سکوت، یوخسا انفعال ؟

آیدین تبریزی

http://www.oyrenci.com /

 

چهارشنبه  ۱ مهر ۱٣٨٨ -  ۲٣ سپتامبر ۲۰۰۹

 

سئچگی سونراسی اولایلاردا آذربایجان میللی حرکتی نین ایشتیراک ائتمه مه سی معنالی بیر سکوت کیمی آنلاشیلدی و 3 ایل بوندان اول آذربایجاندا خورداد اولایلاریندا فارس مرکزلی قوه لرین سکوتونا قارشی بیر اعتیراض و آکسیا کیمی گوروندو. بورا قدر بو سیاستین بیزه چوخلو منفعتلریده اولدو و نئچه نفر اعتیراف ائتمه یه مجبور اولدولار. باشقالاریدا هر یالانچی تبلیغاتا و یانلیش خبر یایماغا ال آتدیلار کی مثلا تبریزده یاشیل حرکاتا قاتیلدی! آنجاق بیر سونوج آلا بیلمه دیلر و آنلادیلار کی آذربایجاندا هئچ طرفدارلاری یوخدور!

 

آنجاق بو سکوت همیشه لیک دوام ائده بیلمز و اگر دوام ائتسه، سونوندا بیزیم ضرریمیزه قورتارابیلر و انفعال نیشانه سی اولا بیلر. بوردا تاکید ائتمه لییم کی من اصلا یاشیل حرکته قاتیلماغی و اونون ایچینده اریمه یی توصیه ائتمیرم، بیزیم اوز موباریزه میز وار، منیم دئدیغیم سوز بودور کی بیز اوز موباریزه میزی اوچونجو بیر گوج کیمی اورتایا قویمالییق و بو یارانمیش فورصتدن ایستیفاده ائدیب و اوز سسیمیزی قالدیرمالییق.

 

البته منجه پلورالیسم و فیکیر آیریلیغی اگر دوشمانلیغا چئوریلمه سه همیشه بیر میللتین خئرینه اولار و من مثلا بو احتیمالی دا دوشونه بیلیرم کی اگر مثلا آذربایجان میللی حرکتی ایلک گوندن آیاغا قالخسایدی و مثلا اوتای بوتای بیر اولسون مرکزی تبریز اولسون کیمی شوعارلاری وئریلسه یدی بلکه ایران مرکزلی سیاسی قوه لر و موسوی و کروبی ایرانین بولونمه سیندن قورخدوقلاری اوچون بو قدر موباریزه لرین دوام ائتمزدیلر و بیزه قارشی رئژیمین دالیسیندا دوراردیلار! یعنی بو باخیش دان آذربایجانین سوسماغی بو ساواشین درین لشمه سینده ده اونملی رولو اولدو. آما ایندی بو ساواش او قدر درینلشیبدیر کی هئچ کس اوز سوزوندن گئری دونه بیلمز. البته بیز یئنه ده شوعارلاریمیزی دیققت لی سئچمه لییک و هر شوعاری زامانی گلمه میشدن وئرمه لییک و رئژیمه سرکوب اوچون بهانه وئرمه مه لییک. دیققت ائتمه لییک کی دیکتاتور رئژیملره قارشی موباریزه ده وئریلن شوعارلارین نه قدر رادیکال اولدوغو چوخ دا اونملی دییل بلکه نه سایی دا میللت خیابانلارا چیخماسی داها آرتیق اونملی دیر و اگر بیز بیله بیله رادیکال شعارلارین یئرینه اینسان حاقلاری شوعارلاری وئرسک، داها آرتیق میللت او میتینگ لرده ایشتراک ائتمه یه جسارت گوستره بیلر.

 

آنجاق ندن ایندی گرک بو سوسماغا سون قویاق و بیزده دیققتلی اولاراق حرکته گلمه لییک؟ قدس گونو یاشیل حرکات اوچون بیر تقدیر گونو ایدی. اگر بو گون میللت قورخوب ائولرینده اوتورسایدیلار بو حرکت مغلوب اولاجاغیدی آنجاق بو گونون باشاریلی کئچیریلمه سی گوستردی کی بو حرکت دوام ائده جک و بو تئزلیکده سونمه یه جک. قدس گونو بیر باشقا مساله نی ده گوستردی و اودا بودور کی رئژیمین رسمی میتینگ لری نین فورصتیندن یارارلانماق و اونو اوز ایستکلریمیزی سسلندیرمک فورصتینه چئویرمک چوخ یاخشی تاکتیک اولا بیلر نیه کی رئژیمین اوز آداملاری دا خیابانلاردا اولوغو اوچون، آتش آچا بیلمز چون اوز آداملاری دا خیابانلاردا اولدورولسه، بویوک روسوا چیلیق اولا بیلر.

