بيز باشارديق (3) گؤروب حکّام عصري ...

عليرضا صرافي

نوت :

خورداد قياملاريندان آرتيق بير ايل سووشور، کئچن ايل بؤيوک و قيمتلي تجروبه‌لر قازانديق. سؤز يوخ کي بو دؤنمين تاريخيني يازماق و باش وئرن حاديثه‌لريني آناليز ائتمک، آيدينلاريميزين اساس وظيفه‌لريندندير. آنجاق هر شئيدن اول آيري-آيري شخصي خاطيره‌لر و شخصي تجروبه‌لر قلمه آلينماليدير. همين مونوقرافذيلرين اوزرينده ده چاغداش آذربايجان تاريخي يازيلا بيلر سانيرام.

اوخوياجاغينيز بو جيزما-قارالار سون قيام گونلرينده شخصا ياشاديغيم، گؤروب، ائشيتديگيم آجيلي-شيرينلي خاطيره‌لر و تاثّراتيمدير.

***

بيرينجي بؤلوم "اويله بير شيدت تصميم ايله چيخديم کي يولا. " عونواني ايله ميتينگ آخشامينا عاييد ايدي.

ايکينجي بؤلوم " تبريزده بير تبريز وار ايميش" باشليغي آلتيندا ايسه قيام گونوندن دانيشيليميشدي.

اوخوياجاغينيز بو بؤلومده ايسه اصلينده تهراندا مجليس قاباغي ميتينگي و اونون ياني سيرا بعضي مقاملارلا کئچيريلن گؤروشلره عاييددير. قيامدان بير هفته سونرا تدريجا حاکيمت اويونو اؤز الينه کئچيره بيليب، اونو کونترول آلتينا آلماق اوچون جيدي آدديملار آتا بيلدي ، بو بؤلومده همين گرچک حاقيندا آز چوخ بيلگيلر آلاجاقسينيز.

***

اؤنري:

بورادا بير داها وورغولاماق ايسترديم کي قلمه آلينان بو يازيلار آنجاق او دؤنمده‌کي تاريخين بير نئچه صفحه‌سيني احتيوا ائدير. منجه يازيلماميش صفحه‌لريميز ، اون ايگيرمي قات بوندان داها بؤيوک حيصه‌ني تشکيل ائدير. مثلا اورميه، سولدوز، مرند، اردبيل و... شهرلرين قياملاريندان بورادا هئچ بير صؤحبت اولونماييب، ائله‌جه ده خوردادين يئدديسينده تبريز قياميندان. بو دا اونا گؤره‌دير کي منيم او حاقدا معلوماتيم چوخ آزدير، سؤز يوخ کي بو قياملارين حاقيندا خاطيره و تحليل يازماق ايلک اؤنجه همين شهرلرده چاليشان ميلي حرکتين فعاللارينا عاييددير.

بو قياملاردا بير نئجه کئچيجي مرکزيتلر يارانميشدي اونلار هره‌سي ياري موستقيل وضعيتده ايشلري ايرلي آپاريرديلار. اولا بيلسين کي مثلا تبريز قيامينين باشقا يؤنلريني آچيقلايا بيلن اونلارجا مقاله و خاطيره‌لر يازيلسين.

ايچري دوشن‌لريميزين زيندان خاطيره‌لري ده چوخ قيمتلي بير تجروبه‌لر کيمي خالقيميزا چاتديريلماليدير.

بونلارا باخاراق همين يازيلاريمين نه قدر قيسا، يئترسيز، اما اولدوقجا واجيب بير ايش اولدوغونا اعتيراف ائديرم.

يئري گلميشکن هامي دوستلاردان ايسترديم کي آذربايجان سيرا قياملاريندان گؤروب، بيلديکلريني تئزليکله قلمه آليب، يايينا وئرسينلر. اولا بيلر کي تهلوکه‌سيزليک مولاحيظه‌لرينه گؤره بعضي مطلبلري اوست اؤرتولو و اؤتري يازيب، کئچه‌لر آنجاق بونلار موطلق يازيلماليدير.

آراشديرماچيلاريميزدا همين ايلکين نوتلاري اؤزلرينه اساس قايناق کيمي گؤتوروب، "آذربايجان سيرا قياملار تاريخي"ني يازا بيلرلر.

عليرضا صرافي

 

 

اوچونجو بؤلوم: گؤروب حکّام عصري..

ايلکين توتولانلار

او گون حسن ارک و حيدراوغلونون توتولماسين ائشيتديم. چنگيز بخت‌آور ده يوخ اولموشدو، داها دوغروسو کيمسه اونون توتولماسين گؤرمه‌ميش و ميتينگين ايچينده ده گؤرونمه‌ميشدير.

