آذربايجان ۵ آذربايجان دموکرات فرقه سى نين ناشر افکارى

 

 

آذربايجان دموکرات فرقه سينين بياناتی

    ۲۱ آذر حرکاتينين۶۰ ايلی تمام اولدو. هم ۲۱ آذر حرکاتی همده او دؤوردن کئچن۶۰ ايلده ايراندا و دونيادا طالع يوکلو حادثه لر باش وئردی. آذربايجان خالقی ژاندارم و مولکه دار ظلمونه، ايرانين مرتجع قوه لرينين رضاخان ديکتاتوراسينی يئنيدن برپا ائتمک نيتينه قارشی، اولوم- ديريم مبارزه سينه باشلادی. همين مبارزه يه رهبرليک ائتمک مقصدی ايله عموم ملی خصوصيت داشييان، آذربايجان دموکرات فرقه سی تشکيل ائديلدی. انقلابی مبارزه يه تام حاضر اولان آذربايجان خالقينی قيسا بير مدتده سفربر ائتدی. آذربايجان خالقينين ملی و دموکراتيک حرکاتی ۲۱ آذر ۱۳۲٤- جی ايلده تام غلبه ايله نتيجه لندی.

     ۲۱ آذر حرکاتی سلاحلی عصيان کيمی تاريخه دوشسه ده، اورمو حادثه لرينی استثناء ائتمکله، گئنيش مقياسلی قانلی دؤيوش باش وئرمه دی. اونا گؤره باش وئرمه دی کی، تهران اؤزونو ايتيرميشدی. آذربايجاندا تهران مرتجعلرينين منافعلرينی مدافعه ائدن قووه لر خالق عموم حرکاتيندان قورخويا دوشه رک، تسليم اولماق مجبوريتينده قالديلار.

     ۲۱ آذر حرکاتينين غلبه سی، آذربايجاندا ملی حکومتين تشکيل ائديلمه سينی آسانلاشديردی. ملی حکومت آذربايجان دموکرات فرقه سينين رهبرليی ايله سياسی، اجتماعی و اقتصادی اصلاحاتلار آپاردی.

     آذربايجان خالقينا صداقتله خدمت ائتمک ايسته ين اردو ضابيطلری و دؤلت مامورلارينين آذربايجاندا فعاليت گؤسترمه سی اوچون گئنيش امکان ياراندی. دموکراتيک سئچکی کئچيريلدی. آذربايجان ملی مجلسی ايشه باشلادی. ملی حکومتين ترکبيی و اونون دؤلت پراقراماسينی تصئيق ائتدی. آذربايجان خالقينين انقلابی نائليتلرينی قوروماق اوچون، فدائی دسته لری ايله يآناشی، يئنی ملی اوردو ياراندی. ژاندارم و پليس دستگاهی لغو ائديلدی. شهرو کندلرده اهالينين تهلوکه سيزليينی قوروماق مقصدی ايله ملی نظميه تشکيلاتی فعاليته باشلادی.

     آذربايجان ديلی رسمی دؤلت ديلی اعلان ائديلدی. دؤلت اداره لرينده يازی آذربايجان ديلينده آپاريلدی. ابتدايی مکتبلردن باشلاياراق، عالی مکتبلره قدر تدريس آذربايجان ديلينده آپاريلدی. شهرلرين سيماسی ده يشيلدی، خيابانلارا و کوچه لره آسفالت دؤشندی. شهرلر آراسی يوللار سرعتله تعمير اولوندو. کندلی- ماليک مناسبتلرينی تنظيم ائدن قانون قبول ائديلدی. خالصه تورپاقلاری پولسوز اولاراق، کند اهاليسی آراسيندا بؤلوندو. اهالييه طبی خدمت اوچون شهر و کندلرده طب منطقه لری ياراندی. صاحب سيز اوشاقلاری دؤلت حمايه سی ايله احاطه ائتمک اوچون اوشاق ائولری آچيلدی. آذربايجان دموکرات فرقه سی و ملی حکومتين ادبيياتا، اينجه صنعته و عموميتله ملی مدنيته قايغيسی نتيجه سينده ايران تاريخينده ايلک دفعه اولاراق، دؤلت فلارمونياسی و دؤلت تئاتری ايشه باشلادی.

     بو مدنيت مرکزلرينين شعبه لری آذربايجانين شهرلرينده ياراديلدی. ادبيات و شعرين انکيشاف ائتديريلمه سی اوچون، شاعرلر مجليسی تشکيل ائديلدی. شاعرلر مجلسينين متبوع اورقانی نشره باشلادی. تبريز، اورمو، زنگان و اردبيلده چوخ سايلی قزئتلر نشر ائديلدی. تبريز راديوسو تاسيس ائديلدی. بو کوتله وی اينفورماسييا واسطه لری، تهران مرتجعلرينين آذربايجانا قارشی ياغديرديقلاری تهمت و افترالاری افشا ائتمکله ياناشی آذربايجاندا آپاريلان مترقی اصلاحاتلارين گئديشينی اؤز صحيفه لرينده عکس ائتديريردی.

     انقلابلار تاريخی، دفعه لرله ثبوتا يئتيرميش دير کی، خالقين آخار انرژينی سفربر ائديلديکده، انقلابی ده ييشيکليکلرين سرعتله حياتا کئچيريلير. آذربايجان دموکرات فرقه سی محض بو استقامتده خالقی سفربر ائتدی و بير ايل عرضينده ايران تاريخينده مثلی گؤرونمه ين معجزه لر ياراتدی. ائله معجزه لر کی اونون ايزينی تهران مرتجعلری آذربايجان خالقينين دوشونجه و شعوروندان سيله بيلمه دی. عکسينه بو نائليتلر سينه دن سينه يه، نسيلدن نسيله کئچره ک، خالق داستانلارينا چئوريلدی. ائله داستانلار کی، بوگونده خالق آراسيندا گئنيش يايلير.

     آذربايجان دموکرات فرقه سی و آذربايجان ملی حکومتی يئنی دؤوره و يئنی شرايطه اويغون اولاراق، ملی مبارزه بايراغينا چئوريلير. خالق، خصوصی ايله ضيالی گنجلر بو بايراق آلتيندا بيرلشيرلر، ملی حقوقلار اوغروندا مبارزه آپاريرلار.

     بو مبارزه ده ايره لی سورولن شعارلار مختلف اولسادا، اساس و آپاريجی شعار فدرال دؤلت شعاری دير. دئمک اولار کی مترقی قووه لرين عمومی شعاری دير. ائله بير شعار کی، اونون حياتا کئچيريلمه سی ايله واحد ايران چرچيوه سينده ملتلرين تعيين مقدرات حقوقو رئاللاشير.

     دونيانين قلاباللاشديغی بير زامان ملی آزادليق حرکاتينين غلبه سی اوچون گئنيش امکان و الوئريشلی شرايط يارانير. آزادليق سئور قووه لرين حرکت بيرليی بو غلبه نين تامين ائديلمه سی اوچون مهم عامل دير.

  

آذربايجان دموکرات فرقه سی

۱۳۸٤- جی ايلين آذر آيی