فدراليسم ين دونيا تجربه سينده و اونون ايران جفرافيايي و تاريخي مكانينا اويقونلاشماسي

 

28 يون تاريخلي برلين ين جان اف كندي زاليندا  آذربايجان كولتور اوجاغي نين دعوت ائتديگي كونفرانس دا علي رضا اردبيلي نين چيخيشي:

ايراندا ياراديلا بيلن فدراليستي سيستم  ايكي قوروپ نظري اساسلاردان عيبارت اولاجاقدير

1.
الده اولان دونيا تجروبه سي
2.
بو تجروبه نين ايران جفرافيايي و تاريخي مكاني لا اويقون لاشديريلماسي

بو ايكي اساسدا حاضيرلانميش پرينسيبلر ايلك نٶبهده حقوقي نورملار اساسيندا فدرال ايران جومهوريتينين اساسي قانونو كيمي حاضيرلانيب اهالي آراسيندا موذاكيرهيه چيخاريلماليدير. تصويب اولونموش اساسي قانونونو، حياته كئچيرمك اوچون، موختليف سويهلرده موتخصيصلر  ايشه جلب اولماليدير. من صٶحبتيمين ايلك حيصهسينده دونيا تجروبهسيندن بيزه اٶنملي اولان مسئلهلره ايشاره ائتمك ايستيرم:

فدراليسم نه دير: فدراليسم سياسي حاكميتين،  مركزي حوكومت و ايالتلرين آراسيندا عمودي (يوخاريدان آشاغي) شكيلده بٶلونموش، غير متمركز حوكومت نٶوعلريندن بيري دير. ديقت ائتمك لازيم دير كي، قانون وئريجي، ايجرا و محكمه حاكميتلرينين آراسيندا افقي بٶلومو، بوتون دونيا دٶولتلرينده باش وئرير آمما عمودي بٶلونوش يالنيز، فدراتيو دٶولتلره مخصوصدور.

فدرال بير دٶلتده حاكميتين عمودي بٶلومو، ايالتلرله فدرال حوكومته خيلاصه اولمور. ميثال اوچون آمئريكا بيرلشميش اشتاتلارينين، 50 ايالتي،  كانتيلر، بلديهلر و مكتب قصبهلريندن عيبارت،  90 مين خوموختار حوكومتي اٶزونده احتيوا ائدير.

فدراتيو حوكومت نٶوعي غير متمركيز حوكومت اولسادا، هر غير متمركز حوكومت فدراتيو دئيل. غيرمتمركز حوكومتلرده، مركز، ايالتلرين ايختيار دايرهسيني اٶز ايستهديگي زامان و ايستهديگي سويهده محدودلاشديرا بيلر. آمما فدراتيو بير سيستمده هر بئله بير دييشيك اتئمك ايكي طرفلي راضيلاشماق اساسيندا اولا بيلر. (ميثال استاندار و ايالتين حاكميت باشچيسي)

 
دونيادا يئر كورهسي نوفوسونون ياريسيني اٶزونده ائحتيوا ائدن 20 اٶلكه رسماً اٶزونو فدراتيو بير دٶولت اعلان ائدير آمما دونيا اٶلكهلرينين يوزده 80 فاييزي اٶز اصولي ايدارهسينده، فدرال ايداره متدودلاريندان ايستيفاده ائديرلر.

 
هر فدرالسيتت دٶولت الزاماً دموكراتيك دئيل و فدراليسم مين بير دردين درماني اولان شفا نسخهسي دئيل. آمما بير اٶلكهده ياشايان ميللتلر آراسيندا ايقتصادي و سياسي عدالت يارادماق اوچون، فدرالسيم اميتاحان اولونموش مٶثر بير اصولي اداره دير.

آرتيق 200 ياشلي دٶولت-ميللت، هم  يوخاريدان سورعتله قلوباللاشان دونيا ايقيصاديات و سياستي طرفيندن مٶوقعلريني گئري چكمهيه مجبور اولور و هم 180 جواريندا دٶلت-ميللتين مينلر دين و مينلر ديله تابع اولان تبعهلري طرفييندن تضييق (فيشار) آلتيندادير.

