بابک قالاسيندان بابک خرم‌دين چيخيش ائدير

 

 

قان تانريسي بابک!

 

 

 

 

بو قالا داشلي قالا

چينقيللي داشلي قالا

قورخورام گلمه‌يه‌سن

گوًزلريم ياشلي قالا

 

٭٭٭٭٭

 

يولونا گوًي سره‌جم يئر ساوالانلانسادا گل

يورو صوبحون باجيسي، دان يولو قانلانسادا گل

ائن منه داغ دوًشويم گيزليجه‌دير چشمه‌لي‌ييم

قورخما چرشنبه‌لي قيز، داغ دولو قافلانسادا گل

٭٭٭٭٭

(بير دايان زيروه‌يه ديز قوي گليرم

سانماکي خسته‌يم ايز قوي گليرم

بير چاناق سوًزده دنيز قوي گليرم

بير دوًيوش مئيداني چن ساخلا منه

٭٭٭٭٭

اوجاليقلاردا ايزين وار دييه‌رک

چيخارام داغلارا يار-يار دييه‌رک

گليره‌م قوربت ائوين دار دييه‌رک

وطن عونوانلي کفن ساخلا منه)

٭٭٭٭٭

 

گليره‌م قاندا قالان قلبيمي غمدن آلاسان گليرم من قوتارام سنده فقط سن قالاسان

ساز کيمي تئللريمين ماهني‌سي ميضراب ديله‌يير نولا گيزلين آلاسان قوينونا گيزلين چالاسان

٭٭٭٭٭

قانلي باخيشيندا جاناوار قورسادا گرده‌ک

ايتلر يورودو گوًزلرينين سيررينه بابک

دوًنمزدي داها نيسگيله جمهور قالاجيقلار ائل بير کلاشينکوف اله آلسايدي سنين تک

گوًزلرده موغوللار چاپا چاپ آت يورودورلر اللرده‌سه بارماقلاري هوًرمکده هوًرومچک

يوخ! بيز جاناواردان توًره‌ديک ائنمه اوجال داغ سنده يولاجاق بوز قاريلار ساپ‌ساري بيرچک

نسلين قيليجين سندن آليب قيندا چوروتدو ايندي‌سه او قيندان جوجره‌ن توپلارا باش چک

پارتلات قالاني داشلارا سيلديرلار سيغما قان تانريسي، قان تانريسي، قان تانريسي بابک

٭٭٭٭٭

 

آه اي وطن سنه سندن اوًج آلماغا

بابک بابام بيله‌ييندنن گوج آلماغا

تورپاق دئييب گوًيه دارنان اوجالماغا

مظلوم ديليم قده‌ر داريخمادايام

تورپاقدا سيغمايان اسکي حدودوما

کوفرومله دوغمالاشان قان قنوتوما

فرياد دوشرگه‌سي موبهم سکوتوما

چنلي بئليم قده‌ر داريخمادايام

٭٭٭٭٭

بابک اوًلوبدورسه‌ده

هله تبريز اوًلمه‌ييب

او گوًزلريله دوًيوشور

و تورپاغيميزدا قان حيماسه‌سينين سونو يوخدور

هله هاراسي‌دير

بيز اوًلسک‌ده مزارلاريميز دوًيوشه‌جک

٭٭٭٭٭

دوغرانير هله‌ده قولو بابکين

شيکسته آغلايير اونا قاراباغ

چتين‌دير سئوگيلي، چتين‌دير چتين

داها آذربايجان کيشي‌سي اولماق ...

٭٭٭٭٭

 

ٱه جمهوريتي‌دير آيسيز اولدوز سوز،

داغ مدينه‌يه چئوريلميش مئشه مکه‌يه

کوًشنين بزه‌يي بايراغيميزدير

لبيک آللاهيم لک لبيک

فيکريميزده بوتووله‌شن توران اولسون

اليميزده قيلينج اولسون قوران اولسون

اوًنوموزده بوز قوردلاري دوران اولسون

لبيک آللاهيم لک لبيک

٭٭٭٭٭

 

شهيدلرين، قاچقين‌لارين اوستوموزده مين آهي وار

چاتديغيميز بو نقطه‌ده هاميميزين گوناهي وار

٭٭٭٭٭

جمهور قالاسي‌دير چنلي دومانلي ساز هوًنکوردوکجه آشيق آغلايير

بابکين بوينوندا افشين قاندالي آزادليق جان وئرير آزادليق جايير

٭٭٭٭٭

 

بو قالا داشلي قالا چينقيللي داشلي قالا

قورخورام گلمه‌يه‌سن گوًزلريم ياشلي قالا

٭٭٭٭٭

 

آغ دوه دوزده قالدي يوکو تبريزده قالدي

تويوم بو تايدا اولدو ياريم او اوزده قالدي

٭٭٭٭٭

 

بيز تاريخين خالچاسيندا تورک آدييلا توخونموشوق

٭٭٭٭٭

 