 

منجه بیز قدس گونونده بو سوسماغیمیزا سون قویا بیلردیک و بیر بویوک حرکت یارادا بیلردیک. آنجاق بو ایش او زامان اولابیلردی کی میللی فعاللارین چوخونلوغو بو قرارا گلردیلر کی بیزیم حرکته گلمه ییمیزین زامانی یئتیریبدیر. باشقا طرفدن بیزیم تبلیغات ایمکانلاریمیز گرک آرتیریلسین. گوناز تی وی نین تورک ست و یا هات بیردا گلمه سی چوخ اونملی دیر. آنجاق اگر بونلارین هامیسی اولسایدی، قدس گونونده بیز اوزوموزه مخصوص شوعارلارلا مئیدانا گله بیلردیک. بیرینجی سی رئژیمین ایکی اوزلو سیاستینه قارشی شوعارلار وئره بیلردیک مثلا قاراباغی، اورومچونو هئچ دئمیرسن یالانچی! کیمی شوعارلار تام قدس گونونه اویغون اولابیلردی. مرگ بر آمریکانین جاوابیندا اولوم اولسون روسیه یه، اولوم اولسون چین دولتینه و مرگ بر ایسرائیلین جاوابیندا اولوم اولسون داشناکلارا دئیه بیلردیک.

 

ایکینجی یاخشی فورصت بو ایلین قدس گونونده، مهر آیی نین یاخین اولماسی ایدی. بیز همین فورصتدن یارارلانیب و آنادیلی شوعارلاری وئره بیلردیک مهر آیی نین بیرینجی سی، اوشاقلارین عزا گونو و تورک دیلینده مدرسه اولمالیدیر هر کسه. ایندی سورو بوردادیر کی اگر بیز قدس گونونده بو شوعارلارلا مئیدانا چیخسایدیق، آیا یاشیل حرکاتدا اریمیش اولاردیق؟! آیا بیزیم بوجور منطیقی و دیققتلی حرکتلریمیز و فورصتلردن دوزگون یارارلانماغیمیز، میللی حرکیتین خئرینه اولا بیلر یوخسا ضررینه؟

 

آذربایجان 3 ایل بوندان اول تک باشینا آیاغا قالخدی و ان بویوک گوجویله آیاغا قالخدی و بوتون شهرلرده بویوک میتینگ لر یاراتدی، آنجاق یالنیز اولدوغوموز اوچون سرکوب اولدوق. چونکو رئژیم باشقا منطقه لردن سرکوب گوجلرین آذربایجانا گوندرمیشدی. بیز بو مساله دن درس آلمالییق کی بیر باشاریلی حرکت یاراتماق اوچون، گرک او زامان حرکته قالخاق کی باشقا منطقه لر آیاغا قالخیبلار تا رئژیمین سرکوب گوجو داغیلسین. بو او آنلامدا دییل کی بیز موسوی نین یا کیمسه نین دالیندا حرکت ائدیریک و یا یاشیل حرکاتا قاتیلیریق! بیزیم یاشیل حرکاتلا یالنیز ایکی ایشتیراکیمیز اولمالیدیر. بیرینجی سی موشترک دوشمانا قارشی موباریزه ائدیریک پس تاکتیکی اولاراق هله لیک بیربیریمیزه قارشی دورموروق و ایکینجی سی عینی زاماندا موباریزه ائدیریک تا رئژیمین سرکوب گوجو داغیلسین. آما بیز اوز استکلریمیزی سسلندیرمه لییک. اگر اونلار جمهوری ایرانی دئییرلر بیز فئدرال جومهورلوق دیه بیله ریک و اوز فرقلی موقعیمیزی اورتایا قویا بیله ریک.

 

بعضی دوستلار دئییرلر کی نیه اونلار جمهوری ایرانی دئییرلر پس بیز سوسمالییق! آیا بیزیم سوسماغیمیز منفعتلی دیر یوخسا اوز فرقلی ایستکلریمیزی اورتایا قویماغیمیز؟ بیز نه قدر گوزله مه لییک کی فارسلار بیزیم شوعارلاری وئرسینلر؟ اصلا مگر بو ایش اولا بیلرمی کی فارسلار بیزیم شوعارلاریمیزی وئرسینلر؟! هر میللت اوز منافعینه اویغون شوعار وئرر و بوتام آنلاشیلان بیر مساله دیر. بیز اگر موباریزه ائتمک ایسته ییریک، فارسلارین نه شوعار وئرمک لرینه باخمایاراق، مئیداندا اولوب و اوز شوعارلاریمیزی وئرمه لییک. اگر بیز او قدر گوزله یک کی فارسلاردا بیزیم شوعارلاریمیزی وئرسین لر تا بیزده آیاغا قالخاق، بوسوزون آنلامی بودور کی بیز بو رئژیمین قالماسینا داها چوخ راضییق! چون امین اولون کی فارسلار هئچ زامان بیزیم شوعارلاری وئرمه یه جکلر و اگر وئرسه لرده امین اولون کی یالان دئییرلر چون اونلارین دا اوز میللی منفتلری وار کی بیزیم منافعیمیزله اوست اوسته دوشمور و طبیعی دیر کی هر میللت اوز منفعتینی آختارسین. ایندی سیزجه بیز نه زامانا قدر دوزمه لییک؟! آیا بو سوزون آنلامی بو دییل کی بیز موباریزه نی تعطیل ائدیب و بو رئژیمین داوامینا داها چوخ راضی اولاق!

