گونئي آذربايجان سياسي محبوسلاريني مودافيعه کوميته سي آ سمک

 

12 سنتيابر 2008

 

ايفطار ضيافتينده حبس ائديلن آذربايجانلي فعاللارين هارادا ساخلانديقلاري بللي دئييل

 

آسمک: چهارشنبه گونو 2008 سئنتيابرين 10-دا گونئي آذربايجانلي تانينميش سياسي محبوس عباس ليساني-نين عائيله سي شرفينه وئريلن ايفطار قوناقليغيندا عباس ليساني-نين حيات يولداشي رقيه ليساني و اؤولادلاري سئودا، آتيلا و اوختاي داخيل اولماقلا تقريبن 20 آذربايجانلي حبسه آلينيب. حبسه آلينانلار گونئي آذربايجانين يازار، ژورناليست، طلبه و مدني فعاللاريدير.

 

بو ساعاتا قدر حبسه آلينانلاردان، 1 ايله ياخيندير نشرينه قاداغا قويولموش " ديلماج " درگيسي نين باش رئداکتور و ايمتيياز صاحيبي، ژورناليست و يازار مهندس علیرضا صرافي، ژورناليست و يازار مهندس حسن راشيدي، ژورناليست و يازار اکبر آزاد، " ياشماق " درگيسي نين رئداکتورو، شاعير سعيد موغانلي، خويلو عباس نعيمي، " آذربايجان گنجلر ائوي " نين کئچميش صدري، شاعير اکرم نجاري (عباس نعيمي- نين حيات يولداشي)، آذربايجان تورکجه سي معليمي اردبيللي مهدي نعيمي، " اولوس " طلبه درگيسي نين باش رئداکتورو حسين حيدري، فرهاد رضايي، شهباز ابراهيم زاده، محمد عباسپور، رباب عظيمي گرگري، يوسوف هوشيار و ايفطار قوناقليغينا ائو صاحيبليگي ائدن صياد محمديان-اين (ووچو) آدلاري دقيقلشيب.

 

توتولانلاردان عباس ليساني-نين عائيله سي نئچه ساعات سونرا سربست بوراخيلسالار دا ديگر توتولانلارين هانسي ايتتيهاملا توتولمالاري و هارادا ساخلانديقلاري ايله علاقه لي معلومات يوخدور.

 

کرج شهرينده ياشايان آذربايجانلي اينسان حقوقلاي مودافيعه چيسي حسن رحيمي بيات ايسه جمعه آخشامي سئنتيابرين 10-دا کرج-ده توتولوب. حسن رحيمي سون 2 آيدا توتولان آذربايجانلي طلبه لر حاقيندا راپورلار حاضيرلاييب، راديو " فردا " و آمئريکا سئسي فارسجا بؤلومو تو-سينه موصاحيبه وئرميشدي. مهندس رحيمي ميياناليدير و کرج شهرينده ياشايير.

 

حبسه آلينانلارين آراسيندا " وارليق " درگيسي نين يازارلاريندان دا گؤرونمکده دير. عليرضا صرافي، حسن راشيدي و اکبر آزاد ايراندا ان اوزون نشر سابقه سی اولان تورکجه قزئت و بوتون تورک ديللي اؤلکه لرده تانينان وارليق درگيسي نين نشره باشلاديغيندان بري بو درگي نين يازارلار هئيتينده اولوبلار. مهندس عليرضا صرافي آيريجا ايران حؤکومتي طرفيندن نشرينه سون قويولان " ديلماج " آيليق درگيسي نين ايمتيياز صاحيبي و باش رئداکتورودور. صرافي عئيني زاماندا تورک ديلي و فولکلورو معليمي، سياسي آکتيويست و اينسان حوقوقلاي مودافيعه چيسي کيمي ده تانينماقدادير.

 

مهندس حسن راشيدي و اکبر آزاد وارليق درگيسيندن علاوه " کيهان-ي هوايي " قزئتي طرفيندن نشر ائديلن " يول " درگيسي، " يارپاق " ، " نويد-ي آذربايجان " و " اوميد-ی زنجان " کيمي قزئتلئرين ده يازارلاريندان اولوبلار. اونلار آذربايجان اوشاقلارينا چئشيدلي پروقراملار حاضيرلايان " چيچکلر " قورولوشو-نون تاسيسچيلريديرلر. 55 ياشلي حسن راشيدي " ديليميزين ساده قرامئري " و " تورک ديلي و اونون ايرانداکي مؤوقئيي " (فارسجا) کيتابلاري نين يازاريدير. حسن راشيدي ماي 2006 " ايران " قزئتينده آذربايجانليلاري تحقير ائدن مقاله و کاريکاتورايا قارشي کوتلوي اعتيراضلاردان سونرا دا 3 آيا ياخين حبس ائديليب و سونرا وثيقه قارشيسيندا سربست بوراخيلميشدي.

