گونئی آذربايجان ميللی حرکتی نين سورونلاری
حسن. ر. ش

گونئی آذربايجان ميللی حرکتی ايله ايلگی لی مسئله لرين دولاشيق ليغی ، طبيعی اولاراق ميللی حرکتده ياشانان سورونلاری دا ( مشکل لر ) قات - قات آرتيرير . يانی بو سورونلار گونئی آذربايجان ميللی حرکتی نی اؤيله بير پيرتلاشيق و دولاشيق يوماق حالينا گتيريب چيخارديب کی بو دويونلرين چؤزولمه يی اولدوقجا چتين لشيب دير . بو دويونلرين چؤزولمه يی اوچون بيز اؤنجه گونئی آذربايجانين دورومونو ( وضعيت ) چئشيدلی يؤنلردن اينجه لمه لی ييک ، سونرا گونئی آذربايجان ميللی حرکتی نين اؤنونده بولونان سورونلاری ، هم ايچه ریدن و هم ديشاريدان اله آلمالی ييق و سونوندا بو سورونلاری اورتادان قالديرماق اوچون اليميزدن نه لر گلديک لرينی ، وار اولان ايمکانلاريميزا گؤره گؤز اؤنونه توتاراق ، دوشونمه لی ييک .

گونئی آذربايجانين دورومو

دونيا خريطه سينه قيسسا بير گؤز آتساق گونئی آذربايجانين اورتادوغو بؤلگه سينده يئر توتدوغونو گؤره بيلريک . اورتا دوغو ايسه ، دونيانين بو گون استراتژيک بؤلگه لريندن بيری بلکه ده ان استراتژيک بؤلگه سی دير دئيه بيله ريک . ايران اؤلکه سينه گلينجه ، بو بؤلگه نين ان استراتژيک اؤلکه سی ساييلا بيلر. گئرچک اولان بوکی ايران سينيرلاری ( مرز ) ايچينده بولونان گونئی آذربايجان بو اؤلکه نين ان استراتژيک نقطه سی دير. ايندی بيز بو گئنيش آچی دان ( زاويه ) گونئی آذربايجانلا ايلگی لی مسئله لری اله آلديقجا ، او مسئله لرين نه قدر دولاشيق و بوروشوق اولدوغونو ، ادعا ائده بيله ريک . گونئی آذربايجانين استراتژيک بير نقطه اولدوغو اونون اوزرينده جغرافی ، سياسی ، اقتصادی و اؤزه لليکله کولتوره ل حساسيت لری اوست اوسته قالاييب دير . سؤز اوزانماسين دييه ،اورتادوغو و ايرانين استراتژيکلی يی نين نه دن لرينی بير قيراغا آتيب ، سؤز قونوسو اولان گونئی آذربايجان اوزه رينده آناليز ائتمه يه باشلاياق . اصلينده اورتادوغو بؤلگه سی نين و اونون ايچينده و مرکزينده بولونان ايران اؤلکه سی نين نه قدر استراتژيک و حساس اولدوغو ، دونيا گوجلری نين بو بؤلگه و اؤلکه اوزه رينده رقابت ائتدی ييندن بللی اولونور . همده بو دفعه باشقا بير يؤنتم له گونئی آذربايجان مسئله سی اينجه له نسين دييه ، ميکرو آچی دان ماکرو آچی يا دوغرو ، مسئله نی آراشديرماغا چاليشاق . داها دوغروسو اؤنجه گونئی آذربايجانين دورومونو اله آلاق ، سونرا ايران اؤلکه سی و اورتادوغو بؤلگه سی نی آنلاماغا چاليشاق .

گونئی آذربايجان جغرافی باخيمدان ايران اؤلکه سی نين ان حساس و استراتژيک نقطه سی دير . بيز دفعه لر جه ايسلامی رژيمين باشچی لاری نين آغزيندان بؤيله بير سؤزون چيخديغينا تانيق اولموشوق : (( آذربايجان ايرانين باشی دير )) . آمما گئرچک اولان بو کی اوزون بير تاريخی دؤنم بو ديل سيز آغيزسيز باش ، 80 ايل ايراندا اوستون گوج اولان فارس فاشيزمی و اوليگارشی سی نين ان ضعيف نقطه سی دير . يانی فارس فاشيزمی رژيمينه ، آشيلين دابانی کيمی ساييلا بيلر . اصلينده او سؤزون آماجی قولتوقلاريميزا قارپيز وئريب ، بيزی حاقلاريميزدان واز گئچيرتمک اوچون آلداتماقدير . بيزيم تاپدالانيب آياق آلتينا قويولموش ميللی و اينسانی حاقلاريميزی ديله مه يیميز و اونلارا چاتماغی ميز ، فارس فاشيزمی و اوليگارشی سی آشيلی نين دابانينا سانجيلان بير اوخ دور .

جغرافی باخيمدان بيزيم قونشولاريميز قوزئيده ، آراز چايی نين او تاييندا وار اولان قوزئی آذربايجان و باتی دا ايسه تورکيه اؤلکه سی دير . دوغودان خزر گؤلونون باتی ساحيلينده يئر توتوروق . بو ايکی اؤلکه نين ميللتی ، دولت لری نين سياست لری گونئی آذربايجانلا ايلگی لی بير قيراغدا قالسين ، ديل و کولتوره ل باخيميندان گونئی آذربايجان ميللتينه قارداش دير . بو ميللت لرين آراسيندا ايليشگی لرين ( روابط) گئنيش لنمه يی و درين لنمه يی ، گئت - گئده قارداش ليق باغلارينی سيخلاشديرا بيلر . داها دوغروسو بو ايکی اؤلکه نين ، فارس فاشيزمی رژيمی نين قولاغی نين ديبينده وار اولماسی و تورک کيملیگی نی ( هويت ) اورتادوغو بؤلگه سينده و اولوسلار آراسی ( بين الملل ) ساحه ده ياشاديب سوردورمه سی ، گونئی آذربايجان ميللتی اوچون کولتورل و ديل باخيميندان ، سؤيکه نه بيله جک داغ کيمی بؤيوک بير وارليق دير . البته فارس فاشيزمی هر زامان بو ايکی اؤلکه نی اؤزو اوچون تهليکه قايناغی آدلانديريب . حتی اکبر گنجی کيمی دئموکراسی شعارينی وئرن بير شخص بئله گئچميش ايللرده يازديغی مقاله لرين بيرينده ، قوزئی آذربايجانی ايران اؤلکه سينه ( داها دوغروسو فارس فاشيزمينه ) بير تهليکه قايناغی کيمی آلقيلاميشدی . آيری ياندان تورکيه اؤلکه سی ، فارس فاشيزمينه آوروپا اؤلکه لرينه ال تاپماق اوچون اؤنملی بير دالان و گئچيت دير. قوزئی آذربايجان ايسه عئينی اؤنمی قفقاز بؤلگه سينده داشی يير . بللی دير کی فارس فاشيزمی بو ايکی اؤنملی و استراتژيک گئچيت دن گله بيلن يارارلاری الده ن بوراخماماق اوچون ، ايران سينيرلارينی و بوتونلويونو قوروماق ايسته يير ، .و اونون فيکرينجه بو بوتونلويو پوزابيله جک هر حرکت، اؤزه لليکله غير فارس ميللی ليگی ساحه سينده ، بوغولوب ياتيرتمالی دير . فاشيزم بو ايمکانلاردان يارارلانماغی اؤزونده ن باشقا هئچ بير گوروها ، اؤزه لليکله گونئی آذربايجان ميللتينه حتی فدرال سيستئمينده بئله ، وئرمک ايسته مير .

