آذربایجان فدرال دموکرات حرکاتی نین بیلدیریسی

 

بیر مهر تحصیل ایلی نین باشلاماسی موناسیبتییله

 

 

بیزیم اؤلکه میزده آموزش و پرورش دستگاهی ان بؤیوک ایجتیماعی قورولوشدور. بو ایل بیر میلیون اوچ یوز دؤرد یوز ه یاخین بیریمینجی کیلاس شاگیردی درس کیلاسلاریندا حاضیر اولاجاقلار و شاگیردلرین ساییسی گئچن ایللرین آمارینا گؤره بو ایل 14 و 15 میلیونون آراسیندادیر.

تخمین ائدیلر کی بو شاگیردلرین 65% فارس دیللی دئییل.

ایرانین آموزش پرورشینین بیر میلیون یوز مین نفر کارمندی و معلیمی وار.

اگر درسی کیتابلارین چاپ ایشلری یله و یازی وسایلی یله مشقول اولان و گئچیملری آموزش پرورش دستگاهینا باغلی اولان مؤسسه لرده و صنایعلرده کی ایشله ینلری ده نظرده آلیرساق ایراندا آموزش پرورشین نقشی و اؤنمی اورتایا چیخار.

ایراندا ایقتیصادین هیچ بیر شوعبه سی یوخدور کی بو حدده آغیرلیغی و ایجتیماعی گوجو اولسون. و هیچ بیر ایجتیماعی حوزه یوخدور کی اوندا حاکیم نیظامین ایرقچیلیغی و ایرتیجاعی لیغی بئله قاباریق اولسون.

ایرقچی دوشونجه لر و عمللر آموزش پرورش دستگاهینا موسلطدیر. بو دستگاه غئیری فارس میللتلری او جومله دن و اؤزللیکله ایراندا یاشایان تورکلری آسیمیله ائتمکده و کیملیکلرینی محو ائتمکده ده اساسی نقش اویناییر. ایسلام جومهوریسی نین ایرقچی و ایرتیجاعی آموزش پرورشی نه فیشار گتیرمک وایفشا ائتمک آذربایجان میللی دموکراتیک حرکتی نین فعاللارینین واز گئچیلمز وظیفه لریندندیر.

 

حاکیم ایرقچی و آپارتاید نیظاملا موباریزه ائتمک اوچون ثوباتلی، ایصرارلی، دواملی و ایبتیکارلی اولماق گرکیر. مهر آینینی بیری آنا دیلینده تعلیم تربیه ایسته گی نی مطرح ائتمک اوچون ان اویقون گوندور. آنا دیلینده تعلیم تربیه گؤرمه حقی اؤنملی اینسان حقلریندندیر. و ایرانداکی غئیری فارس میللتلری اوچون وطنداشلیق حقی ساییلیر.

 

سیویل ایطاعتسیزلیقدان گنیش و یارادیجی شکیلده ایستیفاده ائتمک اؤنملیدیر.آنا دیلینده تعلیم تربیه ایران خلقی نین چوخونلوغونون مسئله سی اولدوغو کیمین، تورک دیلی و هوویتی ده ایران تورکلری نین هامیسینین مسئله سی دیر. بو اوزدن بو نون موشترک بیر ایستک اولدوغونو قاباریق ائتمک اوچون او ایبتیکارلاری ایشلتمه لییک کی مومکون اولدوغو قدر گنیش خلق کوتله سی اوندا شیرکت ائده بیلسین. باشقا طرفدن ده بو تشبوثلر ائتکیله ییجی اولمالی و ایسلام جومهوریسینه گرکن فیشاری گتیریب و بین الخلق اورگانلارینین و افکاری عومومی نین دیققتی نی اؤزونه چکمه لیدیر.

 

 

آذربایجان میللی دموکراتیک حرکتی نین تشکیلاتلاری و فعاللاری بو قونودا چوخ چئشیدلی ودیرلی ایبتیکارلارگؤسترمیشلر. بیر مهرده درس کیلاسلارینا گیتمه مک و اؤز دیلینده مدرسه اولمالیدیر هرکسه شوعارلاری بونلاریم اؤرنکلریدیر. 

 

يئری گلميشکن ايران خلقی‌نين ديل چئشيدلی‌ليگينه و ميلی نظردن چوخ ميلتلی‌ليگينه اينان بوتون فارس ديللی ضيياليلاردان طلب ائدیریک کی مدرسه‌لرين آچيليشی موناسبتی ايله ، آنا ديللری فارسجا اولمايان ميلتلرين ديللرينين رسمی تانينماسی ايستگينی و آنا ديلينده تحصيل آلماق حقينی، عملده- واقعی صورتده مودافيعه ائتسينلر!

 

اينديکی زامانداآنا ديلينده تحصيل آلماق، بوتون اينسان حقلری موقاويله‌لرينين وورغولاديغی طبيعی بير مسئله دير و  دونيا اؤلکه‌لرينين چوخوندا آناديلينده تحصيل آلمانين رسمی اولاراق تانينماسی ديققته لاييقدير. آنجاق ٢١-جی يوزايلين باشلانقيجيندا، ایران ، اوشاقلارين آناديلينده تحصيل آلماسينی رسمی تانيماماقدا، قارا بير اؤرنک کيمی گؤزه چارپماقدادير. حالبوکی، فارس ديلی ايرانلی اوشاقلارين چوخونلوغونون، يانی يوزده آلتميش بئشی(%٦۵) نين آنا ديلی‌ دئييلدير.

 

ایسلام جومهوریسی غئیری فارس میللتلرین آنا دیللرینده تعلیم تربیه آلما ایستکلرینه بویون قویوب و فارس ایرقچی و شوونیستی سیاستلریندن واز گئچمه لیدیر. ایران ایسلام جومهورییتی نین اریتمه و غئیری فارس دیللرینی یوخ ائتمه چابالاری نین گله جگی اولماییب، فارس و غئیری فارس میللتلری نین آراسیندا میللی نیفرتی قازانماقدان باشقا سونوجو اولمایاجاقدیر

 

آذربایجان فدرال دموکرات حرکاتی بوتون ضیالی محفیللری، دانیشجویی فعاللاری، اؤیرنجی لری و سیاسی گوروهلار ی ایراندا تورک دیلی نین رسمی لشمه سی و تعلیم تربیه نین آنا دیلینده اولماسی اوچون ایش بیرلیگینه چاغیریر. آذربایجان فدرال دموکرات حرکاتی اؤز نوبه سینده یوخاریدا ساییلان هدفلره یؤنه لیک آذربایجانین باشقا محفیللر، گوروهلار،جمعیتلر و شخصیتلر ایله همکارلیقا حاضیردیر. 

 

 

آذربايجان فدرال- دموکرات حرکاتی، ايرانداکی  ميلی مساله‌نی تمامأ سياسی بير مساله کيمی تانييير! بو مساله‌نين تملدن حل ائديلمه‌سی، ايراندا دؤولت ايقتيدارينين ائتنیک و فدرال دؤولت بيچيمينده اولوشماسی، ميلی مجليسلرين و او جومله‌دن آذربايجانين ميلی مجليسی‌نين قورولماسيندان آسيليدير.

 

18 سپتامبر 2010

آذربایجان فدرال دمکرات حرکاتی ایجرائیه هیئتی

25 شهریور 1389