http://oyrenci.com/news.php?id=1723

 

ندن قیرمیزی رنگه دستک وئریرم؟- داوود توران

 

سه‌شنبه ۶ مهر ۱٣٨۹ - ۲٨ سپتامبر ۲۰۱۰

 

آذربایجان توپلومو اؤز میللی حاق‌لارینی الده ائتمه سورجینده بللی آشاما‌لار یاشاماق‌دیر. بو سورجین ان بلیرگین وارلیغی اولا‌راق اورتایا چیخان گونئی آذربایجان میللی حرکتی البته کی بو آشاما‌لاری داها درین بیر شکیلده اؤز ایچینده بارین‌دیرماقدا‌دیر. سون ایللرده بو آشاما‌لارین ان دارتیشیلان موضوسو شوبهه‌سیز بایراق-سیمگه مسئله‌سی اولموش‌دور. بایراق و داها سونرا سیمگه شکلینده اورتایا چیخان موتیف‌لر بللی قروبلار طرفین‌دن منیمسه ده، بللی قروب‌لاردان اونا قارشی آجیما‌سیز بیر قارشی دوروش سرگیلمیش‌لردیر (حاقلی ویا حاقسیز اولاراق).

 

ایلک اؤنجه سیاسی بیر تشکیلاتین اؤز بایراغینی، گونئی آذربایجان میللی حرکتی و گونئی آزربایجانین میللی بایراغی کیمی گؤرستمه‌سی نتیجه سینده بو دارتیشمالار اورتایا چیخمیش و دیگر تشکیلات‌لاری دا اؤز بایراقلارینی یاراتمایا و اونو گونئی آذربایجان میللی بایراغی اعلان ائتمه یه دوغرو سوروکلمیش‌دیر. بایراق قارماشاسی دؤنمینده سون اولا‌راق دا یاخلاشیق 2 ایل بون‌دان قاباق بیر قروب موستیقیل فعاللار آدی ایله اورتاق بیر سیمگه مسئله‌سی گوندمه گلمیش و گونئی آذربایجاندا ایلک دفعه اولا‌راق بایراق و سیمگه مسئله سی گئنیش و درین بیر شکیلده مباحیثه‌یه آچیلمیش‌دیر. یازار او دؤنمده او سیمگه‌یه دستک وئرمیش‌دیر. چونکو آذربایجان میللی حرکتی ایچری‌سینده بایراغین بیرلیک یاراتما یئرینه، آیری‌لیق سالان بایراق و سیمگه مسئله‌سینه چؤزوم یولو اولاجاغینی دوشونجه‌سینی داشیماقدایدی. اونون اوچون بوگون قارا آی اولدوزا وئردیگیم دستگین یانلیش اولمادیغینی و اوندان هئچ بیر شکیلده پئشمان اولمادیغیمی آچیق بیر شکیلده بورادا دیله گتیرمک ایسته ییرم.

 

ایندی نییه بو قیرمیزی رنگی داشییان سیمگه‌یه دستک وئریرم:

 

۱. ایلک دفعه اولا‌راق گونئی آذربایجان میللی حرکتی ایچری‌سینده بیر چوخ تشکیلات بیر آرایا گلیب، ان آزین‌دان بیر سیمگه اوزرینده بیرگه حرکت ائتمه چاباسینی گؤرستمیشدیلر. بو اولای منه گؤره آذربایجان میللی قورتولوش حرکتینده چوخ اؤنم‌لی بیر یئره صاحب‌دیر. بو تشکیلات‌لارین نئجه لیگی دیشیندا، میللی حرکت ایچری‌سینده وار اولما‌لاری و دونیادا وارلیق‌لارینی گؤرستمه‌لری منیم اوچون اؤنم‌لی‌دیر. اونون اوچون بو تشکیلات‌لارین تشببوسو چوخ دیرلی‌دیر. ایلک دفعه بیزیم دانیشا‌راق، دیالوق قورا‌راق فیکیرلرینی و حرکت طرزلرینی مینمسک ده بیر چاتی آلتیندا توپلانمایی باشارمامیز، آذربایجان میللی حرکتی آچیسین‌دان بؤیوک بیر قازانج‌دیر. ایللردیر تشکیلات‌لاریمیزین بیر آرایا گلمه مه‌سینی، بیرگه بیر ایش گؤرمه مه‌سینی تنقید ائدیریک. آما ایلک دفعه اولا‌راق بو اولایین گرچکلشمه‌سی و هانسی فیکیرده اولارلارسا اولسون‌لار (ایستیقلال‌چی اولدوق‌لارینی گؤز اؤنونده توتا‌راق) بئله بیر ایشه ایمضا آتما‌لاری منیم اوچون سئویندیریجی‌دیر.