 

 

بعضی دوستلار دئییرلر کی هئچ تضمین یوخدور کی بو حرکتین سونوندا بیز اوز حاقلاریمیزا چاتاق. سیاست دونیاسیندا هئچ کسه تضمین یوخدور و حاققی آلمالییق و هئچ کس بیزه حاققیمیزی وئرمه یه جک! یعنی منیم جاوابیم بو سورویا بودور کی نه فقط کی هئچ تضمین یوخدور کی فارسلار بیزیم حاقلاریمیزی وئرسینلر بلکه اوندان یوخاری هامیمیز بیلمه لییک کی فارسلار بوتون گوجلرینی قویاجاقلار کی بیزیم حاقلاریمیزی وئرمه سینلر! یالنیز بیزیم گوجلو مئیداندا اولماغیمیز و ایستکلریمزی گوجلو سسلندیرمه ییمیز و باشقا میللتلری ده اوزوموزله بیرلشدیرمه ییمیز اونلاری مجبور ائده بیلر کی بیزیم حاقلاریمیزا بویون ایسینلر. بوندان باشقا هئچ بیر یول یوخدور. اگر دوستلار باشقا یول تانییرلار بیزه ده دئسینلر.

اگر فیکر ائدیرلر کی آذربایجان تک باشینا موباریزه ائدیب و رئژیمی ییخیب و ایستیقلالینا قووشا بیلر، بیر داها خورداد اولایلارینا دیققت له باخمالیدیلار. آیا آذربایجان میللتی تک باشینا او حرکتدن داها گوجلو مئیدانا چیخا بیلرمی؟ او حرکتین سونوجو نه اولدو؟ بیر باشقا سورودا بودور کی اگر سیز فیکر ائدیرسینیز کی آذربایجان میللتی تک باشینا بو رئژیمی ییخیب و باغیمسیزلیغینی آلا بیلر، آیا بو ایشی بیر زاماندا کی رئژیمین سرکوب گوجلری باشقا شهرلرده مشغول دور داها راهات گورمک اولار یوخسا بوتون ایران ساکیت اولاندان سونرا آذربایجان تک باشینا آیاغا قالخسا و رئژیم بوتون گوجلرینی آذربایجانا گوندرسه؟!

 

منجه بیز گرک بو سوسقونلوغا سون قویاق و اوزوموزو گله جک فورصتلرده بیر بویوک حرکته حاضیرلایاق. البته بو او آنلامدا دییل کی صاباحدان میللتی خیابانلارا چاغیراق. بلکه بیز صاباحدان گرک میللی فعاللارین بدنه سینده حاضیرلیقلار آپاراق. تبلیغات ایمکانلاریمیزی آرتیراق. گوناز تی وی یئنی ست لایت لارا کئچمه لیدیر و میللتیمیزین ائولرینه گلمه لیدیر و یاواش یاواش میللتیمیزین فیکرینی بیر بویوک حرکته بیر یاخشی فورصتده حاضیر لامالیدیر. بو یاخشی فورصت او زامان اولا بیلر کی باشقا شهرلرده قدس گونو کیمی بیر بویوک حرکته حاضیرلاشیرلار.

تجروبه گوستریر کی بیر بویوک حرکت اوچون یا یئنی بیر شوک اولای جامعه ده لازیم دیر و یاخود قدس گونو کیمی رئژیمین اوز میتینگ لرینین فوصتیندن یارارلانماق لازیمدیر. اگر بیر اونملی شوک جامعه یه تزریق اولماسا بلکه 22 بهمن تظاهرات لاری ان یاخشی فورصت اولسون. بیز نئچه واقت قاباقدان حاضیرلیق آپاریب، اوزوموزه مخصوص شوعارلار حاضیرلاییب و میللی حرکتین بدنه سینه یئتیرمه لییک. البته او زامانا قدر بوتون اولای لاریدا یاخیندان ایزله ییب و آنالیز ائتمه لییک و سونرا قرار وئرمه لییک.

 

اگر بیز بو بویوک حرکتی باشاریلی و چوخ سایی دا میللتین قاتیلماسی ایله یارادا بیلسک و او حرکتده اوزوموزه مخصوص شوعارلار وئریب و سندلرین دونیایا چاتدیرساق، اوندا بیزیم سکوت سیاستمیزین معناسی تاماملاشار. یعنی بیز دئیه بیلریک کی یاشیل حرکاتی بوتون رسانه لری ایله، آمریکانین سسی، رادیو فردا، بی بی سی، ... فارس تئلویزیونالاری ایله چالیشدی آنجاق آذربایجاندا بیر کیچیک حرکتده یارادا بیلمه دی، آنجاق آذربایجان میللی حرکتی او زامان کی بو قرارا گلدی کی حرکت زامانی چاتیبدی بویوک میتینگ لر یارادا بیلدی. بو بیزیم میللی حرکتین گوجونو داها آرتیق گوستره بیلر.