گونتاي گنجالپ 

" آنتی آخوندوف"  يازيسي اوزرينه تنقيدي باخيش*

  آلما قزئتي نين کئچن ساييندا "آنتی آخوندوف"  آدلي بير يازي يايينلانميشدير. آذربايجان دوشونجه حياتيندا بو کيمي باخيشلارين اؤنه مي دولاييسييلا و بعضي آرخاداشلارين ايستکلري اوزرينه بو مؤزويلا ايلگيلي دَیَرلنديرمه مي اوخوجولارين حضزورلارينا تقديم ائديرم. 

***

                      آزربايجان دوشونجه حياتيندا غرب مدنييتي ايله ايلگيلي اوچ آخيم مؤوجود اولموشدور. بيرينجي آخيم غربين علمي، فلسفي، اينسان حاقلاري آنلاييشيني، سئکولار و دئموکراتيک نايلييتلريني بوتونو ايله قبول ائتمه ني قاچينيلماز، ضروري حساب ائديردي. غرب مئتودولوگيياسي اينساني، وارليغي، سوسيال عدالتي علمي شکيلده قاوراما يولوندادير. شرقه دوشن اساس گؤرَو غربي اؤيرنمک و شرقي غربلشديرمکدن عيبارتدير. بوتونويله غربچي آخيمين دوشونجه سي بوندان عيبارت اولموشدور. بو آخيم بئله حساب ائديردي کي، شرقين قارانليق دونياسيني آيدينلاداجاق ايشيق غربده دير. اينسانين آزاد و ترققي يولوندا ياشاماسينا خيدمت ائده جک سيستئم هارداديرسا اونو قبول ائتمک لازيمدير. غربده بو آزادليق آنلاييشي يولوندا بير چوخ دوشونجه آدامي دين مرکزلی محکمه لر طرفيندن محو ائديلميشلر، تامامييلا شرقده اولدوغو کيمي. آنجاق غربده سونوندا بيليم، فلسفه، عدالت، اينسان حاقلاري و دئموکراسی آنلاييشلاري غاليب گلميشدير. شرقده ايسه دين اورتا چاغي بوتون آمانسيزليغي ايله داوام ائتمکده دير. غرب مدنييتي آزاد ياشاماق ايسته ين اينسانلارين اورتاق نايلييتلريدير. اونو صيرف غرب مسئله سي سايماق دوغرو دئييلدير. بو آخيمين باشيندا بؤيوک دوشونور م. ف. آخوندوف دورماقدادير. تورکييه ده ايسه تورک آيدينلاري غربلشمکله آداملاشماق تئرمينيني ائش آنلامدا کوللانيرديلار. 

                      ازربايجاندا ايکينجي دوشونجه آخيمي بئله حساب ائديردي کي، اؤز کؤکوموز اوستونده غربلشمه لي یيک. اؤز دَیَرلريميزين بوتونويله اورتادان قالخماسيني اؤنله ييب و شرق-غرب سينتئزي اولاراق مدني بير پروژه گليشديرمه لي یيک. بو آخيمين ان باريز نوماينده سي ا. آغااوغلو اولاراق بيلينمکده دير. آنجاق بو آخيم اؤز دَیَرلريميز دئديکلرينده نه يي ساخلاييب، نه يي بوراخماليييق حاققیندا بيلگي وئرميرديلر. چونکو شرقين اينسان حاقلاريني رسمييته تانيمايان دَیَرلري بوتون توپلوملارين دوشونجه و اينانجلاريني ساريب-سارميشدير. بيرئي حاقلاري هئچ اولمامیشدیر. تؤره لر، اينانجلار قورخونج شکيلده اينسان حياتينا، خوصوصن قادين حياتينا قييميشدير. بو اوزدن ده زامان آخيشي ايچينده بو آخيمين مودئرن قيسمي ايستر-ايسته مز آخوندوفچولوغا و موحافيظه اکار کسيمي ايسه دينچيلييه سؤوق ائديلميشلر.  

                      اوچونجو آخيم ايسه بوتونويله غرب دَیَرلريني اينکار ائدير، غربي ايمپئرياليست و ايستيلاجي اولاراق گؤروردو. ايمپئرياليست غربه قارشي ايسه يالنيز و يالنيز بير دوشونجه طرزيني اؤنريرديلر: ايسلام دَیَرلري. بو آخيم دين مرکزلي دوشوندوکلري اوچون غربين مثبت دَیَرلريني ده گؤره بيلميرديلر. چونکو اورتادا ايسلام- خريستيانليق تضاددي دورماقدا ايدي. بو شکيلده راديکال داورانديقلاري اوچون اولسا گرک درين ديني دَیَرلره اساسلانيرديلار. غرب مدنييتي قارشيسيندا ايسلام مدنييتيني قويور، ايسلام بيرليگيندن يانا ايديلر. غربده کي  تئکنولوژي گليشمه لر غربين ايمپئرياليست نيتلرينه خيدمت ائتديگي اوچون اونو دا اينکار ائديرديلر. آذربايجاندا بو آخيمين باشيندا ايسه سئييد جمال الدین اسدابادي دوروردو. سئيييد جمال الدین بو راديکال گؤروشوندن دولايي، راديکال سياسي داورانيشلاري و تئررورو دا اؤز مقصدينه چاتماق اوچون ايستيثنا سايميردي. بو اوزدن ده سئيييد جمالددي نين پلانلاماسي و سيفاريشي اوزرينه غربه نيثبتن ياخينلاشماق ايسته ين ناصيرالدين شاه قاجار تئررور ائديلدي.  

  بو اوچ جريانين اؤزلرينه مخصوص دليللري اولموشدور. لاکين بونلارين ايچينده م. ف. آخوندوف بير آيريجاليق تشکيل ائدر. چونکو آخوندوف سادجه آذربايجاندا دئييل، بوتون شرقده مودئرنلشمه ني باشلادان ايلک موتفککيردير. داها سونرا گلنلر آز- چوخ آخوندوفدان ايستر موثبت، ايستر منفي آنلامدا تاثيرلنميشلر. مثلا ضيا گؤيالپدان توتموش ايسماعيل بئگ قاسپيراللييا و قاجار اؤلکه  سي نين آيدينلارينا قدر بؤيوک بير جوغرافييادا آخوندوف اؤز تاثيريني بوراخميشدير. ايسماعيل بئگ  قاسپيراللي ن. نريمانووا و نجف بي وزيرووا يازيردي کي، سيز هئچ بيرينيز آخوندوف کيمي يازا بيلمير، آخوندوف کيمي میللتي آيدينلادا بيلميرسينيز. مودئرن ايران آيدينلاري ايسه چوخ گئنيش شکيلده آخوندوفدان ائتکيلنميشلر. ايراندا آخوندوفون ياراديجيليغيني، گؤروشلريني تقدير و تنقيد ائدن  اونلارجا آراشديرمالار آپاريلميش، بو حاقدا بير چوخ کيتابلار يايينلانميشدير. قاتي دينچي کسيم ايسه اؤز فاناتيک گؤروشلريني اساسلانديرماق اوچون يئنه ده آخوندوفلا قارشي- قارشييا گلميشلر. چونکو ايلک اؤنجه آخوندوف ايشيغيني بوغمادان، اونو سؤندورمه دن ديني جهالته يئر وئرمک اولماياجاقدير. بو اوزدن بوتون شرقده دئمک اولار کي، آخوندوف هئچ بير زامان اسکيمه ين ضيالي و يا ايسلامچيلارين باخيشي ايله سؤيله سک غربه حيسسن و فيکرن ساتيلميش بير شخصييت کيمي دايما گوندمده اولموشدور.  آخوندوف اؤيله بير آيدينليق زيروه سيدير کي، دونيانين هر طرفيندن گؤرونمکده دير. شرقين دينچي و هئچ بير دوشونجه و دين پلوراليزمينه حاق تانيمايان قارانليق کولتورونده آخوندوف ايلک دفعه  اولاراق سئکولاريزم سؤزونو تلففوظ ائتميش، دينين سيياستدن آيري اولماسي ضرورتيني ساوونموشدور. داها سونرا آخوندوفو تنقيد ائدنلرين چوخ بسيط منطيقلري ايله راستلانيريق. چونکو بو تنقيدچيلر شرق ديني ادبيياتيندا آخوندوفون اوخودوقلاريني اوخومادان تنقيد مئتودو گليشديرميشلر. صفويلر دؤنيمينده يازيلان ديني کيتابلارين و ديني تفسيرلرين بير تکي بو میللتي ابديا قارانليقدا ساخلاماق اوچون کيفايت ائدر. آخوندوفلا عئيني عصرده ايران مکانيندا بابيليک، بهايليک بير تورلو ديني رئفورم اولاراق اورتايا چيخميشدي. ديني اينستيتوتلارين فتواسي اوزرينه هاميسي نين کؤکونو، ريشه سيني کسديلر. مينلرجه اينساني قتل ائتديلر. عئيني زاماندا سئکولاريميزي هم ده ديني پلوراليزم شکلينده آنلايان آخوندوفون نئجه بير جسارت گؤسترديگيني بلکه اينديکي زاماندا چتين آنلايا بيلريک. البتته کي، آخوندوفون و آخوندوفچولوغون اوراتاي چيخيشيندا ايکي اساس فاکتور اولموشدور: 1. تاريخي ايران موحيطيندن قوپوش. هر بير قوپوش دايما بير يئنيليک گتيرر. مين ايلليک قارانليق موحيطدن قوپوش فرقلي دوشونمگي ساغلادي. بؤيوک دوشونجه لر، میللتلرين حياتينداکي اؤنملي دَييشيکليکلر هر زامان تاريخي، کولتورل دَیَرلرين اوچورولماسي و يا ترانسفورماسيونا اوغراماسي ايله اورتايا چيخير. او موحيطدن قوپوش، او موحيطين تهلوکه لريندن قورتولوش آخوندوفچولغو دوغوردو. آذربايجان آيدينلاري نين فرقلي دوشونه بيلمه لري اوچون اویغون ايجتيماعي موحيط يارانميشدي. 2. روسييا تاثيري. روسييانين 19- جو عصر مدنييتي ايستيلاسيندا اولان میللتلري ده تاثيرلنديريردي. آيريجا، روسييا واسيطه سي ايله غرب مدنييتي ايله تانيشليق بير شانس ايدي. ان اؤنمليسي ايسه روس حقوق سيستئمي نين دين خاديملري نين اؤلوم فتواسي چيخارماسيني انگلله مه سي، ياشاماق و دوشونمک اوچون بير فورصت ياراتدي. روس حقوق آنلاييشي اؤز تبعه لري نين شريعت ياسالاري ايله اؤلدورولمه سيني اؤنله ميشدي. يوخسا عوثمانليدا و قاجارييه ده اولدوغو کيمي آخوندوفو دا محو ائدرديلر. ايشين چوخ ايلگينج ياني بودور کي، بو گون عرب آيدينلاري کئچميشده کي  غرب ايستيلاسيندا ياشاديقلاري دؤنه مي آلتون چاغ آدلانديريرلار. چونکو مثلن مراکئش کيمي فرانسا ايستيلاسيندا اولموش اؤلکه  لرده بو گون دونيوي دؤولت سيستئمي حاکيمدير، قادينلارين دا سيياسته قاتيلما حاقلاري وار. آنجاق مثلن عربيستاندا قادينين آرابا سورمک حاققی بئله، يوخدور. ايشته بو کيمي اؤرنکلردن يولا چيخاراق آخوندوف و آخوندوفچولار بئله حساب ائديرديلر کي، شرقين اورتا چاغ قارانليغيندان قورتولوش آچاري اؤزونده دئييل، غربده دير. آخوندوفچولوق بيتمه ميش آيدينلانما پروژئسيدير. چونکو آيدينليق يالنيز دينين سياسي- ايجتيماعي مؤوضوع دئييل، فردي مؤوضوع اولدوغو سئکولار اورتامدا مومکوندور. آخوندوفچولوق اوزرينه داها سونرا دوشونجه سرمايه سي ياتيريلمادي و يا چوخ ضعيف شکيلده ياتيريلدي. داها سونراکي دؤنمده کوممونيزم ده بير دين کيمي قبول ائديلديگي اوچون هر تورلو دوشونجه پلوراليزمي ياساقلاندي. يئنه دينچيليگين اينسانلارين سوسيال و فردي حياتينا موداخيله سي باش قالديرديغي اوچون آخوندوفا احتيياج حيسس ائديلمکده دير. يعني آخوندوفون اورتايا قويدوغو پروژه ني مودئرن دونيادا نئجه داها دا گليشديرمک مومکوندور؟ آخوندوفون قارشي چيخديغي، ييخماق و اوچورماق ايسته ديگي ايرتيجاعي حيات و دوشونجه طرزي هله ده داوام ائدير. هله ده اينسانلار اؤز عاغيللاريني، ياراديجيليق، کشف ائديجيليک ائنئرژيلريني مزارا گؤمَرک قورتاريجي "مئهدي"  بکله مکده دیرلر!  