 

" فرنگيز ايله قيرميزي دون " (اوشاقلار اوچون) کيتابي نين يازاري اکبر آزاد ايسه اييول 2004-جو ايلده آذربايجانليلارين بذ (بابک) قالاسينداکي يورويوشونده ايشتيراک ائتديگي اوچون گؤزالتينا آلينيب، 67 گون ايشکنجه ائديله رک اهر، تبريز و تهراندا ايران اطلاعات مأمورلاري طرفيندن سورغو سوالا چئکيلميشدي. او وثيقه قارشيليغيندا سربست بوراخيلديقدان سونرا اينقيلاب محکمه سي طرفيندن 1 ايل و آپئللياسييا محکمه سينده 4 آي حبس جزاسينا محکوم اولدو. آزاد حبس سوره سي نين قالان قيسمي ايله علاقلي اوکتييابر 2006-جي ايلده اهر زيندانينا گؤندريلدي.

 

سئنتيابر 10 و 11-ده توتولانلارين آراسيندا داها اؤنجه حبس سابيقه لري اولان سادجه حسن راشيدي و اکبر آزاد دئييل؛

 

- " يارپاق " قزئتي نين کئچميشده کي و " ياشماق " درگيسي نين اينديکي رئداکتورو شاعير و ژورناليست سعيد موغانلي (مهممه دي) دا نئچه دفعه ، او جومله دن دئکابر 2002 و آپرئل 2004-جو ايلده گؤزالتينا آليناراق ايران اطلاعات مأمورلار طرفيندن هفته لر سورغو سوالا چکيليب. سعيد موغانلي سون آيلاردا گونئي آذربايجان شاعيرلري آراسيندا مئديا واسيطه سي ايله کئچيريلين " قيزيل آلما " شعر فئستيوالي نين بيرينجيسي اولموشدو.

 

- تهران شهرينده ياشايان قوشاچايلي (ميانداب) ميللي آکتيويست صياد محمديان (اووچو) دئکابر 2003-جو ايلده ايران اطلاعاتي مأمورلارين طرفيندن توتولوب و 2 هفته يه ياخين ايران تهلوکه سيزليک حبسخاناسيندا ساخلانيلميشدي. سئنتيابر 10-دا وئريلن ايفطار قوناقليغينا تهرانين نواب کوچه سينده ائو صاحيبليگي ائدن محمد يان-اين ائويني تهلوکه سيزليک گوجلري تفتيش ائديب و اونون بيلگي سايار و بعضي باشقا اشياسيني آپاريبلار.

 

- آذربايجان تورکجه سي نين معليمي، شاعير و مدني-سياسي آکتيويست اردبيللي مهدي نعيمي آپرئل 2005-جي ايلده اطلاعات مأمورلاري طرفيندن توتولوب و 12 گون حبسدن سونرا وثيقه قارشيليغيندا سربست بوراخيلميشدي.

 

سون ايکي آيدا توتولان طلبه لر

 

چرشمبه و جمعه آخشامي ايرانين تهران و کرج شهرلرينده تقريبن 20 آذربايجانلي نين حبسه آلينماسي ايله سون 2 آيدا ايراندا حبسه آلينان آذربايجانلي يازار، ژورناليست، اينسان حقوقلاري مودافيعه چيسي و طلبه لرين ساييسي 25 نفري آشيب.

 

اييولون 17-دن بري ان آزي 10 آذربايجانلي طلبه حبس ائديليبلر. حبس ائديلنلردن سادجه ودود اسدي و شاهروخ حاتمي سربست بوراخيبلار و ديگر 8 طلبه عائيله لري ايله گؤروش ايمکاني و وکيلله تمين اولمادان ايران اطلاعات-ي نين حبسخانالاريندا ساخلانيليرلار. محبوسلارن عائيله لري اونلارا تطبیق اولان احتيمالي ايشکنجه لره گؤره نيارانچيليقلاريني بيلديريبلر. اييولون 17-ده تبريز اونيوئرسيتئتينده توتولان سجاد رادمهر، فراز زهتاب، آيدين خاجوي و داريوش حاتمي (ئلچين)، آوقوستون 20-ده حبسه آلينان منصور امينييان و مقصود عهدي، آوقوستون 13-ده تبريزده توتولان امير مرداني و آوقوستون 31-ده خوي شهرينده توتولان مجيد ماکوي زاد-اين (ئليار خويلو) عائيله لري ايرانين محکمه حاکيميتي نين صدري آيت الله هاشمي شاهرودي-يه آچيق مکتوب يازيبلار. عائيله لر محبوسلارا ياخينالري ايله گؤروشمه و وکيلله تامين اولما حاقي ايسته ييبلر.

