قهرمان تبریز

 

بوردا بیر شیر داردا قالیب باغیریر...

 

یئنه ده قهرمان تبریز زنجیرلرینی دارتیب، قیرماقدادیر.

یئنه ده یارالی تبریز یارالارینی ساریب، آیاغا قالخماقدادیر.

یئنه ده افسانه وی تبریز یوموروقلارینی دویونله ییب، سینه گریب، فاشیزمه و شوونیزمه میدان اوخوماقدادیر.

یئنه ده قوچ کوراوغلونون هالای پوزان و صف داغیدان نعره لری، راسته کوچه ده ن، بازاردان، قره آغاج دان، کوچه باغدان و عینالی اتک لرینده ن ائشیدیلمک ده دیر.

 

ائشیدین!... ائشیدین!... زیللر بو گون کیملر اوچون چالیر...

 

سویله یین! سویله یین! عزیزلریم!

-          استانداری یه یوروش آپاران قادینلارین ئؤنونده گئده ن آغ بیرچک باجی میز، زینت پاشا دئییل می؟

-          آغ بایراقلاری ییخا- ییخا امیره قیزدان گلن ایگیت لر! سیزلرله بیرلیک ده، ستار دا گلدی می؟

-          باغمئشه ده ن گلن گنج لر! حسین باغبان هاردادیر؟

-          خیاواندان دانشگاها یوروش آپارانلار! سالار کوچه سینده ن کئچرکن باقر دان دا خبر توتدونوزمو؟

-          گامیش آوان دان، شام قازان دان، حکماواردان و لاله ده ن گلن باجی- قارداشلاریم! یولدا نبی ایله حلاج اوغلو حسینی گوردونوزمو؟

-          باغ قاباغیندا توپلانان لار! شیخ گلیب چاتدی می؟

 

آه عزیزلریم! ...

منیم درد- داشلاریم!

ساعات قاباغیندا توپلانان باجی و قارداشلاریم!

فریدون ابراهیمی، سریه، ساری خلیل، کلانتری و صمد ده ن یاد ائده ر کن، قونقا باشیندا درس کتابلاری الینده، ئؤره گینده گولله یاراسی قیزیل گول گیمی آچان، آدسیز- نشان سیز گنج شهیدیمیز ی ده اونوتمایین!

آمان اونودمایین!

 

و نهایت...

اورمو دان، اردبیل ده ن، زنجان دان، همدان دان، آستارادان و سولدوزدان سئل کیمی آخیب گلن گنج لر!

سید جعفرین ین گولله ده ن دئشیک- دئشیک اولان بایراغینی، یئنی ده ن سیزمی قالدیراجاقسینیز؟

سویله یین!

سیزمی قالدیراجاقسینیز؟

 

2 خرداد 1385

س. حاتملوی