جاني جانان ديله‌ميش وئرمه‌مک اولماز اي دل

نه نزاع ائيله‌يه‌ليم اول نه سنيندير نه منيم

٭٭٭٭٭

بو يالتاقلار دئييب‌لر

سنه ديليم شکردير

توپور يئره او ديلي، شکر دئييل زهردير

٭٭٭٭٭

آذربايجان ماياسي نور قاياسي نورکي هر داشيندان آلوو ديللي اوخ اولا بيلر

آذربايجان دئييلنده آياغا دورکي فيزولي‌نين اوره‌يينه توخونا بيلر

٭٭٭٭٭

 

دئديلر يارسالار اينسانلاري آللاه بيته‌جک هر کيمي شاققالاديم شانسيما شئيطان چيخدي

٭٭٭٭٭

اوچ کلمه‌دير وارليغيمي بيلديره‌ن بير وطنيم، بير منليگيم، بير ديليم

٭٭٭٭٭

آنا کلمه‌سيله معنايا دولار آنا وطنيميز آنا ديليميز

دوغروسو آناسيز ياشاماق اولار ياشاماق چتيندير ديلسيز وطن‌سيز

٭٭٭٭٭

 

بير سوًزوم وار دئييم سورا اولدورون تئز چکين سيز مني دارا اوًلدورون

وئرين بو خالقيمين اوًز آزادليغين مني، جهنمه-گورا اوًلدورون

٭٭٭٭٭

 

بير رنگي يوخ گوًيلرين مين رنگيني سئويرم بير گولو يوخ گوللرين چلنگيني سئويره‌م

من چيخماغا تپه يوخ اوجا داغ ايسته‌ييرم حياتي حيات کيمي ياشاماق ايسته‌ييرم

٭٭٭٭٭

سازلانديق ايکيميز، ساز، بيره‌ر-بيره‌ر گوًيلردن ال اومدوق هئي دئديک گلر

گئري‌يه دوًنمه‌دي اوزانلي گونلر گلمه‌دين آي دده‌‌م يئنه گلمه‌دين

٭٭٭٭٭

او گئجه، او يارغان، او ائنيش او ديک او گئجه اوچوروم او گئجه گديک

ميليون ايل سووشدو آمما بيلمه‌ديک گتيره بيلمه‌ديک يوخسا گلمه‌دين

٭٭٭٭٭

 

يولونا گوًي سره‌جم يئر ساوالانلانسادا گل

يورو صوبحون باجيسي، دان يولو قانلانسادا گل

٭٭٭٭٭

 

بو قالا داشلي قالا چينقيللي داشلي قالا

قورخورام گلمه‌يه‌سن گوًزلريم ياشلي قالا

٭٭٭٭٭

 

جمهور قالاسينين هوندورلوگونده دده‌ميز بابکين روحو دايانميش

اوغوزون، تئيمورون، خانين اوًنونده اوجاليق، افتخار، گوًيه قالانميش

٭٭٭٭٭

بويون ايمک هله اوًيرنمه‌ميشم داغ باشيندان يئره هئچ انمه‌ميشم

دردلي اللرده ساز اولسام‌دا يئنه تکجه غم چالماغا کوًکله‌نمه‌ميشم

٭٭٭٭٭

 

من وطن درديله کوًنلوم داغيني قاف ائتميشم بير ياشيل يارپاقدير عوًمروم عشقه ايتحاف ائتميشم

٭٭٭٭٭

اصيل دوست يولوندا ايکي قات اييل بيزيم دوست ايتيرمک واختيميز دئييل

٭٭٭٭٭

قيشين سويوغوندا يئتيم اوشاغين ائوينده آلوولو بير کوًز اولايديم

وطنه ده‌يرسيز اوغول يئرينه سارا تک غئيرتلي بير قيز اولايديم

٭٭٭٭٭

دالبادال دانيشير باباميز بابک قيلينجا سوًيکه‌نيب ساغدا کوراوغلو

بايراق اللرينده دايانيب بئيره‌ک دومروله جان دئيير حيدر عموغلو

٭٭٭٭٭

دانيشير-دانيشير آغلايير بابک تاريخ يارالارين باغلايير بابک

٭٭٭٭٭

 

آه... اي ... دده قورقود عليه‌السلام گوًره‌سن،

هاچاغ آللاه آذربايجانا گله‌جک

 

٭٭٭٭٭

بيزکي گله‌جگه اومود ساريدان دونيانين ان وارلي آداملاري‌ييق

٭٭٭٭٭

من ياخشي بيليره‌م قاچقينليق ندير من ياخشي بيليره‌م کوًچ نه دئمکدير

دوغما قارداشين‌دا حيمايه‌سينده سيغينيب ياشاماق هئچ نه دئمکدير

٭٭٭٭٭

اوز توتور عباسي خلافتينه بزه‌کلي ساققالا باخ جان وئرير توپورمک اوچون

٭٭٭٭٭

اوز دوتور تورانين ايگيدلرينه تبريزدن باکي‌يا باغيريرام من

وطن سيز قالميشيق

وطن‌سيزيک بيز سيزي وطن ياراتماغا چاغيريرام من

٭٭٭٭٭

 