 

باشقا محبوسلار

 

خاطيرلاتماق لازيمدير کي محبوسلارين عائيله لري و اينسان حقوقلاري مودافيعه چيلري نين ايران تهلوکه سيزليک گوجلري طرفيندن حده-قورخولارا معروض قالديقلاري اوچون، ايران زيندانلاريندا حبسده اولان اونلار آذربايجانلي نين حاقيندا دقيق معلومات الده ائتمک مومکون دئييلدير. بو ندنله آذربايجان سياسي محبوسلاريني مودافيعه کوميته سي، آسمک، ياييملاديغي راپورلارين دقيق، آنجاق کاميل اولماديغيني بيلديرير. يوخاريدا قئيد اولان آدلاردان علاوه حالي حاضيردا حبسده اولانلارين آدلاري آسمک-اين دقيقلشديرديگي بيلگيلره گؤره بونلاردير؛

 

- عباس ليساني، گونئي آذربايجانين تانينميش سياسي و مدني آکتيويستي عباس ليساني، اييون 2006-جي ايلدن بري حبسده دير، او حبس ائديلنلندن سونرا معروض قالديغي باسقيلاردان دولايي دفعه لرجه اوزون سوره لي آجليق آکسيايالاري کئچيريب. 2008 مارتين 6-دا حيات يولداشي و 3 اؤولادي ياشايان آذربايجانين اردبيل شهريندن تخمينن 2000 کم اوزاقدا اولان ايرانين يزد شهرينده کي حبسخانايا کؤچورولوب. رقييه ليساني 2008 مارت آييندا حيات يولداشيني گؤرمک اوچون 13، 10 و 9 ياشلاريندا اولان اوشاقلاري ايله بيرليکده يزد شهري نين زيندانينا گئتديکلريني آنجاق ساعاتلار اينتيظاردان سونرا سادجه 10 دقيقه گؤروشه بيلديکلريني آسمک-ه بيلديريب. اونون دئديگينه گؤره آنجاق کيچيک اوشاغين آغلاماسي سببي ايله گؤروشه ايمکان وئريليب. بو آغير شرطلرين ندني ايله 6 آيا ياخيندير باشقا مولاقات گئرچکلشمه ييب.

 

- مهدي نوري (ئلمان)، سولدوز آزاد اونيوئرسيتئتي^نين طلبه سيدير. ماي 2006 اعتيراضلاري ايله ايلگيلي سولدوزدا (نقه ده) توتولوب و 80 گون ايشکنجيله بيرليکده سورغو سوالا چکيلديکدن سونرا سربست بوراخيلدي. مهدي نوري آزادليقدان سونرا محکمه طرفيندن 2 ايل حبسه محکوم ائديليب و 2007 مايين 8-ده توتولاراق تکرار زيندانا گؤندريلدي. ايندي ايسه تبريز زينداني نين مالي بؤلمه سينده ساخلانيلير.

 

- احمد حسين پور، آوقوستون 30-دا تبريزده توتولوب و هارادا ساخلانيلديغي بللي دئييل.

 

- حميد روستمي (آرغيش)، 2008 ماي آييندا خوي زيندانينا گؤندريليب، " قارلي ارک " و " ... و سنين حئکايه لريم " آدلي حئکايه توپلولارين يازاري و ژورناليست حميد آرغيش 2007 فئورالين 21-ده دونيا آنا ديلي گونو آکسييالاريندا ايشتيراک ائتمک ايسته ديگي اوچون محاکيمه اولوب! باتي آذربايجان محکمه سي طرفيندن اونا وئريلن حؤکمده 1 ايل حبس و 2 ايل بيجار شهرينه سورگون ائديلميه محکوم ائديله رک، 3 ايل بويونجا بوتون اثرلر و يازيلاري نين نشرينه قاداغا قويولوب.

 

حجت الاسلام عبدالعزيز عظيمي قديم، 2008 مايين 2-ده قوم شهري نين لنگرود زيندانينا گؤندريليب. او دين آداميدير و بوندان اؤنجه تبريز، اردبيل و قوم شهرلرينده ان آزي 4 دفعه حبس ائديليب.

