عباس لیسانی: گونئی آذربایجان میللی قیامینین ایل دونومو مناسیبتی ایله آذربایجان خالقینا موراجیعت

 

 

اولو تانری نین آدی ایله

بؤیوک، باشی اوجا، آیدین و غیرتلی آذربایجان تورک میللتینه، تاریخ بویو حماسه یارادیب باشقا میللتلره اؤرنک اولان، بشریتین ایلکین مدنیتی نی قوروان، سون زامانلاردا علیهینه اولان سایسیز توطئه و چتینلیکلرله باخمایاراق دونیادا، اؤزللیکله شرق دونیاسیندا ایلک دونه اولاراق دموکراتیک حوکومتلر و سیستم لر یارادان میللته سالام اولسون.

عشق اولسون او میللته کی شرق دونیاسیندا ایلک دفعه اولاراق دموکراتیک بیر جمهوریت قورموش، قادینلارا سئچیب و سئچیلمه حاققی تانیمیشدیر، بو بیر حالدا اولموشدورکی هله بیر چوخ مترقی سانیلان غرب اولکه لرینده خانیملار ان ایلکین حاقلاریندان محروم حالدا یاشاییردیلار. آذربایجان تورک میللتینین بئله تاریخی بیر باشارینی گئرچکلشدیرمه سی نه اینکی تعجوبلو گؤرونمه میشدیر،بلکه اونون اؤزاق کئچمیشیندن آخیب گلن درین مدنیت و کولتورو کیمی تظاهور ائتمیشدیر.

ایفتیخار اولسون او بؤیوک و قهرمان میللته کی روس و تهران ایستیبدادینی سیندیریب یئنه ایلک دفعه اولاراق شرق دونیاسیندا شاه و شاهلیغی موطلق گوج اولماقدان ائندیریب، مشروطه آدی ایله تانینان پارلمانتاریستی بیر سیستمه دامغاسینی وورموشدور. بو گرچکده، اونون تاریخیندن بؤیوک و دموکراتیک روحوندان قایناقلانلانماقدا ایدی. چونکو آذربایجان تورکلویونون تاریخینده اولو بابالاری یاراتدیغی خاقانلیقلار و چئشیدلی ایمپئراتئرلوقلاری و دؤولتلری گه ییشمک اساسیندا یعنی قورولتای سیستئمینه دایاناراق یونه تمیشدیر.

آلقیش لار اولسون او میللته کی اوسطوره لشمیش اولو قهرمانی اولان بؤیوک بابک خورمدیندن ایلهام آلاراق یئتمیش مین شهید باهاسینا 21 آذر کیمی پارلاق بیر صحیفه نی ایفتیخارلی و غرورلو کئچمیشینه آرتیردی.

ایندی سن ائی بؤیوک آذربایجان تورک میللتی، بونو بیلمه لی سن کی، اولو بابالارین بو و بونلارا تای و حتی داها بؤیوک باشاری لار و حماسه لری یاخین و اؤزاق کئچمیشده یاراتمیشلار.

بونلار اولا بیلمزدی و اولمادی مگر او چاغ داکی تورک کؤکره ییب اؤزونه دونموشدور.

آنحاق ندن بو دوروما دوشدوک؟! ندن آغالیغیمیز اسارته دونؤشدو؟

بو سورولارین جاوابی بللی دیر. تاریخیمیزدن درس آلمادیق، اؤزوموزو اونودوب اؤزگه لره بنزه مه یه چالیشدیق و سونوجدا پارچالانیب یابانجیلارا قول اولدوق.

آنجاق اولو تانرییا شوکورلر اولسون کی، ایللر بویو تاریخ و دولغون ادبیاتیمیزی بوتون یاساقلارلا رغما میللتیمیزه تانیتدیران داهی بیلگینلریمیزین چالیشمالاری بوشا گئتمه میشدیر. نئجه کی بو گون آیدین، دوشونجه لی و میللتچی بیر نسل اورتایا چیخمیش، بوتون گوج و درین ایناملا فارش فاشیزمینین ظالمانه سیاستی سونوجوندا یاتیردیلمیش گونئی آذربایجان میللتینی اویادیب، اؤزونه و تورکلویونه قایتارماق اوغروندا هر بیر چتینلیه قاتلاشماغا حاضیردیرلار.

اونلار تورک تاریخینین بؤیوک خاقانی اولان بیلگه خاقان بابالارینین داشدا قازیلمیش اویود و وصیتلرینی اونودمامیشیلارکی دئییر : ائی تورک میللتی کؤکره و اؤزونه دؤن! چونکو کی سن اؤزون اولاندا بؤیوک اولورسان. ایللر بویو بو اؤنملی تاریخی مئساژین اوغروندا چالیشان دوزگون و صداقتلی میللتچی لر بیر چوخ آشامالاری چئشیدلی ساحه لرده باشاری ایله آشدیقدان سونرا، سونوندا او بؤیوک و تاریخی گون گلیب چاتدی. و سن، ائی آذربایجانین آیدین و قهرمان میللتی، کؤکره ییب و اؤزونه دؤندون، بؤیودون و داها دا بؤیودون. ائیله کی "خورداد" حماسه سی بؤیوکلویونده عظمتلی بیر تاریخ یازدین. ائیله بیر سس و فریاد سالدین کی دونیا سنی گوروب و ائشیتمه یه مجبور اولدو. او بؤیوک و تایسیز قیام ساده جه کئچمیشده ده بنزرلرینه راستلاندیغیمیز بیر تحقیره قارشی عکس العمل دئییلدی. بو بؤیوک ملی قیام اسارت زنجیرینی قیرماغا قارشی باشلادیلان میللی مباریزه نین گؤسترگه سی ایدی.