بير نفس جيک سوًيله‌ييم دينله‌مزسن نئيله‌ييم

٭٭٭٭٭

 

آنا ديليميزه آنا وطنه اليمدن گله‌ني اسيرگه‌مه‌ديم

سيزده باغيشلايين مني بالالار بيرده قصورلاريمي تيکرار ائتمه‌يين

٭٭٭٭٭

 

وطن نه تورکيه‌دير تورکلره نه تورکوستان

وطن بوًيوک و معبد بير اوًلکه‌دير ياني توران

٭٭٭٭٭

گاهي آليرسان جانيمي گاهي وئريرسن جان منه سن مگر اي بت طناز تاريم سان منيم

٭٭٭٭٭

کيشي‌سي قيز حيالي قيزلاري گوًيچک دولت‌سيز ميللتيک ييه‌سيز ائليک

دوغرانير هله‌ده بو يئرده بابک آللاهلار اليندن آي آللاه آمان

٭٭٭٭٭

خزر ساحليندن بير اسيم گلير بوراخين گئديره‌م جان سسيم گلير

گنجه‌نين باشينا دوًنه‌سيم گلير آه اي آراز چايي اول، دا قوپ قورو

٭٭٭٭٭

گلين ده فريادا بير ديله داغلار قيزيل باش سسينه حاميله داغلار

تورپاق يومروقلاري سيلسيله داغلار قوپون‌دا گوًوده‌زدن يورويون يورو

٭٭٭٭٭

بئينينيه چاخمادان ايلديريم سسي داغلاردان آخمادان قان شلاله‌سي

گلمز آزادليغين قريب ائلچيسي هله آراز چايي قورودور قورو

٭٭٭٭٭

بو سس سيز گئجه‌نين شوم نفسيندن اويغودور آسلانان آت يئله‌سيندن

قورتاران تورپاغي ايت‌لر اليندن بوز قورد سوروسودور سوروسو سورو

٭٭٭٭٭

قيلينج اولام قان سوراندان قان آلام اجل اولام خايينلردن جان آلام

مظلوم‌لارين اوردوسوندان سان آلام اوندا شيرين اولار بو حيات منه

٭٭٭٭٭

آرازي کئچه‌نه قوربان سوًزو سئچه‌نه قوربان

خالقيما خور باخانين قانين ايچه‌نه قوربان

٭٭٭٭٭

آياقلانسان دوشمانا تحقيرله پالاز کيمي

سازيني سات توفنگ آل توفنگي چال ساز کيمي

٭٭٭٭٭

تورپاقدان ديده‌رگين بير کوچه‌دن چاغيريرام سني

بورالي اولدوغومو دوشونمور زامان./ فقط سن گلمه‌ليسن.

و خاطيرلاتمالييق بيرگه‌ليکده/ آناميزين پارچالانميش آديني

هر يانا باخيرام آغجاقوم قوخولو مئيدان قاراباغ قوخولو اوًلکه

اللريمده اوشوين بير قوشجيغاز وار/ ياخامدا بير قار چيچه‌گي گوًيه‌رير

گوًزومده بير نار آغاجي آغلايير/ و يولومدا هارا باخسام، دار آغاجي ...

اليمده مين ايللردن قالميش دمير چليک/ آياغيمدا مين ايللردن قالميش دمير چاريق

دولاشيرام بو دونياني/ اوًلکه-اوًلکه، اوبا-اوبا/ سني آختاريرام/ سني آزادليق.

٭٭٭٭٭

ماوي آيناسيندا سولارين/ بوي وئريب گوًرونمک ايسته‌ييره‌م

و سولاردا باتان بير ايشيق کيمي/ دنيزه دوًنمک ايسته‌ييره‌م

٭٭٭٭٭

گول آلديم شبنم‌سيز تالاندي نرگيز کسديلر يولومو سس‌سيز سميرسيز

آسديلار ساچيمدان سويدولار گوندوز دانيشما دئديلر، دينمه دئديلر

٭٭٭٭٭

دئديم داريخيرام داردير قفسيم اوزدولر ديليمي دوندو نفسيم

دئديم من اينسانام اوجالار سسيم دانيشما دئديلر، دينمه دئديلر

٭٭٭٭٭

 