                      هئيدر جامالين آخوندوفون آنتی تئزي اولدوغو سؤيله نير. اؤنجه بو تئز و آنتی تئز قاوراملاري اوزرينده دوراليم. هئگئلين ديالئکتيکاسي نين اللري اوسته دوردوغونو ايدديعا ائدن مارکس و ائنگئلس اونو آياقلاري اوستونه گتيرديکلريني سؤيلرلر. هئگئل ده عاييله- تئز، جمعييت- آنتی تئز و دؤولت- سينتئزدير. دؤولت، يعني بوتون تضادلارين و ائنئرژي نين مرکزلشديگي سياسي، ايقتيصادي، مدني، حربي قوروم. بو اوزدن ده هر بير فرد اؤز عاييله سي نين گوونليگي سببي ايله دؤولتين قورولماسينا يارديمچي اولماليدير. چونکو دؤولت سيستئمينده منفي ائنئرژي ده موثبت ائنئرژييه، ياراديجي قوووه يه دؤنوشور. مارکس و ائنگئلس بونو تاريخ و سوسيال پلانا داشييار و تاريخده کي  ایجتیماعی قورولوشلارين بير-بيري نين آنتی تئزي اولاراق يوزوملارلار. بو آرادا بونو دا ايصرارلا قئيد ائتمک لازيمدير کي، هم هئگئل، هم ده مارکس و ائنگئلس آوروپانين آيدينلاماسيندا تاثيرلي اولان بؤيوک شخصييتلردير. دونيادا مارکسي و ائنگئلسي ان پيس آنلايان بيريسي وارسا، او دا لئنين اولموشدور. ايشته تئز و آنتی تئز قاوراملاري نين سوسيال قورولوش و ایجتیماعی حيات شرطلري، ائوريم (تکامول)له ايلگيلي اولدوغو بلليدير. چونوکو علمي بيلگي نين هئچ بير زامان آنتی تئزي اولماز. مثلن 2.2=4. بونون آنتی تئزي ندير؟ بونون آنتی تئزي جهالتدير. چونکو آلتئرناتيوسيز علمي بيلگيدير. اينسان حياتيندا مؤوجود اولان و تجروبه دن کئچميش بير چوخ بيلگيلر ده آنتی تئزسيزدير. اينسان بيلگيلري عومومن 3 بؤلومدن اولوشار: 1. علمي بيلگيلر. 2. علمي پروبلئملر. 3. ميستيک ايضاحلار. ايشته آخوندوفون دا ساووندوغو مودئرنيزم آنتی تئزسيز بيلگيدير. اونون بير آنتی تئزي وار: خورافاتا اينام،  " مئهدي "  نين قورتاريجي شکلينده گله جگيني قبول ائتمک! بو آنتی تئز دئييلدير. بو اينانجدير و ائلمله ده هئچ بير علاقه سي يوخدور. یعنی نه علمي بيلگي ايله علاقه سي وار، نه ده علمي پروبلئمله. ميستيک و ميفيک ايضاحلارين نتيجه سيدير. چونکو علمي باخيمدان بير اينسان غئیب اولوب مين ايللر بويونجا ياشاماسي مومکون دئييلدير. اينسانين سئللوللاری، ياراديليشي بونا ايمکان وئرمز. ايشته مودئرنيته نين نئجه اؤنملي بير کونو اولدوغو بو اورتامدا اورتايا چيخار. مودئرنيته نين آنتی تئزي يوخدور. چونکو او دايمي حرکتليليکدن عيبارتدير. مودئرنيته یعنی دورمادان حرکت ائتمک. حرکتين آنتی تئزي ندير؟ دورغونلوق. پلانئتلر، حيات اؤز حرکتليليگيندن دورا بيلرمي؟ دورا بيلمز. دئمک کي، آخوندوفون ساووندوغو سئکولاريزم حياتين و وارليغين روحونا اويغون بير گؤروشدور. دينچيليک ايسه دورغونلوقدان يانادير. چونکو دينچيليک بوتون حقیقتلرين بير مرکزده بيريکديگيني و اينسان ذهني نين يالنيز و يالنيز اونون اوزرينده چاليشما ياپماسيني ايستر. مين ايلدن آرتيقدير کي، ايسلام شرقينده ترققي يوخدور. م. ع. صابیر دئميشکن:  " اووَل نه ايديکسه، يئنه بيز شيمدي همانيز." شرق دورموشدور. شرقده حرکت ديناميک دئييلدير، مئخانيکدير. هئچ بير دوشونجه و تئکنولوژي ايستحصال ائده بيلمير. غربين ايستحصالاتيني ماددي- معنوي نه وارسا ايستئهلاک ائدير. بونو م.ع. صابیر و ديگرلري ريشخندله و بعضن ده شرقين دَیَرلريني، حتّی آشاغيلاياراق يازميشلار. شرقده کي  چاليشمالار علمي چاليشما دئييل، اينانج و عيبادت چاليشماسيدير. بو اوزدن ده شرقده هئچ بير ترققي و گليشمه مؤوجود دئييلدير. چونکو شرقين کولتورو اؤز اينسانلاري نين ذهنيني اينانج ساهه سينه قاپاييب، اورادا حبس ائتميشدير. آنجاق، حتّی ايسلام اؤزو ده اعتيراضلا باشلاييب اعتيرافا گلمگي اؤن گؤرمکده دير. ايسلام  " لا- يوخ " لا باشلار. آللاه ياراتديقلاري ايله باغلي مسئولييت داشييير، آللاهي دا سورقولاماق، سورقو- سوالا چکمک مومکوندور. بو، آللاها هئچ بير ضرر وئرمز. ذاتن آللاه اؤزو ده "هؤججتيميز تامام اولسون دئيه پئيقمبرلري گؤندرديک." - دئيير. یعنی آللاهين اينسانا وئرديگي عاغيل آللاهي دا سورغو- سوالا چکه بيلر و آللاه بونون فرقينده دير. چونکو اينسان بئينيني کايناتا و علمه آچان فلسفي شوبهه دير. بونو ح. جاويد گؤزل آنلادير: 

   " شوبهه آرتارسا هم يقين آرتار 

  معريفت نورو شوبهه دن پارلار. "  

                      بعضی باتي بيليم آداملاري نين آوتوريتئتلرينه سيغيناراق و يا اونلاري يانليش آنلاياراق خطالي گؤروشلري ساوونماق خئيير وئرمز. شپئنقلئرين "مدنييتلرين دوغوشو، یوکسليشي و چؤکوشو "  فورمولو، اوزرينده دارتيشيلاجاق بير مؤوضوعدور. او زامان، اؤنجه بو سوالي سوراليم؟ مدنييت ندير؟ روما بير مدنييت سيستئمي ايدي، يوخسا بير سياسي قورولوش ايدي. چؤکن اونون مدنييتي ايدي، يوخسا اونون دونيا گؤروشو و سياسي سيستئمي؟ ندن او زامان بو گون ده سئنئکانين اثرلري اوخونور؟ ندن چؤکدويو سانيلان يونان مدنييتي يئنيدن يوکسلدي؟ ندن رئنئساس اؤز قايناغيني و داياناغيني اسکي يونان مدنييتي اولاراق دويوردو؟ دئمک کي، مدنييتلر اؤلمور. اؤلن باشقا شئيلردير. چؤکن مدنييتين مادده سيدير، اونون معنويياتي و روحو اؤلمزدير. گونوموزده ده سومئرلرين ذهني نايلييتلري حياتيميزي ائتکيله مکده دير، بلکه بيز اونون فرقينده دئييليک. مدنييت قاورامي تعريف ائديلمه ليدير. بيلينجلي بير یوکسليشين و اينسان ذهني نين گئنيشله مه سيني ساغلايان، اونو دورغونلوقدان چيخاريب دئوينگنلييه (حرکتليلييه) سؤوق ائدن و راحات حيات، اؤزگورلوک يارادان ائنئرژي نين آدي مدنييتدير. مدنييت حرکتين نتيجه سدير. حرکتين اؤز فرقينه، شعورونا وارماسيدير. رياضي قانونلار قدر اينسان حياتيني و طبيعتي ائتکيله ين هئچ بير شئي يوخدور. گؤيلري ده رياضي قانونلارلا کشف ائدَرلر. بو قانونيليگين چؤکمه سي موکونمو؟ کيمسه دویموشمو کي، مثلا پيفاقورون ديک اوچبوجاق قانونو کئچرسيز اولسون؟ تام ترسينه، گؤيلره يوکسلمک اوچون ده بو گون او ياسالاردان فايدالانيرلار. دئمک کي، بير ايمپئراتورلوغون چؤکوشو بير مدنييتين چؤکوشو آنلاميندا دئييلدير. عوثمانلي نين چؤکوشو ايله مدني چؤکوشون نه علاقه سي وار؟ ذاتن عوثمانليدا مدنييت يوخ ايدي، اينانج وار ايدي. اهاليسي نين تام اکثرييتي نين يازيب-اوخوماسي اولمايان بير ايمپئراتورلوق نئجه مدني اولا بيلردي؟ مدنييتلر کيتابلارلا، ذهنين ايمکانلاري نين گئنيشله مه سي ايله اينشا ائديلميشدير. بو نؤوع اينشا ائديلن ايسه تاريخده قالميشدير، اينسانلارين حياتينا، داورانيشلارينا يانسيميشدير. بورادا ائوريم سورجي ايچريسينده بعضي سوسيال دَیَرلرين اؤزونه مخصوص دَييشيم سورجينه تانيق اولماقداييق. دَیَرلرين اوچ نؤو ائوريمله قارشي-قارشييا اولدوغو مومکوندور: 1. اؤلن دَیَرلر. 2. دييشن دَیَرلر. 3. ياشايان ديه لر. اؤلن دَیَرلري و گلنکلري مدني چؤکوش کيمي گؤرمک دوغرو اولماز. مدنييت اؤلمه ين دَیَرلردير. يا دا زامان آخيشي ايچريسينده اؤزونو اوناراراق دييشديريب و ياشاماسيني ساغلايان ديه لردير. اؤرنگين آلمان فيلوسوف  ياسپئر  " تاريخين باشلانقيجي و سونو "  کيتابيندا هينديستان، چين و يونانيستان اولاراق اينسانليق مدنييتي نين اوچ محوريني قبول ائتمکده دير. دونيادا داها سونراکي دوشونجه حياتي نين بو اوچ محور اوزرينده گليشديگيني ساوونار. گؤروندويو کيمي ميلاددان 8 اسر اؤنجه اوچ فرقلي مکاندا گليشن ذهني چاليشمالار بو گونکو علمي حياتيميزي دا ائتکيلر. آنجاق بو 2900 ايل ايچينده نه قدر ايمپئراتورلوقلار دوغدو، بؤيودو و چؤکدو. دئمک کي، شپئنقلئرين گؤروشو حاققیندا دوشوندويوموز زامان اؤنجه  " مدنييت ندير؟ "  سوروسونا جاواب وئرمک گرکه جکدير.  

