موراجيعت

 

حؤرمتلي وطنداشلار!

حؤرمتلي آذربايجان ميلي حرکتي چاليشقانلاري!

 

2005 ـ جي ايلينده آذربايجان ميلي حرکتينين ذيروهسي اولان بابک ميلي قورولتايينين اوغورلو کئچيريلمهسي نتيجهسينده ميلتيميزين افتخارلي تاريخينه يئني بير قيزيل صحيفه يازيلدي. آذربايجانين بوتون اوجقار شهر و کندلريندن اهر، کليبر و بذ(بابک) قالاسينا ساري يوروين اينسانلاريميز بوتون حربي و انتظامي سدلري کئچرک بابک ميلي گونونو قئيد ائتمکله بير داها يئنيلمز و سارسيلماز اولدوقلاريني ثبوتا يئتيرديلر. بو تاريخي حاديثه موناسيبتيله آذربايجان ميلتي و اونون ايگيد، صاديق و يورولماز چاليشقانلاريني تبريک ائديب بير نئچه مسئلهيه توخونماق ايسترديک:

 

1- 2004 ايلي بابک قورولتاييندان سونرا آذربايجان ميلي حرکتينين يئني بير مرحلهيه کئچديگيني ايديعا ائده بيلريک. 2004 و 2005 ايللرينده ايران حاکميتي بوتون حربي، انتظامي و امنيتي واسيطهلريني قوللااناراق بابک ميلي قورولتايينين قارشيسينا چيخميشدي. بو ايسه ايران حاکميتينين آذربايجان ميلي حرکتي و بابک ميلي قورولتاييندان تشويشه دوشدوگونو گؤسترمکدهدير. ايران حاکميتينين مدني، دموکراتيک و مسالمتلي آذربايجان ميلي حرکتي ايله اوزلشديگينده حربي تدبيرلره ال آتماسي حاکميتين عجز، چارهسيزليک و ايفلاسينا ايشارتدير.

 

2- کئچن ايلدن بري بابک ميلي قورولتايلارينين مؤحتواسي (ميلي ـ مدني ايطاعتسيزليک) اولموشدور. يوزميندن آرتيق حربي و انتظامي قووه ايله بابک ميلي قورولتايي قارشيسينا چيخيلسا دا، آذربايجان ميلي حرکتينين ماهيتي مدني اولدوغو اوچون اونا قارشي ايستهديکلري زور و گوجو تطبيق ائدهنمهميشلر. اصلينده يوزمينلرجه بابک قالاسينا يوروين ايناملي و ايرادهلي اينساني توتوقلاييب حبسه آلماق هر هانسي بير حاکميتين ايراده و گوجوندن عمله گلن دئييل. اونا گؤره ده آذربايجانين دوشونن و جسارتلي ميلتي سادهجه بابک ميلي قورولتايينا قاتيلماقلا اينساني حاقلاريميزي تانيماق ايستهمهين ايران حاکميتيني بؤيوک اوزلشمهگه وادار ائتميشدير. شوبههسيز کي، ميلتيميز و پولاد ايرادهلي ميلي چاليشقانلاريميزين ايشلري سونوجوندا بوتون دونيا ميلت و دؤولتلري ميلتيميزين آزادليق و عدالت سوراغيندا گونو ـ گوندن اوجالان سسيني ائشيدهجکدير.

 

3- سون ايللرده ايران حاکميتينين انتظامي و امنيتي اورقانلارينين آذربايجان ميلي حرکتي چاليشقانلارينا قارشي آغير مادي و فيزيکي تضييقلر تطبيق ائتمهسه ده، دولاشيق واسيطهلرله آذربايجان ميلي حرکتي و اونون چاليشقانلاريني يورماق و اَپريتمک ايستهميشدير. بو گون آذربايجان ميلي حرکتينين سوروملو آيدينلاری آرتيق جيديتله يارانميش شراييطي ديقتله تانيمالي و تانيتديرماليديرلار. بونونلا بئله رواني و ذهني سببلري نظرده توتاراق دؤزوملو ميلتيميزين مدني موقاويمت و ميلي موباريزهسينده يئني چالارلار و تاکتيکالار دوشونولمهليدير. بونو زامان ـ زامان آذربايجان ميلي حرکتي چاليشقانلاري تام باجاريقلا باشارميش و عؤهدهسيندن گله بيلميشدير و سؤزسوز کي، بوندان سونرا دا باجاراجاقدير!

 

July 16/ 2005

Oncul_PLAN@yahoo.com

Guney AZERBAYCAN