بير عصردن آرتيق بو آغري ندي يالاديم قانيمي يارام گوًينه‌دي

غيرتيم ايچيمي دارتدي، چئينه‌دي دانيشما دئديلر، دينمه دئديلر

٭٭٭٭٭

قويون محکوم اولوم ميللتچي‌ليگه دونيادا ميللتين سئومه‌ين کيمدير

ديليني، يوردونو، تالان ائتسه‌لر آجييب باشينا دوًيمه‌ين کيمدير

٭٭٭٭٭

ديليمي داليمدان چيخارسالاردا قوي قارداش درديمي دئييم باري بيل

گونئيدن- قوزئيه، شرقدن-غربه هانسي خالقي گوردون بيزيم تک ذليل

٭٭٭٭٭

بو شرف بو شوکت بو قدرت بو شان هورا... دوغورداندا بيزه عار اولسون

حياتين آمانسيز بير قانونو وار تعصيب سيز بير ميللت گرک خار اولسون

٭٭٭٭٭

تورک اوًلکه‌سي بو منم چوخلارينا دوشمنم

دونيا بويدا وطنم ياتماغا يئريم يوخدور

٭٭٭٭٭

ديره‌يين کوًکسومه اعدام ديره‌کلريني/ و آسين قوينومداکي ده‌لي دويغولاري/

قوللاري قيچلاري کسيک بير جوجوغام/ نه قوينوندا قيزيناجاغيم بير گونش/

نه قوجاغيندا سيغيناجاغيم بير بوز قورد/ اهئي... کفنله‌يين مني/ کفنله‌يين/

دمير دوًشومو چينه‌يين هوًنکورتومده!

٭٭٭٭٭

ندن ظاله دئييرلر، يازيلمادان کيتابلاريما؟/ و ندن هئچ بير ديره‌يه باغلامادان، اعدام ائديرلر مني/ آه ... بورا وطن مي؟/ يوخسا اميرالمومنين‌لرين مووهيش سارايي؟ هر کوچه‌سي بير حلب گيره‌جه‌يي/ و هر ائوي/ بير آلينجا قالاسي‌نين زينداني.

٭٭٭٭٭

فيکريم مئشه‌ن کيمي قاريشيقدير مئشه به‌يي قلبيم اوجاغلارين تک ايشيغدير مئشه به‌يي

بير الده ساز، بير الده توفنگ، بيزله دوغمالاش گوللـه‌ن باريت، گولون باريشيقدير مئشه به‌يي

٭٭٭٭٭

بينلي، برکتلي تورک تورپاغي‌دير سامان چنبرينده مات قاليب يابام

تورپاغا او قده‌ر گوًز ياشي سوزموش آستاجا جوجه‌رير ائلچي بي بابام

٭٭٭٭٭

بيز چيلغين ايلديريم کيمي‌ييک چاخميريقسادا ظولمون اوًنونده اودلو سئليک، آخميريقسادا

بيز آيدينيق، آنا-آتاميز آلني تک دورو مين بير بولود آرا گونشيک شاخميريقسادا

چوخ باخمايين‌کي باش آشاغي گل گئد ائيليريک گيزلين سيتم‌لري گوًروروک باخميريقسادا

آللاه بيلير بيز عالمي يئردن قوپارداريق بير کيمسه‌يه هئچ حالدا قارا ياخميريقسادا

يئري گلسه آياق کسريک اوًيله‌ده دئييل بير گول ميخين‌دا بير دابانا تاخميريقسادا

ييغجام حذر قيلين اودوموزدان اودونلويوق چيلغين بير ايلديريم کيمي‌ييک چاخميريقسادا

٭٭٭٭٭

آتيشيم وار کولوم يوخ بولبول اولدوم گولوم يوخ

من بو عشقه دوشه‌لي آغلاماقدان گونوم يوخ

٭٭٭٭٭

 

جانيميزلا باغلييق بو تورپاغا بو ائله سيرالانين داغ کيمي وئره‌يين ال-اله

گل باجي گل قارداشيم بير اولاق، يومروق اولاق سينه‌سي داغلانماسين بوًلونمه‌سين بو تورپاق

ياشا ... ياشا... ياشا... منيم خالقيم

٭٭٭٭٭

مقام عزميده آغزين کيمي گوزه‌ل جمعم بو حاله باخماکي زولفون کيمي پريشانم

٭٭٭٭٭

اوًلسه يادا اييلمز دوشسه دارا چتينه

بو ووقارلي خالقيمين قوربانام غئيرتينه

ياشا... ياشا... آذربايجان ياشا...