آنجاق یازیقلار اولسون کی او حاقلی و مدنی اولان اعتراض سسینی دونیا ائشیدسه ده، او بؤیوک پارتلایشی فارس شوونیزمی دویمادی و دویماق دا ایسته میر. بلکه ده بو، تاریخدن گلن بیر قایدادیرکی ایستیثناسی دا آز اولوب ، اودا بودورکی، میللتلر هر نه قدر درین یاتیردیلمیش اولسالار دا، اویانیشلاری ظالیم و موستبید حاکیملره قارشی داها دا سرت اولموشدور. بو اویانیشدان قورتولوشلار دوغور. نئجه کی 1385- اینجی گونش ایلینین خوردا آییندا آذربایجان تورک میللتینین میللی قیامی بو میللتین اؤزگه لردن هارای اوممادیغینی و یالنیز اؤز قورتولوشونو تاریخدن آلدیقی بیر درس اساسیندا اؤز قیامیندا گوردو و بئله ده اولمالی دیر.

ایندی ائی آذربایجان میللتی آیدینجا سئچدیگین بو حاقلی دیره نیشده داها یاخشی بیلیرسن کی سندن باشقا سنه یاردیم ائدن یالنیز اولو تانری دیر. بونو بیلمه لی سن کی نه کئچمیشده نده بو گون اؤزگورلوک، هئچ بیر میللته پای اولاراق وئریلمه میشدیر. آزادلیق هر زامان بؤیوک موباریزه نین، بؤیوک و سارسیلماز ایراده نین نتیحه سی اولموشدور.

آنجاق بو گون دونیا ده یشییب. دیکتاتورلارا مدنی حرکتلری تاپتاییب و ازمه یه مدنی دونیا ایمکان وئرمیر. اؤزللیکله بؤیوک میللی ایراده یه دایانان موباریزه مئتودونو مغلوب ائتمک مومکون دئیلدیر.

ائی اولو میللت! سن بو گون گوجلو سن. چونکو اؤزونه دونونموسن، اؤزونو درک ائتمیسن و داها گوجلو اولا بیلرسن. اگر بیر سس اولسان، بیر یومروق اولسان و هر بیر من بیزلیک دنیزینده بیرلشسه گوحلو، گوجلو و داها دا گوجلو اولارسان. . سن ای آذربایحان بونو باشاراجاقسان. بو ایل خورداد آیینین بیرینده (1/3/86) آخشام اوستو ساعات 5- ده آذربایجان شهرلرینده و ایران آدلانان اولکه نین هر بیر یئرینده یاشایان تورک، اؤزللیکله تهران شهرینده میللی قیامین ایل دؤنومونو مدنی و باریشجیل یوللا قئید ائدَرَک، فارس فاشیزمینه تاریخی بیر درس وئره جکسینیز.

ایندی ائی یوردومون میللتچی و چالیشقان قیزلاری و اوغولاری بونو یاخشی بیلیرسینیزکی، آذربایجان میللی حرکتینین تریبونو و سسی بیر TV و اینترنت سیته لری دیرلر کی، اونلار دا تاسوفلرله فارس شوونیزمی نین یاساقلاری و بیر سیرا ایمکانسیزلیقلارا گوره خالق آراسیندا یاییلماسی چتینلشمیشدیر. یعنی بونلارین اومودو ایله میللتی گئنیش میقیاسدا خیابانلارا چکمک اولان ایش دئیل.

اینانیرام بو بوشلوغو میللتچی و چالیشقان ایگیدلرین بو فاصیله ده گئجه-گوندوز، یازی، سی دی، دیوار یازمالاری و ائل ایچینده اولوب آیدینلا تیجی دانیشمالاری دولدوراجاقدیر.

ایندی ائی قهرمانلار یوردو اورمو، تبریز، زنگان، اردبیل، همدان، قزوین، ماراغا، اراک، سولدوز، قوشاچای و ائی تهران، سهند و ساوالاندان گوج آل دالغالان، لپه لن و یئنی تاریخ یارات، چونکو قورتولوش یولون آنجاق و آنجاق بودور:بیرلیک و مدنی دیرنیش.

خوردادین بیری آخشام اوستو ساعات 5- ده باشینی اوجا توت و هایقیر دوشمنه قارشی و اؤز میللی حاققینی طلب ائیله. سؤیله کی:

گوزون تیکمه یوردوم آذربایجانا کی دالغین دنیز دیر باتارسان قانا

اؤلوبدور مگر تورکون آلپ ارلری یئتن چاققالا یورد اولا یئرلری

سؤزومون سونوندا اوجا آذربایجان میللتی اؤنونده باش اه ییر، درین سایقیلاریمی سونورام و اؤنده گلن بؤیوک دیره نیشین باشاری ایله سونوجلانماسینی آرزو ائدیرم.

اردبیل زیندانی : عباس لیسانی