اولو تانرينين آدييلا

 

آذربايجان منفي موباريزه ائدير!

 

غئيرتلي و شرفلي آذربايجان ميلتي؛

بيلديگينيز كيمي 90 ايل بويو فارس شونيسمي حاكميتلر قاليبينده و ياخود حاكميت ايمكانلاريندان يارارلاناراق، آذربايجان ميلتينين كيمليگيني و وارليغيني هدهلهييب، اكونوميك وارليقلاريميزلا برابر كولتورل وارليغيميزي آرادان آپاريب، چاپماغا جان آتيبدير.

آذربايجان ميلتي ايللر بويو بو ايرگنج و چيركين سياستلره قارشي موباريزه آپارسادا، بو ايرگنج سياستلر چئشيدلي شكيللرده داوام تاپميشدير. سون گونلر بو سياستلردن بسلهنن دوشونجهلر، ايران گوندهليگينين توهين ائتديريجي كاريكاتوري شكيلده ائشيگه چيخميش، آذربايجان ميلتيني داها جيدي شكيلده صحنهده اولوب، گئنيش آكسيا كئچيرمهيه ماراقلانديردي. تأسفله بو آكسيالار ييرتيجي شكيلده قارشيلانديلار و اونلارجا آذربايجان بالاسي قانا بلهشيب، يوزلرجهده دوستاقلارا آتيلديلار. بو بير حالدا اولدوكي حاكميت و ايراني فارس كيمليگي اساسدا دوشونن فيكير و قلم صاحيبلري، مجليس وكيللري، پارتيالار، سياستچيلر و ... گؤزلري ايله قولاقلاريني آذربايجان ميلتينين ايستكلريني گؤروب ائشيتمهيه يوموب، بو آكسياني بير كاريكاتورا قارشي اولان آكسيا سطحينه يئنديرمهيه چاليشديلار.

بيز آذربايجانلي بيلييوردلولار توپلومو اولاراق هميشهكي كيمي اؤز ميلتيميزله برابر بو آكسيالاردا ايشتيراك ائديب، اونلارجا تشكيلاتداشيميزي دوستاقلاردا گؤردوك. آنجاق سياست عالمينده شور ايله شعوردان برابر يارارلانماغي دوشونهرك، بو گوندن بري منفي موباريزه آپارماغي شوونيسم قاباغيندا كسرلي بير تاكتيك بيليب، اؤزوموزو بو موباريزهيه باغلي بيلهرك، بوتون فيكيرداشلاريمزي بو موباريزهده ايشتيراك ائتمهيه چاغيريريق.

 

منفي موباريزه باشليقلاري:

1- بو گوندن بري آذربايجان اؤيرنجيلري، محصللري، اؤيرتمنلري و اوستادلاري آذربايجان منطقهسينده تشكيل تاپان كيلاسلاردا توركجه دانيشب، اؤيرتيم ياپاجاقلار.

2- بو گوندن بري آذربايجان توركجهسي رسمي بير ديل اولاراق اوخوللاردا اوخونانادك، مهر آيينين ايلك گونونده - ايراندا اوخوللارين آچيليش گونو اولاراق بوتون آذربايجان سئون اؤيرنجيلر، محصللر، اؤيرتمنلر و اوستادلار درس كيلاسلاريندا اعتراض اولاراق ايشتيراك ائتمهيهجكلر.

3- هر بير اينسانين اؤز آناديلينده آدي اولماق دوغال و اينساني حاق ساييلير. بو اساسدا، بوندان بري اؤز آنا ديليميزده ائولادلاريميزا آد قويما ايمكاني وئريلمه، اوشاقلاريميزا سيجيلي آلماييب و گوجلو شكيلده ثبت سازمانينا قارشي شكايت و اعتراض ائدهجهييك.

4- اؤز ميلي موسيقيميزي ديرچتمك اوچون، بو گوندن بري ائولريمزده، اوتوموبيللريميزده و تويلاريميزدا يابانچي موسيقيلرين چالينماسينا و اوخودولماسينا ايذن وئرمييهجهييك. ائله بو اساسدا يابانچي موسيقي چالينان مكانلاردا اولورساق، احتراملا اعتراض ائديب، يابانچي موسيقي كسيلمهديگي حالدا، اوراني ترك ائدهجهييك.

5- آنا ديليميزده چيخان كيتابلاردان حيمايه اوچون، آذر آيي نين 26 سي، آذربايجان كيتاب گونونو عزيز ساييب، آنا ديليميزده چاپ اولموش ان آزي بير كيتابي آليب، ايتحاف ائدهجهييك.

 

آذربايجانلي بيلييوردلولار توپلومو

16/3/1383