٭٭٭٭٭

هارايلار آي هارايلار هر اولدوزلار هر آيلار

باشيم جلاد الينده ديليم سني هارايلار

٭٭٭٭٭

سن سن منيم اولوييتيم شان شهريم آدين منيم آديم‌دير سن‌سيز منيم نه قيمتيم

٭٭٭٭٭

آشيقين هاراييندان ائل ياتماز هاراييندان

گونده بير کرپيج دوشور عوًمورومون ساراييندان

٭٭٭٭٭

وطن بيزيم ائل بيزيم باريش دئين ديل بيزيم

گوًز ياشيلا ايسلانان ساورولان منديل بيزيم

٭٭٭٭٭

اي قهرمان ائولادين شانلي وطني سندن اوًترو جان وئرمه‌يه جمله حاضيريز

سندن اوًترو قان توًکمه‌يه جمله قاديريز اوچ رنگلي بايراغينلا مسعود ياشا

٭٭٭٭٭

من عشقدن يارانميشام جان باغيشلار يارا ياردا

باخ گوًر نئچه نسيمي تک بابالارين اوًلدو داردا

کرملرين اوددا ياندي له‌له‌رين قالدي قاردا

واخت گله‌جک آه آمانين هيجران يولون باغلاياجاق

بس سنه کيم آغلاياجاق

٭٭٭٭٭

خياليم کهکشانلار سيغمايان گوًيدن جالانماقدير

داياز چايلاقلار ايچره کوکره‌مکدن اجتنابيم وار

سيناقدير سينماغيم ظولمه ايرادم ايمه‌ييب قامت

صداقت مسلخينده گوًر نه کسگين انقلابيم وار

٭٭٭٭٭

آرازي کئچه‌نه قوربان سوًزو سئچه‌نه قوربان

يوردوما خور باخانين قانين ايچه‌نه قوربان

٭٭٭٭٭

چيخارين زامانين گونده‌ليگيندن قاراباغ سياست موضوعسو اولماز

سس سسه وئرمه‌گه قويولماز وطن قويولسا او وطن دويغوسو اولماز

٭٭٭٭٭

قا-را-باغ ديليمين اوچ هيجاسيدير قاراباغ جان وئرير مين فساد اوسته

قا-را-باغ بير خالقين فاجيعه‌سيدير اوًلکه‌لر توققوشور سياست اوسته

٭٭٭٭٭

قاراباغيندا شوخ بولبولون وار ستارخان کيمي ايگيدلرين وار

تورکوستان کيمي بوًيوک ائلين وار بالداندا دادلي شيرين ديلين وار

اي گوًزوم جانيم آذربايجانيم

جان جان جان ، آذربايجان

٭٭٭٭٭

آنا ديليمده سئوگينين

يالنيز بير نقطه‌سي وار

وطن

٭٭٭٭٭

مملکتيمي سئويرم

چينارلاريندا کوي گئتديم

زيندان‌لاريندا ياتديم

هئچ بير شئي آپارماز ايچ سيخينتيمي

مملکتيمين ماهني‌لاري و توتونو کيمي

سن اسيرليگيم حرييتيم سن

چيلپاق بير ياي گئجه‌سي کيمي

يانان اتيم سن

سن مملکتيم سن

٭٭٭٭٭

هله آتامين قابار اللري/ قيزيل بوغداني سپير تورپاغا/ سئوگي يئشرسين دييه/ هله هاراسي‌ديرکي/ من زينداندا سئويره‌م/ آداخليم گوًز ياشلاريني يومروقلاريلا سيلنده سئوير/ و قاري ننه‌م ناماز اوستو ان من يجيب دوعاسيندا/ او دوًيوش چارگاهي دير/ ائل شيکسته‌سي/ فريدون بابامين آذربايجان دانيشير مانيفستي/ او تکجه بير شهر دئييل‌/ ارک قالاسيندا مصللا/ گوًي مچيدينده فاحيشه‌خانا/ و اونيوئرسيته‌لرينده اوًلوم اوردوسو سالديراسان/ اونون قالالاري آنا دوًشلري کيمي مقدس/ اونون مچيدي آنا گوًزلري کيمي آغلاغان، آيدين/ و آنا دوداغلاريندان چيچکله‌نن آنا سوًزودور اونون آناديلي/ اوره‌کلريميزده قيديخلانان بو سئوگي تبريز سئوگي‌سي‌دير/ آنا تبريز/ باکي‌لي تبريز/ گوجون يئترسه وور بو سئوگي‌ني.

٭٭٭٭٭

اوخ آتين اوچولار اوخ آتين منه بوسبوتونليگيمله سينه گرميشم

سيز ايري باخاندان گوًزه‌ل وطنه سيزي ايتدن آليب- ايته وئرميشم

٭٭٭٭٭

ياشارکن حياتي سئويرم نه غم اوًلنده اوًلومله سئويشه‌جه‌يم

٭٭٭٭٭

بير گون گلر آراز داشار هيجران دمي اوزاقلاشار

آيريلانلار قوجاقلاشار بونا يوخدور شکيم منيم

اي تبريزيم، باکيم منيم

٭٭٭٭٭

آرازي آييرديلار قوم ايله دويوردولار

بيز سيزدن آيريلمازديق ظولم‌ايله آييرديلار

٭٭٭٭٭

نفسيميز بابک‌لرين صابيرلرين گور نفسي

ماهنيميزدا ياشار بيزيم بابالارين آياق سسي

٭٭٭٭٭

تبريزين کوچه‌لري دولان با دولان

قارا گيله‌م دولان با دولان

قيزيل گول اسدي صبريمي کسدي

سيل گوًزونون ياشيني قارا گيله

آغلاما بسدي.

