آذربایجان میلی فعاللارینین دوزه نله مه شوراسی٬ تشکیلاتلانماغا دوغرو قوجامان بیر آددیم

علیرضا قولونجو

آذربایجان میلی فعاللارینین دوزه نله مه شوراسی قورولدوقدان سونرا ایران اسلام جمهوریتی ۱۰-جو جمهور باشقانلیغی سئچیملری ایه علاقه لی نئچه بیاننامه یاییملایاراق چوخ دوغرو و حساب اولونموش موناسیبتلر بیلدیرمیشدیر.

اصلینده بو شورانین سادجه تشکیل اولماسی باشلی باشینا میلی - مدنی حرکتیمیزده تشکیلاتلانماغا دوغرو آتیلان قوجامان بیر آددیمدیر.

ایراندا فعالیت گؤسترن قروپلار و تشکیلاتلار و یا ایرانین دیشیندا اولان قروپلارین اؤلکه ایچینده کی اوزانتیلاری٬ تمثیل ائتدیکلری توپلوم و سیاسی حرکتلرین منفعتلرینی قورویوب و اؤلکه ده باش وئرن سیاسی اولایلاردا بیر بوتون اولاراق سیاستلرینی سرگیله رکن٬ گونئی آذربایجان میلی - مدنی حرکتینین بو اولایلار قارشیسیندا بوتون بیر سیاست سرگیله مه دییندن بیر چوخ فورصتلر و شانسلاری ایتیردییمیز آز اولمامیشدیر.

ایراندا ۱۰-جو جمهور باشقانلیغی آدایلارینین غیر رسمی اولاراق سئچیم کامپانیالارینی باشلاتدیقلاریندان سونرا٬ آذربایجان میلی فعاللارینین ـ کئچن ایللرده کی ایله تام فرقلی اولاراق ـ داها گوجلو٬ داها بوتون و داها منطیقلی اولاراق سئچیم معادیله لرینی ائتگیله مک اوچون گؤستردیکلری چابالار و الده ائتدیکلری باشاریلاری گؤرمک چوخ دا چتین دئییلدیر. بو باشاریلارین ان اؤنملیسی اولان٬ بیر چوخ تانینمیش فعال و درنه یین دسته یینی قازانان میلی دوزنله مه (کوردیناسیون) شوراسی نین ائتگیسی سادجه بو سئچیملرله قالماییب گله جکده الده ائده جه ییمیز باشاریلارین دا تملی اولاجاقدیر٬ دئیه اینانیرام.

۶ ایون ۲۰۰۹
کانادا٬ تورونتو