( اونونجو جمهوريت باشقانليغي سئچكيلرينه عايد )

آذربايجان مدني- سيويل فعال‌لاري‌نين دوزه‌نله‌مه شوراسي

اؤز فعاليّت‌لرينه داوام ائتديره‌جك!

 

شرفلي، اونودولماز آذربايجان فعالي، رحمت‌ليك غلامرضا اماني‌نين آنما مراسيمي زاماني تبريزده بعضي دوستلار بو قرارا گلديلركي، جمهوريت باشقانليغي سئچكيلرينه تفاوت‌سوز قالماييب، عمومي بير شورا قورماغا چاليشيب و بو شورا چرچيوه‌سينده فعاليت ائتسينلر.

دورومون چتين‌ليك‌لرينه گؤره، شورا قورما ايشي چوخ آغير ايره‌لي گئتدي.. بو ايش هر يئردن آرتيق تهراندا يوباندي. اردبيل، تبريز و ... دوستلاري‌نين تاكيدي ايله بعضي دوستلار تهراندا شورا قورما وظيفه‌سيني عهده‌لرينه آلديلار و قرار اولدو تهرانين محلّه‌لري، كرج، قلعه حسنخان، اشتهارد، رودهن، قزوين،كهريزك، هشتگرد، محمدشهر، شميران، ساوه، قم، ورامين، اسلامشهر، باغ فيض، شهر ري، مامازان، واوان، انديشه، قرچك، ايوان‌كي، كن، دهكده المپيك و - ده شورا قوروب، سئچيلميش نوماينده‌لرينين اشتراكي ايله تهران استاني‌نين عمومي شوراسي قورولسون. هابئله قرار ايدي اؤيرنجي‌سل شورا دا بو شورا ايله ياناشي آيريدا قورولسون. اوراجان كي، ممكن ايدي دوستلارين يارديمي ايله شورا قورما ايشي ايره‌لي گئتدي، بعضي يئرلرده سرعتله، بعضي يئرلرده يوباناراق. هر حالدا ايگيرمي( 20 ) شهر و محله،‌ شوراسيني قوروب و نوماينده‌لريني سئچميشديلر . بير نئچه يئرده ده هله بو ايشي قورتارماييب.

بعضي چاتيشمامازليقلارا گؤره اؤيرنجي‌سل شوراي‌نين قورولماسي اصلي هدف دن اوزاقلاشيب يوبانميشدي. بو آرادا بير سيرا اؤيرنجي اولمايان دوستلار بعضي اؤيرنجي‌لرله بيرليكده بير شورا قورماغا چاليشاراق 62 نفردن دعوت ائتميشديلر كي، تخمينا 30- 32 نفر گليب و تركيبينه هم اؤيرنجي هم ده اؤيرنجي اولمايانلار داخل اولموش 9 نفرليك بير شورا سئچيرلر. سونرا بو دوققوز نفردن ايكي نفر، هابئله ايكي نفر نفرده يوخاريدا آدي چكيلن شورالارين طرفيندن موقتي و بير جلسه‌ليك اولاراق آذربايجان عمومي شوراسينا قوشولماغا اعزام اولدولار. سؤزو گئدن نوماينده‌لر آذربايجان عمومي شوراسيندا حاضير اولوب بير سيرا قرارلاري دا قبول ائتميشديلر. اوجمله‌دن قرار اولموشدو آذربايجان عمومي شورانين ايكينجي جلسه‌سينه، تهران استاني‌نين قطعي و رسمي نوماينده‌لري اعزام اولونسون. بو آرادا يوخاريدا آدي چكيلن دوققوز نفرليك شورانين ان آزي ايكي نفري بعضي مسئله‌لره گؤره او شورادان قيراغا چكيلير . اونون آردينجا يئرده قالان‌لار اينتئرنئت واسيطه‌سيله قيسا بير بيانيه ده بو فعاليتلردن اؤز قيراغا چكيلمه‌لريني اِعلان ائديب، استعفا وئرميشديلر. بو گؤزلنيلمز استعفا چوخ تأسفلنديرجي ايدي. آنجاق بير تصميم‌ديركي، دوستلار توتوبلار. تهران استاني‌نين شوراسي بو تصميمه اِحترام قوياراق اؤز فعاليت‌لرينه داوام ائتديرمه‌يي اؤزونه وظيفه و بورج بيلير.

بونو دئمك ده لازيم گؤرونو كي،گلن جمعه‌يه قدر ( 25 / 2 / 1388 ) شورا قورما ايشي تهراندا سونا چاتاجاق. و تهران استاني‌نين شوراسي‌، آذربايجان عمومي شوراسينا اؤز قطعي و رسمي نوماينده‌لريني گؤنده‌ره‌جك.

 

دقت و آييق‌ليق‌لا سئچكي‌لري و اونا عايد مسئله‌لري گؤز آلتينا آلاق !

جمعه گونو 18/ 2 / 1388 - آذربايجان سيويل مدني فعال‌لاري‌نين دوزه‌نله‌مه شوراسي

( اونونجو جمهوريت باشقانليغي سئچكيلرينه عايد )