٭٭٭٭٭

بيز تاريخه سيغينماريق دونن وارديق بو گون واريق

بيز کئچميشه گوونه‌رک گله‌جگه آدديملاريق

آذربايجان-آذربايجان

ياشا-ياشا-آذربايجان

٭٭٭٭٭

آي قيز گزمه آرالي کوًنلوم سندن يارالي

گوًزلرينه حئيرانام آذربايجان مارالي

٭٭٭٭٭

مني جاندان اوسانديردي جفادان يار اوسانمازمي فلک‌لر ياندي آهيمدان موراديم شمعي يانمازمي

٭٭٭٭٭

آيريليق، آيريلماز نيسگيليم منيم آزادليق، ال چاتماز سئوگيليم منيم

ائليمه يابانجي اوًز ديليم منيم ائليمه، ديليمه آچيق زيندانام

اوره‌گي يارالي آذربايجانام

٭٭٭٭٭

آزادليق اوغروندا چاليشان اينسان اولدوزو يوخلادار اوًزو يوخلاماز

عدالت بايراغين گوًيه قالديران قوللاري يورولماز گوًزو يوخلاماز

٭٭٭٭٭

سيغيرچين دوستاغيندا جان وئرير قيناقلي قارتاللار

دئييرلر سوسماسين داغلار، خاطيرلانميش قيزيل ايلقار

اوياندا نازلي دوزلو بير آچيق گوًزلو شهيد قيز وار

اوًلن چاغدا باخيرميش او سوًکولموش بير دانا جئيران

يئني بابک دئييردي آز قاليب ظولمت يانا جئيران

٭٭٭٭٭

مندن اوًتن، سنه ده‌يدي سندن اوًتن، منه ده‌يدي

سندن، مندن، اوًتن ضربه وطن-وطن سنه ده‌يدي

٭٭٭٭٭

تورپاغيمدان دوًنسون اوزوم اوًلونجه سئومه‌سم سني

قان آغلاسين ايکي گوًزوم اوًلونجه سئومه‌سم سني

٭٭٭٭٭

آذربايجان تورپاق دئييل آرزولارين مئشه‌سي‌دير

انقلابدا قوربان وئرمک بو ديارين پئشه‌سي‌دير

آذربايجان چيراغ ياندير ساخلا اونو اوًز الينده

ياشا سنده اوًز بختيني دانيش سنده اوًز ديلينده

٭٭٭٭٭

ائوسيزلرين، ائوي‌دير دونيا دئديلر،

ائوسيز قيچين اوزاتدي

آياقلاديلار

٭٭٭٭٭

ياسا باتيب اوتاغين قان آغلايير ياتاغين

سن يوخوما گلمه‌سن اوًزوم اوللام قوناغين

٭٭٭٭٭

تبريزيمين ارکي وار ارکينه مين ارکي وار

ستارخاني يوخدورسا ميليون-ميليون ار کي وار

٭٭٭٭٭

خوجالي خوجام منيم اوًلومدن اوجام منيم

بير گون اوًپم تورپاغين داشيني قوجام سنين

٭٭٭٭٭

داغدا هايلاديم قوردو قاچدي گديکده دوردو

او جئيران باخيشيلا مني اوره‌کدن ووردو

٭٭٭٭٭

هر گونش آيينه‌سيندن داشلاناندير اردبيل عشقه آن البته آذربايجاندير اردبيل

٭٭٭٭٭

بوگونون آرخاسي اگر ساباحسا کيمدير آرخاسينا گوًز تيکه بيلمز

يئرين محبتي بيزه گوناهسا بيزيم گوناهلاري گوًي چکه بيلمز

٭٭٭٭٭

آغلايير وطنيم هوًنکورور يامان کوًکسونده يارا وار باشيندا دومان

توتايديم گوللـه‌ني دييه‌يديم دايان بات سينه‌مه آذربايجان ا ده‌يمه

٭٭٭٭٭

ائل آرخامدا دار آياقدا بير معنا وار ياشاماقدا

دوغولدوغوم بو تورپاقدا يورا بيلمز يوللار مني

٭٭٭٭٭

سوًکوب بو دونياني يئر کوره‌سينده عدالت توخومون اکمه‌سم اولماز

بو باش سيز کروانين اووسارين توتوب آزادليق يوردونا چکمه‌سم اولماز

٭٭٭٭٭

دار گونلرده بيزه قارداش دئييرلر حاق بوًلنده هئچ باجي‌دا اولماريق

گوناه بيزده اوًزوموزه اينانساق اوًزگه‌لرين محتاجي دا اولماريق

٭٭٭٭٭

منيم سئوگيليم ديليم گوًز ياشين سيليم ديليم

ديليم، ديليم دييه‌جک اولسادا ديليم-ديليم

٭٭٭٭٭

بو گون تورپاغيني، داشيني ساتاجاق ساتقين ساباح اوًز دوغما قارداشيني ساتاجاق ساتقين

نئيله‌سين، ساتقينليق عصري‌دير، باهادير چوًره‌ک بيري گون حيات يولداشيني ساتاجاق ساتقين