سياسی باخيمدان گونئی آذربايجان تاريخ بويو اؤزه لليکله ( خصوصا ) سون يوز اللی ايلده ، هر بير حرکتده قاباقجيل اولوبدور و رئژيمين باشچی لارينين بيرينين دئديگينه گؤره ، اينقيلاب اوجاغی دير . چاغداش دؤنمده تورکيه و قفقاز يوليله ايرانا گليب چاتان سياسی دوشونجه لر ، ايران مرکزينه وارمادان اؤنجه گونئی آذربايجاندا يئرله شيب و سياسی حرکت لرين نه دنی اولوبدور . پهلوی و ايسلامی رژيم بير سوره ( مدت ) گونئی آذربايجانين ، دونيانين باشقا اؤلکه لريله دوشونجه آليش وئريشينده بولونماغیني اؤنله مکده باشاريلی اولسايدی لاردا ، آرتيق اينفورماسيون دؤنمی بو ايشه سون قويدو .

اقتصادی باخيمدان ايسه ، گونئی آذربايجان وارلی و زنگين يئر آلتی و يئر اوستو قايناقلارا صاحيب دير . کولتورل باخيمدان گونئی آذربايجاندا ، چوخ اسگی و گئچميش تورک تاريخی ، تورک ميتولوژيسی ، ادبيات ، موسيقی و داها اؤنملی ، گؤزه ل و زنگين ديل بولونماقدادير .

بوتون بو پتانسيل لری الده ائتمک و اونلارا صاحيب چيخماق اوچون گره کن بيرينجی و اؤنملی شئی ، ميللی دوشونجه نين اويانيب ديرچلمه يی دير . بو اويانيش و ديره نيش ديل و کولتورل وارليغيميزا و کيملی ييميزه دؤنوش و قاييتماقدان يولا چيخير . داها دوغروسو ديل و کولتوره ل باخيميندان ميللی دوشونجه نين اويانماسی تمل ، کؤک و بيرينجی آشامادير ( مرحله ) . آمما اونونلا سينيرلی ( محدود ) قالمامالی و بير بوتون اولاراق سياسی ، ايقتيصادی و اينسانی حاقلاريميزی دا ايچينه آلمالی دير .

بوتون بونلار گئنيش جغرافييايا و ان آز اوتوز ميليونلوق نفوسا صاحيب اولان گونئی آذربايجانين حساس ليغينين و استرا تئژيکلی يینين نه دنلریدير . فارس فاشيزمی گونئی آذربايجانی سؤمورمک ( استثمار ) و الدن وئرمه مک اوچون گونئيده يارانان هر تورک ميللی دوشونجه سینی داشييان باغيمسيز ( مستقل ) و اؤرگوتلو ( متشکل ) حرکتی ، بوغوب اؤلدورمک ايسته يير و بؤيله بير اؤرگوتلو و و باغيمسيز ميللی حرکتی ، ايستر ديل و کولتوره ل بويودوندا ( بعد ) اولسون بئله ، اؤز وارليغی اوچون بير تهليکه گؤرور . اونا گؤره ده فارس فاشيزمی ، گونئی آذربايجان ميللی حرکتینی بو قدر باسقی آلتينا توتور و اليندن گلديگی قدر بو حرکتی ايستر ايران ايچريسينده ، ايسترسه ده ايران ديشيندا، ائتگی سيز ( بی تاثير ) و يوخ ائتمک حالينا گتيرمه يه چاليشير .

فارس فاشيزمی و اورتا دوغو

ايران سينيرلاری ايچينده ، باشقا غير فارس ميللت لرينی سؤمورن و ايسلامی رژيم ماسکاسی آلتيندا حياتينی سوردورن فارس فاشيزمی نين دورومونو ، چئشيدلی ( مختلف ) يؤنلردن اله آلمالی ييق . اورتادوغو بؤلگه سی نين ان استراتژيک اؤلکه سی ايران آدلانان توپراقلاردا ياشايان فارس فاشيزمی و اوليگارشی سی ، ايران ايچينده و ديشيندا الينده بولونان ايمکانلارين يانيندا ، چوخلو سورونلارلادا قارشی قارشييا دير . بورادا بو سيستئم ايچينده بعضی فرقلی دوشونجه ده اولان چئوره لری ، گوروهلاری و شخص لری گؤز اؤنونه توتما لی ييق . آمما اؤنجه بو سيستئمين ( فرقلی دوشونجه داشييانلارينی دا اونون ايچينده گؤرمک شرطيله ) دورومونو ، گونوموز قوشوللاريندا ( شرط لر ) آنلامالی ييق . ايسلامی رژيم 57 اينجی ايلده ايدئولوژيک شعاريله دونيايا آياق قويسادا ، گئت - گئده ايدئولوژيک شعارلارينی سياسی چيخارلارينا و يارارلارينا قوربان وئردی و بو گون ايدئولوژيک سؤيله نتیلر و اينانجلار ، اونون سياسی آماجلاری اوغروندا بير آراج ( وسيله ) کيمی قوللانيلير ( استفاده ) دئيه بيلريک . ايسلامی رژيم ايران ميللت لرينين چيخارلارينی و يارارلارينی يوخ ، اؤز چيخارلارينی قوروماق اوچون چوخلو سورونلارلا قارشی قارشييا قاليبدير . بو گون بوتون دونيانين ايسلامی رژيمه حاقلی اولاراق الشديری لری ( تنقيد ) بونلاردان عيبارتدير : اينسانی حاقلارين آياق آلتينا قويولوب تاپدانيلماغی ، اؤلکه ده گئرچک دموکراسی نين اولماماغی ، دونيا تروريست لرينه و اؤزه لليکله شيعه تروريست لره آرخا دوروب و اونلارا مادی و سيلاح يارديمی ائتمک ، اؤزونو و تروريست لری نوکلئر سيلاحلانديرماغا چاليشماق ، غير فارس ميللت لرين و باشقا دين لرين حاقلارينی ازمک ، اورتا دوغودا باريش حرکاتی نين گرچک لشمه يينی اؤنله مک . بوتون دونيا ايسلامی رژيمدن بو حاق سيزليق لارين اورتادان قالديريلماغینی ايسته سه ده ايسلامی رژيم بو ايسته کلرين قاباغيندا ديره نير و اونلاری جيددييه آلمير . آيری ياندان بو قونولاری ( موضوع ) بير بيريندن آييرد ائتمک دوغرو دئييل و بو مسئله لری بير بوتون اولاراق اينجه لمه ييميز لازيمدير . بونون يانيندا بؤلگه ده عرب اؤلکه لری نينده ايسلامی رژيمده ن باغری آغ دئييل . اونلار ايسلامی رژيمی و داها دوغروسو فارس فاشيزمینی بؤلگه ده اؤزلری اوچون بير تهليکه گؤرورلر .

