بيزي بيزه تانيتديران کتاب
 
 
 
 ميانالي عليرضا: "سيلاحلا اولچولن تورپاق-آذربايجان ملي حکومتي -60", 
کانادا- ونکووئر 2005
 
 
 
 هر زامان باش اوجا ياشاماق اوچون,
 او عصرين هنرين اويرنمک گره ک!
 آتايا گوونمک هنر دئييلدير,
 دونيادا هنره گوونمک گره ک.
 
 
 
 ميانالي عليرضا بير شاعير و ملي روحلي قلم ساحيبي کيمي واحد آذربايجان 
اوچون ياخشي تانينان شخصيتلردندير. چوخ گنج اولماسينا باخماياراق اونون بو 
واختا قدر گوردويي ايشلرله هر آذربايجانلي اويونه بيلر. عليرضانين هله 
ميانادا ياشايارکن گوردويي ناشرليک فعاليتي, شمالي آذربايجان شاعيرلري نين 
اثرلريني اوز مادي و معنوي فداکارليغي حسابينا گونئيده ايلک دفعه نشر 
ائتديرمه سي, داها سونرا باکييا مهاجرت ائتديکدن سونرا 21 آذر تشکيلاتي نين 
ايلک قوروجولاريندان اولماسي, تشکيلاتين اورقاني 21 آذر درگيسينه باش 
يازارليق ائتمه سي, اصلينده بو درگيني شخصي فداکارليغي ايله نشر ائتديرمه سي 
اونون ملي خدمتلري نين ان ياددا قالان صحيفه لريندندير. نئچه ايللرديرکي, 
عليرضا سياسي مهاجرتده کانادادا ياشايير و بورادا دا گئجه ني گوندوزه 
قاتاراق اجتماي-سياسي, مدني ساحه ده گوردويي ايشلر , سونسوز زحمتي ايله هامي 
نين احتراميني قازانميشدير. ائله کانادا دا ملي حکومتين رهبري سيد جعفر 
پيشه وري نين نطقلريندن پارچالارين آيريجا کتاب حاليندا نشر اولونماسي, ملي 
حکومتين اويره نيلمه ميش صحيفه لري نين راديودا و مطبوعات صحيفه لرينده 
ايشيقلانديريلماسي عليرضانين بيزيم ملي حرکات تاريخيميزه نه قدر باغلي 
اولدوغوني بير داها تصديقله دي. بو چاليشمالار گوستردي کي, عليرضا هر يئرده 
اولورسا اولسون هئچ زامان شخصي منافعه يي اوچون ياشاماييب, ياشايا بيلمز. 
عليرضا هر يئرده آذربايجانلا, اونون منافعي ايله ياشايان بارماقلا ساييلان قدر 
آز ملي ضياليلاريميزداندير. 
 
سيلاحلا اولچولن تورپاق-آذربايجان ملي حکومتي -60 کتابي ايسه 
ميانالي عليرضانين بو واختا .قدر گورردويي ايشلرين ان يوکسک ذيروه سي, نمونه 
وي, گوزه ل ملت پرورليک نمونه سي ساييلا بيلر. 1945-46-
 جي ايللر گونئي آذربايجان ملي حکومتي آذربايجان خالقي نين ملي آزادليق 
تاريخينده اولدوقجا شرفلي بير يئر توتور. بونا باخماياراق ملي حکومتين 
تاريخي بو واختا قدر هرطرفلي تدقيق ائديلمه ميشدير. 
بو دفه ده عليرضا ايشين آغيريني اوز اوزرينه گوتوردي. ملي تاريخيميزين 
فاجعه لي بير دوورونون تاريخينه بويوک سئوگي ايله, فداکارليقلا اوز توتدي. 
ايکي جلدي 588 صحيفه دن عبارت اولان, تکجه قايناقلار سياهيسي 43 (!!!) 
صحيفه ني تشکيل ائدن بو نهنگ آراشديرما تکجه هجمي, استروکتوري ايله اوزي- 
اوزوني گوزه ل بير شه کيلده تقديم ائدير و استناد ائتديي تاريخي قايناقلار, 
ايشيقلانديرديغي پروبلئملر اعتباري ايله بو واختا قدر آلتئرناتيوي اولماديغي 
قناعتينه گه تيرير. 588 صحيفه ليک کتابدا 583 قايناقدان استفاده 
اولونموشدورکي, بو قايناقلارين تکجه نظردن کئچيريلمه سي ايللرله واخت طلب ائدير. 
کتاب عرب قرافيکاسي ايله نشر اولونموشدور. آرزو ائديريک کي, ياخين زاماندا 
لاتين الفباسي ايله ده نشر اولونسون, داها گئنيش اوخوجي آيديتوريياسي 
قازانسين, هر بير آذربايجانلي نين ايستول اوستي کتابينا چئوريلسين. بو گونه 
قدر بو کتاب باره سينده اوز نظرلريني بيلديرن عاليملرين و ملي حکومتين 
تاريخي نين آراشديريجيلاري نين عمومي قناعتينه گوره, حاقيندا بحث ائتدييميز 
اثر 46-1945-جي ايللر تاريخيميز باره ده تصوورلريميزي گئنيشلنديرن, 
تاريخيميزين بو دوورونه مختلف يِونلردن ايشيق سالان اولدوقجا ده يرلي بير اثردير. 
بيلدييميزه گوره, عليرضا نئچه ايللردير کي, ادبيات تاريخيميزه حصر 
اولونموش نامزدليک ديسئرتاسياسي اوزرينده چاليشير. جسارتله دئمک اولارکي, حاقيندا 
دانيشديغيميز کتاب حتي دوکتورلوق ديسئرتاسياسي نين علمي طلبلرينه تمامي 
ايله جاواب وئرير, بو فيکيرده يم کي, $$$$$ تدقيقات اينستيتوتلاري بو اثرين 
مولفينه تاريخ علملري دوکتوري علمي آديني وئرسلر, عدالتلي بير آدديم آتميش 
اولارلار. 
 
