1 مای دونیا ایشچیلر گونو حاققیندا اویرنجی نین باخیشی

 

هر بیر توپلوم دا ایشچی طبقه سی او توپلومون اقتصادی و صنعتی گلیشمه سینده چوخ بویوک و اونملی رولو واردیر. ایشچی لر ایستر اوزه ل و ایستر دولتی بخش ده اولکه نین قالخینماسینا خدمت ائدیرلر. تاریخ بویو ایشچی طبقه سی بویوک ظلم لره معروض قالیب. بو طبقه هر زامان سرمایه دار طبقه سی و دیکتاتور حکومت لر قارشیسیندا حیات موجادله سی وئریب. بو موجادله لر سونوجو ایشچی طبقه سی بعضی اونملی حقلری الده ائتمه یی باشاریب. آنجاق نه یازیق کی بعضا ایشچی طبقه سی آدینا دونیا ایشچی دیکتاتوریالارینین یارانماسینا دا شاهید اولموشوق. دوغرو ایشله ین ایشچی لر بعضا گورمزده ن گلینیب و ایشچی طبقه سینده ن مودافعه آدینا بویوک سیاسی رانت لاردان استفاده ائده نلرده آز اولماییب. آذربایجان دا دا ایشچی لر چوخو زامان یاشام سیخینتی سی ایله اوزله شیب لر. اونلار یئرسیز یئره ایش لرینده ن چیخاردیلیب لار و یا آیلار چالیشسالاردا ان ابتدائی یاشام استانداردینی تامین ائده ن معاشیلارینی بئله آلا بیلمه ییب لر. سون واختلاردا خبرلرده بئله شئی لرله چوخ اوزه اوزه گلیریک. آنجاق بوتون بو سیخینتی لارا باخمایاراق دونیانین هر یئرینده اولدوغو کیمی آذربایجان ایشچی سی ده دونیا ایشچیلر گونونو (12 اردیبهشت، 1 می) قوتلاماق ایسته ییر.

ایشچی گونون اعلانی یولوندا ایشچی لر چوخ زحمت لر چکیب لر و تاریخ بونا بویوک بیر شاهیدیر.

ایلک دفعه 1856 دا استرالیانین ملبورن شهرینده داش و تیکینتی ایشچیلری 8 ساعاتلیق ایش گونو اوچون ملبورن بیلیم یوردوندان مجلیس ائوینه قده ر بیر تظاهرات دوزنله دیلر. 1 مای 1886 دا آمئریکا ایشچی سندیکالاری کنفدراسیونو باشچی لیغیندا ایشچیلر 12 ساعات، هفته ده 6 گون اولان چالیشما یئرینه، گونلوک 8 ساعاتلیق چالیشما طلبی ایله ایشی بوراخدیلار. شیکاگوداکی تظاهراتلاردا یاریم میلیون ایشجی ایشتیراک ائتمیشدیر. قانونی تضیقلر و باسقی لار سونوجو بو گوسترینین تکرارلانماسینین قاباغین آلدی. 1889 دا توپلانان ایکینجی اینترناسیونال دا فرانسه لی بیر ایشچی تمثیلچی سی تکلیفی ایله 1 مای گونو بوتون دونیا دا بیرلیک، مجادله و دایانیشما گونو اولاراق جشن توتولماسینا قرار وئریلدی. و بئله لیکله ایشچی لرده اوز آدلارینا بیر گونو تقویم صحیفه لرینه یازماغی باشاردیلار. آما موجادیله لر بوردا سونا چاتمادی و بو حیات موجادله سی ائله بو گونده دونیانین هر یئرینده اولدوغو کیمی گونئی آذربایجان دا دا دوام ائدیر.

دونیا گنلینده باخدیغیمیزدا، ایشچیلر هر بیر توپلومون ان چتین شرایطینده چالیشان طبقه نی تشکیل وئریرلر. بونون اوچون ایشچی حاقلارینین قورونماسی او توپلومون ایشچی سینه سایغی سینی دا گوستریر. بیلدییمیز کیمی آذربایجان دا دا ایشچیلرین حقلری ده تاپدانماقدادیر. ایشچیلرده بیر چوخ طبقه کیمی اوز حقلرینی الده ائتمک اوچون مجادله وئرمکده دیرلر.

بوردا ایندی بو سوالی وئرمک اولار، ندن سیستئملی بیر آذربایجان ایشچی حرکتی یوخدور؟ میللی حرکت چرچیوه سینده آذربایجان ایشچی سینینیئری هاردادیر؟ بونو بیلیریک کی آذربایجان میللی حرکتی ایچریسینده کی فعاللارین بیر چوخو ائله بو ایشچی طبقه سیندندیر. بیزیم ایشچیلریمیزده میللی دویغولارین قورویاراق بیر ایشچی حرکتی یاراتما فیکرینده اولمالیدیرلار. آذربایجان میللی بیر صنعت و اقتصادا احتیاجی وار. ملتیمیزین رفاه دوزه یینین آرتیرماسی و دونیا یاشام استاندرلارینا اویوملو اولاراق شرافتمندانه یاشاماسی اوچون ایشچی لرین وارلیقلاری و اونملری داها آرتیق تانینمالی دیر. دونیادا هر بیر ایشچی نین اوز اولکه سی ایچریسینده آلنی آچیق بیر یاشام سوردورمه یه و او یاشادیغی اولکه نین چیخارلارین قوروماغا حقی وار. بو گون گونئی آذربایجان ملتینین قایغی سیندا اولان بیر ایشچی طبقه سی نین صنفی ایستک لر ایله بیرلیکده میللی ایستک لر آراسیندا محکم بیر باغلانتی نین اولماسینا احتیاجی وار. آرتیق آذربایجان دا اولان ایشچی لر ده سیستماتیک اولاراق هم اوز اقتصادی-صنفی حاقلارین و هم میللی حرکتین چالیشقان موتورلاری اولماغا فکیرلشمه لیدیرلر. اوته یاندان ایسه میللی فعاللار هر زامان ایشچی طبقه سینین آرخاسیندا دورمالی و اونلارین صنفی ایستک لرینه احترام قویاراق اونلاری دستکله مه لی دیر.

گونئی آذربایجان دا اویرنجی، اویرتمن، ایچشی، قادین و .... توپلومسال حرکتلر چیین چیینه میللی منافعیمیزین و میللی حرکتیمیزین ان گوجلو عنصرلرینه چئوریلمه دیرلر.

اویرنجی سیته سی اولاراق، ایشچی گونونو بوتون آذربایجان و دونیا ایشچیلرینه تبریک ائدیریک. هر زامان مظلوم ایشچیمیزین یانیندا دوراجاغیمیزا و اونلار حقلرینین طلب ائده جه ییمیزی سوز وئریریک. نئیه کی بو گون اویرنجی فعاللاری ائله بو توپلوم ایشچی لرینین بالالاری دیرلار و هر کس ده ن آرتیق ایشچی نین دورومونون نه قده ر آغیر اولدوغونو بیلیرلر.

 

گلجک بیزیمدیر

اویرنجی