   " آوروپا مدنيتي نين اؤلومه محکوم اولدوغو قناعتينه باش اَييب پئسسيميزمه يووارلاندي. "  باخ بو جومله ني ده عئيني منطيقله تهليل ائتمک و يالانلاماق موکوندور. آوروپا مدنييتي ندن چؤکسون کي؟ آوروپا مدنييتي علمي مدنييتدير. بونون ايچينده اولان سئويمسيزليکلري بو مدنييتين چؤکوشو اوچون سبب اولاراق گؤسترمک دينچي، دورغون ذهنييتلره خاصدير. آوروپا مدنييتي ديني و اينانجي اينسانين سوسيال حياتيندان ديشلاييب اؤزل حياتا يئرلشديرديگي اوچون ان بؤيوک باشاريني ساغلاميشدير. مودئرن مدنييتين ان بؤيوک کشفي ده بوندان عيبارتدير. آوروپا مدنييتي نين چؤکمه سيني آرزو ائده رک  " فلسفه "  اولوشدورماق باشقا شئيدير. ايشته بو ذهنييت غربين بئيين ژيمناستيگي نين نتيجه سي اولان بير چوخ دَیَرلري بوش-بوغازليق آدلانديرير.  " پوستمودئرنيزم بوشبوغازليغي "  سؤيله مک ايلک اؤنجه مودئرن مدنييته قارشي ساواش آچماقدير. چونکو پوستمودئرنيزم هر شئيدن اؤنجه مودئرن اولماغا ايصرار ائدر. هابئرماسين دا سؤيله ديگي کيمي هله ياريمچيق بير پروژئ اولان پوستمودئرنيزم ان چوخ ديل و ديلچيليک علمي ساهه سينده يئنيليکلره يول آچميشدير. بونو مودئرنيته نين آنتی تئزي اولاراق گؤرمک، بؤيله بسيط ياناشما ايله يوزوملاماق دوغرو دئييلدير.   

  يئنه ده دؤنه ليم آخوندوف مسئله سينه.  " بوينوموزا آلاق، اگر آخوندوفون آنتی تئزي بيزلرده يوخدورسا، کول باشيميزا. "  آخوندوفون آنتی تئزي (اگر بو قاوراملارلا اولايي تحليل ائتسک)   نييه يوخدور، وار. آخوندوفون آنتی تئزي بو گونکو عربيستاندير، ايراندير، افقانيستاندير و ايسلام حاققیني اينسان حاققی نين يئرينه قويان ايسلام دونياسي و ايسلام  " آيدين " لاريدير. آخوندوفون آنتی تئزي بوتون شرق تاريخي، ایجتیماعی داورانيشلاري و فاناتيکليگيدير. اينسان حاققیني آنلاماق ايستمه ديکلري اوچون ايسلامي دا سيياسته، سرمه يهيه آلت ائدن ايسلام اؤلکه لري نين اکثرييتيدير. آخوندوفون آنتی تئزي بوتون شرقين قارانليق تاريخيدير. چونکو آخوندوفون دوشونجه سي شرقين قارانليق دونياسيني تنقيد ائده رک شکيللنميشدير. آخوندوفچولوغون تمل ايستگي تاريخي، ميف و اينانج ياتاغيندان چيخاريب بيليم ساهه سينه ده سؤوق ائتمکدن عيبارتدير. شرقده شيددت ائنئرژيسي هله ده بيليمسل پلانا داشينمامايشدير. چونکو شرق کولتورو اينسانين طبيعتينده مؤوجود اولان ائنئرژيني علمي پلانا يؤنلنديرمکده ايستکلي دئييلدير، شيددت پلانينا ايستيقامتلنديرمکده ايستکليدير. ندن؟ چونکو هئچ بير راسيونال و اينتئللئکتوال دئوريمي شرق اؤز دوشونجه حياتيندا آرديجيلليغي ايله گئرچکلشديرمه دي.   

“" معاريفچيليک "  دؤورونو اصلینده قيسا بير زاماندا کئچيريب، مثلچون، بالتيکياني اؤلکه لر بو ايشه 30-40 ايل واخت آييريبلار. "  بئله آنلاشيلير کي، بو سطيرلرين يازاري بالتيکياني اؤلکه لرله موسلمان اؤلکه لري نين سوسيال و تاريخي ستاتوسلاري حاققیندا گرکن بيلگييه صاحيب دئييلدير. ندن؟ چونکو شرق اؤلکه لرينده چوخ گوجلو تاريخي دئتئرمينيست باسقي و دئتئرمينيست پسيخولوگييا مؤوجوددور. بو دئتئرمينيزم دونه ني بو گونه داشيماق ايستر. بو اوزدن ده بو گونو آنلاماق ايسته مز، کئچميشه قاپانيب قالار. ايسلام شرقي نين کولتورونده اؤندن ايره ليگه دوغرو سؤوق ائده جک فيناليست پسيخولوگييا، حدف و ائنئرژي مؤوجود دئييلدير. اويسا بالتيکياني اؤلکه لرين فيناليست کيمليکلري و کولتورلري وار. یعنی اسکي دَیَرلرين گونوموزه موداخيله سي بالتيکياني اؤلکه لرين دونيايا باخيش طرزينده، اينانجلاريندا داها زيفدير. اويسا شرق دوننيندن آيريلماق ايستمه ميشدير. تکامول ايسه بو آيريليشين نتيجه سيدير. معاريفچيليک دئييلن آنلاييشين دا گئرچک فلسفه سي دونه ني و اونون گوندميني تاريخه بوراخيب، حيات دويغولاري ايله دوپ-دولو مودئرن گوندم اولوشدورماقدان عيبارتدير. غرب اينساني گله جکده نه اولاجاغي نين هيجانيني ياشارکن، شرق اينساني اسکيميش، قوخوموش، دورغون کئچميشين نوستالگيياسي ايچينده دويغولانيب دورار. ذاتن  " آنتی آخوندوف "  مقاله سي نين ده مؤليفي بلکه ده اؤزل حياتينداکي سيخينتيلار دولاييسييلا اينديکي زاماندان بوتونو ايله قوپوب تاريخه فرار ائدير و هارادا آيدينليق و دوشونجه ايشيغي گؤرموشسه درهال سؤندورن شاه ایسماعیللاردان و اونلارين قارانليق دونيالاريندان قورتولوش بکله مکده دير. تاريخين باسقيسيندان آيريلا بيلمه يهن توپلوملارين معاريفلنمه سي چتين، چوخ چتين مسئله دير. تاريخي بيلگي ساهه سي اولماقدان چيخاريب، اونو اينانج و شعور ياتاغي اولاراق گؤرن فاناتيک دينچيلر و موحافيظ اکار مورتجئ ميللييتچيلرين اينديکي زاماني آنلامالاري مومکون دئييلدير. بيزيم تاريخيميزده سرمايه بيريکيمي مؤوجود اولماميشدير. ياخشي ياشاماق و يئنيليکلر ايسه بيريکميش سرمايه نين نتيجسدير. اؤرنگين  " آنتی آخوندوف "  يازاري نين غورور دويدوغو صفويلر زامانيندا اوغول آتانين يئرينه کئچديگينده داها اسکي ایجتیماعی سرمايه و ایجتیماعی شبکه نه وارسا هاميسيني محو ائديب يئنيدن اؤز ذؤوقونه گؤره قوراشديريردي. بو اوزدن ده بو گون مثلن صفويلردن قالما هئچ بير سرمايه يه، حتّی ايسفاهان ديشيندا هئچ بير دوغرو-دوروست معمارييه راستلانميريق. ايسفاهانين ائرمنيلر، گورجولر طرفيندن ياپيلانماسي باشقا بير کونودور و بو حاقدا ناسير پورپيرارين آراشديرمالاريني اوخوماقدا فايدا وار.

                      شرقده فلسفه اولماميشدير. شرقده بؤيوک شرحچيلر، تفسيرچيلر اولموشدور. دانته نين و بئرتراند راسسئلين ده بللي ائتديکلري اوزره ان بؤيوک شرحچي ايسه ايبني-روشد اولموشدور. ندن فلسفه اولماميشدير؟ فلسفه نين دوغوشو اوچون 3 اونسور بير يئرده اؤزگورلوک اورتاميندا اله آلينماليدير.  یعنی  ديل، دوشونجه و وارليق اونسورلري اؤزگور بير اورتامدا ذهنين يارغيسينا سونولماليدير. اصلینده ايسه فلسفه نين اورتا ديرگيني اولوشدوران ديلدير. شرقده ايسه طبيعتينده فلسفي درينليک بارينديراجاق بير ديل اصلا دوغمادي. عرب ديلي ان بؤيوک تفيسرلرين يازيلديغي و آنتيفلسفي ياپيدا گليشميش بير ديل شکليني آلميشدير. فارس ديلي نين کسينليکله فلسفي آلانا گيرمه سي مومکون دئييل. ديلين ستروکتورونداکي عکسيکليکلر بونا ايذن وئرمير. تورک ديلي ايسه سون 100 ايلده شهر حياتي ايچينده يازي تجروبه سي قازانماغا باشلاميشدير. تورکييه تورکجه سي نين فلسفه يه گيرمه يولو سون 80 ايلده آچيلميشدير. بو باخيمدان آخوندوف بير فيلوسوف اولماقدان داها چوخ گئرچک بير ضيالي ايدي. یعنی  تورکجه نين ده فلسفه ساهه سينه گيريش يولونو آچماق ايسته ميشدير. یعنی  آخوندوفون ضياليليق ميسسيياسي چوخ گئنيش ميقياسلي اولموشدور. ضياليليغي نين ايکي يؤنو مؤوجود ايدي 1. غرب مدنييتيني شرقده يانسيتماق، عکس ائتديرمک. 2. شرقين فاناتيک و اؤزلليکله قورتاريجي  " مئهدي "  بکله مه خسته ليگيني ايفشا ائتمک. بو ايکي ايستيقامتده هئچ کيمسه آخوندوف قدر شرقين آيدينلانماسينا خيدمت ائتمه ميشدير. بو اوزدن ده هم قارانليق سئورلر، هم ده آيدينليق سئورلر دايما آخوندوفلا قارشي-قارشييا گله جکلر.  