فدراتيو سيستمله سانترالسيتي نيظاملارين آراسيندا هر فرق اولسادا بير اوخشار جهتده وار و  اودا بو هر ايكي سيستمين قارشييا قويدوغو مقصددير. هر ايكي سيستم، اينسانلارا فيراوان ياشاييش، خوشبخت گوذران، صلح و آيدين بير صاباح وعد ائديرلر.

بو موهوم بير حقيقتدير كي هر سيستمين نتيجهسي اونون افئكتيو اولوب-اولمامسينين ثوبوتيدير. باشقا سٶزله پيشيك سيچان توتماليدير، ايستير پيشيگين رنگي آغ اولسون، ايستر قارا.  فدرال بير قورلوشوندا بورجو اهالينين گوذرانيني تأمين ائتمكدير. بو مدعا هئچ مقامدا اونودلماماليدير.

دونياميزين هئچ بير كاسيب اٶلكهسينين اهاليسي حاقيندا اونلارين دموكراتيا و اينسان حاقلاريندان دانيشا بيلمريك. دموكراتيا، آزادليق و اينسان حاقلاري يالنيز كيفايت درجهده يوكسك عوموم داخيلي محصول (درآمد ناخالص ملي) رقمي اولان اٶلكهلرين وطنداشلارينا قيسمت اولور و بيز فدرال ايران جومهوريتيندن دانيشاركن باشقا بير مقصد آختارماماليييق.
 
فدرال دٶولتلر يا سابيق موستقيل دٶولتلرين بيرلشمهسيندن يارانميشديرلار يا برزيل، آرقنتينا، بئلچيكا و اسپانيا نومونهلري كيمي سابيق سانتراليستي دٶولتلرين دموكراتيكلشمه پرتوسئسلرينده مئيدانا چيخميشلار. هابئله آلمانيا و آمئريكا كيمي جفرافيايي اساسلاردا يارانميش فدرال سيستملرين كناريندا بئلچيكا، هندوسيتان و ايسوئچره كيمي ديك و اتنيسيتت اساسيندا يارانميش فدرال نيظاملاردا آز دئيللر.
اٶنجه من وارلي اٶلكهلرين اهاليسينين خوشبخت ياشاييش صاحيبي اولماق شانسينا ايشاره ائتديم. داها موهوم بير واقعيت بودور كي وارلي اٶلكهلر نه اٶلكهلرينين داخيلينده داخيلي موحاريبهلره گيريفتار اولورلار، نه قونشولاريلا دائمي موناقيشه هيجانيندا ياشاييرلار و نه دونيايه موحاريبه اعلان ائديرلر.

فدراليسم  فورمال حالدا ديكتاتورا و حتي توتاليتر سيستملرده ده مٶجود اولا بيلر. آمما فدرالسيم پتانسيللري و اينسانلارين اٶز اٶلكهلري و اٶز فردي طالعلريله بيگانه قالماماغا سٶوق ائدن جهتلري يالنيز دموكراتيك بير سيستمده آزاد اولا بيلر.  بو جهتدن بير ليبرال، دموكراتيك و پارلامنتاريستي جومهوريت، اولمادان; فدراليسم، ده حاضيركي ولايت فقيه حوكومتينين رسمي آديندا "جومهوري" سٶزو كيمي بير معناسيز ادعا اولا بيلر.

بو عمومي كلياتدان سونرا من مسئلهنين، آذربايجان ميللي منافعي باخيميندان اٶنملي اولان، آمما  آز موباحيثهيه قالديرلميش آسپكتلرينه توخونماق ايستيرم.

تاريخ

بوگون آذربايجانا اويقون اولان فدراليستي مودله تأثير قويان بير مسئله بيزيم تاريخي آجي تجروبهلريميزدير.

 
مشروطه اينقيلابي، ايكينجي دونيا موحاريبهسي دٶورينده آذربايجان ميللي حوكومتي و 1356-57-جي ايللرده باش وئرميش ايسلامي اينقيلاب هر اوچو آذربايجانين ميللي حاقلاريني قورويان قانونلار و رسمي راضيلاشمالارلا نتيجهلنميشلر.

آمما نه يازيق كي هر اوچ حالدا بو قانوني سندلرين ديري، عملده اونلارين يازيلديقلاري كاغاذداندا آز اولموشدور. ايالت و يلايت انجمنلري قانونلاري ايجرا اولمادي و بو اصلي يادا سالانلاري تجزيه طلب آدلانديرديلار. قوام السطلنه دٶولتي آذربايجان ميللي حوكمتيله موقاويله ايمضالاييب، آذربايجانا حربي باسقتن ياپدي.
 