گئجه ياريسي چنگيزين اوغلو سيامک، زنگ ائديب، آتاسيندان خبرسيز اولدوقلاريني دئدي. سحري تئزدن بير باشا فرمانداريه گئتديم. او گون "شوراي تامين استان"ين فوق‌العاده ايجلاسي اولاجاقميش، احمدي‌نژاد جلسه اوتاغينا گئتميشدي، آنجاق ايجلاس هله رسما باشلاماميشدي. اونو ائشيگه چاغيريب، آياق اوستو گؤروشدوک. دونين حاديثه‌سيندن تاسوفله ياد ائله‌دي و ايش بيزيم اليميزدن چيخميشدي يوخسا قويمازديق توققوشما اوز وئرسين - دئدي.

دئديم: - بيز چنگيز بخت‌آوردن نيارانيق، او ايتيب.

دئدي: - اونو ائله‌جه ده حسن ارک و حيدراوغلونو "حفاظت نيروي انتظامي"ده ساخلاييرلار.

آدرسيني اؤيرنديم، همن چنگيزگيله خبر وئرديم. چنگيزين آللاه باغيشلاسين اوشاقلاري و حيات يولداشي دا اؤزو کيمي دؤيوشکن روحيه‌يه صاحيبديرلر. گويا اونلار اورايا گئديب، هاي کوي سالميشلار، يا اونو بوراخين، يا بيزي ده توتون ساخلايين دئميشلر. کور دا کي توتدوغون بوراخماز!! نتيجه ده چنگيزين اهل-عيالين توتوب، بير ايکي گون اورادا ساخلاميشديلار! ساغ اولسونلار، اونلاري دا بو قاپيدان نااوميد قايتارماميشلار!!

عينالي اتگينده

(جومعه 5 خورداد)

خوردادين بيريندن باشلاياراق تبريزده هرگون نوماييش کئچيريلير عموما ساعات قاباغي و باغيرخان کؤرپوسو اطرافيندا . جومعه گونو بير چوخ تبريزلي جاوانلار عادتا عينالييا گئتديرلر، يولدا هميشه‌ اولدوغو کيمي‌ آذربايجان ميلي ماهنيلاري اوخويورموشلار، داغدان قاييدارکن، الي چوماقلي دسته‌لر اونلارا يوگوروب، اؤلومونه تاپديرلار . بئش گون قياملارين عرضينده آنجاق گؤستريلره حمله اولونموشدور، آنجاق بو ايلک دفعه‌دير کي بونلار ائله بئله‌سينه بير عيده‌ني توتوب، دؤيورلر. اولا بيلر کي بو حاکيميتين مهرورزانه سياستلرينه ساري بير دؤنوش نوقطه‌سي اولسون.

همان گون منه بير نئچه اي-‌مئيل و SMS گلدي، کي تهرانداکي مجليس قاباغي مراسيمينده بير آغ‌ساققالين اولماغينين ضرورتينه گؤره سيزه اوز توتوب، ايستيرديک گليب اورادا توپلاناجاق جماعته دانيشاسينيز! من ده بوينوما دوشن وظيفه‌دن قاچا بيلمزديم- اولدو ايندي کي بئله ايسته‌ييرسيز گلرم دئديم.

دوستلارين برنامه‌سي بئله ايدي کي مجليس قاباغينا توپلانسينلار، اورادا منيم ده بير دانيشيغيم اولسون و نهايت بير قطعنامه ايله مراسيمه سون قويولسون، عيني حالدا بئله بير قرارا دا گلينميشدي کي بو بئش - آلتي گون دالبادال اوز وئرن قياملارا بير سون نوقطه لازيمدير. مجليس قاباغي ميتينگ ايسه همين سيرا قياملارين سونوجو کيمي قيمتلنديريلدي.

اليمه گلن اؤنريلري اساسيندا قيسا بير يازي ميلت وکيللرينه خيطاب يازيب، باش آليب تهرانا گئتديم.

تهران ميتينگي‌ يولوندا

(شنبه 6 خورداد)

شنبه گونو آيين 6-سي آخشام باشي طياره‌يه ميندم. ساعات 6-7 آرالاريندا تهراندايديم. بير باشا اؤيرنجيلر مني ائولرينه گؤتوردولر. ساباهين پروقرامين خبر آلديم.

معلوم اولدو کي اورتادا بير آز آواراچيليق وار. کيمسه ساباهين نه اوز وئره‌جگيني بيلمير، اونا گؤره ده هئچ بير ايشي دوزگون پلانلاشديرا دا بيلميرديلر. دئمه‌لي ايش بير آز اؤز باشينا ايرلي گئديردي، همان گون قهرمان اردبيل شهرينده اوز وئرن شيدتلي توققوشمالار و مينه ياخين آدامين توتوقلانماسي، تهراني دا اؤز ائتگيسي آلتينا آلميشدير. هامي قورخونج و دومانلي بير فضادا ساباها گؤره صؤحبت ائديرديلر. تبريزدن زنگ ووروب، حسن آذربايجانين ائوينه تؤکولوب، اونو و اوغلو بابکين توتولماسينين خبريني وئرديلر. بو خبرلر هم اورگيميزي سيخير هم ده ساباهکي ايشلريميزي ده اؤز ائتگيسي آلتينا آلا بيلردي.

