بوراسی بابک قالاسی؛

دانیشیر آذربایجان

 

 

 

 

سعید موغانلی

 

 

 

یوخ ائدین اینسانین اینسانا قوللوغونو!

بو دعوت بیزیم

یاشاماق بیر آغاج کیمی تک و حر

و بیر اورمان کیمی قارداشجاسینا

بو حسرت بیزیم.

 

ناظیم حیکمت

 

بابک اؤلوبدورسه ده

هله تبریز اؤلمه ییب

او گؤزلریله دؤیوشور

 

بابکین مزاری امامیه ده دیر، صمد کؤنلوموزده دیرسه، فریدون بَی گؤزلریمیزده یاشاماغا حاقلی دیر. آخی بیر گون پاییزدا اوشویور دادستان. آذربایجان دانیشاندا دیشلری، دیشلرینه دَیَر دارآغاجلارینین. وگولوستان باغیندا بوتون سینه لره تاخیلمایان گوللر بوینو بوکوک آغلار. بؤیوک تبریزین سولمازلیغی دیر بوباغ، کی اوتوز بئش مین شهیدین بوردا چیچک لندی سولماز سئوگیسی، بیر گون پاییزدا شاعیر سئوگیسی امامیه ده چیچکلنن کیمی. اوندایدی کی آذر گوللۀ لندی، بایجان یاساق اولدو. وایگیرمی بیر آذرقیزلاری قارداشسیز قالدی. ساری ساچلی، یاشیل گؤزلو، چینار بویلو سولماز، تبریزین دولان با دولان کوچه لرینده قارا گیله مرثیه سینی دوداقلاریندا گؤیرتدی. و گؤم-گؤی گؤیردی دوداقلاردا شاللاقلی کوره ک لر، قاداغان سئوگی نین زمزمه سیندن. تپیک دؤیوش آلتیندا قیر قوم لارا یاخیلدی گونش قیزلاری. بیر داها بورلاخاتین لار، بوغدای اوغلان لارا وورولمایاجاق. و بابک اوغول لار، گؤزلرینده سئوگی، سینه سینده باریت، دوداقلاریندا وطن داشییان، سئوینج قیزلارینا سؤیله مه یه جک، - بیر دَلی شئیطان دئییر دور قاداسین آل بونون ایندی امامیه نین آغلاغان قیزلاری،بابک قالاسیندا دَلی سوو قیزلارا دؤنموش. هایدی دَلی

ر، قالادا بوغدای داداش لار جان اوسته دیرلر. هایدی دَلی لر، زرنسا آنانین گنجه یایلیق ینین قوخوسو بوروموشدو کوچه لری، و بای بَی بابامیزین بوینونون قانی قیزارتمیشدی گونشی. هایدی چیچک بانی لار، سئلجان خاتین لار، قاراجا اوغلان لار، دَلی دومرول لر سئوداسیز اؤلدو. اللریندن اؤپه ریم، گؤزلرینه آند ایچه ریم، یالقیز دؤیوشور قیلینج کوراوغلوسو، ساز کوراوغلوسو. و سؤز آللاهلاری پریزیدئنت اولماق ایسته ییر، کی بابک قالاسی چئینه توپور اولور میندار سؤزجوک لرین آراسیندا. هایدی سولماز، - تئللرین باس یاراما قویما منی قان آپارا

بورا گونش له آللاهین قونشولوغوندا بیر یئر دیر، بوراسی بابک قالاسی، دانیشیر آذربایجان.

هایدی دَلی لر، سئوگینین قاداغان چاغیندا، عشق گوناهدیرسا، سئوگی مینداردیر، دئییرلرسه، اؤله- اؤله یاشاماقدانسا !، یاشاسین اؤلوم! یاشاسین اؤلوم! یاشاسین اؤلوم!

هایدی بَی لر، هایدی بایان لار، بابک قالاسی یالقیز آغلاییر. هایدی چه گوواراچی لار، هایدی فاتح لر، محمدامین لر، آتیلا، شیخ احمدیسوی لر، مقدس اردبیلی لر، ثقه الاسلام لار، عم اوغلولار، خالوغلولار، هایدی قاسپیرالی نین بالالاری، بابک الینده قانلی بایراق بیزلری گؤزلور.

بوگون قورد قارتال تپه سینده خلیل رضا داوام ائدیر اوتوز یئددی، داها کسگین ، داها جیدی سؤیله ییر. بوغدای دؤنومونده ساهیر، بیر خزاندا سئودالاندیق ... ماهنی سینی اوخویور. قاراقاشقا دورانندا ،بختیارلا شهریار گولوستان موقاویله سینه آیاقلاری آلتدا باطیل اولدو مؤهرو باسیرلار.

 

(آنام تبریز منه سؤیلردی یاوروم بیل

سنین قالمیش او تایدا، خاللی تئللی بیر خالان واردیر)

 

آینالی مئشه لیک لرینین جئیران جویورلری، آراز قیراق لارینین بوز قوردلاری، و کلیبر یایلاق لارینین توکانچی لاری بیزلری گؤزلور. و مین پیلله آیاغیندا ائلچی آللاهلار قاراباغ شیکسته سی سیزلیر. قدیرین سونا بولبول لری نازیل اولور. اوردا باریشماز هارای چکیر، باریش مانچو گولور. اوردا زهتابی سو دئییبدیر منه اولده آنام آب کی یوخ چاغیریر، و شاه اسماعیل دده، دؤیوش چاغی وصیت ائدیر.بو وطنه، بو دیله الیمدن گله نی ائتدیم .خطا لاریمی تکرار ائتمه یین و ترخان کئچیدینده ناظیم حیکمت جسارتله اوخویور تورکولرینی؛

 

سن گلمه سن/ من گلمه سم/ بیز گلمه سک/ ناسیل چیخار قارانلیق لار آیدین لیغا/ هاوا تورپاق کیمی گبه/ هاوا قورشون کیمی آغیر/ باغیر-باغیر-باغیریوروم، باغیر/ قوشون قورشون اریتمه یه چاغیریوروم.