 بو واختا قدر ملي حکومت حاقيندا هر شئيي بيلديي اينانجيندا اولان 
چوخلي آداملار, عليرضانين نهنگ زحمتي نين و نهنگ سئوگيسي نين محصولي کيمي 
ميدانا گلميش بو کتابي تکجه ورقله سه لر, نه قدر يانيلديقلاريني اوزلري ده 
اعتراف ائده جک, ديله گه تيرمه لي اولاجاقلار. سيلاحلا اولچولن تورپاق 
کتابي نين مزييتلري, يئنيليکلري باره ده يازيليب, بوندان سونرا دا شبهه سيز 
يازيلاجاق. و بو کتاب شبهه سيز بوندان سونرا ملي حکومتين تاريخي ايله باغلي 
چوخ سايلي آراشديرمالار اوچون اعتبارلي, تمل قايناق رولي اويناياجاق. بير 
چوخ منبع لردن فرقلي اولاراق بورادا مولفين اوزونون فيکيرلري, ملاحيظه لري 
دئييل, داها چوخ تاريخي قايناقلار, آرخيو ماتئرياللاري, سيستاتيستيکا 
اوستونلوک تشکيل ائديرکي, بو دا علمي اثرين مزيتيني, سامباليني آرتيران 
جهتلردندير. بو ماتئرياللارين بير چوخي ايلک دفه محض عليرضانين اوزي طرفيندن 
اوزه چيخاريلميشدير.
 
 معين بير ملي حرکاتدا اشتراک ائدنلرين, او گونلرين جانلي شاهدلري نين 
خاطره لري همين تاريخي دوور باره ده ان اعتبارلي تاريخي ماخذ رولي 
اوينايير.سيلاحلا اولچولن تورپاق کتابيندا سانکي عليرضا ملي حکومتين رهبري, 
بويوک سيد جعفر پيشه وري نين آشاغيداکي اوزاق گورن فيکريني اساس گوتورموش, 
اوز قلمي ايله ملي وظيفه سيني يئرينه يئتيرميشدير.
 
 سيد جعفر پيشه وري يازيردي:  بير زامان گه لر خالق مشروطه 
انقلابيندا اشتراک ائدن بير مجاهد آختارارکي, اوزونون محبتيني اونا اظهار ائتسين. 
بلکه بير مدتدن سونرا اودا تاپيلماياجاقدير, او واخت خالق فقط تاريخه 
مراجعت ائدجکدير, اورادان بويوک حرکاتي اويرنمک ايسته يه جکدير. بو جهتدنديرکي, 
تاريخه جدي صورتده توجه ائتمک, الده اولان اسناد و مداريکي توپلاييب گلجک 
نسيل اوچون ساخلاماق لوزومي ميدانا چيخير.
 