نه ايسه او گئجه تبريز ميلت وکيلي اعلمي‌يه زنگ ائتديم و اونونلا گؤروشمک ايسته‌ديم. او دا گئجه ساعات دوققوزا واقت وئردي. مجليسه گئديب، اونو اؤز دفترينده گؤردوم و ساباهکي مجليس قاباغي ميتينگدن ائله‌جه ده او ميتينگده‌کي اساس مقصدلريميزدن اونا دانيشديم و اوندان ايسته‌ديم کي او اؤزو ده حتما همين مراسيمده اولوب، دانيشسين.

دئدي: - من ساباهلاري خاريجي ايشلر ناظيريله بيرليکده هيندوستانا گئده‌جگم. ميتينگده اولا بيلمرم! (اؤز-اؤزومه دوشوندوم آخي بئله بير گونده، هئچ فيل‌لر ده هيندوستانا گئتمک هوسينه دوشمزلر! يقين اونو آرادان چيخارديرميشلار)

سوروشدوم:

- سيزجه ميتينگين قورولماسينا ايذين وئره‌جکلرمي؟

- بعلي بيزي امين ائديبلر کي هئچ بير توققوشما اولماياجاق!!- دئدي.

- بونا امين‌مي سينيز؟ سوروشدوم،

- بعلي امينم دئدي.

- ياخشي ساباه آدامدي ايشدي بو سؤزلر ترسه چيخسا بس بيز کيمين اتگيندن توتاق؟

او دئدي ساباه ساعات اوندا ميلت وکيللريني رهبرله گؤروشه آپاراجاقلار. آنجاق اوچ بئش وکيل قالاجاق مجليسده، سونرا دا قوشاچاي وکيلي محبي‌نيانين آديني چکيب، تلفن نومره‌سيني وئردي.

بوتون بو يئر دگيشمه‌لر و عجاييب داورانيشلار، تماميله علامتدار حاديثه‌لر ايدي.

بير ساعاتا ياخين اعلمي ايله دانيشديقدان سونرا مجليسدن چيخديم. يئنيدن دوشدوگوم اؤيرنجيلرين ائوينه دؤندوم. بعضيلر زنگ آچيب، گؤروشوموزون نتيجه‌سين سوروشدولار، يايم ساعات عرضينده بوللو SMS - لر ياييلدي کي صرافي، اعلمي ايله گؤروشوب و اعلمي دئييب اينتيظامي قوه‌لرين کيمسه ايله ايشلري اولماياجاق.

هده- قورخولار

ميلت وکيللرينه باش وورماقدان اصل مقصد آزجا فضاني يوموشاتماق و ميتينگه گلنلرين باشينا مشروعيت چتري آچماق ايدي. حال بو کي ميتينگ آخشاميندان اعتيبارا من اؤزوم يامان تهديدلره معروض قالميشديم.

تهرانا يئتيشجگين هاوا ليمانيندان مينديگيميز تاکسي‌ده ايکن جئپ تلفونوم زنگ ووردو و کيم‌ايسه ميريلداندي:

-     سلام مهنديس!! اؤزونسن.

-     البته کي هرکس اؤزودور. بس سيز؟

ديل-دوداغين چئينه‌يرک:

-  من؟!!. . . من رضائي‌يم، "ستاد خبري وزارت اطلاعات"-دان خيدمتينيزه زنگ آچميشام. لوطفا ساباه ساعات سکگيز ياريمدا بورا بير باش وورون چونکو چوخ واجيب ايشيميز وار- دئدي.

-     من گله‌بيلمرم- دئديم.

-     مهنديس‌جان چوخ واجيبدي‌ها حتما گلمه‌لي‌سيز.

-     باخين ايندي من تهراندايام و اعلمي ايله گؤروشوم وار- دئديم.

-     اعلميدن واجيب بورايا گلمکدي.

- بو اصلا مومکون دئييل، من لاپ ايندي تهرانا يئتيشميشم و قاييدا بيلمرم کي.

- بس هاواخت تبريزه قاييداجاقسيز؟ دئيه سوروشدو.

- سه شنبه دئديم.

- اوندا سه شنبه سحر ساعات سکگيز ياريمدا سيزي گؤزله‌ييريک - دئدي.

بير آزدان سونرا دوسلاردان بيري بهمن، منه SMS ووردو اونا زنگ ائديم. باشيم قالاباليق ايدي زنگ ائله‌مه‌ديم. باشقا بير SMS ووردو. بو مضمون ايله :

"ساباه مجليس قاباغيندا ميتينگين قوروجولاريندان هر کيمي توتسالار اون ايل زيندان کسه‌جکلر."

گئجه ساعات اون‌بيرده اؤزو زنگ ائله‌دي، سوروشدوم:

- آي بالا سن بو خبرلري هاردان بيليرسن؟

- منيم بعضي يوخاريداکيلار ايله علاقه‌م وار. بو خبري اونلار منه چاتديريبلار- دئدي.

