آزاد کارگر تشکوللری (فعله قورولوشلاری) قورماق اوچون
آرديجيلليق کوميته سی نين بير مای قطعنامه سيندن

 

ايستکلريميز:

1 بيز فعله قورولوشلارينين آزادجاسينا قورماسی نی ايسته ييريک. دؤولت مقاملاريندان و اينستيتوتلاريندان ايجازه آلمادان و اونلارين موداخيله سی اولمادان، اؤز قورولوشلاريميزی قورماق بيزيم دوغال حقيميز ساييلر!

 

2 بيزجه، عالی امک شوراسی نين (شورای عالی کار) تصويبه يئتيرديگی ال موزدولرين حد اقلينه عاييد اولان قرار، اينسانين ان طبيعی و دوغال حقينی يعنی حيات حقينی و اينسان کيمی ياشاماق حقينی گوبودجاسينا پوزوب و آياق آلتينا سالير. بيز طلب ائديريک کی، يوبانمادان ، ال موزدلرين حداقلينه عاييد اولان قراردا تجديد نظر اولونسون ، بئله کی، فعله لر (کارگرلر) اوچون چاغداش اينسانين ياشاييش ايستانداردلاری ايله اويغون بير حياتين تامين ائديلمه سی مومکون اولا بيلسين.

 

3 بوتون موقتی امک موقاويله لری دايانمادان لغو ائديلمه لی و بو کيمی موقاويله لر اوزره ايشله ين فعله لرين هاميسی رسمی اولاراق ايستخدام اولونمالیدیرلار.

 

4 اعتيصاب ائتمک حقی بيزيم حقلريميزدندير. بيز اعتيصاب ائتمه نين و ها بئله بوتون تانينميش فورملارداکی فعله اعتيراض ائتمه لرينين آزاد اولونماسينی ايسته ييريک. ايجتيماعی و صينفی حقلريميزين تاپدالانماسينا قارشی اعتيصاب ائتمگی اؤزوموزه حق ساييريق.

 

5 ايش گونو عرضينده و ايش موحيطينده عومومی فعله توپلوملاری قورماق رسمی اولماليدير. بيز، اوچ طرفلی اگلشمه لرده و ها بئله فعله لرين موقدراتينا مربوط اولان بوتون اوموراتدا، موستقيل فعله نوماينده لرينين موستقيم اولاراق موداخيله سی و ايشتيراک ائتمه سينی ايسته ييريک.

 

6 بوتون يوباديلميش امک حقلری (الموزدولر) فورا اؤده نيلمه ليدير. اينديليکده، امک حقلرينی واختلی واختيندا اؤده مه مک معمولی بير شيوه يه چئوريلبدير. بونو ايش صاحيبلرينه (کارفرمالارا) قداغان ائتمک گرکدير.

 

7 اون سککيز 18 ياشا دولموشلارين هاميسی، کيشى ويا قادين اولماسينا باخماياراق، امک ايله تامين اولونماليديرلار، بو اولمايان صورتده اونلارا کيفايت قدری ايشسيزليک حقی وئريلمه ليدير. ايشله مگه حاضير اولانلارين هاميسينا الموزدلرين حداقلی قدری ايشسيزليک سيورغاتی (بيمه سی) وئريلمه ليدير.

 

8 بيز موعليملرين و شفقت باجيلارينين (پرستارلارين) حقلی ايستکلريندن حيمايت ائديب و اونلارين تاپدالانميش حقلرينين يئرينه يئتيريلمه سينی ايسته ييريک.

 

9 بيز هر نوع جينسی آيری سئچگيليگن لغو ائديلمه سی نی ايسته ييريک و بوتون ايجتيماعی، ايقتيصادی عرصه لرده قادينلارلا کيشيلرين کاميل حوقوق برابرليگيندن حيمايت ائديريک.

 

10 ايجتيماعی و صينفی فعاليتلر اساسيندا فعله لری ايشدن چيخارتماق ، توتماق، سورگون ائتمک، هده قورخويا و تضييقه معروض قويماق، فوری اولاراق دايانديريلماليدير و قانونجاسينا جورم ساييلماليدير.

 

11 ايش يئرلرينده قووه لری تعديل ائتمه و فعله لری ايشدن چيخارتماق، نه فورمدا و نه باهانا ايله اولورسا اولسون، دايانديريليب و قداغان ائديلمه ليدير. بيز بوتون ايشدن چيخاريلميش فعله لرين ايش باشينا قايتاريلماسينی و اونلارا يئتيريلميش ضررلرين اؤده نيلمه سينی ايسته ييريک.

 

12 - بيز تقاعود اولانلارين (بازنيشسته لرين) و ايش قا بليتينی ايتيرميشلرين آيليقلارينين آرتماسينی، و اونلارين اينسانا يارايان بير ياشاييشلا تامين ائديلمه سينی ايسته ييريک.

 

13 بيز، اوشاقلارين هاميسی نين بوتون ريفاه و تعليم تربيت ايمکانلاريندان فايدالانمالارينی و ياخشی ياشامالارينی ايسته ييريک.

 

14 مای آيی نين 1- بيری تعطيل گونو کيمی ساييليب و رسمی تقويملرده قئيد اولونماليدير. بو گونه عاييد هر جور مراسيم توتما قداغانليغی، لغو ائيلمه ليدير.