                       » روسييا فلسفي فيکري محض هئيدر جامال سايه سينده اؤز احاته دايره سينه ايسلامي قبول ائديب، اونون ان اولوي، موباريز جهتلريني اؤز کونتئکستينه کؤچوروب، بو دفعه  غربه دئييل، محض ياشيل بايراقلي ايسلاما اوز توتوب. "  چوخ جيدي مسئولييت گرکديرن ايديعادير. یعنی  روسييا فلسفي فيکري نين درينليکلري حاققیندا گئنيش آراشديرما آپارمادان هئيدر جامالين بئله ائتکيله یيجي رول اويناماسيني سؤيله مک نه اينانديريجيدير، نه علمي. بير دفعه  قيرميزي بايراقلا دئوريم گئرچکلشديره رک روسييانين گليشمه سيني انگلله ين روس خالقي بو دفعه  ده ياشيل بايراقلا دئوريم گئرچکلشديره جک درجه ده گئري ذکالي اولماماليدير. سينانميشي تکرار سيناماق موطلق جهالتدير. ايستر هئيدر جامال اولسون، ايسترسه بير باشقاسي اؤز فلسفه سيني يايقينلاشديرماق اوچون غرب مئتودولوگيياسينا حاکيم اولماليدير. هله مضمون بير يانا دورسون، مضمونون آنلاتيم و تانيتيمي اوچون غربين فلسفي تجروبه لرينه احتيياج وار. سادجه بير جومله ايله روسييا آيدينلاري نين ياشيل بايراقلي ايسلاما اوز توتماسيني سؤيله مک علميلييه دايانماز. ايسلاملا بيلگي اولاراق ايلگيلنمه باشقا شئيدير، ايسلامي بير ياشام بيچيمي اولاراق قبول ائتمک باشقا شئي. سيبئرييانين سويوقلاريندا بده نين هرارتيني قورويا بيلمک، ياشايا بيلمک اوچون شراب ايچمه يه احتيياج وار. ايقليم ايسلامين سرت ديسيپلينلريني قبول ائده بيلمز، هينديستان ايقليمي نين قبول ائتمه ديگي کيمي. هينديستاندا هم عربلر، هم فارسلار، هم ده تورکلر سايسيز آدام باشي کسديلر کي، ايسلامي قبول ائتديرسينلر. هينديستانين تورکوستانا، ايرانا و عربيستانا بنزر خاوس جوغرافيياسي اولان پاکيستان و افقانيستانين بؤيوک بير قيسمي همن ايسلامي قبول ائدرکن، اونون بوللوق و اورمانليق ايقليمي ايسلامي قبول ائتمه دي. چونوک او جوغرافييا اوچون بو ديسيپلينلر کئچرلي دئييلدير و بو ديسيپلينلرله اورالاردا ياشاماق اولماز. بو آرادا بونو دا قئيد ائده ليم کي، فلسفه ايسلام جوغرافيياسينا بوللوق جوغرافيياسيندان گلميشدير: يونانيستاندان. وييي اسرين ايکينجي ياريسي و خي اسرين بيرينجي ياريسينا قدر آبباسي خيلافتي نين رسمي دؤولت ايدئولوگيياسي مؤعتزیله مذهبي ايدي. مؤعتزیله مذهبي نيسبتن راسيونال ايدي و بير چوخ حاللاردا آچينيم (وحي) و عاغيل قارشيدورماسيندا وحيي بير يانا بوراخيب عاغيلي ترجيه ائديرديلر. مؤعتزیله يه گؤره هم وحيين، هم ده عاغلين قايناغي تانريديرسا، ندن بو عاغيلدان دا ايستيفاده ائديلمه سين؟ بو اوزدن ده بو دؤنمده يونان ذهنييتي عرب ديلينه ترجومه ائديلدي. بو ترجومه لر بؤيوک ذهني اينقلابا سبب اولدو. فارابي و بن سينا کيمي موتفککيرلر ده بو دالغانين نتيجه سي ايدي. بو دؤنه مي ابورئيهان بيروني ياخشي دَیَرلنديرميشدير. بيرونييه گؤره شرق مدنييتي هينديستانا و چينه مخصوصدور، ايسلام شرقينه دئييل. ايسلام شرقينده کي  مدنييت يونان مدنييتي نين کوپيسيدير. ابورئيهان بيروني نين بو تثبیتيني ذکي وليدي توقان دا اؤز اثرلرينده کوللانميشدير. داها سونرا مؤعتزیله نين دؤنه مي قاپاندي، اؤزلليکله محمد غززالي شرقين ذهنيني تقليدچيليک قارانليغينا گؤمدو. ريياضييات و فلسفه ياساقلاندي. فلسفه ايله اوغراشانلار مولحيد و مورتد آدلانديريلدي. غززالي اونلو " توحافت الفلاسيفه" (فيلوسوفلارين عئيبجرليکلري) آدلي اثرينده فلسفه ني بوش بير شئي آدلانديردي. غززالي نين بو دَیَرلنديرمه سيني بير عصر سونرا بن روشد تنقيد ائتدي و " توحافت التوحافه " (عئيبجرليکلرين عئيبجرليکلري) آدلي کيتابيني غززالي نين تنقيدينه هسر ائتدي. بن روشدو محکمه ليک ائديب اثرلريني ياخديلار. یعنی  مؤعتزیله زامانيندا باشلايان نيسبي گليشمه لر ده بو شکيلده سؤندورولدو. داها سونرا تصوووف جريانلاري اورتايا چيخدي کي، اونلار دا گوجلو فردلر يئتيشديرديلر، آنجاق توپلوملارين آزاد و دئموکراتيک اورتامدا ياشايا بيلمه لري اوچون هئچ بير سياسي فلسفه اورتايا قويماديلار. بو يولدا اونلار چوخ ايستکسيز ايديلر.  

                      » ميرزه فته لي اوچون آخوندلار ايسلامين، کوللن قوجا شرقين سيماسيديرسا، هئيدر جامال اوچون آخوندلارين، کلئريکاللارين ايبراهيمي دينلرينه قطعي دخلي يوخدور بو جومله لرين ايچينده بير نئچه چليشکي (تضاد) مؤوجوددور. آخوندوف ايسلامي آخوندلاردا خولاصه ائتميردي. آخوندوف عومومييتله دينلرين ترققييه انگل اولدوغونو ساوونوردو. او، سادجه ايسلام دينيني دئييل، بوتون دينلري تنقيد ائديردي. مارکسين  " دين توپلومون اويوشدوروجوسودور "  کيمي بير توتوم ايچينده ايدي. تاريخه باخيلديغيندا ان قورخونج و قانلي ساواشلارين دينلر، مذهبلر آراسيندا گئتمه سي هارداسا بو سؤيله مي منطيقلي اولاراق گؤسترمکده دير. شاه ایسماعیل، يالنيز تبريزده 12 مين سونني آدام باشي کسدي. سوچلاري ايسه سادجه سونني اولماق ايدي! او زامانکي تبريزين نوفوسونو 80 مين اولاراق قبول ائتسک، تقريبن شهرين دؤردده بيريني محو ائتميشدير. ديگر طرفدن، بو جومله لرين يازاري آخوندچولوغون نه اولدوغونو، هانسي تاريخي-ایجتیماعی شرايتده اورتايا چيخماسي ايله باغلي بيلگي وئرمير. آخوندچولوق ذاتن يازارين هسرتيني چکديگي صفويليگين نتيجه سيدير. نئجه؟ قيزيلباشليق آنادولو علویليگي نين سياسيلشميش شکليدير. علویلرين ايسلام حقوق سيستئميني آنلاداجاق کيتابلاري يوخ ايدي. یعنی  علویليکده فيقه علمي مؤوجود اولماميشدير. کلاسسيک دؤولتلر ايسه دين مرکزلي قورولدوغو اوچون دي نين سياسي فلسفه سيني اولوشدوران سيستئم لازيم ايدي. بو سيستئم سوننيليکده وار ايدي، آنجاق علویليکده يوخ ايدي. بو اوزدن ده صفوي دؤولتي قورولدوقدان سونرا فارس ميللييتچيليگي مرکزلي شیعه فيقهي طرفيندن هضم ائديلدي. شهر حياتي نين نه اولدوغونو بيلمه يهن کؤچري قيزيلباشلار مورشيدي کاميللري نين امري اوزرينه آذربايجاندا شهر حياتيني محو ائتديلر. داها سونرا دا بيليکلرين ايداره هئيتي اولان لالاليق قورولو 1508- جي ايلده شاه ايماييلين امري اوزرينه لغو ائديلدي. اونون يئرينه  " وکيلي نفسي هومايوني "  اوتوردولدو. قيزليباشلار شاه ایسماعیلين بو داورانيشلارينا اعتيراض اولاراق شاه طرفيندن تعيين ائديلميش 5 فارس واليني تئررور ائتديلر. بو دفعه  ده تورکلر صفويليک آدي آلتيندا و شاه ایسماعیلين  " مئهديليگي "  سايه سينده فارسلارا يئم ائديلديلر. شاه ایسماعیل دؤولت فلسفه سيني شیعه مرکزلي اولوشدورا بيلمه سي اوچون لبنانين کوچه لرينده سوله نيب درويشليک ائدن شیعه آخوندللاري تئبريزه دعوت ائتدي. بونلارين باشيندا مجليسي عاييلهسي دوروردو. مجليسي عاييله سي صفويليگين سياسي فلسفه سيني تام شیعه کيمليگي اوزرينه اوتورتدو. محمدباقير مجليسي نين 110 جيلد اولاراق يازديغي «بحارالانوار»  کيتابي نين سادجه بير جيلدي بير میللتي و بير تاريخي قارانليغا گؤممک اوچون يئترليدير. بوتون صفوي تاريخي بويونجا بو کيتابلار مسجيدلرده تدريس ائديليردي. مجليسي نين دده لري لبناندا درويشليک، ديلنچيليک ائديب ياشارديلار. شاه ایسماعیلين حسابينا صفوييه دؤولتينده فئوداللارا دؤنوشدولر. صفويليين کؤکونو بؤيوک نادير شاه قازماق ايسته ييردي، لاکين او دا تئرروريست قيزيلباشلار طرفيندن اؤلدورولدو. بئله ليکله صفوي آريستوکراسيسي 4 مرحله دن اولشوردو: 1. ساراي. 2. اوردو. 3. آخوندلار (ايلک دفعه  اولاراق ايسلام تاريخيند). 4. ريت (کوتل). لاکين زامان آخيشي ايچينده فئوداللارا دؤنوشن آخوندلوق اينستيتوتو اوردودان دا داها ايره لي کئچيب و سارايلا عئيني ستاتوسا صاحيب اولدو. آرتيق ساواشلارين باش وئرمه سينده روحانيلر ده سؤز صاحيبي اولموشدو. فئوداللاشان آخونديزم اؤز منافعسي اوغرونا ساواش و يا باريش اوچون ديني فتوا چيخاريردي. بو شکيلده آذربايجان شاه ایسماعیلين ظهورو ايله قارانليغا گؤموله جک و ايسلامين ماهييتي ايله هئچ علاقه سي اولمايان فئودال آخونديزم اينسيتيتوتو اولوشاجاقدي. آنلاشيلديغي کيمي „انتياخوندوو "  مقاله سي نين مؤليفي فرقينده دئييل کي، هسرتيني چکديگي صفويليک و „مئهديليک "  آنلاييشي آخوندچولوق کيمليگيني ايسلام کولتور سيستئمي ايچينه سوخموشدور. روس ستراتئژيستلر بونو چوخ گؤزل بيلديکلري اوچون آذربايجاندا شاه ایسماعیلچيلغين یوکسليشينه ايمکان ياراتديلار. چونکو شاه ایسماعیلچيليقلا عئيني زاماندا هم ايسلام دونياسي، هم ده تورک دونياسي پارچالانميش اولدو. روسلارا و فارسلارا لازيم اولان دا بو ايدي. اگر بو گون ايران شووينيزمين بئيني اولان رفسنجاني اؤلکه ده کي  ميللي حرکتلري بوغماق اوچون شاه ایسماعیلچيليغا و صفوييته سيغينيرسا هئچ ده تسادوفي دئييلدير. چونکو بوگونکو فارس ميللييتچيليگي مرکزلي شیعه دؤولتي نين ايلک قوروجوسو شاه ایسماعیل اولموشدور. بو سادتي بوگونکو ايران دؤولتي نين يؤنتيجيلرينه شاه ایسماعیل بخش ائتميشدير. بوگونکو 30 ميليون تورکو فارس شووينيزمينه تسليم ائدن ايلک ذهنييت شاه ایسماعیل اولموشدور. آذربايجان تورکچه سي نين ديگر تورکجه لردن تجريد ائديليب فاسر ديلي قارشيسيندا ساوونماسيز قالماسيني ساغلايان شاه ایسماعیل اولموشدور. ايران-ايراق ساواشيندا جاهيل توپلومو جنّت خيالي ايله آلداديب 12-13 ياشيندا اوشاقلاري مينالارين اوستونه گؤندريب اؤلومه يوللايان خومئينيزم يئنه ده شاه ایسماعیلچيليغين مؤوهوماتينا سيغينميشدي. خومئيني نين اؤزوندن باشلاميش بوتون آخوندلار جومه نامازيندا شاه ایسماعیلين ائتديگي بير ايشي بو شکيلده جاهيل کوتله يه نقل ائديرديلر:  " شاه ایسماعیل کربلاني آلديقدان سونرا هز. هوسئينله بير يئرده شهيد اولان هوررون قبريني آچير. باخير گؤرور کي، او زامان هورر يارالاناندا هز. هوسئي نين اونون ياراسينا باسديغي دسمال ائله يارانين اوستونده دورماقدادير. دسمالي يارانين اوستوندن گؤتوردوکدن سونرا قان آخماغا باشلايير. دسمالي نه قدر يئرينه قويور کي، قان آخماسين باشارمير و ایسماعیل خطا ائتديگيني آنلاديغي اوچون آديني خطاي قويور!  "  آخوندلار ايران-ايراق ساواشيندا اؤلنلرين  " شهيد "  اولدوقلاري اوچون هورر کيمي اؤلمزليکلريني قوروياجاقلاريني بو شکيلده تبليغ ائديرديلر. اؤلکه  نين سرمايه سيني اله کئچيرميش آخونديزم ميليونلارجا اينساني اؤز منافعلري يولوندا قوربان وئرديلر. او ساواشدا عسگر اولاراق من ده يارالانديم. او زامان آخونديزمين ایسماعیل خطايدن نقل ائتديکلري بو افسانه يه اينانميرديم. آنجاق داها سونرا شاه ایسماعیلي و او دؤنه مي جيدي شکيلده اؤيرنديگيم زامان اونون شئيرلرينده بو حاديثه يه راست گلديم. شاه ایسماعیل خطاي بير قزه لينده بو ماجراني بو شکيلده آنلادير: 

   " ائي موسلمانلار، اسيري زولفي يارم دوغروسو، 

  بير سيتمکارين اليندن بيقرارم دوغروسو. 