دئدي: -گؤزله‌يين گئتميه‌سيز، سيزين اوچون چوخ تهلوکه‌ليدير.

منسه دئديم: - اعلمي ايله گؤروشموشم و او دئييب کي امن-آمانليقدي. ميتينگيميزه ايذين وئريله‌جک. هر حالدا من گئده‌جگم، سيز ده تشريف گتيرين.

او گئجه‌ني، بير تهر سحرله‌ديم. ال آياغيما کيمسه دولاشماسين دئيه تهرانا گلمگيمي ياخين فاميللريميزدن گيزلتميشديم. کيمسه منيم تهراندا اولدوغومو بيلميردي، سحر تئزدن هله چاي- چؤرک يئمه‌ميش، جئپ تلفونوم زنگ چالدي. تهرانداکي قارداشيم ايدي.

-عليرضا!! هارداسان؟ - دئدي

- نئجه ميه؟

-ائشيتميشم تهرانداسان، مجليس قاباغينا گئتميه‌سن ها؟

"گؤردوم حريف بيلير سؤزون دوغروسون. . " [1] داها دانماغا گلمز. دئديم:

- بعلي تهراندايام.

- او برنامه‌ني لغو ائله. سني توتوب، زيندانا سالاجاقلار- دئدي.

دئديم: - آخي نيه کي توتسونلار مني ؟

دئدي: - من بحث ائله‌ميرم. فقط بونو بيلمه‌ليسن کي گرک مجليس قاباغينا گئتميه‌سن.

- اولدو، سيز نياران اولمايين!! باخيم گؤروم نئيلرم - دئديم.

 

مجليسده

(يکشنبه 7 خورداد1385)

ساعات 9- دا مجليس قاباغيندا ايديم. بير ساعات سورا ميتينگ قورولاجاق ايدي. يئنه بهمندن بير SMS گلدي. بو مضمون ايله: "ميراث فرهنگي-يه عاييد، مجليس ياخينليغينداکي فيلان بينانين ايچيني سيلاحلي قوّه‌لرله دولدورموشلار. دئمه‌لي بير خبرلر وار!!"

داييم قارا خبرلر وئرن تلفونومو قاپيچييا تاپشيريب، ايچري گيرديم. مجليسين اوتورومو بيتميش و داغيلماقدا ايدي. ميلت وکيللري رهبر ايله گؤروشه گئتمگه تلسيرديلر. ساعات اوندان قاباق بوراني ترک ائتمک مجبوريتينده ايديلر.

محبي‌نياني سوروشدوم. زنگ ائله‌ييب چاغيرديلار. او دا مني گؤرمگه آشاغي ائندي. ظاهيرا صميمي داورانيردي. اليمدن ياپيشيب، يوخاري قاتداکي بير ايجلاس سالونونا آپاردي اورادا شاعير حسن مجيدزاده "ساوالان" هم ده ايکي باشقا دوستلاريني گؤردوم. اسدالهي و اعلمي. آنجاق بونلارين رحمان اسدالهي و ميلت وکيلي اکبر اعلمي ايله هئچ بير ايلگيلري يوخموش . سوروشدوم:

-     نه عجب ؟ سيزي کيم بورايا چاغيريب- دئديم.

معلوم اولدو کي "اونو چاغيرانين دا، مني چاغيرانلار ايله هئچ بير ايلگيلري يوخموش".

دئمه‌لي بو ساوالان گيلين بير شعر آخشاملاري اولارميش تهراندا و هردن محبي‌نياني اورايا چاغيرار، بعضي خئير ايشلرده الين قاتارميشلار. ايندي ايسه دمير قاپي‌نين تاختا قاپييا ايشي دوشوب، محبي‌نيا اونلاري چاغيريب کي ميلتيندن اوزاق قالميش وکيل‌لري بو دارگونده جماعتين اليندن قوتارماق لازيم گليرسه، اونلاري قاباغا وئرسينلر!!!

نه ايسه يئر گؤسترديلر اوتوردوق، محبي‌نيا سوروشدو: نه خبر؟ منه گؤره امريز اولسون؟

-  عرضيم اولار. واللاه سيزنن گؤروشمگي آقاي اکبر اعلمي منه تاپشيردي. اؤزوز ياخشي بيليرسيز، بير ساعات سونرا بورادا بير ميتينگ اولاجاق. بيزيم دوستلارين سيزدن ايستگي بودور کي همين ميتينگين دينج شراييطده کئچمه‌سينه ايمکان ياراداسينيز. بيزيم قيسا دانيشيقلاريميز اولوب، سوندا دا بير بيانيه اوخوناجاق. دئديم.

-     چوخ گؤزل داها نه؟

- سؤز بوردادير کي پوليس موداخيله ائده‌جک، سانيريق. اونا گؤره هرشئيدن اول سيزدن ايسته‌نيلير کي اينتيظامي گوجلرين يوگوروب، اوشاقلاري ووروب، توتمالارينا ايمکان وئرميه‌سيز. دئديم

-     يوخ ائله بير ايشذلر اولماياجاق. بيزه دئييبلر کي اونلار ابدا بو ايشه قاريشماياجاقلار.

