنگر و جيبهه‌يه بنزر حصيرآبادينا باخ!

 

دروازا ايشلرينين يوزده بيرين هئچ دئميرم -٢

لوتوسون، چاققى کئشين، باشقا ايشين سؤيله‌ميرم

يازيرام حقى داداش، من کى، گوناه ائيله‌ميرم

يئددى مين شيره‌خانانين جمع و تعدادينا باخ

سنگر و جيبهه‌يه بنزر حصيرآبادينا باخ!

 

واردى تهراندا دمير يول و بؤيوک کؤرپوسو وار -٢

گئجه-گوندوز اورا مينلرله ده بئکار ييغيشار

هاميسى سبزى سويار، يادا يئرآلماسى ساتار

چؤرک آواره‌سيدير، ناله و افغانينا باخ

سنگر و جيبهه‌يه بنزر حصيرآبادينا باخ!

 

باخ گيلن شيمرانينا، بير نظر ائت داغلارينا ٢

اوندا احسن دئيه‌سن موفته‌خور اويناقلارينا

اوردا وئل-وئل دولانيب کئف چکن آخماقلارينا

داها بسدير بو قدر تهرانى چوخ پيسله‌مه‌يين

بو گؤزل تهرانيمين آدينا بؤهتان دئمه‌يين

 

تانيميرسان بيليرم لاله‌زارى، شهريضانى

يئمه‌ييبسن اورادا بير تيکه الوان غذانى

هله سن چيخ مچيده سؤيله اوجادان اذانى

يا چکين شيره-حشيش، کالباس و مالباس يئمه‌يين

بو گؤزل تهرانيمين آدينا بؤهتان دئمه‌يين