علي رضا اردبيلي:


فئدرالسيم يا ايستقيلال مؤوقعيندن، آذربايجان ميللي آزادليق حركاتينا قارشي تشكيل ائديلن هجوملار


مودرن آذربايجان ميللي آزادليق حركاتينين عرصهيه چيخماسيندان 20 ايل اؤتور. ميللي حركاتين بو ايكي دئسئنيوم عرضيندهكي اينكيشاف يولو، تاريخيميزين ان فرحلي ايللري كيمي ثبت اولموشدور. 20-جي عصرين سون و 21-جي عصرين ايلك دئسئنيوملارينا تصادوف ائدن بو ايللر، هم ميللتيميز و هم سياسي قوهلر و ضيياليليغيميز اوچون تاريخي-ميللي مكتب ايللري ساييلابيلر. مكتب ايللريني موفقيت و باشي اوجاليقلا باشا ووروموش بو تاريخي اينكيشاف يولونون طلبهلري (ميللت و اونون ضيياليلاريلا سياسي قووهلري) آيدين و ظفرلي بير صاباحا گؤز تيكيمهيه تام حاق قازانميشلار. مسئله بوردادير كي صاباحكي آزاد آذربايجانين بوگون باغلي قالميش قاپيلارينين آچارينين نه اولاجاغي حاقدا، آرادا ايكي فيكير واردير: فدراليسم و ايستيقلال.
اگر اليميزده اولان تاريخي تجروبهلره اساسلانساق، هر ايكي آلترناتيوي مومكون ائده بيلن و اونلاري غئيري مومكون گؤسترن آرقومئنتلر وارديرلار. (مقاله نين مؤوضوعسونا داخيل اولماديغي اوچون، من بو ايكي يولو، مومكون اولماق و غئيري رئالليق بويالاريله بزهين فاكتورلارين سياهيسيني بوردا وئرميرم)
اگر اوخوجو منيم وئرديييم مئتافورلا راضيديرسا، هر ايكي آچارين ميللي آزادليق حركاتينا لازيملي اولدوغوايله ده راضي اولماليدير. يعني بوگون بيزيم اليميزده آزاد آذربايجانين قاپيسيني آچان آچارين حاقيندا قطعي معلوماتيميزين اولماديغي اوچون، هر ايكي آچارين اؤنم داشيديغيني و هر ايكي آچاردان موغايات اولماغيميزي نتيجه چيخارمالي اولوروق. بو البته سياسي
هرموفروديتليك (ايكي جينسيتليليك) يعني هم ايستيقلال و هم فئدرالسيم پلاتفورملاردان مودافيعه ائتمك دئيلدير. منيم وورغولاماق ايستهديييم بودور كي، ميللي آزادليق حركاتينين عومومي منافعي پرسپكتيويندن باخاركن، هر ايكي آلترناتيو، لازيملي گؤرونورلر. آمما بونلارين بير-بيرلرينه قاتيلماسي نه لازيمدير و نه فايدالي. ميثال اوچون اينسانا هم گؤز و هم قولاق لازيمدير آمما بو ايكي اورقانين بير-بيرلرينه قاتيلماسي نه لازيمدير و نه فايدالي. ميللي حركاتين سيرالاريندا دا هم فئدرالسيم و هم ايستيقلال يولونا اينانانلار، اوز تشكيلاتلاري و پلاتفورملاريلا وار اولماليديرلار. هر ايكي آلترناتيوه منسوب اولان قوهلر، اوز پلاتفورملاريندان ايرهلي گلن نظري و پراتيك ايشلري گئنيشلنديرمهلي و درينلشديرمهلي ديرلر. فئدرالسيم آلترناتيوي بوگونه كيمي گئنيش موذاكيره اولموش و بو حاقدا چوخ حجيملي سياسي ادبيات مؤوجوددور. عملي باخيمدان گونئي آذربايجان سياسي صحنه سينده "آذربايجان فدرال دموكرات حركاتي" و ايران آلانيندا "كنگره مليتهاي ايران فئدرال" فعالدير. بونلاردان علاوه چوخ فيكير صاحيبي، سياسي يا صيرف آكادميك فعاليتلرينده فئدراليسمين نظري مسئلهلريني تارتيشاركن، بو مؤوضوعدا اولان سياسي ادبياتي الوانلاشديريب و درينلشديريرلر.
ايستيقلال آلتريناتيوي آمما ايشاره اولان باخيمدان ضعيف بير دورومدا دير. ميللي حركاتيين ايكي موهوم آلترناتيويندن بيريني تمثيل ائدن جيدي سياسي تشكيلاتلار، سياسي پلاتفورم و سياسي ادبياتين يئري هله ده بوشدور. هله ده ايراندا غئيري فارس ميللترين ايستقيلالچي قووهلرينين قانع ائديجي دييالوق وهمكارليق اورقانلاري يوخدور. آشاغيدا من ايستيقلال آلترناتيوي اطرفيندا لازيم اولان ايشلرين اصلينده چوخ اوزون اولان سياهيسيندن بير نئچه اؤرنهيي سادالاييرام:
سون 40 ايلده ايستيقلاللا ميللي آزادليق الده ائتميش ميللتلرين احوالي، بو احوالاتين بير-بيرينه و گونئي آذربايجانا نيسبت اوخشار و فرقلي جهتلري. باشقا سؤزله موقاييسهلي و تطبيقي مطاليعه.