  دئرديم اول ديلبر يانيندا اعتيباريم وار منيم، 

  يوخلاديم ائتديم يقين بيئتيبارم دوغروسو 

  شاه خطاي گشته چيخدي آچدي حوررون قبريني 

  بار ايلاهي عفو قيل، کيم تؤوبه کارم دوغروسو. 

  گلين بو مسله يه عاغلين موهاکيمه سي ايله باخاليم. نييه ایسماعیل حوررون قبريني آچير؟ بو صلاحييتي اونا کيم وئرميش؟ ایسماعیلدان 900 ايل اؤنجه اؤلموش بير آدامين قاني هله ده آخا بيلرمي؟ ایسماعیل حوررون قبريني نئجه تاپميش؟ چونکو او زامان اؤلدورولنلري نين بير چوخونون مزاري بئله، بللي دئييل. کربلا حاديثه سينده شهيد ائديلنلر بير پيچاقلا اؤلدورولمه ديلر کي، ياراسينا دسمال قويولسون. مثلن حوسئين شهيد ائديلديکدن سونرا باشيني کسيب شاما آپارديلار. ديگرلري ده بو شکيلده نامردجه اؤلدورولدولر. اؤزلليکله حورر اؤز اوردوسونو بوراخيب هوسئينين طرفينه کئچديگي اوچون اونو پارام- پارچا ائتديلر. دئمک کي، نه ایسماعیل حوررون قبريني آچميش، نه ده اورادا دسمال فيلان اولموش. ايسلامييتي بو گون اؤز منافعلري يولوندا کوللانان آخوندلار کيمي او زامان دا ايسلامييتي مرثيه خانليق، خورافات سوييه سينه ائنديرن صفوييه نين اويونبازليغيدير بو. چونکو هئچ بير تاريخي قايناق بو حاديثه ني يازمير. شاه ایسماعیل دئميش و قيزليباش موريدلر ده اينانميش، وسسلام. صفوييه نين شبئيخانليق، سينه و زنجيروورما صحنه لريني اولوشدورماق اوچون اويدورولموش يالانلاردان بير نومونه سيدير بو. صفويليکدن تاريخ اوچون ميراث قالان خورافاتلاردير. اينسان عاغلينين چئوره سينه قارانليق هؤرموش، اونون گليشمه سيني انگلله ين خورافات.   

  هر بير فئنومئن تاريخي سورج ايچينده کندي يازقيسيني، کندي بوزولمه و و بؤيومه سورجيني ياشار. اؤنجه بونو بليرتليم کي، بير ايسلام کولتورو وار، بير ده ايسلامين زااتي وار. مثلا هجج، ناماز، قيبله کيمي حاديثه لر ايسلام کولتورودور. اؤرنگين قيبله نين هز. محمد طرفيندن بئيت-اول موقدسدن کعبه يه طرف چئوريلمه سي ايسلامين جؤوهرينده هئچ بير شئيي دييشديرمه دي. ايسلام کولتورو عومومن کوتله داورانيشلاريني عيارلايان ائتکنلر (عاميللر) کيمي گؤرونمکده دير. مثلن بير چوخ تصوووف جريانلاري ايسلام کولتورونو قبول ائتمه ميشدير. بو کولتور تاريخي سورج ايچينده ايسه اؤزونو دَييشيک شکيللره دؤنوشدورموشدور. ايستر جوغرافي، ميللي فرقليليکلردن قايناقلانان، ايسترسه مذهبلرين تاسيسچيلري نين اؤزل گؤروشلري فرقلي کولتور اورتايا قويموشدور. بونون ان آچيق اؤرنکلريني شیعه-سونني فرقليليکلرينده گؤرمکدگيک. صفويليکله عئيني زاماندا فرقلي ايسلام آنلايشي اورتايا چيخدي. بير شهر دؤولتي اولان قاراقويونلولار ايسلام دونياسيندا يايقين اولان ايسلام آنلاييشي ايله دونياني گؤروردولر. آنادولونون سوسوز بوزقيرلاريندان گليب تبريز شهرينه سوخولان کؤچري قيزيلباشلار ايسلامين شهر آنلاييشيني دييشديرديلر. مثلن هز. محمدين ان چوخ سئوديگي هز. آييشه صفويلردن اعتيبارن اخلاقسيزليغين رمزي کيمي گؤروندو. تبريزده بلکده اولان آييشه آدلي قيز اوشاقلاري نين دا باشيني کديلر. آييشه سؤزو صفويلر طرفيندن فاحيشه ليک سوييه سينه قدر ائنديريلدي. اصلینده ايسه ايسلامين ان دوشونن، ساواش مئيدانلاريندا پئيقمبرله بير يئرده اولان قاديني آييشه ايدي. حتّی قورانين متلشمه سينده ده آييشه نين ذهني ايستعدادي نين بؤيوک رولو اولموشدور. بير سؤزله صفويليک نيفرتين، کي نين، قاتيلليگين، ساديزمين اؤرنگي کيمي تاريخ صحنهسينه گيردي.  

                       " آنتی آخوندوف "  يازيسيندا هئيدر جامالين  " يئني سياسي تئولوگييا "  ياراتماسي کونوسوندا خبر وئريلير، آنجاق بو يئني سياسي تئولوگييا نين نه اولدوغو آچيلمير. ايسلامدا هر جور  " يئني " ليک بيدت ساييلميشدير. چونکو ايسلام اؤزونو هئچ بير زامان اسکيميين و دايما يئني اولان، دايما يئني قالاجاق اينانيش و يؤنتيم شکلي کيمي تانيملاميشدير. حتّی ايسلام دونياسيندا رسمن سئکولار دؤولت اولان تورکييه جومهورييتي نين ده سيخينتيلاري بورادان قايناقلانماقدادير. چونکو رسمي دؤولت ايدئولوگيياسي ايله توپلومون اينانج سيستئمي تام بير تضاد ايچينده دير. هئيدر جامالين ايسلامين يئني تئولوگيياسي حاققیندا دوشونمه سي نين سببي خريستيان اؤلکه سينده، دي نين سيياستدن آيري اولدوغو بير اؤلکه ده ياشاماسيدير. يوخسا تصوور ائدين عربيستان، ايران، افقانيستان کيمي بير ايسلام اؤلکه سينده ياشاسايدي ايسلاما بيدت گتيرديگي اوچون درهال اونون قتلينه فتوا وئريلردي.  

   " ايسلامين باشليجا حدفي محشر گونو، دقيق دئسک آخيرت سئوداسيدير. یعنی  آدي بؤيوک حرفله يازيلاجاق  " فوتورولوژي گله جک. "  بو جومله يه ده تنقيدي ياناشاليم. ايسلامين کيتابي قوراندير و بير ده پئيقمبرين داورانيشي. پئيقمبر ايسه دئميش کي، اگر منيم دئديکلريم بير زامان قورانلا ترس دوشسه، منيم دئديکلريمي اونودون. اساس بو ايکي قايناقدير. داها سونرا شیعه ديگر 12 قايناق دا اويدورموشدور و شیعه نين اينانجينا گؤره بو 12 قايناق دا سهو ائتمزميش. آنجاق قوراندا آللاه تؤوبه سوره سي نين 43-جو آيسينده پئيقمبرين خطا ائتديگيني سؤيله يير و دئيير کي، تانري سني بو خطانا گؤره باغيشلاسين. پئيقمبرين خطا ائتمه سي مومکونموش، 12 ايمامينکي مومکون دئييلميش! ان يايقين و مقبول اولان قوران و سوننتدير. قورانين هئچ بير يئرينده  " آخيرت "  سؤزو  " بو دونيا "  سؤزوندن اؤنجه گلمه ميشدير.  " بو دونيا " دا بليرلنميش حدفلر مؤوجوددور. بو حدفلر آنجاق و آنجاق اينسانين اؤزونون اؤز ايراده سي ايله چاتا بيله جگي حدفلردير. اينسان بو حدفلر حاققیندا بيلگي ده الده ائده بيلر. آنجاق  " او دونيا "  حاققیندا و روحلارين ديريليشي ايله باغلي حتّی پئيقمبره بئله تجروبي بيلگي وئريلمه ميشدير. چونکو قوراندا پئيقمبره  " سندن روح حاققیندا سوروشسالار، دئ کي، بو حاقدا منه بيلگي وئريلمه ميشدير " - دئييلمکده دير.  " او دونيا "  حاققینداکي تصويرلر اينسانين اوتوپيک شعورونو بير تور مينياتورلشديرسه ده گئرچک حدفين  " بو دونيادا "  اولدوغو وورغولانير. اصلینده آخيرت بو دونيادا واريلميش حدفلردن تجريد ائديلميش دئييلدير، بو حدفلرين اوزانتيسي و بير پارچاسيدير. وولتئر  " جهننم اولا بيلمز، چونکو تانري بو قدر غدار و ظاليم اولا بيلمز، جنّت ايسه تنبللرين ياتاغيدير. " - دئيير. ايسلامي کولتور اولاراق دئييل، جؤوهر اولاراق قبول ائدن تسوووفون بير چوخ طريقتلري ده جنّت-جهننمه اينانماز. اوراني ان سون حدف اولاراق گؤسترمزلر. ان سون حدف تانري نين کنديسيدير، جنّت دئييلدير. قوراندا  " تانريدانسينيز، تانرييا دؤنرسينيز. "  آيسي ده بونا ايشارتدير. آنجاق تسوووف ده سياسي مسئله لرده فيقهين قوجاغينا يووارلاندي. سادجه ديکتاتور مورشودلرين مازوخيست موريدلر اوزرينه حاکيمييت و کونترول کولتورونو گليشديردي.  