و نهايت ايسلام جومهوريتي رسماً، اٶز اساسي قانونون، آذربايجانين ميللي منافعينه بير آزاجيق دا خئير يئتيره بيلن  اصيللريننين ايجراسيني، رژيمين امنيت مليسينه قارشي اولدوغونو اعلان ائتدي. بو اوچ تايرخي تجروبه آذربايجان آييق-ساييق اولماغا چاغيرير.

تاريخي تجروبهنين بوگون اوچون نتيجه سي بودور كي، آذربايجان گرهك گله جك فدراتيو ايرانين تركيبينه اٶز حقوقونون تام تضميناتيله داخيل اولسون. گرك بير گوجلو و بيطرف قانون اساسي محكمهسي اولسون كي، اگر قاردشلاريميز عهده وفا ائتمكدن بويون قاچيرماق ايستهييب يا اويون قايدالاريني پوزسالار، قانوندا نظرده آلينميش اورقان، ايشلري اٶز يولونا قايتارا بيلسين. بوندان احتياطي الدن وئرمهمك نامينه گرهك بوتون طرفلره، بينالمللي اورقانلار طرفيندن بو و يا ديگر مناسيب فورمادا گارانتيلر وئريلسين.

ايرانين شيمالي غربينده كومپاكت شكيلده توركلرين ياشاديغي اراضي موختليف اوستانلارا بٶلونموش و سرحد بٶلگهلرده اهالينين اتنيك تركيبي آذربايجانضررينه دهييشديرلمشدير. شاه رژيمي آذربايجانين خزر دنيزيله علاقهسيني كسمك مقصديله آستارا بٶلگهسيايسه بيرباشا گيلان اوستاني تركيبينه داخيل ائتنيشدير.

بوگون آذربايجانا عاييد اردبيل، آذربايجان شرقي، آذربايجان غربي و زنجان اوستاندا، غربي آذربايجانين ياريم ميليون جواريندا كورد اهاليسي داخيل اولماقلا، 8 ميليون 674 مين نفردير. همين رقمه قزوين و همدان نوفوسونو علاوه ائتسك 11 ميليون 734 مين نفر اولور. بو رقملر ايران توركلرينين عمومي سايلاريلا هئچده اويقون دئيلدير. ايلك باخيشدا نظره چارپان سببلر البته آذربايجان شهر و كندلري اهاليسينين فارس بٶلگهلرينه ايش آختارانلار ااوردولاري كيمي آخينلاريدير.

بو فاكت و اوستهليك، معاصر قلوباللاشميش دونيادا ايش قووهسي نين آزاد فيرلانماق ضرورتي، بيزي آذربايجانين فدرال ايران جموهوريتينده يا سرحدلريني نقل مكان ائدن ايش قوهسيني باغلاييب، ايران ايچينده بير تورك ديللي شيمالي كورهآ تأسيس ائتمهليدير يا دا سرحدلريني نه اينكي سايير ايران ايالتلري همده ايرانين قونشو ايقتيصادي زونالارينا آچيب، بير ليبرال و ديناميك ايقتيصادين بينٶرهسيني قويماليدير. آذربايجان بو سون يولو سئچمك اوچون گرهك  ائله بير قانوني اساسلارلا ايران فدرال جومهوريتينه داخيل اولسون كي، اوردا ايش قووهسي آذربايجاني ترك ائتمكله اونون فدرال حاكميت استروكتورلاريندا سياسي  نفوذوو و چكيسي و مركزي بودجهدن پايينين آزالماسيله قارشيلا بيلر. بو نا گٶره گرهك ايران توركلرينين حاقلاري دٶرد سويهده ضمانت اولسون.

