خاطیره لریمده کی دوکتور صمد سرداری نیا

 

 

 

 

مرحوم دوکتور سرداری نیانین آدینی چوخ کیچیک یاشلاریمدان بیلیردیم. او زامان آتام مرحوم هدایت هیئت وارلیق درگیسی نین تبریزده کی داغیتیم ایشینی عهده سینه آلمیشدی و درگی هر آی بیزیم ائوه گؤندریلردی. اؤنجه لری درگیده کی تورکجه مقاله لری اوخوماقدا چتین لیک چکردیم و ان چوخ فارسجا مقاله لری و مرحوم منظوری خامنه نین "تورکجه- فارسجا محاوره" آدلی سلسله یازیلارینی اوخویاردیم. صمد سرداری نیانین مقاله لری فارسجا اولوب، هر ساییدا دا یایینلاندیغی اوچون اونون آدی چوخ اسکیدن بری حافظه مه یئرلشمیشدی. 1365-ده آتام وفات ائدینجه درگی نین تبریز تمثیلچی لیگینی دوکتور سرداری نیا اوستلندی و او تاریخده من ده بؤیوک قارداشیم دوکتور فرهاد هئیت ین آراجیلیغی ایله دگرلی عالیمی یاخیندان زیارت ائتمه فرصتی تاپدیم. او زامانلار حؤرمتلی دوکتور جواد هئیت هر ایل ان آز بیر دفعه تبریزه گلیب دوستلاری و قوهوملاری ایله یاخیندان گؤروشردی. بو گؤروشمه لر داها چوخ تبریزین قیمتلی شخصیتلریندن اولان دوکتور خاقانی نین ائوینده گرچکلشردی و ادیبلر، یازارلار و بیلیم آداملاری اورایا توپلاناراق فیکیر مبادله سی آپاراردیلار. دوکتور سرداری نیا هرکسدن اول گلیب، هرکسدن آخیر چیخاردی. اونون حضورو مجلیسه ایستی لیک و آغیرلیق قاتاردی. یا هئچ دانیشمازدی، یا دا چاغداش آذربایجان تاریخینی، مطبوعاتینی و بؤیوک شخصیتلرینی اؤزونه مخصوص بیر مهارت و هیجانلا اوزون اوزون آنلاتاردی. عقیده سینده چوخ محکم ایدی و حیاتیندا سئچدیگی یولو سونونا قدر یورولمادان، اگیلمه دن و ساپمادان داوام ائتدیردی.

 

1369-جو ایلده (18 یاشیمدایکن) اوستاد دوکتور جواد هیئت منی مرحوم دوکتور زهتابی یه تاپشیردی و منیم الیمدن توتماسینی ایسته دی. دوکتور زهتابی او زامان تبریز رادیوسونون خارجی یایینلاریندا (برون مرزی) ایشله ین امکداشلارینا تورکجه درس وئریردی و من ده ایلک دفعه اورادا مرحوم زهتابی نین زیاریتینه گئتمیشدیم. او مرحوم منیم تلفونومو آلدی و بیر- ایکی گون سونرا منه تلفون ائده رک هر هفته باشقا بیر ائوده یاپیلان تورکجه کورسلارا دعوت ائتدی. بو منیم حیاتیمدا چوخ اؤنملی بیر حادثه ایدی. چونکی اساساً وارلیق درگیسیندن اؤیرندیگیم آذربایجان تورکجه سی ادبی دیلینی سیستملی بیر شکیلده، هم ده بؤیوک بیر اوستادین نظارتی آلتیندا تکمیل لشدیره جکدیم. ائوده کی صینیفلرده بیر-بیریندن دگرلی عالیملر، یازارلار و ادبیلر وار ایدی. اونلاردان بیری ده بیر نئچه گون اؤنجه ایتیردیگیمیز دوکتور صمد سرداری نیا ایدی. او انسانلارین یاشلارینا و بوتون مشغله لرینه رغماً آنا دیللرینی داها دریندن اؤیرنمگه چالیشمالاری اونلارین نه قدر عزملی، غیرتلی و یورولماز اولدوقلارینی و مینم دوغرو بیر یول سئچدیگیمی و اونلارین یولونو داوام ائتمم گرکدیگینی گؤستریردی. او تاریخدن تام 18 ایل گئچیر و من او انسانلارلا، اؤزللیکله ده مرحوم دوکتور سرداری نیا ایله عینی صینیفده، آنا دیلی درسلرینده اوتوردوغومو، اؤزوم اوچون بیر شرف حساب ائدیرم. تبریزده یاشادیغیم ایللرده او مرحومدان چوخ شئیلر اؤیرندیم. تبریز قزئتلری نین بیرینده چیخان ایلک مقاله می اوخودوقدان سونرا منه قیسا و چوخ معنالی بیر جمله دئمیشدی: "محمدرضا، مقاله نی اوخودوم، چوخ گؤزل ایدی، آنجاق چالیش ائله مقاله یاز کی، وارلیق درگیسی اونو یایینلاسین". بو جمله منی داها چوخ حرکته گتیردی و او تاریخدن سونرا مقاله لریمده وارلیق استانداردینی یاخالاماغا چالیشدیم وسونوندا باشاریلی اولدوم.

