مارتين سکگيزي، دونيا قادينلار گونو موناسيبتيله

 

قادين مسأله‌سی و ميلّی مسأله

 

 

    عليرضا صرافی

 Sarrafi2006@yahoo.com

7 mart 2007

گيريش:

1383-جو ايليني، آذربايجان قادين حرکتينده، بير دؤنوش نوقطه‌سي کيمي قيمتلنديرمک اولار، بو ايلين دونيا قادينلار گونونده، بيرينجي قادين قورولتايي، تبريز شهرينده تشکيل اولدو. قورولتاي و اونونلا پارالل گئدن گئنيش چاليشمالار، مديالاريميزدا[i][1] بير چوخ دالغا‌لار اويانديردي، اوندان سونرا اينترنت دوشرگه‌لريميز و مطبوعاتيميز، قادينلار اوچون بليرلي يئر آييرديلار و قادين مسأله‌سي، بير چوخ فعال‌ قروپلاريميزين گوندمينه‌ کئچميش اولدو[ii][2]....

آشاغيدا اوخوياجاغينيز بو يازينين ايلکين قئيدلري، همان ايلين دونيا قادينلار گونو موناسيبتيله ترتيب ائتديگيم بير مقاله‌ده نشر اولموشدو[iii][3] .

بورادا چاليشميشام بير پارا منطيقي حؤکملر و عيباره‌لر چرچيوه‌سينده ميلّيتلر و قادينلارين توپلومسال مسأله‌لري و حرکتلريني بير-بيريله توتوشدوروب، اوخشارليقلاريني اوزه چيخاريب، چاتيشمازليقلار و قارشيليقلي آليش-وئريشلريني گؤستريب... و نهايت بير سونوجا وارميش اولام.

آشاغيداکي متني اوخويورکن بو ايکي مولاحيظه‌ني ده ديقّته آلمانيز لازيمدير:

  بو منطيقي حؤکملرين و عيباره‌لرين هر بيري، تک‌ليکده ده، موستقيلّ معنا داشيماقدادير، اونلارين سيرالانماسي، هئچ ده اهميتلري اساسيندا دئييلدير.

  بو منطيقي حؤکملرين و عيباره‌لر عومومي، مضمون داشيماقدادير (عامّدير)، آنجاق بعضي يئرلرده داها دا آنلاشيلان اولسون دئيه ميثال اولاراق، خاص آدلاردان فايدالانميشام. (مثلا آذربايجان و فارسجا و... ) بو هئچ ده اونون عمومي‌ليگين اسکيلتمه‌مه‌ليدير.

الف. موقاييسه‌وي تعريفلر

1- ميلّيت و جينسيت هر ايکيسي ده، کيمليگه عاييد مقوله‌لردير.

بيرينجيسي اينسانين اتنيک کيمليگيني، ايکينجيسي ايسه، اونون جينسي کيمليگيني اولوشدورماقدادير.

بيرينجيسي اتنولوژي و مدنيته باغلي، ايکينجيسي ايسه بيولوژي و خيلقتدن آسيليدير.

2- قادين حرکتي و ميلّي حرکت، هر ايکيسي ده توپلومسال حرکتلردن ساييلماقدادير.

3- قادينلارين و ميلّيتلرين حاقلاري هر ايکيسي ده اولوسلارآراسي يوکسک قوروملارين ياييملاديغي سندلرده، ائله‌جه‌ ده ب.م.ت.نين[iv][4] کونوانسيونلاريندا خوصوصيله وورغولانميشدير.

4- اؤلکه‌ اهالي‌سينين اوچده ايکيسي، ان بديهي اينسان حاقّي ساييلان آنا ديلي و بعضي ميلّي حاقلاريندان، محروم ساخلانيلميشلار.

اهالي‌نين ياريسيني اولوشدوران قادينلاريميز دا، آتابگليک[v][5] کولتوروندن ائتگيلنميش قانونلار، عادت و عنعنه‌لرين جايناغيندا اسير قالميشلار.

