بولود قاراچورللو سهند

 

 

من‌ تبريزدن‌ گلميشم‌

 

بيلميرم‌ آغلاييم‌، بيلميرم‌ گولوم‌،

بيلميرم‌ آچيليب‌، يا سولوب‌ گولوم‌!

دانيشماغا توتمور آغزيمدا ديليم‌،

آخي‌ دوستلار، من‌ تبريزدن‌ گلميشم‌!

 

مندن‌ سوروشمايين‌ تويدان‌، بايرامدان‌،

نغمه‌دن‌، ماهني‌دان‌، باده‌دن‌، جامدان‌،

اوغول‌ اوشاغيمدان‌، بالا ـ بولامدان‌،

آمان‌ دوستلار، من‌ تبريزدن‌ گلميشم‌!

 

سؤز آچمايين‌ منه‌ يازدان‌، باهاردان‌،

يا ايستي‌ اوركلي‌، ايستكلي‌ ياردان‌

سورمايين‌ او عزيز آنا دياردان‌،

آمان‌، دوستلار، من‌ تبريزدن‌ گلميشم‌!

 

سورمايين‌، سورمايين‌ ياشيل‌ داغلاردان‌،

شاختا قارسيلايان‌ بارلي‌ باغلاردان‌،

يادا، باغريمداكي‌ چارپاز داغلاردان‌،

آمان‌ دوستلار، من‌ تبريزدن‌ گلميشم‌!

 

عاريفلر درديمي‌ آنلايار ـ قانار،

آليشقانلار آلوولانار، اودلانار،

بعضيلر سؤزومو افسانه‌ سانار،

آمان‌ دوستلار، من‌ تبريزدن‌ گلميشم‌!

 

يارادان‌ ديل‌ وئريب‌ اينسان‌ دانيشا،

ال‌ ـ قول‌ وئريب‌ حيات‌ اوچون‌ ووروشا،

اورك‌ وئريب‌ سئوه‌، كوسه‌، باريشا،

آمان‌ دوستلار، من‌ تبريزدن‌ گلميشم‌!

 

گوناهيم‌: ثروتيم‌، دوشونجه‌م‌، ديليم‌،

ال‌ ـ قولوم‌ زنجيرده‌، يورد، ديليم‌ ـ ديليم‌،

اورگيم‌ شان‌ ـ شاندير، باغليدير ديليم‌،

آمان‌، دوستلار، من‌ تبريزدن‌ گلميشم‌!

 

شاعيرين‌ سيلاحي‌ كلمه‌دير، سؤزدور،

ياخان‌ شاپالاقدير، ياخيلان‌ اوزدور،

گؤيرن‌ ياناقدير، قيزاران‌ گؤزدور،

آمان‌، دوستلار، من‌ تبريزدن‌ گلميشم‌!

 

قلم‌ سونگو ايله‌ قارشي‌ دورا؟...هئي‌...

كاغاذ قالخان‌ اولا، جان‌ قورويا؟...هئي‌...

ناحاق‌ قان‌ قورويا، قورومايا؟...هئي‌...

آمان‌ دوستلار، من‌ تبريزدن‌ گلميشم‌!

 

سؤز دوستلارينا من‌ دايانانميرام‌،

بوش‌ بوغاز سؤزونه‌ اينانانميرام‌،

جان‌ قويماقلا، سؤزو، بير سانانميرام‌،

چونكو دوستلار، من‌ تبريزدن‌ گلميشم‌!

 

باده‌ مجليسينده‌، ايستي‌ اوتاقدا،

اؤيونمك‌ ده‌ اولار، بلكه‌ جوشماق‌ دا،

ايش‌ مرره‌ باشينا يئتيشن‌ واختدا،

آمان‌ دوستلار، من‌ تبريزدن‌ گلميشم‌!

 

لاله‌نين‌ توتولدو باغري‌ قارالدي‌؟

بولبولون‌ نه‌ اولدو رنگي‌ سارالدي‌؟

قان‌ قارداشلاريم‌ بس‌ هاياندا قالدي‌؟

آمان‌ دوستلار، من‌ تبريزدن‌ گلميشم‌!

 

طالعيم‌ بللي‌دير دوستا، دوشمانا،

دئميرم‌ او باشي‌ دومانلي‌ آنا،

لاله‌يه‌ بورونوب‌ يا باتيب‌ قانا،

آنجاق‌ دوستلار من‌ تبريزدن‌ گلميشم‌!

 

ساوالان‌ اوركلي‌ تبريز آناسي‌،

اللري‌ اوستونده‌ قاليب‌ بالاسي‌،

تويو چاليناركن‌ باشلاييب‌ ياسي‌،

آمان‌ دوستلار، من‌ تبريزدن‌ گلميشم‌!

 

ديرناخلانيب‌ گلينلرين‌ ياناغي‌،

گردكلر اولوبدور قاسيم‌ اوتاغي‌،

قيرميزي‌ گئيينيب‌ عئينالي‌ داغي‌،

آمان‌ دوستلار، من‌ تبريزدن‌ گلميشم‌!

 

دومان‌ چولقاييبدير داغلاري‌، دوزو،

شهرين‌ آغزيندا قاليبدير سؤزو،

آنجاق‌، سحر ـ آخشام‌ قيزارير گؤزو،

آمان‌ دوستلار، من‌ تبريزدن‌ گلميشم‌!

 

دؤنوم‌ ـ دؤنگه‌لرده‌ قوردلار اولاشير،

سومسوك‌ ـ سومسوك‌ گزير، گاه‌ قودوزلاشير،

بعضاً ده‌ ديشلري‌ قانا بولاشير،

آمان‌ دوستلار، من‌ تبريزدن‌ گلميشم‌!

 

درين‌ دنيز كيمي‌ ساكيتدير شهر،

سس‌سيز ييرقالانير قالين‌ لپه‌لر،

بو سوكوتدا نه‌لر گيزلنيب‌، نه‌لر؟...

آمان‌ دوستلار، من‌ تبريزدن‌ گلميشم‌!

 

سهندين‌ ايچينده‌ كوپسونور وولقان‌،

باشيندا گاه‌ دومان‌، گاه‌داكي‌، توفان‌،

بويلانير شهه ره‌ باخير نيگاران‌،

آمان‌ دوستلار، من‌ تبريزدن‌ گلميشم‌!

 

وطن‌ دميرده‌دير، وطن‌ داردادير،

گؤزلري‌ يول‌ چكير، اينتيظاردادير،

شهريار قارداشيم‌ گؤرسن‌ هاردادير،

آمان‌ دوستلار، من‌ تبريزدن‌ گلميشم‌!

تهران‌، اسفند 1356