 

دوکتور سرداری نیانین وارلیق درگیسینه گؤندردیگی مقاله لر اؤزونه مخصوص نظامی، تمیزلیگی و گؤزل خطی ایله سئچیلردی. 1372-ده گؤندردیگی مقاله لرله 1386-دا گؤندردیگی مقاله لری مقایسه ائتدیگیمیزده اونون نه قدر دوزنلی و سلیقه لی اولدوغونو گؤره بیلریک. او هر زامان مقاله لرینی اوزون ساری کاغیذلاردا، هئچ بیر چیزمه و قارالاما اولمادان یازار و صحیفه نین سونونا قدر دولدوراردی.

 

دوکتور سرداری نیا ایله ان سون گؤروشوموز گئچن ایل تبریزده و او مرحومون ائوینده ایدی. دوکتور جواد هیئت بگ کیتابلارینی تبریزین میلّی کیتابخاناسینا هدیه ائتمک اوچون بیزیمله بیرلیکده تبریزده ایدی. مراسیمدن بیر گون سونرا مرحوم سرداری نیا بیزی ائولرینه آخشام یئمگینه دعوت ائتدی. قیزی ائلناز خانیم دوکتور هئیت بگین چوخ گؤزل بیر رسمینی چکیب ائوین دووارینا آسمیشدی. حیات یولداشی خانیم پیرهاشمی چوخ نفیس یئمکلر پیشیرمیشدی و اوغلو آیدین بگ قوناقلاری صمیمیت و محبتله آغیرلاییردی. من آنکارایا گله جگیم اوچون، او گئجه مرحوم سرداری نیا وارلیقدا یایینلانماق اوزره بیر نئچه مقاله سینی بیر یئرده منه وئردی. بیر نئچه آی سونرا بئله آجی بیر حادثه نین باش وئره جگینی عاغلیمین اوجوندان بئله گئچیره بیلمزدیم.

 

صمد سرداری نیا تام آنلامی ایله بیر تبریزلی ایدی. اونون دانیشیق طرزی، یاشامی، عایله یه مناسبتی و مسأله لره باخیشی اونون آنا یوردونا نه قدر باغلی اولدوغونون گؤسترگه سی ایدی. او، تبریز کیمی غرورلو، تبریز کیمی ساده ایدی. تبریز کیمی اگیلمز و تبریز کیمی آلچاق کؤنوللو ایدی.

 

مرحوم سرداری نیانین وارلیق درگیسی اوچون گؤستردیگی خیدمتلر اونودولمازدیر. هئچ بیر تمناسی اولمادان وارلیق درگیسی نین تبریزده داغیتیم ایشینی گؤرور و اونو یاخیندان تعقیب ائدردی و وارلیق درگیسی نین سون مقاله لری اونا عاید ایدی.

روحو شاد، مزاری ایشیقلی، قالانلاری دؤزوملو، سئونلری صبیرلی اولسون.

 

 

محمدرضا هیئت وارلیق درگیسی رداکتورو