 

۲. بو تشکیلات‌لار توپلوما و میللی حرکته بیر سیمگه و یا بایراق منیمستمیر، یاراتمیر و اؤنرمیر. توپلوم قیرمیزی رنگی اؤزونون بیر ایفاد ائتمه شکلی اولا‌راق سئچمیش‌دیر. قیرمیزی رنگ آرتیق تراختور تاخیمینین بیر رنگی اولماق‌دان چیخمیش، آذربایجان توپلومونون میللی سیمگه‌سی حالینه گلمیش‌دیر. بو باغلامدا اورتادا وار اولان (هئچ بیر تشکیلات و قروبون دایاتماسی و اؤنرمه‌سی اولما‌دان) بیر میللی سیمگه اورتایا چیخمیش‌دیر. بو سیمگه توپلومون هر کسیمی طرفین‌دن منیمسنمکده‌دیر. دیگر طرف‌دن ده تراختور اویونلارینداکی میللی اتمسفردن ائتکی‌لنه‌رک میللی بیر اؤزل‌لیک داشیماق‌دیر.

او بیلدیر‌یه ایمضا آتان بیر قورولوشون منصوبو اولا‌راق، بونو دئییرم کی نه آذربایجان توپلومونا نه ده آذربایجان میللی حرکتینه بیر سیمگه و یا بایراق یاراتما کیمی تشببوس ایچری‌سینده اولمادیغیمی آچیق شکیلده ایفاده ائدیرم. بو تشببوس تکجه وارولان بیر گئرچه یه دستک وئرمک‌دیر.

 

۳. قیرمیزی رنگ ایرانداکی یاشیل رنگه قارشی اورتایا چیخمامیش‌دیر. قیرمیزی رنگ، یاشیل رنگ‌دن اؤنجه ده آذربایجان میللی حرکتی ایچری‌سینده یاواش یاواش بیر فئنومن (پدیده) حالینه گلن تراختور اویون‌لاریندا اؤز وارلیغینی اورتایا قویموش‌دور. تراختور اویون‌لارینی و اوردا سرگی‌لنن اولای‌لاری تکجه بیر فوتبول مسئله‌سی کیمی گؤرمک یانلیش‌دیر. بو منه گؤره بیر توپلومسال حرکت فرقلی شکیلده اؤز وارلیغینی او ساحه‌لرده گؤرستمه سیدیر.

اگر تراختور اویون‌لاری تکجه فوتبال اویونو اولسایدی، او قدر جمعیتین ایستادیوم‌لارا توپلاشماسی مومکون دئییلدی. ایکینجی اولا‌راق دا، ایستادیوملارداکی فوتبال شعارلارین‌دان داها چوخ، میللی شعارلار دیله گتیرلمکده‌دیر. اونون اوچون منه گؤره تراختور اویون‌لاری، آذربایجان توپلومون اؤز کیملیگینین هایقیردیغی و میللی ایستک‌لرینین سسلندیردیگی بیر ساحه‌دیر.

 

قیرمیزی رنگین بیر بایراق اولدوغونو دوشونمه دیگیم اوچون، بیر بایراغین او توپلومون تاریخی و کولتورل اؤزللیکلریندن دوغماسی گرکدیگی حاققیندادا بیر شئی دئمک ایسه میرم.

 

تنقیدلره قیسا جواب:

 

قیرمیزی رنگین بیر چوخ تشکیلات طرفیندن سیمگه اولماسینا دسته گی بعضی میللی فعاللار طرفیندن تنقیدلر ایه قارشیلانمیشدیر. البته کی بئله بیر اولایا تنقیدلرین اولاجاغی گؤزلنیلمک ده ایدی. تنقیدلر عمومی اولارق، بو سیمگه نین آنتی دموکراتیک شکیلده سئچیلمه سی، قیرمیزی رنگین کومونیست دوشونجه نی تمثیل اتئمه سی ... شکلینده دیر. اما تنقیدلر اؤز ایچریسنده بؤیوک یانلیشلیقلار و تضادلار گورستمکده دیر.

 

۱. دئیلیر کی بو سیمگه آنتی دموکراتیک شکیلده سئچیلیبدیر. بو سیمگه سئچیلمه ییب کی دموکراتیک و یا آنتی دموکراتیک شکیلده سئچیلسین. اگر بیر آنتی دموکراتیکلیک وارسا اون مینلرجه گونئی آذربایجان تورکونو کی بو سیمگه نی داشییرلار، آنتی دموکراتیک گؤرمه لیسینیز. یایینلانان بیلدیری ده آچیق شکیلده دئییلیر کی : بو بیاناتا ایمضا آتان‌لارین مقصدی کسینلیکله گونئی-ه و یا میللی حرکاتیمیزا هر هانسی بیر قوندارما سیمگه، بایراق و یا رنگ یاراتماق دئییل‌دیر. مقصدیمیز، گونئیده عمومی ایراده اساسیندا قال‌دیریلان تشببوسه تام دستک وئردیگیمیزی، میللی حرکات فعال‌لاری ایله همرای اولدوغوموزو ایفاده ائتمک‌دن عبارت‌دیر. آنتی دموکراتیک سئچیلدیگینی ادعا ائدنلر داها سونرا دا قیرمیزی رنگه قارشی چیقماقدادیرلار. یعنی اونلار اوچون مسئله دموکرات و آنتی دموکراتلیق دئییل، مسئله تکجه قارشی چیخماقدیر. او بیلدیری تکجه بیر دستک بیلدیریسیدیر. یا وئریلن دسته یه دستک وئره رسن یا وئرمزسن. اگر تنقید وارسا دا منطیقلی شکیلده اورتایا قویولار.