 

- عاريف علوفي 2008 مايين 31-ده اورمييه زيندانينا گؤندريليب، نخجوان اونيوئرسيتئتي نين طلبه سيدير، 2007 فئورالين 21-ده دونيا آنا ديلي گونو آکسييالاريندا ايشتيراکي اوچون محاکيمه اولوب.

 

- ابراهيم جفرزاده اييونون 21-ده خوي زيندانينا گؤندريليب، خوي شهرينده فعاليت ائدن " اورين " غيري حؤکومت تشکيلاتي نين صدري اولوب، سياسي و مدني فعاليتلري اوچون 1999-جو ايلدن بري ان آزي 7 دفعه حبس ائديليب، سون دفعه 2007 فئورالين 21-ده دونيا آنا ديلي گونو آکسييالاريندا ايشتيراک ائتمک ايسته ديگي اوچون محاکيمه اولوب! باتي آذربايجان محکمه سي طرفيندن اونا وئريلن سون حؤکمده، 1 ايل حبس و 2 ايل ايران-اين گونئيينده يئرلشن برازجان شهرينه سورگون ائديلمئيه محکوم ائديله رک بوتون سياسي-ايجتيماي فعاليتلرينه 3 ايل، ميلت وکيلليگي و شهر شورالاري سئچيملرينده ناميزدليگينه ايسه بير دؤنم (4 ايل) قاداغا قويولوب.

 

- ابراهيم رشيدي (ساوالان)، 2008 آوقوستون 5-ده اوئمييه زيندانينا گؤندريليب، شاعير و يازاردير. آذربايجان طلبه حرکاتيندا اؤنملي رولو اولان ابراهيم رشيدي اورمييه اونيوئرسيتئتي نين مئخانيکا مهنديسي فاکولته سي نين مأذونو " آذر تورپاق " غئيري حؤکومت تشکيلاتي نين قوروجوسو، اورمييه اونيوئرسيتئتي نين " اوستاد شهريار " درنگي نين صدري، " اولدوز " ، " بولود " ، " باخيش " و " اويانيش " درگيلري نين رئداکتورو اولوب. کئچميشده ده ان آزي 5 دفعه اورمييه، تهران، اهر و اردبيل شهرلري نين حبسخانالاريندا ساخلانيليب.

 

- محمد نصيري، 2008 آوقوست آييندا 6 آي حبس سوره سينه چکمک اوچون، باتي آذربايجانين ماکي شهرينده زيندانا گؤندريليب.

 

- علي عباسي، اردبيل زيندانيندا.

 

آذربايجان سياسي محبوسلاريني مودافيعه کوميته سي، آسمک، ايران حؤکومتي نين آذربايجانلي مدني-سياسي آکتيويستلر، يازارلار، ژورناليستلر، اينسان حوقوقلاري مودافيعه چيلري و طلبه لرين حبسه آلينماسيني بين الخالق قانونلارين علئيه اينه اولاراق ديرلنديرير. آسمک-ه داخيل اولان معلوماتا اساسن محبوسلارين عائيله لري اونلارين حاقيندا هر هانسي معلومات بوراخماماق اوچون قورخودولوبلار. تبريز اونيوئرسيتئتي نين طلبه سي منصور امينييان-اين عائيله سينه هر هانسي قزئت و راديويا موصاحيبه وئرديکلري تقديرده داها آرتيق باسقيللارلا اوزلشه جکلريني دئييبلر. قورخودولان عائيله دن مئديا طرفيندن موراجيعت اولوناندا " هر هانسي بير ياخينلاري حبسه آلنماييب " شکلينده دانيشماقلاري ايسته نيلير. آسمک گؤز آلتينا آلينانلاردان نئچه سي نين وکيلله تامين اولماديقلاري و اعتيراف وئرمک اوچون ايشکنجه يه معروض قالديقلاريني تثبيت ائديب. اونلارين هاميسي نين بنزر دورومدا اولدوقلاري تخمين ائديلير. آسمک ايران حؤکومتي و محکمه لر مسئوللاريني بين الخالق قانونلار و ايران دؤولتي نين ده قول چکديگي اينسان حقوقلاري آنلاشمالارينا اويماغا چاغيرير.

 

بوتون سياسي و عقيده محبوسلاري نين آزادليغي ديلگي ايله

 

12 سئنتيابر 2008

 

آذربايجان سياسي محبوسلاريني مودافيعه کوميته سي آ سمک

 

سؤزچو: عليرضا قولونجو