ايسلامی رژيم و اونون دريسينه گيرميش فارس فاشيزمی ، اؤزونون قاليجي ليغينی قوروماق ايسته يير . آمما بو قوروماغين يؤنتملری ( روش ) ايکی قروپ طرفينده ن فرقلی دير . بيز اؤنجه ايسلامی رژيم ايله فارس محور ايرانچی لارين اورتاق و فرقلی يؤنلرينی ( جهت ) باشا دوشمه لی ييک . هر ايکی قروپ ايراندا ياشايان غير فارس ميللت لرين حاقيندا عئينی سياستی پايلاشيرلار . اونلارين هئچ بيری غير فارس ميللت لرين ميللی و اينسانی حاقلارینين اؤده نيلمه يينی ايسته ميرلر و بو ايشی اؤزلرينين وارليغی اوچون بؤيوک تهليکه بيليرلر . آيری ياندان هر ايکی قوروپ، ايران اؤلکه سی نين اونلارين اليندن گئتمه مه يی اوچون ، آمريکايلا ساواش ايسته ميرلر ، بونا گؤره کی آمريکايلا ساواش مرکزی گوجون داغيلماغينا سبب اولا بيلر . اونلار بو آماجلارينا چاتماق اوچون اللريندن گلن هر ايشه باش وورورلار . البته ايسلامچی فوندامنتاليست لرين ايچينده بعضی ساواشدان قورخماماق شعارينی وئرن لر و آمئريکانين اؤنونده ديره نه بيله جکلرينی ادعا ائدنلر بولونماقدادير ، آمما بونلار ايچی بوش سؤيله نتیلرن باشقا بير شئيه بنزه مير . بو حاقدا گله جک سطيرلرده دوشونجه لريمی گتيره جه يم . فارس محور ايرانچی لار مذهبی کرالليق سيستئمی نين دييشيلمه يينی و اونلارجا ان ايده آل و اينسانی فورماسینين يانی جومهوری سيستئمی نين ، يارانماغينی ايسته ييرلر . باخماياراق کی بعضی سلطنت چی و يا مشروطه شعارينی وئرن سلطنت چیلرده بو قوروپدا يئر آليرلار . آمما فوندامنتاليست ايسلامچی لار بو ايسته يين قارشی سيندا ديره نيرلر .

ايندی آمئريکايلا ايسلامی رژيم آراسينداکی گرگين ليگی ( تشنج ) اله آليرساق ، هله ليک بو گرگين ليک نوکله ر مسئله سی اوزه رينده دورور . آمما گئنيش بير آچی دان مسئله يه باخديغيميزدا ، اورتادا روسيه نی و چينی اورتا دوغو بؤلگه سينده ائتگی سيز حاله گتيرمک اوچون ، بير بؤيوک اورتادوغو پروژه سی واردير . او پروژه نين آماجی بوندان اؤنجه کی مقاله ده ( گونئی آذربايجان و اورتادوغو ) يازديغيم کيمی چوخ چئشيدلی دير . ايران اؤلکه سينده حياتينی سوردوره ن ايسلامی رژيم بو پروژه نين اويقولانماغی اوچون بير انگل دير . ايسلامی رژيم اؤز حاکميتينی سوردوره بيلمک اوچون ، چئشيدلی يؤنته م لرده ن ايستيفاده ائدير . بونلاردان بيری نوکله ر مسئله سی حاققيندا موخاليف بلوکدا ( آمئريکا ، انگيلتره ، فرانسا ، روسيه ، چين و آلمان ) چاتلاق و اويمامازليق ياراتماق و بو بلوکون ايسلامی رژيمه قارشی جيددی داورانيشلارينی ( رفتار ) اؤنله مکدير . بو آرادا آمئريکا و اينگيلته ره موخاليف بلوکدا ، ايسلامی رژيمين ان جيددی دوشمن لری دير . چين اؤلکه سی ايسلامی رژيمين ان بؤيوک تيجاری اورتاغی اولدوغو حالدا ، آوروپالی لار ميز آلتيندان ايسلامی رژيميله ايليشگی ( ارتباط ) قورورلار . البته اونلار آمئريکايلا ياناشی ايسلامی رژيمين نوکله ر سيلاحينا ال تاپماغينا راضی دئييل لر ، آمما ايراندا سياسی سيستئمين دييشيلمه يينه ده ، اؤز چيخارلارينا گؤره اصرارلی دئييل لر . اؤزه لليکله بو ايشين ساواش يوليله گرچک لشمه يينی آصلا ايسته مير لر . روسيه ايسه هر زامان اولدوغو کيمی ، ايسلامی رژيمی قوللانير و اولدوقجا بو رژيمده ن مادی امتيازلار آلير ، گونون بيرينده ده اونلارين داليسينی ، اؤز چيخارلارينا گؤره بوشالتا جا غی اورتادادير . بو آرادا آمئريکا عاغيلی و دؤزوملو اولاراق ، نوکله ر مسئله سينده باشقالارينين سؤز يولونو کسمک اوچون ، ايسلامی رژيمه سورونون ديپلماتيک يؤنته مله حل اولماغی اوچون ، سون فرصت لری و شانس لاری وئرمکده دير و بونون يانيندا جورج دبيليو بوش ، دفعه لرجه تروريست لرين نوکله ر سيلاحا ال تاپماغی نين ، اونلاری دستکله ينلرين ( سوريه و ايران ) واسيطه سيله ، اؤنونده دوراجاقلارينی وورغولاييبدير .