-     دئديم سيزه ائله دئييرلر. آنجاق بيزه باشقا نيشانه‌لره گليب چاتير.

و سون ساعاتلاردا اولان تهديدلري اونا آچيقلاديم. او دا حئيرتله قولاق آسيردي. معلوم اولدو کي بو اويونلار دا هاميسي سعيد ايمامي گيلين فيتنه-فعليدي. بير طرفدن ميلت وکيللرين اله ساليب، آلداديرلار. چونکو اونلارا موداخيله ائده‌جگيک دئسه‌لر، اوندا بعضي باش-قولاغي ترپشن وکيل‌لر اورتايا دوشوب، هاي-کوي سالارلار. بو دا اينتيظامي گوجلرين ال آياغين باغلار. او بيري طرفدن ده بيزه هده-قورخو گليرلر کي اولدوقجا مجليس قاباغينا گلمکدن قاچيرتسين.

اوردان-بوردان ائشيديليردي کي: دوننکي اردبيل قيامچيلاريني کوبودجاسينا تاپدالاماقدان بير مقصد ده مجليس ميتينگينه قاتيلاجاق آداملاري بو ايشدن چکينديرمک‌ميش. اونونچون ده محبي‌نيانين وئرديگي تأميناتا هئچ ده اورک قيزميردي.

دئديم:

-  باخين من آذربايجاندان گليرم اورادا وحشيجه‌سينه جماعتي ووروب دؤيورلر. نئچه‌لري شهيد اولوب، دونن اردبيلده مين نفره ياخين آدام توتولوب، ايسراغي گون تبريزده عينالي داغي اتگينده بسيجيلر چوماق ايله يوگوروب، آذربايجان مارشين اوخويان گنجلري اؤلومونه تاپدالاييبلار، بير چوخونو دا توتوبلار.

سولدوزدا، نوماييش کئچيرنلرين اوستونه آتش آچيبلار. نئچه نفر قانينا بله‌نيب، يوزلرجه آدام يارالانيب، "يا ديليم يا اؤلوم" باغيران بير يئني-يئتمه گنجين گولـله ايله بوغازيندان ووروب، يئره سالميشلار.

بونو دئيرکن بيردن بوغازيم بيچيلدي، داها اؤزومو ساخلايانمادييب، اؤکوتمه ايله آغلاديم.

محبي‌نيا سؤزلريمدن درين ائتگيلنديگيني بيلديريريب، مني اووندورماق اوچون دئدي:

-       يوخ ايشالـله قويماريق بورادا بئله ايشلر اولسون.

محبي‌نيا حتي منه دئدي کي مجليس رئيسي "حداد عادل" اونا خوصوصي حالدا "آذربايجانليلار گلسينلر مجليسين ايچينه و تريبون آرخاسيندان دانيشسينلار. بورا ميلتين اؤز ائويدي. بورادا ميلتي دؤيمزلرکي" دئميشدي!! (آي سن اؤزون اؤله‌سن).

دئديم:

- الده اولان نيشانه‌لر اينتيظامي گوجلرين بيزيم قارشيميزي آلاجاغيني گؤسترير. بس نه عجب بوگون دوز ساعات اوندا نوماينده‌لري رهبر ايله گؤروشه آپاريرلار؟ هامي چيخيب، گئدير، اورتاليغي خلوت ائديرلر کي بيلديکلريني ائله‌سينلر دا.

محبي‌نيا دا ايشاللاه-ماشاللاهدان باشقا دئمگه بير سؤزو يوخ ايدي.

***

وکيل‌لردن جبارزاده، تبريز ميلت وکيلي و خانيم مروتي خلخال ميلت وکيلي ده "بيت رهبري"-يه گئتمه‌ميش[2]، مجليسده قالميشديلار گؤرسونلر ايش نئجه ايرلي گئده‌‌جک. بو حضرات دا آرا-سيرا اوتاغا گيريب، سؤز آراسيندا وردنه يئتيريرديلر.

مجليسين ائشيگينده

ساعاتا باخديق ميتينگ زامانينا اون دقيقه قاليردي. آشاغي ائنديک مجليس حيطي‌نين ايچي سيلاحلي قوه‌لرله دولوايدي، ائشيگي ده. خياوانا چيخديق. مجليس الينه گلمگه کيمسه‌ني بوراخميرديلار، او بيري الدن گئدنلره ده دايانيب، باخماغا ايجازه وئريلميردي، ظنيمجه سايلاري اوچ‌‌مين نفري آشان اينتيظامي مامورلار، مجليسي تماميله موحاصيره‌يه سالميشدي. خاريجي موخبير اولسايدي ائله بيلردي کي مملکتده کودتا-فيلان باش وئريب!! ائشيتديگيمه گؤره مجليسه ساري گلن جاده‌لري ده مامورلارلا دولدورموش و مجليسي بير نئچه حلقه‌ده موحاصيره‌ ائتميشديلر.