۲. تنقیدلرده بیریسی ده بو سیمگه نین کومونیزمی و دئوریمجیلیگی چاغیریشدیغیدیر. دئدیگیمیز کیمی تنقیدلر اؤز ایچیلرینده تضاد یاشاماقدادیرلار. چونکو بو ادعایی ائدنلر عینی زاماندا قیرمیزی رنگین، رنگلی دئوریملیرین دوامی اولدوغونو و بیزی ده آمئریکان آدامی اولما اتهامیمیز اولاجاقدیر. ایندی قیرمیزی رنگین کمونیزمی می سیمگه له دیگینی یوخسا آمئریکا نی می ( ایکی ترس قطب) سیمگه له دیگینی بیلمیریک. دونیادا قیرمیزی رنگین بیزی تمثیل ائتمه دیگینی ساونانلارا ایسه دئمه لییک کی: بوگون هئچ بیر بایراق ویا سیمگه بیزی دونیادا تمثیل ائده بیلمیز مگر او بایراغی و سیمگه یی بیرگه ( توپلوم ) صاحیبلنک. بیز هله تراختور اولاینی دونیادا انلاتا بیلمه میشیک کی بیر بایراق ایله اؤزوموزو دونیایا تانیداق.

آذربایجان میللی حرکتی نی دئوریمجی بیر حرکت دئییل دئمک، بیر حرکتین اؤزللیکلرینی و میللی حرکتلرین نه اولدوغونو بیلمه مکدن قایناقلانماقدایر. گونئی آذربایجان میللی حرکتی میللیتچی بیر حرکتی اولماسینین یانی سیرا عینی زاماندا دا دئوریمجی بیر حرکتدیر. گونئی آذربایجان میللی حرکتینین بو اؤزللیگی اونو گونوموزده کی دیگر میللیتچی حرکتلردن فرقلی قیلماقدادیر.

 

۳. بیر باشقا تنقید ایسه قیرمیزی رنگین میللی حرکتین تشکیلاتلاری طرفیندن دستکلنمه سی اونو سیاسی لاشدیراجاقدیر. بونون نتیجه سینده ایسه ایچریده کی میللی فعاللارا چتینلیک یاراداجاقدیر. بو ساخلاشیم منه گؤره محافظه کارانه بیر یاخلاشیمدیر. بوگون ایچریده قیرمیزی رنگی داشیان اونون ماهیتینین نه اولدوغونو بیلیر. بونو ایران حاکمیتی ده بیلیر. آز دئییل تراختور مسابقه لری سونراسی توتوقلامالار و یا تراختور تاخیمی نین فان کلوبونو ایشله دنلرین توتوقلانماسی. اونون اوچون بو تنقید ایچریده کی تراختور اویونلاریندا یارانان سیاسی فضانی بیلمه مکدن قایناقلانماقدادیر.

 

نتیجه اولاراق: بوگون گونئی آذربایجان-دا اینسانلاریمیزین اؤزلرینی ایفاده ائتمه سیمگه سی اولاراق قیرمیزی رنگ اورتایا چیخمیشدیر. اگر تراختور تاخیمی یئرینه، فولاد تاخیمی بئله بیر فئنومن اولا بیلسه ایدی، شوبهه سیز ماوی رنگ میللی سیمگه اولاراق توپلوموموز طرفیندن منیمسه نیردی. بو دورومدا آذربایجان میللی حرکتی ایچریسنده فعالیت ائدن تشکیلات و فعاللارین بو سیمگه یه بیرگه دستک وئرمه سی، آذربایجان میللی حرکتینده بیرلیک یاراتماق ایسته یه نلر اوچون بؤیوک بیر فورصت یارانمیشدیر. مگر سیمگه ویا بایراغین میللی حرکت ایچریسینده ان اؤنملی ایشله و لریندن بیریسی بیرلیک یاراتماق دئییل می؟ او زامان گلین ان آزیندان یارانان بو بیرلیگی داها دا گوجلندیرک. هامیمیز بیلیریک کی بو قیرمیزی رنگی داشییان سیمگه گونئی آذربایجانین بایراغی دئییل و اولابیلمیز.