٭٭٭٭٭

نيگران آغلاما بيزه سئوديگيم سني سارسيدماسين اوزانان دوستاق

دوستاغي بيزلره تيکيب‌لر گولوم تورکچونون ائوي‌دير بو زامان دوستاق

٭٭٭٭٭

يئنه‌ده گوًره‌سن کيم سورگون گئدير اوًزونو آه چکيب بو اوزان آغلير

آرزيسي دالييجا چوًکن‌لر کيمي هاواني سووروب قوپوز قان آغلير

٭٭٭٭٭

ياشاماق بير آغاج کيمي تک و آزاد

و بير اورمان کيمي قارداشجاسينا

بو حسرت بيزيم

٭٭٭٭٭

سو دئييب‌دير منه اوولده آنام، آب کي يوخ يوخو اوًيرتدي اوشاقليقدا منه خواب کي يوخ

٭٭٭٭٭

يوخ مني اوزاغا آپارما ايلهام تورپاغا باغلييام، تورپاق يئريمدير

مني سئونلردن چوخ اوزاق اولسام لاپ آياق آلتلاري اوزاق يئريمدير

٭٭٭٭٭

گئتمز بير ايزلره، چاشماز وفا يولون تک ميللي يول بيليرکي نه سولدور، نه ساغ ائليم

٭٭٭٭٭

گوًزلريني قاتديم شعيرلريمه/ يئل اسدي باخيشين گونشه اوچدو/

نه عزيز اولورموش گوًزه‌للـه‌مه‌لر/ گونشله شعيرلريم، تارتيشمادادير.

٭٭٭٭٭

گل بوتونلت مني گل هوپ منه آزلانمادايام بوروشوق ماوي‌جيگيم هوپ يارامازلانمادايام

داليبان يايليغينين ساپ ساري سولغونلوغونا -آي صمد سندن ايراق- چوخدان، آرازلانمادايام

يام ياشيل تئل هوًرولور سسليجه سن‌سيزليگيمه آند اولا بارماغينا-آستاجا- سازلانمادايام

بئله تکلنمه‌ده‌يم گئت-گئده سن‌سيز ائله بيل قاراباغ مسجيدي ايچره جانامازلانمادايام

باخديغين آينادا، گوًز ايزلرينه قالدي چارام من بوغاز گوزگولرين نسلينه نازلانمادايام

صوبحه قارشي داشيير سن بويالي بايراغيمي گوللـه‌لنميش دوه بوينوندا قوتازلانمادايام

ياندي قيندي دئييلم شاختايا اومسوق جوجه‌جيم آيه!... يالنيز سنه اووماجليجا يازلانمادايام

گل سوزول شعريمه، مئهلن خياليمدا قورخما من قيلينج آلميش اله سنده آيازلانمادايام

٭٭٭٭٭

 

 

وارليغين ماوي‌ليگي اپريدي پاسلاندي قاييت گوًزله‌دي باخمادين هئچ آينادا کاسلاندي قاييت

گله‌جکدير دييه تانريم سني سوًز وئرميش ايدي آللاهين‌دا بو گئجه گوًزلري ايسلاندي قاييت

تاخچادا توز بوروموش سازلاري کيم دينديره‌جک بابامين غئيرتي‌دير تاخچادان آسلاندي قاييت

بير ياشامليق منه پاي وئر بو قبيرليک‌لردن بابکين مئييتي‌نين اوًرتوسو آل قاندي قاييت

بو ياساق سازدا منيم دوستاق اولان شعريم تک قار چيچک‌لر کيمي قيش شاختاسيني داندي قاييت

چييره‌ييب جمدک اتيندن دلي سوو ميصري قيلينج ايلديريم قامچيسي‌دير لئش يئمه‌سي ماندي قاييت

گل سنه قان تولوغو هوپ‌دا قيلينجين ديلينه گل ساحات بومباسي گل،گل قوزو قورباندي قاييت

٭٭٭٭٭

چيرپينيردي قارا دنيز باخيب تورکون بايراغينا

آه اوًلمه‌دن بير گوًرسه‌يديم دوشه بيلسم تورپاغينا

٭٭٭٭٭

قافقازلاردان آشاجاغيق تورکلوگه شان قاتاجاغيق

تورکون شانلي بايراغيني بيز تبريزدن آساجاغيق

٭٭٭٭٭

(قولاغيمدا توک اورپه‌دن بير هاراي وار/ هاراييدير بالالاري پرن دوشن آنا قوردون/ باخ، بئله‌جه، باخ بو آخشام/ من قاجاري،‌امير تئيمورو، ختاييني،‌من ايلديريم بايزيدي، سولطان سليمي، سني-سني، بير ميللتين حاق-عدالت/ ديوانينا چاغيرارام.)

٭٭٭٭٭

سن ائله بيلمه‌کي باخيب آرازا آينا قاباغيندا دارانير وطن

باشي ميلياردسادا، مرد بير اوغلونو تاپارکن يئني‌دن يارانير وطن

٭٭٭٭٭

نه قوم ذره‌سي‌يم نه شئي قطره‌سي ديبسيز عومانلارين، طوفان سسي‌يم

جغرافي سرحدلري چوخ اوًيونمه‌سين باکي‌نين-تبريزين سوًز سوفره‌‌سي‌يم

٭٭٭٭٭

لاله‌نين قانييام، قافلانين جاني قوبوستان چوًلونده، داغ ياران منم

قالديريب چيينيمه آذربايجاني اوفقدن-اوفقه آپاران منم

٭٭٭٭٭

ياد اليله بير چيچک گول دريلمه‌سين جانلي مئييت اولسون او ديريلمه‌سين

بو آنا تورپاقدا يئر وئريلمه‌سين اوًز آنا ديليني بيلمه‌ينلره

بو گون اسير ديللي آذربايجانام اوتايلي-بوتايلي واحيد بير جانام

باخير اوًگئي کيمي آغ بيرچک آنام اوًز آنا ديليني بيلمه‌ينلره

٭٭٭٭٭

شامانام ايچيم کوًز-کوًز تانريميز دئييرکي، دوًز

ندن تورک حاقدا بير سوًز کورکلو قورانا گلمز؟!