 انترناسيوناليزم فيکرينه تاپينيب ملتي بير - بيرينه دوشمن- 
بورژوا-ايشچي قروپلارينا بولن انسانلارين يانيلديقلارينا بير داها ايمان گه تيرن 
اوخوجي بو کتابي اوخودوقدان سونرا بير داها بو قناعته گله جک کي, ملتلرين 
نجاتي يالنيز اونلارين ملي گوجلرينه ايناميندادير. اوخوجي بير داها 
ايناناجاق کي, ملتين اجتماعي عدالتدن بهره لنمه سينه شرايت ياراتماق ملت سئور 
ضياليلارين ان بويوک وظيفه لريندندير.
 
 ملت يولودور, حاق يولودور توتدوغوموز يول,
 اي حاق ياشا, اي سئوگيلي ملت, ياشا وار اول!
 
 سيلاحلا اولچولن تورپاق کتابي نين هر سطرينده بو ديللر ازبري شعرين 
بويوک بير حقيقتين افاده سي اولدوغي بير داها تصديق ائديلير.
 
 سيلاحلا اولچولن تورپاق کتابي ني ورقله ديکجه آذربايجان تورکلري 
نين آزادليغا, وطنه و اوني قوروماق اوچون ان بويوک فداکارليقلارا حاضر 
اولدوغوني گورمک اولار. اونون سطير به سطرينده ورقله نن, تکرارلانان سندلي 
تاريخيميز گوسته ريرکي, آذربايجان اوغول و قيزلاري دوورون بوز صفتينه و 
زامانين سرت اوزونه اعتيناسيز قالاراق, هئچ بير چتينليکدن, حتي حياتيني قوربان 
وئرمکدن قورخماياراق, چه کينمه يه رک اوز ملي, وجداني وظيفه لريني مشروطه 
حرکاتيندا, 1920- جي ايلين خياباني حرکاتيندا, نهايت 46-1945-جي ايللر 
ملي آزادليق حرکاتي دوورونده قهرمانليقلا يئرينه يئتيرميشلر. بو ملي شخصيتلر 
آراسيندا ستارخان و خياباني حرکاتي نين اشتراکچيسي اولموش وور-توت, 
بارماقلا ساييلان قدر آز قالان فدائيلرده وار ايدي, اونلار اوز تجروبه سيني ملي 
حکومتين ياراديلماسي و قورونماسي يولوندا صرف ائتميشلر. نورالله خان 
يئکانلي توده پارتياسيني ترک ائديب آذربايجان دئموکرات فرقه سينه قوشولدوقدان 
سونرا, ملي بيرلي يي ملتين يئگانه چيخيش يولي اولدوغوني بيلديرير. زامانين 
سسينه و ملي آزادليغين اوره کلرده چيرپينان دويونتوسونه سس وئره رک دئيير: 
 بونا باخماياراق کي, من خوي شهري نين و اونون اطرافيندا اولان توده 
پارتياسي نين مسئولويام و گئجه -گوندوز اونون اهدافيني قاباغا آپارماقدا 
چاليشيريق, ولي عملده گوروروک کي, بو زحمتلر نتيجه سيز قالير. آمما مشروطيت 
دوورونده بئله دئييلدي. هر يئره کي گئديرديک, خالقين حمايتي و آلقيشلاري 
ايله اوزبه اوز اولوردوق.
 
سيلاحلا اولچولن تورپاق اثرينده ايلک دفعه اولاراق آذربايجان ملي 
حکومتي نين غيري - فارس خالقلارلا, خصوصا کوردلرله قارشيليقلي انساني 
مناسيبتلري زنگين ماترياللار اساسيندا گئنيش تحليل ائديلميشدير. ائلجه ده 
آذربايجان داخيلينده ياشايان, مختلف ديني اينانجلاري اولان ملي و ديني آزليقلار 
ملي حکومتين هومانيست مناسبتيني دايم اوزرلرينده حس ائتميشلر. بو مناسبتده 
کتابدا يئني منبع لر اساسيندا اوز علمي تدقيقيني تاپميشدير. 1325- جي 
ايلين اورديبهشت آيي نين 3-ده کوردستان ملي حکومتي ايله آذربايجان ملي حکومتي 
آراسيندا بويوک تاريخي اهميته مالک قراردادين امضالانماسي بو ايکي اوخشار 
طالع لي, فارس شوونيزمي نين تزييقيني دايم اوزرينده حس ائتميش خالقين 
مناسبتلرينده يئني بير مرحله نين باشلانغيجي ايدي. بو قرارا گوره آذربايجان و 
کورد خالقلاري بير- بيرينه قارشيليقلي يارديم گوسترمه لي ايديلر. هر ايکي 
خالقين اوزاق گورن رهبرلري واحد جبهه ده بيرلشمکله فارس شوونيزمي نين 
آلداديجي شعارلارينا سون قويورلار. کوردستان ملي حکومتي نين رهبري قاضي محمد 
اوزاق گورنليکله قوام السلطنه نين تئلقرافينا بئله جاواب وئرير:  کورد 
خالقي داها ظولم آلتيندا ياشاماق ايسته مير. آذربايجان, کورد خالقلاري 
آراسينداکي دوستلوغي بو حيله لرله بوغماق اولماز.
 بو گون ده بيز و کورد خالقي دوشمنين شيرين وعدلرينه اويمادان واحد بير 
جبهه ده ملي حقوقلار اوغروندا مبارزه يولي توتمالي, همين تاريخي تجروبه دن 
عبرتلي درس آلمالي ييق. 
 
