حبيب ساهيرين ال يازماسيندان بير نومونه:

 

 

دوکتور حميد نطقى يه

 

ائى نالى دانيشير

 

١- اولکر سؤنوب، دان اولدوزى پارلارکن

گؤز تيکه‌رم، اوزاق، اوزاق يوللارا!

آرغين يورغون کروانلارى گؤزله‌رم...

 

باهار گونو اريدرکن قارلارى

ياناجلاردا گؤوه‌رنده اوت، علف

بيلدير کؤچن چوبانلارى اؤزله‌رم...

 

دره‌لرده قيققيلدارکن ککليکلر

دورولارکن، حووض طرلان سولارى

سرين- سرين شيمال يئلى اسرکن

 

اوزاقلاردان سلاملارام، هر سحر:

- قارا لچک، چادرالى دوللارى،

گوشوارالى، مخمل دونلو قيزلارى...

 

 

٢- گؤز گزديريب اوجالاردان شهره

توزلو يوللار، پالچيق ائولر، قبريستان

ظولم ايچره، پاسلى بازار، شئه زيندان

 

آياق يالين، سولغون اوزلو اوشاقلار

شاه چلبى اوسته پالتار يويانلار،

کوللوکلرده، سومسونن ايت گؤره‌رم...

 

 

٣- ياديمدادى، گليب- گئدن دؤورانلار

اتگيمده صفا باغى وار ايدى...

گؤم- گؤى گوللو باغمئشه ده، چشمه‌لر

 

دييرمانلار فيرلاداراق آخاردى

رشيديه اطرافيندا، گزرکن:

ساناردين کى، خزان بيلمز باهارى

 

ياشيم چوخدور آب-حيات ايچميشم

آتا بيگلر، غازان خانلار، صوفيلر،

زئينب پاشا، ستارخانلار گؤرموشم

ناحق يئره آخان قانلار گؤرموشم...

 

 

۴- بويانارکن، قيزيل سويا آخشاملار

گون چيخمادان اوزچئوئريب، او زامان،

آل اؤرپکلى، گون باتانا باخارام...

الوان- الوان داوودى‌له بزه‌نن

او موقدس پاييزى، من اؤزله‌رم

گئجه‌لرى، بير تک چيراق يانديريب:

آيدينليغين کروانينى گؤزله‌رم...

حبيب ساهير