بير: ايرانين شيمال غربينده توركلرين تاريخاً كومپاكت ياشاديقلاري ارضيده يارانميش آذربايجان ايالتينين اكثريت و حاكيم اتنيك قوروپ.
ايكي: قاشقاييلرين و خوراسان توركلرينين خودمختار حاكميتي.
اوچ: آذربايجاندان مهاجرت ائديب و بوتون ايران سپهلنميش توركلرين سايي داخيل اولماقلا، بوتون ايراندا ياشايان توركلرين ساي نيسبتي اساسيندا، فدرال حاكيميتين اورقانلاريندا  متناسيب پاي. ائله كي بوتون ايرانا عاييد اولون قانون وئريجي، ايجرا و محكمه حاكميتلرينده آذربايجانين سهمي يالنيز آذربايجان دا ياشايان اهالي يوخ، بوتون ايرانين تورك هاليسينين ساييله متناسيب اولسون.
دٶرد: بٶيوك تهرانين بروكسل مودلي اساسيندا خصوصي ايداره سيستمينده توركلرين رولو.

كونسرواسيون
ايراندا اتنيك ايالتلرين يارانماسي گرهك ايراني اورتا عصيرلري يادا سالان آوروپايا بنزهمهسين. ايالتلرين آراسيندا هئچ بير گٶمروك سيستمي اولمادان، هر ايالتدن او بيريسينه و بير سٶزله بوتون فدرال ايران جومهوريتينده ايش قوهسي، مالالتجاره و سرمايهنين جرياني تام آزاد اولماليدير. ايراندا بو گون حاكيم اولان بوروكراسي دونيادا موقاييسه اولونا بيلن اٶلكهلرله موقايسهده ان غيري افكتيو و  ان باهالي دٶولت آپاراتيدير. بو آپاراتي داهادا يوكسك بير درجهده بوروركراتيكلشديرمك و باهالاشديرماق هئچ آرزو اولونان بير حال دئيل. اورتا عصرين آوروپاسيندا هر شهرين دروازالاريني گٶمروك مأمورلاري كسميشديلر.  ايالتلرين دروازالاريني گٶمروك مأمورلارينا تاپشيرميش بير فدرال سيستم  21-جي عصير يوخ، اورتا عصيرلره عاييد اولان بير سيستمدير. بو مسئله ني حل ائتمك اوچون  ائله بير سيستم يارادماق لازيمدير كي ايالتلر اٶز وطنداشلارينين ايالتدن كٶچمهسي يا يئني اينسانلارين او ايالتده مسكونلاشماسيندا ضرر چكمهسين.

باشقا بير مسئله ايالتلرين دموگرافيسينين دهييشمه قورخوسودور. بو قورخو اٶز نٶبهسينده ايالتلري ايش قووهسي، اونيورسيتت طلبهلري و امتعه دٶوريهسينين آزادليغي قارشيسيندا مانعلر يارادماغا تشويق ائده بيلر. بئله نيگرانچيليقلار و اونلاردان دوغان منفي نتيجهلري آرادان قالديرماق اوچون بوتون ايالتلرين جغرافياسي و فدرال دٶولتين بودجه سي و سياسي گوجوندن پايي، راضيلاشيلميش سويهده كونسرو اولماليدير. نتيجه ده هئچ ايالت نه سرحدلرينين بير زامان دهييشيلمهسي  قورخوسو ندان ايالته گلن ايش قوهسينه محدوديتلر قويماغا احتياج گٶرر و نه اٶز اهاليسينين تحصيل، ايش آختارماق و سايير مقصدلرله موقتي يا دائمي كٶچمهسي و ايالتين نفوسونون آزالماسي سببيندن فدرال ايقتصاد يا فدرال حاكميت استروكتورلاريندان پايينين آشاغي دوشمهسيندن  نيگران اولا بيلر.

اتنيك اكثريت، اتنيك آزليق و وطنداش
فدرال ايراندا اينسانلارين حوقوقلاري 3 سويهده قورونماليدير:
1.
اتنيك اكثريت: هر ايالتده بير حاكم اتنيك قوروپ وار. اتنيك اكثريتين ديلي ايالتين رسمي ديلي ساييلماليدير. ايالتده بوتون سويهلرده ايالتين رسمي ديلي قوللانيلماليدير.
2.
اتنيك آزليق: هر ايالتده معين اداري بٶلگو چرچيوهسينده معين فاييزدان يوخاري ديل قوروپو، اوردا اتنيك آزليق كيمي رسميته تانينير. اتنيك آزليق اورتا مكتب سويهسينه قدر اٶز ديلينده تحصيل ايمكاني و يئرلي مئديا اورقانلاري صاحيب اولماغا حاققي اولماليدير.
3.
بو ايكي قوروپدان علاوه هر وطنداش بير نفر ده اولدوغو حالدا اٶز ديليني اٶيرنمك و دونيانين هانسي نٶقطهسينده ياشاماغيندان آسيلي اولماياراق اٶز سويداشلاريللا ايستهديگي سويهده موناسيبت ساخلاماغا حاقلي دير.


