عبدولله افسری

هدايت سلطانزاده

شاهین قصر زيندانیندا ، بیر شیریخ تيکه يئرده کی، اوناباغچا دییردیلر، بیز سوپورگه توخومو اَکمیشدیق.  یای زامانی سوپورگه لر بوی آتیب اوجالمیشدی و سوپورگه کولگه سی بیزلره بیر دالدلانماق و  یغیناق يئری اولموشدو. آخشام چاغیلار بیر- بیرینین یانینا یغیشیب و کندلیلر کند آراسیندا یغیشان کیمی، هره بیر یئردن سوز آچاردی. بو یغیناق یئرین آدینی بیز قویموشدوق ماماغان سفیرلیگی. چون او زامانلاردا ، ماماغانین ایکی زادی چوخ تانینمیشدی .بیری ماماغان قارپوزی و بیریسی ده ماماغان سوپورگه سی ايدی. هله برقی سوپورگه دن خبر یوخ ايدی و خلق  اوز ائوین و حيه تین سوپورگه- مرمريلن سوپورردی. نئجه کی مراغا صابونی و باسلیقی کیمی مراغا آدیى ايلن بیرایدی ، ماماغان آدی دا سپورگه نی یادا سالاردى. عبدولله افسری ماماغان اهلی اولاراق ، اورانين سفیرجنابی ايدی! بیز ده اونو ماماغان چاغیراردیق و او آد عبدولله افسرینین اوستونده قالدی!

ماماغان چوخ بیر گوزل و اورگه یاتیم و جان یاندیران و دایانان بیر دوست ایدى ، و صمد بهرنگی کندده درس وئرن زاماندا ، اونون طلبه سی اولموشدو .اونو دا چنگیز احمدی کیمین اسلام جمهوریتی اوز قانینا بولادی!

ماماغان دئيیردى‌کی، منیم آتام و بؤیوک قارداشیم ائشیدمیشدیلر کی، دونیا ساحه سینده کومونیست اؤلکه لر وار و هردن بیر اونون حقینده بیر- بیرلریلن دانیشاردیلار. آتامین هچ بیر یازيب- اوخوما ساوادی یوخ‌ایدی. بیر گون گؤردوم اونلارین  دانیشقلاری کومونیستلیق حقینده فیرلانیر! دده‌م چوبوغون چکه- چکه ، قارداشیمین سؤزلرینه قولاق آسیردى. قارداشیمین بیر آز چوخ ، جیزما- قارا ساوادی وارایدی ودده‌مین گؤزونده او بیر بؤیوک عالیم کیمی ساییلیردی!  یاواش یاواش قولاغیمی شوشله دیم کی، گؤروم سؤزلری هارا چاتیر!  من سؤزلرینین آراسینا یتیشمیشدیم!

آتام چؤنوب سوروشدی ، بس بو ماللا نيیه دئییردی کی کمونیست یانی الله سیزلیق و ناخیرکیمین آروادلاری آرادا بؤلماق ؟ قارداشیم بیر آز دایاناندان  سونرا دئدى : بونی بیر بیلگیلی آدامدان ائشیدیبدی کی ، کومونیست  بیر فارسی کلمه سی دير و خالق اونو دوز دیله گَتیره بيلمیر و معناسین بیلمیرلر. کومونیست، اصلینده  غم نیست ایمیش ، یانی، بیریسی غم و اوبیریسی ده نیست کلمه سیندن عبارت دير. تورکوجانسنه دئییم ، یانی غم یوخدی! یانی ائله بیر اؤلکه ده آدامین هچ غمی و قوصّه سی اولماز! قارداشیم ، آغیر فارسی سؤزلرین آتاما قاندیراندان سونرا، و آتامین خیالی راحات اولاندان سونرا کی، منیم  ننه می آرادا بؤلمیه جاقلار، دده‌م چوبوغونو بیرده پوفله‌يیب  دئدى: آهان ایندی باشا دوشدوم!