ايران ايچينده 8 ايل رفورميست آدينی داشييان حرکتين يئنيلگييه ( شکست ) اوغراديغيندان سونرا ، فوندامنتاليست ايسلامچی لار حکومتی تماميله اله گئچير ديبلر . اونونچون نيسبی اولاراق سياسی حرکتلرده دورغون لوق و پاسيو ليک گؤرونمه کده دير . ديشاريدا ايسه ايسلامی رژيم ، نه ساواش نه ده باريش دورومونون قازاندير ديغی فرصت ده ، دانيشيق و موذاکره نی اؤنه سورمکله ، هله ليک ، اونا قارشی ايستيفاده اولونا بيله جک جيددی حرکت لری دوردوروبدور . آمما بللی دير کی بو يؤنته م چوخ دوام ائده بيلمه يه جک و ايندی کی دوروم ، فيرتانادان اؤنجه کی سه س سيز ليگه بنزه يير .

بوندان اؤنجه کی سطيرلرده يازديغيم کيمی بيز ايسلامی رژيمه اولونان الشديری لری ، بير بيرينده ن آيری اولاراق دئييل ، بير بوتون اولاراق اينجه له مه لی ييک . نوکله ر قونوسو ايسه بو الشديری لرين تکجه بيری دير و آمئريکا سونوندا ايسلامی رژيمی دييشمک دوشونجه سينده دير . بونو هاميدان ياخشی باشا دوشه ن ايسلامی رژيم ، قاليجی ليغينی قوروماق اوچون هر ايشه باش وورور . نوکله ر سيلاحينا ال تاپماق چاباسی بونلاردان بيری دير . رژيم نوکله ر سيلاحی آمئريکا و يا باشقالارينا سالديرماق ( هجوم ) اوچون و يا اونلارلا ساواشماق اوچون دئييل ، بلکی اونلاری اؤزونده ن قورخوتماق و اؤزونو ساوونماق ( دفاع ) اوچون ايسته يير . داها دوغروسو حکومتينی و گوجونو الده ن بوراخماماق اوچون ، نوکله ر سيلاحينا ال تاپماغی اؤزو اوچون يؤنته م لرين بيری بيلير . البته ايسلامی رژيم اؤز قاليجی ليغينی قوروماق اوچون ، بعضی امتياز لاردان واز گئچه ن سيستئم کيمی گؤرونور . اونا گؤره ده آمئريکادان رژيمين دييشيلمه مه يی اوچون ، قارانتی آلماق شرطيله ، نوکله ر مسئله سينده ن واز گئچه جه يينی ايره لی سورور . حالبوکی آمئريکايا اؤنملی اولان ايسلامی رژيمين دييشيلمه يی دير و بو اؤلکه اوزون مدت لی چيخارلارينی ، هئچ بير مسئله اوغروندا قوربان وئره ن دئييل . آمئريکا ايراندا سياسی سيستئمی دييشمک اوچون ، ميز اوستونده چئشيدلی سئچه نه کلری بولوندورور . ايسلامی رژيمی سياسی ، ايقتيصادی و ديپلماتيک تحريم ائتمک ، ايسلامی رژيم بعضی قوشوللاری اؤنجه ده ن قبول ائيله ييب اويقولاديغی حالدا ، اونونلا دانيشيق و موذاکيره و ايسلامی رژيميله ساواش سئچه نه يی . البته ساواش سون سئچه نه ک کيمی گؤرونور . فارس محور ايرانچی لار پهلوی محمد رضا شاهين اوغلو اؤنده ر ليگينده ، آمئريکايا تحريم لرين ايسلامی رژيمه قارشی ائتگی سيز اولدوغونو سؤيله ديک لری حالدا ، اونا ايسلامی رژيميله ساواش و موذاکيره ائتمه کده ن ، اوزاق دورماغی نی اؤنه رير لر ( پيشنهاد ) . آمما باشقا بير يؤنته م ايره لی سورورلر . اونلارجا ايران ميللتينه آرخا دوروب ، رژيمی ايران ايچه ريسينده ن کؤچورتمه يه چاليشماق . فارس محور ايرانچی لار بو دوشونجه يه داياناراق ، اپوزيسيون ياراتماغا چاليشيرلار و بو اپوزيسيونون ايچه ريسينه باشقا غير فارس ميللت لرينی ده آلماقدان چکينمير لر . البته آنتی غير فارس اپوزيسيونو ياراتماغدا ، بير قده ر باشاريلی اولوبلار و بو ايش غير فارس ميللت لرينه تهليکه ساييلا بيلر .

ايران ايچينده ، حکومتده آمئريکا سياست لرينه قارشی اوچ توتوم واردير: بيرينجی آمئريکا قارشی سيندا ديره نيب سونوندا گره کيرسه ، اونونلا ساواشا حاضير اولماق . بو فوندا منتاليست ايسلامچی لارين توتومودور . ايکينجی گوروه آمئريکايلا ساواشدان چکينمه يه ن آمما ساواشين وضعيتی گرگين لشديگی و تهليکه نين چوخالديغی حالدا ، بير يولونو تاپيب بعضی آليش وئريش لر له و يونته م لر له ، اؤزلرينی قوروماق ايسته ينلر . اوچونجو گوروه ايسه آمئريکايلا دانيشيق و موذاکيره آختارانلار دير . بونلار ايرانين بير ساواش ايچينه سوروتلنمه يينی ، اؤز وارليقلاری اوچون تهليکه لی بيلير لر و اؤلکه نين کيريز ( بحران ) ايچينه گيرمه سينی ايسته مير لر . فارس محور ايرانچی لار بو گوروهدا يئر آليرلار . آمما بوگون ايران اؤلکه سی نين آصيل گوجو، ولايت فقيه الينده دير . اونون اطرافيندا بعضی دانيشمانلار ( مشاور ) بولونسادا ، سون سؤزو آيت الله خامنه ای سؤيله يه جکدير . بيرينجی گوروهون يانليش آناليز لری آمئريکا حاققيندا ، بوندان قايناقلانير کی اونلارجا آمئريکانين گوجو افغانيستان و عراقداکی آپارديغی ساواشا گؤره بيتيب دير و ايسلامی رژيمه قارشی ، آچا بيله جه يی ساواشا گوجو قالماييب . اونونچون نوکله ر مسئله سی حاققيندا آياق دالی قويمور و ظننيجه يارانان فورصتده ن استفاده ائديب نوکله ر سيلاحا ال تاپماق اوچون الينده ن گله ن يول يؤنته می قوللانير . آمما آمئريکا ايسلامی رژيمه اونو دييشمه مه يی اوچون قارانتی وئره ر سه ، نوکله ر مسئله سينده ن واز گئچه جه يی الوئريشلی اولا بيله ر . آمئريکا ايسه بؤيله بير نييت ده دئييل .