مجليسين قوزئي قاپيسندان چيخيب، اسکي قاپيسينا قدر يورويرک گئتديک. محبي‌نيا و اونون چاغيرديغي قوناقلار دا گلديلر.

معلوم دئييلدي کيم-کيمين قورخوسوندان کيمين داليندا دالدالانير. قوناقلارمي پوليسين قورخوسوندان وکيلين داليندا، يوخسا وکيلمي ميلتين قورخوسوندان قوناقلارين داليندا!؟.

اسکي قاپي قاباغي دا خلوت ايدي. ميتينگ اوچون هئچ بير الوئريشلي شراييط گؤرنموردو، مجليس الينده قوو وورورسان قولاق توتولور، سرچه ده اوچموردو. اما او بيري ال زيم‌به‌زيم آداملار، دورمادان اويان بويانا وورنوخوردو.

مجليس حيطينده‌کي قارغالار تئز-تئز اؤز يئرلرين دگيشير و قاريلديرديلار. بير-بيرلرين يوخلاييب، نه ايسه خبرلشيرديلر!، سانکي اونلار دا بو آغير دورومون فرقينده ايديلر.

دؤندوک يئنه‌ده قوزئي قاپييا. بورادا معلوم اولدو کي بيز ايلن گلن اعلمي قاييدارکن مجليسين اوتايينا آتلاييب، دوستونون بيرين گؤرسون، اونو دا دوستويلا بيرليکده اورداجا توتوب، آپارميشلار.

مجليس قاپيسي قاباغيندا اونلارجا الي بي‌سيملي، قاش‌قاباقلي آغالار دالبادال مجليس ايچينه گيريب، چيخير، نه ايسه سؤکوب، قوشوردولار.

اؤزومله بو قرارا گلديم کي مجليس قاباغيندا دوراجاغام. ساوالان گيل محبي‌نيا ايله ايچري گيرديلر، اويان-بويانا زنگ ائله‌سينلر، بلکه توتولانلاري تئز بوراخسينلار. منسه قاپي قاباغيندا دايانديم. بو آرادا تانيش اؤيرنجيلردن بير-ايکيسي ياخينا گليب، دئديلر:

-     سيز ائله قاپي قاباغيندا دايانين باشقالاري سيزي گؤروب، ييغيشارلار.

ساعات 11-‍‍ه آز قاليردي. بير آزدان حيدر شادي، سونرا يوروش مهرعلي‌بگلي، صونا خانيم، و. . . بير-بير ساکيتجه‌سينه مجليس قاپيسينا توپلانديلار. تقريبا 50- 60 نفر اولدوق. اولار دئييرديلر کي:

-  بير ايکي يئرده مامورلار ايله توققوشما اوز وئريب، جماعت پلاکاردلاري آچيب، آما مامورلار اونلارا يوگوروب ايرلي گلمه‌لرينين قاباغين آليبلار. بير چوخلارين دا توتوبلار، بوتون جئپ تلفونلاريني ايشدن ساليبلار. مجليسه ياخين مترو داياناجاغي‌نين دا قاپيسين باغلاييب، سرنشينلره باشقا داياناجاقدا ائنمگي تکليف ائديرلر.

قالين موحاصيره ‌حلقه‌لرين اوردان - بوردان سينديران بو دوستلار دا مني مجليس قاباغيندا گؤروب، اورکلري قيزيشيب، ايرلي گليبلر دئييرديلر.

هر حالدا همين اللي-آلتميش نفرين توپلانماسي بير غنيمت ساييليردي. اصلينده بؤيوک ايشلر ائله کيچيک قروپلاردان باشلار. بيزيم ايگيرمي قدمليگيميزده يوزه ياخين سيلاحلي گارد و آرخاميزدا دا قاراياخا مامورلار دورموشدولار.

دوستلار چوخ دا گؤزه گلمه‌سينلر دئيه، بير-بيريندن بير آز آرالي دايانميشديلار. بيري ياخينلاشيب قولاغيما دئدي:

بيزجه ائله بورادا ييغيلان نفراتين حضورو ايله دانيشيغا باشلاياق. کاشکي وکيلين بيري ده گليب، بوردا دورسايدي.

-     هه، اوندا قيامت گونونده بيزيم ده بير شفاعت ائدنيميز اولاردي.

محبي‌نيايا خبر وئريلدي کي بير عيده اؤيرنجي مجليس قاباغيندا توپلانيبلار. تئز گلين برنامه‌ميزي باشلاماق ايسته‌ييريک. اودا ايندي بو دقيقه گلرم دئييب، آنجاق 20 دقيقه سوردو اونون بو دقيقه‌سي!!! و بو آرادا اينتيظامي گوجلر ده گليب، هامي دوستلاري سيليب، سوپورتده‌ديلر. هامي داغيلديقدان سونرا جناب محبي‌نيا تشريف گتيرديلر!!

محبي‌نيا گلينجه ده: - داها فايداسي يوخدور گلين گئدک مجليسين ايچينه - دئدي.