5- بير آدلانديرما اساسيله، ميلّي آيري‌سئچکيليگه معروض قالان وطنداشلاريميز، ايکينجي درجه‌لي وطنداش آدلانديريلديغي کيمي، جينسي آيري‌سئچکيليگه معروض قالان قادينلاريميز دا، ايکينجي جينس آدي ايله آدلانميشلار. بونا بينائاً هم ميلّي، هم ده جينسي آيري‌سئچکيليگه، معروض قالان قادينلاريميزي دؤردونجو درجه‌لي وطنداش کيمي آدلانديرماق اولور.

6- ميلّي حاقلاريني تانيمايان وطنداشلار، شوونيسم کولتورونه يئنيليب، اؤز ديل حاقلاريني دانير.

قادين حاقلاريني تانيمايان قادينلاريميز دا حاکيم آتابگليک کولتورونه يئنيليب، اؤز قادين حاقلاريني دانيرلار.

بيرينجي دسته، اوشاقلاريله حاکيم ديل‌له (فارسجا) دانيشماغي، ايکينجي دسته ايسه اوغلان اوشاغي دوغورماغي اوستون توتورلار!

آما بيرينجي دسته، تماميله ميلّي کيمليگيني ايتيره بيلديگي حالدا، ايکينجي دسته اؤز جينسي کيمليگيندن هئچ زامان ياخا قوتارا بيلمز!

7- بير عائيله‌‌ده، ار اؤز حيات يولداشي‌نين طبيعي حاقلاريني دانيرسا، اونو کوچومسه‌ييب، سيخيشديريرسا، اوندا قادين دا ويجدان حؤکمويله عائيله دوزنيني، عدالت، دموکراسي اساسيندا ساغلاماغا اليندن گلني اسيرگه‌مه‌ليدير، راست گلمزسه ده، اخلاقاً اريندن آيريلماغا حاقي وار[vi][6]. ..

بير بؤلگه‌‌ده اورتاق حيات سورن ايکي قونشو خالق آراسيندا دا، بيري اؤزونو حاکيم، باشقاسيني محکوم دوروما گتيريب، اونو کوچومسه‌ييب، سيخيشديرماق ايسته‌ييرسه، اوندا محکوم خالق ويجدان حؤکمويله بو موناسيبتلري برابرجه‌سينه ساغلاماق اوچون اليندن گلني ائتمگه حاقليدير، راست گلمزسه ده، اخلاقا قونشو خالقلا پايلاشديغي وارليغينا، شخصاً صاحيب چيخاراق، حسابيني اوندان آييرماغا حاقّي وار.[vii][7]

8-آشيري فمينيستلر، آتابگليه قارشي موباريزه‌ني، کيشيلره قارشي موباريزه‌ده گؤررلر.

آشيري ناسيوناليستلر ده، سانتراليسم و شوونيسمه قارشي موباريزه‌ني، حاکيم ميليته قارشي (فارس‌ديلليلره قارشي) موباريزه‌يله قاريشيق ساليرلار.

9- قادين مسأله‌سي و ميلّي مسأله بير-بيريندن موستقيل اولدوقلاري حالدا، ايچ-ايچه کئچن جهتلري ده آز دئييلدير. شوونيسم ادبياتي ، آپ-آيدين کيشيلرين قلم اويناتديغي بير ساحه اولماسي، هئچ ده تصادوفي دئييلدير. سکسن ايل‌ليک شوونيسم تاريخينده "پروين "دن[viii][8]، "سيمين"‌ـه[ix][9] کيمي....، ميلّي حاقلاريميزا قارشي، قلم اوينادان بيرجه شوونيست قادينا بئله، راست گلينمير.

10-گئريچيلر، چئشيتلي يوللارلا، ايفاده اؤزگورلوگونه قارشي چيخارلار. بونلاردان بيري ده اينسانلاري ميلّي حقارت و جينسي‌ حقارتله سوسدورماقدير. ميلّيتلره و قادينلارا قارشي جوکلار، آتماجا سؤزلر و ساتاشمالارلا دولو بير توپلومدا، اونلار آرخا پلانا ايته‌لنرک، اؤز دوشونجه و دويغولاريني دانيشماقدان چکينرلر. بئله‌ليکله هر ايکيسي‌ده ايفاده اؤزگورلوگوندن يارارلانماني قارشي طرفه (حاکيم ميلّيته و کيشيلره) بوراخميش اولارلار.