بؤيله اولدوغوندا ، نوکله ر مسئله سی ايسلامی رژيمه بير قيرميزی چيزگی حالينه گلير. او بير ياندان باشا دوشور کی نوکله ر مسئله سينده آمئريکايا بويون ايسه ،آردينجا چوخ مسئله لر حاققيندا آمئريکانين و بوتون دونيانين ايسته کلرينی يئرينه گتير مه لی دير و بو مسئله لر ، بير بيريله بير بوتون اولوشدوردوغو و بير بيرينده ن آيری اولماديغی و بير بيرلرينه باغلی اولدوغو اوچون ، سونوندا سيستئمين اؤمرو باشا چاتمالی اولاجاق . آيری ياندان ، بو مسئله اوزه رينده ديره نديگی حالدا ، آمئريکانين جيددی سياسی ائيله ملريله ( عمل ) قارشی قارشا قالاجاقدير . بو ا ئيلم لر تحريم لرده ن توتموش ، ساواش سئچه ه يينه قده ر ميز اوستونده بولونماقدادير . بو تهليکه نی باشا دوشه ن فارس محور ايران چی لار ، هر ايکی طرفه ساواشدان اوزاق دورماقلارينی سؤيله يير لر . فارس محور ايران چی لار ، ايران ايچينده آغير دورومدان يورولوب و ساواشا راضی اولان کوتله يه ، ساواشا راضی ليق وئرمه مه کلری اوچون ، بو نده ن لری ايره لی سورورلر : ايسلامی رژيم اؤمرونو سوردوره بيلمه ک اوچون ، کيريزه احتياجی وارديرو ساواش رژيمه بير نعمت کيمی اولاجاق دير و رژيم کيريزده ن ايستفاده ائديب اؤمرونو اوزالدا جاقدير . آيری ياندان ، ايسلامی رژيمين آمئريکايا مئيدان اوخوماسی و ايرانی آمئريکايا باشقا بير ويتنام ائدمه يی ادعاسی ، بو دوشونجه يه يارديمچی اولور . آمما گرچک اولان ، آرتيق سويوق ساواش( جنگ سرد ) دؤنه می سوووشوبدور و اورتادا سووئت بيرلی يی آديندا ، گوجلو بير اؤلکه يوخدور کی ايسلامی رژيمه آرخا دورسون . باشقا بو کی ايران اؤلکه سينده وار اولان استراتژيک اؤنه م ( اهميت ) ، ويتنام اوچون گئچه ر لی دئييل دير . داهاسی ايران عراق ساواشی زامانی دا گئری ده قالدی . بو گونون قوشوللاری فرقلی دير . اصلينده سؤزو ائديله ن کيريزين ، مئيدانی دا اؤنه ملی دير . اگر بو کيريزين مئيدانی فلسطين و لبنان دير سا ( باخماياراق کی لبناندا دا ايسلامی رژيم باشاريلی اولمادی ) ، بلکه فارس محور ايران چی لار حاقلی دير لار آمما بو کيريزين مئيدانی ايران اؤلکه سی اولدوغوندا ، بو اويونون ايسلامی رژيمه تهليکه لی يؤنلری واردير و اگر آمئريکا ايسلامی رژيميله ساواشا گيره ر سه و بو ايشی باشلايارسا ، اونو کسين ليکله ( قطعا ) بيتير مه لی دير و آماجلارينا چاتمالی دير . سؤزون دوغروسو بودورکی فارس محور ايرانچی لار ، يارانا بيله جک احتمالی ساواشين اونلارا گتيره بيله جه يی ضررلرين قورخوسواوزونده ن ، بؤيله نده ن لری آنتی ساواش دوشونجه لرينده ايره لی سورورلر . بوندان سونرا باش وئره بيله جک احتمالی اولای لاری ( حادثه ) دقتله ايزله مک و حاضير ليق لی اولماق ، اونون يانيندا ايسه ميللی حرکتده انسجام و بيرليک ، عاغيل و منطق و چئشيدلی آلترناتيولر اوره تمه ک ( توليد ) ، ميللی حرکتين ان اؤنملی گؤره وی دير ( وظيفه ) . آمما اؤنجه گونئی آذربايجان ميللی حرکتی نين اؤنونده بولونان سورونلاری ، چئشيدلی يؤنلرده ن اينجه له مه لی ييک .

آذربايجان ميللی حرکتی نين سورونلاری

بوندان اؤنجه آذربايجانين نه قده ر اؤنملی ، حساس و استراتژيک بير نقطه اولدوغونو سايين اوخوجولارا سونموشدوم . آذربايجان ميللی حرکتينده بولونان سورونلارين بؤيوک بير حصه سی ، بو اؤنه م و استراتژيک ليکده ن قايناقلانير. ايندی بو سورونلارين نئجه ليگينی و نه لر اولدوغونو، اله آلاق . گونئی آذربايجان ميللی حرکتی نين سورونلارينی ميللی حرکتين ايچينده و ديشيندا کی سورونلارا بؤلوب اينجه له مه ييميز ، بلکه منطق لی يؤنته م دير . اؤنجه بو حرکتين ايچينده کی سورونلار و چاتيشمازليق لاری گؤزده ن گئچيرده ک آمما بونو باشا دوشمه لی ييک کی بو سورونلارين بعضی لری حرکتين مکانيسمينده ن قايناقلانسادا ، بعضی لری ده ديشاريدان ايسلامی رژيم و فارس محور ايرانچی لار اليله يارانيبدير .

گونئی آذربايجان ميللی حرکتی نين ايچينده وار اولان گوروهلاری اؤنجه آچيق گؤزله تانيماغيميز لازيمدير . داها دوغروسو گونئی آذربايجان ميللی حرکتی نی بير بوتون اولاراق گؤردويوموزده ، اونون عنصر لرينی بير بيرينده ن آيير ماغيميز اؤنملی ايشدير .