-     من هله وارم سيز بويورون.

عهد ائله‌ميشديم ساعات 12-يه قدر توپلانيب، توپلانماساق بئله مجليس قاپيسي قاباغيندا دورام.

****

داها تدريجا ال آياق کسيليردي. قارا گئييملي، قارا گؤزلوکلو برادرلر آرخامجا وار-گل ائديرديلر، کيم کي مجليسه حتي شخصي بير ايش اوچون ده گيرمک ايستيردي قايتاريرديلار کي بوگون مجليس تعطيلدي، بوردا دورمايين، وکيللر "بيت رهبري"يه گئديبلر، عريضه‌نيزي آلاجاق کيمسه يوخدور!!

گارد ويژه‌لر آياقدا دورماقدان يورولموش، اللرينده‌کي باتومو اوينادير، بعضا قالخانلارين چتير کيمي گونه قارشي توتوردولار، . . . مجليس ايچينده قارغالار قاريلدير. هاوا ايستي‌لشيب، بوغوجو حالا گلميشدي. ايکي يوزباشي سردار بير-بيرينه ياخينلاشيب، نه ايسه پيچيلداشيب، بوشو-بوشونا هيرلديرديلار.

ساعات اون ايکيني بير نئچه دقيقه ده سووشوردو. اطرافيما باخديم، دئيه‌سن خيمه‌لرده کيشي طايفاسي ائله بير من قالميشام!.

اليم-قولومدان اوزون بير داها محبي‌نيانين آدين وئريب، مجليسن ايچينه گيرديم. محبي‌نيا، ساوالان‌گيل ايله ناهار يئمگه رستورانا گئديرديلر. مني ده چاغيرديلار. من ده کي زهريمارين يئميه‌جکديم بو زهلم گئتميشلرين. - سيز بويورون، من دوستلاريمي گؤزله‌مه‌لييم بورادا -دئديم. و بير- ايکي ساعات آياق اوستو وار-گل ائله‌ديم.

سحر چاغي مجليسي سيلاحلي قوه‌لره تاپشيريب، رهبرله گؤروش باهاناسيله اکيلن وکيللر ايسه بير-بير قاييديرديلار. ناهارين يئين، ديشلريني قورتلايا-قورتلايا، چيخيب، مجليسين کوريدورلاريندا گزيشيرديلر. ساوالان‌گيل ده هاندان گئجدن چيخيب گلديلر. مجليسين لابي‌سينده اوتوردوق.

***

بو آرادا رهبرين گؤروشوندن قاييدان مهاباد وکيلي نياران حالدا محبي‌نيانين يانينا گليب، سوروشدو: نه خبر آذربايجانليلاردان؟ او دا قيساجا بير خبر اولمادي دئدي، کيشي‌نين گؤزلري گولدو، ال گؤتورتودو گؤيه کي آللاها شوکور بلا سووشدو!

***

ساعات ايکي-اوچ عرفه‌لرينده اکثرا توپلوم اوشاقلاري اولان بئش‌آلتي نفر گلديلر مجليسين ايچينه. گؤروشدوک.

ايکي يوز نفره ياخين آدام توتولوب - دئديلر. اونلار مجليس قاباغي ميتينگ اوچون توپلومون حاضيرلاديغي بير بيانيه‌ني محبي‌نيا و بير نئچه باشقا نوماينده‌يه وئرديلر. و اونونلا بير ساعات فيلان دانيشديلار. محبي‌نيا دا بوينونا آلدي، آذربايجان وکيللريني بير آرايا ييغيب، بيزيمله گؤروشدورسون. بير ده سؤز وئردي، پرزيدنتين پارلمان ايشلري يارديمجيسي آقاي موسويدن واقت آلسين، بيز آذربايجان مسأله‌سينين ايچ اوزونو اونلارا آچيقلاياق، حتما چوخ تأثيري وار - دئدي.

بو موسوي دئديکلري...

(سه‌شنبه 09/03/85)

محبي‌نيا، موسويدن واقت آليب، سه‌شنبه ساعات اون بيره وعده قويموشدو.

ساعات 11 عرفه‌لرينده جناب موسوي ايله اؤز دفترينده گؤروشدوک. تخمينا 30-35 ياشيندا بير مولّا ايميش بو موسوي دئديکلري. دؤرد نفر توپلوم اوشاقلاريندان، بير ده من ياآلـلاه دئيب، گيرديک مولّانين دفترينه. بيزي گؤرن کيمي باشلادي کي:

-  من اؤزوم خوزستانليام، آي بئله اهوازين بودجه‌سيني کسيب آيري يئرلره خرجله‌ييرلر، بيليرم. اليمده آمار-فيلان وار، اونا گؤره ده سيز آذربايجانليلارين دا مسئله‌سيني ياخشي باشا دوشورم. بعلي هر يئرده تبعيض وار، - دئدي بيزه.