11-قادين مسأله‌سينين حلي‌، دموکراسي و عدالتين دوغرولتوسوندا، ميلّي بويوتدا يئريديلن بير پروژه کيمي دگرلنديريله بيلر. باشقا سؤزله قادين مسأله‌سي اؤزولوگونده، بير ميلّي مسأله‌دير.

ب. پاتولوژي

12- ميلّي حاقلار و قادين حاقلاري،. .... اينسان حاقلارينين آيريلماز پارچالاري ساييلماقدادير، ميلّي حاقلارا اعتيناسيز قالان فمينيستلر، قادين حاقلارينا اعتيناسيز قالان ناسيوناليستلر قدر، (ايکيسي ده عئيني درجه‌ده) دموکراسيدن اوزاقدا قالميشلار.

نه‌زامان کي کيشيلر ده، قادين حاقلاريني قازانماقدا، اونلارا آرخا دورماغي باجارديلار و نه‌زامان کي فارسلار دا، تورکلرين ميلّي حاقلارينا ييه‌لنمه‌لرينه دستک اولدولار، اوندا توپلوموزون گرچک دموکراسي اوغروندا ايرليله‌مه‌سينه کؤنول باغلاماق اولار.

13-قادينلار اوچون ايده‌آل دوزن، اونون موستقيل‌ليگيني و فردي کيمليگيني تضمين ائدن بير دوزندير. ميليتچيلر، حرکتده قادينلارين اکتيو قاتيلمالاريني ايسته‌ييرلرسه، اونلاري، فردي کيمليکلرينه و ايستيقلال‌لارينا سايغيلي اولمالارينا، اينانديرماليديرلار.

14-قادينلارين ميلّي حرکتلره قاتيلماسي، او زامان قاباريق حالا گليب، چاتاجاق کي، ميلّي مسأله‌نين حلّي ايله، کيشيلرين اوستونلوگونو ساغلايان يئني بير قورغو قورولماياجاغيندان، امين اولسونلار.

15-ميلّي حرکتلر ذاتاً دموکرات و عدالت‌سئور حرکتلردير. بو او دئمکدير کي، اورادا ميلتين بوتون مسأله‌لري او جومله‌دن قادين مسأله‌سي ده، اؤز لاييقلي يئرينده آراشديريليب، اؤز حليني تاپاجاقدير. اونو صيرف ديل مسأله‌سي چرچيوه‌سينده ساخلايانلارسا، اؤز دوشونجه دارليقلاريني سرگيله‌مکدن باشقا بير هونر گؤسترميرلر.

16-بعضي ميلّيتچيلرين نظرينجه، اونلارين اساس وظيفه‌سي آنجاق اؤز ميلّي جوغرافياسينا مخصوص اولان مسأله‌لرله اوغراشماقدير. اونلارا گؤره، قادين مسأله‌سي، عموم‌اؤلکه مسأله‌سي اولدوغو اوچون، اونو عموم‌اؤلکه تشکيلاتلار ايرلي يئريتمه‌ليدير! بو دوشونجه طرزي، سانتراليسمه قاپيلماقدان باشقا بير شئي دئييلدير.

ايش بئله گئديرسه قادينلاريميز، اؤز قورتولوشونو مرکزه باغلانماقدا گؤره‌جکلرميش. کيشيلرسه مرکزدن قيريلماقدا! بو دا ايشلرين گئديشيني تماميله چتين‌لشديريب، چيخيلماز وضعيته سالاجاق.

17-ماهيت اعتيباريله آنتي‌سانتراليست اولان ميلّي حرکتلرده، کيشيلر قرارلي و ايراده‌لي چاليشسالار دا، آنجاق اؤز مسأله‌لرينين حلّيني ميلّي حرکتين ايچينده گؤره‌بيلمه‌ين قادينلار، ايراده‌سيز و آخساق آتديملار آتارلارسا، بو حرکتلرده دوزگون هارموني باش توتماياجاق.

