تورك مدرسه سي


مدرسه ده موعلليم
يئنه دؤيدو اليمدن
باجارماديم فارسجاني
ايراد توتدو ديليمدن



دئديم : آغا موعلليم
وورما ، گؤينه دي اليم
نه دير آخي گوناهيم
توركودور منيم ديليم



ياپيشدي قولاغيمدان
دئدي : بوراخ توركونو
او قالدي ائوينيزده
اونوت گئتسين كؤكونو



اؤيره نمه سن آب بابا
آچاجاقسان اليني
كؤتك يئيه ندن سونرا
اونودارسان ديليني



سنين هاران توركدور؟!
آذريسن ، آذري !
كيم اؤيره ديبدير سنه
بئله يانليش سؤزلري!



آخدي گؤزومون ياشي
تيتره دي ديل دوداغيم
بئله يالان سؤزلره
اينانمادي قولاغيم




آنام مني اويدورماز
آتام مني آلداتماز
بو سؤزلرين هئچ بيري
منيم عاغليما باتماز



نييه منيم آديمي
سوروشمايير اؤزومدن
نييه سؤزون دوزونو
اوخومايير گؤزومدن



هركس يالان دانيشسا
آللاهين دوشماني دير
من كي يالان دئميرم
بو اونون يالاني دير



لايلاي دئييبدير آنام
منه بئشيكده توركو
دانيشميشيق هاميميز
ائوده ائشيكده توركو



نه دن گرك يازماياق
ديليميزي كيتابا ؟
مدرسه ده نه اوچون
گلمه يك بيز حسابا؟



هئچ عاغليما سيغمايير
نه دير بونون جاوابي
سو يئرينه اوخويام
مدرسه ميزده آبي




يقين كؤتك يئمزديم
اوخوسايديم ديليمي
گؤينرتي دن سيخمازديم
قولتوغوما اليمي



قوي بؤيويوم بير اؤزوم
اولاجاغام موعلليم
اوندا چوخ ايش گؤره جك
بو گون گؤينه ين اليم



كيلاسيمدان گله جك
ائليميزين اؤز سسي
اولاجاقدير او زامان
توركون ده مدرسه سي