او دئدي: - ناهاردان سونرا هئيت-دؤولت جلسه‌سينده اولاجاق و بيزيم سؤزلريميزي و ايستکلريميزي اورادا دانيشاجاق. بيز ده تقريبا 45 دقيقه اونون بئينينه قوورا چکيب، دانيشديق. سؤزلريميزين اساس محوري بو ايدي:

1- مينلرجه گوناهسيز توتولانلاريميز وار. اونلار تئزليکله تعيين تکليف اولوب، بوراخيلماليدير.

2- بعضيلريني يالاندان تلويزيونا گتيريب، دانيشديرماق ايسته‌ييرلر، بيز بونو هر يئرده ايفشا ائله‌ييب، اوستون آچاجاغيق . تاپشيرين بو بايات ايشلريندن ال گؤتورسونلر.[3]

3- کاريکاتور فيلان آنجاق شوونيسم عليهينه اعتيراضلاريني بيلديرمک اوچون آذربايجانليلارا بير مجال ياراتدي، اونا گؤره ده "ايران"ي باغلاماق ايله بو مسئله حل اولماياجاقدير. ميلي مساله آذربايجانين، ائله‌جه ده ايرانين ان اؤنملي مساله‌لريندن ساييلير. (بورادا ميلي مسأله‌نين ايقتيصادي، ايجتيماعي و سياسي ابعادي حاقيندا چوخلو صؤحبت اولوندو)

4- آذربايجان شهرلرينده دينج و مدني يوللارلا اعتيراضلاري، رژيمه عاييد اونيفورملو ياخود دا قاراياخا مامورلار گرگينليگه چکيب، داليسينجا وور- سيندير يولا ساليب، خلقين اوستونه آتش آچميشلار. هامي بيلير کي بوتون بو جينايتلرين اساس عاميلي دؤولته منسوب اولان آداملاردير. اگر سيز بو جينايتلري تاييد ائتميرسينيزسه اوندا جانيلري توتوب، جزالانديرمالي‌سينيز.

ايشي بئله گؤردوکده، ياخشي من بو سؤزلري اورادا دانيشارام دئدي.

حاجي‌آغانين سکرتري هئي قاپيني آچيب، ادي-باجي ائديردي کي: "حاج آغا تو جلسه منتظرتونن! دير نشه ها! "

مولّا دا عباسينا بورونوب، هئچ بير مسئوليت گتيرن وعده- وعيد وئرمه‌دي، بوتون دؤولت آداملاري کيمي تماميله دگمه منه، دگمه‌ييم سنه داوراندي، . 45 دقيقه يئرينده وورنوخاندان سونرا سکرترينين کؤمکچيليغي ايله ياخاسيني اليميزدن قوتاردي.. بيز ده

"گؤروب حکّام عصري بي‌خبر صيدق و صداقتدن

چکيلديک عيزت و تمکين ايله باب حؤکومتدن" [4]

***

بئله‌ليکله اونا‌‌ دئديگيميز سؤزلردن علاوه بيرده، رسمي تهرانا "مئيداندان قاچماريق دئميشديک". هم ده بو ايشيميزله حاکيمين آغزين باغلاميشديق کي دئمه‌سينلر: هاني به !! بيز بوتون مساله‌‌لري حل ائده بيلرديک آما سيزي چاغيرديق، گلين دانيشاق، کيمسه‌نين جوراتي اولمادي، گليب، بيزه نت و آچيق شکيلده مسأله‌ني دانيشسين. ..

 

قوتارمادي...

 



[1] - گؤردوم حريف بيلير سؤزون دوغروسون
ياخشي تانير مملکتين اوغروسون

بو شعر حبيب ساهيرين " گولشن" منظومه سيندندير.

 

[2] - خانيم مروتي بيزلري چوخ تاييد ائديردي، او احمدي نژادين سياستلريني تنقيد ائديب، دئييردي کي : دؤولت لاپ ائله اول گوندن آذربايجانليلاردان عوذر ايسته‌مه‌لي و ايران قازتيني ده توبيخ ائتمه‌لي ايدي. اؤزو باعيث اولوب ايش بو قدر بؤيوسون. بير ساعات سونرا دا مجليس قاباغينا گلن آذربايجانليلاري وحشيجه‌سينه دؤيولوب، توتولماسين ائشيدن کيمي داها اؤز قاباغين ساخلايانمادي و گؤز ياشلاري ايچينده دؤولتين سياستلريني پيسله‌ييردي. . .

اما اونون عکسينه جبارزاده اولدن آخيره قدر فيلم اوينايير و سياسي داورانيردي.

[3] - بو صؤحبتلرين آرديني توتان اؤيرنجيلريميز ده ايشي نئچه يؤنده ايرلي آپاريب، نتيجه‌ده اعلمي‌ تبريز زيندانيندان رسمي گؤروش ائدير و زيندان مسئوللاري‌نين ال آياغي بير آز ييغيلميش اولور.

 

[4]- بو شعر ناميق کمالداندير، اصلينده ده "حکّام" سؤزو يوخ "احکام" اولاجاق سانيرام.