18-بعضي ميلّتچي يازارلار، قادينلارين ادبي، تاريخي سيمالارينا، رومانتيک، افسانه‌وي و ميتيک بير اؤرتوگون آرخاسيندان باخاراق، اونلاردان اؤز ناسيوناليستي حيسلريني اوخشايان قادين سيماسي ياراديرلار. اصلينده اونلار قادين مسأله‌سيني گؤرمزدن، اؤز مسأله‌لريني دانيشيرلار!

19-بيزيم توپلومدا آتابگليک موناسيبتلرينين اوزون سورمه‌سي، قادينلاريميزي باشقا بير اتنوسدان اولان کيشيلرله (مثلا فارسلارلا) ائولنمگه ساري يؤنلده‌جک.

آنا ديليني قوروماق ايسته‌ينلر، ايلک اؤنجه آنالارين اؤزونو قوروماليديرلار.

ج. گله‌جکدن گؤرونتولر

20-ياخين گله‌جکده اونيورسيته‌لريميزدن مأذون اولان بير چوخ قادينلار، ايش مرکزلرينده چاليشماغا باشلاياجاقلار. دوخسانلي ايللرده ايش گؤرن قادينلارين سايي، کيشيلرله ائشيت سويّه‌لره گليب، چاتاجاق، بو دا اونلارين اکونوميک ايستيقلاليني ساغلاييب، کيشيلرين اوستونلوگونو آزالداراق، آتابگليگه قارشي مئيدان اوخوياجاق.

21-دوخسانلي ايللرده اوغلانلاريميزين، اؤزلريندن کيچيک ياشلي قيزلارلا ائولنمه شانسلاري اولدوقجا محدودلاشاجاق، (بو گرچگي جمعيت آمارلاريندان آسانليقلا ايثباتلاماق اولار)[x][10]، ائولنمه دبلريميزه حاکيم اولان آتابگليک کولتورنو ياشاتماق ايسته‌ييرسک، اوندا اوغلانلاريميز سوباي قالاجاق. اوغلانلارين اؤزلريله ياشيت قيزلارلا، يا دا اؤزلريندن يوخاري ياشلاردا اولان قيزلارلا ائولنمه‌‌سي ده، مين‌ايللرجه حاکيم اولان آتابگليک کولتورونه آغير ضربه‌ ائنديررک، مؤوجود اولان دگرلري تماميله پوزموش اولاجاق.

22-ميلّي آيري‌سئچکيليک آرادان قالديريلينجا ميلّيتلرين کولتورل، اکونوميک و توپلومسال گليشمه‌لري اوچون الوئريشلي شراييطين حاضيرلاناجاغي کيمي، جينسي آيري‌سئچکيليک ده آرادان قالديريلينجا، قادينلاريميز بير چوخ اکونوميک و توپلومسال و کولتورل چاليشمالارا قاتيلاجاق.

قادين حاقلاري و ميلّي حاقلارين رسما تانينيماسيله اؤلکه اهالي‌سينين آلتيدان بئشي‌نين بوخوولانميش انرژي قايناقلاري، آزاد اولاراق، اونون هرطرفلي گليشمه‌سي و چيچکلنمه‌سينه ميدان آچيلاجاق. هر ايکي مسأله‌نين حلّي تماميله دموکراسي اوغروندا و ميلّي منافعيميزين دوغرولتوسوندا دگرلنديريله بيلر.

د. سونوج

23-گله‌جکده، قادينلار ايش گوجونون ياريسيني، بويونلاريندا آلاجاغينا گؤره، لاپ ائله بوگوندن اعتيبارا، ايش‌يئرلريميز، آتابگليک بولانتيلاريندان آرينمالي و قادينلاراحاضير دورومدا ساغلانماليدير.

