سنسیز یالقیز قالیب تبریز (سعید موغانلی)

گونای تبریزی:

"سعید موغانلی"نی ایلک دفعه تبریزده رحمتلیک "محمدعلی فرزانه"نین یاس تؤره نینده (تعزیه) گؤردوم. بیلمیرم مسجیدین ایچینده نه اولدو کی بیردن بیره هر کس مسجیدین حیه طینده توپلانیب اوجا سسله "آذربایجان سنسن منیم..." مارشی نی فرزانه یه بیر بورج کیمی اوخودولار. مسجیدین قاپیسینی باغلامیشدیلار کی سس ایچه ری گئتمه سین آنجاق بیز مارشیمیزی اوخویوب یاواش یاواش داغیلماغا باشلامیشدیق کی ، اوزاقدان "سعید"ی گؤردوم.

من اوزاقدان تانیییردیم اونو ، او منی هیچ تانیمیردی. آما بعضی موشترک دوستلاریمیز واردی ، ائله اونا گؤره ده بیردن باخدیم کی سعیدله یان یانا گلمیشدیم. او ایللرده من شئعردن بئزار ایدیم (بلکی هله ده) آما منده آز شئعر اوخومامیشدیم ، فارسجالاری دئمیرم، سهند ، بختیار ، شاهمار ، ناظیم ، رامیز ، خیال اوغلو ، آتیللا ایلحان و... کیمی لر.

"آن گلیر ، آتیللا ایلحان اؤلر" ، سعیدین بونا بنزر بیر شئعری زامانیندا خوشوما گلمیشدی ،من داها چوخ نثرله اوغراشیردیم ، آنار ، ائلچین افندی ، چنگیز آیتاماتوف ، اورهان و یاشار کمال ، و اورهان پاموک کیمیلر.

او گون قیسسا و گؤزل بیر گؤروشوموز اولدو ، آما شئعردن دانیشمادیق.

سعید 1379 دا قوم شهرینین علمیه حوزه سیندن (حوزه علمیه قم) دوقتورا معادلی اولان "الهیات" بیتیریب. سونرا تئهرانا یئرلشیب بیر رستوران آچدی.(بیر رستورانچی داها!) اؤزو دئییر: "پیتزا ساتیریق ، قازانجیندان کیتاب چیخاریریق".

1385 دن بری "یاشماق" ادبی درگی سینی چیخارتدیلار (مدیر مسئول: سیما دیدار ، باش یازار: سعید موغانلی) داها سونرا ائله یاشماق آدی ایله سیرا کیتابلار یایینلاندی. درگی و کیتابلار پروفئسیونال و گؤزل بیر شکیلده یایینلانیردی و تئهرانداکی فارسجا درگی لر قارشیسیندا بیزی تمثیل ائده بیلیردی. آنجاق رسمی باسقی لاردان چوخ ، بیزیم توپلومسال مسئله لریمیز اونلاری اینجیدیردی:

"منجه آذربایجاندا یاخشی و پروفئسیونال اوخوجو 200 نفردیر. متوسط اوخوجو 500 نفر و کیتاب آلان ، داها دوغروسو کیتاب سئورلر 1000 نفر اولور. بو بیزیم دوروموموزدور. بیزیم کیتابلارین تیراژی مین جیلد اولور. آما چوخلاری 500 تیراژلا وورورلار و نئچه ایل اللرینده قالیر. تاسفله بو وضعیت واردیر." (سعید موغانلی آفتاب آذربایجان خرداد 89 شماره 42 ص 44)

سعید تبریزه چوخ گلردی ، شئعرلری ایله ، امامیه ده گیلئی لنمه یه...

"... و امامیه امامزاداسی/من ائله یئتمیش لرده ده گلمیشدیم دئموکرات دادستانینا بشر حاقلاریندان گیلئی لنمه یه/ماهنی قوشماغا دئییل/من آللاها اینانیردیم/من تکجه قوربان گونو اوروج توتموردوم..."

بلکی سعید او آز استیثنالاردان دیر ، من شئعردن بئزار ایدیم ، بیزده اولان آخیم اینجیدیر ، قورخودور ، داها اؤنجه ده قیسساجا یازمیشدیم (زنگ خطری بر ادبیات معاصر آذربایجان جنوبی) سعید اوخوموشدو اونو.

"محمدرضا لوایی"نین یاخین دوستو اونون "عاشورا پوئماسی"نی (بو آدی اوخویان دوستو قویموشدو سانیریم) اوخویور ، بو قدر اؤیولن ، تعریف لنن "زیبا کرباسی" ، اؤز سسی ایله اوخودوغو شئعرلری گئنج شاعیرلر آراسیندا اللرده دولانیر ، "گور لرزه" شئعرینی دینله ییب خوشلانیرلار ، او قبیرده کیندن بتر ، تیتره ییرلر ، نه قدر آیدین اینسان دیر ، چوخ پست مدرن دیر ، تابو لاری سیندیران دیر ، دیر ، دیر ، دیر...

سعید منی تانیمیر ، من اونو اوزاقدان. من سیزی آنلامیرام شاعیرلر! ، او گون مسجیدین حیه طینده ده ، داها چوخ باخیشلاریمیز لا دانیشدیق...

یاشماق درگی سینین باش یازاری (سعید موغانلی) او درگی نین دوستاق دا اولان مودورونه (سیما دیدار) قاتیلدی. بیز ده اونلارین آزادلیق پئتیشین لارینی بیر آی ایچینده 2000 امضایا یئتیرمه یه چالیشیریق!

"... بو وطن وطن اولمادی ،..."

گونای تبریزی 27/3/90