گونئی آذربايجان ميللی حرکتين ايچينده صادق ، وجدانلی ، آذربايجانا اوره ک يانديران و اونون اوغروندا جانيندان ماليندان واز گئچه ن شخص لر و گوروهلارين اولدوغو سؤزسوزدور . کوتله ده ن توتموش ميللی فعال لار ، يازيچی لار ، آيدينلارو سياسی پارتييا لاردا ، بؤيله شخص لر کسين ليکله بولونماقدادير . اصلينده حرکتين اله گتيرديگی اوغورلار و باشاريلاردا ، بؤيله عنصر لرين چاليشمالارينين سونوجودور . بوندا هئچ شوبهه يوخدور . آمما ميللی حرکتده بؤيله ساغلام عنصر لرين يانيندا ، حرکته ضرر ووران عنصر لرينده موجود اولدوغونو گؤرمزده ن گلمه ييميز ، دوغرو اولماياجاق . آجی وئريجی تاسف بؤيله عنصر لرين ، رژيم و فارس محور ايرانچی لار اليله ميللی حرکتين ايچينه سوخولمالاری دير . بونلاری نئچه بؤلومده اله آلماغيميز و بير بيرينده ن آيير ماغيميز ، ميللی حرکتين ساغلامليغی باخيميندان ، چوخ اؤنملی دير بونا گؤره کی بعضی لرينين تهليکه سی داها چوخ ، ييخيجی و داغيديجی دير و اولا بيله ر چوخ حساس تاريخی دؤنمده ، ميللی حرکته وورابيله جک لری ضربه ده ن ،گونئی آذربايجان ميللتی بلکه الی ايلده ن سونرا بئله اؤزونه گله بيلمه سين .

بيرينجی گوروه ميللی حرکتين ايچينده ايسلامی رژيمين گؤز قولاقلاری دير . بونلار ييغينجاق لاردان ، اوتوروملاردان ، ميللی فعال لارين اطرافيندان ، باجارا بيله ر لرسه اونلارين و باشقالارينين اؤزه ل حياتيندان ، سياسی پارتييالارين ايچه ريسينده ن و باشقا يئرلرده ن ، ايسلامی رژيمه خبرتوپلاييب چاتديرماغا اوغراشانلاردير .

ايکينجی گوروه ميللی حرکتين ايچينده کی ايسلامی رژيميله ، آليش وئريش ائيله يه ن بعضی سياسی فعال لاردير . بونلارين چوخونون سياسی گئچميشينی گؤزده ن گئچير دير سه ک ، سولچولوق آخيميندان ميللی حرکته گله نلردير لر . کومونيزم ايدئولوژی سينين اؤلدويو ايله يئتيم قالان بو شخص لرين بعضی لری ، سولچولوق حرکتينده باشاريلی اولماماغين عقده لرينی اؤزلريله داشيياراق ، آذربايجان ميللی حرکتينه آياق قويدولار . سياسی تجروبه لرين ادعاسينی ائده ن بو شخص لر، اؤنده ر ليک و آد قازانماق اوغروندا ، ايسلامی رژيمه آلدانيب لار و ايسلامی رژيمين ، اونلارا گله جکده وئره جه يی مقام و گوج وعده سينه اينانيب ، رژيم ايله بعضی آليش وئريش لر ائديب لر . بعضی لری ايسه آلداناراق دئييل ، بيله ره ک بو ايشی گؤرورلر . رژيمين تهديدينده ن قورخان بعضی آل وئر چی لريده البته اونوتمامالی ييق . ماراغلی بودور کی آذربايجان اوغروندا چاليشماق ادعاسينی ائده ن بو شخص لر ، بير پاراقراف تورکجه نی يازيب اوخوماقدان بئله عاجيز ديرلر .

اوچونجو گوروه تاسف له ايسلامی رژيم اليله ،قهرمان ائديلميش بعضی سياسی فعال لاردير . . ايسلامی رژيم ايندی و گله جکده گونئی آذربايجان ميللی حرکتی نی اؤز الينه آلماق اوچون ، کوتله ايچينده و کوتله طرفين ده ن بعضی اؤز اليله ياراتديغی قهرمانلاری ، سئوديرمه يه چاليشير . بو آماجينا چاتماق اوچون گونئی آذربايجان ميللتی ايچينده ، اووجو آچيلميش و يانميش مهره لرينه يئنی ده ن آد- سان قازانديرماق و تانينماميش يا آز تانينميش بعضی مهره لری قهرمان ائتدير مه ک ، اونون يؤنته م لری دير . بو سئناريونون بير حيصه سی اولاراق بعضی لرينی بير مودده ت دوتساق ائتمک ، اينترنت سايتلاريندا و باشقا مئديا (رسانه )آراجلاريندا اونلارين توتوقلانديقلارينی رئکلام ائده ره ک ، گونئی آذربايجان ميللتی نين قولاغينا چاتديرماق سياستينه، ديققت ائتمه يميز لازيمدير . سايتلاردا و باشقا يئر لرده توتوقلانديقلاری رئکلام ائديله ن شخص لرين بعضی لری ، عئينی زاماندا ديشاريدا گزه ر کن بئله گؤرونورلر . ايران ديشيندا ياشايان مئديا صاحيب لري تاسف له ايچه ريده ن خبر لری اولماديقلارينا گؤره ، بؤيله شخص لرين ، گرچک و دوغرو اولدوغلارينا ، اينانماق تهليکه سينده دير لر .

دؤردونجو گوروه تک کلمه ايله سؤيله مه ييميز گره کير سه ، ساتقين لاردير لار . بو گوروه گئچميش ده ده ، گونئی آذربايجان مسئله سی ايله ايلگی لی حرکت لری ، ايسته ر سياسی و کولتوره ل ساحه سينده بئله ايسلامی رژيمه ساتيب ، بو يولدان اؤزلرينه فرصت لر و ايمکانلار قازانانلاردير لار .

بئشينجی گوروه تاسف له ايسلامی رژيم اليله يارانان گيزلی و آشکار قوروملاردا ( نهاد ) ، رژيمين تاپشيريغی ايله و وئرديگی دوشونجه خطی ايله ، گونئی آذربايجان مسئله سی ايله ايلگی لی ، آراشديرما آپاران بعضی آيدينلاردير . سيستئمين آماجی گونئی آذربايجانلا ايلگی لی اؤز دوشونجه طرزينی ، بؤيله آيدينلارين قلمی ايله گونئی آذربايجان ميللتينه يئديرتمک و گونئی آذربايجان ميللتينی گرچک و دوغرو ميللت چی ليک قاوراميندان ( مفهوم ) اوزاق توتوب ، اؤز ايسته ديگی دوشونجه طرفينه يؤنلنديرمک دير .

آلتينجی گوروه عئينی گؤره وی ، ايرانچی لارين اليله يارانان قوروملاردا ، بوينونا آلان قلم صاحيبی ، بعضی آيدينلاردير .