سيلاحلا اولچولن تورپاق کتابي نين احاطه ائتدي يي پروبلئملر 
حدديندن آرتيق گئنيش و احاطه لي دير. کتابين بيرينجي جلدينده 21 آذر حرکاتي 
نين يارانما سببلري, ملي حکومتين و موسيسلر مجليسي نين يارانماسي,ملي مجلسين 
يارانماسي, ملي حکومتين اصلاحات تدبيرلري, فداي و قيزيلباش خالق 
قوشونلاري, تورپاق اصلاحاتي, اقتصادي تدبيرلر, ايکينجي جلدينده مدني-معارف 
تدبيرلري, ديل و ادبيات, تحصيل, داروالفونون, چاپخانا و مطبوعات, راديو شرکتي نين 
تاسيسي, فيلارمونيا, تئاتر و موسيقي, صحيه اصلاحاتي, جاوانلار, قادينلار, 
ملي حکومت و خالقلار دوستلوغي, مغلوبيتين سببلري کيمي اولدوقجا گئنيش 
پروبلئملر شبکه سي تدقيقاتا جلب اولونموشدور. تکجه آدلاري سادالانان بولمه لر 
کتابين ملي آزادليق تاريخيميزين 46-1945- جي ايللر دوورونون اويره نيلمه 
سينده نه قدر بويوک اهميت داشيديغيني عياني صورتده گوسته رير. کتابدا 
تدقيقاتا جلب اولونان بو مثالارين هر بيري حاقيندا اوزون - اوزادي دانيشماق 
ممکوندور. بير کيچيک يازيدا ميانالي عليرضانين  سيلاحلا اولچولن تورپاق 
کتابي نين مزييتلريني سادالاماق, اونلاري اوخوجونون دقتينه چاتديرماق 
غيري-ممکوندور. 
 
 کتابدا عيني زاماندا ملي حکومتين تاريخيني عياني شه کيلده عکس 
ائتديرن فوتو شکيللرده اوخوجويا تقديم اولونور کي, بونلاردا بويوک اونم, سندلي 
لي يه ماليک دير. 
 
 کتاب بير شرفلي آذربايجان اوغلونون, 7-6 ياشيندا اولارکن ملي حکومتين 
دئوريلمه سي نين- قانلار توکولمه سي نين, ائولر داغيديلماسي نين, 
گلينلرين دول, اوشاقلارين يئتيم قالماسي نين جانلي شاهدينه چئوريلميش, او بويوک 
ملي فاجعه ني بو گونه قدرده اوريينده داشيان مهندس عظيم ابراهيمي نين مادي 
و معنوي دسته يي ايله نشر اولونموشدور. بو بويوک وطنپرورليک تشبثونه گوره 
بيزده عزيز عظيم ابراهيمي يه سونسوز منتدارليغيميزي بيلديريريک. ميانالي 
عليرضايا ايسه سياسي مهاجرتين آغير گونلريني ملي و انساني ايستکلر يولوندا 
چاليشيب, گئجه ني گوندوزه قاتاراق بو کتابي نشر ائتديردي يينه گوره تشکر 
ائديب, هم اونا, هم ده 21 آذر تشکيلاتي نين قوروجولارينا, بوتون 
اوزولرينه داها بويوک اوغورلار ديله ييريک.
 خالقيميزين تئزليکله ملي ظولم دن قورتولماسي و عليرضانين او مقدس گونلرين 
جارجيسي اولماسي ان بويوک آرزوموزدور. آرزو ائديريک کي, آزادليق بايراغي 
عينالي نين و آذربايجانين فاجعه وي تاريخي نين شاهدي اولموش, دوشمن الي 
ايله قول-قانادي سينميش مِحتشم ارکيميزين اوزرينده دالغالانسين!
 
 بهروز حقي
 
 21 آذر تشکيلاتي نين رهبري