                      يسلامين آنا قايناقلاريندا  " مئهدي "  آنلاييشينا راست گلينمه مکده دير. بو، داها سونرا اويدورولموشدور. چونکو پئيقمبر ايصرارلا دئميش کي، منيم مؤعجيزه م قوراندير. قوراندا دا  " مئهدي "  آنلاييشي حاققیندا هئچ بير آچيق مئساژ مؤوجود دئييلدير. بئله اؤنملي بير مؤوضوعنو ندن تانري بير خبر شکلينده قورانا يئرلشديرمه ميشدير؟ چونکو گرک دويماميشدير. اگر  " مئهدي " چيليک دوغرو ايسه او زامان قوران اؤز تاثيريني ايتيرر، اونون اؤنه مي قالماز. اصلینده قورتاريجي بکله مک بوتون ميفلرده و دين کولتورلرينده اولموشدور. ايسا اؤلدورولدوکدن سونرا اونون 1000 ايلدن سونرا دونيايا تکرار دؤنه جگينه اينانيرديلار. 999، 1000، 1001، 1002-جي ايللرده خريستيان دونياسي صبيرسيزليکله ايسانين زوهورونو بکله ييردي. آنجاق ايسا گلمز اولدو. ايشته بو دؤنمدن سونرا آوروپادا اينسان عاغلينين حياتا گوجلو موداخيله سي باشلادي. چونکو گؤردولر ايسا گلنه اوخشامير، اؤز ايشلريني اؤز عاغيللاري ايله ائتمه يه باشلاديلار ياواش-ياواش. یعنی  قورتاريجي ائنئرژيني اينسان عاغليندا آراماغا باشلاديلار. گؤروندويو کيمي قورتاريجي بکله مه نين سونا چاتديغي بير دؤنمدن باشلاياراق اينسان حاقلاري، بير چوخ فلسفي جريانلار، ايقتيصادي اينکيشاف، دئموکراتييا کيمي قاوراملار اينسانين گونده ليک حياتينا اوتورموشدور. قورتاريجي گليب نه ائده جک؟ گله جکسه، گلسين بير زاوود آچسين، بير فابريکا آچسين کي، ايشسيز آداملار اورادا چاليشسينلار. ايسلام دونياسي نين دا ايقتيصادي، سياسي بدبختليک ايچينده ياشاماسي نين سببي ائله بو قورتاريجي  " مئهدي "  گؤزله مکدن واز کئچه بيلمه مه سيدير. اينسانلار اونون عاغلينين دونيايا حاکيم اولاجاغيني بکله ديکلري اوچون اؤز عاغيللاريني مزارا آپاريرلار. اويسا مزارا گؤمولن بو سايسيز عاغيللار بو دونايادا تجروبه يه دؤنوشسه ايدي، بو گون بو قدر ظولم و عدالتسيزليک ايسلام دونياسيني سارمازدي. آيريجا،  " مئهدي " نين زوهورو او زامان گئرچکلشه جکميش کي، ظولم دونيادا آشيب-داشسين. اونا گؤره ده مثلن خومئينيزم بو ايلاهي ايرادني گئرچکلشديرمک اوچون اولمازين ظولملر ائتدي. اونمينلرجه اينسانلاري دسته-دسته گوللله ديلر.  " مئهديچيليک "  اورتايا آتيلديغي گوندن ايتيبارن، اينسانليق بدبختلييه محکوم ائديلميشدير. آتاتورک، جومهورييتي قوردوقدان سونرا دونيوي دؤولت سيستئمينه قارشي اؤزونو  " مئهدي "  اولاراق دويوران بير نئچه آدام اوراتايا چيخيب عوثمانلي جهالتيني هله اؤز روحوندا داشييان توپلومو دؤولته قارشي تشکيلاتلانديرماق ايسته ديلر. آتاتورک اونلاري ياخالاييب دئدي:  " سيزي قوياجاغام ديوارين اؤنونه. بئينينيزه گولله سيخاجاغام. اگر اؤلمه سه نيز سيزه ايمان گتيريب اؤلکه نين يؤنتيميني سيزه تاپشيراجاغام. "   " مئهدي " لر قاپانديلار آتاتورکون آياقلارينا و آتاتورک اونلاري  " دارالمجنون"آ، یعنی  دليخانايا گؤندردي. اصلینده بو گون  " مئهدي "  بکله ين اينسانلارين هاميسي نين يئري دليخانا اولماليدير.  

  „شیعه مذهبي تکجه دئکادانس روحلو مرثيه خانليق دئييل، اونون جانلي جؤوهري گله جگي سسله ين مئهديچيليکدير، یعنی  ايمام مئهدي اينتيظاري! يني، سؤزون اسل معناسيندا  " اينقيلاب " . "  بو سطيرلرين مؤليفي تاريخده  " مئهدي "  اينتيظارچيليغي نين نه قدر قتللر تؤره ديب بو گؤزل دونياني جهننمه چئويرمه سي حاققیندا خبرسيزدير. سطيرلردن ده آنلاشيلديغي کيمي، گله جک  " مئهدي "  طرفيندن گتيريله جکميش، توپلومون اينتئللئکتوال، تئکنيکسل، عقلي چاليشمالاري نتيجه سينده گتيريلميه جکميش. یعنی  بير سؤزله موتلو گله جک توپلومسال، بيرئيسل چاليشمالارين نتيجه سينده گتيريلميه جکميش،  " مئهدي "  اونو گتيره جکميش. او زامان بو عاغيل بيزه نييه وئريلميش؟ مئهديچيلک اينانيشينا گؤره عاغيل اونا گؤره بيزه وئريلميش کي، يالنيز قورتاريجي بکله مه نين اساسلاريني، منطيقيني اولوشدوراليم، وسسالام. بو اينانيش طرزي ان سون اولاراق خومئيني کيمي بير ديکتاتورو يئتيشديردي. خومئينيزم توپلومون اينانج جهالتيندن يوغرولان خسته ليکدن باشقا بير شئي اولماميشدير. سوسيال پسيخولوگيياداکي خسته ليک و قورتاريجي بکله مه خومئينيزم شکلينده اورتايا چيخدي. ايلک اؤنجه شاه ايمساييل شکلينده زوهور ائدن  " مئهدي "  اينسانلارين گؤيلري فتح ائتديگي بير دؤنمده خومئينيزم شکلينده دوغدو. بو آرادا بو مئهديچيلر گؤره سن بو سوالا دا جاواب وئره بيليرلر مي کي، مئهدي گلديگينده گؤيه گئتميش اينسانلارين تکليفي نئجه اولاجاق؟ چونکو مئهدي بو تئزلييه گلنه بنزمير و او گلنه قدر اينسانلارين چوخو اولا بيلسين گؤيه گئتسين. چينگيزخان اؤلدوکدن و سونرا دا مونقوللارين چين ايستيلاسينا اوغراماسيندان سونرا اونلاردا دا چيگيزخانين يئنيدن ديريليب، گئري دؤنوب اونلاري قورتاراجاغي اينانجي ياراندي. بو اينانج اورتايا چيخديغي گوندن اعتيبارن، مونقوللار چؤکدو، اسارته محکوم ائديلديلر. بو ميف هاردا اورتايا چيخميشسا فلاکت، بدبختليک ياراتميشدير. مودئرن سوسيولوگييانين کاريزماتيک ليدئر آنلاييشي ميفلرده و دينلرده غئیبدن گله جک اولان قورتاريجي کيمي آنلاديلميشدير.   

                      قورتاريجي بکله مه نين مودئرنيزمين ايستکلري ايله اؤرتوشمه سيني سؤيله مک، کسينليکله منطيقسيزدير. ذاتن مودئرنيزم بو اينانيشا قارشي دوشونجه پلانيندا ساواش آچديغي اوچون تاريخده عرضي-اندام ائتميشدير. مودئرنيزمين کشفلريندن ان اساسي اينسان عاغليندا و دونيا گؤروشونده حيات دويغولاريني اولوشدورماق اولموشدور. یعنی  او دونيادا ياشاماق خياللاري نين يئرينه بو دونياني ياشانيلير دوروما گتيرمک. اينسان اؤز آزادليق آنلاييشيني بو دونيادا اولوشدورماليدير. بو دونيادا کؤله اولوب او دونيانين ميفيک آزادليغي خيالي ايله ياشاماق مودئرنيته نين فلسفه سي ايله باغداشماز.  „مئهدي "  بکله مک اينسانين کؤله ليگه تسليم اولماسيندان، عاغليني کوللانيلماز حالا گتيرمه سيندن باشقا بير شئي دئييدلير. ذاتن بيزيم تاريخيميخ بير شکيلده معنوي کؤله ليک تاريخيدير، یعنی  هپ قورتاريجي بکلنه رک مزارلارا گؤمولن اينسان عاغلي. مودئرنيزم بونا سون وئرمک ايسته ميشدير. مئهديچيليک اينسانين اؤزونو زيف گؤرمه پسيخولوگيياسيندان قايناقلانميشدير. چاره سيز، بدبخت دورومدا اينسانين عاغيل سيستئمي نورمال ايشلگيش مئخانيزميني ايتيرديگي اوچون، حياتدا قالما، ياشايا بيلمه اينستينکتي ايستر-ايسته مز بير چاره آراماغا باشلار. بو اوزدن ده يوخسول اؤلکه لر، يوخسول اينسانلار قورتاريجي بکله مک اوچون چوخ ياتقين پسيخولوگييايا صاحيبدَیَرلر. ايش حياتي، عاييله حياتي، سوسيال حياتي قايداسيندا اولان اينسانين بو خسته ليگه قاپيلماسي مومکون دئييلدير. اقلي، معنوي و ايقتيصادي باخيمدان يوخسول اولان بيرئيلرين و اؤلکه لرين حيات شکيللري نين تلقين ائتديگي خسته ليک دورومدور قورتاريجي بکله مه.  

                      يئري گلميشکن،  " مئهدي "  قاورامي نين نئجه اورتايا چيخديغي ايله باغلي تاريخي وئريلره باخاليم. شیعه يه گؤره، 11-جي ايمامين اوغلو اؤنجه  " غئیبتي سوغرا "  (کيچيک مودتلي غئیب)، داها سونرا  " غئیبتي کوبرا " يا (وزون زامانلي غئیب) چکيلميشدير. سوننيلر ده „مئهدي "  قاورامينا اينانارلار، آنجاق اونلارا گؤره، مئهدي دونيايا گليب غئیبه چکيلمه ميشدير، او دوغولاجاق. آنجاق  " آنتی آخوندوف "  مقاله سينده مئهديچيليگين شیعه واريانتي اله آلينديغي اوچون بو نؤوونه بير نظر سالاليم.  " 11-جي ايمام ساميره ده ياشاييردي. ساميره او زامان عسگري مرکز اولدوغو اوچون 11-جي ايماما هسن عسگري دئييرديلر. اونون 3 قارداشي و 1 باجيسي وار ايدي. „اييشه "  آدي نين صفويلر زامانيندا ياساقلانماسينا باخماياراق، اونون باجيسي نين آدي آييشه ايدي. اونون قارداشي نين بيري نين آدي جفر ايدي. او زامان شیعه اهلي ايمام هسن عسگري نين قارداشينا „جفر کززاب "   („يالانجي جفر " ) دئييرديلر، چونکو ايمام هسن عسگري اؤلدوکدن سونرا واريثيني بللي ائتمک اوچون اونون ائولادلاري حاققیندا آراشديرما گئديردي. بو آراشديرما اوچون آبباسي دؤولتي طرفيندن رسمي بير مجليس دوزنلنميشدي. بو مجليسده 11-جي ايمامين قارداشي جفر آللاهين بيرليگينه آند ايچدي کي، اونون قارداشي نين (يني 11-جي ايمامين) هئچ بير زامان ائولادي اولماميشدير. "  (باخ: شوجاددين شفا „پس از هئزارو چهارسد سال، س. 949.) گؤروندويو کيمي، عومومييتله „مئهدي "  آديندا بير چوجوغو اولماميشدير 11-جي ايمامين. سادجه ميفيک احتيياج اولماياني دا اولموش کيمي گؤسترميشدير. اؤزلليکله شيده „مئهدي "  قاورامي نين دوغوشوندا نسرددين توسي نين بؤيوک رولو اولموشدور. نسرددين توسي حتّی „مئهدي "  نين سون مکتوبونو  " ال- تيبيان "  آدلي کيتابيندا وئرميشدير. هم ده „مئهدي "  بو مکتوبو بير فارسا يازميشدير، عربه دئييل.  