يئددينجی گوروه ، ايسلامی رژيم طرفينده ن گئچميشده و سون زامانلاردا ، ايراندان ديشارييا قاچماغلارينا گؤز يومولان ، بعضی شخص لر دير . اونلار ايسلامی رژيمده ن آلديقلاری دوشونجه خطی اساسيندا ، ديشاريداکی حرکت لری کنترل ائتمه يه چاليشيب ، اطرافلارينا توپلانان شخص لره باشچی ليق ائدمک له اوغراشيرلار . اونلار چئشيدلی يؤنته ملر له ، ميللی حرکتين ديناميک ليگينه و چاليشقانليغينا ضرر وئره نلر و ميللی بيرليگين يارانماغينا انگل اولانلاردير .

ميللی حرکتين ديشيندا ، اؤنونه چيخان سورونلارايسه باشقاديرلار . بو سورونلار ، سياسی ساحه ده باش وئره بيله جک احتمالی اولای لارا گؤره ، چئشيدلی همده فرقلی اولا بيله ر . آمما بللی دير کی توم سورونلارين قايناغی ايسلامی رژيم و فارس محور ايران چی لارا ، داهاسی اونلارين آمئريکا و باتی دونياسيله گرگين ليک لرينی حل ائديب ائدمه مه يينه و يا هانسی يؤنته ملر له حل ائد مک لرينه ، قاييدير .

اگر ايسلامی رژيم نوکله ر مسئله سينده ، آمئريکا و باتی دونياسی قاباغيندا آياق دالی قويارسا ، بللی دير کی بو مسئله ايسلامی رژيم ايله آمئريکا آراسينداکی واراولان گرگين ليک لرين بير حصه سی اولدوغونا گؤره ،آمئريکانين رژيمده ن باشقا ايسته کلرينه ده يول آچاجاق و اگر رژيم بو مسئله ده بويون ايسه ، آرد آردا آمئريکانين ايسته کلرينی سيستئمين دييشيلمه يينه قده ر يئرينه گتيرمه لی دير . البته بورادا آمئريکا ايران ميللت لری ايچينده داها حرکت لی ليک و چاليشقانليق ياراتماق اوچون ، اونلارا آرخا دورا بيله ر و اونلارين يارديمی ايله ايسلامی رژيمی دييشيلمه يه مجبور ائده بيله ر . بؤيله دورومدا ايسلامی رژيمين دالی اوتوردوغو اوچون ، ساواش چتين گؤرونور . غير فارس ميللت لرين بؤيله دورومدا اپوزيسيون فورماسيندا بيرلشمه لری، ايسلامی رژيمی دييشمکده بؤيوک قاتقی دا بولونماغلاری و بو ساحه ده کسين ليکله آنتی غير فارس اپوزيسيونونا مئيدانی بوراخماماقلاری و اونلاردان قاباقجيل و گوجلو اولماغلاری گره کلی دير . بو ايش باش وئرمز سه و فارس محور ايرانچی لار مرکزی گوجو اللرينه آليرلارسا ، غير فارس ميللت لرين حاقلاری نين اؤده نيلمه يی چوخ چتين اولاجاقدير . کسين ليکله ايسلامی رژيم بو دورومدا ، اوليگارشيک قاليجی ليغينی قوروماق اوچون ، فارس محور ايرانچی لارلا آليش وئريش ائديب ، يوموشاق جا سينا آمئريکانين ايسته کلرينی يئرينه گتيره بيله ر و مرکزی گوج بؤيله اولدوغوندا ، اونلارين اللرينده قالديغی اوچون ، غير فارس ميللت لرين حاقلاری نين اؤده نيلمه يی ، ساده جه گرچک لشمه يه ن يوخو دان باشقا بير شئی دئييل دئمه ييميز ، هئچ ده يانليش اولماز . آيری ياندان غير فارس ميللت لری ، فارس محور ايران چی لارا حاقلاری نين اؤده نيلمه يی قونوسوندا آلدانمامالی ، اونلارين اپوزيسيونونا گيرمه مه لی و اونلارا ايسلامی رژيمی دييشمکده يارديم ائتمه مه لی دير لر . بؤيله يانليش سياست سونوندا اؤزلرينی محو ائده جک دير لر . داها دوغروسو بو ايش اؤز اللريله ، اؤزلرينی ديری ديری قويلاماق آنلامينا گلير .

باشقا بير احتمال ايسلامی رژيمين نوکله ر مسئله سی قونوسوندا ، آمئريکا و باتی نين اؤنونده ديره نمه يی دير . بو دورومدا ايسلامی رژيمی چئشيدلی تحريم لرده ن توتموش ، ساواشا قده ر احتمال لار گؤزه تله يير . البته بو اوزون بير زامان آلابيله ر . آمما اگر آوروپا ، روسيه و چين ايسلامی رژيمه آمئريکا اؤنونده آرخا دورماغا دوام ائده ر لر سه و ايسلامی رژيم نوکله ر سيلاحينی اوره تمه يه ( توليد ) ياخينلاشارسا ، آمئريکانين تک باشينا ايسلامی رژيمين نوکله ر مرکز لرينه سالديرماغی ( هجوم ) چوخ بؤيوک احتمال دير . بلکه ده نوکله ر مرکز لری نين يانيندا نظامی و اکونوميک مرکز لری ني ده آتش آلتينا آلا بيله ر . البته بو ساواش گؤيده ن اويقولانان بير ساواش اولارسا و آمئريکا عسگر لريله ايران ايچينه گيرمه ز سه ، ساواشين تماميله اوغور قازانماغی نی ادعا ائتمک دوغرو اولا بيلمه ز . آمما بؤيوک اؤلچوده ايسلامی رژيمين گوج مرکز لرينی داغيدا بيله ر . بؤيله دورومدا چوخ اولای لارين باش وئرمه احتمالی ايله قارشی قارشييا قالا بيله ريک . بو دورومدا ايران ميللت لری تماميله آياغا قالخماغا جسارت ائده بيله ر لر . آمما ايسلامی رژيمين ساواش ماشينی نين بير بؤلومو ساغلام قاليرسا ، چوخلو اؤلولر ، يارالی لار و جنايت لرين باش وئريلمه يی قاچينيلماز حالينه گله ر . بلکه ده بؤيله اولدوغوندا فارس محور ايرانچی لار ايسلامی رژيمی دييشيلمه يه ، باسقی آلتيندا توتسونلار و بو ايشده باشاريلی اولسونلار ، اؤزه لليکله اونلارين رفسنجانی و آيری لاری کيمی اکونوميک و باشقا باخيملاردان گوجلو آداملاری واردير کی ايران اؤلکه سی نی الده ن وئرمه سينلر دييه ، ايسلامی رژيمی قانديريب و يا زورلايا بيله ر لر . داها سی فارس محور ايرانچی لار ، ميللت لشمه پروسه سی نين گتيرديگی سونوجلارين اساسيندا ، غير فارس ميللت لر ده ن چوخ بيرلشمه قابيليتينه ماليک دير لر . اونلار تکجه بير ميللته عاييد دير لر ، غير فارسلار ايسه دؤرد بئش ميللتده ن عيبارت دير لر . اونونچون غير فارس ميللت لرين بير لی يينين پوزولماغی و اونلارين آراسيندا آلداناراق ، اورتاق دوشمنه قارشی آيری ليغين دوشمه يی داها اولاناقلی دير ( امکانلی ) . غير فارس ميللت لری بو دورومدا اپوزيسيون حالينده ، بير ليک لرينی قورومالی و ايسلامی رژيمين دييشيلمه يينده بؤيوک قاتقی دا بولونمالی دير لارو اللرينده ائتديکلری گوج ايله ، ميللی حاقلاری نين اؤده نيلمه يينه چاليشمالی دير لار .