24-قادينلار و ميلّيتلر حاقيندا يازيلان قانونلار[xi][11] اونلاري مودافيعه ائتمگه اولدوقجا يارارسيزدير. گله‌جکده دوزگون حقوق رژيمي‌نين يارانماسي، قادين حاقلاري و ميلّي حاقلارين گرچک مودافيعه‌چيلرينين قاتقيلاريله باش توتا بيلر. بونا گؤره ده هر ايکي مسأله ايله ماراقلانلار، حقوق ساحه‌سينده ده ايش قروپلاري ياراتماليدير.

25-آتابگليک کولتورو، توپلومون گئريده ساخلاتماسيندان باشقا، قادينلارين دا حرکتده جيدّي و فعّال رول اويناماياجاغينا سبب اولموشدور. ضياليلاريميز، شوونيسمله ايدوئولوژيک موباريزه‌يه گيرديکلريله ياناشي، بو باياغي کولتوره قارشي دا موباريزه ائدرک، اؤزلريني يئتيشديرمه‌ليديرلر.

26-ضياليلاريميز، اؤز خالقلاريني دونيادا قبول اولموش اينسان حاقلاري نورملاريلا، دونيا جمعيتينه داخيل ائتمه‌ليديرلر، قادين حاقلارينا اعتيناسيز بير توپلوم، دونيادا اؤزونه لاييق يئر آلا بيلمز، ميلّي حرکتلر تماميله بين‌الملل نورملارلا (او جومله‌دن قادين حاقلاريني رسما تانييب، اونلارا سايغيلي اولماقلا) آياقلاشماليديرلار.

و داها اؤنمليسي بو کي:

27-باشقا توپلومسال حرکتلرين (قادين، گنجلر، ايشچي، آزاديخواه حرکتلرين) اورتاقليقلارينا آياق ديره‌ييب، ميلّي ايستکلريله ياناشي، دموکراتيک ايستکلرين ده بوتونونو طلب ائتمک، ميلّيتچي ضيالي‌نين قاچينيلماز وظيفه‌لريندن بيريدير. نئجه کي باشقا بير ضيالي دا ميلّيتلرين ايستکلريني طلب ائتمکدن چکينمه‌مه‌لي و اونو اساس بير وظيفه کيمي بويونونا آلما‌ليدير.



 



اتک يازيلار

1- مديا : medya تلويزيون، راديو، مطبوعات، اينترنت دوشرگه‌لري و... بوتون جمعي ايليشکيلر اوچون يارارلي واسيطه‌لر (ف. رسانه‌هاي گروهي يا وسائط ارتباط جمعي)

[ii][2] - بو دؤنوش نوقطه‌سي حاقدا گله‌جکده، اطرافلي معلومات وئرمک لازيمدير.

[iii][3] - باخين: " گزاره‌هايي چند به بهانه روز جهاني زن و روز جهاني زبان مادري " آدلي مقاله‌يه، همين يازاردان - ديلماج 6-جو سايي

[iv][4] - ب. م. ت.: B.M.T بيرلشميش ميلتلر تشکيلاتي (ف. سازمان ملل متحد)

[v][5] - آتا بگليک، آتامانليق، کيشيلرين اوستونلوگونو ساغلايان دوزن. (ف. پدرسالاري، مردسالاري، پدرشاهي)

[vi][6] - بو حاقدان فايدالانماق اونا گؤره "ويجدان حؤکمونه" و "اخلاقا" شرطلندي کي، بعضي اؤلکه‌لرده بئله حاقلار قانون چرچيوه‌سينده تانينماميشدير.

[vii][7] - باخين اوستدهکي آچيقلامايا!

[viii][8] - عصريميزين اوللرينده ان تانينميش شاعيره"پروين اعتصامي" نظرده توتولور.

[ix][9] - عصريميزين سون ايللرينه قدر فارس قادين يازارلارينين ان تانينميشي "سيمين بهبهاني" نظرده توتولور.

[x][10] - باخين: "دهه نود، پايان عصر مردسالاري در ايران!"آدلي مقاله‌يه همين يازاردان - ديلماج 14-جو سايي

[xi][11] - بيزه گلديکده ميلّيتلر حاقيندا يازيلمايان قانونلاردان! بحث ائتمک داها دوغرو اولاردي.