          شیعه ليگين موختليف مذهبلرينده „مئهدي "  آنلاييشي دا فرقليدير. چونکو شیعه ليک بو گونه قدر ايثبات ائده بيلمه ميشدير کي، مثلن، ايمامليق نييه هسه نين سويوندان دئييل، هوسئي نين سويونداندير و يا ندن ايمام هوسئي نين اليکبر اوغلو طرفيندن دئييل، خسته اوغلو زئينلابيدين طرفيندن داوام ائتميشدير. بو گون يمن اؤلکه سي نين رسمي مذهبي اولان زئيدييه شيسي „مئهدي "  قاوراميني 12-جي ايمام تيمساليندا دئييل، 6-جي ايمام جفر ساديقين اوغلو اولان ایسماعیلين يئنيدن ديريله جگي تيمساليندا اينانجلاشديرميشدير. کوتله ذکاسيني ميفيک احتيياج دينلر اؤنجه سي باشقا جور يؤنلنديرميش، دين سونراسي ايسه يارانان ميفلرده دي نين ده تاثيري اولموشدور. بونو گئرچک کيمي گؤرمک آغلا ضيدير. فارس ميللييتچيليگي مرکزلي شیعه آنلاييشي صفويلر زامانيندا، حتّی ايمام هوسئي نين آرواديني دا فارس ائتدي. گويا زئينلابدين بير فارس قيزيندان دونيايا گلميشدير. یعنی  ساسانيلر چؤکدوکدن سونرا اؤزونو توپارلامايا باشلايان و ايسلامي کيمليکله يئنيدن صحنهيه چيخان فارسلارين رافيزي، شووبييه حرکتي ايله باشلاييب، ايسمايليلرله داوام ائدن فارس ميللييتچيليک ماجرالاري شاه ایسماعیل زامانيندا ايمپئراتورلوق ايدئولوگيياسي اولدو. بونلار ايسلامين زااتي ايله علاقه سي اولمايان اولايلارين تاريخيدير. 1501-جي ايلده شاه ایسماعیل تاج قويما مراسيمينده 12 جومله دن عيبارت بير متني „سوگندنامه "  (اندايچمه) اولاراق اوخوموشدور. گويا بو متن 12 ايمام آدينا 12 جومله دن اولوشموشدو. آنجاق بو متنده 12 ايمامچيليقدان دا هئچ بير اثر-علامت يوخدور. بو متن فارس ميللييتچيليگي نين فيردووسيدن باشلاييب ناسير خوسروولار طرفيندن داوام ائدن فارس تاريخ آنلاييشيندان باشقا بير شئي دئييلدير. بلليدير کي، 13-14 ياشيندا بير اوشاق (شاه ایسماعیل) فارس تاريخي حاققیندا بو قدر بيلگييه صاحيب اولا بيلمز ايدي. بلليدير کي، بو متني يازيب اونون الينه وئرميشلر کي، اوخوسون. گلين بو متنه نظر سالاليم:  " 1. من بو گون يئره ائنديم. 2. سرور و شاهنشاه منم. 3. امين اول کي، هئيدرين اوغلو منم. 4. منم فيرودون. 5. منم خوسروو. 6. منم جمشيد. 7. منم زههاک. 8. منم روسته مي-زال. 9. منم ايسکندر. 10. انل-حاق سيرري منيم باغريمدا گيزليدير. 11. چونکو منم موطلق حقیقت. 12. حقیقت منيم سونا چاتديرديغيم ايشلردير.„ (باخ: ائتتئلااتئ سياسي-ايقتيصادي، 1378-جي ايل، سايي 147-148، س. 23.) 

   او زامان شاه ایسماعیلين شئيخ هئيدرين اوغلو اولماماسي ايله باغلي گئنيش شاييه لر ياييلديغي اوچون شاه ایسماعیل سادجه شئيرلرينده تئز-تئز „هئيدر اوغلويام "  دئمه ميش، آندايچمه متنينه ده هئيدرين اوغلو اولدوغونو يئرلشديرميشدير.  

  يئري گلميشکن چالديران ساواشينا دا بورادا ايشاره ائتمک تام يئرينه دوشر. چالديران ساواشيندا شاه ایسماعیل قاليب اولسايدي، دونيادا بير تک آزاد تورک دؤولتي اولماياجاقدي. چونکو آوروپا اوردولاري بو ساواشين سونوجونو بکله ييردي. عوثمانلي نين مغلوب اولماسي حاليندا ايستانبولو، ترابزونو گئري آلماغي پلانلاميشديلار. یعنی  آنادولونون درينليکلرينه قدر اولاجاقدي ايران و ديگر تورپاقلاري دا آوروپاليلار گئري آلاجاقديلار. ذاتن شاه ایسماعیلا تئخنيک دستک وئرن آوروپاليلارين اساس حدفلري بو ايدي. بو سببله ده چالديراندا شاه ایسماعیلين مغلوب اولوب يئرينده اوتورماسي تورکلوگون يازقيسي باخيميندان خئييرلي اولموشدور.  

  „هئيدر جامال اؤز فلسفي داياقلارييلا شاه ایسماعیلي خاطيرلادير. "  اگر هئيدر جامال اؤز فلسفي داياناقلاري ايله شاه ایسماعیلي خاطيرلاديرسا، دئمک اونون فلسفه سي اينساني دئييلدير، اينسانليغا بير ياراري اولا بيلمز. چونکو شاه ایسماعیلچيليق قان، نيفرت، کين و قاتيلليک اوزرينده قورولموشدور. چونکو شاه ایسماعیلچيليغين ايسلامييتله ده ايلگيسي زيف اولموشدور. بللي سببلر اوزوندن شاه ایسماعیل قوزئي آذربايجاندا حدديندن آرتيق ايدئاليزه ائديلميشدير. باخاليم تاريخي قايناقلار اونون حاققیندا نه دئيير:  " 914-جو هيجري شمسي ايلينده شاه ایسماعیل باغدادي آلديقدان سونرا امر ائتدي کي، سوننيلرين زيارتگاهي اولان حنفی مذهبي نين قوروجوسو ابوهه نيفه نين مزاريني سؤکوب مزارين اوزرينده توالئت تيکسينلر. شیعه اهلي ابوهه نيفه نين مزاري اوزرينده ياپيلان توالئته گئتمه نين ذؤوقونو ياشاييردي. بو شئيري ابوهه نيفه نين مزاري اوستونده ياپيلان توالئتين قاپيسينا يازيب ياپيشديرديلار: 

  شیعه بر گور حنیفه رید و سنی سجده کرد 

  هست ریدشگاه شیعه سجده گاه سنیان. 

  (ابوحنيفه نين مزارينا شیعه سيچدي، سوننيلر بو پوخا سجده ائتديلر. شیعه نين سيچديغي يئر سونني نين عيبادتگاهي اولدو.) (باخ: اسناد و نامه هاي دوره صفوييه، گرداوري آ. ثابيتيان،ص. 99.) 

   گؤروندويو کيمي، صفوييت اخلاقسيزليغين، ادبسيزليگين و نيفرتين تيمسالي کيمي تاريخه گيرميشدير.  شاه ایسماعیلين قانلي ائيلملريندن ديگر اؤرنکلر:  " فريدالدين تفتاني هئراتين شافئي دين آدامي ايدي. 30 ايلدن آرتيق بو گؤروده ايدي. شاه ایسماعیلين امري اوزرينه اونو شهرين مرکزينده اؤنجه اؤلدوروب سونرا داردان آسديلار. داها سونرا دا جسه ديني يانديرديلار. (باخ: نقل از نسخه خطی کتابخانه ملک در کتاب تصیع و سیاست در ایران، نوشته بهرام چوبک دوسلدرف، جلد 2، ص 35.)  

  شاه ایسماعیلين لبناندان گتيرديکلري شیعه "عاليم"لري بو شکيلده فتوا وئرديلر: " بير سوننيني اؤلدورمه نين 5 کافيري اؤلدورمک قدر ثاوابي وار. سونني ايله ائولنمک هارامدير. سوننيلرين قانلاري، ماللاري و ناموسلاري حالالدير. اونلاري کؤله کيمي ده ساتماق موباحدير. حاميله  سونني قادينلارين قارنيني سؤکوب قارنينداکي بالاسيني دا اؤلدورمه نين ايمتييازلاري وار. چونکو اونلار ايسلامين ديشيندادَیَرلار. "  (باخ:  "سليمنامه" ،سولطان سليمين رسمي تاريخچيسي.) 

  بو تاريخي بلگه لردن بير باشقاسي: صفوي دؤنه مي نين ان مؤعتبر قايناقلاريندان بيري "احسن التواريخ"  کيتابيدير. بو کيتابدا يازيلير: "قيزيلباشلار شيرواندا مينلرجه اينساني قتل ائتديلر. مورشودلري شاه ایسماعیلين امري اوزرينه کسيلميش باشلاردان ميناره دوزلتديلر. حاميله  قادينلارين قارنيني سؤکوب چوجوقلاريني دا قتل ائتديلر. آنجاق يئنه ده مورشيدي کاميلين نيفرتي سؤنمک بيلمه دي و سولطان يقوبون مزاري نين سؤکولمه سينه امر وئردي. شيروانليلارين ناموسلاريني قيزيلباشلارا حالال ائتدي. بير سؤزله مورشيدي کاميل ديريلري مزارا گؤمدو، مزارداکيلاريين سوموکلريني سؤکوب چيخاردي. "  و شاه ایسماعیل بوتون بو جينايتلري غئیبه چکيلميش  " مئهدي "  نين امرلري اوزرينه ائتديگيني ايديعا ائديردي. اؤزونو  " مئهدي "  نين کسرلي قيلينجي ساييردي. هوروفيلردن گلن بير اينانيش اساسيندا  " مئهدي "  نين اونون روحونا حيلول ائتديگيني (گيرديگيني) و اونو يؤنلنديرديگيني ايديعا ائديردي. یعنی  بوتون بو قاتيلليکلرين آرخاسيندا دوران  " مئهدي "  اينانيشي ايدي.  

  شاه ایسماعیلين ديگر بير جينايتي : " اؤزبکلر مغلوب ائديلديکدن سونرا قيزيلباشلار سولطان شئيبکين جسديني جنازه لرين ايچيندن تاپديلار. باشيني کسيب، دريسيني سويدولار. باشي نين دريسينه سامان تپه رک سولطان سليمه گؤندرديلر. باشي نين سوموکلري ايله ده شراب پيياله سي دوزلتديلر کي، شاه ایسماعیل اؤز ساراييندا بو پيياله ايله شراب ايچسين. آيريجا، شاه ایسماعیلين بويوروغو اوزرينه سولطان شئيبکين جسدي نين ال-آياقلاريني دا کسديلر. سونرا دا کسيلميش ال-آياقلاري سولطان شئيبکه قارشي ساواشماغي قبول ائتمه ين مازانداران سولطاني روستمه گؤندرديلر."  (باخ: احسن التواريخ، ص. 84.)   "شاه ایسماعیل دئدي: " هر کس مني مورشيدي-کاميل اولاراق قبول ائديرسه، بو دوشمنين اتيني يئسين. "  بو حاديثه يه شاهيد اولان خواجه ماحمود ساغرجي يازير کي، شاه ایسماعیلين بو امريندن سونرا سوفيلر جنازه نين اتيني يئمه يه باشلاديلار. حتّی اؤلونون اتيني يئمک اوچون بير-بيرينه قيلينج چکديلر. لئشخورلار کيمي، جنازه ني يئمک اوچون هر کس بير طرفه دارتيردي. "  (عئيني قايناق، ص. 85.) 