دونيادا، بؤلگه و ايران داخيلينده اولان آكتيورلار و قوهلرين يئني دؤولتلر يارانماسينا قارشي اولمالاري و بو گوجلرين دونيا سياسي خريطهسينين يئنيدن جيزيلماسينا نئجه غاليب گلمك اولار سوآلينين جاوابي.
گونئي آذربايجانين سرحدلرينين (كئچميش شوروي و يوقوسلاوييا جومهوريتلرينده اولدغوندان فرقلي اولاراق) بللي اولماماسي و بو مسئلهدن ايرهلي گلن پرابلئملرين نئجه چوزولهجهيي.
يوزه دوخسان نئفت حاصيلاتينين ساتيشيندان الده اولموش وسائيطله ايداره اولان ايقتيصاديياتي، نئفتسيز بير ايقتيصاديياتا چئويرمك. بو حاقدا الده اولان باشقا ميللتلرين تجروبهلري و ايقتيصاد مكتبلرينده اولان مودللرين گونئي آذربايجانا تطبيق ائتمهسي.
قوزئي آذربايجان، توركييه جومهوريتي و غرب اؤلكهلرينين ايجتيماعيتينه، گونئي آذربايجانين موستقيل اولماسينين مومكون اولماسي، بو ايشين بؤلگهده ثابيتلييي پوزماماسي و اونلارين منافعلرينه خلل گتيرمهدييينه اينانديرماغا چاليشماق.

آدلاريني "ايستيقلالچي" قويوب، بو ايشلره هئچ بئله ياخينلاشمايان و عوضينده ميللي حركاتين سيرالاريندا چاليشانلارين 240 نفريني بير يئرده "ساتقينلار، ايرانچيلار، يالانچيلار، آذربايجانا دوشمان، كومونيست زيبيل لري، كومونيستلرين ميللي حركته يئرلشديردييي جاسوسلار، نفوذي قوهلر، فارس دؤولتيندن حاق ديلنچيليك ائدنلر، آذربايجان ميللي حركتينه خائن، فارس شوينيزمينين موفته نؤكرلري و موفته حامبالي، ايچيميزه سيزان خائنلر، فارس قويروقلاري، فارس عاميللري" آدلانديرانلار البته ايستيقلال آلترناتيوينه ياخيلميش قارا لكه كيمي ياددا قالاجاقلار.

اوزون سؤزون قيصاسي: فدرالسيم و ايستيقلال مفكورهلري هر ايكيسيده موستقيل اينكيشاف ائتديكلري حالدا، نه اؤزلريني و نه او بيري آلترناتيوي لكهلهمهيه حاقلي دئيرلر. سياسي اينتيحار هوسينه دوشن هر كيمسه، اؤزونو ايستيقلال يا فئدراليسم آلترناتيولرينه باغلاماقلا، باغيشلانيلماز بير سهوه يول وئريرلر. اؤتن ايل، فئدراليسم فيكرينه ياخين اولان آز ساييلي بير قوروپون بوتون آذربايجان معنوياتينا گولونج دوغوران بير دبدبه ايله قيلينج چكمهلريني هله اونودماميشيق. 240 نفر آذربايجانلييا بير يئرده اهانت هر نه قدر آنلاشيلماز اولسادا، محمدامين رسولزاده و ابولفظل ائلچيبي، قوزئي آذربايجان و توركيه جومهوريتلرينه و بير چوخ معنوي تاريخي عابيدهلريميزه بير يئرده هوجوم ائتمك آراسيندا اوخشارليق تاپماق چتين دئيل. هر ايكي هجوم هيستريك و ديقت مركزينده اولماق آرزوسوندا يانان دئسپئرات شخصلر طرفيندن باش وئرميشدير. هر ايكي هوجومون منطيقسيزلييينده ياتان بير منطيق گؤرونور: زمزم سويونا اهانت ائت قوي آدين ديللره دوشسون! اؤزنون كيم اولدوغونو و هانسي ديرلي ايشلرين مؤلفي اولماغيني دئمكده چتينليك چكيرسن سه، اوندا دون كيشوت كيمي عالمه قارشي قيلينج چك!
21 آذر 1388 تاريخلي آمستردام بياناتينين تاريخيلييي و توكنمز ديري، ائله بو مقاملا باغلي دير: ايستيقلال و فئدرالسيم آلترناتيولري هر ايكيسي آذربايجان ميللي آزادليق حركاتينين تام لئقال و نورمال تركيب حيصهلريديرلر. آذربايجان ميللي آزادليق حركاتينين فعاللاري، مدنيت و ايجتيماعيت خاديملري، مئديا اورقانلاري و سياسي تشكيلاتلارينا زهرلي هجوملار چوخ اولور. بو هجوملار؛ آنتي ايمپريالسيم، آنتي ايسرائيل، آنتي غرب، آنتي كمونيسم، ديني فاناتيزم، فاناتيك كومونيسم، آرياچي راسيسم، پريميتيو ائكسپانسيونيسم، شيمالي آذربايجان و توركييهيه قارشي نيفرت بسلهين، تماميت ارضي ايران، و بير چوخ مؤوقعدن اولا بيلر و بوگونه كيمي ده اولوبدور و جرياندادير. آمما آمستردام بياناتي بيرداها، فئدرالسيم يا ايستقيلال مؤوقعيندن، آذربايجان ميللي آزادليق حركاتينا هجوم تشكيل ائتمهيي، يول وئريلمز و باغيشلانيلماز اعلان ائتميشدير.