يالنيز آمئريکا دولتی گؤيده ن و يئرده ن ايسلامی رژيمه سالديرديغی حالدا ، فارس محور ايرانچی لار اوستون موقع لرينده ن استفاده ائده بيلمه يه جکدير لر و غير فارس ميللت لرين گوجو بو دورومدا چوخالماغا دوغرو گئده بيله جک دير . اونونچون فارس محور ايرانچی لار ، چئشيدلی يؤنته ملر و سؤيله ملر له آنتی ساواش شعارينی هورورلر و بونا چئشيدلی همده عاغيلا باتان نده ن لر ايره لی سورورلر . اونلار هر ايکی طرفی ( آمئريکا و ايسلامی رژيم ) ساواشدان اوزاق دورماغا چاغيريرلار .اونا گؤره ده آمئريکا دولتينده ن ايسلامی رژيميله ساواش و موذاکيره نی بير قيراغا آتماغينی و ايران ميللت لرينه آرخا دوروب ، ايسلامی رژيمی ايران ايچه ريسينده ن ميللت لرين يارديمی ايله دييشمه يه چاليشما غينی ، اؤنه رير لر . اونلارين تکجه دردی ، ساواش سونوجوندا مرکزی گوج ده ن اللرينده بولوندوردوغلاری پايي و حصه نی ايتيرمک ، غير فارس ميللت لرين اؤنؤنده سيلاح سيز قالماق و غير فارس ميللت لرين حاقلاری نين اؤده نيلمه يی سونوجوندا ايران اؤلکه سينده ضعيف دوروما دوشمک و بلکه ده ايران اؤلکه سی نی الده ن وئرمک دير . اونا گؤره ده بوتون گوجلريله و يؤنته ملرله يارانا بيله جک احتمالی ساواشين اؤنونو آلماغا چاليشيرلار . بو آرادا غير فارس ميللت لری اپوزيسيون حالينده بيرليک لرينی قورومالی ، بو بيرلی يی پوزابيله جک هر ايشده ن اوزاق دورمالی ، احتمالی اولای لار قارشی سيندا آلترناتيو پلانلار تؤکمه لی و داها اؤنملی سی ايسلامی رژيمين دييشيلمه يينده ، گله جک يئنی سياسی سيستئمده سؤز صاحيبی اولا بيلمک اوچون ، بؤيو ک قاتقی دا بولونمالی دير لار .

گونئی آذربايجان ميللی حرکتی ايسه ، بو اپوزيسيونون چوخ اؤنملی و بؤيوک بير اويه سی ( عضو ) اولاراق ، هر ايشده ن اؤنجه اؤز چاتيشماز ليق لارينی و سورونلارينی اورتادان قالديرمالی دير . منيم باشا دوشه بيلديگيم قده ر ، يئددی بؤلومده گتيرديگيم سورونلاردان باشقا ، بعضی سورونلاردا گونئی آذربايجان ميللی حرکتی نی ياواشلاديب ، آخسادير بئله . فدراليسم و استقلال تارتيشمالاری و بايراق سورونو ، بونلارين ان باشيندا دورور . اصلينده بو سورونلارين موجود اولدوغو ، سياسی پارتييا لاری بير جبهه آرخا سيندا بيرلشمکده ن اوزاق دوتور و بونون اولومسوز ( منفی ) ائتگی لری ( تاثير ) ميللی حرکتی سارسيدير . بو حاقدا سؤز اوزانماسين دييه سايين اوخوجولار ، بو سورونون اورتادان قالديريلماغی اوچون بوندان اؤنجه کی مقاله ده ( گونئی آذربايجان و اورتادوغو ) گتيرديگيم اؤنه رينی اوخويا بيله ر لر . بللی دير بؤيله سورونلار اورتادان قالديريلسا ، گونئی آذربايجان ميللی حرکتی نين بئينينده ( سياسی پارتييا لار و آکتيو لر ) يارانان و ياشانان بيرليک حرکتين بدنينه ( کوتله ) داشيناجاقدير و گونئی آذربايجان ميللی حرکتی بيرليک ، انسجام ، اؤرگوتلو و تک بير سه س حالينده ، اؤنونه چيخان بوتون سورونلاری چؤزمه يه ، الينده گوج ائده بيله جکدير . . اصلينده بيرينجی آشامادا ( مرحله ) ميللی حاقلارين اؤده نيلمه يی و ميللی توپلومون يارانماغی ، داها سونرا ميللی چيخارلارين قورونماغی و ميللی حرکتين دوشونجه و ائيله مده ( عمل ) باغيمسيزليغی ( استقلال ) سؤز قونوسودور و بو آماجلارين ايسته ر فدرال سيستئمينده ، ايسته ر سه ده استقلال فورماسيندا گرچک لشمه يی ان اؤنملی ايشدير .

بؤيله اولدوغوندا گونئی آذربايجان ميللی حرکتی ، غير فارس ميللت لری اپوزيسيونوندا ان اؤنملی و ان گوجلو يئری توتا بيله جک دير و آشيری چی کورد پارتييا لاری ، آذربايجان توپراقلارينا گؤز تيکه بيلمه يه جک دير لر . عکس حالدا چوخ آجی وئريجی و تهليکه لی اولای لارلا قارشی قارشييا قالماغيميز قاچينيلمازدير .

..

85 \ 7 \ 17