صمد بهرنگی بو دونیادان گئدندن سونرا، عبدولله افسری ، بهروز دهقانی ، کاظم سعادتی و مناف فلکی و اونلارین یار- یولداشلارینين چوخ یاخینلیقی وارايدى. مدرسه نین دوققوزو مینجی ایلی قورتاران زمانلاردا ايدى کی، توتولدو و بیزلر کیمی آیاغی شاهین زندانینا چاتدی. آمما هممشه دوشونجه سی و عقلی ، یاشیندان چوخراق ایدی.

ماماغان دئییردی کی، منی  توتاندان سونرا ، بیر يئکه‌پر آجان  چینینه آلیب و زينداتین پيلله لریندن آشاغی آپاریردی کی، گؤردوم بیر له‌ییرتی آرواد اللرین ووروب بئلینه  و باشلادی منه یامان دئمگه کی :

گده فيلان- فيلان اولموش ، هله بویون قینیندان چيخمامیش باشلامیسان بو پوخلاردان یئماغا؟ بوردا بيله‌وه ولیم باغی سوخاللار حالین یئرینه گلر!  قولاغیوین دیبین گؤرنده ، بیر ده ائشیگی گوره جاقسان!  فیکر ائله دیز مملکتین صاحابی یوخدی،هان؟ ماماغان دئيیردی کی، آجانین چینینده اولا- اولا ، آروادین سینه سینه ائله  بیرتپيک آتدیم کی، يئره سره لَندی ! دالیسین  اوزوز بولوسوز نئجه گئچدی!

بیر گون ماماغانی قصر زيندانیندان آپارمیشدیلار کومیته‌ زيندانینا و ماماعان ، آغیر شیکنجه‌یه معروض قالمیشدی . شعبانی ، کومیته زندانینین آدلیم ورحمسیز شیکنجه چیسى ایدی .شعبانينی  کمیته زندانیندا، حوسینی آدی ايلن تانيیاردیلار و اؤزو قزوین شهریندن ایدی .من اونو اول دفعه  و تازا توتولان زامان ، ائوین زيندانيندا گؤرموشدوم، بویو قَره دوه‌دن بیر آز کیچیک ایدی ! اونا گؤره اونون هربیر شاللاق وورماسی، آداملارین اتین و دریسین ديده‌ردی! یوزلر آدام اونون الى آلتيندان یارالی و دیدیلمیش چیخمیشدی!  بعضی زيندانیلارین آیاقلارینین آلتی، سونرالار آرتیق ات گتیرمیشدی!  شعبانی، ماماغانین ال- آیاغین تختين اوستونه باغلایاندن سونرا، باشلامیشدی اونا تورکو جان یامان دئماغا : کومونیسمی دال قاباغ ائله‌ییم ! لنینى‌وی فیلان ائله‌ییم ! سنین او پيشه‌وریوی فيلان ائله‌ییم ! آخیرده ده  اوزون توتدی منه :  سنی ده فیلان ائله‌ییم!!

   تامام اوبير نئچه ایلده، عبدولله تکجه بیر دفعه عایله سی ايلن گوروشو اولابیلمیشدی. آخی ماماغان کندی هارا و شاهین خراب قالمیش قصر زندانی هارا؟ یازیق آتاسینین وار دؤلتی گویا  بیر گئچی ايميش، اونو دا ساتیب و یول خرجی ائله میشدیلر کی، گليب اؤز اوشاقلارین گوره بیلسینلر!

عبدولله افسری ، توتولان زاماندا ، تهراندا راه کارگرین اصلی مسئوللاریندان بیرى ایدی. عبدولله دا چنگیز کیمی تویو قانا بولاندی و بیر ایل یاریم ائوین زیندانیندا چوخلو شکنجه لردن سونرا ، خالقا اورک یاندیران اورک ، اسلام جمهوریتینین گوللهَ لری ايلن آرتيق دایاندی! 

کاش آتا- آنا سینین بیردانا گئچی سی اولایدی و اونو ساتیب یول خرجی ائله‌ييب و تهراندا عبدولله نین قبرینى تاپا بیله‌ایديلر!