یاد تورپاغیم


ناصر مرقاتی

1
آجی دان دؤننده شهره ساری
هامی نیزین اللرینیز اللریم ایچینده ایستی و
یوموشاق
هامی نیزین اوره کلرینیز هر کیچیک اولایا آچیلان
هامی نیزین دوداقلارینیز بیر کلمه یه قاچان
هر بیر زاد اینجه
هر بیر زاد معنالی
هر بیر زاد ایستی ایدی باغ یولوندا.

و یئرین یئددی قاتیندان
قاییتمیش اوغلان
آیاقلار آلتینا
گول سپه سپه
گزیشیردی هر یانی.

آجی دان دؤننده شهره ساری
یادیندادیرمی ساچلارینی اوینادارکن اسیم
سؤیله دین منه:
نه یامان آخیری آجی.
من ایسه دئدیم:
گؤز ایشله دیکجه ساپ ساری زمیلر
یام یاشیل باغلار

آه
یئرله گؤی دوغمایدی هله.

2
هئی هئی
آی منله بیرگه دوغودان کؤچوب
دوزنلرده کؤچ سالانلار
بیره ر بیره ر دئیین گؤروم
پیشمیش کرپیش لردن هؤردویوموز ارک- یمیز دورورمو؟
سؤیله دی آتا:
ندن ائولادلاریم و قاریم باشا دوشمه دیلر
نه سؤیله دیکلریمی؟
سؤیله دی آنا:
ندن ائولادلاریم و اریم باشا دوشمه دیلر
نه سؤیله دیکلریمی؟
سؤیله دیلر اوغوللار و قیزلار:
ندن آتا، آنا، قارداش و باجیلاریمیز
باشا دوشمه دیلر نه سؤیله دیکلریمیزی؟
سؤیله دیلر هامی:
اؤزوموز ده اؤز دئدیکلریمیزی.
و او گؤردویون دوزنلرین تورپاغی ایندی کول و کول
اورکلری قورشون
هاواسی توستو و دومان
گؤیلره قالدیردیغیمیز بورج ایسه آرزولاریمیز کیمی ویران.
و کؤچدویوموز یوللار بویو،
- بایات دوغمالیق و بیرلیک تکجه داشلارا قازیلمیش
بیز اورکلریمیزی اوزاقلارا باغیشلادیق

بؤیله سؤیله میش اولدولار هامیلار
آنجاق من آجی ساحیلینده منله بیرگه دوغودان
کؤچموشلرین نه سؤیله دیکلرینین بیرینی ده دوشمه دیم باشا
آه
نه سؤیله یه جگیم وار سیزه؟
آی بیرگه لریم بیر دیلده دردلشدیکلریم
یادلاشان آشنالار
نه دئییم من سیزه؟
آی اؤگئی دوغمالار
آنمییاجاقسینیز منی
نه دئسه نیز منه
آنمییاجاغام سیزی
آجی نین قانا دؤنمه سیندن بری
و او لعنته گلن توستولو و دومانلی
چاققاللار دوزوندن آیریلالی

3
آجی دان دؤننده شهره ساری
اللرین اللریم ایچینده بوم بوز،
باخیشلارین سازاق،
سؤیله دیین هر بیر سؤز یاد ایدی؛
سن دئدین:
قورویوب آجی؛
من ایسه دئدیم:
گؤز ایشله دیکجه کول اولوب باغلار؛
آج قارقالار یانمیش زمیلره قونموش
داها دانیشمادیق شهره قدر.



دونیا، مین دیلده ایدی.
کولک یئرسیز اسمیر
سازاق یئرسیز کسمیر
و قارا دومان کیمی دیر داریسقال پنجره لردن
کول رنگی لال باغیرتیلار؛
و باخدیقدا:
گؤز یئرینده گؤز
اوز یئرینده اوز
و سؤز یئرینده گؤرمه دیم سؤز؛
بیرجه بولانیق سسلر
ایتگین اوزلر
اویوق گؤزلر
بیرده کی توستویدو و دومان؛
و اؤلومون جایناغیندان دامجی دامجی دامان قان.

تکجه
یاییلیر هاوادا بیر سس:
تنهالیق
اؤزگه لیک
و اؤلوم یولدا؛
اؤلوم
اؤلوم یولدا.
آه
ارک ین دووارلاری تؤکولور.
تؤکولور
تؤکولور

.

قایناق:
تالانمیش گونش شعرلر توپلوسو - ناصر مرقاتی

www.barama.org
info@barama.org