  بو کيمي اؤرنکلري داها دا سايماق مومکوندور، آنجاق بو قدرييله ده يئتر. یعنی   " مئهدي "  بکله مه نين شاه ایسماعیل، خومئيني کيمي جاناوارلارين زوهورونا شرايت ياراتماسيني بو شکيلده گؤرموش اولوروق. بؤيله بير دورومو مودئرنيته نين روحو ايله نئجه علاقه لنديرمک اولار؟ ذاتن مودئرنيته بو فلاکتلري اورتادان قالديرماق و اينسانا اينانج، ويجدان اؤزگورلوکلري تانيماق اوچون مئيدانا گلميشدير. محمد هادي نين بو قورخونج تاريخي تاريخه گؤموب، مودئرن دونيايا کئچيش اوچون يازديغي بير نئچه ميصراعسيني وئرمک يئرينه دوشر: 

   " بو آدم اوغلو قاتيلدير، ايشي حرب ايله قاندير هپ 

  ازل گوندن بري تورپاق پريشان بير جاهاندير هپ 

  بشر تاريخي قانلي سرگوزشتي آدمييتدير 

  بشر تاريخي دهشتدير، بشر تاريخي وحشتدير. "  

  گؤرون  " آنتی آخوندوف "  مقاله سي يازاري نين شعورآلتيندا نئجه قانلي ايستکلر دورماقدادير. تامامييلا بير آز اؤنجه تاريخدن اؤرنکلريني وئرديگيميز کيمي:  " آخوندوف کيمي معاريفچيلرين اوزريندن آدلاييب يئنيدن خالقيميزي قانلي فلسفي دؤيوشلره دعوت ائدير. "  یعنی  م.ف. آخوندوف گؤروشونه قارشي سونوندا قيلينجلاريني چکيرلر. ديالوق و تولئرانسا ايمکان يوخدور، اولا بيلمز، چونکو  " مئهدي " ني موطلق حاقلي و تانري ايراده سيني اويقولايان فاکتور کيمي گؤره نين تولئرانسي اولماز، چونکو او آرتيق اؤزونو موطلق حاقلي اولاراق گؤرور. وولتئر تولئرانس قاورامي نين 3 اونسورو اولدوغونو ساوونار: 1.  " من "  موطلق حاقلي دئييلم. 2.  " سن "  موطلق حاقسيز دئييلسن. 3.  " من "  و  " سن "  آراسينداکي آنلاشيلمازليق ساواشلا دئييل، موزاکيره و ديالوقلا چؤزولمه ليدير. آنجاق  " مئهديليک "  اؤز لئقالليغيني تانري قايناقلي اولاراق بيلديگي اوچون، يالنيز جيهاد و ساواشلا سورونو چؤزمک ايستر. بو ايستيقامتده ده اؤز منطيقيني بو شکيلده اورتايا قويار:  " اؤلدورسن قاضيسن (قهرمانسان)، اؤلسن شهيد! "  بو سلوقاندا هئچ بير ترققييه، هئچ بير خوشگؤرويه يئر اولا بيلمز. بو جيهاد شوعاعري، يالنيز قان و قاتيلليک دوغورار. بو آنلاييش ايچينده اينسان حاقلارينا يئر اولا بيلمز. بورادا موجاهيدلري  " عاشيق " لر اولاراق آدلانديرما ايسه اسکيميش و خومئينيزمين فتوالاريندان باشقا بير شئي دئييلدير. بو بير خسته ليک حاليدير. بو خسته ليگي درينلشديرن بو گؤروشون نوميناليزمي سرت قاوراملار اورتميشدير.  

            " آنتی آخوندوف "  يازيسيندا کئچن  " تاغوت "  قاورامي نه دئمکدير؟ بو آنلاييش هر هانسي بير حاديثه يه فاناتيزمين منطيقي ايله ياناشماقدان باشقا بير شئي دئييلدير.  " تاغوت "  یعنی  ايسلامدان چيخميش، یعنی  ايسلاما قارشي  " ياغي "  اولموش. بو سببدن ده اونون محو اولماسي واجيبدير. بونون دا آدينا اينقيلاب دئييلير. ايشته دايما اينقيلاب، دايما ساواش دئمک، یعنی  کيمينسه ايسلام آنلاييشي نين ديگرلريني تاغوت قبول ائديب محو ائتمه سي کيمي اورتايا چيخير. مثلن، شاه رئژيميني خومئيني  " تاغوت "  اولاراق تانيملاييردي.  " اؤلوم عاشيقلري "  اولاراق تانيملانان موجاهيدلر اصلینده اؤز اؤلوملرينه دئييل، اؤلدورمه يه عاشيق اولموشلار. هم خومئيني،  هم ده سددام 8 ايل بو شوعاعر آدي آلتيندا اورتادا معصوم گنجلري اؤلومه وئرديلر. فلسفه سي ياشاماق و ياشاتماق دئييل، اؤلمک و اؤلدورمک اولان بير ذهنييت هئچ بير زامان اينساني اولا بيلمز. مدنييت اؤلوم دويغولاريني دئييل، حيات دويغولاريني چاغريشديرار. انور ساداتي دا ائله بو  " تاغوتچولوق "  فلسفه سي اساسيندا تئررور ائتديلر. داها سونرا زامان گؤستردي کي، ايسرايل-عرب ايليشکيلرينده انور ساداتين پوليتيکاسي داها دوغرو ايميش.  " کمپدئيويد "  آنلاشماسي ايمضالانماسا ايدي، ميسير دؤولتچيليگي تهکلوکه آلتينا گيريردي و هئچ سينانماميش بومبالار ميسيره آتيلا بيلردي.  

           هئيدر جامالين اؤلکه  ايدارئتمه اوسولونا يئني چالارلار گتيرديگي ايديعا ائديلير. اصلینده اينسان داها اسکيدن وار اولاني بيلمه ديگي زامان اونو ايلک دفعه  دويدوغوندا يئني اولدوغونو هيسس ائدر.  " مئهدي "  مرکزلي پوليتيک آنلاييش ايسلام تاريخينده بير چوخ کره دئننميشدير. هر دفعه سينده ده قان، جلادليق، قاتيلليک و فلاکت اورتايا چيخميشدير. بورادا خوييي اسر آيدينلانما حرکتي نين اؤندرلريندن بيري اولان وولتئرين بو دوشونجه سيني وئرمک يئرينه دوشر. وولتئر دئيير:  " بلکه دينده بعضي ياخشي و موثبت جهتلر ده اولا بيلر. آنجاق عاغلي اولان بيري نين تميز آدام اولماسي اوچون دينه احتيياجي يوخدور. تاريخ بويونجا دين توپلوملاري ايستيثمار ائتمک، اونلاري يانليش يولا سوروکله مک اوچون واسيطه اولموشدور. دين سايه سينده دين خاديملري و شاهلار دايما میللتلري سؤمورموشلر. "  (باخ: ويل دورانت،  " مدنييت تاريخي خي کيتاب، وولتئر چاغي، س. 794، فارسجا ترجومه سي.) تاريخي تجروبه لرين ده گؤسترديگي اوزره سوبيئکتيو (زئهني) و اوبيئکتيو (سوسيال) پلاندا سئکولاريزاسيون اينسانا راحاتليق، باريش و ترققي گتيرميشدير. دي نين اينسانين پوليتيک و سوسيال حياتيندان ديشلانماسي دونياني ياشانيلير حالا گتيرميشدير.  " ايسلام جومهورييتي "  کيمي پوليتيک آنلاييش دونيادا بوتون اينسانلارين دئييل، يالنيز موسلمانلارين ياشاماق حاقلاري نين اولدوغونو تاريخ بويو و ان سون دا ايران، طاليبان افقانيستاني، سودويه عربيستان و ديگر ايسلام اؤلکه لري تيمساليندا ايثبات ائتميشدير. ايسلام جومهورييتي بير سياسي تئوري و داورانيش شکلي اولاراق اينسان حاقلاريني دئييل، ايسلام حاقلاريني تانييار. ايلک 4 خليفه زامانيندا بئله، موسلمان اولمايانلار داها چوخ وئرگي اؤديه رک موسلمان اولمامانين جزاسيني اؤده ييرديلر. حتّی ايي خليفه اؤمر محض بو سببدن موسلمان اولمايان ابولولو طرفيندن تئررور ائديلدي. یعنی  بو زئنييته گؤره، موسلمان اولماماق سوچ ساييلميشدير. اينسان نه قدر گئري قالميش اولماليدير کي،  " ايسلامين ديشيندا ياخشيليق، گؤزلليک، اينسانليق و عدالت يوخدور "  ايدئياسينا اينانسين. ايسلام دونياسي بير تک ماهاتما قاندي کيمي بوتون اينانجلارا سايقيلي اولان ليدئر يئتيشديره بيلمه دي. قاندي ايسه موسلمان دئييلدي. گئرچکليک ايسه گؤسترير کي، اينسان حاقلاري، عدالت، قادين حاقلاري، حقوق آنلاييشي يالنيز موسلمان اؤلکه لرده يوخدور، موسلمان اؤلکه لرين ديشيندا عدالت و ترققي وار. حتّی ايسلام اؤلکه لرينده اعدامدان، ظولمدن، عدالتسيزليکدن قاچان اينسانلارا دا مودئرن مدنييت صاحيب چيخير. چونکو  " آنتی آخوندوف "  مقاله سي يازاري نين آنلاتديغي نين تام ترسينه اولاراق دين مرکزلي پوليتيکانين مودئرنيته ايله بير علاقه سي يوخدور و  " مئهدي "  بکله مه نين کسينليکله مودئرنيته قارشيتي بير گئريجيليک اولدوغو اورتادادير.   

   " آنتی آخوندوف "  يازيسيندا وئريلن بيلگيلره گؤره، اصلینده هئيدر جامال هئچ ده يئني بير شئي سؤيلمير، ايسلام اؤلکه لري نين باشينا درد اولان، گليشمه لريني انگلله ين، اونلاري ايسلام اورتا چاغيندا ساخلايان دين مرکزلي سياسي فاناتيزمي يئني مئتودلا آنلاتماق ايسته ميشدير. بورادا يئني اولاراق گؤرونن اونون غربدن آلديغي آنلاتما مئتودودور، مضمون يئني دئييلدير. 

  سون سؤز 

  جهالتله آمانسيزجا ساواشان آلمان فيلوسوف نيچه دئيير:  " ائي اينسانلار، من سيزين يولونوزدا دوران ان بؤيوک انگه لي اورتادان قالديرديم. آللاهين اؤلدويو خبريني سيزه چاتديريرام. آللاه اؤلدو! آرتيق راحات ياشايا بيلر، بؤيوک حدفلرين آرخاسينجا جسارتله گئده بيلرسينيز. سيزين حرکتينيزي انگلليه جک هئچ بير شئي قالمادي. "  

  نيجه بو مئساژيني ايسلام شرقينه بو شکيلده چاتديرماق اولار:  " ائي موسلمانلار، بيلميش اولون کي، "مئهدي" گلميه جک. او بير ناغیل ايدي. بو ناغیلین عؤمرو سونا چاتميشدير. آرتيق مئهديدن يارديم و قورتولوش اوميديني بکله مه يين. اؤز ايشلرينيزي اؤز عاغلينيزلا ائدين. مئهدي هئچ بير زامان گلميه جکدير. مئهدي انگلي آرتيق قارشينيزدان گؤتورولموشدور. اوزاق دييارلارا سفر ائدين! پلانئتلره یوکسلين! علمله اوغراشين! چونکو مئهدي گلميه جک. او هئچ اووَلدن ده يوخ ايدي. سيزين جهالتينيز اونو وار ائتميشدي. آيدينليقلار سيزي بکله يير. "  

  07.04.08  

   

 



* Quzey Azərbaycanda baş qaldıran dini fanatizm Azərbaycan tarixində sekular aydınları hədəf almağa başlamışdır. Bakıda Alma qəzetinin keçən sayında “Anti Axundov” adlı bir yazı yayınlanmışdır: http://almaqezeti.com/?mod=view&id=2686. Azərbaycan düşüncə həyatında bu kimi baxışların önəmi dolayısıyla bu mözuyla ilgili dəyərələndirməmi oxucuların hüzurlarına təqdim edirəm.