٭٭٭٭٭

بابک اوغلو باغير خانلار/ اوًرنک ديلر ستارخان‌لار/ تورک ائللري بيزيم ائللر.

٭٭٭٭٭

داها کسگين داها جيدي-داوام ائدير اوتوز يئددي

٭٭٭٭٭

سئوديگيميز کيمي ياشاماق ايمکانسيز اولسا

سئوديگيميز کيمي اوًلوم ايمکانسيز دئييل

٭٭٭٭٭

ناموسونو حفظ ائتمه‌يه

بايراغيني يوکسلتمه‌يه

جومله گنجلر مشتاقدير

شانلي وطن! شانلي وطن!

آذربايجان! آذربايجان! آذربايجان! آ... ذر... باي... جا... ن

٭٭٭٭٭

بو گوًروشو درده درمان بيلميشديم حسرتيندن چوخ آغلاييب گولموشدوم

گوًروشونه بير قيش گونو گلميشديم اي قار آلتدا اوره‌گي ياز تبريزيم

چوًره‌گي بول قيسمتي آز تبريزيم

دالغا ايديم عوممانينا قووشدوم زووارايديم کروانينا قووشدوم

آزادليغا-گومانينا قووشدوم آزادليغين ايلک سنگري تبريزيم

تاريخلرين شاه اثري تبريزيم

نه گوًزله‌ديم، نه آختارديم نه بولدوم نه بولدوم سا اوره‌گيمه قبولدو

بو سويوقلوق نه زاماندان دب اولدو اوولاديني قوناق بيلن تبريزيم

دردينه‌ده دئييب گولن تبريزيم

قودرتينه شک ائله‌يه بيلمه‌ديم قوجا ارکه، ارک ائله‌يه بيلمه‌ديم

نه ياتيبسان درک ائله‌يه بيلمه‌ديم اي دونياني يولا سالان تبريزيم

اي کرواندان دالا قالان تبريزيم

جنتيني سنده تاپان چوخويدو سوًزون وارسا داشدان کئچن اوخويدو

نيويورک‌لار، لوندورالار يوخويدو اوًز يئرينده ساييب دوران تبريزيم

نوًکرلره بويون بوران تبريزيم

قيلينجا يوخ ياغلي سوًزه اييلدين دوشمنه يوخ دوست قارداشا دوًيولدون

تاريخ بويو بوًيله مظلوم دئييلدين اوميد گوجوم ظفر تاغيم تبريزيم

گوللـه ده‌يميش سوًز بايراغيم تبريزيم

باکي سندن سن باکيدان اوممادا دونوق‌قانلار، اوًزگه‌دن قان اوممادا

اومود يوخدور بو دونيادان، اوممادا... ييخيق کوًنلوم سن اوًزون قور تبريزيم

زامان گئدير آياغا دور تبريزيم

٭٭٭٭٭

 

قان تانري‌سينين چيخيشيندا گلن شعرلرين شاعيرلري...

آتيلا کيشي‌زاده، سحرخانيم، بختيار واهابزاده، ميکائيل ميرزه، توکل فرضي، مولانا فيزولي، آراز قاراباغلي، ممد آراز، علي کريمي، ائلدار موغانلي، سوًنمز، ائل سئوه‌ن، خليل رضا، ايلقار موغانلي، شجاعت کلبجرلي، شاه اسماعيل ختايي، ضيا گوًگ آلپ، ‌سيد عظيم شيرواني، نيگار تمري، حسين آراز، جمشيد شيباني، نادر ايلاهي، کيان خيوو، عزيز سلامي، ناظيم حکمت، دوشگون قوجا بي‌لي، سهند، مدينه گولگون، حسن قبادزاده، عباس بابايي، پروفسور زهتابي، ائل اوغلو، تبريزلي علي، حکيم هيدجي، احمد جاواد، باريش مانچو، هاشيم ترلان، ستار گول‌محمدي، ائلچي يحيوي، نريمان حسن‌زاده، چئهره‌قانلي، سيما صمدي، فاتح قيسابارماق، سهراب طاهير، ليلي کحالي، آيدين تبريزلي، اسماعيل جميلي، صابر رستم‌خانلي، توفيق بايرام، رسول رضا، علي داشقين، مهندس اماني، سعيد موغانلي و ائل باياتي‌لاري و مارش‌لار.