اورتاق ديل

اٶتن 90 ايلده غير فارس ميللتلره، ميللي سيتميمن  اعمال اولماسيندا فارس ديلينين رولو موهوم و استراتژيك اولموشدور و بوگون، غير فارس ميللتلر فدرال ايران جومهوريتينده، اورتاق ديل كيمي فارس ديليني قبول ائتمهمهيه تام حاقليديرلار. آمما مسئله بونونلا بيتمير.

دونيادا بوتون ديللر اينگليس ديلي قارشيسيندا گئري چكيلمهيه مجبور اولموشلار. فارس ديليني عقيم  يعني دوغمايان ديل كيمي معرفي ائدن ائله منصور باطني و دريوش آشوري كيمي فارس ديلينين متخصصلريديرلر. فارس ديليني اورتاق ديل كيمي قبول ائتمكله، غير فارس ميللتلرين انرژيسي بو عقيم ديلي اٶيرنملكه هدر اولدوغو حالدا فارس ميللتي همن ائنرژيني اينگليس ديليني اٶيرنمهيه صرف ائديب داها دا بٶيوك آواناژلار الده ائتمهيه موفق اولاجاقلار.

بو سببلردن اينگليس ديليني فدرال ايران جومهوريتينين اورتاق ديلي كيمي قبول ائتمك هم  ايران مدنيتينين دونيا مدنينه اينتقره اولماسيني سورعتلشديره بيلر و هم  رسمي فارس ديلي يئرينه فارس ديلي دومينانسيني گلن يوز ايل اوچون "اورتاق" اتيكتي آلتيندا ضمانت ائتمهنين قارشيسيني آلير.

سرحدسيز بٶلگه و دونيا

اينكيشاف عادتاً بٶلگهسل اولور. اٶلكهلر اٶز بٶلگهلرينده مٶوجود اولان قونشولاريلا بيرليكده بو و يا ديگر درجهده خوشبخت اولورلار يا اولمورلار. لاتين آمئريكا، آسيا جنوبي شرق بٶلگهسي، اورتا دوغو، كٶرفز ياني عرب اٶلكهلري، بالتيك ياني جومهوريتلر، اورتا آسيا، صحرانين جنوبيندا كي آفريقا، شيمالي آمئريكا، غربي و شرقي آوروپا و سايير. بو نوكتهنين اهميتي اوندا ديركي، بيزيم آرزو ائتديييميز عئني حالدا ايرانين داخيلنده و ايرانين چوخ ساييلي قونشولاري و سايير دونيا ايله هارمونيك بير موناسيبتلر شبكهسي ياراتماليدير.

هم ثروت و هم دموكراسي و اينسان حاقلاري باخيميندان اٶلكهلر  ايدئٶژيك باخيميندان اوخشار نومونهلريندن آرتيق، اٶز قونشولارينا بنزهيير. ميثال اوچون كمونيست كوبا رژيمي، كمونيست شرقي آورپا اٶلكهلريندن يوخ، ائله ساغ و ليبرال لاتين آمئريكا اٶلكهسينه بنزهييرده. ياخود كمونيستي موزامبيك و آنگولادا شوروي يا كوبايا يوخ ائله آفريقانين سايير آنتي كومونيست ديكتاتورالارينا بنزهييردي. بيزده ديناميك بير ايقتيصاد، وارلي و دموكراتيك ايران فدرال جومهوريتي يارادماق اوچون، ديناميك ايقتيصادلي، وارلي و دموكراتيك قونشولارا احتياجيميز واردير. بو اساسدا فدرال ايران جومهوريتي گرهك قلوبال دونيالا هارمونيك بير مناسبتلر دن علاوه، قونشولاريلا سرحدسيز، گٶمروكسوز موناسيبتلر يارادماغا دوغرو حركت ائتسين.